Connect with us

cbn

ಲಂಕೇಶ್ ಮತ್ತು ಸಿನಿಮಾ…

Published

on

ಉತ್ತಮ ಸಾಹಿತ್ಯದ ಅಭಿರುಚಿ ಇರುವವರು ಮಾತ್ರ ಸದಭಿರುಚಿಯ ಸಿನಿಮಾಗಳನ್ನು ನೀಡಲು ಸಾಧ್ಯ. ಪಾತ್ರ ಪೋಷಣೆ ಮಾಡುವ ನಟರಿಗೆ ಹಾಗೂ ಪಾತ್ರಗಳನ್ನು ಸೃಷ್ಟಿಸುವ ಕಥೆಗಾರರಿಗೆ, ನಿರ್ದೇಶಕರಿಗಂತೂ ಸಾಹಿತ್ಯದ ಓದು ಅನಿವಾರ್ಯ. ಆದರೆ ಪ್ರಸ್ತುತ ಕನ್ನಡ ಚಿತ್ರರಂಗದಲ್ಲಿ ಇತಿಹಾಸ, ಸಾಹಿತ್ಯಗಳನ್ನು ಓದಿಕೊಂಡವರು ತೀರಾ ವಿರಳ.
ಸಾಹಿತಿ, ಬರಹಗಾರರಾಗಿದ್ದುಕೊಂಡು ಸಾಂಸ್ಕೃತಿಕ ಲೋಕಕ್ಕೆ ಹೊಸ ವಿಜನ್ ತಂದುಕೊಟ್ಟವರು ಲಂಕೇಶ್. ಇವತ್ತು ಲಂಕೇಶರು ಇದ್ದಿದ್ದರೆ 82 ವರ್ಷ ಪೂರೈಸುತ್ತಿದ್ದರು. ಭೌತಿಕವಾಗಿ ಅವರಿಲ್ಲದಿದ್ದರೂ, ಸಿನೆಮಾ ರಂಗದೊಂದಿಗೆ ಲಂಕೇಶರ ನಂಟನ್ನು ಒಮ್ಮೆ ಅವಲೋಕಿಸುವುದು ಜರೂರು.

ಪಿ. ಲಂಕೇಶರಿಗೂ ಚಿತ್ರರಂಗಕ್ಕೂ ಇದ್ದ ನಂಟು ಅಂದಿನಿಂದ ಇಂದಿನವರೆಗೂ ಒಂದಲ್ಲಾ ಒಂದು ರೀತಿಯಲ್ಲಿ ಮುಂದುವರೆದೇ ಇದೆ. ‘ಲಂಕೇಶ್ ಪತ್ರಿಕೆಯನ್ನು ಆರಂಭಿಸುವ ಮುನ್ನ ಸ್ವತಃ ನಾಲ್ಕು ಚಿತ್ರಗಳನ್ನು ನಿರ್ದೇಶಿಸಿ ರಾಷ್ಟ್ರ ಮತ್ತು ರಾಜ್ಯ ಪ್ರಶಸ್ತಿಗಳನ್ನು ಪಡೆದಿದ್ದ ಲಂಕೇಶರು ಆನಂತರ ‘ಪತ್ರಿಕೆ’ಯ ಒತ್ತಡದಿಂದಾಗಿ ಚಿತ್ರ ನಿರ್ದೇಶಿಸುವ ಉಸಾಬರಿಗೆ ಹೋದವರಲ್ಲ. ಆದರೂ ಅವರ ಪುತ್ರಿ ಕವಿತಾ ಲಂಕೇಶ್ ಅವರು ಲಂಕೇಶರ ಕಿರುಕಾದಂಬರಿ ‘ಅಕ್ಕ’ ಅನ್ನು ಆಧರಿಸಿ ‘ದೇವೀರಿ’ ಎಂಬ ಸಿನಿಮಾ ಮಾಡಿದಾಗ ಆ ಚಿತ್ರಕ್ಕೆ ಹಾಡುಗಳನ್ನು ಮತ್ತು ಹಲವು ಡೈಲಾಗ್‌ಗಳನ್ನು ಬರೆದಿದ್ದರು ಲಂಕೇಶ್.
ಅದೇನೇ ಇರಲಿ, ಇವತ್ತಿಗೂ ಸಿನಿಮಾ ಮಾಧ್ಯಮದಲ್ಲಿ ತಮ್ಮನ್ನು ತೊಡಗಿಸಿಕೊಂಡಿರುವ ಹಲವರು ಒಂದಲ್ಲಾ ಒಂದು ರೀತಿಯಲ್ಲಿ ಲಂಕೇಶರ ಪ್ರಭಾವಕ್ಕೆ ಒಳಗಾದವರು ಎಂದರೆ ಅತಶಯೋಕ್ತಿಯಲ್ಲ.

ಪತ್ರಿಕೆಯ ಆರಂಭದ ದಿನಗಳಲ್ಲಿ ಲಂಕೇಶರ ಒಡನಾಟದಲ್ಲಿದ್ದ ಟಿ.ಎನ್. ಸೀತಾರಾಮ್, ಸತ್ಯಮೂರ್ತಿ ಆನಂದೂರು, ಮಹಾಬಲ ಮೂರ್ತಿ ಕೋಡ್ಲುಕೆರೆ ತರಹದವರು ಇವತ್ತು ಕಿರುತೆರೆ ಮತ್ತು ಹಿರಿತೆರೆಗಳಲ್ಲಿ ತಮ್ಮದೇ ಆದ ಚಾಪನ್ನು ಅಥವಾ ಭಿನ್ನ ರೀತಿಯಲ್ಲಿ ಗುರುತಿಸಿಕೊಂಡಿರುವವರು.
ನಂತರದಲ್ಲಿ ಪತ್ರಿಕೆಯ ಬರಹಗಾರರಾಗಿ ದುಡಿದ ಎನ್.ಎಸ್. ಶಂಕರ್, ಬಿ.ಚಂದ್ರೇಗೌಡ, ರೇಖಾರಾಣಿ, ಪ್ರತಿಭಾ ನಂದಕುಮಾರ್ ಮುಂತಾದವರು ಲಂಕೇಶರ ಒಡನಾಟದಲ್ಲಿದ್ದುಕೊಂಡೇ ದೃಶ್ಯಮಾಧ್ಯಮಕ್ಕೆ ಧುಮುಕಿದವರು. ಇನ್ನು ಲಂಕೇಶರ ನೆಚ್ಚಿನ ಶಿಷ್ಯರಲ್ಲೊಬ್ಬರು ಮತ್ತು ಪತ್ರಿಕೆಯ ಹಿರಿಯ ವರದಿಗಾರರೂ ಆಗಿದ್ದ ಸದಾಶಿವ ಶೆಣೈ ಕೂಡಾ ಈಗಾಗಲೇ ಒಂದು ಸಿನಿಮಾದ ‘ಪ್ರಾರ್ಥನೆ’ ಮುಗಿಸಿದ್ದಾರೆ.
ಇನ್ನು ಮೇಷ್ಟ್ರನ್ನು ಬಹಳ ಹತ್ತಿರದಿಂದ ಕಂಡು ಮತ್ತು ಅವರ ಸ್ನೇಹ ಸಂಪಾದಿಸಿ, ನಂತರದ ದಿನಗಳಲ್ಲಿ ಚಿತ್ರರಂಗಕ್ಕೆ ಕಾಲಿಟ್ಟು ದೊಡ್ಡ ನಿರ್ದೇಶಕರೆನಿಸಿಕೊಂಡವರಲ್ಲಿ ನಾಗತಿಹಳ್ಳಿ ಚಂದ್ರಶೇಖರ್ ಕೂಡಾ ಪ್ರಮುಖರು.
ಇವತ್ತಿಗೆ ಕನ್ನಡ ಚಿತ್ರರಂಗದ ಅಪರೂಪದ ಗೀತಸಾಹಿತಿ, ಸಂಗೀತ ನಿರ್ದೇಶಕ ಮತ್ತು ನಿರ್ದೇಶಕರೂ ಆಗಿರುವ ವಿ. ಮನೋಹರ್ ಕೂಡಾ ಲಂಕೇಶ್ ಪಾಳಯದಲ್ಲಿ ಚಿಗುರಿದ ಪ್ರತಿಭೆಯೇ. ಒಂದು ಕಾಲದಲ್ಲಿ ‘ಲಂಕೇಶ್ ಪತ್ರಿಕೆ’ಯಲ್ಲಿ ಕಾರ್ಟೂನಿಸ್ಟ್ ಆಗಿ ಕಾರ್ಯನಿರ್ವಹಿಸಿದ ಮನೋಹರ್ ಪತ್ರಿಕೆಯ ಆಫೀಸಿಗೆ ಬರುವ ಸಿನಿಮಾ ಮಂದಿ ಯಾರಾದರೂ ಪರಿಚಯವಾಗಿ ಚಿತ್ರರಂಗದಲ್ಲಿ ತಮಗೊಂದು ಛಾನ್ಸು ಕೊಡಬಹುದು ಎಂಬ ಕಲ್ಪನೆಯಲ್ಲಿದ್ದರಂತೆ.
ಚಿತ್ರಸಾಹಿತಿ ಜಯಂತ ಕಾಯ್ಕಿಣಿ ಕೂಡಾ ಲಂಕೇಶ ನೆಚ್ಚಿನ ಸ್ನೇಹಿತರಲ್ಲೊಬ್ಬರು. ದಶಕಗಟ್ಟಲೆ ಬಾಂಬೆಯ ಕಂಪೆನಿಯೊಂದರಲ್ಲಿ ಉದ್ಯೋಗಕ್ಕಿದ್ದ ಕಾಯ್ಕಿಣಿ, ಆ ಸಂದರ್ಭದಲ್ಲಿ ಪತ್ರಿಕೆ ಮತ್ತು ಲಂಕೇಶರ ನಿಕಟ ಸಂಪರ್ಕದಲ್ಲಿದ್ದವರು.
ಇವರೆಲ್ಲ ಲಂಕೇಶರ ಆಪ್ತವಲಯದಲ್ಲಿದ್ದುಕೊಂಡೇ ದೃಶ್ಯಮಾಧ್ಯಮದ ಸೆಳೆತಕ್ಕೆ ಒಳಗಾದದವರು. ಆದರೆ ದೂರದಿಂದಲೇ ಲಂಕೇಶರ ಸಾಹಿತ್ಯ ಮತ್ತು ಬರವಣಿಗೆಯನ್ನು ಅಪಾರವಾಗಿ ಓದಿಕೊಂಡು, ಅವರ ಕೆಲವು ಚಿಂತನೆಗಳನ್ನು ತಮ್ಮ ಸಿನೆಮಾ, ನಟನೆಗಳಲ್ಲಿ ಅಳವಡಿಸಿಕೊಳ್ಳಲು ಉತ್ಸುಕರಾಗಿರುವ ಅನೇಕ ಯುವ ಪ್ರತಿಭೆಗಳು ಈಗ ನಮ್ಮ ಚಿತ್ರರಂಗದಲ್ಲಿ ಕಾಣಸಿಗುತ್ತಾರೆ.


ಇವತ್ತಿನ ಸ್ಟಾರ್ ನಿರ್ದೇಶಕ ಯೋಗರಾಜ್ ಭಟ್ ಲಂಕೇಶರ ಬರವಣಿಗೆಗಳನ್ನು ಓದುತ್ತಲೇ ಅದರ ಗುಂಗಿನಲ್ಲೇ ಬೆಳೆದವರು. ಇನ್ನೊಬ್ಬ ಯುವ ನಿರ್ದೇಶಕ ‘ದುನಿಯಾ’ ಸೂರಿಗೆ ಲಂಕೇಶರ ಬರವಣಿಗೆಗಳ ಬಗೆಗಿನ ವ್ಯಾಮೋಹ ಅದ್ಯಾವ ಪರಿ ಗೊತ್ತೆ? ಲಂಕೇಶರು ಭಾವಾನುವಾದಿಸಿರುವ ಚಾರ್ಲ್ಸ್ ಬೋದಿಲೇರನ ‘ಪಾಪದ ಹೂಗಳು ಕೃತಿಯನ್ನು ಈತ ಓದಿ ಓದಿ ಕಂಠಪಾಠ ಮಾಡಿಕೊಂಡಿರುವ ವ್ಯಕ್ತಿ.
ಇತ್ತೀಚೆಗಷ್ಟೇ ‘ಕಬೀರ ಸಿನೆಮಾವನ್ನು ನಿರ್ದೇಶಿಸಿದ್ದ ನರೇಂದ್ರ ಬಾಬು ಕೂಡ ಲಂಕೇಶರ ಪರಮಭಕ್ತ. ನರೇಂದ್ರ ಬಾಬು ಹಿಂದೊಮ್ಮೆ ಪಿಯುಸಿ ಮುಗಿಸಿದ ಮೇಲೆ ಡಿಗ್ರಿಗೆ ಸೇರಲು ಕಾಲೇಜಿನ ರಜೆಯಲ್ಲಿ ನಂಜುಂಡೇಗೌಡರ ‘ಚಿನ್ನದ ಚಂದ್ರಿಕೆ ಎಂಬ ಕಿರುಚಿತ್ರಕ್ಕೆ ಕಾಸ್ಟೂಮ್ ಡಿಸೈನರ್ ಆಗಿ ಕೆಲಸ ಮಾಡಿದ್ದರಂತೆ. ಕಡೆಗೆ ತಮ್ಮ ಕೆಲಸಕ್ಕೆ ಸಂಭಾವನೆ ಪಡೆದ ನರೇಂದ್ರ ಬಾಬು ಅದನ್ನು ಕಾಲೇಜಿಗೆ ಅಡ್ಮಿಷನ್ ಶುಲ್ಕ ಕಟ್ಟುವ ಬದಲು ಸೀದಾ ಹೋಗಿ ಲಂಕೇಶರ ‘ಟೀಕೆ ಟಿಪ್ಪಣಿ’, ‘ಸಮಗ್ರ ಕಥೆಗಳು’ ಮತ್ತಿತರ ಪುಸ್ತಕಗಳನ್ನು ಖರೀದಿಸಿದ್ದರಂತೆ.
ಲಂಕೇಶ್ ಬರಹಗಳ ಬಗ್ಗೆ ಉತ್ಕಟ ಅಭಿಮಾನವನ್ನು ಹೊಂದಿರುವ ನರೇಂದ್ರ ಬಾಬು ಲಂಕೇಶರ ‘ಸಂಕ್ರಾಂತಿ’, ‘ಕ್ರಾಂತಿ ಬಂತು, ಕ್ರಾಂತಿ’, ‘ಟಿ. ಪ್ರಸನ್ನನ ಗೃಹಸ್ಥಾಶ್ರಮ’ ನಾಟಕಗಳನ್ನೂ ನಿರ್ದೇಶಿಸಿರುವವರು. ಯಾವತ್ತಾದರೂ ಸರಿ, ಲಂಕೇಶರ ‘ಸ್ಟೆಲ್ಲಾ ಎಂಬ ಹುಡುಗಿಯನ್ನು ಸಿನೆಮಾ ಮಾಡಬೇಕು ಎಂಬ ಬಯಕೆ ಹೊಂದಿರುವ ಬಾಬುಗೆ “‘ಸಂಕ್ರಾಂತಿಯನ್ನು ನಾನು ನಿರ್ದೇಶಿಸಿದರೆ ಮಾತ್ರ ಜೆಸ್ಟಿಫೈ ಮಾಡಲು ಸಾಧ್ಯ” ಎಂಬ ಸಾತ್ವಿಕ ಅಹಂ ಕೂಡಾ ಇದೆ!
ಇನ್ನು ಇದೇ ನರೇಂದ್ರ ಬಾಬು ನಿರ್ದೇಶನದ ಲಂಕೇಶರ ನಾಟಕಗಳಲ್ಲಿ ಅಭಿನಯಿಸುತ್ತಲೇ ಚಿತ್ರರಂಗದಲ್ಲೂ ಅವಕಾಶ ಪಡೆದವರು ನಟ ಕಿಶೋರ್. ಹಾಗೆಯೇ ದಕ್ಷಿಣ ಭಾರತದ ಅದ್ಭುತ ನಟ ಎಂದೆನಿಸಿಕೊಂಡು ಹಲವಾರು ರಾಷ್ಟ್ರ ಮತ್ತು ರಾಜ್ಯಗಳಲ್ಲಿ ಪ್ರಶಸ್ತಿಗಳಿಗೆ ಭಾಜನರಾಗಿರುವ ಪ್ರಕಾಶ್ ರೈ ಕೂಡಾ ಲಂಕೇಶರ ಅಭಿಮಾನಿಯೇ. “ನಾನು ಲಂಕೇಶರ ನೇರ ಶಿಷ್ಯನಲ್ಲದಿದ್ದರೂ ಅವರ ಬರವಣಿಗೆ, ನಾಟಕಗಳು ನನ್ನನ್ನು ಪರೋಕ್ಷವಾಗಿ ಮತ್ತು ಅಪಾರವಾಗಿ ಪ್ರಭಾವಿಸಿದ್ದವು” ಎಂದು ರೈ ತಮ್ಮ ಅನೇಕ ಸಂದರ್ಶನ ಗಳಲ್ಲಿ ಹೇಳಿಕೊಳ್ಳುತ್ತಲೇ ಇರುತ್ತಾರೆ.
ಹಾಗೆಯೇ ಕನ್ನಡ ಸಿನಿಮಾಗಳಲ್ಲಿ ನಟಿಸುತ್ತಲೇ ಇಡೀ ಇಂಡಿಯಾ ಚಿತ್ರರಂಗವನ್ನು ಆಕರ್ಷಿಸಿದ ನಟ ಅನಂತ್ ನಾಗ್ ಕೂಡಾ ಲಂಕೇಶರ ಹತ್ತಿರದ ಸ್ನೇಹಿತರಾಗಿದ್ದವರು. ಅಷ್ಟೇ ಏಕೆ, ಲಂಕೇಶರ ಮಕ್ಕಳಾದ ಕವಿತಾ ಲಂಕೇಶ್ ಮತ್ತು ಇಂದ್ರಜಿತ್ ಕೂಡಾ ಈಗ ಸಿನೆಮಾ ಉದ್ಯಮದಲ್ಲೇ ನೆಲೆ ಕಂಡುಕೊಂಡಿದ್ದಾರೆ.
“ರಂಗಭೂಮಿಯಲ್ಲಿ ನಾನು ಕಿಟಕಿಯಿಂದ ಮಾತ್ರ ಪ್ರೀತಿ ಮಾಡುತ್ತಿದ್ದೆ, ಆದರೆ ಸಿನಿಮಾ ನನಗೆ ಮುಕ್ತವಾಗಿ ಪ್ರೀತಿಸುವುದನ್ನು ಕಲಿಸಿಕೊಟ್ಟಿತು” ಎಂದು ಸ್ವತಃ ಲಂಕೇಶರೇ ಹೇಳಿದ್ದಾಗಿ ಒಮ್ಮೆ ಟಿ.ಎನ್. ಸೀತಾರಾಮ್ ‘ಸೂತ್ರಧಾರ ಅನ್ನುವ ಪತ್ರಿಕೆಯೊಂದರಲ್ಲಿ ಬರೆದಿದ್ದರು.
ಹಾಗೆಯೇ ಲಂಕೇಶ್ ಮತ್ತವರ ಸಾಹಿತ್ಯವನ್ನು ಪ್ರೀತಿಸುವವರಿಗೆ ‘ಸಿನಿಮಾ ವನ್ನು ಸಂಕೀರ್ಣವಾಗಿ ನೋಡುವ ಶಕ್ತಿ ಮತ್ತು ಆಳವಾಗಿ ಅಭ್ಯಸಿಸುವ ಕ್ರಮವನ್ನು ಕಲಿಸಿಕೊಟ್ಟಿದೆ.

ಲಂಕೇಶ್ – ಪರಿಚಯ

ಲಕೇಶರು ಜನಿಸಿದ್ದು ಮಾರ್ಚ್ ೮ ೧೯೩೫. ಶಿವಮೊಗ್ಗೆಗೆ ೧೪.೪ ಕಿ.ಮೀ ದೂರದಲ್ಲಿರುವ ಕೊನಗವಳ್ಳಿ ಎಂಬ ಗ್ರಾಮದಲ್ಲಿ. ಶಿವಮೊಗ್ಗೆಯ ಇಂಟರ್ ಮೀಡಿಯಟ್ ಕಾಲೇಜ್ (೧೯೫೩-೫೫)ನಲ್ಲಿ ಇಂಟರ್ ಮೀಡಿಯಟ್; ಬೆಂಗಳೂರಿನ ಸೆಂಟ್ರಲ್ ಕಾಲೇಜ್ (೧೯೫೫-೫೮) ನಲ್ಲಿ ಇಂಗ್ಲಿಷ್ ಆನರ‍್ಸ್; ಬೆಂಗಳೂರು ಸೆಂಟ್ರಲ್ ಕಾಲೇಜಿನಲ್ಲಿ ಇಂಗ್ಲಿಷ್ ಎಂ.ಎ. (೧೯೫೮-೫೯)
೧೯೫೯ರಿಂದ ೧೯೬೨ರವರೆಗೆ ಶಿವಮೊಗ್ಗೆಯ ಸಹ್ಯಾದ್ರಿ ಕಾಲೇಜ್‌ನಲ್ಲಿ ಅಧ್ಯಾಪಕ. ಆಮೇಲೆ ಸೆಂಟ್ರಲ್ ಕಾಲೇಜಿನಲ್ಲಿ ಮೂರು ವರ್ಷ (೧೯೬೨-೬೫), ಸರ್ಕಾರಿ ಫಸ್ಟ್ ಗ್ರೇಡ್ ಕಾಲೇಜಿನಲ್ಲಿ ಒಂದು ವರ್ಷ ಮತ್ತು ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ ಹನ್ನೆರಡು ವರ್ಷ (೧೯೬೬-೭೮) ಅಧ್ಯಾಪಕ. ೧೯೭೮ರಲ್ಲಿ ಅಧ್ಯಾಪಕ ವೃತ್ತಿಗೆ ರಾಜೀನಾಮೆ. ೧೯೭೭ರಲ್ಲಿ ‘ಪಲ್ಲವಿ ಚಿತ್ರ ನಿರ್ದೇಶನ, ೧೯೮೦ರಲ್ಲಿ ನಾಲ್ಕನೆಯ ಚಿತ್ರ ‘ಎಲ್ಲಿಂದಲೋ ಬಂದವರು ಬಿಡುಗಡೆ. ೧೯೮೦ರಲ್ಲಿ ‘ಲಂಕೇಶ್ ಪತ್ರಿಕೆಯ ಆರಂಭ. ಲಂಕೇಶರ ಸಂಪೂರ್ಣ ವಿವರ ಅವರದ್ದೇ ಆತ್ಮಕತೆ ಹುಳಿಮಾವಿನಮರ ದಲ್ಲಿ ಸಿಗುತ್ತದೆ. ಲಂಕೇಶರು ಪ್ರಪಂಚದ ಸಿನಿಮಾಗಳ ಬಗ್ಗೆ ಬರೆದ ಲೇಖನಗಳು ‘ಈ ನರಕ ಈ ಪುಲಕ ಹೆಸರಿನಲ್ಲಿ ಪುಸ್ತಕವಾಗಿದೆ.

cbn

ಅನುಕ್ತ: ಕ್ರೈಂ ಥಿಲ್ಲರ್ ಕಥೆಗಿದೆ ಭೂತ ಕೋಲದ ನಂಟು!

Published

on


ಸ್ಯಾಂಡಲ್‌ವುಡ್‌ಗೆ ಹೊಸಾ ಪ್ರತಿಭೆಗಳ ಆಗಮನವಾಗುತ್ತಾ, ಹೊಸಾ ಅಲೆಯ ಚಿತ್ರಗಳ ಸಂಖ್ಯೆಯೂ ಅಧಿಕವಾಗುತ್ತಿದೆ. ಈಗ ಇಂಥಾ ಪ್ರತಿಭಾನ್ವಿತರೇ ಸೇರಿ ರೂಪಿಸಿರೋ ಅನುಕ್ತ ತೆರೆಗಾಣಲು ರೆಡಿಯಾಗಿದೆ. ಈ ಸಿನಿಮಾ ಮೂಲಕ ಕಿರುತೆರೆಯಲ್ಲಿ ಗುರುತಿಸಿಒಕೊಂಡ ಇದ್ದ ಕಾರ್ತಿಕ್ ಅತ್ತಾವರ್ ನಾಯಕನಾಗಿ ಪಾದಾರ್ಪಣೆ ಮಾಡಿದ್ದಾರೆ. ಇವರಿಗೆ ಜೋಡಿಯಾಗಿ ಸಂಗೀತಾ ಭಟ್ ಅಭಿನಯಿಸಿದ್ದಾರೆ.

ಅನುಕ್ತ ಕ್ರೈಂ ಥಗರಿಲ್ಲರ್ ಕಥಾ ಹಂದರ ಹೊಂದಿರುವ ಚಿತ್ರ. ಇದನ್ನು ಮಂಗಳೂರು  ಮೂಲದ ಅಶ್ವತ್ಥ್ ಸ್ಯಾಮುಯಲ್ ನಿರ್ದೇಶನ ಮಾಡಿದ್ದಾರೆ. ಕರಾವಳಿ ಮೂಲದವರಾದ ಹರೀಶ್ ಬಂಗೇರ ನಿರ್ಮಾಣ ಮಾಡಿದ್ದಾರೆ. ಈ ಮೂಲಕ ಹೊಸಾ ತಂಡವೊಂದು ಅನುಕ್ತ ಮೂಲಕ ಕನ್ನಡ ಚಿತ್ರರಂಗಕ್ಕೆ ಪಾದವೂರಿದೆ. ಅನುಕ್ತ ಸಿನಿಮಾ ಮೂಲಕವೇ ಕಾಲೂರಿ ನಿಲ್ಲುವ, ಮತ್ತಷ್ಟು ಚಿತ್ರಗಳನ್ನು ತಯಾರು ಮಾಡುವ ಉತ್ಸಾಹದಿಂದಿದೆ.

ಈ ಸಿನಿಮಾದ್ದು ವಿಶಿಷ್ಟವಾದ ಜಾಡು. ತುಳುನಾಡಿನ ಸಂಸ್ಕೃತಿಯ ಭಾಗವಾದ ಭೂತ ಕೋಲ ಸೇರಿದಂತೆ ಎಲ್ಲವೂ ಇಲ್ಲಿದೆ. ಅದನ್ನೆಲ್ಲ ಕ್ರೈಂ ಥ್ರಿಲ್ಲರ್ ಕಥಾನಕಕ್ಕೆ ಬ್ಲೆಂಡ್ ಮಾಡಲಾಗಿದೆಯಂತೆ. ಆದ್ದರಿಂದಲೇ ಇಡೀ ಚಿತ್ರೀಕರಣ ಕರಾವಳಿ ಭಾಗದಲ್ಲಿಯೇ ನಡೆದಿದೆ. ಇದೆಲ್ಲದರ ನಡುವೆಯೇ ಕನಸಿಗೆ ಅರ್ಥವನ್ನೂ ಹುಡುಕ ಹೊರಟಿರೋ ಅನುಕ್ತ ಇಪ್ಪತ್ತೆಂಟು ದಿನಗಳಲ್ಲಿಯೇ ಸಂಪೂರ್ಣ ಚಿತ್ರೀಕರಣ ಮುಗಿಸಿಕೊಂಡಿದೆ.

ಹೀಗೆ ವೇಗವಾಗಿ ಚಿತ್ರೀಕರಣ ಮುಗಿಸಿಕೊಳ್ಳೋದಕ್ಕೆ ಕಾರಣ ಪ್ಲಾನಿಂಗ್. ಕೇವಲ ಇಪ್ಪತ್ತೆಂಟು ದಿನಗಳಲ್ಲಿ ಚಿತ್ರೀಕರಣ ಸಮಾಪ್ತಿ ಮಾಡಿಕೊಂಡಿದ್ದರ ಹಿಂದೆ ಎಂಟು ತಿಂಗಳ ಶ್ರಮವಿದೆಯಂತೆ. ತುಳುನಾಡಿನ ಸಂಸ್ಕ್ರತಿ ಅಂದರೆ ಮೊಗೆದಷ್ಟೂ ಮುಗಿಯದ ಅಕ್ಷಯ ಪಾತ್ರೆಯಂಥಾದ್ದು. ಈ ಬಗ್ಗೆ ಪ್ರೇಕ್ಷಕರ ಕೌತುಕ ತಣಿಯುವುದೇ ಇಲ್ಲ. ಅಂಥಾದ್ದರಲ್ಲಿ ಅದನ್ನೇ ಜೀವಾಳವಾಗಿಸಿಕೊಂಡಿರೋ ಅನುಕ್ತ ಬಗ್ಗೆ ಸಹಜವಾಗಿಯೇ ಪ್ರೇಕ್ಷಕರು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಈಗ ಬೇರೆ ಭಾಷೆಗಳಿಗೂ ರೀಮೇಕ್‌ಗಾಗಿ ಬಹು ಬೇಡಿಕೆ ಹೊಂದಿರುವ ಅನುಕ್ತ ಬಿಡುಗಡೆಗೆ ಸಜ್ಜುಗೊಂಡಿದೆ.

Continue Reading

cbn

ಬಿಲ್ಲಾ ರಂಗ ಭಾಷಾ: ಮೂರು ಅವತಾರದಲ್ಲಿ ಮಿಂಚಲಿದ್ದಾರಾ ಸುದೀಪ್?

Published

on


ರಂಗಿತರಂಗ ಖ್ಯಾತಿಯ ಅನೂಪ್ ಭಂಡಾರಿ ಸುದೀಪ್ ಚಿತ್ರವನ್ನು ನಿರ್ದೇಶನ ಮಾಡಲಿದ್ದಾರೆಂಬ ಸುದ್ದಿಗೆ ಎರಡ್ಮೂರು ವರ್ಷ ತುಂಬಿದೆ. ಇಷ್ಟೊಂದು ಕಾಲಾವಧಿಯ ನಂತರ ಅದೀಗ ನಿಜವಾಗಿದೆ. ಈ ಚಿತ್ರಕ್ಕೆ ಬಿಲ್ಲಾ ರಂಗ ಭಾಷಾ ಎಂಬ ಶೀರ್ಷಿಕೆಯೂ ನಿಗಧಿಯಾಗಿ ಅನಾವರಣಗೊಂಡಿದೆ.

ಬಿಲ್ಲಾ ರಂಗ ಭಾಷಾ ಎಂಬ ಶೀರ್ಷಿಕೆ ಕಂಡೇ ಸುದೀಪ್ ಅಭಿಮಾನಿ ಬಳಗ ಖುಷಿಗೊಂಡಿದೆ. ಇದರ ಬೆನ್ನಲ್ಲಿಯೇ ಒಂದಷ್ಟು ಕುತೂಹಲ ಬೆರೆತ ಗೊಂದಲಗಳೂ ಕಾಡಲಾರಂಭಿಸಿವೆ. ಇದರಲ್ಲಿ ಕಿಚ್ಚಾ ಸುದೀಪ್ ಮೂರು ಪಾತ್ರಗಳಲ್ಲಿ ಅಭಿನಯಿಸಲಿದ್ದಾರಾ? ಶೀರ್ಷಿಕೆಯಲ್ಲಿರುವಂತೆ ಮೂರು ಪಾತ್ರಗಳು ಈ ಸಿನಿಮಾದಲ್ಲಿ ಇರಲಿದ್ದಾವಾ ಅಂತೆಲ್ಲ ಪ್ರಶ್ನೆಗಳು ಅಭಿಮಾನಿಗಳಲ್ಲಿವೆ.

 

ಆದರೆ ಅನೂಪ್ ಭಂಡಾರಿ ಅಪ್ಪಿ ತಪ್ಪಿಯೂ ಈ ವಿಚಾರದ ಬಗ್ಗೆ ಬಾಯಿ ಬಿಟ್ಟಿಲ್ಲ. ಆದರೆ ಕನ್ನಡ ಚಿತ್ರರಂಗದ ಪಾಲಿಗೆ ಈ ಚಿತ್ರವನ್ನು ವಿಭಿನ್ನವಾಗಿ ನೆಲೆಗಾಣಿಸೋ ಉತ್ಸಾವಂತೂ ಅವರಲ್ಲಿ ಸ್ಪಷ್ಟವಾಗಿಯೇ ಕಾಣಿಸುತ್ತಿದೆ. ರಂಗಿತಂರಂಗ ಮೂಲಕ ಭರ್ಜರಿ ಗೆಡಲುವು ದಾಖಲಿಸಿದ್ದ ಅನೂಪ್ ಎರಡನೇ ಚಿತ್ರವಾದ ರಾಜರಥದಲ್ಲಿ ಮುಗ್ಗರಿಸಿದ್ದರು. ಭಾರೀ ನಿರೀಕ್ಷೆ ಹುಟ್ಟಿಸಿದ್ದ ಈ ಚಿತ್ರ ಸೋತಿತ್ತು.

ಈ ಸೋಲಿನಿಂದ ಪಾಠ ಕಲಿತಿರೋ ಅನೂಪ್ ಬಿಲ್ಲಾ ರಂಗ ಭಾಷ ಮೂಲಕ ಮತ್ತೆ ಎದ್ದು ನಿಲ್ಲುವ ಹುರುಪಿನೊಂದಿಗೆ ತಯಾರಾಗಿದ್ದಾರೆ. ಕಿಚ್ಚಾ ಸುದೀಪ್ ಕೂಡಾ ಸರಿಯಾಗಿಯೇ ಸಾಥ್ ನೀಡಿದ್ದಾರೆ. ಈ ಬಗೆಗಿನ ಮತ್ತಷ್ಟು ಮಾಹಿತಿಗಳನ್ನು ಅನೂಪ್ ಇಷ್ಟರಲ್ಲಿಯೇ ಜಾಹೀರು ಮಾಡಲಿದ್ದಾರೆ.

Continue Reading

cbn

ಜೀ ಕನ್ನಡದಲ್ಲಿ ಹಾರರ್ ಆತ್ಮಬಂಧನ

Published

on

ಕಳೆದ ಹಲವು ವರ್ಷಗಳಿಂದಲೂ ಜೀ ಕನ್ನಡ ವಾಹಿನಿ ಸದಾ ತನ್ನ ಕಾರ್ಯಕ್ರಮ ಕಟ್ಟಿಕೊಡುವಲ್ಲಿ ಹೊಸತನವನ್ನು ಮೈಗೂಡಿಸಿಕೊಳ್ಳುವ ಮೂಲಕ ವೀಕ್ಷಕರಿಗೆ ಹೆಚ್ಚು ಹೆಚ್ಚು ಹತ್ತಿರವಾಗುತ್ತಿದೆ. ಜೋಡಿ ಹಕ್ಕಿ, ಸುಬ್ಬಲಕ್ಷ್ಮಿಸಂಸಾರ, ಕಮಲಿ, ಯಾರೆ ನೀ ಮೋಹಿನಿ, ವಿಷ್ಣು ದಶಾವತಾರ, ಮಹಾದೇವಿ, ನಾಗಿಣಿ, ಪಾರು, ಬ್ರಹ್ಮಗಂಟು ಮೊದಲಾದ ಧಾರಾವಾಹಿಗಳು ಹೊಸ ಇತಿಹಾಸ ಬರೆದಿವೆ. ವಾರಾಂತ್ಯ ಧಾರಾವಾಹಿ ಉಘೇ ಉಘೇ ಮಾದೇಶ್ವರ, ಅಲ್ಲದೆ ಸರಿಗಮಪ, ಡ್ರಾಮಾದಂಥ ರಿಯಾಲಿಟಿ ಷೊಗಳು ಕನ್ನಡಿಗರ ಮನೆಮಾತಾಗಿವೆ.

ಇದೀಗ ಜೀ ಕನ್ನಡ ವಾಹಿನಿಯಲ್ಲಿ ಆತ್ಮಬಂಧನ ಎಂಬ ಮತ್ತೊಂದು ಹಾರರ್ ಧಾರಾವಾಹಿ ಮೂಡಿಬರಲಿದೆ. ಜನನ ಮತ್ತು ಮರಣದ ಸಾಕ್ಷಿ ಆತ್ಮ. ಮರಣಾ ನಂತರವೂ ಆತ್ಮ ತನ್ನ ಪ್ರೀತಿ ಮತ್ತು ದ್ವೇಷವನ್ನು ಬಿಡುವುದಿಲ್ಲ ಎಂಬುದು ಸಾಮಾನ್ಯ ನಂಬಿಕೆ. ಈ ಎಳೆಯನ್ನು ಇಟ್ಟುಕೊಂಡು ತಾಯಿ ಮತ್ತು ಪುಟ್ಟ ಮಗನ ನಡುವಿನ ಬಾಂಧವ್ಯದ ಹಿನ್ನೆಲೆಯಲ್ಲಿ ಆತ್ಮಬಂಧನ ಧಾರಾವಾಹಿಯನ್ನು ನಿರೂಪಿಸಲಾಗುತ್ತಿದೆ. ದುರಂತದಲ್ಲಿ ಮರಣವನ್ನಪ್ಪುವ ಮಗನ ಆತ್ಮ ತನ್ನ ಅಮ್ಮನ ಪ್ರೀತಿಗಾಗಿ ಹಂಬಲಿಸಿ ಬರುವ ಮತ್ತು ಆ ಪ್ರೀತಿಗೆ ಅಡ್ಡ ಬರುವವರನ್ನು ಶಿಕ್ಷಿಸುವ ಕಥಾಹಂದರ ಇದರಲ್ಲಿದೆ. ಈ ಹಿನ್ನೆಲೆಯಲ್ಲಿ ಕೌಟುಂಬಿಕ ಪ್ರೀತಿ-ದ್ವೇಷಗಳು ಹಾಗೂ ಪತಿ-ಪತ್ನಿಯರ ಸಂಬಂಧದ ನಡುವೆ ಏಳುವ ಬಿರುಗಾಳಿ ಹೊಸ ಬಗೆಯಲ್ಲಿ ನಿರೂಪಿತವಾಗಿದೆ. ಈ ಧಾರಾವಾಹಿಯನ್ನು ನಿರ್ದೇಶಕ ಜಿ.ಕೆ. ಸತೀಶ್ ಕೃಷ್ಣನ್ ನಿರ್ದೇಶಿಸುತ್ತಿದ್ದಾರೆ. ದ್ವಿಜ ಕ್ರಿಯೇಷನ್ಸ್ ಅಡಿಯಲ್ಲಿ ಮಹೇಶ್ ಗೌಡ, ಡಾ| ಸುಮಾ ಈ ಧಾರಾವಾಹಿಯನ್ನು ನಿರ್ಮಿಸುತ್ತಿದ್ದಾರೆ. ಇದರ ಕಥಾವಿಸ್ತರಣೆ, ಚಿತ್ರಕತೆಯನ್ನು ಎಸ್. ಸೆಲ್ವಂ ಮತ್ತು ಗಿರೀಶ್ ತಂಡ ನಿರ್ವಹಿಸಿದೆ. ರತ್ನಗಿರಿ ಅವರ ಸಂಭಾಷಣೆ, ವಿನಯ್ ಅವರ ಸಂಗೀತ, ಹರ್ಷಪ್ರಿಯ ಅವರ ಶೀರ್ಷಿಕೆ ಸಾಹಿತ್ಯ ಇದಕ್ಕಿದೆ. ಎದೆಯಲ್ಲಿ ಕಂಪನ ಹುಟ್ಟಿಸುವ ಗ್ರಾಫಿಕ್ಸ್ ಪ್ರತಿ ಸಂಚಿಕೆಯಲ್ಲೂ ವೀಕ್ಷಕರಿಗೆ ಹೊಸ ಅನುಭವ ನೀಡಲಿದೆ.

ಆತ್ಮಬಂಧನ ವೀಕ್ಷಕರಿಗೆ ಮನರಂಜನೆಯ ಹೊಸ ಬಾಗಿಲು ತೆರೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸುತ್ತಾರೆ ಜೀ ಕನ್ನಡ ವಾಹಿನಿಯ ಬಿಸ್ನೆಸ್ ಹೆಡ್ ರಾಘವೇಂದ್ರ ಹುಣಸೂರು. ಎಲ್ಲ ವಯೋಮಾನದವರನ್ನೂ ಗಮನದಲ್ಲಿರಿಸಿಕೊಂಡು ಕುಟುಂಬ ಸಮೇತ ನೋಡುವಂತೆ ಈ ಹಾರರ್ ಧಾರಾವಾಹಿ ರೂಪಿಸಿದ್ದೇವೆ ಎನ್ನುತ್ತಾರೆ ನಿರ್ದೇಶಕ ಜಿ.ಕೆ. ಸತೀಶ್ ಕೃಷ್ಣನ್. ತಾರಾಗಣದಲ್ಲಿ ರಜನಿ, ಪ್ರಶಾಂತ್, ಬಾಲನಟ ಆಲಾಪ್, ಶಿವಾನಿ, ಲಕ್ಷ್ಮೀಗೌಡ, ರಾಮಮೂರ್ತಿ, ರಾಜೇಶ್, ನೇತ್ರಾ ಸಿಂಧ್ಯಾ, ಸುನೇತ್ರ ಪಂಡಿತ್ ಮುಂತಾದವರಿದ್ದಾರೆ. ಜೀ ಕನ್ನಡ ವಾಹಿನಿಯಲ್ಲಿ ಡಿಸೆಂಬರ್ ೧೭ ರಿಂದ ಸೋಮ-ಶುಕ್ರವಾರ ರಾತ್ರಿ ೧೦:೩೦ಕ್ಕೆ ಆತ್ಮಬಂಧನ ಪ್ರಸಾರವಾಗಲಿದೆ.

Continue Reading

Trending

Copyright © 2018 Cinibuzz