One N Only Exclusive Cine Portal

ಕಡೆಗೂ ಉಳಿಯಲಿಲ್ಲ ದರ್ಶನ್ ಅಭಿಮಾನಿ!

ಕ್ಯಾನ್ಸರ್ ಕಾಯಿಲೆಯಿಂದ ನರಳುತ್ತಾ ತನ್ನ ಮೆಚ್ಚಿನ ನಟ ದರ್ಶನ್ ಅವರನ್ನು ನೋಡಬೇಕೆಂದೇ ಉಸಿರುಳಿಸಿಕೊಂಡಿದ್ದ ಹುಡುಗ ಶಿವಮೊಗ್ಗದ ರೇವಂತ್. ಈತನ ಬಗ್ಗೆ ಸಿನಿಬಜ್ ಮನಕಲಕುವಂಥಾ ಸವಿವರವಾದ ವರದಿ ಮಾಡಿತ್ತು. ನಂತರ ಮೊನ್ನೆ ತಾನೇ ದರ್ಶನ್ ವೀಡಿಯೋ ಕಾಲ್ ಮೂಲಕ ರೇವಂತ್‌ನೊಂದಿಗೆ ಮಾತಾಡಿದ್ದರು. ಅದಾಗಿ ದಿನದೊಪ್ಪತ್ತಿನಲ್ಲಿಯೇ ರೇವಂತ್ ಕೊನೆಯುಸಿರೆಳೆದಿದ್ದಾನೆ.

ರೇವಂತ್ ಎಂಬ ಹುಡುಗ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಅಪ್ಪಟ ಅಭಿಮಾನಿ. ಶಿವಮೊಗ್ಗದ ರೇವಂತ್ ಆತನ ಸ್ನೇಹಿತರ ವಲಯದಲ್ಲಿ ದರ್ಶನ್ ಅಂತಲೇ ಗುರುತಿಸಿಕೊಳ್ಳುವಷ್ಟರ ಮಟ್ಟಿಗೆ ದರ್ಶನ್ ಅವರನ್ನು ಹಚ್ಚಿಕೊಂಡಿದ್ದಾತ. ಆತ ಕ್ಯಾನ್ಸರ್ ಎಂಬ ಯಮಸದೃಷ ಕಾಯಿಲೆಗೆ ಸಿಕ್ಕು ಕಡೇ ಕ್ಷಣಗಳನ್ನು ಎಣಿಸುತಿದ್ದ. ಹೀಗೆ ಸಾವಿನ ಸಮ್ಮುಖದಲ್ಲಿ ನರಳುತ್ತಾ ಮಲಗಿರೋ ಈ ಹುಡುಗನಿಗೆ ಕಡೇ ಘಳಿಗೆಯಲ್ಲಿ ತನ್ನ ಇಷ್ಟದ ನಟ ದರ್ಶನ್ ಅವರನ್ನು ನೋಡಿ ಕಣ್ಮುಂಬಿಕೊಳ್ಳಬೇಕೆಂಬ ಅದಮ್ಯ ಆಸೆಯಿತ್ತು.

ಶಿವಮೊಗ್ಗದ ರೇವಂತ್ ಆರಂಭ ದಿಂದಲೂ ದರ್ಶನ್ ಅವರ ಪರಮ ಅಭಿಮಾನಿ. ಡಿ ಕಂಪೆನಿಯ ಶಿವಮೊಗ್ಗ ವಿಭಾಗದ ಹುಡುಗನಾತ. ಈಗ್ಗೆ ತಿಂಗಳ ಹಿಂದಷ್ಟೇ ದರ್ಶನ್ ಅವರನ್ನು ಬೆಂಗಳೂರಿಗೆ ಬಂದು ಭೇಟಿಯಾಗಿದ್ದ ಈತ ಫೋಟೋ ತೆಗೆಸಿಕೊಂಡು ಸಂಭ್ರಮಿಸಿದ್ದ. ಆದರೆ ಆ ಹೊತ್ತಿಗಾಗಲೇ ಆತನಿಗೆ ಕ್ಯಾನ್ಸರ್ ಇತ್ತಂತೆ. ಈ ವಿಚಾರ ದರ್ಶನ್ ಅವರಿಗೆ ಗೊತ್ತಿರಲಿಲ್ಲ.

ಅಭಿಮಾನಿಗಳನ್ನು ಅಪಾರವಾಗಿ ಪ್ರೀತಿಸುವವರು ದರ್ಶನ್. ಅವರಿಗೆ ಶಿವಮೊಗ್ಗದ ಹುಡುಗ ರೇವಂತನ ಸ್ಥಿತಿಯೂ ಗೊತಿತ್ತು. ಬಹುಶಃ ದರ್ಶನ್ ಯಾವತ್ತೋ ಹೋಗಿ ಆತನನ್ನು ಮೈದಡವಿ ಮಾತಾಡಿಸುತ್ತಿದ್ದರು. ಆದರೆ ದರ್ಶನ್ ಹೋಗೋ ವಿಚಾರ ಗೊತ್ತಾದರೆ ದೃಷ್ಯ ಮಾಧ್ಯಮಗಳು ಟಾಂ ಟಾಂ ಬಾರಿಸುತ್ತವೆ. ಅಲ್ಲಿ ಅಪಾರವಾದ ಕ್ರೌಡು ಸೃಷ್ಟಿಯಾಗುತ್ತೆ. ಮೊದಲೇ ಮರಣಶಯ್ಯೆಯಲ್ಲಿರೋ ರೇವಂತನ ಮೇಲೂ ಅದರ ಪರಿಣಾಮವಾಗಬಹುದು. ಇಷ್ಟೆಲ್ಲಾ ಮುಂದಾಲೋಚನೆ ಮಾಡಿರೋ ದರ್ಶನ್ ವೀಡಿಯೋ ಕಾಲ್ ಮೂಲಕ ರೇವಂತ್ ಜೊತೆ ಮಾತಾಡಲು ನಿರ್ಧರಿಸಿದ್ದರು. ಈ ನಿರ್ಧಾರಕ್ಕೆ ದರ್ಶನ್ ಅಭಿಮಾನಿಗಳೂ ಸಹಮತ ವ್ಯಕ್ತ ಪಡಿಸಿದ್ದರು. ಕಡೆಗೂ ದರ್ಶನ್ ತಮ್ಮ ಅಭಿಮಾನಿಯೊಂದಿಗೆ ವೀಡಿಯೋ ಕಾಲ್ ಮೂಲಕ ಮಾತಾಡಿದ್ದರು.

ದರ್ಶನ್ ಅವರೇ ಖುದ್ದಾಗಿ ತನಗಾಗಿಯೇ ಕರೆ ಮಾಡಿ ಮಾತಾಡಿದ್ದರಿಂದ ಈ ಹುಡುಗ ಜೀವ ಹಿಂಡುವ ಕ್ಯಾನ್ಸರ್ ನೋವಿನ ನಡುವೆಯೂ ಖುಷಿಯಾಗಿದ್ದ. ವೈದ್ಯರು ಆತ ಇನ್ನು ಹೆಚ್ಚು ದಿನ ಬದುಕೋದಿಲ್ಲ ಅಂದಿದ್ದರೂ ಕೂಡಾ ಆತನ ಹೆತ್ತವರು, ಸ್ನೇಹಿತರು ಮತ್ತು ದರ್ಶನ್ ಅಭಿಮಾನಿ ವಲಯದಲ್ಲಿಯೂ ಹೊಸಾ ಆಸೆಯೊಂದು ಚಿಗುರಿಕೊಂಡಿದ್ದದ್ದು ಸುಳ್ಳಲ್ಲ. ಯಾಕೆಂದರೆ, ಆ ಖುಷಿಯೇ ರೇವಂತ್‌ನೊಳಗೆ ಹೊಸಾ ಚೈತನ್ಯ ಹೊಮ್ಮಿಸಿ ಬದುಕಿಯಾನೇನೋ ಅನ್ನಿಸಿದ್ದು ಸಹಜವೇ. ಆದರೆ ರೇವಂತನ ಕಾಯಿಲೆ ಅದಾಗಲೇ ಕಡೇಯ ಹಂತ ತಲುಪಿದ್ದರಿಂದ ಆತ ಉಸಿರು ಚೆಲ್ಲಿದ್ದಾನೆ.

ದರ್ಶನ್ ಅಭಿಮಾನಿಗಳೆಲ್ಲರೂ ರೇವಂತನ ಚಿಕಿತ್ಸೆಗೆ ನೆರವಾಗಿದ್ದರು. ಆತನನ್ನು ಹೇಗಾದರೂ ಮಾಡಿ ಬದುಕಿಸಿಕೊಳ್ಳಲು ಪ್ರಯತ್ನಿಸಿದ್ದರು. ಆದರೆ ಎಲ್ಲ ಹಾರೈಕೆ, ಪ್ರಯತ್ನಗಳಾಚೆಗೂ ಕ್ಯಾನ್ಸರ್ ರೇವಂತನನ್ನು ಬಲಿ ಪಡೆದುಕೊಂಡಿದೆ. ದರ್ಶನ್ ಮೊನ್ನೆ ಮಾತಾಡಿದಾಗ ಸರಿಯಾಗಿ ಚಿಕಿತ್ಸೆ ಪಡೆದು ಮೊದಲಿನಂತಾಗುವಂತೆ ಹೇಳಿದ್ದರು. ಅದರಿಂದ ಈ ಹುಡುಗ ಉಲ್ಲಸಿತನಾಗಿದ್ದ. ಆದರೀಗ ಆತ ಕಡೆಗೂ ಇನ್ನಿಲ್ಲವಾಗಿದ್ದಾನೆ.

Leave a Reply

Your email address will not be published. Required fields are marked *


CAPTCHA Image
Reload Image