Connect with us

ಸಿನಿಮಾ ವಿಮರ್ಶೆ

ಇದು ಬಿಟ್ಟು ಬಂದವಳ ಕತೆ!

Published

on

ಸಿಟಿ ಲೈಫಿನೊಟ್ಟಿಗೆ ಕನೆಕ್ಷನ್ನೇ ಇಲ್ಲದ ತಂದೆ ತಾಯಿ. ಪ್ರೀತಿಸೋ ತಂದೆ ತಾಯಿಯನ್ನು ಬಿಟ್ಟು ನಗರ ಸೇರಿ ದುಡಿಮೆಯೇ ಜೀವನ ಅಂತಾ ನಂಬಿದ ಮಗಳು. ಕಾರ್ಪೊರೇಟು ಬದುಕಿಗೆ ಹೊಂದಿಕೊಂಡು, ದಿನೇದಿನೆ ಉದ್ಯೋಗದಲ್ಲಿ ಉನ್ನತಿ ಪಡೆಯೋದೇ ಆಕೆಯ ಗುರಿ. ಈ ಮಧ್ಯೆ ಜೊತೆಯಾಗುವ ಗಂಡು ಜೀವ. ಇವರಿಬ್ಬರೂ ಇರುವ ಸೌಕರ್ಯಗಳನ್ನು ಬಳಸಿಕೊಂಡು ರಾಯಲ್ಲಾಗಿ ಜೀವಿಸುವ ಪ್ರಕ್ರಿಯೆಗೆ ಇಟ್ಟುಕೊಂಡ ಹೆಸರು ಲಿವಿನ್ ರಿಲೇಷನ್‌ಶಿಪ್ಪು. ಹಾಗೆ ಜೀವ ಜೀವಗಳು ಬೆಸೆದುಕೊಂಡಾಗ ಮರಿಹಾಕುವ ಮತ್ತೊಂದು ಜೀವ. ಲವ್ವು, ಪ್ರಪೋಸು, ಕೂಡಿಕೆ, ಬ್ರೇಕಪ್ಪು… ಹೀಗೆ ಇಲ್ಲಿ ಎಲ್ಲವೂ ಫಾಸ್ಟು!

ಇಷ್ಟೇ ಲೈಫು ಅಂತಾ ಅಂದುಕೊಂಡವಳು ಬದುಕು ಮುಗಿಸಿಕೊಳ್ಳುವ ನಿರ್ಧಾರಕ್ಕೆ ಬಂದಮೇಲಷ್ಟೇ ಅಸಲೀ ಜೀವನ ಆರಂಭವಾಗುತ್ತದೆ. ಇರುವುದೆಲ್ಲವನ್ನೂ ಬಿಟ್ಟು ಇರದುದರೆಡೆಗೆ ತುಡಿಯುವ ಮನಸ್ಸು ಅನಾವರಣಗೊಳ್ಳುತ್ತದೆ. ಒದ್ದು ಬಂದ ಹೆಜ್ಜೆಗಳೆಲ್ಲವೂ ಮತ್ತೆ ಬಾ ಎನ್ನಲು ಶುರು ಮಾಡುತ್ತದೆ. ವಿಷ ತುಂಬಿದ ಮನುಷ್ಯರ ನಡುವೆ ಬದುಕೋದಕ್ಕಿಂತಾ ಪ್ರೀತಿ ಕೊಡೋ ಬೊಂಬೆಗಳ ಜೊತೆಗೆ ಜೀವಂತಿಕೆ ಹುಡುಕಿಕೊಂಡ ಹುಡುಗನೊಬ್ಬ ಜೊತೆಯಾಗುತ್ತಾನೆ. ತಾನು ಬಯಸಿದ ಹೊಸ ನೆಲೆಯೊಂದು ಸಿಕ್ಕಿತು ಅನ್ನುವಷ್ಟರಲ್ಲಿ ಮತ್ತೇನೋ ಘಟಿಸುತ್ತೆ.

ಕಾಂತ ಕನ್ನಲ್ಲಿ ನಿರ್ದೇಶಕ ಶಶಾಂಕ್ ಗರಡಿಯಲ್ಲಿ ಬೆಳೆದುಬಂದವರಾದ್ದರಿಂದಲೋ ಏನೋ ಮನುಷ್ಯ ಸಂಬಂಧಗಳು, ಅದರೊಂದಿಗೆ ಬೆಸೆದುಕೊಂಡ ಭಾವುಕತೆಯನ್ನು ತಣ್ಣಗೆ ತೆರೆದಿಡುವ ಕಲೆ ಅವರಿಗೆ ಒಲಿದಿದೆ. ದೃಶ್ಯಕ್ಕೆ ಬೇಕಾದಷ್ಟೇ ಮಾತು, ಮಿಕ್ಕಂತೆ ಸ್ವಗತದಲ್ಲಿ ಹರಟೆ, ತುಂಬಾ ಮಾತಾಡಿಸಿಬಿಡಬಹುದಾದ್ದ ದೃಶ್ಯಗಳನ್ನು ಅಂಥಾ ಅಪಾಯದಿಂದ ಪಾರು ಮಾಡಿ ನಿಶಬ್ಧದಲ್ಲೇ ಹೇಳಿಬಿಡುವ ನಾಜೂಕುತನ… ಇವೆಲ್ಲವೂ ನಿರ್ದೇಶಕರ ಜಾಣತನವನ್ನೂ ಮತ್ತವರ ಕಸುಬುದಾರಿಕೆಯನ್ನೂ ತೋರಿಸಿದೆ. ಇನ್ನು ನಿರ್ದೇಶಕ ಕಾಂತಾ ಅವರ ಕನಸಿಗೆ ಕಣ್ಣಾದವರು ಛಾಯಾಗ್ರಾಹಕ ವಿಲಿಯಮ್ ಡೇವಿಡ್. ಒಂದೊಂದು ದೃಶ್ಯಕ್ಕೂ ಅಳೆದೂ ತೂಗಿ ಇಷ್ಟಿದ್ದರೆ ಸಾಕು ಅಂತಾ ತೀರ್ಮಾನಿಸಿ ಅವರಿಟ್ಟಿರುವ ಒಂದೊಂದು ಫ್ರೇಮೂ ಮುದ್ದುಮುದ್ದಾಗಿವೆ. ಬಳಸಿರುವ ಲೈಟು ಮತ್ತು ಹದವಾದ ಬಣ್ಣ ಕೂಡಾ ಸಿನಿಮಾದ ಒಟ್ಟಂದವನ್ನು ಹೆಚ್ಚಿಸಿದೆ.

ಬಹುಶಃ ಇದು ನಾಯಕನಟಿ ಮೇಘನಾರಾಜ್ ವೃತ್ತಿಬದುಕಿನ ಬಹುಮುಖ್ಯ ಚಿತ್ರವಾಗುವುದರಲ್ಲಿ ಸಂಶಯವಿಲ್ಲ. ಕಾರ್ಪೊರೇಟ್ ಬದುಕಿಗೆ ಒಗ್ಗಿಕೊಂಡು ಒಳ್ಳೆ ಸ್ಥಾನ, ದುಡಿಮೆಯಷ್ಟೇ ಮುಖ್ಯ ಅಂತಾ ತೀರ್ಮಾನಿಸಿ ಖಾಸಗೀ ಬದುಕನ್ನು ನರಕವಾಗಿಸಿಕೊಳ್ಳುವ, ಆತುರದ ನಿರ್ಧಾರಗಳಿಂದ ಸುಖ ಶಾಂತಿಗೆ ಭಂಗ ಸೃಷ್ಟಿಸಿಕೊಳ್ಳುವ ಹೆಣ್ಣುಮಕ್ಕಳ ಪ್ರತಿನಿಧಿಯಂತಾ ಪಾತ್ರದಲ್ಲಿ ಮೇಘನಾ ಮನೋಜ್ಞವಾಗಿ ಅಭಿನಯಿಸಿದ್ದಾರೆ. ಬೊಂಬೆ ಹುಡುಗ ಶ್ರೀಮಹದೇವ್ ಇಷ್ಟವಾಗುತ್ತಾನೆ. ಚಿತ್ರದ ನಾಯಕನಂತೆ ಪ್ರೇಕ್ಷಕರೂ ಕೂಡಾ ನಿರೀಕ್ಷಿಸದೇ ಎಂಟ್ರಿ ಕೊಡುವ ಪುಟಾಣಿ ಹುಡುಗ ಅಭಿಷೇಕ್ ರಾಯಣ್ಣ ದ್ವಿತೀಯಾರ್ಧವನ್ನು ಮಾತ್ರವಲ್ಲ ನೋಡುಗರ ಮನಸ್ಸನ್ನೂ ಆವರಿಸಿಕೊಂಡುಬಿಡುತ್ತಾನೆ. ಅಪರೂಪಕ್ಕೆನ್ನುವಂತೆ ತಿಲಕ್ ಶೇಖರ್‌ಗೆ ಸೊಗಸಾದ ಪಾತ್ರವೊಂದು ಇಲ್ಲಿ ದಕ್ಕಿದೆ. ಅಚ್ಯುತ್ ಕುಮಾರ್ ಬರೀ ನಟನಲ್ಲ ಪಾತ್ರವನ್ನೇ ಜೀವಿಸುವ ಪ್ರತಿಭೆ ಅನ್ನೋದು ಇಲ್ಲೂ ಸಹ ಮುಂದುವರೆದಿದೆ. ಮಹೇಶ್ ಮಳವಳ್ಳಿ ಅವರ ಸೊಗಸಾದ ಸಂಭಾಷಣೆ, ಶ್ರೀಧರ್ ಸಂಭ್ರಮ್ ಅವರ ಮ್ಯೂಸಿಕ್ಕು, ಇರುವೆ ಬಿಟ್ಟು ಥಕಥೈ ಕುಣಿಸುವ ಸಿಂಬು ಹಾಡು, ಕಣ್ತಂಪು ಮಾಡೋ ಲೊಕೇಷನ್ನುಗಳು… ಹೀಗೆ ಎಲ್ಲವೂ ಚೆಂದ ಎನಿಸುವ, ಎಲ್ಲರೂ ಒಮ್ಮೆ ನೋಡಲೇ ಬೇಕಾದ ಸಿನಿಮಾ `ಇರುವುದೆಲ್ಲವ ಬಿಟ್ಟು ಇರುವೆ ಬಿಟ್ಟುಕೊಳ್ಳುವುದೇ ಜೀವನ’

ಸಿನಿಮಾ ವಿಮರ್ಶೆ

ಆರೆಂಜ್: ಭರಪೂರ ಮನರಂಜನೆಯ ಫ್ಯಾಮಿಲಿ ಪ್ಯಾಕೇಜ್!

Published

on

ಲವ್ ಗುರು ಪ್ರಶಾಂತ್ ರಾಜ್ ನಿರ್ದೇಶನದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯಿಸಿರುವ ಆರೆಂಜ್ ಸಿನಿಮಾ ಇಂದು ತೆರೆಗೆ ಬಂದಿದೆ. ಪ್ರಶಾಂತ್ ರಾಜ್ ಈ ವರೆಗೆ ನಿರ್ದೇಶಿಸಿರುವ ಒಂದೊಂದು ಸಿನಿಮಾ ಕೂಡಾ ಭಿನ್ನ ಕಥಾವಸ್ತುಗಳನ್ನು ಒಳಗೊಂಡಿದೆ. ಒಂದೇ ಬಗೆಯ ಸಿನಿಮಾಗಳಿಗೆ ಪ್ರಶಾಂತ್ ರಾಜ್ ಯಾವತ್ತೂ ಜೋತುಬಿದ್ದವರಲ್ಲ. ಆರೆಂಜ್ ಕೂಡಾ ಅವರ ಈ ಹಿಂದಿನ ಎಲ್ಲ ಸಿನಿಮಾಗಳಿಗಿಂತಾ ಬೇರೆಯದ್ದೇ ರೀತಿಯಲ್ಲಿ ಮೂಡಿಬಂದಿದೆ.

ಗಣೇಶ್ ಈ ಚಿತ್ರದಲ್ಲಿ ಕಳ್ಳ ಹೀರೋ ಆಗಿ ಕಾಣಿಸಿಕೊಂಡಿದ್ದಾರೆ. ಜೈಲಿನಿಂದ ಬಿಡುಗಡೆಯಾಗಿ ತನ್ನ ಸ್ಥಳಕ್ಕೆ ಹೋಗುತ್ತಿರೋ ಸಂದರ್ಭದಲ್ಲಿ ಟ್ರೈನಿನಲ್ಲಿ ಜೊತೆಯಾಗುವವಳು ನಾಯಕಿ. ಆರೆಂಜು ಬಣ್ಣದ ಸೀರೆ ತೊಟ್ಟು, ಕೈಗೆ ಆರೆಂಜು ಕೊಡೋ ಮೂಲಕ ಹೀರೋ ಜೊತೆಗೆ ಈಕೆಯ ನಂಟು ಆರಂಭವಾಗುವ ಹಂತದಲ್ಲಿರುತ್ತದೆ. ಅಷ್ಟರಲ್ಲಿ ಟ್ರೈನು ಮಿಸ್ ಆಗಿ, ಮಿಸ್ ಆಗಿದ್ದ ಆಕೆಯ ವಸ್ತುವೊಂದು ಹೀರೋ ಬಳಿ ಉಳಿಯುತ್ತದೆ. ಅದನ್ನು ತಲುಪಿಸಲು ಗಣೇಶ್ ನಾಯಕಿಯ ಮನೆ ಸೇರುತ್ತಾರೆ. ಆಕೆಯ ಮನೆಯವರೊಟ್ಟಿಗೆ ಈತನ ಬಾಂಧವ್ಯ ಬೆಸೆದುಕೊಳ್ಳುತ್ತದೆ. ವಿಚಿತ್ರವೆಂದರೆ ನಾಯಕಿಗೆ ಅದಾಗಲೇ ಬೇರೊಬ್ಬ ಪ್ರಿಯಕರನಿರುತ್ತಾನೆ. ಹೇಳಿ ಕೇಳಿ ಸಂತೋಷ್ (ಗಣೇಶ್) ಜೈಲಿಂದ ರಿಲೀಸಾದ ಕಳ್ಳ. ಹುಡುಗಿಯದ್ದು ತುಂಬು ಸಂಸಾರ. ಮನೆಯ ಸದಸ್ಯರಲ್ಲೊಬ್ಬನಾಗಿ ಬೆರೆತುಹೋಗುವ ಈತನ ಅಸಲೀ ಹಿನ್ನೆಲೆ ಆಕೆಯ ಮನೆವರಿಗೆ ಗೊತ್ತಾಗಿಬಿಟ್ಟರೆ? ಯಾರೋ ಮದುವೆಯಾಗಬೇಕಿರುವ ಹುಡುಗಿಗೂ ಹೀರೋ ಸಂತೋಷ್‌ಗೂ ಕೂಡಿಕೆಯಾಗೋದಾದರೂ ಹೇಗೆ?… ಇವೆಲ್ಲಾ ಚಿತ್ರದಲ್ಲಿ ಪ್ರತೀ ಕ್ಷಣ ಕಾಡುವ ಕುತೂಹಲ.

ಒಂದು ಮಜಬೂತಾದ ಫ್ಯಾಮಿಲಿ ಸಬ್ಜೆಕ್ಟನ್ನು ನಿರ್ದೇಶಕ ಪ್ರಶಾಂತ್ ರಾಜ್ ಸಮರ್ಥವಾಗಿ ನಿಭಾಯಿಸಿದ್ದಾರೆ. ಇಡೀ ಸಿನಿಮಾದ ಪೂರ್ತಿ ಕಚಗುಳಿಯಿಡೋದು ಸಾಧು ಕೋಕಿಲಾ ಕಾಮಿಡಿ. ಅರ್ಧ ಸಿನಿಮಾ ಮುಗಿಯೋ ಹೊತ್ತಿಗೆ ಎಂಟ್ರಿ ಕೊಡುವ ರವಿಶಂಕರ್ ಗೌಡರ ಕಾಮಿಡಿ ನಗುವನ್ನು ಎಂಜಾಯ್ ಮಾಡೋರ ಪಾಲಿಗೆ ಬೋನಸ್.

ಅವಿನಾಶ್, ಪದ್ಮಜಾರಾವ್, ಸಾಧು, ರವಿಶಂಕರ್, ರಂಗಾಯಣ ರಘು, ಪ್ರಿಯಾ ಆನಂದ್… ಮಾತ್ರವಲ್ಲದೆ ಇಡೀ ಸಿನಿಮಾದಲ್ಲಿ ಸಾಕಷ್ಟು ಜನ ನಟ-ನಟಿಯರ ದಂಡೇ ಇದೆ. ಇಷ್ಟೊಂದು ಪಾತ್ರಗಳನ್ನಿಟ್ಟುಕೊಂಡು ಸಿನಿಮಾ ಕಟ್ಟೋದು ಸಲೀಸಾದ ಮಾತಲ್ಲ. ಆದರೆ ಆರೆಂಜ್ ಸಿನಿಮಾ ನೋಡುಗರಿಗೆ ಯಾವ ತ್ರಾಸವನ್ನೂ ನೀಡದೇ ಸಲೀಸಾಗಿ ಸಾಗುತ್ತದೆ. ಸಂತೋಷ್ ರೈ ಪಾತಾಜೆ ಅವರ ಛಾಯಾಗ್ರಹಣ ಕಣ್ಣಿಗೆ ಸಂತೋಷ ನೀಡುತ್ತದೆ. ಗೋಲ್ಡನ್ ಸ್ಟಾರ್ ಗಣೇಶ್ ಮುದ್ದು ಮುದ್ದಾಗಿ ಕಾಣಿಸಿದ್ದಾರೆ. ನಟರಾಜ್ ಸಂಭಾಷಣೆ ಚಿತ್ರಕ್ಕೆ ಪೂರಕವಾಗಿ ನೋಡುಗರಿಗೆ ಮಜಾ ಕೊಡುತ್ತದೆ.
ಒಟ್ಟಾರೆ ಸಿನಿಮಾ ಯಾವುದೇ ಪೂರ್ವಾಗ್ರಹವಿಲ್ಲದೆ ನೋಡೋರಿಗೆ ಪರಿಪೂರ್ಣ ಮನರಂಜನೆ ನೀಡುವಲ್ಲಿ ಗೆದ್ದಿದೆ.

Continue Reading

ಸಿನಿಮಾ ವಿಮರ್ಶೆ

ಕರ್ಷಣಂ: ಕೊಲೆಗಳ ಸುತ್ತಾ ಕೌತುಕದ ಕಂದೀಲು!

Published

on

ನಾಲಕ್ಕು ಚಿತ್ರ ವಿಚಿತ್ರ ಕೊಲೆ ಮತ್ತು ಅದರ ಸುತ್ತಾ ಸುತ್ತುವ ಮೈ ನವಿರೇಳಿಸೋ ಕಥೆ… ಯಾವ ಗೊಂದಲಗಳಿಗೂ ಅವಕಾಶವಿಲ್ಲದ, ಯಾವ ಗೋಜಲುಗಳೂ ಕಾಡದಂತೆ ಸರಾಗವಾಗಿ ನೋಡಿಸಿಕೊಂಡು, ಕ್ಷಣ ಕ್ಷಣವೂ ನೋಡುಗರನ್ನು ಕುತೂಹಲದ ಮಡುವಿಗೆ ತಳ್ಳೋ ಚಿತ್ರ ಕರ್ಷಣಂ!

ಧನಂಜಯ ಅತ್ರೆ ನಿರ್ಮಾಪಕರಾಗಿ, ನಾಯಕನಾಗಿಯೂ ಅಭಿನಯಿಸಿರೋ ಕರ್ಷಣಂ ಹೆಸರಿನಂಥಾದ್ದೇ ಖದರ್ ಹೊಂದಿರೋ ಕಥೆ, ನಿರೂಪಣೆಯಿಂದಲೇ ನೋಡುಗರಿಗೆ ಹೊಸಾ ಅನುಭವ ನೀಡುವಲ್ಲಿ ಗೆದ್ದಿದೆ. ತಾವು ನಾಯಕನಾಗಿ ನಟಿಸಬೇಕು, ಚಿತ್ರವೊಂದನ್ನು ನಿರ್ಮಾಣ ಮಾಡಬೇಕೆಂದು ಧನಂಜಯ್ ಅತ್ರೆ ಶ್ರಮ ಪಟ್ಟಿದ್ದರಲ್ಲಾ? ಅಂಥಾದ್ದೇ ಶ್ರದ್ಧೆ ಇಡೀ ಚಿತ್ರದಲ್ಲಿಯೂ ಕಾಣ ಸಿಗುತ್ತದೆ. ಅವರ ನಟನೆಯಲ್ಲಿಯೂ ಅದರ ಛಾಯೆ ದಟ್ಟವಾಗಿದೆ.

ಧನಂಜಯ್ ಅತ್ರೆ ಶಂಕರ್ ನಾಗ್ ಅಭಿಮಾನಿ ಶಂಕರನಾಗಿ ನಟಿಸಿದ್ದಾರೆ. ಸ್ಲಂ ನಿವಾಸಿಯೂ ಆಗಿರೋ ಶಂಕರನ ಪರೋಪಕಾರದ ಬುದ್ಧಿಗೆ ನಾಯಕಿ ಮನಸೋತು ಲವ್ವಲ್ಲಿ ಬೀಳುತ್ತಾಳೆ. ಆಕೆ ವೃತ್ತಿಯಲ್ಲಿ ಪತ್ರಕರ್ತೆ. ಒಟ್ಟಾರೆ ಕಥೆ ಮಾಫಿಯಾ, ಭೂಗತ ಜಗತ್ತಿನೊಂದಿಗೆ ತೆರೆದುಕೊಳ್ಳುತ್ತಲೇ ಮೂರು ಹತ್ಯೆಗಳು ನಡೆಯುತ್ತವೆ. ಕಡೆಗೆ ಪ್ರೀತಿಸಿದ ಹುಡುಗಿಯೇ ಶಂಕರನತ್ತ ಬಂದೂಕಿನ ಗುರಿಯಿಡೋ ಮೂಲಕ ಇಡೀ ಚಿತ್ರ ಕುತೂಹಲದ ಉಚ್ಛ್ರಾಯ ಸ್ಥಿತಿ ತಲುಪಿಕೊಳ್ಳುತ್ತೆ. ಅದಾಗಲೇ ಆಗಿದ್ದ ಮೂರೂ ಕೊಲೆಗಳೂ ಕೂಡಾ ಆತ್ಮೀಯರ ಕಡೆಯಿಂದಲೇ ನಡೆದಿರುತ್ತೆ. ಅದಕ್ಕೆ ಕಾರಣವೇನು? ನಾಯಕಿಯೇ ಯಾಕೆ ನಾಯಕನನ್ನು ಕೊಲ್ಲಲು ಮುಂದಾಗ್ತಾಳೆ ಎಂಬೆಲ್ಲ ಪ್ರಶ್ನೆಗಳಿಗೂ ಕರ್ಷಣಂ ಸಾವಕಾಶದಿಂದಲೇ ರೋಚಕ ಉತ್ತರ ನೀಡುತ್ತೆ.

ಹಿರಿಯ ನಟ ಶ್ರೀನಿವಾಸ ಮೂರ್ತಿ ಕೂಡಾ ಎಂದಿನಂತೆಯೇ ಚೆಂದಗೆ ನಟಿಸಿದ್ದಾರೆ. ನಾಯಕಿ ಅನುಷಾ ಕೂಡಾ ಗಮನ ಸೆಳೆಯುತ್ತಾರೆ. ಧನಂಜಯ್ ಅತ್ರೆ ಅವರಂತೂ ಈ ಪಾತ್ರವನ್ನು ನುಂಗಿಕೊಂಡಂತೆ ನಟಿಸಿದ್ದಾರೆ. ಫೈಟು, ಡಾನ್ಸುಗಳಲ್ಲಿ ಹೊಸಾ ಪ್ರಾಕಾರವೊಂದನ್ನು ಪರಿಚಯಿಸಿದ್ದಾರೆ. ವಿಸ್ತಾರವಾದ ಮುಖದ ತುಂಬಾ ಭಾವ ತುಂಬಿಕೊಂಡು ನಟಿಸೋ ಅವರು ಪವರ್‌ಫುಲ್ ಪಾತ್ರಗಳಿಗೂ ಜೀವ ತುಂಬಬಲ್ಲ ನಾಯಕ ನಟನಾಗಿ ನೆಲೆ ನಿಲ್ಲುವ ಸೂಚನೆಯನ್ನೂ ನೀಡಿದ್ದಾರೆ. ಅಚ್ಚುಕಟ್ಟಾದ ಕಥೆಯನ್ನು ನಿರ್ದೇಶಕ ಶರವಣ ಅಷ್ಟೇ ಚೆಂದಗೆ ತೆರೆ ಮೇಲೆ ಕಟ್ಟಿಕೊಟ್ಟಿದ್ದಾರೆ. ಹಾಸ್ಯ ನಟ ವಿಜಯ್ ಚೆಂಡೂರ್ ನಗಿಸುವುದು ಮಾತ್ರವಲ್ಲದೆ ಕಾಡುವಂತಿದೆ.

Continue Reading

ಸಿನಿಮಾ ವಿಮರ್ಶೆ

ಆಪಲ್ ಕೇಕ್‌ನ ತುಂಬಾ ಗಾಂಧಿನಗರದ ಸಿಹಿ-ಕಹಿ ಸ್ವಾದ!

Published

on

ಚಿತ್ರರಂಗದ ಅಸಲೀಯತ್ತನ್ನು ಬಿಡಿಸಿಡುವ ಕಥಾ ಹಂದರ ಹೊತ್ತ ಚಿತ್ರಗಳು ಆಗಾಗ ತೆರೆ ಕಂಡಿವೆ. ಸಾಮಾನ್ಯ ಪ್ರೇಕ್ಷಕರಿಗೆ ಕಾಣಿಸದಂಥಾ ಕಹಿ ಸತ್ಯಗಳನ್ನೂ ಇಂಥಾ ಸಿನಿಮಾಗಳು ತೆರೆದಿಡೋ ಪ್ರಯತ್ನ ಮಾಡಿವೆ. ಅಂಥಾದ್ದೇ ಸಿಹಿಕಹಿಗಳನ್ನು ಬದುಕಿಗೆ ಹತ್ತಿರಾದ ರೀತಿಯಲ್ಲಿಯೇ ತೆರೆದಿಡೋ ಚಿತ್ರ ಆಪಲ್ ಕೇಕ್!

ಅರವಿಂದ್ ನಿಮಾಣ ಮಾಡಿರೋ ಈ ಆಪಲ್ ಕೇಕ್ ಸಿನಿಮಾ ನಿರ್ದೇಶನದ ಕನಸು ಹೊತ್ತು ಕರ್ನಾಟಕದ ನಾಲಕ್ಕು ದಿಕ್ಕುಗಳಿಂದ ಬಂದ, ನಾಲ್ವರು ಯವಕರ ಸುತ್ತ ತಿರುಗೋ ಕಥಾ ಹಂದರ ಹೊಂದಿದೆ. ಸೂತ್ರ ಸಂಬಂಧವೇ ಇಲ್ಲದ ಈ ನಾಲಕ್ಕೂ ಪಾತ್ರಗಳೂ ಒಂದೆಡೆ ಸಂಧೀಸುತ್ತವೆ. ಒಂದೇ ದಾರಿಯಲ್ಲಿ ಚಲಿಸುತ್ತವೆ. ಆ ಹಾದಿಯ ತುಂಬಾ ಎಲ್ಲರ ಜೀವನಕ್ಕೂ ಹತ್ತಿರದ ಅಂಶಗಳನ್ನು ಹೇಳುತ್ತಲೇ, ಚಿತ್ರರಂಗದ ಅಸಲೀ ಮುಖವನ್ನೂ ಬಿಚ್ಚಿಡುವ ಪ್ರಯತ್ನಕ್ಕೆ ನಿದೇಶಕ ರಂಜಿತ್ ಆಪಲ್ ಕೇಕ್ ಮೂಲಕ ಪ್ರಯತ್ನಿಸಿದ್ದಾರೆ.

ಬೇರೆ ಬೇರೆ ಊರುಗಳಿಂದ ಥರಥರದ ಜಂಜಾಟಗಳನ್ನು ಹೊತ್ತು ಬೆಂಗಳೂರಿಗೆ ಬಂದಿಳಿವ ಆ ನಾಲ್ವರು ಯುವಕರದ್ದೂ ನಿರ್ದೇಶಕರಾಗೋ ಕನಸು. ಹೇಗೋ ಪಡಿಪಾಟಲು ಪಟ್ಟು ಚಿತ್ರರಂಗಕ್ಕೆ ಪ್ರವೇಶ ಮಾಡಿದರೂ ಅವರೆಲ್ಲ ಸಹಾಯಕ ನಿರ್ದೇಶಕರಾಗಿಯೇ ಸಮಾಧಾನ ಕಂಡುಕೊಳ್ಳಬೇಕಾಗುತ್ತೆ. ಈ ಪಾತ್ರಗಳ ಮೂಲಕವೇ ಗಾಂಧಿನಗರದ ಚಮಕ್ಕು, ಚಮಚಾಗಿರಿಗಳನ್ನೆಲ್ಲ ನಿರ್ದೇಶಕರು ಅನಾವರಣಗೊಳಿಸಲು ಪ್ರಯತ್ನಿಸಿದ್ದಾರೆ. ಇದೆಲ್ಲದರ ನಡುವೆಯೂ ಆ ಯುವಕರು ನಿರ್ದೇಶಕರಾಗೋ ಗುರಿ ಮುಟ್ಟುತ್ತಾರಾ? ಅಲ್ಲಿ ಎಂತೆಂಥಾ ಟ್ವಿಸ್ಟುಗಳೆದುರಾದಾವೆಂಬುದೇ ನಿಜವಾದ ಕುತೂಹಲ.

ಆದರೆ, ಪ್ರಾಮಾಣಿಕವಾಗಿಯೂ ಗೆಲ್ಲ ಬಹುದು, ಎಲ್ಲ ಅವಮಾನಗಳನ್ನೂ ಮೆಟ್ಟಿ ನಿಂತು ಗುರಿ ತಲುಪ ಬಹುದೆಂಬ ಸ್ಫೂರ್ತಿದಾಯಕ ವಿಚಾರಗಳನ್ನೂ ಹೇಳಿರೋದು ಈ ಚಿತ್ರದ ಪ್ರಧಾನ ಅಂಶ. ಆದರೆ ಗಾಂಧಿನಗರದ ಅಸಲೀಯತ್ತನ್ನು ಅನಾವರಣಗೊಳಿಸೋದರತ್ತ ಮಾತ್ರವೇ ದೃಷ್ಟಿ ನೆಟ್ಟಿದ್ದರಿಂದ ಕೆಲ ಕೊರತೆಗಳೂ ಆಗಿವೆ. ಮನೋರಂಜನಾತ್ಮಕ ಅಂಶವೇ ಅಲ್ಲಲ್ಲಿ ಮರೆಯಾದಂತೆ ಭಾಸವಾದರೂ ನಾಲ್ವರು ಯುವಕರ ಬದುಕಿನ ಭಿನ್ನ ಬಣ್ಣಗಳು ತಕ್ಕ ಮಟ್ಟಿಗೆ ಮುದ ನೀಡುತ್ತವೆ. ನಿದೇಶಕ ರಂಜಿತ್, ನಿರ್ಮಾಪಕ ಅರವಿಂದ್ ಕೂಡಾ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಇವರೂ ಸೇರಿದಂತೆ ಎಲ್ಲ ಪಾತ್ರಗಳಿಗೂ ನ್ಯಾಯ ಸಲ್ಲಿಸೋ ಪ್ರಯತ್ನವನ್ನು ಕಲಾವಿದರು ಮಾಡಿದ್ದಾರೆ.

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz