Connect with us

ಸಂದರ್ಶನ

ನಡುವೆ ಅಂತರವಿರಲಿ ಅಂದ ಐಶಾನಿ ಶೆಟ್ಟಿ ಮಾತಾಡಿದಾಗ..!

Published

on

ಯೋಗರಾಜ್ ಭಟ್ ನಿರ್ದೇಶನದ ವಾಸ್ತುಪ್ರಕಾರ ಚಿತ್ರದ ಮೂಲಕ ನಾಯಕಿಯಾಗಿ ಶೈನಪ್ ಆದರವರು ಐಶಾನಿ ಶೆಟ್ಟಿ. ಆ ನಂತರ ನೀನಾಸಂ ಸತೀಶ್ ಜೊತೆ ರಾಕೆಟ್ ಚಿತ್ರದಲ್ಲಿ ನಟಿಸಿದ್ದ ಐಶಾನಿ ಆ ನಂತರ ಕಾಣಿಸಿಕೊಂಡಿದ್ದು ಅವರೇ ನಿರ್ದೇಶನ ಮಾಡಿದ್ದ `ಕಾಜಿ’ ಎಂಬ ಕಿರುಚಿತ್ರದ ಮೂಲಕ. ಈ ಚಿತ್ರವೀಗ ಅಂತಾರಾಷ್ಟರೀಯ ಚಿತ್ರೋತ್ಸವಕ್ಕೆ ಆಯ್ಕೆಯಾಗಿ, ಒಂದಷ್ಟು ಪ್ರಶಸ್ತಿಗಳನ್ನೂ ಬಾಷಿಕೊಂಡಿದೆ. ಇದೇ ಹೊತ್ತಲ್ಲ ಜರ್ನಲಿಸಂ ಮಾಸ್ ಕಮ್ಯೂನಿಕೇಷನ್ ಅನ್ನೂ ಮುಗಿಸಿಕೊಂಡಿರೋ ಐಶಾನಿ `ನಡುವೆ ಅಂತರವಿರಲಿ’ ಚಿತ್ರದ ನಾಯಕಿಯಾಗಿ ರೀಎಂಟ್ರಿ ಕೊಟ್ಟಿದ್ದಾರೆ. ಸಿನಿಬಜ಼್ ಜೊತೆ ಮಾತಿಗೆ ಸಿಕ್ಕ ಐಶಾನಿ ತಮ್ಮ ಕನಸು, ಚಿತ್ರ, ಬದುಕಿನ ಬಗ್ಗೆ ಹಲವಾರು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ…

ಒಂದು ಸುದೀರ್ಘವಾದ ಮಧ್ಯಂತರದ ನಂತರ ನಡುವೆ ಅಂತರವಿರಲಿ ಚಿತ್ರದ ನಾಯಕಿಯಾಗಿದ್ದೀರಿ. ಈ ಚಿತ್ರ ನಿಮ್ಮ ಪಾಲಿಗೆ ಹೇಗೆ ವಿಶೇಷ?

– ನಡುವೆ ಅಂತರವಿರಲಿ ಚಿತ್ರ ನನಗೆ ಹೇಗೆ ವಿಶೇಷ ಅನ್ನೋದಕ್ಕಿಂತ ಇಡೀ ಚಿತ್ರವೇ ವಿಶೇಷವಾಗಿದೆ. ಇದರ ಕಥೆಯೂ ಭಿನ್ನವಾಗಿದೆ. ಇದೊಂದು ಲವ್ ಸ್ಟೋರಿ, ಹಾಗಂತ ಮಾಮೂಲಿ ಸ್ಟೈಲಿನ ಲವ್ ಸ್ಟೋರಿಯಲ್ಲ. ಇಲ್ಲಿ ಕಾಲೇಜು ಬದುಕಿನ ಮೂಲಕ ಯುವ ಮನಸುಗಳ ಭಾವೋದ್ವೇಗ, ಒತ್ತಡ, ತಲ್ಲಣಗಳತ್ತ ಪ್ರಧಾನವಾಗಿ ಫೋಕಸ್ ಮಾಡಲಾಗಿದೆ. ಬರೀ ಯುವ ಸಮೂಹಕ್ಕೆ ಮಾತ್ರವಲ್ಲದೆ ಪೋಷಕರಿಗೂ ಇಷ್ಟವಾಗುವಂತಿದೆ. ಬದುಕಿನ ಮೌಲ್ಯಗಳನ್ನೂ ಇದರ ಕಥೆ ತೆರೆದಿಡುತ್ತೆ. ಟೀನೇಜಲ್ಲಿ ಪ್ರೀತಿ, ಪ್ರೇಮದ ಹಿಂದೆ ಬಿದ್ದಾಗ ಮನಸು ಯಾವುದೋ ಲೋಕದಲ್ಲಿ ತೇಲಾಡ್ತಾ ಬ್ಲೈಂಡ್ ಆಗುತ್ತಲ್ಲಾ? ಅಂಥಾ ಸ್ಥಿತಿ ವಾಸ್ತವವನ್ನ ಮುಖಾಮುಖಿಯಾದಾಗಿನ ಪಲ್ಲಟಗಳನ್ನ ಈ ಚಿತ್ರದ ಮೂಲಕ ದಾಖಲಿಸಲಾಗಿದೆ. ಇದು ಎಲ್ಲರಿಗೂ ಇಷ್ಟವಾಗುವಂಥಾ ಚಿತ್ರ.

ನಿಮಗೆ ಈ ಸಿನಿಮಾ ಕಥೆ ಯಾಕಾಗಿ ಇಷ್ಟವಾಯ್ತು?

– ನನಗೆ ಫೀಲ್ ಆಗಿದ್ದು ಈ ಚಿತ್ರದ ಕಥೆ ಮತ್ತು ಕ್ಲೈಮ್ಯಾಕ್ಸ್. ಅದು ಎಲ್ಲರ ಮನಸಲ್ಲೂ ಉಳಿದುಕೊಳ್ಳುತ್ತೆ. ನಮ್ಮನ್ನು ನಾವೇ ಪ್ರಶ್ನೆ ಮಾಡಿಕೊಳಖ್ಳುವಂಥಾ ಸಂದರ್ಭ ಸೃಷ್ಟಿಸುತ್ತೆ. ಇದರಲ್ಲಿನ ಪಾತ್ರ ನನ್ನ ವಯೋಮಾನಕ್ಕೆ ಹತ್ತಿರಾಗುವಂಥಾದ್ದು. ಅದಲ್ಲದೆ ನಟನೆಗೂ ಹೆಚ್ಚಿನ ಅವಕಾಶವಿತ್ತು. ಮಧ್ಯಮವರ್ಗದ ಸಿಂಪಲ್ ಹುಡುಗಿಯ ಥರ ಥರದ ಶೇಡುಗಳಿರೋ ಪಾತ್ರವನ್ನಿಲ್ಲಿ ನಾನು ಮಾಡಿದ್ದೇನೆ.

ನೀವು ಚಿತ್ರರಂಗಕ್ಕೆ ಬಂದು ನಾಲಕ್ಕು ವರ್ಷವಾಯ್ತು. ಇದು ನಿಮ್ಮ ನಾಲಕ್ಕನೇ ಸಿನಿಮಾ. ಇದು ಕಡಿಮೆ ಅನ್ನಿಸಲ್ವಾ?

– ನನಗೇನೂ ಕಮ್ಮಿ ಅನ್ನಿಸಲ್ಲ. ವಾಸ್ತುಪ್ರಕಾರ ಚಿತ್ರದ ನಂತರ ತುಂಬಾ ಅವಕಾಶಗಳು ಬರಲಾರಂಭಿಸಿದ್ದವು. ಆದ್ರೆ ಇಂಥಾ ಬ್ರೇಕ್ ಸಿಕ್ಕಿದಾಗ, ಆ ಮೂಲಕ ಅವಕಾಶಗಳು ಬರಲಾರಂಭಿಸಿದಾಗ ಯಾರೂ ಅದನ್ನ ಬಿಡಲು ಮನಸು ಮಾಡೋದಿಲ್ಲ. ಆದ್ರೆ ನಂಗೆ ನನ್ನ ಎಜುಕೇಷನ್ ಮುಖ್ಯ ಅನ್ನಿಸ್ತು. ಡಿಗ್ರಿ ಕಂಪ್ಲೀಟ್ ಮಾಡಿ ಮಾಸ್ಟರ್‍ಸ್ ಮಾಡಬೇಕನ್ನೋ ಆಸೆ ಇತ್ತು. ಅದರಂತೆಯೇ ಸೇಂಟ್ ಜೋಸೆಫ್ಸ್ ಕಾಲೇಜಿನಲ್ಲಿ ಮಾಸ್ ಕಮ್ಯೂನಿಕೇಷನ್ ಜರ್ನಲಿಸಂ ಮಾಡಲಾರಂಭಿಸಿದೆ. ನಡುವೆ ಅಂತರವಿರಲಿ ಚಿತ್ರದ ಕಥೆ ನನಗೆ ಸಿಕ್ಕಿದ್ದು ಆವಾಗಲೇ. ಕಥೇ ಕೇಳಿದೆ. ತುಂಬಾ ಇಷ್ಟ ಆಯ್ತು. ಆದ್ರೆ ಆಗ ತುಂಬಾ ಓದೋಕಿದ್ದಿದ್ದರಿಂದ ತಕ್ಷಣಕ್ಕೆ ನಟಿಸಲು ಒಪ್ಪಿಕೊಳ್ಳೋಕೆ ಸಾಧ್ಯವಿರಲಿಲ್ಲ. ಸಿನಿಮಾ ಕೆರಿಯರ್ ಸ್ವಲ್ಪ ನಿಧಾನವಾದರೂ ಪರವಾಗಿಲ್ಲ ಅಂತ ತೀರ್ಮಾನಿಸಿ ಓದೋದರತ್ತ ಗಮನ ಹರಿಸಿದೆ. ಈಗ ಓದು ಮುಗಿಸಿಕೊಂಡು ಮತ್ತೆ ನಟನೆಯತ್ತ ಮರಳಿದ್ದೇನೆ.

ನಿಮ್ಮ ಪೋಷಕರಿಗೆ ನೀವು ನಟಿಯಾಗೋದು ಇಷ್ಟವಿದೆಯಾ? ಅವರ ಸಹಕಾರ ಹೇಗಿದೆ?

– ನಾನು ಸಿನಿಮಾ ರಂಗಕ್ಕೆ ಬರಲು ಕಾರಣ ನಮ್ಮ ತಂದೆಯವರೇ. ನನ್ನ ತಂದೆ ಸಿದ್ಧಾರ್ಥ ಶೆಟ್ಟಿ ನಾರಾಯಣ ಹೃದಯಾಲಯದಲ್ಲಿ ವರ್ಕ್ ಮಾಡ್ತಿದ್ದಾರೆ. ಅವರಿಗೆ ಸಿನಿಮಾದವರು ಪರಿಚಯ ಇದ್ದದ್ದರಿಂದ ಮೊದಲ ಸಿನಿಮಾ ಅವಕಾಶ ಸಿಕ್ಕಿತ್ತು. ನಂಗೆ ನಟನೆಯಲ್ಲಿ ಆಸಕ್ತಿ ಇದೆ ಅಂತ ಅವರಿಗೆ ಗೊತ್ತಿತ್ತು. ಆದ್ರೆ ನಾನು ಸಿನಿಮಾ ನಟಿಯಾಗಬೇಕು ಅಂತ ಕನಸು ಕಂಡಿರಲಿಲ್ಲ. ಯಾಕಂದ್ರೆ ನಮ್ಮಂಥಾ ಮಧ್ಯಮವರ್ಗದವರಿಗೆ ಅಂಥಾ ಕನಸು ಕಾಣೋದು ಕಷ್ಟವಾಗುತ್ತೆ. ನಾನು ರಂಗಭೂಮಿಯತ್ತ ಆಸಕ್ತಿ ಹೊಂದಿದ್ದೆ. ಆದ್ರೆ ತಂದೆಯ ಕಾರಣದಿಂದ ಮೊದಲು ಸಿನಿಮಾದಲ್ಲಿ ನಟಿಸುವಂತಾಯ್ತು. ಅದನ್ನು ನಾನು ಹವ್ಯಾಸದಂತೆ ಮಾಡಿದ್ದೆನಾದ್ರೂ ಆ ನಂತರವೇ ವಾಸ್ತುಪ್ರಕಾರ ಮತ್ತು ರಾಕೆಟ್ ಚಿತ್ರಗಳ ಅವಕಾಶವೂ ಸಿಕ್ಕಿತು. ಆ ನಂತರದಲ್ಲಿ ಸಿನಿಮಾ ನಟನೆ ಇಷ್ಟವಾಯ್ತು. ನಾನೇನೇ ಓದಿದ್ರೂ ನಂಗೆ ಆಸಕ್ತಿ ಇರೋದೇ ಸಿನಿಮಾ ಬಗ್ಗೆ. ಇದು ಬಿಟ್ಟು ಕಥೆ, ನಿರ್ದೇಶನದಂಥಾ ಕ್ರಿಯೇಟಿವ್ ವಿಭಾಗದಲ್ಲೂ ಆಸಕ್ತಿ ಇದ್ದದ್ದರಿಂದ ಸಿನಿಮಾವನ್ನೇ ಆರಿಸಿಕೊಂಡೆ.

ಈಗ ನೀವು ನಿರ್ದೇಶನವನ್ನೂ ಮಾಡಿದ್ದೀರಿ. ನಿಮ್ಮ ಕಾಜಿ ಚಿತ್ರಕ್ಕೆ ಸಿಕ್ಕ ಪ್ರತಿಕ್ರಿಯೆ ಹೇಗಿದೆ?

– ಕಾಜಿ ಕಿರುಚಿತ್ರವನ್ನ ಮಾಡಿದ್ದು ಕಲಿಕೆಯ ದೃಷ್ಟಿಯಿಂದ. ಖಂಡಿತಾ ಅವಾರ್ಡಿಗಾಗಿ ಈ ಚಿತ್ರ ಮಾಡಿದ್ದಲ್ಲ. ಸ್ಕ್ರಿಪ್ಟ್ ರೆಡಿ ಮಾಡಿದಾಗ ಅದು ಚೆನ್ನಾಗಿದೆ ಅಂತ ನೀನಾಸಂ ಸತೀಶ್ ಸಪೋರ್ಟ್ ಮಾಡಿದ್ರು. ಒಂದೊಳ್ಳೆ ಟೀಮ್ ಕಟ್ಟಿ ಕೊಟ್ರು. ನಾವು ನಿರೀಕ್ಷೆಯೇ ಮಾಡಿರದಂತೆ ಇದಕ್ಕೆ ಒಳ್ಳೆ ಪ್ರತಿಕ್ರಿಯೆ ಸಿಕ್ತು. ಸೈಮಾಗೂ ಆಯ್ಕೆಯಾಗಿದೆ. ಮೂರು ಅವಾರ್ಡುಗಳೂ ಸಿಕ್ಕಿವೆ. ಇದ್ರಿಂದ ತುಂಬಾ ಖುಷಿಯಾಗಿದೆ. ಇಂಥಾ ಪ್ರತಿಕ್ರಿಯೆ ಬಂದಾಗ ನನ್ನ ಬಗ್ಗೆ ನಮಗೇ ಭರವಸೆ ಮೂಡುತ್ತೆ.

ನಟನೆ ಮತ್ತು ನಿರ್ದೇಶನದಲ್ಲಿ ಯಾವುದಕ್ಕೆ ಹೆಚ್ಚು ಆದ್ಯತೆ ಕೊಡ್ರೀರಿ?

– ಖಂಡಿತಾ ನಟನೆಗೇ ಹೆಚ್ಚು ಒತ್ತು ಕೊಡ್ತೀನಿ. ಯಾಕಂದ್ರೆ ಚಿಕ್ಕ ವಯಸಿನಿಂದಲೂ ನನಗೆ ನಟನೆಯ ಬಗ್ಗೇನೆ ಜಾಸ್ತಿ ಆಸಕ್ತಿ ಇತ್ತು. ಆಕ್ಟಿಂಗ್ ಮಾಡೋ ಹೊತ್ತಲ್ಲೇ ನಂಗೆ ಫಿಲಂ ಮೇಕಿಂಗ್ ಬಗ್ಗೆ ಆಸಕ್ತಿ ಹುಟ್ಟಿಕೊಂಡಿತ್ತಷ್ಟೆ. ಅದಕ್ಕೂ ಮೊದಲು ನನ್ನಿಷ್ಟದ ಆಯ್ಕೆಯಾಗಿದ್ದದ್ದು ನಟನೆಯಷ್ಟೇ. ಈಗ್ಲೂ ನಟನೆಯೇ ಮೊದಲ ಆದ್ಯತೆ ಕೊಡ್ತೀನಿ. ಸಿನಿಮಾ ಮೇಕಿಂಗ್‌ಗೆ ಇನ್ನೂ ಸಾಕಷ್ಟು ಸಮಯಾವಕಾಶವಿದೆ. ಕಲಿಯೋದೂ ಸಾಕಷ್ಟಿದೆ. ಆದ್ರಿಂದ ಸದ್ಯದ ನನ್ನ ಆಯ್ಕೆ ನಟನೆಯೇ.

ನಡುವೆ ಅಂತರವಿರಲಿ ಚಿತ್ರದ ನಂತರ ಹೊಸಾ ಚಿತ್ರಗಳ ಅವಕಾಶ ಬಂದಿದೆಯಾ?

– ಬಂದಿದೆ. ಅದ್ರ ಬಗ್ಗೆ ಮಾತುಕತೆಯೂ ನಡೀತಿದೆ. ಎಲ್ಲ ಫೈನಲ್ ಆದ್ಮೇಲೆ ಹೊಸಾ ಚಿತ್ರದ ಬಗ್ಗೆ ಹೇಳ್ತೀನಿ.

ಸಿನಿಮಾಗೆ ಬರುವ ಮುಂಚೆ ನಿಮ್ಮ ಖಾಸಗಿ ಜಗತ್ತು ಹೇಗಿತ್ತು?

– ಸಿನಿಮಾಗೆ ಬರೋ ಮುಂಚೆ ನಾನು ಮಾಮೂಲಿ ಕಾಲೇಜು ಸ್ಟೂಡೆಂಟ್ ಅಷ್ಟೆ. ಆದ್ರೆ ಆ ಹಂತದಲ್ಲಿಯೇ ನಂಗೆ ಸಿಂಗಿಂಗ್ ಬಗ್ಗೆ ಆಸಕ್ತಿ ಇತ್ತು. ವೀಣೆ ನುಡಿಸೋದನ್ನ ಕಲಿತಿದ್ದೆ. ಅಮ್ಮ ಕೂಡಾ ನಾನು ಸಿಂಗರ್ ಆಗಬೇಕೆಂದೇ ಆಸೆಪಟ್ಟಿದ್ರು. ಸಂಗೀತವನ್ನೂ ಕಲಿತಿದ್ದ ನನಗೆ ಸ್ಪೋರ್ಟ್ಸ್‌ನಲ್ಲೂ ಆಸಕ್ತಿ ಇತ್ತು. ಅದಕ್ಕೂ ಮುಂಚೆ ಡಾಕ್ಟರ್ ಆಗ್ಬೇಕನ್ನೋ ಆಸೆ ಇತ್ತು. ಬಯಾಲಜಿ ನನ್ನ ಫೇವರಿಟ್ ಸಬ್ಜೆಕ್ಟ್ ಆಗಿತ್ತು. ಹಾಗ್ನೋಡಿದ್ರೆ ಚಿಕ್ಕವಳಿರುವಾಗ ನಾ ತುಂಬಾ ವಾಚಾಳಿಯಾಗಿದ್ದೆ. ಹೈಸ್ಕೂಲಿಗೆ ಬರೋ ಹೊತ್ತಿಗೆಲ್ಲ ಮಾತು ಕಡಿಮೆಯಾಗಿ ಅಂತರ್ಮುಖಿಯಾಗಿ ಬಿಟ್ಟಿದ್ದೆ. ಆ ಹಂತದಲ್ಲಿ ನಟಿಯಾಗಬೇಕು ಅಂದುಕೊಂಡಿರಲಿಲ್ಲ. ಆದ್ರೆ ನಂತರ ನಟಿಯಾದರೂ ರಾಕೆಟ್ ಚಿತ್ರದಲ್ಲಿ ಒಂದು ಹಾಡು ಹಾಡೋ ಮೂಲಕ ಅಮ್ಮನ ಆಸೆಯನ್ನ ಪೈರೈಸಿದ ತೃಪ್ತಿ ಇದೆ.

ನಿಮಗೆ ಹುಟ್ಟಿದೂರು ಇಷ್ಟವಾಗುತ್ತಾ ಅಥವಾ ಬೆಂಗಳೂರಾ?

– ನಾನು ಹುಟ್ಟಿದ್ದು ಅಮ್ಮ ಸಂಧ್ಯಾ ಶೆಟ್ಟಿಯವರ ಊರಾದ ಪುತ್ತೂರಿನಲ್ಲಿ. ನಾನು ಬೆಳೆದಿದ್ದು, ಓದಿದ್ದೆಲ್ಲ ಬೆಂಗಳೂರಿನಲ್ಲೇ ಆದ್ರೂ ಪುತ್ತೂರಿನ ನಂಟು ಹಾಗೇ ಇದೆ. ಆಗೆಲ್ಲ ವರ್ಷಕ್ಕೆ ಎರಡೆರಡು ತಿಂಗಳು ಅಲ್ಲೇ ಹೋಗಿರುತ್ತಿದ್ದೆ. ಈಗಲೂ ಪ್ರತೀ ವರ್ಷ ಊರಿಗೆ ಹೋಗ್ತೀನಿ. ಅಲ್ಲಿ ನಡೆಯೋ ಭೂತಾರಾಧನೆಯನ್ನ ಯಾವ

ಕಾರಣಕ್ಕೂ ಮಿಸ್ ಮಾಡಿಕೊಳ್ಳೋದಿಲ್ಲ. ಅಪ್ಪ, ಅಮ್ಮ ಮತ್ತು ತಮ್ಮ ಅಭಿರಥ್ ಜೊತೆ ಊರಿಗೆ ಹೋಗೋದಂದ್ರೆ ನಂಗಿಷ್ಟ.

ನೀವು ತುಳುನಾಡಿನವರು. ಇದೀಗ ತುಳು ಚಿತ್ರರಂಗವೂ ಬೆಳೆಯುತ್ತಿದೆ. ಅಲ್ಲಿಂದ ಆಫರ್‌ಗಳು ಬಂದಿವೆಯಾ?

– ಸಾಕಷ್ಟು ಆಫರ್‌ಗಳು ಬಂದಿವೆ. ಆದ್ರೆ ಕಾರಣಾಂತರಗಳಿಂದ ಒಪ್ಪಿಕೊಳ್ಳಲಾಗಿಲ್ಲ. ನಾನು ತುಳುವಿನವಳಾದರೂ ಕನ್ನಡದೊಂದಿಗೇ ನಂಟು ಜಾಸ್ತಿ. ನನಗೆ ಸೂಟ್ ಆಗುವಂಥಾ ಒಳ್ಳೆ ಕಥೆ ಬಂದ್ರೆ ಖಂಡಿತಾ ತುಳು ಚಿತ್ರಗಳಲ್ಲೂ ನಟಿಸ್ತೀನಿ.

ಈಗ ಮತ್ತೆ ನಡುವೆ ಅಂತರವಿರಲಿ ಚಿತ್ರದ ಬಗ್ಗೆ ಮಾತಾಡೋದಾದರೆ…

-ಈ ಚಿತ್ರವನ್ನು ಹೊಸಬರ ತಂಡವೇ ರೂಪಿಸಿದ್ರೂ ಡಿಫರೆಂಟಾಗಿದೆ. ತಾಂತ್ರಿಕವಾಗಿಯೂ ರಿಚ್ ಆಗಿದೆ. ಮಾಸ್, ಆಕ್ಷನ್ ಸೂತ್ರಗಳಾಚೆಗೆ ಬದುಕಿಗೆ ಹತ್ತಿರವಾದ ಕಥೆ ಹೊಂದಿದೆ. ಆದ್ದರಿಂದಲೇ ಎಲ್ಲರಿಗೂ ಇಷ್ಟವಾಗುತ್ತದೆ ಎಂಬ ಭರವಸೆಯೂ ಇದೆ. ಎಲ್ಲರೂ ಈ ಸಿನಿಮಾ ನೋಡುವಂತಾಗ್ಲಿ ಅಂತ ಆಶಿಸ್ತೀನಿ.

Continue Reading
Click to comment

Leave a Reply

Your email address will not be published. Required fields are marked *

ಸಂದರ್ಶನ

ಇನ್ಮೇಲೆ ವರ್ಷಕ್ಕೊಂದು ಚಿತ್ರ ಮಾಡ್ತಾರಾ ದಿನಕರ್?

Published

on

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಸಹೋದರ ದಿನಕರ್ ತೂಗುದೀಪ ನಿರ್ದೇಶನದ ಲೈಫ್ ಜೊತೆ ಒಂದ್ ಸೆಲ್ಫಿ ಚಿತ್ರ ಬಿಡುಗಡೆಗೆ ಸಜ್ಜಾಗಿದೆ. ಜೊತೆಜೊತೆಯಲಿ, ನವಗ್ರಹ, ಸಾರಥಿಯಂಥಾ ಸೂಪರ್ ಹಿಟ್ ಚಿತ್ರಗಳನ್ನು ನಿರ್ದೇಶನ ಮಾಡಿರೋ ದಿನಕರ್ ಈ ಚಿತ್ರದ ಮೂಲಕ ಮತ್ತೊಂದು ಮಹಾ ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ. ಸಿನಿಬಜ಼್ ದಿನಕರ್ ಅವರೊಂದಿಗೆ ಈ ಚಿತ್ರದ ಬಗ್ಗೆ ಮಾತಿಗಿಳಿದಾಗ ಮಜವಾದ, ಇಂಟರೆಸ್ಟಿಂಗ್ ಆದ ಹಲವಾರು ಸಂಗತಿಗಳ ಬಗ್ಗೆ ಮುಕ್ತವಾಗಿ ಮಾತಾಡಿದ್ದಾರೆ. ಅದರ ಸಂಕ್ಷಿಪ್ತ ವಿವರ ನಿಮಗಾಗಿ…

ನೀವೊಂದು ಸಿನಿಮಾ ಮಾಡಲು ಹೊರಟಾಗ ಭಾರೀ ನಿರೀಕ್ಷೆ ಇರುತ್ತೆ. ಲೈಫ್ ಜೊತೆ ಒಂದ್ ಸೆಲ್ಫಿ ವಿಚಾರದಲ್ಲಿ ಅದು ಹೇಗೆ ಸ್ಪೆಷಲ್?

– ಇದುವರೆಗೂ ನಾನು ಮಾಡಿರೋ ಸಿನಿಮಾಗಳೆಲ್ಲ ಬೇರೆ ಬೇರೆ ಜಾನರಿನವುಗಳೇ. ಪ್ರತೀ ಚಿತ್ರಗಳೂ ನನ್ನ ಪಾಲಿಗೆ ಸ್ಪೆಷಲ್. ಈ ಹಿಂದೆ ಜೊತೆ ಜೊತೆಯಲಿ ಚಿತ್ರ ಲವ್ ಸಬ್ಜೆಕ್ಟ್ ಹೊಂದಿತ್ತು. ನವಗ್ರಹ ಥ್ರಿಲ್ಲರ್ ಆದ್ರೆ, ಸಾರಥಿ ಪಕ್ಕಾ ಆಕ್ಷನ್ ಮೂವಿ. ಲೈಫ್ ಜೊತೆ ಒಂದ್ ಸೆಲ್ಫಿ ಈ ಹಿಂದಿನ ಚಿತ್ರಗಳಿಗಿಂತ ಖಂಡಿತಾ ಸ್ಪೆಷಲ್. ಖಂಡಿತಾ ನೋಡುಗರಿಗೆಲ್ಲ ಆ ಫೀಲ್ ಆಗೇ ಆಗುತ್ತೆ. ಎಮೋಷನ್, ಲವ್, ಫ್ರೆಂಡ್‌ಶಿಪ್ ಮತ್ತು ಬದುಕಿನ ವಾಸ್ತವತೆಗಳ ಸುತ್ತ ಹರಡಿಕೊಂಡಿರೋ ಚಿತ್ರ.

ಒಂದೇ ಚಿತ್ರದಲ್ಲಿ ಹಲವು ನಾಯಕರನ್ನು ನಿರ್ದೇಶನ ಮಾಡಿದವರು ನೀವು. ಈ ಚಿತ್ರದಲ್ಲಿ ಇಬ್ಬರು ನಾಯಕರೊಂದಿಗಿನ ಅನುಭವ ಹೇಗಿತ್ತು?

– ಈ ಚಿತ್ರದ ನಾಯಕರಲ್ಲೊಬ್ಬರಾಗಿರೋ ಪ್ರೇಂ ಜೊತೆ ನನಗಿದು ಎರಡನೇ ಚಿತ್ರ. ಈ ಹಿಂದೆ ಜೊತೆಯಾಗಿಯೇ ಜೊತೆ ಜೊತೆಯಲಿ ಚಿತ್ರ ಮಾಡಿದ್ವಿ. ಆದರೆ ಆ ಚಿತ್ರಕ್ಕೂ ಈ ಚಿತ್ರಕ್ಕೂ ಇಬ್ಬರಲ್ಲಿಯೂ ಒಂದಷ್ಟು ಬದಲಾವಣೆಗಳಾಗಿವೆ. ಆಗ ನಾವಿಬ್ಬರೂ ಹೆಚ್ಚೂ ಕಮ್ಮಿ ಹೊಸಬರು. ಈಗ ನನಗೊಂದಷ್ಟು ಅನುಭವವಾಗಿದೆ. ಅವರೊಂದಷ್ಟು ಪಳಗಿಕೊಂಡಿದ್ದಾರೆ. ಓರ್ವ ನಟನಾಗಿ ಪ್ರೇಂರಲ್ಲಿನ ಬದಲಾವಣೆ ನಿಜಕ್ಕೂ ಅಚ್ಚರಿ ಹುಟ್ಟಿಸುವಂತಿದೆ. ಇನ್ನು ಪ್ರಜ್ವಲ್ ನಮ್ಮದೇ ಫ್ಯಾಮಿಲಿಯ ಹುಡುಗನಿದ್ದಂತೆ. ಪ್ರಜ್ವಲ್ ಮತ್ತು ಪ್ರಣಾಮ್ ಇಬ್ರೂ ನನಗಾಗಲಿ ದರ್ಶನ್‌ಗಾಗಲಿ ತಮ್ಮಂದಿರಿದ್ದಂತೆ. ಬಹು ಕಾಲದಿಂದಲೂ ಒಟ್ಟಾಗಿ ಚಿತ್ರ ಮಾಡಬೇಕೆಂಬ ಆಸೆ ಇಬ್ಬರಿಗೂ ಇತ್ತು. ನನಗಂತೂ ಪ್ರಜ್ವಲ್ ಒಳಗೊಬ್ಬ ಯಂಗ್ ದರ್ಶನ್ ಕಾಣಿಸುತ್ತಾರೆ. ಇಬ್ಬರದ್ದೂ ಕೂಡಾ ಸಹಜಾಭಿನಯ. ಈ ಚಿತ್ರದ ವಿಚಾರದಲ್ಲಿ ಹೇಳೋದಾದರೆ ಇವರಿಬ್ಬರ ಜೊತೆಗಿನ ಚಿತ್ರೀಕರಣದ ಅನುಭವ ನಿಜಕ್ಕೂ ಚೆನ್ನಾಗಿತ್ತು.

ಹರಿಪ್ರಿಯಾ ನಿಮ್ಮ ಚಿತ್ರದ ನಾಯಕಿ. ಈ ಪಾತ್ರಕ್ಕೇ ಅವರನ್ನೇ ಆಯ್ಕೆ ಮಾಡಲು ಕಾರಣ?

– ಈ ಹಿಂದೆ ಹರಿಪ್ರಿಯಾ ನಾಯಕಿಯಾಗಿ ನಟಿಸಿದ್ದ ಉಗ್ರಂ ಚಿತ್ರವನ್ನ ನಮ್ಮದೇ ತೂಗುದೀಪ ಸಂಸ್ಥೆಯಿಂದ ಡಿಸ್ಟ್ರಿಬ್ಯೂಟ್ ಮಾಡಿದ್ದೆ. ನಂತರ ನೀರ್ ದೋಸೆ ಚಿತ್ರದಲ್ಲಿನ ಅವರ ನ್ಯಾಚುರಲ್ ಆದ ಅಭಿನಯ ನೋಡಿ ಅವರ ಜೊತೆಗೊಂದು ಚಿತ್ರ ಮಾಡಲೇ ಬೇಕೆಂದು ಅನ್ನಿಸಿತ್ತು. ಆ ಮೇಲೆ ಲೈಫ್ ಜೊತೆ ಒಂದ್ ಸೆಲ್ಫಿ ಚಿತ್ರದ ಕಥೆಯ ಹಂತದಲ್ಲಿ ಈ ಪಾತ್ರಕ್ಕೆ ಅವರೇ ಪರ್ಫೆಕ್ಟ್ ಅನ್ನಿಸಿತ್ತು. ಅವರಿಲ್ಲಿ ಸ್ನೇಹಿತರಿಂದ ರ‍್ಯಾಶ್ ಅಂತ ಕರೆಸಿಕೊಳ್ಳೋ ರಶ್ಮಿ ಎಂಬ ಪಾತ್ರ ನಿರ್ವಹಿಸಿದ್ದಾರೆ. ಪ್ರಜ್ವಲ್, ಪ್ರೇಂ, ಹರಿಪ್ರಿಯಾ ಸೇರಿದಂತೆ ಎಲ್ಲರೂ ಆ ಪಾತ್ರಗಳಿಗೆ ಬೇರ‍್ಯಾರನ್ನೂ ಕಲ್ಪಿಸಿಕೊಳ್ಳಲೂ ಸಾಧ್ಯವಾಗದಂತೆ ನಟಿಸಿದ್ದಾರೆ. ಸುಧಾರಾಣಿಯವರ ಜೊತೆ ಕೆಲಸ ಮಾಡಲು ಸಿಕ್ಕ ಅವಕಾಶವಂತೂ ನನ್ನ ಪಾಲಿನ ಸೌಭಾಗ್ಯ. ಆ ಪಾತ್ರಕ್ಕೆ ನಾವೇನು ಬಯಸಿದ್ದೆವೋ ಅದನ್ನೇ ಮೀರಿಸುವಂಥಾ ಎಕ್ಸಲೆಂಟ್ ನಟನೆ ಅವರಿಂದ ಸಿಕ್ಕಿದೆ. ಬಹುಶಃ ಇವರೆಲ್ಲರೂ ನನಗಿಂತ ಡೀಪ್ ಆಗಿ ಕಥೆಯನ್ನ ಫೀಲ್ ಮಾಡಿದ್ದಾರನ್ನಿಸುತ್ತೆ!

ನಿಮ್ಮ ಮಡದಿ ಮಾನಸಾ ಈ ಚಿತ್ರಕ್ಕೆ ಕಥೆ ಬರೆದಿದ್ದಾರೆ. ಈ ಕಥೆಯ ಬಗೆಗಿನ ಕಥೆ ಹೇಳಿ…

– ಮಾನಸಾ ಈ ಕಥೆಯ ಲೈನ್ ಹೇಳಿದಾಗ ಮಾಡಬಹುದನ್ನಿಸಿತ್ತು. ಆಕೆ ಅದನ್ನು ಹೇಳಿದ್ದು ಒಂದೂವರೆ ವರ್ಷಗಳ ಹಿಂದೆ. ಆದ್ರೆ ಆಗ ವರ್ಕ್ ಮಾಡೋಣ, ಆಮೇಲೆ ಡಿಸೈಡ್ ಮಾಡೋಣ ಅಂದಿದ್ದೆ. ಅದಾದ ನಂತರ ಐದಾರು ತಿಂಗಳಲ್ಲಿ ಕಥೆಯ ಒನ್ ಲೈನ್ ರೆಡಿಯಾಗಿತ್ತು. ಅದನ್ನು ನೋಡಿದಾಗ ನಿಜಕ್ಕೂ ಈ ಕಥೆ ಒಂದೊಳ್ಳೆ ಸಿನಿಮಾ ಆಗುತ್ತೆ ಅನ್ನೋ ಕಾನ್ಫಿಡೆನ್ಸ್ ಬಂದಿತ್ತು. ನಾನು ಮಾಡಿದ್ದ ಈ ಹಿಂದಿನ ಮೂರು ಸಿನಿಮಾಗಳಿಗೆ ಹೋಲಿಸಿದರೆ ಈ ಕಥೆ ನನಗೆ ಹೊಸತು. ನನಗೆ ಒಂದೇ ಕೆಲಸ ಹೆಚ್ಚು ಕಾಲ ಮಾಡೋದಂದರೆ ಬೋರಾಗುತ್ತೆ. ನನ್ನ ವ್ಯಕ್ತಿತ್ವವೇ ಅಂಥಾದ್ದು. ಇನ್ನೊಂದು ಲವ್ ಸ್ಟೋರಿ ಅಥವಾ ಆಕ್ಷನ್ ಚಿತ್ರ ಮಾಡಬೇಕನ್ನಿಸೋದಿಲ್ಲ. ಹೊಸದೇನಾದರೂ ಹುಡುಕ್ತೀನಿ. ಅದು ಸಿಕ್ಕಾಗಲಷ್ಟೇ ಮನಸು ಒಪ್ಪಿಕೊಳ್ಳುತ್ತೆ. ಮಾನಸ ಹೇಳಿದ ಈ ಕಥೆಯಲ್ಲಿ ಅಂಥಾ ಹೊಸತನ ಸಿಕ್ಕಿದ್ದರಿಂದಲೇ ಮುಂದುವರೆದೆ. ಕಥೆಯ ಲೈನ್ ರೆಡಿಯಾದ ನಂತರ ಸ್ಕ್ರೀನ್‌ಪ್ಲೇಗೆ ಮತ್ತೆ ಆರೇಳು ತಿಂಗಳು ಹಿಡಿಯಿತು. ಮಾನಸಾ ಕೂಡಾ ಪಾತ್ರಗಳನ್ನು ರೂಪಿಸಿ, ಕಥೆಯನ್ನು ಒಗ್ಗಿಸಿಕೊಳ್ಳುವಲ್ಲಿ ಜೊತೆಯಾದಳು. ಇಬ್ಬರೂ ಸೇರಿಯೇ ಸ್ಕ್ರೀನ್ ಪ್ಲೇ ಮುಗಿಸಿ ನಿರ್ಮಾಪಕರನ್ನು ಭೇಟಿಯಾದಾಗ ಅವರದನ್ನು ಒಪ್ಪಿಕೊಳ್ಳಲು ತೆಗೆದುಕೊಂಡಿದ್ದು ಕೇವಲ ಎರಡೇ ನಿಮಿಷ!

ಮಾನಸ ಅವರೊಂದಿಗೆ ದಶಕಗಳಷ್ಟು ಕಾಲದಿಂದ ಸಂಸಾರ ನಡೆಸಿದ್ದೀರಿ. ಆದರೆ ಒಂದು ಚಿತ್ರದಲ್ಲಿ ಮೊದಲ ಸಲ ಒಟ್ಟಾಗಿ ಕೆಲಸ ಮಾಡಿದ ಅನುಭವ ಹೇಗನ್ನಿಸಿತು?

– ಮಾನಸಾ ಕಥೆ ಬರೆದಿದ್ದಲ್ಲದೇ ಈ ಚಿತ್ರದುದ್ದಕ್ಕೂ ನನ್ನ ಸಹಾಯಕ್ಕೆ ನಿಂತಿದ್ದಳು. ಚಿತ್ರೀಕರಣ ಮುಗಿಯುವಷ್ಟರಲ್ಲಿ ಮದುವೆಯಾಗಿ ಈ ಹತ್ತು ವರ್ಷಗಳಲ್ಲಿ ಯಾವತ್ತೂ ಮಾಡಿರದಷ್ಟು ಜಗಳಗಳೂ ನಮ್ಮ ನಡುವೆ ನಡೆದವು. ಆಕೆ ತನ್ನ ಕಥೆಯ ಬಗ್ಗೆ ವಿಪರೀತ ಪೊಸೆಸಿವ್. ಸ್ಕ್ರೀನ್ ಪ್ಲೇ ಹಂತದಲ್ಲಿ ಚರ್ಚಿಸುವಾಗ ಇದ್ದಂತೆಯೇ ಪಾತ್ರಗಳು ಬರಬೇಕೆಂಬುದು ಮಾನಸಾ ಬಯಕೆ. ಅದೊಂಚೂರು ಏರುಪೇರಾದರೂ ಜಗಳ ಗ್ಯಾರೆಂಟಿ. ಈ ಜಗಳದಿಂದಲೇ ಕೆಲಸ ಮತ್ತಷ್ಟು ಪಕ್ವವಾಗಿದ್ದೂ ನಿಜ. ಕಡೆಗೆ ಎಡಿಟಿಂಗ್ ಎಲ್ಲ ಮುಗಿಸಿ ಆದಮೇಲೆ ಮಾನಸಾಳನ್ನು ಕರೆದು ತೋರಿಸಿದೆ. ಆಕೆ ಹೊಸಾದೇನು ಮಾಡಿದ್ದೀರಿ, ಎಲ್ಲ ನಾವಂದುಕೊಂಡಂತೆಯೇ ಇದೆಯಲ್ಲಾ ಅಂದಾಗ ಎಲ್ಲ ಅಂದುಕೊಂಡಂತೆಯೇ ನಡೆದಿದೆ ಅಂತ ಸಮಾಧಾನವಾಯ್ತು. ರೀರೆಕಾರ್ಡಿಂಗ್ ಆದ ಮೇಲಂತೂ ಮಾನಸ ಮತ್ತಷ್ಟು ಖುಷಿ ಪಟ್ಟಳು. ಆದರೆ ಚಿತ್ರೀಕರಣ ನಡೆದ ಅರವತ್ತು ದಿನಗಳಲ್ಲಿ ಆರುನೂರು ಸಲ ಜಗಳವಾಡಿದ್ದೇವೆ!

ದರ್ಶನ್ ಅವರು ಚಿತ್ರ ನೋಡಿದ್ದಾರಾ?

– ಇಲ್ಲ ನೋಡಿಲ್ಲ. ಆದರೆ ಸದ್ಯದಲ್ಲೇ ತೋರಿಸೋ ಯೋಜನೆ ಹಾಕಿಕೊಂಡಿದ್ದೇವೆ.

ಈಗ ಕೇಳ್ತಿರೋದು ಅಭಿಮಾನಿಗಳೆಲ್ಲರ ಪ್ರಶ್ನೆಯೂ ಹೌದು, ನೀವು ವರ್ಷಕ್ಕೊಂದು ಸಿನಿಮಾ ಮಾಡೋದು ಯಾವಾಗ?

– ಖಂಡಿತಾ ನನಗೂ ಆಸೆಯಿದೆ ವರ್ಷಕ್ಕೊಂದು ಸಿನಿಮಾ ಮಾಡಬೇಕಂತ. ನಂಗೆ ಅಂಥಾ ಕಥೆ ಸಿಗಬೇಕು. ಕೂತಲ್ಲಿ ಕೂರಲು ಬಿಡದೆ ಎದೆಗೊದ್ದು ಸಿನಿಮಾ ಮಾಡುವಂಥಾ ಕಥೆ ಸಿಗಬೇಕು. ಆವಾಗ ಖಂಡಿತಾ ವರ್ಷಕ್ಕೊಂದು ಸಿನಿಮಾ ಮಾಡ್ತೀನೇನೋ… ನನ್ನ ಪಾಲಿಗೆ ಚಿತ್ರಗಳ ಸಂಖ್ಯೆ ಮುಖ್ಯವಲ್ಲ, ಕ್ವಾಲಿಟಿ ಮುಖ್ಯ ಎಂಬ ಮನಸ್ಥಿತಿ ನನ್ನದು. ಮುಂದೆ ಕೆಲ ಬದಲಾವಣೆ ಮಾಡಿಕೊಂಡು ವರ್ಷಕ್ಕಲ್ಲದಿದ್ದರೂ ಎರಡು ವರ್ಷಕ್ಕೊಂದಾದರೂ ಸಿನಿಮಾ ಮಾಡಲೇಬೇಕು. ಮೊನ್ನೆ ಫಿಲಂ ಚೇಂಬರ್ ಎಲೆಕ್ಷನ್ನಿನಲ್ಲಿ ಸಿಕ್ಕವರೂ ಒಂದು ವರ್ಷಕ್ಕೊಂದಾದ್ರೂ ಸಿನಿಮಾ ಮಾಡೋಕೇನು ದಾಡಿ ಅಂತ ಕ್ಲಾಸು ತಗೊಂಡಿದ್ರು. ಆದ್ರೆ ಏನ್ಮಾಡ್ಲಿ, ಸಿನಿಮಾ ವಿಚಾರದಲ್ಲಿ ನಾನೊಂಥರ ಪೊಸೆಸಿವ್ ಆಸಾಮಿ. ಸಿನಿಮಾ ಅಂದಾಕ್ಷಣ ಪೊಸೆಸಿವ್ ಆಗ್ತೀನಿ. ಹಿಂಗಂದ್ರೆ ಹಿಂಗೇ ಇರಬೇಕು, ಒಂಚೂರೂ ಆಚೀಚೆ ಆದರೂ ನಾ ಸಹಿಸೋದಿಲ್ಲ. ಚಿತ್ರಕ್ಕೆ ಚೂರು ತೊಂದರೆಯಾದರೂ ನನ್ನ ಸುತ್ತ ಕೆಲಸ ಮಾಡೋರೇ ಶತ್ರುಗಳಂತೆ ಕಾಣಿಸೋಕೆ ಶುರುವಾಗುತ್ತೆ. ಆವಾಗ ಬೈತೀನಿ, ಗಲಾಟೆ ಮಾಡ್ಕೋತೀನಿ. ನನ್ನ ಅಸಿಸ್ಟೆಂಟ್ ಡೈರೆಕ್ಟರ್‌ಗಳ ಪಾಡು ನೋಡಿದ್ರಂತೂ ಅಯ್ಯೋ ಪಾಪ ಅನ್ನೋ ಹಾಗಿರುತ್ತೆ. ಇದೆಲ್ಲದರಿಂದಾಗಿ ಒಂದಷ್ಟು ಟೈಮು ತಗೊಂಡು ಸಿನಿಮಾ ಮಾಡ್ತೀನಿ. ಮುಂದಿನ ಚಿತ್ರದಿಂದ ಕೋಪಾನೆಲ್ಲ ಕಮ್ಮಿ ಮಾಡಿಕೊಂಡು ಎರಡು ವರ್ಷಕ್ಕೆ ಒಂದಾದ್ರೂ ಸಿನಿಮಾ ಮಾಡಬೇಕಂದುಕೊಂಡಿದ್ದೇನೆ.

ಲೈಫ್ ಜೊತೆ ಒಂದ್ ಸೆಲ್ಫಿ ಫೈನಲಿ ಯಾವುದನ್ನು ಹೇಳುತ್ತೆ?

– ಇದು ತುಂಬಾ ಸಿಂಪಲ್ ಕಾನ್ಸೆಪ್ಟ್. ಲೈಫ್ ಅಂದ್ಮೇಲೆ ಎಲ್ಲರಿಗೂ ಒಂದಲ್ಲಾ ಒಂದು ಸಮಸ್ಯೆ ಬಂದೇ ಬರುತ್ತೆ. ಆದ್ರೆ ನಾವೆಲ್ಲ ಅದನ್ನ ಪರಿಹಾರ ಮಾಡೋದರ ಬಗ್ಗೆಯೇ ತಲೆ ಕೆಡಿಸಿಕೊಳ್ತೀವಿ. ವಾಸ್ತವವಾಗಿ ನಮ್ಮ ಕಲ್ಪನೆಯೇ ದೊಡ್ಡದಿರುತ್ತೆ. ಸಮಸ್ಯೆ ಸಣ್ಣದೇ ಆಗಿರುತ್ತೆ. ಈ ಸಮಸ್ಯೆಗಳಿಗೆ ಜೀವನವೇ ಒಂದು ಪರಿಹಾರವನ್ನೂ ಕೊಟ್ಟಿರುತ್ತೆ. ಇಲ್ಲಿನ ಮೂರೂ ಪಾತ್ರಗಳಿಗೂ ಒಂದೊಂದು ಕೊರಗು, ಸಮಸ್ಯೆ ಕಾಡುತ್ತಿರುತ್ತೆ. ಆದರೆ ಜರ್ನಿಯ ಸಂದರ್ಭದಲ್ಲಿ ಜೀವನವೇ ಅದೊಂದು ಸಮಸ್ಯೆಯಲ್ಲ ಎಂಬುದನ್ನು ಸಾರುತ್ತೆ. ಆ ಕ್ಷಣದ ಶುಭ್ರವಾದ ಜೀವನದೊಂದಿಗಿನ ಸುಂದರ ಸೆಲ್ಫಿಯಂತೆ ಈ ಚಿತ್ರ ಮೂಡಿ ಬಂದಿದೆ.

 

Continue Reading

ಸಂದರ್ಶನ

ಎಲ್ಲರ ಬಾಸ್ ಮೇಲೌನೆ ಅಂದ್ರು ಶಿವಣ್ಣ!

Published

on

ಕೆಲ ದಿನಗಳಿಂದ ಸ್ಟಾರ್‌ಗಳ ಅಭಿಮಾನಿಗಳ ನಡುವೆ ಬಾಸ್ ಎಂಬ ಬಿರುದಿಗಾಗಿ ಶೀತಲ ಸಮರ ನಡೆಯುತ್ತಿದೆ. ಇದಕ್ಕೆ ಟಗರು ಚಿತ್ರದ ಶತದಿನದ ಸಂಭ್ರಮದಲ್ಲಿ ನಿರ್ದೇಶಕ ಸೂರಿಯವರ ಬಳಗ ಶಿವರಾಜ್‌ಕುಮಾರ್ ಅವರಿಗೆ ಬಾಸ್ ಆಫ್ ಸ್ಯಾಂಡಲ್ ವುಡ್ ಎಂಬ ಬಿರುದು ನೀಡಿದ್ದೇ ಮೂಲವಾಗಿ ಬಿಟ್ಟಿತ್ತು. ಈ ವಿದ್ಯಮಾನದ ಬಗ್ಗೆ ದ್ರೋಣ ಚಿತ್ರದ ಮುಹೂರ್ತ ಸಮಾರಂಭದಲ್ಲಿ ಶಿವಣ್ಣ ಮನಬಿಚ್ಚಿ ಮಾತಾಡಿದ್ದಾರೆ!

ದ್ರೋಣ ಚಿತ್ರದ ಮುಹೂರ್ತ ಸಮಾರಂಭದಲ್ಲಿ ಮಾತಿಗೆ ಸಿಕ್ಕ ಶಿವಣ್ಣನಿಗೆ ಮಾಧ್ಯಮದವರ ಕಡೆಯಿಂದ ಈ ಬಾಸ್ ವಿವಾದದ ಬಗ್ಗೆ ಪ್ರಶ್ನೆ ಎದುರಾಗಿತ್ತು. ಇದಕ್ಕೆ ಶಿವಣ್ಣನ ಕಡೆಯಿಂದ ಸಿಕ್ಕಿದ್ದು ಬಿಡು ಬೀಸಾದ ಖಡಕ್ಕು ಉತ್ತರ!

ಎಲ್ಲ ಅಭಿಮಾನಿಗಳಿಗೂ ಅವರವರ ಇಷ್ಟದ ನಟರೇ ಬಾಸ್. ಯಶ್ ಅಭಿಮಾನಿಗಳಿಗೆ ಯಶ್ ಬಾಸ್. ದರ್ಶನ್ ಅಭಿಮಾನಿಗಳಿಗೆ ಅವರೇ ಬಾಸ್. ಹಾಗಿರೋವಾಗ ನನ್ನ ಅಭಿಮಾನಿಗಳು ನನ್ನನ್ನು ಬಾಸ್ ಅಂದುಕೊಳ್ಳೋದರಲ್ಲಿ ವಿಶೇಷವೇನಿಲ್ಲ. ಆದರೆ ಈ ಬಾಸ್ ಪಟ್ಟದ ಬಗ್ಗೆ ಈಗ ವಿವಾದ ಸೃಷ್ಟಿಯಾಗಿರೋದನ್ನ ಗಮನಿಸಿದ್ದೇನೆ. ಇದರ ಹಿಂದೆ ಏನೇನಿದ್ದರೂ ಇದೊಂದು ಸಿಲ್ಲಿ ಮ್ಯಾಟರ್. ಇದು ವಿವಾದವಾಗಿ ಕಚ್ಚಾಡುವಂಥಾ ವಿಚಾರವಲ್ಲ. ಯಾಕಂದ್ರೆ ಎಲ್ಲರ ಬಾಸ್ ಮೇಲೌನೆ!

ಹೀಗೆ ಬಾಸ್ ವಿವಾದದ ಬಗ್ಗೆ ನೇರಾನೇರವಾಗಿ ವಾಸ್ತವದ ಭೂಮಿಕೆಯಲ್ಲಿ ಮಾತಾಡಿರುವ ಶಿವಣ್ಣ, ಇಂಥವೆಲ್ಲ ಅದು ಹೇಗೆ ವಿವಾದದ ಸ್ವರೂಪ ಪಡೆಯುತ್ತವೋ ಗೊತ್ತಾಗೋದಿಲ್ಲ. ಯಶ್ ಆಗಲಿ ದರ್ಶನ್ ಆಗಲಿ ಇಂಥಾದ್ದನ್ನೆಲ್ಲ ಬಯಸೋದಿಲ್ಲ. ನಾನೂ ಕೂಡಾ ಅದಕ್ಕೆ ಹೊರತಾಗಿಲ್ಲ. ಆದರೆ ಯಾರೋ ಹಚ್ಚುವ ಇಂಥಾ ಕಿಡಿಗಳು ಹೊತ್ತಿ ಉರಿಯದಂತೆ ನೋಡಿಕೊಳ್ಳಬೇಕಿದೆ ಅಂದಿದ್ದಾರೆ.

ಇಂಥಾ ಸಿಲ್ಲಿ ಮ್ಯಾಟರುಗಳನ್ನೆಲ್ಲ ಬಿಟ್ಟು ಎಲ್ಲರೂ ಒಗ್ಗಟ್ಟಾಗಿರೋಣ. ಚಿತ್ರರಂಗದ ಉಳಿವಿನತ್ತ ಗಮನ ಹರಿಸೋಣ. ಕನ್ನಡದ ಘನತೆ ಎತ್ತಿ ಹಿಡಿಯುವ ಬಗ್ಗೆ ಆಲೋಚಿಸೋಣ. ಎಲ್ಲ ನಟರ ಅಭಿಮಾನಿಗಳೂ ಎಲ್ಲರ ಚಿತ್ರಗಳನ್ನೂ ನೋಡುವ ಮೂಲಕ ಕನ್ನಡ ಚಿತ್ರಗಳನ್ನು ಗೆಲ್ಲಿಸೋಣ. ಇಂಥಾದ್ದೆಲ್ಲ ವಿವಾದವಾಗುವಂಥಾ ವಿಚಾರಗಳಲ್ಲ. ಒಗ್ಗಟ್ಟು ಕನ್ನಡ ಚಿತ್ರರಂಗದ ಶಕ್ತಿ. ಅದನ್ನು ಉಳಿಸಿಕೊಳ್ಳೋಣ ಎಂಬ ಸಕಾರಾತ್ಮಕ ಮಾತುಗಳನ್ನು ಶಿವಣ್ಣ ಬಾಸ್ ವಿವಾದಕ್ಕೆ ಸಂಬಂಧಿಸಿದಂತೆ ಎಲ್ಲ ಅಭಿಮಾನಿ ಬಳಗಕ್ಕೂ ರವಾನಿಸಿದ್ದಾರೆ.

Continue Reading

ಸಂದರ್ಶನ

ಟಗರು ಟೈಟಲ್ ಸಾಂಗ್ ಹಾಡಿದವನ ಅಂತರಾಳ…

Published

on

ಟಗರು ಶಿವನ ಅಭಿಮಾನಿ ಅಂತೋಣಿ ದಾಸನ್!

ದುನಿಯಾ ಸೂರಿ ಮತ್ತು ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಕಾಂಬಿನೇಷನ್ನಿನ ಸೂಪರ್ ಹಿಟ್ ಚಿತ್ರ ಟಗರು. ಗೆಲುವಿನ ಖದರಿನಲ್ಲಿರುವ ಈ ಚಿತ್ರದ ಹಾಡುಗಳು ಥರ ಥರದಲ್ಲಿ ಸದ್ದು ಮಾಡಿದ್ದವು. ಅದರಲ್ಲಿಯೂ ತಮಿಳಿನ ಖ್ಯಾತ ಹಿನ್ನೆಲೆ ಗಾಯಕ ಅಂಥೋಣಿ ದಾಸನ್ ಹಾಡಿರೋ ‘ಟಗರು ಬಂತು ಟಗರು ಇದು ಈ ಊರ ಟಗರು ಟೈಟಲ್ ಸಾಂಗಂತೂ ವಿಭಿನ್ನ ಸೌಂಡಿಂಗ್ ಮೂಲಕ ಹುಟ್ಟು ಹಾಕಿರೋ ಕ್ರೇಜ್ ಸಣ್ಣದೇನಲ್ಲ. ಟಗರು ಚಿತ್ರದ ಸಂಗೀತ ನಿರ್ದೇಶಕ ಚರಣ್ ರಾಜ್ ಈ ಮೂಲಕ ವಿಶಿಷ್ಟವಾದ ದೇಸೀ ಧ್ವನಿಯೊಂದನ್ನು ಕನ್ನಡಕ್ಕೆ ಪರಿಚಯಿಸಿದ್ದಾರೆ. ಹೀಗೆ ಟಗರು ಟೈಟಲ್ ಸಾಂಗ್ ಮೂಲಕ ಕನ್ನಡದಲ್ಲೂ ಹೊಸಾ ತರಂಗಗಳನ್ನೆಬ್ಬಿಸಿರೋ ಅಂಥೋಣಿ ದಾಸನ್ ಸದ್ಯ ತಮಿಳಿನಲ್ಲಿ ಭಾರೀ ಪ್ರಸಿದ್ಧಿ ಪಡೆದಿರೋ ಹಿನ್ನೆಲೆ ಗಾಯಕ. ಈ ಕಾರಣದಿಂದಲೇ ಈ ಹಾಡಿಗೆ ಧ್ವನಿಯಾದ ಅಂಥೋಣಿ ದಾಸನ್ ಬಗ್ಗೆ ಕನ್ನಡಿಗರಲ್ಲೊಂದು ಕುತೂಹಲವಿದೆ. ಈ ಹಿನ್ನೆಲೆಯಲ್ಲಿ ಸಿನಿಬಜ್ ಅಂತೋಣಿ ದಾಸನ್ ಜೊತೆ ಚುಟುಕಾದ ಮಾತುಕತೆಯೊಂದನ್ನು ನಡೆಸಿದೆ. ಬೆಂಗಳೂರಿನ ಬಗ್ಗೆ ಅತೀವ ಪ್ರೀತಿ ಇಟ್ಟುಕೊಂಡೇ ಶಿವಣ್ಣನ ಚಿತ್ರಕ್ಕೆ ಹಾಡಿದ ಬಗ್ಗೆ ಅಗಾಧವಾದ ಖುಷಿಯಿಂದಲೇ ಅವರು ಬಿಚ್ಚಿಟ್ಟು ಇಂಟರೆಸ್ಟಿಂಗ್ ವಿಚಾರಗಳು ನಿಮಗಾಗಿ…

– ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅವರ ಹಿಟ್ ಚಿತ್ರಕ್ಕೆ ಜನಪ್ರಿಯ ಗೀತೆಯೊಂದನ್ನು ಹಾಡಿದ್ದೀರಿ. ಶಿವಣ್ಣ ಅವರ ಬಗ್ಗೆ ನಿಮ್ಮ ಅಭಿಪ್ರಾಯವೇನು?

ಶಿವಣ್ಣನ ಥರಾ ಪ್ರೀತಿ ತೋರಿಸೋ ವ್ಯಕ್ತಿಯನ್ನು ನಾನೆಂದೂ ನೋಡಿಲ್ಲ. ಅಷ್ಟು ದೊಡ್ಡ ಸ್ಥಾನದಲ್ಲಿದ್ದು ಇಷ್ಟು ಸಿಂಪಲ್ಲಾಗಿದ್ದಾರೆ. ನನ್ನಂಥ ಕಲಾವಿದನ ಜೊತೆ ಯಾವುದೇ ಕೀಳರಿಮೆ ಇಲ್ಲದೆ ಬೆರೆಯುತ್ತಾರೆ. ಅವರ ಸರಳತೆ ಮತ್ತು ಸಜ್ಜನಿಕೆಗೆ ನಾನು ಋಣಿಯಾಗಿದ್ದೇನೆ.

– ಟಗರು ಟೈಟಲ್ ಸಾಂಗ್ ಹಾಡುವ ಮುನ್ನ ಆ ಚಿತ್ರದ ಬಗ್ಗೆ ಗೊತ್ತಿತ್ತಾ?

ಶಿವಣ್ಣನಿಗೆ ಹಾಡಲು ಹೋಗಿದ್ದೇನೆ ಅಂತಾ ನನಗೆ ಗೊತ್ತೇ ಇರಲಿಲ್ಲ. ನನಗೆ ಭಾಷೆ ಗೊತ್ತಿಲ್ಲ. ತಮಿಳು ಬಿಟ್ಟು ಬೇರೆ ಭಾಷೆಯ ಅರಿವಿಲ್ಲದ ನಾನು ತಮಿಳಿನಲ್ಲೇ ಬರೆದುಕೊಂಡು ಹಾಡಿದೆ. ಕನ್ನಡ ಭಾಷೆಯ ಪರಿಚಯವೇ ಇಲ್ಲದ ನನ್ನ ಬಳಿ ಸಂಗೀತ ನಿರ್ದೇಶಕ ಚರಣ್ ರಾಜ್ ತುಂಬಾನೇ ತಾಳ್ಮೆಯಿಂದ ಕೆಲಸ ತೆಗೆಸಿಕೊಂಡರು.
ಹಾಡೆಲ್ಲಾ ಪೂರ್ತಿ ರೆಕಾರ್ಡ್ ಆದ ನಂತರವಷ್ಟೇ ಚರಣ್ ರಾಜ್ ಅವರ ಬಳಿ ‘ಸಾರ್ ಈ ಸಿನಿಮಾಗೆ ಹೀರೋ ಯಾರು ಅಂತಾ ಕೇಳಿದೆ. ಆಗ ಅವರು ‘ಶಿವಣ್ಣ ಅಂದರು. ನನಗೆ ನಂಬಲೂ ಸಾಧ್ಯವಾಗಲಿಲ್ಲ. ಆಕಾಶದಲ್ಲಿ ಹಾರುತ್ತಿದ್ದೇನೇನೋ ಎನ್ನುವಂತೆ ಅನುಭವವಾಯಿತು.
ಮೊದಲ ಬಾರಿಗೆ ನಮ್ಮ ಕರ್ನಾಟಕದ ಸೂಪರ್ ಸ್ಟಾರ್‌ಗೆ ಹಾಡಿಬಿಟ್ಟೆನಲ್ಲಾ ಅಂತಾ ಸಂಭ್ರಮಿಸಿಬಿಟ್ಟೆ.

– ಶಿವಣ್ಣ ಹೇಗೆ ರಿಯಾಕ್ಟ್ ಮಾಡಿದರು?
ಮೊದಲ ಭೇಟಿಯಲ್ಲೇ ತೀರಾ ಆತ್ಮೀಯವಾಗಿ ಮಾತಾಡಿಸಿದರು. ನಾನು ನನ್ನ ಪತ್ನಿಯ ಸಮೇತ ಹೋಗಿ ಶಿವಣ್ಣರನ್ನು ಮೀಟ್ ಮಾಡಿದ್ದೆ. ಅವರನ್ನು ಎದುರು ಕಂಡಾಕ್ಷಣ ನಾನು ಈ ಪ್ರಪಂಚದಲ್ಲೇ ಇದ್ದೀನಾ? ಅಂತಾ ಒಂದು ಸಲ ಗಿಲ್ಲಿ ನೋಡಿಕೊಂಡೆ!
ಅವರೊಂದಿಗೆ ಪ್ರೋಮೋ ಶೂಟ್ ಕೂಡಾ ನಡೆಯಿತು. ನಮ್ಮ ಮನೆಗೆ ಬಾ ಅಂತಾ ಕರೆದರು. ನನ್ನಂಥವರು ಅವರ ಮನೆತನಕ ಹೋಗಬೇಕೆಂದರೆ, ನಿಜಕ್ಕೂ ನಾನು ಪುಣ್ಯವಂತ ಎಂದುಕೊಳ್ಳುತ್ತೇನೆ.

– ಈ ಹಾಡು ಹಿಟ್ ಆಗಿರೋದರ ಬಗ್ಗೆ ನಿಮಗೆ ಏನನಿಸುತ್ತಿದೆ?

ನನಗೆ ಬೆಂಗಳೂರೆಂದರೆ ಬಹಳ ಇಷ್ಟ. ಆಗಾಗ ಬೆಂಗಳೂರಿಗೆ ಹೋಗ್ತಾ ಇರ‍್ತೀನಿ. ಹಾಗೆ ಒಮ್ಮೆ ಹೋಗಿ ಆ ಊರಿಗಿಳಿದಾಗ ಅಲ್ಲಿನ ಗೋಡೆಗಳಿಗೆ ಅಂಟಿಸಿದ್ದ ಟಗರು ಸಿನಿಮಾ ಪೋಸ್ಟರ್ ನೋಡಿ ಖುಷಿಯಾಗಿಹೋಗಿತ್ತು. ಟಗರು ಸಿನಿಮಾದ ಹಾಡುಗಳು ಬಿಡುಗಡೆಯಾದ ನಂತರ ಎಲ್ಲರ ಬಾಯಲ್ಲೂ ‘ಟಗರು ಬಂತು ಟಗರು ಹಾಡು, ಅದೂ ನಾನು ಹಾಡಿರುವ ಹಾಡು ಹರಿದಾಡುತ್ತಿದೆ ಅನ್ನೋದು ತಿಳಿದು ಅದೆಷ್ಟು ಸಂಭ್ರಮಿಸಿದ್ದೀನೋ..
ಒಬ್ಬ ಹಾಡುಗಾರನಿಗೆ ಭಾಷೆ ಮುಖ್ಯವಲ್ಲ, ಪ್ರತಿಭೆ ಇದ್ದರೆ ಸಾಕು ಅನ್ನೋದನ್ನು ಟಗರು ಹಾಡು ಮತ್ತು ಕನ್ನಡ ಜನತೆ ಸಾಬೀತು ಮಾಡಿದ್ದಾರೆ. ಇದರ ಪ್ರತಿಫಲವೆಂಬಂತೆ ಈಗಾಗಲೇ ಇನ್ನೂ ನಾಲ್ಕೈದು ಹಾಡುಗಳನ್ನು ಕನ್ನಡ ಸಿನಿಮಾಗಳಿಗಾಗಿ ಹಾಡಿದ್ದೇನೆ.

ಹೀಗೆ ಕಲಾವಿದನಾದವನಿಗೆ ಭಾಷೆಯ ಗಡಿ ಇಲ್ಲ ಎಂಬಂತೆ ಕನ್ನಡದ ಬಗ್ಗೆಯೂ ಪ್ರೀತಿಯಿಂದಲೇ ಮಾತಾಡೋ ಅಪ್ಪಟ ದೇಸೀ ಪ್ರತಿಭೆಯಾದ ಅಂತೋಣಿ ದಾಸನ್ ಮೂಲತಃ ತಮಿಳಿನ ಜಾನಪದ ಗಾಯಕ. ತನ್ನ ವಿಶಿಷ್ಟವಾದ ಕಂಠ ಸಿರಿಯ ಮೂಲಕ ಪ್ರಸಿದ್ಧಿ ಪಡೆದ ಅವರು ತಮಿಳು ಚಿತ್ರರಂಗಕ್ಕೆ ಅಡಿಯಿರಿಸಿದ್ದು ೨೦೧೩ರಲ್ಲಿ. ಆ ನಂತರ ಹಲವಾರು ಚಿತ್ರಗಳಿಗೆ ಹಿನ್ನೆಲೆ ಗಾಯಕರಾಗಿ ಹಾಡಿದ ಅಂತೋಣಿ ದಾಸನ್ ತಮಿಳಿಗಳ ಹಾಟ್ ಫೇವರಿಟ್ ಗಾಯಕ. ಜೊತೆಗೆ ಲಾವಣಿ ಹಾಡುಗಳನ್ನು ಬರೆದು ತಾವೇ ಹಾಡುತ್ತಾರೆ.


ತಮಿಳುನಾಡಿನಲ್ಲಿ ನಮ್ಮ ಕೀಲುಕುದುರೆಯನ್ನು ಹೋಲುವ ಕರಗಾಟ್ಟ ಎನ್ನುವ ಗ್ರಾಮೀಣ ಕಲೆಯಿದೆ. ಅಂತೋಣಿ ದಾಸನ್ ಅವರ ತಂದೆ ಕರಗಾಟ್ಟ ತಂಡದಲ್ಲಿ ನಾದಸ್ವರ ಕಲಾವಿದರಾಗಿದ್ದವರು. ಕಿತ್ತು ತಿನ್ನೋ ಬಡತನದಿಂದ ಆರನೇ ಕ್ಲಾಸಿಗೇ ಸ್ಕೂಲಿಗೆ ಗುಡ್ ಬೈ ಹೇಳಿದ ಅಂಥೋಣಿ ಕರಗಾಟ್ಟಗಳಲ್ಲಿ ಜನರನ್ನು ರಂಜಿಸುವ ಬಫೂನ್ ವೇಷ ಹಾಕಿ ಬದುಕು ಸಾಗಿಸುತ್ತಿದ್ದ. ಹಾಗೇ ರೋಡ್‌ರೋಡಲ್ಲಿ ಕುಣಿದುಕೊಂಡಿದ್ದಾತ ಇವತ್ತು ತನ್ನದೇ ಬ್ಯಾಂಡ್ ತಂಡವನ್ನು ಹೊಂದಿದ್ದಾನೆ. ಜಗತ್ತಿನ ಎಲ್ಲ ಮೂಲೆಗಳಲ್ಲೂ ಕಾರ್ಯಕ್ರಮ ನೀಡುತ್ತಾನೆ. ತಮಿಳಿನ ಸ್ಟಾರ್ ನಟರ ಸಿನಿಮಾಗಳಲ್ಲಿ ಈತನದ್ದೊಂದು ಹಾಡಿರುತ್ತದೆ. ಬಣ್ಣ ಬಟ್ಟೆಗಳನ್ನು ನೋಡಿ ಅವಕಾಶ ಕೊಡೋ ಮಂದಿಯ ನಡುವೆ ಬೀದಿಗಳಲ್ಲಿ ಕುಣಿಯುತ್ತಿದ್ದ ಪ್ರತಿಭಾವಂತನನ್ನು ಕರೆತಂದು ಸಿನಿಮಾಗಳಲ್ಲಿ ಹಾಡುವ ಅವಕಾಶ ಕೊಟ್ಟ ತಮಿಳಿಗರನ್ನು ಭೇಷ್ ಅನ್ನಲೇಬೇಕು.
ಇಂಥಾ ಜನಪದ ಕಲಾವಿದ ಅಂತೋಣಿ ದಾಸನ್ ಇದೀಗ ಟಗರು ಚಿತ್ರದ ಮೂಲಕ ಕನ್ನಡಕ್ಕೂ ಅಡಿಯಿರಿಸಿದ್ದಾರೆ. ಇವರು ಹಾಡಿರೋ ಟೈಟಲ್ ಸಾಂಗ್ ಕೂಡಾ ಟಗರು ಚಿತ್ರದ ಪ್ರಮುಖ ಮೈಲಿಗಲ್ಲಾಗೋ ಮೂಲಕ ಅಂತೋಣಿ ದಾಸನ್ ಆರಂಭಿಕವಾಗಿಯೇ ಗೆಲುವು ಸಾಧಿಸಿದ್ದಾರೆ. ಅಂದಹಾಗೆ ಈ ಟೈಟಲ್ ಸಾಂಗ್ ಬರೆದಿರೋದು ಕನ್ನಡ ಚಿತ್ರರಸಿಕರ ನೆಚ್ಚಿನ ಕವಿ ಡಾ. ವಿ. ನಾಗೇಂದ್ರ ಪ್ರಸಾದ್. ಟಗರು ಟೈಟಲ್ ಹಾಡಿನ ಖದರಿನಿಂದಲೇ ಅಂತೋಣಿ ದಾಸನ್ ಕಂಠದಲ್ಲಿ ಮತ್ತಷ್ಟು ಕನ್ನಡ ಹಾಡುಗಳು ಮೂಡಿ ಬರುವ ಸನ್ನಾಹದಲ್ಲಿವೆ.

Continue Reading

Trending

Copyright © 2017 Zox News Theme. Theme by MVP Themes, powered by WordPress.