Connect with us

ಸಿನಿಮಾ ವಿಮರ್ಶೆ

ಕನ್ನಡಕ್ಕಾಗಿ ಒಂದನ್ನೊತ್ತಿದರೆ ಒತ್ತರಿಸಿಕೊಳ್ಳುತ್ತೆ ಪ್ರೇಮಬಾಧೆ!

Published

on

ಕನ್ನಡದಲ್ಲಿ ಎಂ.ಎ. ಮಾಡಿಕೊಂಡಿದ್ದ ಹುಡುಗ ಊರುಬಿಟ್ಟು ಬೆಂಗಳೂರಿಗೆ ಬಂದು ಸೇರೋದು ಹೋಟೇಲ್ ಸಪ್ಲಯರ್ ಕೆಲಸಕ್ಕೆ. ಅಲ್ಲಿ ಆತನ ಕನ್ನಡಜ್ಞಾನ, ಪ್ರತಿಭೆಯನ್ನು ಕಂಡ ಪುರಾತನ ಪತ್ರಿಕೆಯ ಸಂಪಾದಕರೊಬ್ಬರು ಕರೆಸಿಕೊಂಡು ಲೇಖನ ಬರೆಯೋ ಕೆಲಸ ಕೊಡುತ್ತಾರೆ. ಪ್ರೀತಿ ಬೆಸೆದುಕೊಳ್ಳಲು ಬರವಣಿಗೆಯೇ ಕಾರಣವಾಗುತ್ತದೆ. ಹುಡುಗಾಟಿಕೆಯಲ್ಲಿ ಆರಂಭವಾದ ಲವ್ವು ಗಾಢವಾಗುತ್ತಾ ಸಾಗುತ್ತದೆ. ಎಲ್ಲವೂ ದಕ್ಕಿತಲ್ಲಾ ಅಂದುಕೊಳ್ಳೋಹೊತ್ತಿಗೆ ಎದುರಾಗೋ ಭಯಂಕರ ಟ್ವಿಸ್ಟೆಂದರೆ ಮೊಬೈಲು ಆಫಾಗಿ ಬಿಡೋದು!

ನಿರೀಕ್ಷೆಯೇ ಇಲ್ಲದೆ ಸಿಕ್ಕವಳು ಕಾರಣವೇ ಇಲ್ಲದೆ, ಸುಳಿವೂ ನೀಡದೇ ಕಳೆದುಹೋದಾಗ ಬದುಕೇ ಕುಸಿದುಹೋದಂತೆ ವಿಲವಿಲ ಒದ್ದಾಡಿಬಿಡುತ್ತಾನೆ ಕವಿಹೃದಯಿ ಹುಡುಗ. ಬಾಲ್ಯದ ಗೆಳೆಯರಿಬ್ಬರು ಅಚಾನಕ್ಕಾಗಿ ಸಿಕ್ಕು ಕಾರಿನಲ್ಲಿ ಪಯಣಿಸುತ್ತಾ, ತಮ್ಮ ಫ್ಲಾಶ್ ಬ್ಯಾಕುಗಳನ್ನು ಹೇಳಿಕೊಳ್ಳುತ್ತಾ ಕಥೆಯನ್ನೂ ಮುಂದುಮುಂದಕ್ಕೆ ಸಾಗಿಸುತ್ತಾರೆ. ಶಠಮರ್ಷಣ ಅವಿನಾಶ್ ಮತ್ತು ಚಿಕ್ಕಣ್ಣ ಈ ಸ್ನೇಹಿತರು. ಒಬ್ಬನದ್ದು ಪ್ರೌಢತೆಯ ಪ್ರೀತಿಯಾದರೆ, ಮತ್ತೊಬ್ಬನದ್ದು ಹದಿಹರೆಯದ ಲವ್ವು. ಇಬ್ಬರ ಹೃದಯವನ್ನೂ ಒತ್ತೊತ್ತಿ ಸೊರಗಿಸಿದ ಪ್ರೀತಿಯ ಮೂಲ ಯಾವುದು ಅನ್ನೋದು ಕೊನೆಗೆ ಅವರವರಿಗೇ ಗೊತ್ತಾಗುತ್ತದೆ!

ಹೊಸ ನಿರೂಪಣೆಯ ಈ ಸಿನಿಮಾವನ್ನು ನಿರ್ದೇಶಕ ಕುಶಾಲ್ ಒಂಚೂರು ಗಂಭೀರವಾಗಿ ತೆಗೆದುಕೊಂಡಿದ್ದರೆ ಬೇರೆ ರೇಂಜಿನಲ್ಲಿ ಕಟ್ಟಿಕೊಡಬಹುದಿತ್ತು. ಬಹುಶಃ ಚಿತ್ರೀಕರಣದ ಹಂತದಲ್ಲಿ ಒತ್ತರಿಸಿಕೊಂಡಿದ್ದ ಆರ್ಥಿಕ ಸಂಕಷ್ಟಗಳು ಸಿನಿಮಾವನ್ನು ಅಲ್ಲಲ್ಲಿ ಬಾಧಿಸಿಂತೆ ಕಾಣುತ್ತದೆ. ಒಂದಷ್ಟು ಮಿಸ್ಟೇಕುಗಳು ಸಿನಿಮಾದ ಒಟ್ಟಂದಕ್ಕೆ ಅಡ್ಡಿಯಾಗಿವೆ. ಪತ್ರಿಕಾ ಕಛೇರಿಯಲ್ಲಿ ಕೆಲಸಕ್ಕೆ ಸೇರಿದ ದಿನದಿಂದ ಸಂಬಳವೇ ಕಾಣದ ಹುಡುಗ ಪ್ರೀತಿ ಕೈಬಿಟ್ಟುಹೋದಾಗ ದಿನಗಟ್ಟಲೆ ಕುಡಿದು ತೂರಾಡಲು, ಸಂಬಳಕ್ಕೆ ಪ್ರತಿಯಾಗಿ ಸಿಕ್ಕ ಹಳೇ ಕಾರಿಗೆ ಪೆಟ್ರೋಲು ಹಾಕಿಸಲಾದರೂ ಕಾಸು ಎಲ್ಲಿಂದ ಬರಬೇಕು? ಚಿಕ್ಕಣ್ಣನ ಮೀಸೆ ಮೊಳೆಯದ ಕಾಲದ ಶಾಲಾದಿನಗಳನ್ನು ನೆನಪಿಸುವ ಫ್ಲಾಶ್‌ಬ್ಯಾಕ್ ಕಥೆಯಲ್ಲಿ ಆತನ ತಂದೆ ರಂಗಾಯಣ ರಘು ೨೦೧೭ರ ಫೆಬ್ರವರಿ ತಿಂಗಳ ‘ಕರ್ನಾಟಕ ವಿಕಾಸ ಪತ್ರಿಕೆಯನ್ನು ಯಾಕೆ ಹಿಡಿದು ನಿಲ್ಲುತ್ತಾರೆ? ಇಂಥ ತಪ್ಪುಗಳನ್ನು ಕಡೇಪಕ್ಷ ಎಡಿಟಿಂಗಿನಲ್ಲಾದರೂ ತಪ್ಪಿಸಬಹುದಿತ್ತು ಅನ್ನೋದನ್ನು ಬಿಟ್ಟೆರೆ, ‘ಕನ್ನಡಕ್ಕಾಗಿ ಒಂದನ್ನು ಒತ್ತಿ ಮಲೆನಾಡು ಮತ್ತು ಬೆಂಗಳೂರನ್ನು ಬೇರೆಯದ್ದೇ ರೀತಿಯಲ್ಲಿ ತೋರಿಸಿರುವ ಛಾಯಾಗ್ರಣದ ಕೌಶಲ್ಯ, ಸಹಜತೆಯೊಂದಿಗೆ ಸಣ್ಣದಾಗಿ ಬೆರೆತಿರುವ ನಾಟಕೀಯತೆ ಎಲ್ಲವೂ ನೋಡುಗರಿಗೆ ಹೊಸದೆನಿಸುತ್ತದೆ.

ಮುಖ್ಯವಾಗಿ ಕಮರ್ಷಿಯಲ್ ಫಾರ್ಮುಲಾಗಳನ್ನು ಒಳಗೊಂಡಿರುವ ಈ ಚಿತ್ರದಲ್ಲಿ ನಾಯಕನನ್ನು ಪುಸ್ತಕ ಪ್ರೇಮಿಯನ್ನಾಗಿ, ಅಕ್ಷರ ವ್ಯಾಮೋಹಿಯನ್ನಾಗಿ ಚಿತ್ರಿಸಿರುವುದು ನಿಜಕ್ಕೂ ಅಭಿನಂದನೀಯ. ಜೊತೆಗೆ ಇವತ್ತಿನ ಕಾಲದಲ್ಲಿ ಸಣ್ಣ ಮಟ್ಟದ ಪತ್ರಿಕೆಯೊಂದನ್ನು ಹೊರತರಬೇಕಾದರೆ ಏನೆಲ್ಲಾ ಸಮಸ್ಯೆ ಸವಾಲುಗಳನ್ನು ಎದುರಿಸಬೇಕು ಅನ್ನೋದನ್ನು ಸೂಚ್ಯವಾಗಿ ಹೇಳಲಾಗಿದೆ. ಮಾತಿನಲ್ಲೇ ಬೆಸೆದುಕೊಂಡಿರುವ ಹಾಸ್ಯ ಖುಷಿಕೊಡುತ್ತದೆ. ಜೀವದಂತಾ ಪ್ರೀತಿ ಕೈಬಿಟ್ಟುಹೋಗಿ, ನಿರ್ಜೀವ ಬದುಕು ಎದುರಾದಾಗ ಪ್ರೇಮಿಗಳು ಎದುರಿಸುವ ನೋವು ನಿಜಕ್ಕೂ ಗಾಢವಾಗಿ ಚಿತ್ರಿತಗೊಂಡಿದೆ.

‘ದಯವಿಟ್ಟು ಗಮನಿಸಿಯಲ್ಲಿ ನಾಲ್ಕು ಕತೆಯ ಒಂದು ಭಾಗದ ಕಥಾನಾಯಕನಾಗಿ ಕಾಣಿಸಿಕೊಂಡಿದ್ದ ಅವಿನಾಶ್‌ಗೆ ಇಲ್ಲಿ ಕೂಡಾ ಗಡ್ಡ ಅಡ್ಡವಿದ್ದರೂ ಚೆಂದಗೆ ನಟಿಸಿದ್ದಾರೆ. ಗಡ್ಡವಿಲ್ಲದ ದೃಶ್ಯಗಳಲ್ಲೂ ಚೆಂದಗೆ ಕಾಣುತ್ತಾರೆ. ಇಡೀ ಸಿನಿಮಾದಲ್ಲಿ ಅತಿ ಹೆಚ್ಚು ಮಜಾ ಕೊಡೋದು ಚಿಕ್ಕಣ್ಣನ ನಟನೆ ಮತ್ತು ನಾಯಕಿ ಕೃಷಿ ತಾಪಂಡಳ ಮಾದಕತೆ. ಚೆಡ್ಡಿ ತೊಟ್ಟರೂ, ಸೀರೆಯುಟ್ಟರೂ ತೆರೆಯಲ್ಲಿ ಇವಳದ್ದೇ ಸೆಳೆತ!
ಒಟ್ಟಾರೆ, ಒಮ್ಮೆಯಾದರೂ ಕನ್ನಡಕ್ಕಾಗಿ ಒಂದನ್ನು ಒತ್ತಬಹುದು!

Continue Reading
Advertisement
Click to comment

Leave a Reply

Your email address will not be published. Required fields are marked *

ಸಿನಿಮಾ ವಿಮರ್ಶೆ

ನೀವಂದ್ಕೊಂಡಂಗೆ ಏನೂ ಇಲ್ಲಣ್ಣೊ!

Published

on

ದಿ ವಿಲನ್: ಎಲ್ಲ ರಸಗಳನ್ನೂ ಬೆರೆಸಿ ತಯಾರಿಸಿದ ಪ್ರೇಮ್‌ಮೇಡ್ ಕಷಾಯ!
ಪ್ರೇಮ್ ನಿರ್ದೇಶನದ ದಿ ವಿಲನ್ ಚಿತ್ರ ಥೇಟು ಗಜಪ್ರಸವದ ಮಾದರಿಯಲ್ಲಿಯೇ ಕಡೆಗೂ ಬಿಡುಗಡೆಯಾಗಿದೆ. ಒಂದು ಚಿತ್ರ ಆರಂಭಿಸಿದರೆಂದರೆ ಮೊದಲು ಪ್ರಚಾರ ಆಮೇಲೆ ಕೆಲಸ ಎಂಬ ಸೂತ್ರವನ್ನೇ ನೆಚ್ಚಿಕೊಂಡು ಬಂದಿರೋ ಪ್ರೇಮ್ ಈ ಚಿತ್ರದಲ್ಲಿಯೂ ಅದನ್ನೇ ಮುಂದುವರೆಸಿದ್ದರು. ಆದರೆ ಪ್ರೇಕ್ಷಕರ ಅಸಹನೆಯನ್ನೂ ಕಡೇ ಘಳಿಗೆಯಲ್ಲಿ ಕೊತ ಕೊತನೆ ಕುಡಿಯುವ ಕುತೂಹಲವಾಗಿಸಿದ್ದ ಪ್ರೇಮ್ ಜಾಣ್ಮೆ ಎಂಬುದರಲ್ಲಿ ಎರಡು ಮಾತಿಲ್ಲ. ಸುದೀಪ್ ಮತ್ತು ಶಿವಣ್ಣ ಈ ಇಬ್ಬರಲ್ಲಿ ಯಾರು ರಾಮ ಮತ್ತು ಯಾರು ರಾವಣ ಎಂಬುದಕ್ಕೆ ಇದೀಗ ಉತ್ತರ ಸಿಕ್ಕಿದೆ!

ಪ್ರೇಮ್ ಚಿತ್ರವೆಂದ ಮೇಲೆ ಹಳ್ಳಿ ಚಿತ್ರಣ, ಮದರ್ ಸೆಂಟಿಮೆಂಟ್ ಇರೋದು ವಾಡಿಕೆ. ಈ ಚಿತ್ರವೂ ಕೂಡಾ ಹಳ್ಳಿಯೊಂದರ ನಾಟಕ ಪ್ರದರ್ಶನದ ಮೂಲಕವೇ ತೆರೆದುಕೊಳ್ಳುತ್ತೆ. ಈ ಚಿತ್ರಣದಲ್ಲಿ ಶಿವಣ್ಣ ಹಳ್ಳಿಗಾಡಿನ ರಾಮನಾಗಿ ಕಾಣಿಸಿಕೊಂಡಿದ್ದಾರೆ. ಆ ತಾಯಿಗೆ ತನ್ನ ಮಗ ರಾಮ ಶ್ರೀರಾಮ ಚಂದ್ರನಂತೆಯೇ ಬಾಳಿ ಬದುಕಬೇಕೆಂಬೋ ಆಸೆ. ಆದ್ದರಿಂದ ರಾಮನ ಆದರ್ಶಗಳನ್ನೇ ಧಾರೆ ಎರೆದು ಬೆಳೆಸುತ್ತಾಳೆ. ಆದರೆ ವಿಪರೀತ ನಾಟಕದ ಹುಚ್ಚಿನ ರಾಮನ ಜನ್ಮದಾತನಿಗೆ ರಾವಣನ ಮೇಲೆ ಬಲು ಪ್ರೀತಿ. ನಾಟಕದಲ್ಲಿಯೂ ಪಟ್ಟು ಹಿಡಿದು ರಾವಣನಾಗೋ ಗಂಡನ ಮೇಲೆ ರಾಮನ ತಾಯಿಗೆ ಕೆಂಡದಂಥಾ ಸಿಟ್ಟು. ಕಡೆಗೂ ಆಕೆ ತನ್ನ ಗಂಡ ನಾಟಕದಲ್ಲಿ ಧರಿಸಿ ಮೆರೆಯುವ ರಾವಣ ಕಿರೀಟಕ್ಕೆ ಬೆಂಕಿಯಿಡುತ್ತಾಳೆ. ಆ ಬೆಂಕಿಯ ಜೊತೆಗೇ ಅಸಲೀ ಕಥಾನಕ ತೆರೆದುಕೊಳ್ಳುತ್ತೆ!

ಅವ್ವನ ರಾಮನಾಮಸ್ಮರಣೆಯನ್ನೇ ಕಿವಿಗೆ ಎರಕ ಹೊಯ್ದುಕೊಂಡಂತೆ ಬೆಳೆದ ರಾಮನ ಕತ್ತಿನಲ್ಲೊಂದು ಬೆಳ್ಳಿಯ ಸರ. ಆದರೆ ರಾಮ ಒಂದು ಫೈಟಿಂಗ್ ಸೀನಿನಲ್ಲಿದ್ದಾಗ ಆ ಸರ ಮಾಯವಾಗುತ್ತೆ. ಹಾಗೆ ಮಾಯವಾದ ಸರದ ಫ್ಲ್ಯಾಶ್ ಬ್ಯಾಕ್ ಸ್ಟೋರಿಯಲ್ಲಿ ಕೈಸರ್ ರಾಮ್ ಆಗಿ ಸುದೀಪ್ ಭರ್ಜರಿ ಎಂಟ್ರಿ ಕೊಡುತ್ತಾರೆ. ರಾಮ ಕೈಸರ್ ರಾಮನ ಬೆಂಬಿದ್ದು, ಬಡಿದಾಟವಾಗಿ, ಅದಕ್ಕೊಂದು ಉಪಕಥೆ, ಆ ಕಥೆಗೆ ಮತ್ತೊಂದು ಕೊಂಬೆ ಕೋವೆ… ಬಹುಶಃ ನಿರ್ದೇಶಕ ಪ್ರೇಮ್ ಎರಡು ವರ್ಷಗಳ ಕಾಲ ಯಾವುದ್ಯಾವುದೋ ಕಥೆಯನ್ನು ಚೆನ್ನಾಗಿ ಕಲೆಸಿ, ಕಲಸುಮೇಲೋಗರ ಮಾಡಿ ದೃಷ್ಯ ಕಟ್ಟಿದ್ದಾರೇನೋ ಎಂಬ ಸಂಶಯ ಮೂಡುವಂತೆ ಗೋಜಲಿನ ವಾತಾವರಣವೂ ಸೃಷ್ಟಿಯಾಗುತ್ತೆ.

ಥ್ರ್ರಿಲ್ಲರ್, ಆಕ್ಷನ್ ಮತ್ತು ಸೆಂಟಿಮೆಂಟುಗಳನ್ನು ಸೇರಿಸಿ ಪ್ರೇಮ್ ಕಥೆ ಹೊಸೆದಿದ್ದಾರೆ. ಅದು ಪ್ರೇಕ್ಷಕರಿಗೆ ಅಲ್ಲಲ್ಲಿ ಕಾಮಿಡಿ ಮತ್ತು ಹಾರರ್ ಅನುಭವವನ್ನೂ ನೀಡೋದು ಈ ಚಿತ್ರದ ಹೆಚ್ಚುಗಾರಿಕೆಯೋ, ಕೊರತೆಯೋ ಎಂಬ ಗೊಂದಲವೂ ಕಾಡುತ್ತೆ. ಆದರೆ ಕಥೆ ಸಿಕ್ಕಿನಾಚೆಗೆ ಇಡೀ ಚಿತ್ರವನ್ನು ಪ್ರೇಮ್ ರಿಚ್ ಆಗಿ ಕಟ್ಟಿಕೊಟ್ಟಿದ್ದಾರೆಂಬುದರಲ್ಲಿ ಎರಡು ಮಾತಿಲ್ಲ. ರಾಮ ಮತ್ತು ಕೈಸರ್ ರಾಮ್ ಪಾತ್ರದಲ್ಲಿ ಶಿವಣ್ಣ ಮತ್ತು ಸುದೀಪ್ ಅಕ್ಷರಶಃ ವಿಜೃಂಭಿಸಿದ್ದಾರೆ. ಅವರಿಬ್ಬರದ್ದೂ ಪರಕಾಯ ಪ್ರವೇಶ. ಅವರ ಬಾಯಿಂದ ಹೊರ ಬೀಳೋ ಪ್ರತೀ ಡೈಲಾಗುಗಳಿಗೂ ಶಿಳ್ಳೆ ಕೇಕೆಗಳು ಮೊರೆಯುತ್ತವೆ. ಆದರೆ ಪ್ರೇಮ್ ವ್ಯಕ್ತಿತ್ವದಂತೆಯೇ ಗಡಿಬಿಡಿ, ಗಜಿಬಿಜಿಗಳೇ ಕಥೆಯ ವಿಚಾರದಲ್ಲಿ ಮಿಜಿಗುಡುತ್ತವೆ. ಇಡೀ ಸಿನಿಮಾ ನೋಡಿದಾಗ ಸುದೀಪ್ ಪಾತ್ರಕ್ಕೆ ಹೆಚ್ಚು ಸ್ಕೋಪ್ ನೀಡಲಾಗಿದೆಯಾ ಎಂದು ಅನಿಸದೇ ಇರದು. ಹಾಗೆ ನೋಡಿದರೆ ಒಂದು ಸಣ್ಣ ಎಳೆಯಲ್ಲಿ ಸಲೀಸಾಗಿ ಹೇಳಿಬಿಡಬಹುದಾಗಿದ್ದ ಕತೆಯನ್ನು ರೋಚಕಗೊಳಿಸುವ ಉಮೇದಿಗೆ ಬಿದ್ದು ಎಲ್ಲಿಂದ ಎಲ್ಲಿಗೋ ಟ್ರಾವೆಲ್ ಮಾಡಿಸಿದ್ದಾರೆ. ಬ್ರಿಟಿಷರು ಭಾರತವನ್ನು ಆಳಿದ್ದ ಸೇಡಿಗೆ ಒಬ್ಬ ವ್ಯಕ್ತಿ ಇಡೀ ಬ್ರಿಟಿಷ್ ಸಾಮ್ರಾಜ್ಯವನ್ನೇ ಅಲ್ಲಾಡಿಸಲು ಅಂಡರ್ ವರ್ಲ್ಡ್ ಡಾನ್ ರೂಪದಲ್ಲಿ ಎದ್ದುನಿಲ್ಲೋದನ್ನು ನಿಜಕ್ಕೂ ಹಾಸ್ಯಾಸ್ಪದವಾಗಿದೆ!

ಎಲ್ಲಾ ರಸಗಳನ್ನೂ ಒಂದೇ ಚಿತ್ರದಲ್ಲಿ ಸೇರಿಸಿದರೆ ರುಚಿಯಾದ ರಸಾಯನವೇ ಆಗುತ್ತದೆಂದೇನೂ ಗ್ಯಾರಂಟಿಯಿಲ್ಲ. ಅದು ಒಗರೊಗರು ಕಷಾಯವಾಗೋ ಅಪಾಯವೂ ಇದೆ. ಆ ಅಪಾಯವನ್ನು ಪ್ರೇಮ್ ಮನಗಂಡಿಲ್ಲ ಎಂಬುದೇ ಈ ಚಿತ್ರದ ದೊಡ್ಡ ಹಿನ್ನಡೆ. ಶಿವಣ್ಣ ಮತ್ತು ಸುದೀಪ್ ಪಾತ್ರಗಳ ಖದರ್ ಇಡೀ ಕಥೆಯಲ್ಲಿಯೂ ಇದ್ದಿದ್ದರೆ, ಹುಟ್ಟಿಕೊಂಡಿದ್ದ ಕ್ರೇಜಿನಲ್ಲಿ ವಿಲನ್ ಎಲ್ಲಿಯೋ ಹೋಗಿ ಬಿಡುತ್ತಿದ್ದ. ಆದರೆ ವಿಲನ್ನು ನಿರ್ದೇಶಕ ಪ್ರೇಮ್ ಗಡಿಬಿಡಿಯ ನಡುವೆ ಅಕ್ಷರಶಃ ಬಸವಳಿದಿದ್ದಾನೆ!

ಫೈನಲಿ, ಇಡೀ ಕಥೆ ಮದರ್ ಸೆಂಟಿಮೆಂಟಿನಲ್ಲಿ ವಿಲೀನವಾಗುತ್ತದೆ. ಅದನ್ನು ನೋಡುಗರ ಕಣ್ಣಾಲಿಗಳು ತುಂಬಿ ಬರುವಂತೆ ಶಶಕ್ತವಾಗಿಯೂ ಪ್ರೇಮ್ ರೂಪಿಸಿದ್ದಾರೆ. ಆದರೆ ಕಣ್ಣುಗಳು ಹನಿಗೂಡಿದ್ದು ಮೂರು ಘಂಟೆ ಚಿತ್ರ ನೋಡಿದ ಪರಿಣಾಮದಿಂದಲಾ, ಅಥವಾ ಅದಕ್ಕೆ ಕ್ಷೈಮ್ಯಾಕ್ಸ್ ಕಾರಣವಾ ಎಂಬ ಯಕ್ಷ ಪ್ರಶ್ನೆ ಪ್ರೇಕ್ಷಕರನ್ನು ಕಾಡುತ್ತದೆ. ಇದೆಲ್ಲದರಾಚೆಗೆ ಇಡೀ ಚಿತ್ರವನ್ನು ಅದ್ದೂರಿಯಾಗಿ ರೂಪಿಸೋ ಪ್ರೇಮ್ ಹಂಬಲ ಎದ್ದು ಕಾಣಿಸುತ್ತೆ. ಕೆಲವೆಡೆ ಅದರಲ್ಲವರು ಯಶಸ್ವಿಯೂ ಆಗುತ್ತಾರೆ. ಗಿರೀಶ್ ಗೌಡ ಛಾಯಾಗ್ರಹಣವೂ ಚೇತೋಹಾರಿಯಾಗಿದೆ. ಮಳವಳ್ಳಿ ಸಾಯಿಕೃಷ್ಣರ ಸಂಭಾಷಣೆಯಲ್ಲೂ ಖದರ್ ಇದೆ. ಅರ್ಜುನ್ ಜನ್ಯಾ ಸಂಗೀತದ ಹಾಡುಗಳೂ ಚಿತ್ರಕ್ಕೆ ಪೂರಕವಾಗಿ ಇಷ್ಟವಾಗುತ್ತವೆ.

ಆದರೆ ಎಲ್ಲಾ ಇದೆ, ಮತ್ತೇನೋ ಇಲ್ಲ ಎಂಬ ಗೊಂದಲದ ಛಾಯೆಯೊಂದು ಕ್ಲೈಮ್ಯಾಕ್ಸ್ ಜೊತೆಗೇ ಪ್ರೇಕ್ಷಕರ ಮನಸಿಗೂ ಇಳಿದುಕೊಳ್ಳುತ್ತೆ ಎಂಬಲ್ಲಿಗೆ ವಿಲನ್ ಅಬ್ಬರ ಸಮಾಪ್ತಿಯಾಗುತ್ತೆ!

Continue Reading

ಸಿನಿಮಾ ವಿಮರ್ಶೆ

ಕಹಿ ಸತ್ಯಗಳಿಗೆ ಸಿನಿಮಾ ಫ್ರೇಮು ಹಾಕಿದಂಥಾ ಎ ಪ್ಲಸ್!

Published

on

ವಿಜಯ್ ಸೂರ್ಯ ನಿರ್ದೇಶನದ ಎ ಪ್ಲಸ್ ಚಿತ್ರ ತೆರೆ ಕಂಡಿದೆ. ರಿಯಲ್ ಸ್ಟಾರ್ ಉಪೇಂದ್ರ ಅವರ ಗರಡಿಯಲ್ಲಿ ಪಳಗಿರುವ ವಿಜಯ್ ಟ್ರೈಲರ್ ಮೂಲಕವೇ ಒಂದಷ್ಟು ಕ್ರೇಜ್ ಹುಟ್ಟು ಹಾಕೋ ಪ್ರಯತ್ನ ಮಾಡಿದ್ದರು. ಅದರ ಒಡ್ಡೋಲಗದಲ್ಲಿ ತೆರೆ ಕಂಡಿರೋ ಈ ಚಿತ್ರ ಪ್ರೀತಿ, ಮೋಸ, ದ್ವೇಷ ಸೇರಿದಂತೆ ಎಲ್ಲವೂ ಅಡಕವಾಗಿರೋ ಕಥೆಯೊಂದನ್ನು ಪ್ರೇಕ್ಷಕರ ಮುಂದೆ ತೆರೆದಿಟ್ಟಿದೆ. ಒಂದಷ್ಟು ಹೊಸತನ ಮತ್ತು ಲೀಲಾಜಾಲ ನಿರೂಪಣೆಯಿಂದಾಗಿ ಈ ಚಿತ್ರ ಒಂದು ಹೊಸಾ ಅನುಭವದೊಂದಿಗೆ ಪ್ರೇಕ್ಷಕರನ್ನು ಮುದಗೊಳಿಸಿದೆ.
ನಾಯಕ ತನ್ನ ಗುರುವಿನ ಕುಟುಂಬವನ್ನು ಹಾಡಲೆಬ್ಬಿಸಿದ ಶ್ರೀಮಂತನೊಬ್ಬನ ಸಂಹಾರಕ್ಕೆ ಹೊಂಚು ಹಾಕಿದವನು. ನಾಯಕಿ ಅವನನ್ನೇ ಪ್ರೀತಿಸಿ ಹೊರಟವಳು. ಆದರೆ ಆಕೆ ಪ್ರೇಮಿಯೂ ಹೌದು, ಕಟಕಿಯಂಥಾ ವಿಲನ್ನೂ ಹೌದು… ಒಂದು ಟೈಟ್ ಕಂಟೆಂಟ್ ಮತ್ತು ಒಂದೇ ಒಂದೆಳೆ ಕೈ ತಪ್ಪಿದರೂ ಇಡೀ ಚಿತ್ರವೇ ಹಳಿ ತಪ್ಪೋ ಅವಕಾಶವಿರುವಂಥಾ ಪ್ರಯೋಗಗಳು ಆರಂಭದಲ್ಲಿ ಪ್ರೇಕ್ಷಕನನ್ನು ಗೊಂದಲಕ್ಕೆ ತಳ್ಳಿದರೂ ಅದನ್ನೂ ಕುತೂಹಲವಾಗಿ ಪರಿವರ್ತಿಸಿರೋದು ನಿರ್ದೇಶಕರ ಜಾಣ್ಮೆ.
ನಿರ್ದೇಶಕರು ಆರಂಭದಲ್ಲಿಯೇ ಇದೊಂದು ಹೊಸಾ ಪ್ರಯೋಗದ ಚಿತ್ರ ಅಂದಿದ್ದರು. ಅದಕ್ಕೆ ಚಿತ್ರದುದ್ದಕ್ಕೂ ಸಾಕಷ್ಟು ಕುರುಹುಗಳೂ ಸಿಗುತ್ತವೆ. ಕಟ್ಟುಮಸ್ತಾದೊಂದು ಕಥೆ, ಅಲ್ಲಲ್ಲಿ ಟ್ವಿಸ್ಟು ಮತ್ತು ಗೊಂದಲ ಹುಟ್ಟಿಸುತ್ತಲೇ ಪರಿಹಾರವನ್ನೂ ಸೂಚಿಸುವ ಮೂಲಕ ನಿರ್ದೇಶಕರು ಇಡೀ ಸಿನಿಮಾವನ್ನು ಕುತೂಹಲದೊಂದಿಗೇ ನಿರಾಳವಾಗಿ ನೋಡಿಸಿಕೊಳ್ಳುವಂತೆ ಮಾಡಿದ್ದಾರೆ.
ಈ ಚಿತ್ರದ ಹೆಸರೇ ಎ ಪ್ಲಸ್. ಇದನ್ನು ನಿರ್ದೇಶನ ಮಾಡಿರುವವರು ಉಪೇಂದ್ರರ ಶಿಷ್ಯ. ಹಾಗಂದ ಮೇಲೆ ಇದು ಎ ಚಿತ್ರದ ಮುಂದುವರೆದ ಭಾಗ ಅಂತೊಂದು ಸುದ್ದಿ ಹರಡಿಕೊಂಡಿತ್ತು. ಆದರೆ ಅದನ್ನು ಸುಳ್ಳಾಗಿಸಿದ್ದರೂ ಅಲ್ಲಲ್ಲಿ ಆ ಚಿತ್ರದ ಛಾಯೆಯಂತೂ ಇದ್ದೇ ಇದೆ. ಆದರೆ ಅದನ್ನೂ ಕೂಡಾ ಈ ಸಿನಿಮಾದ ಓಘಕ್ಕೆ ಅನುಗುಣವಾಗಿ ಪ್ಲಸ್ ಆಗಿಸಿಕೊಂಡಿರೋದು ನಿರ್ದೇಶಕರ ಜಾಣತನ.
ತನ್ನ ವೈಯಕ್ತಿಕ ಸವಾಲುಗಳ ಜೊತೆಗೇ ನಿರ್ದೇಶಕನಾಗೋ ಕನಸು ಹೊತ್ತ ನಾಯಕನ ಪಾತ್ರವನ್ನು ಸಿದ್ದು ಸಮರ್ಥವಾಗಿಯೇ ನಿರ್ವಹಿಸಿದ್ದಾರೆ. ಹಣವಂತರ ಅಟ್ಟಹಾಸ, ಪ್ರೀತಿಯ ಮೋಸ… ಹೀಗೆ ತಾನೇ ಕಂಡುಂಡ ಕಹಿಸತ್ಯಗಳಿಗೆ ಸಿನಿಮಾ ಫ್ರೇಮು ಹಾಕಬೇಕೆಂಬುದು ನಾಯಕನ ಆಸೆ. ಅದೆಲ್ಲವೂ ಯಾವ ಅಂತ್ಯಕ್ಕೆ ಕೊಂಡೊಯ್ಯುತ್ತದೆ ಎಂಬುದೇ ಅಸಲೀ ಕುತೂಹಲ. ಇಲ್ಲಿ ನಾಯಕಿಯಾಗಿ ಸಂಗೀತಾ ಶೃಂಗೇರಿ ನೆಗೆಟಿವ್ ಶೇಡಿನಲ್ಲಿಯೂ ಪ್ರತಿಭೆ ತೋರಿಸಿದ್ದಾರೆ. ಎಲ್ಲ ನಟ ನಟಿಯರೂ ತಂತಮ್ಮ ಪಾತ್ರಕ್ಕೆ ಒಗ್ಗಿಕೊಂಡಿದ್ದಾರೆ. ಅಂದಹಾಗೆ ಭೂಪಿಂದರ್ ಸಿಂಗ್ ರೈನಾ ಅವರ ಕ್ಯಾಮೆರಾ ಕೆಲಸವನ್ನೂ ಕೂಡಾ ಈ ಚಿತ್ರದ ಪ್ಲಸ್ ಪಾಯಿಂಟುಗಳಲ್ಲಿ ಒಂದಾಗಿ ಗುರುತಿಸಬಹುದು.

Continue Reading

ಸಿನಿಮಾ ವಿಮರ್ಶೆ

ಫಸ್ಟ್ ನೈಟ್ ಕೆಂಡದ ಕುಂತ ಆದಿಯ ಕಥನ!

Published

on

ಇದು ಪಕ್ಕಾ ಈ ದಿನಮಾನದ ಕಾಲೇಜು ಹುಡುಗರ ಮನಸ್ಥಿತಿಗೆ ಕನ್ನಡಿ ಹಿಡಿದಂಥಾ ಚಿತ್ರ. ಕಿಸಿಂಗ್ ಸೀನಿನ ಫೋಟೋ ಮೂಲಕವೇ ಭಾರೀ ಸದ್ದು ಮಾಡಿದ್ದ ಆದಿಪುರಾಣ ಕಿಸ್ಸಿನ ಸುತ್ತಲೇ ಹರಡಿಕೊಂಡಂತಿರೋ ಯುವ ಬಾಧೆಯ ಕಥಾನಕವನ್ನು ಹೊತ್ತು ತಂದಿದೆ. ಬಹುಶಃ ಈ ಕಾರಣದಿಂದಲೇ ಈ ಚಿತ್ರ ಯುವ ಸಮುದಾಯಕ್ಕೆ ಹತ್ತಿರಾಗೋ ಸೂಚನೆಗಳೂ ಕಾಣಿಸುತ್ತವೆ.
ಇದು ಆದಿ ಎಂಬೊಬ್ಬ ಹುಡುಗನ ಸುತ್ತಲೇ ಹರಡಿಕೊಂಡಿರೋ ಕಥೆ. ಆದರೆ ಅದರ ಆಚೀಚೆಗೆ ಯುವ ಮನಸುಗಳ ಮನೋಲೋಕವನ್ನೂ ಬಿಚ್ಚಿಡುತ್ತಾ ಸಾಗೋ ಆದಿಪುರಾಣ ಅಂತ್ಯವಾಗೋ ಹೊತ್ತಿಗೆ ಕಾಲೇಜು ಲೈಫು, ಮದುವೆ ನಂತರದ ಪಡಿಪಾಟಲು ಮತ್ತು ಕಾಮದ ಮಾಯೆಯತ್ತ ಹೊರಳಿಕೊಳ್ಳೋ ಆಸೆಗಣ್ಣಿನ ಕಥೆ ಹೇಳುತ್ತಲೇ ಒಂದು ಸಂದೇಶದಂಥಾದ್ದನ್ನೂ ರವಾನಿಸುತ್ತದೆ.
ಬೆಂಗಳೂರಿನಲ್ಲಿ ಓದಿ ಅಲ್ಲಿಯೇ ಕೆಲಸ ಗಿಟ್ಟಿಸಿಕೊಂಡ ಹುಡುಗ ಆದಿ. ಆತನ ಸುತ್ತಾ ಆವರಿಸಿಕೊಂಡಿರೋ ಕಾಲೇಜು ಲೈಫಿನ ಕೊಂಡಿಗಳಂಥಾ ಸ್ನೇಹಿತರ ಪಡೆ. ಕುಡಿತ ಮೋಜು ಮಸ್ತಿ ಎಂಬುದು ಈ ಪಟಾಲಮ್ಮಿನ ನಿತ್ಯ ಕಾಯಕ ಮತ್ತು ಅದುವೇ ಬದುಕಿನ ಏಕಮಾತ್ರ ಉದ್ದೇಶ. ಆದರೆ ತನ್ನ ಸುತ್ತೆಲ್ಲ ಎಣ್ಣೆಗಾಡಿಗಳೇ ಇದ್ದರೂ ಅದರಲ್ಲೊಂದು ಹನಿಯ ಟೇಸ್ಟೂ ನೋಡದ ಆದಿ ಆ ವಿಚಾರದಲ್ಲಿ ಪಕ್ಕಾ ಸಾಚಾ. ಆದರೆ ವಯೋಸಹಜ ಕಾಮ ಕುತೂಹಲದಲ್ಲಿ ಕೊತಗುಡುವ ಆದಿ ಅದೊಂದು ವಿಷ ಘಳಿಗೆಯಲ್ಲಿ ಸಾಕ್ಷಾತ್ ಅಪ್ಪನ ಮುಂದೆ ಸಿಕ್ಕಿ ಬಿದ್ದ ಕಾರಣಕ್ಕೆ ಕಂಕಣ ಭಾಗ್ಯವೂ ಕೂಡಿ ಬರುತ್ತೆ.
ಆದರೆ ಫಸ್ಟ್ ನೈಟ್ ಭಾಗ್ಯಕ್ಕೆ ಮಾತ್ರ ಪ್ರತೀ ರಾತ್ರಿಯೂ ಅಡ್ಡಾಗಾಲಾಗುತ್ತಿರುತ್ತದೆ. ಇದುವೇ ಮುಂದುವರೆದು ಮನಸೊಳಗಿನ ಕುತೂಹಲದಿಂದ ಕೊತಗುಡುವ ಆದಿಯದ್ದು ಫಸ್ಟ್ ನೈಟೆಂಬ ಕೆಂಡದ ಮೇಲೆ ಕುಂತ ಕಾವಲಿಯಂಥಾದ್ದೇ ಸ್ಥಿತಿ. ಹೀಗೆ ನಿಗಿನಿಗಿಸೋ ಕೆಂಡಕ್ಕೆ ಆಫೀಸಿನ ಟೀಮ್ ಲೀಡರ್ ಆಗಿದ್ದ ಬೆಣ್ಣೆಯಂಥಾ ಹುಡುಗಿ ಸಿಕ್ಕಾಗ ಅನಾಹುತವಾಗುತ್ತಾ? ಆದಿ ಕುಡಿತದ ವಿಚಾರದಲ್ಲಿನ ಕಟ್ಟುನಿಟ್ಟನ್ನು ಕಾಮದ ವಿಚಾರದಲ್ಲಿಯೂ ಪರಿಪಾಲಿಸುತ್ತಾನಾ? ಕಡೆಗೂ ಆದಿ ಪುರಾಣದ ಅಂತ್ಯ ಏನಾಗುತ್ತೆ ಎಂಬೆಲ್ಲ ಕುತೂಹಲಕ್ಕೆ ಥೇಟರಿನಲ್ಲಿಯೇ ಉತ್ತರ ಹುಡುಕಬೇಕು.
ಆದರೆ ಚಿತ್ರದುದ್ದಕ್ಕೂ ಕಾಲೇಜು ಜೀವನದ ಕಿತಾಪತಿಗಳು, ಯುವ ಮನಸಿನ ಹಸಿಹಸೀ ಭಾವನೆಗಳಿರೋದರಿಂದ ಅಷ್ಟಾಗಿ ಬೋರು ಹೊಡೆಸೋದಿಲ್ಲ. ಆದರೆ ಇಡೀ ಚಿತ್ರ ಅಲ್ಲಲ್ಲಿ ನಿಧಾನಗತಿಗೆ ಒಗ್ಗಿಕೊಳ್ಳುವ ಮೂಲಕ ನೋಡುಗರಿಗೆ ಒಂದಷ್ಟು ಕಸಿವಿಸಿ ಕಾಡುತ್ತದೆ. ನಾಯಕ ಶಶಾಂಕ್ ಇನ್ನೊಂಚೂರು ಕಷ್ಟಪಟ್ಟರೂ ಉತ್ತಮ ನಟನಾಗಿ ನಿಲ್ಲುವ ಎಲ್ಲ ಸಾಧ್ಯತೆಗಳೂ ಗೋಚರಿಸಿವೆ. ಮೊದಲನೇ ಸಿನಿಮಾದಲ್ಲೇ ಅಚ್ಚರಿ ಹುಟ್ಟಿಸುವಂತೆ ನಟಿಸಿರೋದು ಶಶಾಂಕ್ ಹೆಚ್ಚುಗಾರಿಕೆ. ಒಟ್ಟಾರೆಯಾಗಿ ಯೂಥ್‌ಫುಲ್ ಕಥೆ ಹೊಂದಿರೋ ಈ ಚಿತ್ರ ಮನರಂಜನೆ ನೀಡುತ್ತದೆ. ಇದು ಒಂದಷ್ಟು ಮೈನಸ್‌ಗಳನ್ನೂ ಮರೆಯಾಗಿಸಬಲ್ಲ ಫ್ಲಸ್ ಪಾಯಿಂಟ್. ನಿರ್ದೇಶಕ ಮೋಹನ್ ಕಾಮಾಕ್ಷಿ ಮೊದಲ ಚಿತ್ರ ಅಂತಾ ಅನ್ನಿಸದಂತೆ ಕೆಲಸ ನಿಭಾಯಿಸಿದ್ದಾರೆ.

Continue Reading

Trending

Copyright © 2018 Cinibuzz