Connect with us

cbn

ಏಪ್ರಿಲ್ 27ರಂದು ಹಾರಾಡಲಿದೆ ಅಶೋಕ್ ಕಶ್ಯಪ್ ಧ್ವಜ!

Published

on

ಛಾಯಾಗ್ರಾಹಕರಾಗಿ ಕನ್ನಡ ಚಿತ್ರರಂಗದಲ್ಲಿ ಹೆಸರುವಾಸಿವಾಯುಗುತ್ತಲೇ ನಿರ್ದೇಶಕರಾಗಿಯೂ ಗುರುತಿಸಿಕೊಂಡಿರುವವರು ಅಶೋಕ್ ಕಶ್ಯಪ್. ಕ್ಯಾಮೆರಾ ಕೈಚಳಕದಿಂದ ಗಮನ ಸೆಳೆಯುತ್ತಲೇ ನಿರ್ದೇಶನಕ್ಕೂ ಸೈ ಎಂದು ಸಾಬೀತು ಪಡಿಸಿರುವ ಕಶ್ಯಪ್ ನಿರ್ದೇಶನದ ಹೊಸಾ ಚಿತ್ರ ‘ಧ್ವಜ’. ಈ ಚಿತ್ರ ಇದೇ ತಿಂಗಳ ೨೭ರಂದು ತೆರೆ ಕಾಣಲು ಮುಹೂರ್ತ ನಿಗಧಿಯಾಗಿದೆ.

ರೀಮೇಕ್ ಬಗ್ಗೆ ಅದೇನೇ ತಕರಾರುಗಳಿದ್ದರೂ ಬೇರೆ ಭಾಷೆಗಳ ಒಳ್ಳೆ ಚಿತ್ರಗಳು ಇಲ್ಲಿನ ನೇಟಿವಿಟಿಗೆ ತಕ್ಕುದಾಗಿ ರೀಮೇಕಾದರೆ ತಪ್ಪೇನಿಲ್ಲ ಎಂಬ ವಾದವೂ ಇದೆ. ಅದಕ್ಕೆ ಸಾಕ್ಷೀಕರಿಸುವಂತೆ ತೆರೆ ಕಾಣಲು ಸಜ್ಜಾಗಿರುವ ಚಿತ್ರ ಧ್ವಜ. ಅಂದಹಾಗೆ ಇದು ತಮಿಳಿನ ಸೂಪರ್ ಹಿಟ್ ಚಿತ್ರ ‘ಕೊಡಿ’ಯ ರೀಮೇಕ್. ಆದರೆ ವರ್ಷಾಂತರಗಳಿಂದಲೂ ಸಿನಿಮಾ ಸಾಹಚರ್ಯದಲ್ಲಿರುವ ಅಶೋಕ್ ಕಶ್ಯಪ್ ಅವರು ಆ ಕಥೆಯನ್ನು ಇಲ್ಲಿನ ನೇಟಿವಿಟಿಗೆ ತಕ್ಕುದಾಗಿ ನಿರ್ದೇಶನ ಮಾಡಿ, ಛಾಯಾಗ್ರಹಣವನ್ನೂ ಅವರೇ ನಿರ್ವಹಿಸಿದ್ದಾರೆ.

ರಾಜಕೀಯ ಮೆಲೋಡ್ರಾಮದ ರೋಚಕ ಕಥೆ ಹೊಂದಿದ್ದ ತಮಿಳಿನ ಕೊಡಿ ಚಿತ್ರದಲ್ಲಿ ಧನುಷ್ ನಾಯಕನಾಗಿದ್ದರು. ಆ ಪಾತ್ರವನ್ನಿಲ್ಲಿ ಹೊಸಾ ಹುಡುಗ ರವಿ ನಿಭಾಯಿಸಿದ್ದಾರೆ. ಮಂಡ್ಯ ಮೂಲದ ರವಿ ಈ ಹಿಂದೆ ಉಪ್ಪಿ ೨ ಚಿತ್ರದಲ್ಲಿಯೂ ನಿರ್ದೇಶನ ವಿಭಾಗದಲ್ಲಿ ಕೆಲಸ ಮಾಡಿದ್ದವರು. ಸಿನಿಮಾ ರಂಗದಲ್ಲಿ ಏನಾದರೊಂದು ಸಾಧಿಸುವ ಹಠ ಹೊತ್ತಿರುವ ರವಿ ತಾವೇ ಈ ಚಿತ್ರವನ್ನು ನಿರ್ಮಾಣ ಮಾಡಿ ನಾಯಕನಾಗಿ ನಟಿಸಿದ್ದಾರೆ.

ಅಂದ ಹಾಗೆ ಮೊದಲ ಚಿತ್ರವಾದರೂ ರವಿ ಅವರದ್ದಿಲ್ಲಿ ಪಕ್ಕಾ ಸವಾಲಿನ ಪಾತ್ರ. ಅವರು ಅಣ್ಣ ಮತ್ತು ತಮ್ಮನ ಎರಡು ಶೇಡ್‌ಗಳ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಎರಡಕ್ಕೆ ಬೇಕಾದ ದೈಹಿಕ ಬದಲಾವಣೆಗಳನ್ನೂ ಕೂಡಾ ಕಷ್ಟಪಟ್ಟು ಮಾಡಿಕೊಂಡಿದ್ದಾರೆ. ತಮಿಳಿನಲ್ಲಿ ತ್ರಿಶಾ ರಾಜಕಾರಣಿಯಾಗಿ ಬೋಲ್ಡ್ ಆಗಿ ನಟಿಸಿದ್ದರಲ್ಲಾ? ಆ ಪಾತ್ರವನ್ನು ಕನ್ನಡದಲ್ಲಿ ಪ್ರಿಯಾಮಣಿ ನಿಭಾಯಿಸಿದ್ದಾರೆ. ಅವರ ಪಾತ್ರಕ್ಕಿಲ್ಲಿ ರಮ್ಯಾ ಎಂಬ ಹೆಸರಿದೆ. ಆದರೆ ಆ ಪಾತ್ರಕ್ಕೂ, ನಟಿ ಕಂ ರಾಜಕಾರಣಿ ರಮ್ಯಾ ಲೈಫ್ ಸ್ಟೋರಿಗೂ ಯಾವ ಸಂಬಂಧವೂ ಇಲ್ಲ ಅಂತ ಈಗಾಗಲೇ ಚಿತ್ರ ತಂಡ ಸ್ಪಷ್ಟೀಕರಣ ನೀಡಿದೆ.

ಈ ಹಿಂದೆ ನಂದಗೋಕುಲ ಎಂಬ ಧಾರಾವಾಹಿಯನ್ನು ನಿರ್ದೇಶನ ಮಾಡಿ ಯಶ್ ಮತ್ತು ರಾಧಿಕಾ ಪಂಡಿತ್ ಅವರನ್ನು ಕಿರುತೆರೆಗೆ ಪರಿಚಯ ಮಾಡಿದ್ದವರು ಅಶೋಕ್ ಕಶ್ಯಪ್. ಆ ನಂತರ ಐವತ್ತಕ್ಕೂ ಹೆಚ್ಚು ಚಿತ್ರಗಳಿಗೆ ಛಾಯಾಗ್ರಾಹಕರಾಗಿ ಕೆಲಸ ಮಾಡುತ್ತಲೇ ನಿರ್ದೇಶನದಲ್ಲಿಯೂ ತೊಡಗಿಸಿಕೊಂಡಿದ್ದ ಅವರ ಮುಂದೆ ಎರಡು ಮರಾಠಿ ಚಿತ್ರಗಳಿವೆ. ಅದಾದ ನಂತರ ಕನ್ನಡದಲ್ಲಿ ಚಿತ್ರ ನಿರ್ದೇಶನ ಮಾಡುವ ಯೋಜನೆ ಹಾಕಿಕೊಂಡಿದ್ದಾರಂತೆ. ಧ್ವಜ ಚಿತ್ರವನ್ನು ಕನ್ನಡದ ಮಟ್ಟಿಗೆ ಹೊಸಾ ಶೈಲಿಯಲ್ಲಿ ಮಾಡಿರೋ ಭರವಸೆ ಹೊಂದಿರುವ ಅಶೋಕ್ ಕಶ್ಯಪ್ ಮತ್ತು ಚಿತ್ರ ತಂಡ ಭರಪೂರ ಗೆಲುವೊಂದರ ನಿರೀಕ್ಷೆಯಲ್ಲಿದೆ. ಪ್ರೇಕ್ಷಕರೂ ಕೂಡಾ ಡಿಫರೆಂಟಾದ ಪೋಸ್ಟರುಗಳು, ಚೆಂದದ ಟ್ರೈಲರ್ ಮತ್ತು ಹಾಡುಗಳಿಂದಾಗಿ ಈ ಚಿತ್ರದ ಬಗ್ಗೆ ಕುತೂಹಲ ಹೊಂದಿದ್ದಾರೆ.

ಇತ್ತೀಚೆಗೆ ಬಿಡುಗಡೆಯಾಗಿದ್ದ ಧ್ವಜ ಚಿತ್ರದ ಹಾಡುಗಳೂ ಕೂಡಾ ಜನ ಮನ ಗೆದ್ದಿವೆ. ಈ ಹಿಂದೆ ರಜನೀಕಾಂತ್ ಅಭಿನಯದ ಕಬಾಲಿ ಚಿತ್ರಕ್ಕೆ ಸಂಗೀತ ಸಂಯೋಜನೆ ಮಾಡಿದ್ದ ಸಂತೋಷ್ ನಾರಾಯಣ್ ಅವರು ಈ ಚಿತ್ರದ ಹಾಡುಗಳಿಗೂ ಸಂಗೀತ ನೀಡಿರುವುದು ವಿಶೇಷ.

cbn

ಅನುಕ್ತ: ಕ್ರೈಂ ಥಿಲ್ಲರ್ ಕಥೆಗಿದೆ ಭೂತ ಕೋಲದ ನಂಟು!

Published

on


ಸ್ಯಾಂಡಲ್‌ವುಡ್‌ಗೆ ಹೊಸಾ ಪ್ರತಿಭೆಗಳ ಆಗಮನವಾಗುತ್ತಾ, ಹೊಸಾ ಅಲೆಯ ಚಿತ್ರಗಳ ಸಂಖ್ಯೆಯೂ ಅಧಿಕವಾಗುತ್ತಿದೆ. ಈಗ ಇಂಥಾ ಪ್ರತಿಭಾನ್ವಿತರೇ ಸೇರಿ ರೂಪಿಸಿರೋ ಅನುಕ್ತ ತೆರೆಗಾಣಲು ರೆಡಿಯಾಗಿದೆ. ಈ ಸಿನಿಮಾ ಮೂಲಕ ಕಿರುತೆರೆಯಲ್ಲಿ ಗುರುತಿಸಿಒಕೊಂಡ ಇದ್ದ ಕಾರ್ತಿಕ್ ಅತ್ತಾವರ್ ನಾಯಕನಾಗಿ ಪಾದಾರ್ಪಣೆ ಮಾಡಿದ್ದಾರೆ. ಇವರಿಗೆ ಜೋಡಿಯಾಗಿ ಸಂಗೀತಾ ಭಟ್ ಅಭಿನಯಿಸಿದ್ದಾರೆ.

ಅನುಕ್ತ ಕ್ರೈಂ ಥಗರಿಲ್ಲರ್ ಕಥಾ ಹಂದರ ಹೊಂದಿರುವ ಚಿತ್ರ. ಇದನ್ನು ಮಂಗಳೂರು  ಮೂಲದ ಅಶ್ವತ್ಥ್ ಸ್ಯಾಮುಯಲ್ ನಿರ್ದೇಶನ ಮಾಡಿದ್ದಾರೆ. ಕರಾವಳಿ ಮೂಲದವರಾದ ಹರೀಶ್ ಬಂಗೇರ ನಿರ್ಮಾಣ ಮಾಡಿದ್ದಾರೆ. ಈ ಮೂಲಕ ಹೊಸಾ ತಂಡವೊಂದು ಅನುಕ್ತ ಮೂಲಕ ಕನ್ನಡ ಚಿತ್ರರಂಗಕ್ಕೆ ಪಾದವೂರಿದೆ. ಅನುಕ್ತ ಸಿನಿಮಾ ಮೂಲಕವೇ ಕಾಲೂರಿ ನಿಲ್ಲುವ, ಮತ್ತಷ್ಟು ಚಿತ್ರಗಳನ್ನು ತಯಾರು ಮಾಡುವ ಉತ್ಸಾಹದಿಂದಿದೆ.

ಈ ಸಿನಿಮಾದ್ದು ವಿಶಿಷ್ಟವಾದ ಜಾಡು. ತುಳುನಾಡಿನ ಸಂಸ್ಕೃತಿಯ ಭಾಗವಾದ ಭೂತ ಕೋಲ ಸೇರಿದಂತೆ ಎಲ್ಲವೂ ಇಲ್ಲಿದೆ. ಅದನ್ನೆಲ್ಲ ಕ್ರೈಂ ಥ್ರಿಲ್ಲರ್ ಕಥಾನಕಕ್ಕೆ ಬ್ಲೆಂಡ್ ಮಾಡಲಾಗಿದೆಯಂತೆ. ಆದ್ದರಿಂದಲೇ ಇಡೀ ಚಿತ್ರೀಕರಣ ಕರಾವಳಿ ಭಾಗದಲ್ಲಿಯೇ ನಡೆದಿದೆ. ಇದೆಲ್ಲದರ ನಡುವೆಯೇ ಕನಸಿಗೆ ಅರ್ಥವನ್ನೂ ಹುಡುಕ ಹೊರಟಿರೋ ಅನುಕ್ತ ಇಪ್ಪತ್ತೆಂಟು ದಿನಗಳಲ್ಲಿಯೇ ಸಂಪೂರ್ಣ ಚಿತ್ರೀಕರಣ ಮುಗಿಸಿಕೊಂಡಿದೆ.

ಹೀಗೆ ವೇಗವಾಗಿ ಚಿತ್ರೀಕರಣ ಮುಗಿಸಿಕೊಳ್ಳೋದಕ್ಕೆ ಕಾರಣ ಪ್ಲಾನಿಂಗ್. ಕೇವಲ ಇಪ್ಪತ್ತೆಂಟು ದಿನಗಳಲ್ಲಿ ಚಿತ್ರೀಕರಣ ಸಮಾಪ್ತಿ ಮಾಡಿಕೊಂಡಿದ್ದರ ಹಿಂದೆ ಎಂಟು ತಿಂಗಳ ಶ್ರಮವಿದೆಯಂತೆ. ತುಳುನಾಡಿನ ಸಂಸ್ಕ್ರತಿ ಅಂದರೆ ಮೊಗೆದಷ್ಟೂ ಮುಗಿಯದ ಅಕ್ಷಯ ಪಾತ್ರೆಯಂಥಾದ್ದು. ಈ ಬಗ್ಗೆ ಪ್ರೇಕ್ಷಕರ ಕೌತುಕ ತಣಿಯುವುದೇ ಇಲ್ಲ. ಅಂಥಾದ್ದರಲ್ಲಿ ಅದನ್ನೇ ಜೀವಾಳವಾಗಿಸಿಕೊಂಡಿರೋ ಅನುಕ್ತ ಬಗ್ಗೆ ಸಹಜವಾಗಿಯೇ ಪ್ರೇಕ್ಷಕರು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಈಗ ಬೇರೆ ಭಾಷೆಗಳಿಗೂ ರೀಮೇಕ್‌ಗಾಗಿ ಬಹು ಬೇಡಿಕೆ ಹೊಂದಿರುವ ಅನುಕ್ತ ಬಿಡುಗಡೆಗೆ ಸಜ್ಜುಗೊಂಡಿದೆ.

Continue Reading

cbn

ಬಿಲ್ಲಾ ರಂಗ ಭಾಷಾ: ಮೂರು ಅವತಾರದಲ್ಲಿ ಮಿಂಚಲಿದ್ದಾರಾ ಸುದೀಪ್?

Published

on


ರಂಗಿತರಂಗ ಖ್ಯಾತಿಯ ಅನೂಪ್ ಭಂಡಾರಿ ಸುದೀಪ್ ಚಿತ್ರವನ್ನು ನಿರ್ದೇಶನ ಮಾಡಲಿದ್ದಾರೆಂಬ ಸುದ್ದಿಗೆ ಎರಡ್ಮೂರು ವರ್ಷ ತುಂಬಿದೆ. ಇಷ್ಟೊಂದು ಕಾಲಾವಧಿಯ ನಂತರ ಅದೀಗ ನಿಜವಾಗಿದೆ. ಈ ಚಿತ್ರಕ್ಕೆ ಬಿಲ್ಲಾ ರಂಗ ಭಾಷಾ ಎಂಬ ಶೀರ್ಷಿಕೆಯೂ ನಿಗಧಿಯಾಗಿ ಅನಾವರಣಗೊಂಡಿದೆ.

ಬಿಲ್ಲಾ ರಂಗ ಭಾಷಾ ಎಂಬ ಶೀರ್ಷಿಕೆ ಕಂಡೇ ಸುದೀಪ್ ಅಭಿಮಾನಿ ಬಳಗ ಖುಷಿಗೊಂಡಿದೆ. ಇದರ ಬೆನ್ನಲ್ಲಿಯೇ ಒಂದಷ್ಟು ಕುತೂಹಲ ಬೆರೆತ ಗೊಂದಲಗಳೂ ಕಾಡಲಾರಂಭಿಸಿವೆ. ಇದರಲ್ಲಿ ಕಿಚ್ಚಾ ಸುದೀಪ್ ಮೂರು ಪಾತ್ರಗಳಲ್ಲಿ ಅಭಿನಯಿಸಲಿದ್ದಾರಾ? ಶೀರ್ಷಿಕೆಯಲ್ಲಿರುವಂತೆ ಮೂರು ಪಾತ್ರಗಳು ಈ ಸಿನಿಮಾದಲ್ಲಿ ಇರಲಿದ್ದಾವಾ ಅಂತೆಲ್ಲ ಪ್ರಶ್ನೆಗಳು ಅಭಿಮಾನಿಗಳಲ್ಲಿವೆ.

 

ಆದರೆ ಅನೂಪ್ ಭಂಡಾರಿ ಅಪ್ಪಿ ತಪ್ಪಿಯೂ ಈ ವಿಚಾರದ ಬಗ್ಗೆ ಬಾಯಿ ಬಿಟ್ಟಿಲ್ಲ. ಆದರೆ ಕನ್ನಡ ಚಿತ್ರರಂಗದ ಪಾಲಿಗೆ ಈ ಚಿತ್ರವನ್ನು ವಿಭಿನ್ನವಾಗಿ ನೆಲೆಗಾಣಿಸೋ ಉತ್ಸಾವಂತೂ ಅವರಲ್ಲಿ ಸ್ಪಷ್ಟವಾಗಿಯೇ ಕಾಣಿಸುತ್ತಿದೆ. ರಂಗಿತಂರಂಗ ಮೂಲಕ ಭರ್ಜರಿ ಗೆಡಲುವು ದಾಖಲಿಸಿದ್ದ ಅನೂಪ್ ಎರಡನೇ ಚಿತ್ರವಾದ ರಾಜರಥದಲ್ಲಿ ಮುಗ್ಗರಿಸಿದ್ದರು. ಭಾರೀ ನಿರೀಕ್ಷೆ ಹುಟ್ಟಿಸಿದ್ದ ಈ ಚಿತ್ರ ಸೋತಿತ್ತು.

ಈ ಸೋಲಿನಿಂದ ಪಾಠ ಕಲಿತಿರೋ ಅನೂಪ್ ಬಿಲ್ಲಾ ರಂಗ ಭಾಷ ಮೂಲಕ ಮತ್ತೆ ಎದ್ದು ನಿಲ್ಲುವ ಹುರುಪಿನೊಂದಿಗೆ ತಯಾರಾಗಿದ್ದಾರೆ. ಕಿಚ್ಚಾ ಸುದೀಪ್ ಕೂಡಾ ಸರಿಯಾಗಿಯೇ ಸಾಥ್ ನೀಡಿದ್ದಾರೆ. ಈ ಬಗೆಗಿನ ಮತ್ತಷ್ಟು ಮಾಹಿತಿಗಳನ್ನು ಅನೂಪ್ ಇಷ್ಟರಲ್ಲಿಯೇ ಜಾಹೀರು ಮಾಡಲಿದ್ದಾರೆ.

Continue Reading

cbn

ಜೀ ಕನ್ನಡದಲ್ಲಿ ಹಾರರ್ ಆತ್ಮಬಂಧನ

Published

on

ಕಳೆದ ಹಲವು ವರ್ಷಗಳಿಂದಲೂ ಜೀ ಕನ್ನಡ ವಾಹಿನಿ ಸದಾ ತನ್ನ ಕಾರ್ಯಕ್ರಮ ಕಟ್ಟಿಕೊಡುವಲ್ಲಿ ಹೊಸತನವನ್ನು ಮೈಗೂಡಿಸಿಕೊಳ್ಳುವ ಮೂಲಕ ವೀಕ್ಷಕರಿಗೆ ಹೆಚ್ಚು ಹೆಚ್ಚು ಹತ್ತಿರವಾಗುತ್ತಿದೆ. ಜೋಡಿ ಹಕ್ಕಿ, ಸುಬ್ಬಲಕ್ಷ್ಮಿಸಂಸಾರ, ಕಮಲಿ, ಯಾರೆ ನೀ ಮೋಹಿನಿ, ವಿಷ್ಣು ದಶಾವತಾರ, ಮಹಾದೇವಿ, ನಾಗಿಣಿ, ಪಾರು, ಬ್ರಹ್ಮಗಂಟು ಮೊದಲಾದ ಧಾರಾವಾಹಿಗಳು ಹೊಸ ಇತಿಹಾಸ ಬರೆದಿವೆ. ವಾರಾಂತ್ಯ ಧಾರಾವಾಹಿ ಉಘೇ ಉಘೇ ಮಾದೇಶ್ವರ, ಅಲ್ಲದೆ ಸರಿಗಮಪ, ಡ್ರಾಮಾದಂಥ ರಿಯಾಲಿಟಿ ಷೊಗಳು ಕನ್ನಡಿಗರ ಮನೆಮಾತಾಗಿವೆ.

ಇದೀಗ ಜೀ ಕನ್ನಡ ವಾಹಿನಿಯಲ್ಲಿ ಆತ್ಮಬಂಧನ ಎಂಬ ಮತ್ತೊಂದು ಹಾರರ್ ಧಾರಾವಾಹಿ ಮೂಡಿಬರಲಿದೆ. ಜನನ ಮತ್ತು ಮರಣದ ಸಾಕ್ಷಿ ಆತ್ಮ. ಮರಣಾ ನಂತರವೂ ಆತ್ಮ ತನ್ನ ಪ್ರೀತಿ ಮತ್ತು ದ್ವೇಷವನ್ನು ಬಿಡುವುದಿಲ್ಲ ಎಂಬುದು ಸಾಮಾನ್ಯ ನಂಬಿಕೆ. ಈ ಎಳೆಯನ್ನು ಇಟ್ಟುಕೊಂಡು ತಾಯಿ ಮತ್ತು ಪುಟ್ಟ ಮಗನ ನಡುವಿನ ಬಾಂಧವ್ಯದ ಹಿನ್ನೆಲೆಯಲ್ಲಿ ಆತ್ಮಬಂಧನ ಧಾರಾವಾಹಿಯನ್ನು ನಿರೂಪಿಸಲಾಗುತ್ತಿದೆ. ದುರಂತದಲ್ಲಿ ಮರಣವನ್ನಪ್ಪುವ ಮಗನ ಆತ್ಮ ತನ್ನ ಅಮ್ಮನ ಪ್ರೀತಿಗಾಗಿ ಹಂಬಲಿಸಿ ಬರುವ ಮತ್ತು ಆ ಪ್ರೀತಿಗೆ ಅಡ್ಡ ಬರುವವರನ್ನು ಶಿಕ್ಷಿಸುವ ಕಥಾಹಂದರ ಇದರಲ್ಲಿದೆ. ಈ ಹಿನ್ನೆಲೆಯಲ್ಲಿ ಕೌಟುಂಬಿಕ ಪ್ರೀತಿ-ದ್ವೇಷಗಳು ಹಾಗೂ ಪತಿ-ಪತ್ನಿಯರ ಸಂಬಂಧದ ನಡುವೆ ಏಳುವ ಬಿರುಗಾಳಿ ಹೊಸ ಬಗೆಯಲ್ಲಿ ನಿರೂಪಿತವಾಗಿದೆ. ಈ ಧಾರಾವಾಹಿಯನ್ನು ನಿರ್ದೇಶಕ ಜಿ.ಕೆ. ಸತೀಶ್ ಕೃಷ್ಣನ್ ನಿರ್ದೇಶಿಸುತ್ತಿದ್ದಾರೆ. ದ್ವಿಜ ಕ್ರಿಯೇಷನ್ಸ್ ಅಡಿಯಲ್ಲಿ ಮಹೇಶ್ ಗೌಡ, ಡಾ| ಸುಮಾ ಈ ಧಾರಾವಾಹಿಯನ್ನು ನಿರ್ಮಿಸುತ್ತಿದ್ದಾರೆ. ಇದರ ಕಥಾವಿಸ್ತರಣೆ, ಚಿತ್ರಕತೆಯನ್ನು ಎಸ್. ಸೆಲ್ವಂ ಮತ್ತು ಗಿರೀಶ್ ತಂಡ ನಿರ್ವಹಿಸಿದೆ. ರತ್ನಗಿರಿ ಅವರ ಸಂಭಾಷಣೆ, ವಿನಯ್ ಅವರ ಸಂಗೀತ, ಹರ್ಷಪ್ರಿಯ ಅವರ ಶೀರ್ಷಿಕೆ ಸಾಹಿತ್ಯ ಇದಕ್ಕಿದೆ. ಎದೆಯಲ್ಲಿ ಕಂಪನ ಹುಟ್ಟಿಸುವ ಗ್ರಾಫಿಕ್ಸ್ ಪ್ರತಿ ಸಂಚಿಕೆಯಲ್ಲೂ ವೀಕ್ಷಕರಿಗೆ ಹೊಸ ಅನುಭವ ನೀಡಲಿದೆ.

ಆತ್ಮಬಂಧನ ವೀಕ್ಷಕರಿಗೆ ಮನರಂಜನೆಯ ಹೊಸ ಬಾಗಿಲು ತೆರೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸುತ್ತಾರೆ ಜೀ ಕನ್ನಡ ವಾಹಿನಿಯ ಬಿಸ್ನೆಸ್ ಹೆಡ್ ರಾಘವೇಂದ್ರ ಹುಣಸೂರು. ಎಲ್ಲ ವಯೋಮಾನದವರನ್ನೂ ಗಮನದಲ್ಲಿರಿಸಿಕೊಂಡು ಕುಟುಂಬ ಸಮೇತ ನೋಡುವಂತೆ ಈ ಹಾರರ್ ಧಾರಾವಾಹಿ ರೂಪಿಸಿದ್ದೇವೆ ಎನ್ನುತ್ತಾರೆ ನಿರ್ದೇಶಕ ಜಿ.ಕೆ. ಸತೀಶ್ ಕೃಷ್ಣನ್. ತಾರಾಗಣದಲ್ಲಿ ರಜನಿ, ಪ್ರಶಾಂತ್, ಬಾಲನಟ ಆಲಾಪ್, ಶಿವಾನಿ, ಲಕ್ಷ್ಮೀಗೌಡ, ರಾಮಮೂರ್ತಿ, ರಾಜೇಶ್, ನೇತ್ರಾ ಸಿಂಧ್ಯಾ, ಸುನೇತ್ರ ಪಂಡಿತ್ ಮುಂತಾದವರಿದ್ದಾರೆ. ಜೀ ಕನ್ನಡ ವಾಹಿನಿಯಲ್ಲಿ ಡಿಸೆಂಬರ್ ೧೭ ರಿಂದ ಸೋಮ-ಶುಕ್ರವಾರ ರಾತ್ರಿ ೧೦:೩೦ಕ್ಕೆ ಆತ್ಮಬಂಧನ ಪ್ರಸಾರವಾಗಲಿದೆ.

Continue Reading

Trending

Copyright © 2018 Cinibuzz