Connect with us

ಕಲರ್ ಸ್ಟ್ರೀಟ್

ಕನ್ನಡ ಚಿತ್ರರಂಗಕ್ಕಿದು ಕರಾಳ ಭಾನುವಾರ

Published

on

ಇಂದು ಕನ್ನಡ ಚಿತ್ರರಂದ ಪಾಲಿಗೆ ಸರಣಿ ದುಃಖದ ದಿನ. ಗಂಟಲು ಕ್ಯಾನ್ಸರ್ ಕಾಯಿಲೆಯಿಂದ ಬಳಲುತ್ತಿದ್ದ ಛಾಯಾಗ್ರಾಹಕ ವಿಷ್ಣುವರ್ಧನ್ ಸಾವಿನ ಸುದ್ದಿ ಹೊರ ಬಿದ್ದ ಬೆನ್ನಿಗೇ, ಕನ್ನಡ ಚಿತ್ರರಂಗದ ಅಮೂಲ್ಯ ಕೊಂಡಿಯಂತಿದ್ದ ಪ್ರೊಡಕ್ಷನ್ ಮ್ಯಾನೇಜರ್‌ಮೀಸೆ ಪಾಪಣ್ಣ ನಿಧನರಾದ ಸುದ್ದಿ ಬಂದಿದೆ.
ಮೀಸೆ ಪಾಪಣ್ಣ ನಾಗೇಶ್ ಕೋಗಿಲು ನಿರ್ಮಾಣದ ಟಕ್ಕರ್ ಚಿತ್ರಕ್ಕೂ ಪ್ರೊಡಕ್ಷನ್ ಮ್ಯಾನೇಜರ್ ಆಗಿ ಕಾರ್ಯ ನಿರ್ವಹಿಸುತ್ತಿದ್ದವರು. ವಯಸ್ಸು ಎಪ್ಪತೈದರ ಗಡಿ ದಾಟಿದರೂ ಉತ್ಸಾಹದಿಂದಲೇ ಕಾರ್ಯ ನಿರ್ವಹಿಸುತ್ತಿದ್ದ ಮೀಸೆ ಪಾಪಣ್ಣ ಇಡೀ ಚಿತ್ರರಂಗದ ಪ್ರೀತಿ ಪಾತ್ರರಾಗಿದ್ದವರು. ಪಾಪಣ್ಣರ ಅನಿರೀಕ್ಷಿತ ನಿರ್ಗಮನ ಹಲವಾರು ಚಿತ್ರತಂಡಕ್ಕೆ ಆಘಾತವನ್ನುಂಟು ಮಾಡಿದೆ.
ಕನ್ನಡ ಚಿತ್ರರಂಗದಲ್ಲಿ ನೂರಾರು ಚಿತ್ರಗಳಿಗೆ ಪ್ರೊಡಕ್ಷನ್ ಮ್ಯಾನೇಜರ್ ಆಗಿ ಕೆಲಸ ಮಾಡಿದ್ದ ಪಾಪಣ್ಣ ಮೀಸೆ ಪಾಪಣ್ಣ ಎಂದೇ ಖ್ಯಾತರಾಗಿದ್ದವರು. ಡಾ. ರಾಜ್ ಕುಮಾರ್ ಮತ್ತು ವಿಷ್ಣುವರ್ಧನ್, ಅಂಬರೀಶ್ ಅವರಂಥಾ ನಟರ ಚಿತ್ರಗಳಿಗೂ ಪ್ರೊಡಕ್ಷನ್ ಮ್ಯಾನೇಜರ್ ಆಗಿದ್ದವರು ಪಾಪಣ್ಣ. ಅಂಥಾ ಮಹಾ ನಟರ ಚಿತ್ರಗಳ ಜೊತೆಗೆ ಈ ತಲೆಮಾರಿನ ನಟರ ಚಿತ್ರಗಳಿಗೂ ಪ್ರಡಕ್ಷನ್ ಮ್ಯಾನೇಜರ್ ಆಗಿ ಕೆಲಸ ಮಾಡುತ್ತಿದ್ದರು. ಸ್ನೇಹಶೀಲತೆ ಮತ್ತು ಪ್ರಾಮಾಣಿಕತೆಗೆ ಹೆಸರಾಗಿದ್ದ ಪಾಪಣ್ಣ ವಯಸ್ಸಿನಾಚೆಗೆ ಚಿತ್ರರಂಗದಲ್ಲಿ ಚಾಲ್ತಿಯಲ್ಲಿದ್ದದ್ದು ಆ ವ್ಯಕ್ತಿತ್ವದಿಂದಲೇ. ನಾಗೇಶ್ ಕೋಗಿಲು ನಿರ್ಮಾಣದಲ್ಲಿ ರಘು ಶಾಸ್ತ್ರಿ ನಿರ್ದೇಶಿಸುತ್ತಿರುವ ಮನೋಜ್ ಅಭಿನಯದ ‘ಟಕ್ಕರ್’ ಪಾಪಣ್ಣ ಕೆಲಸ ಮಾಡಿದ ಕೊನೆಯ ಚಿತ್ರ.
ಕುಣಿಗಲ್ ಮೂಲದ ಪಾಪಣ್ಣನವರಿಗೆ ಕಳೆದ ವರ್ಷವೇ ಹೃದಯಾಘಾತವಾಗಿತ್ತು. ಆದರೂ ಶ್ರಮ ಜೀವಿಯಾದ ಅವರು ಚೇತರಿಸಿಕೊಂಡು ಮತ್ತೆ ತಮ್ಮ ವೃತ್ತಿಗೆ ಮರಳಿದ್ದರು. ಎಪ್ಪತೈದು ವರ್ಷವಾಗಿದ್ದರೂ, ಆರೋಗ್ಯ ಕೈ ಕೊಟ್ಟಿದ್ದರೂ ಅವರೊಳಗಿನ ಕೆಲಸಗಾರ ದಣಿದಿರಲಿಲ್ಲ. ಅವರ ಉತ್ಸಾಹ ಖಾಯಿಲೆಗಳ ಮುಂದೆ ಮಣಿದಿರಲಿಲ್ಲ. ಇಳಿ ವಯಸಿನಲ್ಲಿಯೂ ಹೀಗೆ ಸ್ವಾಭಿಮಾನದಿಂದ ಬದುಕಿದ್ದ ಅವರಿಗೆ ಕಾಯಿಲೆಯೂ ಸೇರಿದಂತೆ ಕಷ್ಟಗಳಿದ್ದವು. ಆದರೆ ರಾಜ್ ಕಾಲದಿಂದಲೂ ಸಿನಿಮಾ ರಂಗದ ಭಾಗವಾಗಿದ್ದ ಅವರಿಗೆ ಮಿಡಿದವರು ಕಡಿಮೆ. ತೆರೆಯ ಹಿಂದೆ ದುಡಿಯುವ ಇಂಥವರನ್ನು ಬದುಕಿರುವಾಗವಾಗಲಿ, ಮರಣದ ಸಂದರ್ಭದಾಗಲಿ ಯಾರೂ ಕಣ್ಣೆತ್ತಿ ನೋಡೋದಿಲ್ಲ. ಇಂಥವರು ಸಂಧ್ಯಾ ಕಾಲದಲ್ಲಿ ಒಂದಷ್ಟು ನೆಮ್ಮದಿಯಾಗಿರುವಂಥಾ ಅವಕಾಶ ಕಲ್ಪಿಸೋ ಬಗ್ಗೆ ಇನ್ನಾದರೂ ಫಿಲಂ ಚೇಂಬರ್ ಆಲೋಚಿಸಬೇಕಿದೆ.
ಒಟ್ಟಾರೆಯಾಗಿ, ನೂರಾರು ಚಿತ್ರಗಳಿಗೆ ಪ್ರೊಡಕ್ಷನ್ ಮ್ಯಾನೇಜರ್ ಆಗಿ ಪ್ರತೀ ಹಂತದಲ್ಲಿಯೂ ಜೊತೆಯಾಗಿದ್ದವರು ಮೀಸೆ ಪಾಪಣ್ಣ. ಅವರು ಚಿತ್ರರಂಗದ ಅನುಭವಗಳ ಗಣಿ. ಅವರಿಗೆ ಅದೆಷ್ಟೋ ವಿಚಾರಗಳು ಗೊತ್ತಿದ್ದವು. ಮುಖವಾಡಗಳ ಪರಿಚಯವಿದ್ದವು. ಮೂರ್ನಾಲಕ್ಕು ದಶಕಗಳ ಕಾಲ ಕನ್ನಡ ಚಿತ್ರರಂಗದ ಪ್ರತೀ ಹೆಜ್ಜೆಗೂ ಅವರು ಜೊತೆಯಾಗಿದ್ದರು. ಅವರೀಗ ನಿಧನರಾಗಿದ್ದಾರೆ. ಈ ಮೂಲಕ ಕನ್ನಡ ಚಿತ್ರರಂಗದಿಂದ ಹಿರಿತನದ ಕೊಂಡಿಯೊಂದು ಕಳಚಿಕೊಂಡಂತಾಗಿದೆ. ಇವರ ಸಾವಿನ ಸುದ್ದಿಯ ಹಿಂದೆಯೇ ಛಾಯಾಗ್ರಾಹಕ ಕುಮಾರ್ ಚಕ್ರವರ್ತಿಯವರೂ ನಿಧನರಾದ ಸುದ್ದಿ ಬಂದಿದೆ. ಪಿಕೆಎಚ್ ದಾಸ್‌ರ ಗರಡಿಯಲ್ಲಿ ಪಳಗಿ ಖ್ಯಾತ ಛಾಯಾಗ್ರಾಹಕರಾಗಿದ್ದವರು ಕುಮಾರ ಚಕ್ರವರ್ತಿ. ಅವರಿಗೂ ಕೂಡಾ ವಿಷ್ಣು ಅವರಂತೆಯೇ ಯುವ ವಯಸ್ಸು. ಆದರೂ ಅವರು ಅನಾರೋಗ್ಯದಿಂದ ಮರಣ ಹೊಂದಿದ್ದಾರೆ.
ಹೀಗೆ ಬೆಳಗ್ಗಿನಿಂದಲೇ ಸಾವಿನ ಸುದ್ದಿಯ ಆಘಾತ ಬಂದೆರಗುತ್ತಿದೆ. ಕನ್ನಡ ಚಿತ್ರರಂಗಕ್ಕಿದು ನಿಜಕ್ಕೂ ಕರಾಳ ಭಾನುವಾರ.

Continue Reading
Advertisement
Click to comment

Leave a Reply

Your email address will not be published. Required fields are marked *

ಕಲರ್ ಸ್ಟ್ರೀಟ್

ಪರದೇಸಿ ಕೇರಾಫ್ ಲಂಡನ್ ಇದು ಎರಡನೇ ಸಲದ ಮಹಾ ಸಂಗಮ!

Published

on


ಸಾಮಾನ್ಯವಾಗಿ ಒಂದೇ ತಂಡ, ನಾಯಕ ಮತ್ತು ನಿರ್ದೇಶಕರು ಒಂದರ ಹಿಂದೆ ಮತ್ತೊಂದು ಚಿತ್ರದಲ್ಲಿ ಜೊತೆಯಾಗೋದು ವಿರಳ. ಎಷ್ಟೋ ಸಲ ಒಂದು ಸಿನಿಮಾ ಮುಕ್ತಾಯಕ್ಕೂ ಮುನ್ನವೇ ತಂಡದೊಳಗಿನ ವಿಶ್ವಾಸವೂ ಸಮಾಪ್ತಿಗೊಂಡಿರುತ್ತದೆ. ಆದರೆ ಪರದೇಸಿ ಕೇರಾಫ್ ಲಂಡನ್ ವಿಚಾರದಲ್ಲದು ಪಕ್ಕಾ ತದ್ವಿರುದ್ಧ!

ಪರದೇಸಿ ಕೇರಾಫ್ ಲಂಡನ್ ಮೂಲಕ ನಿರ್ದೇಶಕ ರಾಜಶೇಖರ್ ಮತ್ತು ವಿಜಯ್ ರಾಘವೇಂದ್ರ ಎರಡನೇ ಸಲ ಒಂದಾಗಿದ್ದಾರೆ. ಈ ಹಿಂದೆ ಇದೇ ಜೋಡಿ ರಾಜ ಲವ್ಸ್ ರಾಧೆ ಚಿತ್ರದ ಮೂಲಕ ಗೆಲುವು ದಾಖಲಿಸಿತ್ತು. ಈಗ ಹೆಚ್ಚೂ ಕಮ್ಮಿ ಅದೇ ತಂಡವೇ ಸೇರಿಕೊಂಡು ಪರದೇಸಿ ಕೇರಾಫ್ ಲಂಡನ್ ಚಿತ್ರವನ್ನು ರೂಪಿಸಿದೆ.
ರಾಜ ಲವ್ಸ್ ರಾಧೆ ಚಿತ್ರ ಅಂತಿಮ ಹಂತ ತಲುಪೋ ಮುನ್ನವೇ ನಿರ್ದೇಶಕ ರಾಜಶೇಖರ್ ಹೊಸಾ ಕಥೆಯೊಂದಕ್ಕೆ ಕಾವು ಕೊಟ್ಟಿದ್ದರು. ಅದಕ್ಕೆ ವಿಜಯ್ ರಾಘವೇಂದ್ರ ಅವರೇ ನಾಯಕ ಎಂದೂ ಫಿಕ್ಸಾಗಿದ್ದರು. ಆ ಘಳಿಗೆಯಲ್ಲಿಯೇ ರಾಜಶೇಖರ್ ವಿಜಯ್ ರಾಘವೇಂದ್ರ ಅವರ ಜೊತೆ ಮತ್ತೊಂದು ಚಿತ್ರ ಮಾಡೋದಾಗಿಯೂ ಘೋಶಿಸಿದ್ದರು.

ಆ ಮಾತಿಗೆ ತಕ್ಕುದಾಗಿಯೇ ಪರದೇಸಿ ಕೇರಾಫ್ ಲಂಡನ್ ಅನ್ನು ರೂಪಿಸಿ ಬಿಡುಗಡೆಯ ಹೊಸ್ತಿಲಿಗೆ ತಂದು ನಿಲ್ಲಿಸಿದ್ದಾರೆ.
ವಿಜಯ್ ರಾಘವೇಂದ್ರರ ನಟನಾ ಚಾತುರ್ಯದ ಬಗ್ಗೆ ಬಿಡಿಸಿ ಹೇಳೋ ಅಗತ್ಯವೇನಿಲ್ಲ. ಈವರೆಗೂ ಅವರು ಥರ ಥರದ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಎಂಥಾ ಪಾತ್ರಗಳಿಗಾದರೂ ಒಗ್ಗಿಕೊಳ್ಳುವ ಛಾತಿಯನ್ನೂ ಜಾಹೀರು ಮಾಡಿದ್ದಾರೆ. ಆದರೆ ಈ ಚಿತ್ರದಲ್ಲಿ ವಿಜಯ್ ಈ ಹಿಂದೆಂದೂ ಕಾಣಿಸದ ರೀತಿಯಲ್ಲಿ ಅವತರಿಸಲಿದ್ದಾರೆ ಅಂತ ರಾಜಶೇಖರ್ ಆರಂಭದಲ್ಲಿಯೇ ಹೇಳಿದ್ದಾರೆ. ಪರದೇಸಿ ಕೇರಾಫ್ ಲಂಡನ್ ಬಗ್ಗೆ ಈ ಪಾಟಿ ನಿರೀಕ್ಷೆ ಮೂಡಿರೋದಕ್ಕೆ ಅದೂ ಕೂಡಾ ಪ್ರಮುಖ ಕಾರಣ. ಅಂಥಾ ವಿಶೇಷತೆ ಏನಿದೆ ಎಂಬುದು ಈ ತಿಂಗಳ ಕಡೇಯ ಹೊತ್ತಿಗೆಲ್ಲ ಅನಾವರಣಗೊಳ್ಳಲಿದೆ.

Continue Reading

ಕಲರ್ ಸ್ಟ್ರೀಟ್

ಡಾ ರಾಜ್ ಮೊಮ್ಮಗನಿಗೊಲಿದ ಕೆಂಡಸಂಪಿಗೆ!

Published

on


ಕನ್ನಡದಲ್ಲಿ ಅಪಾರ ಅವಕಾಶಗಳನ್ನು ಗಳಿಸಿಕೊಳ್ಳುತ್ತಲೇ ಪರಭಾಷೆಗೂ ಜಿಗಿದ ಖುಷಿಯಲ್ಲಿರುವವಳು ಮಾನ್ವಿತಾ ಕಾಮತ್. ಇದೀಗ ಮಾನ್ವಿತಾ ಡಾ ರಾಜ್‌ಕುಮಾರ್ ಮೊಮ್ಮಗ ಧೀರೇನ್ ನಾಯಕನಾಗಿರೋ ದಾರಿ ತಪ್ಪಿದ ಮಗ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾಳೆ.

ಧೀರೇನ್ ಎಂಟ್ರಿ ಕೊಡುತ್ತಿರೋ ದಾರಿ ತಪ್ಪಿದ ಮಗನ ಬಗ್ಗೆ ಈ ಹಿಂದಿನಿಂದಲೂ ವ್ಯಾಪಕವಾಗಿ ಸುದ್ದಿಗಳು ಹರಿದಾಡುತ್ತಿದ್ದವು. ಈ ವಿಚಾರ ಅಧಿಕೃತವಾಗಿ ಜಾಹೀರಾದರೂ ನಾಯಕಿ ಯಾರಾಗಲಿದ್ದಾರೆಂಬ ಕುತೂಹಲ ಮಾತ್ರ ಹಾಗೆಯೇ ಉಳಿದುಕೊಂಡಿತ್ತು. ಇಲ್ಲಿ ನಾಯಕಿಯದ್ದು ಲವ ಲವಿಕೆಯಿಂದಿರೋ ಮುದ್ದಾದ ಪಾತ್ರ. ಅದಕ್ಕೆ ಹುಡುಕಾಟ ನಡೆಸಿದ ನಿರ್ದೇಶಕರು ಕಡೆಗೂ ಮಾನ್ವಿತಾಳನ್ನು ಆಯ್ಕೆ ಮಾಡಿದ್ದಾರೆ.

ರಾಜ್ ಮೊಮ್ಮಗ ಧೀರೇನ್ ಈಗಾಗಲೇ ಈ ಚಿತ್ರದ ಪಾತ್ರಕ್ಕಾಗಿ ಪಟ್ಟು ಹಿಡಿದು ಸಾಕಷ್ಟು ತಯಾರಿ ಮಾಡಿಕೊಂಡಿದ್ದಾರೆ. ನಟನೆಯಲ್ಲಿ ತರಬೇತಿ ಪಡೆದು ಡ್ಯಾನ್ಸ್, ಫೈಟ್‌ಗಳಲ್ಲಿಯೂ ಪಳಗಿಕೊಂಡಿದ್ದಾರೆ. ನಿರ್ದೇಶಾಕ ಅನಿಲ್ ಕುಮಾರ್ ಕೂಡಾ ಎಲ್ಲ ಸಿದ್ಧತೆಗಳನ್ನೂ ಮುಗಿಸಿಕೊಂಡು ಚಿತ್ರೀಕರಣದತ್ತ ಮುಖ ಮಾಡಿದ್ದಾರೆ.
ನಟಿ ಮಾನ್ವಿತಾ ಕೆಂಡ ಸಂಪಿಗೆ ಮೂಲಕ ಎಂಟ್ರಿ ಕೊಟ್ಟು ಆ ನಂತರ ಟಗರು ಚಿತ್ರದ ಮೂಲಕ ಹೆಚ್ಚಿನ ಅವಕಾಶಗಳನ್ನು ತನ್ನದಾಗಿಸಿಕೊಳ್ಳುತ್ತಿದ್ದಾಳೆ. ಈ ಸಮಯದಲ್ಲಿಯೇ ಮರಾಠಿ ಚಿತ್ರಕ್ಕೆ ನಾಯಕಿಯಾಗೋ ಅವಕಾಶವೂ ಒಲಿದು ಬಂದಿದೆ. ಅದನ್ನೊಪ್ಪಿಕೊಂಡು ಮರಾಠಿಯಲ್ಲಿಯೂ ಸಕ್ರಿಯವಾಗಿರೋ ಮಾನ್ವಿತಾ ದಾರಿ ತಪ್ಪಿದ ಮಗನಿಗೂ ಸಾಥ್ ಕೊಡಲು ಮುಂದಾಗಿದ್ದಾಳೆ.

Continue Reading

ಕಲರ್ ಸ್ಟ್ರೀಟ್

ಕ್ರೇಜಿಸ್ಟಾರ್ ಪುತ್ರನಿಗೆ ಸಿಕ್ಕವಳು ಹುಬ್ಬಳ್ಳಿ ಹುಡುಗಿ!

Published

on


ರವಿಚಂದ್ರನ್ ಪುತ್ರ ಮನೋರಂಜನ್ ಸಾಕಷ್ಟು ತಯಾರಿ ಮಾಡಿಕೊಂಡ ಬಳಿಕ ಹೊಸಾ ಚಿತ್ರಕ್ಕೆ ರೆಡಿಯಾಗಿದ್ದಾರೆ. ಈ ಚಿತ್ರಕ್ಕೆ ಪ್ರಾರಂಭ ಎಂಬ ಹೆಸರೂ ನಿಗಧಿಯಾಗಿದೆ. ಸಾಕಷ್ಟು ಸಮಯದಿಂದ ಪ್ರಾರಂಭಕ್ಕೆ ನಾಯಕಿಯನ್ನು ಆಯ್ಕೆ ಮಾಡೋ ಕಾರ್ಯ ಚಾಲ್ತಿಯಲ್ಲಿತ್ತು. ಇದಕ್ಕಾಗಿ ದೊಡ್ಡ ಮಟ್ಟದಲ್ಲಿಯೇ ಸರ್ಕಸ್ಸು ನಡೆಸಿ ಕಡೆಗೂ ಕೀರ್ತಿ ಕಲಕೇರಿಯನ್ನು ನಾಯಕಿ ಪಾತ್ರಕ್ಕೆ ನಿಕ್ಕಿ ಮಾಡಲಾಗಿದೆ.

ಕೀರ್ತಿ ಕಲಕೇರಿ ಮಾಡೆಲಿಂಗ್ ಕ್ಷೇತ್ರದಲ್ಲಿ ಛಾಪು ಮೂಡಿಸಿರೋ ಹುಡುಗಿ. ಈಗಾಗಲೇ ಮಿಸ್ ಗೋವಾ ಕರೀಟವನ್ನೂ ಮುಡಿಗೇರಿಸಿಕೊಂಡಿರುವ ಈಕೆ ಪಕ್ಕಾ ಕನ್ನಡತಿ. ಹುಬ್ಬಳ್ಳಿಯ ಕೀರ್ತಿ ಈಗಿನ್ನೂ ಹದಿನೆಂಟರ ಹುಡುಗಿ. ಈ ಚಿತ್ರದ ನಾಯಕಿ ಪಾತ್ರಕ್ಕೆ ಮುಗ್ಧ ಮುಖ ಭಾವ ಹೊತ್ತ ತಾಜಾ ಮುಖವೊಂದು ಬೇಕಾಗಿತ್ತಂತೆ. ಅದಕ್ಕಾಗಿ ಆಡಿಷನ್ ನಡೆಸಿದ್ದ ಚಿತ್ರತಂಡ ಎಪ್ಪತ್ತಕ್ಕೂ ಅಧಿಕ ಹುಡುಗೀರಲ್ಲಿ ಕೀರ್ತಿಯನ್ನು ಆಯ್ಕೆ ಮಾಡಿಕೊಂಡಿದೆ.

ಪ್ರಾರಂಭವನ್ನು ಮನು ಕಲ್ಯಾಡಿ ನಿರ್ದೇಶನ ಮಾಡಲಿದ್ದಾರೆ. ಜಗದೀಶ್ ಕಲ್ಯಾಡಿ ಹಣ ನಿರ್ಮಾಣದ ಜವಾಬ್ದಾರಿ ಹೊತ್ತಿದ್ದಾರೆ. ಕೌಟುಂಬಿಕ ಕಥಾಹಂದರ ಹೊಂದಿರೋ ಈ ಚಿತ್ರಕ್ಕೆ ತಿಂಗಳೊಪ್ಪತ್ತಿನಲ್ಲಿಯೇ ಚಿತ್ರೀಕರಣ ಆರಂಭವಾಗಲಿದೆ.

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz