Connect with us

ಫೋಕಸ್

ನೋಟ್ ಬ್ಯಾನ್ ಸುತ್ತ ನಡೆಯುವ ರೋಚಕ ಕಥೆ!

Published

on

2016ರ ನವೆಂಬರ್ ಎಂಟರಂದು ಮಧ್ಯರಾತ್ರಿ ಒಂದು ಸಾವಿರ ಮತ್ತು ಐನೂರರ ನೋಟುಗಳು ಏಕಾಏಕಿ ಬ್ಯಾನ್ ಆಗಿದ್ದವು. ಅದಾಗಿ ಐವತ್ತು ದಿನಗಳ ಕಾಲ ಇಡೀ ಭಾರತ ಸತ್ಯ, ಮಿಥ್ಯ, ಭ್ರಮೆಗಳ ನಡುವೆ ಮಿಂದೆದ್ದಿದ್ದವು. ಅತ್ತ ಬ್ಲಾಕ್ ಮನಿಯನ್ನು ನಿರ್ಮಾಮ ಮಾಡೋ ವೀರಾವೇಷದಲ್ಲಿ ಕೇಂದ್ರ ಸರ್ಕಾರ ಬಿರುಸಿನಲ್ಲಿದ್ದರೆ, ಇತ್ತ ಬ್ಯಾನಾದ ನೋಟುಗಳನ್ನು ಬದಲಿಸೋದೇ ದೊಡ್ಡ ದಂಧೆಯಾಗಿ ಹೋಗಿತ್ತು. ಹೀಗೆ ನೋಟ್ ಬ್ಯಾನ್ ಆದ ಘಳಿಗೆಯಿಂದ ಐವತ್ತು ದಿನಗಳಲ್ಲಿ ನಡೆದ ಸತ್ಯಕಥೆಗಳ ಕಾಲ್ಪನಿಕ ಕಥೆಯನ್ನು ಹೊಂದಿರೋ ಚಿತ್ರ ಮಟಾಶ್!

ಎಸ್.ಡಿ ಅರವಿಂದ್ ನಿರ್ಮಾಣದ ಈ ಚಿತ್ರ ಇದೀಗ ಪ್ರೇಕ್ಷಕರ ಕುತೂಹಲದ ಕೇಂದ್ರಬಿಂದು. ತಮ್ಮನ್ನು ಸಾರಾಸಗಟಾಗಿ ತಲ್ಲಣಕ್ಕೆ ತಳ್ಳಿದ್ದ ಒಂದು ಘಟನೆಯ ಸುತ್ತಲಿನ ಕಥಾನಕ ಹೊಂದಿರೋ ಈ ಚಿತ್ರದತ್ತ ಜನ ದೃಷ್ಟಿ ನೆಟ್ಟಿದ್ದಾರೆ. ಹಾಗಂತ ಈ ಚಿತ್ರ ಕೇವಲ ನೋಟು ಬ್ಯಾನ್ ಆದುದರ ಸುತ್ತಲಿನ ಕಥೆಯನ್ನು ಮಾತ್ರವೇ ಹೊಂಸದಿದೆಯಾ? ಇದು ಯಾವ ಥರದ ಚಿತ್ರ ಅಂತೆಲ್ಲ ಎಲ್ಲರಲ್ಲಿಯೂ ಪ್ರಶ್ನೆಗಳಿವೆ. ಅದಕ್ಕೆ ನಿರ್ದೇಶಕರೇ ಉತ್ತರವಾಗಿದ್ದಾರೆ!

ಈ ಚಿತ್ರದ ಶೀರ್ಷಿಕೆಯೇ ಮಟಾಶ್. ಈ ಪದ ಮಾಮೂಲಿಯಾಗಿ ಕಥೆ ಮಗೀತು ಎಂಬಂಥಾ ಭಾವ ಸೂಚಿಸಲು ಬಳಕೆಯಲ್ಲಿದೆ. ಆದರೆ ನಿಜವಾದ ಅರ್ಥದಲ್ಲಿ ಇದು ಸರಿಯಾದ ಅಂತ್ಯ ಇಲ್ಲದಿರೋದರ ಸೂಚನೆ. ನೋಟ್ ಬ್ಯಾನ್ ವಿದ್ಯಮಾನಕ್ಕೂ ಸೂಕ್ತ ಅಂತ್ಯ ಇಲ್ಲದಿರೋ ಕಾರಣದಿಂದ ಈ ಶೀರ್ಷಿಕೆಯನ್ನು ಬಳಸಿಕೊಳ್ಳಲಾಗಿದೆಯಂತೆ. ಒಟ್ಟಾರೆಯಾಗಿ ಈ ನೋಟ್ ಬ್ಯಾನ್ ಘಟನೆಯನ್ನಿಟ್ಟುಕೊಂಡು ನಿರ್ದೇಶಕ ಎಸ್.ಡಿ ಅರವಿಂದ್ ಅವರು ಯೂಥ್‌ಫುಲ್ ಕಥೆಯೊಂದನ್ನು ಈ ಚಿತ್ರದ ಮೂಲಕ ಹೇಳ ಹೊರಟಿದ್ದಾರೆ.

ನೋಟ್ ಬ್ಯಾನ್ ಹಿನ್ನೆಲೆಯಲ್ಲಿಯೇ ಈಗಿನ ಯುವ ಸಮುದಾಯದ ಮನಸ್ಥಿತಿಯನ್ನು ಅನಾವರಣಗೊಳಿಸೋ ಈ ಚಿತ್ರ ಕನ್ನಡದ ಪ್ರಪ್ರಥಮ ನಿಜವಾದ ಮಲ್ಟಿ ಸ್ಟಾರರ್ ಚಿತ್ರವೂ ಹೌದಂತೆ. ಈ ಚಿತ್ರದಲ್ಲಿರೋರೆಲ್ಲ ಹೊಸಬರೇ ಹಾಗಿದ್ದ ಮೇಲೆ ಇದು ಹೇಗೆ ಮಲ್ಟಿ ಸ್ಟಾರ್ ಚಿತ್ರವಾಗುತ್ತೆ ಎಂಬ ಪ್ರಶ್ನೆಗೆ ಚಿತ್ರದಲ್ಲಿಯೇ ಉತ್ತರ ಸಿಗಲಿದೆ!

ಒಟ್ಟಾರೆ ಕಥೆ ಬಿಜಾಪುರ ಬೆಂಗಳೂರು ಸುತ್ತಾಡಿ ಮಲೆನಾಡು ಭಾಗದಲ್ಲಿಯೇ ತೆರೆದುಕೊಳ್ಳುತ್ತದೆ. ಆದ್ದರಿಂದ ಮಲೆನಾಡು ಪ್ರದೇಶದಲ್ಲಿಯೇ ಹೆಚ್ಚಿನ ಭಾಗದ ಚಿತ್ರೀಕರಣ ನಡೆಸಲಾಗಿದೆ. ಹಳೇ ನೋಟುಗಳನ್ನು ಪರ್ಸೆಂಟೇಜ್ ಲೆಕ್ಕದಲ್ಲಿ ಬದಲಾಯಿಸೋ ದಂಧೆ ನಡೆದಿತ್ತಲ್ಲಾ? ಅದರಂತೆಯೇ ಭಾರೀ ಮೊತ್ತದ ಹಣವೊಂದರ ಸುತ್ತ ಹರಿದಾಡೋ ಯುವಕರು, ಅದು ಹೇಗೋ ಬೆಂಗಳೂರಿನ ಮನೆಯಿಂದ ಮಲೆನಾಡಿಗೆ ರವಾನೆಯಾಗೋ ದೊಡ್ಡ ಪ್ರಮಾಣದ ಹಣ… ಮೈ ನವಿರೇಳಿಸೋ ಚೇಸಿಂಗ್ ಸೀನುಗಳು, ಪ್ರೀತಿ, ಕಾಮಿಡಿ ಸೇರಿದಂತೆ ಇದು ಪಕ್ಕಾ ಕಮರ್ಶಿಯಲ್ ರಸಪಾಕ ಎಂಬುದು ನಿರ್ದೇಶಕ ಅರವಿಂದ್ ಅವರ ಅಭಿಪ್ರಾಯ.

ನೋಟ್ ಬ್ಯಾನ್ ಸರಿಯೋ ತಪ್ಪೋ ಎಂಬ ಚರ್ಚೆ ಇಲ್ಲಿನ ಉದ್ದೇಶವಲ್ಲ. ಆದರೆ ಅದರ ಸುತ್ತಾ ಹರಿದಾಡೋ ರೂಮರ್‌ಗಳು, ಅದನ್ನು ನಂಬೋ ಜನರ ಅನಿವಾರ್ಯತೆ… ಹೀಗೆ ಸೂಕ್ಷ್ಮ ವಿಚಾರಗಳನ್ನೂ ರೋಚವಾಗಿಯೇ ಹಿಡಿದಿಟ್ಟಿರೋ ಚಿತ್ರ ಮಟಾಶ್. ಇದರಲ್ಲಿ ಹೊಸಾ ಹುಡುಗರೇ ಹೆಚ್ಚಾಗಿ ನಟಿಸಿದ್ದಾರೆ. ಇಲ್ಲಿ ಹದಿನಾಲಕ್ಕು ಮಂದಿ ನಾಯಕರಿದ್ದಾರೆ. ಅವರಿಗೆ ಇಬ್ಬರು ನಾಯಕಿಯರು. ಈ ನಡುವೆ ನಾಲ್ವರು ವಿಲನ್ನುಗಳೂ ಅಬ್ಬರಿಸುತ್ತಾರೆ. ಆದರೆ ಕಥೆಯೇ ಹೀರೋ ಸ್ಥಾನದಲ್ಲಿ ನಿಲ್ಲುತ್ತದೆ. ಇದುವೇ ಈ ಚಿತ್ರದ ಅಸಲೀ ಸ್ಪೆಷಾಲಿಟಿ.

ಇನ್ನುಳಿದಂತೆ ಈ ಚಿತ್ರದಲ್ಲಿ ನಿರ್ದೇಶಕ ಅರವಿಂದ್ ಅವರು ನಾನಾ ಜವಾಬ್ದಾರಿ ಹೊತ್ತುಕೊಂಡಿದ್ದಾರೆ. ಈ ಚಿತ್ರದ ನಿರ್ದೇಶನದ ಜೊತೆಗೆ ನಿರ್ಮಾಣದ ಜವಾಬ್ದಾರಿಯನ್ನೂ ವಹಿಸಿಕೊಂಡಿರುವ ಅವರು ಸಂಗೀತ ನಿರ್ದೇಶಕರಾಗಿಯೂ ಕಾರ್ಯ ನಿರ್ವಹಿಸಿದ್ದಾರೆ. ಮಟಾಶ್ ಹನ್ನೊಂದು ಹಾಡುಗಳನ್ನು ಹೊಂದಿದೆ. ಅದರಲ್ಲಿ ನಾಲಕ್ಕು ಹಾಡುಗಳನ್ನು ನಿರ್ದೇಶಕರೇ ಬರೆದಿದ್ದಾರೆ.
ನೋಟ್ ಬ್ಯಾನ್ ನಮ್ಮ ಕಣ್ಣೆದುರೇ ನಡೆದ ವಿದ್ಯಮಾನ. ಆದರೆ ಜನಸಾಮಾನ್ಯರ ಕಣ್ಣಾಚೆಗೂ ಮತ್ತೇನೋ ನಡೆದಿದೆ. ದಂಧೆಗಳು ವಿಜೃಂಭಿಸಿವೆ. ಯುವ ಸಮುದಾಯವೊಂದು ಏಕಾಏಕಿ ಕಾಸು ಮಾಡೋ ಉಮೇದಿಗೆ ಬಿದ್ದು ನಾನಾ ಅವಘಡಗಳನ್ನೂ ಮಾಡಿಕೊಂಡಿದೆ. ಇಂಥಾ ಹಲವಾರು ರೋಚಕ ಸಂಗತಿಗಳನ್ನು ಈ ಚಿತ್ರ ಒಳಗೊಂಡಿದೆ.

#

ಸಿನಿಮಾ ಬಗ್ಗೆ

ವಿಚಿತ್ರ ಜಗತ್ತಿಗೆ ಕರೆದೊಯ್ಯುವ ಸೂಪರ್ ಡಿಲಕ್ಸ್!

Published

on

ಕಥೆ-1

ಪುಟ್ಟ ಮಗು, ಸುಂದರವಾದ ಹೆಂಡತಿ, ತುಂಬು ಕುಟುಂಬ – ಎಲ್ಲವನ್ನೂ ಬಿಟ್ಟು ಓಡಿ ಹೋಗಿ ಮುಂಬೈ ಸೇರಿದವನು. ಏಳು ವರ್ಷಗಳ ನಂತರ ಮತ್ತೆ ಮನೆಗೆ ಆಗಮಿಸುತ್ತಿದ್ದಾನೆ. ಮನೆಮಂದಿಯೆಲ್ಲಾ ಬಂದವನನ್ನು ಆರತಿ ಮಾಡಿ ಒಳಗಡೆ ಕರೆಡುಕೊಳ್ಳಲು ಕಾಯುತ್ತಾ ನಿಂತಿದ್ದಾರೆ. ಈಗ ಬಂತು ಆಗ ಬಂತು ಅಂತಾ ಕಾದವರ ಮುಂದೆ ಕಡೆಗೂ ಟ್ಯಾಕ್ಸಿ ಬಂದು ನಿಲ್ಲುತ್ತದೆ. ‘ಅಪ್ಪ ಬರ್ತಾರೆ, ಗಂಡ ಬರ್ತಾನೆ ಅಂತಾ ಕಾದವರ ಎದುರು ಪ್ರತ್ಯಕ್ಷವಾಗೋದು ಮೈತುಂಬ ಸೀರೆಯುಟ್ಟ, ಒಪ್ಪವಾಗಿ ಬಾಚಿದ ತಲೆಯ, ಹಣೆ ಕುಂಕುಮ, ಬಣ್ಣ ಮೆತ್ತಿದ ತುಟಿಗಳ ದೊಡ್ಡ ಗಾತ್ರದ ಹೆಂಗಸು!

ಊರುಬಿಟ್ಟವನು ಲಿಂಗಪರಿವರ್ತನೆ ಮಾಡಿಸಿಕೊಂಡು ಮಂಗಳಮುಖಿಯಾಗಿರುತ್ತಾನೆ. ಹಾಗೆ ಮಾರ್ಪಾಟು ಹೊಂದಿದವನು ತನ್ನವರನ್ನು ನೋಡಲು ಬಂದು ನಿಂತಿರುತ್ತಾನೆ.

ಕಥೆ-2

ಅವಳು ಮನೆಯವರ ಇಷ್ಟದಂತೆ ಮದುವೆಯಾದ ಹುಡುಗಿ. ಗಂಡ ಸಿನಿಮಾ ಹೀರೋ ಆಗಬಯಸಿದವನು. ನಟನೆ ಕಲಿಕೆಗಾಗಿ ಎರಡು ಗಂಟೆ ಹೊರಹೋಗಿರುತ್ತಾನೆ. ಆ ಸಂದರ್ಭದಲ್ಲೇ ಹುಡುಗಿಯ ಮಾಜಿ ಪ್ರಿಯಕರ ಕಾಲ್ ಮಾಡುತ್ತಾನೆ. ಬದುಕಿನಲ್ಲಿ ಎಲ್ಲವನ್ನೂ ಕಳೆದುಕೊಂಡವನಂತೆ ಮಾತಾಡುತ್ತಾನೆ. ಎಷ್ಟಾದರೂ ಕಾಲೇಜು ಲವ್ವು, ಹಳೆಯದೆಲ್ಲಾ ನೆನಪಾದಂತಾಗಿ “ಚಿಂತೆ ಮಾಡಬೇಡ. ನನ್ನ ಮನೆಗೆ ಬಾ.. ಗಂಡ ಹೊರಗೆ ಹೋಗಿದ್ದಾನೆ. ಅವನು ಬರುವಷ್ಟರಲ್ಲಿ ನಿನ್ನನ್ನು ಸಮಾಧಾನಿಸಿ ಬಿಡುತ್ತೇನೆ ಎಂದು ಕರೆಯುತ್ತಾಳೆ. ಇಷ್ಟೆಲ್ಲಾ ಫೋನ್ ಸಂಭಾಷಣೆಯ ನಂತರ ದೃಶ್ಯ ಶುರುವಾಗುತ್ತದ. ಮಂಚದ ಮೇಲಿನ ನರಳಾಟದ ಸದ್ದು ನಿಲ್ಲುತ್ತದೆ.  ಸಮೃದ್ಧವಾದ್ದೊಂದು ಸಂಭೋಗದ ಸುಖ ನೀಡಿದ ತೃಪ್ತಿ ಈಕೆಯದ್ದು. ಮನೋವ್ಯಾಕುಲದಿಂದ ಕಂಗಾಲಾಗಿದ್ದವನು ಹಾಗೇ ಹಾಸಿಗೆಗೆ ಒರಗುತ್ತಾನೆ. ಇವಳು ಮತ್ತೆ ಎಬ್ಬಿಸೋ ಪ್ರಯತ್ನ ಮಾಡುತ್ತಾಳೆ. ಅತಿಯಾದ ದುಃಖದಲ್ಲಿದ್ದವನಿಗೆ ಸುಖದ ತೀವ್ರತೆ ತಡೆದುಕೊಳ್ಳಲು ಸಾಧ್ಯವಾಗದ ಕಾರಣವೋ ಏನೋ? ಚೆಲ್ಲಾಟ ಮುಗಿಸಿದವನು ಹಾಗೇ ಉಸಿರುಚೆಲ್ಲಿ ಮತ್ತೆಂದೂ ಅಲ್ಲಾಡದಂತೆ ಮಲಗಿಬಿಟ್ಟಿರುತ್ತಾನೆ. ಅಪಾರ್ಟ್‌ಮೆಂಟಿನ ಆ ರೂಮಿನಿಂದ ಇಣುಕಿದರೆ ಗಂಡ ಕ್ಲಾಸು ಮುಗಿಸಿ ಮನೆಗೆ ವಾಪಾಸು ಬರುತ್ತಿರುತ್ತಾನೆ…

ಕಥೆ-3

ಸ್ಲಂನಂಥಾ ಪ್ರದೇಶ. ನಾಲ್ಕು ಜನ ಹುಡುಗರು ಶಾಲೆಯ ನೆಪ ಹೇಳಿ ಮತ್ತೊಬ್ಬ ಗೆಳೆಯನ ಮನೆಯಲ್ಲಿ ಪಾರ್ಟಿ ಅರೇಂಜು ಮಾಡಿಕೊಳ್ಳುತ್ತಾರೆ. ದೇವರ ಸಿನಿಮಾ ನೋಡೋದು ಆ ಕೂಟದ ಮುಖ್ಯ ಉದ್ದೇಶ. ಮುಂಬಾಗಿಲಿನಿಂದ ಬೀಗ ಹಾಕಿ, ಕೀಲಿಯನ್ನು ಪಕ್ಕದ ಮನೆಗೆ ಕೊಟ್ಟು, ಬ್ಯಾಕ್ ಡೋರಿಂದ ಎಂಟ್ರಿ ಕೊಟ್ಟು ಮತ್ತೆ ಎಲ್ಲರೂ ಮನೆ ಒಳ ಸೇರುತ್ತಾರೆ. ಬರೋದಾರಿಯಲ್ಲಿ ಸಿಡಿ ಅಂಗಡಿಯಿಂದ ದೇಹವಿಜ್ಞಾನಕ್ಕೆ ಸಂಬಂಧಿಸಿದ ಸಿಡಿಯನ್ನು ತಂದಿರುತ್ತಾರೆ. ಅದನ್ನು ಪ್ಲೇಯರಿಗೆ ಹಾಕುತ್ತಾರೆ. ದೃಶ್ಯ ಆರಂಭವಾಗುತ್ತದೆ. ಸೆರಗು ಜಾರಿಸಿದವಳ ಬೆನ್ನ ಮೇಲೆ ಕಡುಗಪ್ಪು ಮಚ್ಚೆ. ಹುಡುಗರ ಮುಖದಲ್ಲಿ ಆಶ್ಚರ್ಯ, ಗಾಬರಿ. ಆ ಸೆಕ್ಸು ಸಿನಿಮಾ ನೋಡಲು ಬಂದ ನಾಲ್ಕು ಜನ ಹುಡುಗರ ಪೈಕಿ ಒಬ್ಬನಂತೂ ಕೋಪದಿಂದ ಕೈಲಿದ್ದ ಬಾಟಲಿಯನ್ನು ಎಸೆದು ಟೀವಿ ಒಡೆದುಹಾಕುತ್ತಾನೆ. ಯಾಕೆಂದರೆ, ಟೀವಿಯಲ್ಲಿ ಪ್ರತ್ಯಕ್ಷವಾದವವಳು ಅವನ ತಾಯಿ!

–    ಹೀಗೆ ಬಿಡಿಬಿಡಿಯಾಗಿ ತೆರೆದುಕೊಳ್ಳುವ ಮೂರು ವಿಚಿತ್ರ ಕಥೆಗಳು, ಒಂದಕ್ಕೊಂದು ಸೂತ್ರ ಸಂಬಂಧವಿಲ್ಲದಂತೆ ಬಂದು ಹೋಗುತ್ತಿರುತ್ತವೆ. ಕಡೆಗೆ ಮೂರೂ ಕತೆಗಳು ಒಂದೇ ಬಿಂದುವಿನಲ್ಲಿ ಕೂಡಿಕೊಳ್ಳುತ್ತವೆ. ಈ ತಮಿಳು ಸಿನಿಮಾದ ಹೆಸರು ಸೂಪರ್ ಡಿಲಕ್ಸ್.

ಇಲ್ಲಿ ಸ್ಟಾರ್ ನಟ ವಿಜಯ್ ಸೇದುಪತಿ ಮಂಗಳಮುಖಿಯಾಗಿ ನಟಿಸಿದ್ದಾನೆ. ರಮ್ಯಾ ಕೃಷ್ಣ ವಯಸ್ಕರ ಸಿನಿಮಾದ ನಾಯಕಿಯಾಗಿಯೂ, ವಯಸ್ಸಿಗೆ ಬಂದ ಹುಡುಗನ ತಾಯಿಯಾಗಿಯೂ, ಖ್ಯಾತ ನಟಿ ಸಮಂತಾ ಗಂಡ ಇಲ್ಲದ ಸಮಯದಲ್ಲಿ ಸ್ನೇಹಿತನನ್ನು ಕರೆದು ಮಲಗಿಸಿಕೊಳ್ಳುವಂತಾ ಬೋಲ್ಡ್ ಪಾತ್ರದಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಾಗಿದ್ದಿದ್ದರೆ ಇಂಥಾ ಸಿನಿಮಾವನ್ನು ಮಾಡಲು ಸ್ಟಾರ್‌ಗಳು ಇಮೇಜು ಅಡ್ಡ ಬರುತ್ತದೆ ಅನ್ನುತ್ತಿದ್ದರೇನೋ. ಆದರೆ ಸೂಪರ್ ಡಿಲಕ್ಸ್‌ನಲ್ಲಿ ಪಾತ್ರ ನಿಭಾಯಿಸಿರುವ ಪ್ರತಿಯೊಬ್ಬರೂ ಇಮೇಜನ್ನು ಕಿತ್ತೆಸೆದು ಅಪ್ಪಟ ಕಲಾವಿದರಂತೆ ಪಾತ್ರ ಪೋಷಿಸಿದ್ದಾರೆ.

ತ್ಯಾಗರಾಜನ್ ಕುಮಾರರಾಜ ನಿರ್ದೇಶನದ ಈ ಸಿನಿಮಾ ನೋಡುಗರನ್ನು ಬೇರೊಂದು ಜಗತ್ತಿಗೆ ಕರೆದುಕೊಂಡು ಹೋಗಿ ನಿಲ್ಲಿಸಿಬಿಡುತ್ತದೆ.

Continue Reading

ಫೋಕಸ್

ಗಂಡನ ಸಾವಿನ ಸೂತಕದಲ್ಲೂ ಸಂಭ್ರಮವೇ?

Published

on

ಮಂಡ್ಯಾ ಲೋಕಸಭಾ ಕ್ಷೇತ್ರದಲ್ಲಿ ಸುಮಲತಾ ಅಂಬರೀಶ್ ಅವರ ಬಹಿರಂಗ ಕಲಾಪ್ರದರ್ಶನಕ್ಕೆ ತೆರೆ ಬಿದ್ದಿದೆ. ಚುನಾವಣಾ ಪ್ರಕ್ರಿಯೆ ಆರಂಭವಾದಂದಿನಿಂದ ಕಡೇ ಘಳಿಗೆಯವರೆಗೂ ಸುಮಲತಾರಾ ಮಾತು, ಹಾವಭಾವಗಳನ್ನೊಮ್ಮೆ ಮತ್ತೆ ಕಣ್ಮುಂದೆ ತಂದುಕೊಳ್ಳಿ. ಸುಮಲತಾ ಜನರ ಸಮಸ್ಯೆಗಳ ಬಗ್ಗೆ ಮಾತಾಡಿದ್ದಕ್ಕಿಂತಲೂ ಹೆಚ್ಚಾಗಿ ಅಂಬರೀಶ್ ಬಗ್ಗೆ ಮಾತಾಡಿ ಸೆಂಟಿಮೆಂಟ್ ಕ್ರಿಯೇಟ್ ಮಾಡಿದ್ದೇ ಹೆಚ್ಚು. ಇಂಥಾ ಕಲೆಗಾರಿಕೆಯ ಮೂಲಕವೇ ಅಂಬಿ ಅಭಿಮಾನಿಗಳನ್ನು ಸೆಳೆದುಕೊಳ್ಳೋ ಕಸರತ್ತು ನಡೆಸಿರುವ ಸುಮಲತಾಗೆ ಗಂಡನ ಬಗ್ಗೆ ನಿಜಕ್ಕೂ ಎಂಥಾ ಸೆಂಟಿಮೆಂಟ್ ಇದೆ ಅಂತ ನೋಡ ಹೋದರೆ ಆಘಾತಕಾರಿ ವಿಚಾರವೊಂದು ಜಾಹೀರಾಗುತ್ತದೆ!

ಮನೆಯಲ್ಲಿ ಯಾರೇ ಮರಣ ಹೊಂದಿದರೂ ಎಂಥವರಿಗೂ ಕೂಡಾ ಅದರಿಂದ ಹೊರಬರಲು ತಿಂಗಳುಗಟ್ಟಲೆ ಬೇಕಾಗುತ್ತದೆ. ಆದರೆ ಸುಮಲತಾ ಮೇಡಮ್ಮು ಮಾತ್ರ ಈ ವಿಚಾರದಲ್ಲಿ ಭಲೇ ಗಟ್ಟಿಗಿತ್ತಿ ಹೆಣ್ಣುಮಗಳು. ಯಾಕೆಂದರೆ, ಅಂಬರೀಶ್ ನಿಧನರಾಗಿ ಎರಡನೇ ದಿನವೇ ಅವರು ಐಶಾರಾಮಿ ಜಾಗ್ವಾರ್ ಕಾರು ಬುಕ್ ಮಾಡಿದ್ದರಂತೆ. ಈ ಕಾರಿನ ಬೆಲೆ ಮೂರು ಕೋಟಿ ಹತ್ತು ಲಕ್ಷ!

ಯಾರೇ ಆದರೂ ಗಂಡ ಅಸುನೀಗಿ ಎರಡೇ ದಿನಕ್ಕೆ ಹೊಸಾ ಕಾರು ಬುಕ್ ಮಾಡುತ್ತಾರಾ? ಅದನ್ನು ಮಾಡಿದ್ದಾರೆಂದರೆ, ಸುಮಕ್ಕನಿಗೆ ಅಂಬಿ ಮೇಲೆ ಎಂಥಾ ಸೆಂಟಿಮೆಂಟಿತ್ತೆಂಬುದು ಎಂಥವರಿಗಾದರೂ ಅರ್ಥವಾಗದಿರೋದಿಲ್ಲ. ಹಾಗೆ ಅಂಬಿ ಸತ್ತ ಎರಡನೇ ದಿನವೇ ಜಾಗ್ವಾರ್ ಕಾರ್ ಬುಕ್ ಮಾಡಿದ್ದ ಸುಮಲತಾ ಹನ್ನೊಂದನೇ ದಿನ ಶ್ರೀರಂಗಪಟ್ಟಣದಲ್ಲಿ ಅಸ್ತಿ ಬಿಟ್ಟು ಬಂದವರೇ ಸೀದಾ ಮಲೇಷಿಯಾಕ್ಕೆ ಹೊರಟು ಬಿಡುತ್ತಾರೆ. ಇದು ಸುಮ್ಮಕ್ಕನಿಗೆ ಅಂಬಿ ಮೇಲೆ ಅದಿನ್ನೆಂಥಾ ಪ್ರೀತಿ ಇತ್ತೆಂಬುದಕ್ಕೆ ಮತ್ತೊಂದು ಉದಾಹರಣೆ.

ಸಾಮಾನ್ಯವಾಗಿ ಇಂಥಾ ಸಾವಾದಾಗ ಕಾರ್ಯವೆಲ್ಲ ಮುಗಿದ ನಂತರ ಸಂಬಂಧಿಕರ ಮನೆಗಳಿಗೆ ಹೋಗೋದಿದೆ. ಆದರೆ ಸುಮಲತಾ ತರಾತುರಿಯಿಂದ ಮಲೇಷಿಯಾಕ್ಕೆ ಹಾರುವ ದರ್ದೇನಿತ್ತೋ ಗೊತ್ತಿಲ್ಲ. ಹಾಗೆ ನೋಡಿದರೆ, ಸುಮಕ್ಕನಿಗ ಮಂಡ್ಯಕ್ಕಿಂತ ಹೆಚ್ಚಿನ ನಂಟಿರೋದೇ ಸಿಂಗಾಪುರದಂಥಾ ವಿದೇಶಗಳ ಜೊತೆಗೆ. ಕ್ಲಬ್ಬು ಅದೂ ಇದೂ ಅಂತ ಸಿಂಗಾಪುರದಲ್ಲಿಯೇ ಈಕೆ ಝಾಂಡಾವೂರುತ್ತಿದ್ದರೆಂಬ ಮಾತೂ ಇದೆ. ಆದರೆ ಗಂಡ ಮರೆಯಾಗಿ ಹನ್ನೊಂದನೇ ದಿನಕ್ಕೇ ಸಿಂಗಾಪುರಕ್ಕೆ ತೆರಳುವಂಥಾ ತುರ್ತು ಅದೇನಿತ್ತೋ ಅವರೇ ಹೇಳಬೇಕು.

ಹೀಗೆ ಸುಮಲತಾ ಸಿಂಗಾಪುರದಲ್ಲಿ ರಿಲ್ಯಾಕ್ಸ್ ಮೂಡಿನಲ್ಲಿರುವಾಗಲೇ ಅಂಬಿ ನಿಧನರಾದ ಎರಡು ದಿನಗಳಲ್ಲಿ ಅವರು ಬುಕ್ ಮಾಡಿದ್ದ ಜಾಗ್ವಾರ್ ಕಾರ್ ಮನೆಗೆ ಬಂದಿಳಿಯೋ ಕರೆ ಬಂದಿದೆ. ಆದರೆ ಆಗ ಮನೆಯಲ್ಲಿ ಯಾರೂ ಇಲ್ಲದ ಕಾರಣ ನಿರ್ಮಾಪಕ ರಾಕ್ ಲೈನ್ ವೆಂಕಟೇಶ್ ಅದನ್ನು ಪೋಸ್ಟ್ ಫೋನ್ ಮಾಡಿಸಿದ್ದರಂತೆ. ಅದಾದ ಕೆಲ ದಿನಗಳಲ್ಲಿಯೇ ಎಲೆಕ್ಷನ್ ಕಣಕ್ಕಿಳಿಯೋ ನಿರ್ಧಾರ ಮಾಡಿದ್ದ ಸುಮಲತಾ ಜಾಗ್ವಾರ್ ಕಾರನ್ನು ಮನೆಗೆ ತರೋ ಪ್ರೋಗ್ರಾಂ ಅನ್ನು ಮತ್ತೆ ಫೋಸ್ಟ್ ಫೋನ್ ಮಾಡಿದ್ದಾರೆ. ತೀರಾ ಎಲೆಕ್ಷನ್ ಸಂದರ್ಭದಲ್ಲಿ ಸಲ್ಲಿಸಿರೋ ಅಫೀಡವಿಟ್ ನಲ್ಲಿಯೂ ಈ ಜಾಗ್ವಾರ್ ಕಾರನ್ನು ಉಲ್ಲೇಖಿಸಿಲ್ಲ. ಹಾಗೆ ಮಾಡಿದರೆ ಗಂಡ ನಿಧನರಾದ ಎರಡನೇ ದಿನವೇ ಹೊಸಾ ಕಾರು ಖರೀದಿಸಿದ್ದು ವಿರೋಧಿಗಳಿಗೆ ಅಸ್ತ್ರವಾಗುತ್ತದೆ ಎಂಬ ಬುದ್ಧಿವಂತಿಕೆ ಸುಮ್ಮಕ್ಕನದ್ದಿರಬಹುದು.

Continue Reading

ಫೋಕಸ್

ತ್ರಯಂಬಕಂ ಒಂದು ಅದ್ಭುತ ಅನುಭವ ಅಂದ್ರು ಅನುಪಮಾ!

Published

on

ಅಕ್ಕ ಎಂಬ ಧಾರಾವಾಹಿಯ ಮೂಲಕ ಕಿರುತೆರೆ ಜಗತ್ತಿನ ಸ್ಟಾರ್ ನಟಿಯಾಗಿ ಗುರುತಿಸಿಕೊಂಡಿದ್ದವರು ಅನುಪಮಾ ಗೌಡ. ಈ ಧಾರಾವಾಹಿಯ ಡಬಲ್ ರೋಲ್ ನಲ್ಲಿ ಮಿಂಚಿದ್ದ ಅನುಪಮಾ ಅದೆಂಥಾ ಸವಾಲಿನ ಪಾತ್ರಗಳಿಗಾದರೂ ಜೀವ ತುಂಬಬಲ್ಲ ಕಲಾವಿದೆ ಅನ್ನೋದನ್ನೂ ಸಾಬೀತುಗೊಳಿಸಿದ್ದರು. ಈ ಹುಡುಗಿ ಹಿರಿತೆರೆಗೆ ಬಂದರೂ ನಾಯಕಿಯಾಗಿ ನೆಲೆಗೊಳ್ಳುತ್ತಾಳೆಂದು ಪ್ರೇಕ್ಷಕರೂ ಅಂದುಕೊಂಡಿದ್ದರು. ಇಂಥಾ ಅನುಪಮಾ ಇದೀಗ ಆ ಕರಾಳ ರಾತ್ರಿಯ ನಂತರ ತ್ರಯಂಬಕಂ ಚಿತ್ರದ ನಾಯಕಿಯಾಗಿ ಪ್ರೇಕ್ಷಕರೆದುರು ನಿಲ್ಲಲು ರೆಡಿಯಾಗಿದ್ದಾರೆ.
ದಯಾಳ್ ಪದ್ಮನಾಭನ್ ನಿರ್ದೇಶನದ ಆ ಕರಾಳ ರಾತ್ರಿ ಚಿತ್ರದಲ್ಲಿಯೂ ನಾಯಕಿಯಾಗಿದ್ದ ಅನುಪಮಾ ತ್ರಯಂಬಕಂನಲ್ಲಿಯೂ ಬಹು ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಮೂಲಕ ದಯಾಳ್ ನಿರ್ದೇಶನದ ಎರಡನೇ ಚಿತ್ರದಲ್ಲಿಯೂ ಅವರು ಅವಕಾಶ ಗಿಟ್ಟಿಸಿಕೊಂಡಿದ್ದಾರೆ. ಅನುಪಮಾ ಹೇಳೋ ಪ್ರಕಾರವಾಗಿ ನೋಡೋದಾದರೆ ಆ ಕರಾಳ ರಾತ್ರಿಗಿಂತಲೂ ತ್ರಯಂಬಕಂ ಪಾತ್ರ ಭಿನ್ನ ಮತ್ತು ಸವಾಲಿನದ್ದು!
ತ್ರಯಂಬಕಂನಲ್ಲಿ ಉದ್ದುದ್ದದ ಡೈಲಾಗುಗಳಿವೆಯಂತೆ. ಅದನ್ನು ಸಹಜವಾಗಿ ದಾಟಿಸಲು ಆರಂಭದಲ್ಲಿ ಅನುಪಮಾ ತಿಣುಕಾಡಿದ್ದರಂತೆ. ಅದರಲ್ಲಿಯೂ ವಿಶೇಷವಾಗಿ ರಾಘವೇಂದ್ರ ರಾಜ್ ಕುಮಾರ್ ಅವರ ಜೊತೆ ನಟಿಸಿದ್ದೇ ಅನುಪಮಾ ಪಾಲಿಗೆ ವಿಶೇಷ. ರಾಘಣ್ಣ ಮತ್ತು ಅನುಪಮಾ ಮಾತಾಡಿಕೊಂಡು, ಚರ್ಚಿಸಿಯೇ ಪ್ರತೀ ಸೀನುಗಳಿಗೂ ತಯಾರಾಗುತ್ತಿದ್ದರಂತೆ. ಖುದ್ದು ರಾಘಣ್ಣನೇ ತನ್ನ ನಟನೆಯ ಬಗ್ಗೆ ಅಭಿಪ್ರಾಯವನ್ನೂ ಕೇಳುತ್ತಿದ್ದರಂತೆ. ಅಷ್ಟು ಸೀನಿಯರ್ ನಟನಾದರೂ ಯಾವುದೇ ಹಮ್ಮುಬಿಮ್ಮಿಲ್ಲದ ರಾಘಣ್ಣನ ವ್ಯಕ್ತಿತ್ವವೇ ತನ್ನ ಪಾತ್ರವನ್ನು ಪರಿಣಾಮಕಾರಿಯಾಗಿಸಿದೆ ಎಂಬುದು ಅನುಪಮಾ ಅಭಿಪ್ರಾಯ.
ಇನ್ನು ದಯಾಳ್ ನಿರ್ದೇಶನದ ವಿಚಾರದಲ್ಲಿ ಅವರದ್ದೇ ಆದ ಒಂದಷ್ಟು ರೀತಿ ರಿವಾಜುಗಳನ್ನು ರೂಢಿಸಿಕೊಂಡಿದ್ದಾರೆ. ಯಾವುದೇ ಪಾತ್ರಕ್ಕಾದರೂ ಕಲಾವಿದರು ಪ್ರಿಪೇರ್ ಆಗಿ ಹೋಗೋದನ್ನವರು ಇಷ್ಟಪಡುವುದಿಲ್ಲ. ಸ್ಪಾಟಲ್ಲಿಯೇ ಸೀನೊಂದನ್ನು ವಿವರಿಸಿ ನಟನೆ ತೆಗೆದುಕೊಳ್ಳುತ್ತಾರೆ. ಪರ್ತಕರ್ತೆಯಾಗಿಯೂ ನಟಿಸಿರೋ ಅನುಪಮಾ ಆ ಪಾತ್ರಕ್ಕೂ ಕೂಡಾ ತಯಾರಿಯನ್ನೇನೂ ನಡೆಸಿಲ್ಲ. ಆ ಸೀನು ಎಂಥಾ ಭಾವ ಬೇಡುತ್ತದೋ ಅದನ್ನು ಕೊಟ್ಟು ಆ ಪಾತ್ರಕ್ಕೆ ನ್ಯಾಯ ಸಲ್ಲಿಸಿದ್ದಾರಂತೆ.
ಒಟ್ಟಾರೆಯಾಗಿ ಅನುಪಮಾ ಪಾಲಿಗೆ ತ್ರಯಂಬಕಂ ಒಂದು ಅದ್ಭುತ ಅನುಭವ. ಅಂಥಾದ್ದೇ ಅನುಭವ ಚಿತ್ರ ನೋಡಿದ ಪ್ರತಿಯೊಬ್ಬರದ್ದೂ ಆಗಿರುತ್ತದೆ ಎಂಬ ಭರವಸೆ ಅವರಲ್ಲಿದೆ.

Continue Reading

Trending

Copyright © 2018 Cinibuzz