Connect with us

ಫೋಕಸ್

ಬಯಕೆ ತೋಟಕ್ಕೆ ಬೇಲಿ ಬೇಕಾ?

Published

on

ಹೆಣ್ಣೊಬ್ಬಳ ಒಳತೋಟಿಗಳನ್ನು ಇಂಚಿಂಚಾಗಿ ಬಿಚ್ಚಿಟ್ಟಿರುವ ಸಿನಿಮಾ ನಾತಿಚರಾಮಿ. ಪ್ರೀತಿಸಿ ಎರಡೂ ಕಡೆಯವರ ವಿರೋಧದ ನಡುವೆಯೂ ಮದುವೆಯಾಗಿ, ಐದು ವರ್ಷ ಅನ್ಯೋನ್ಯವಾಗಿ ಬಾಳಿ, ಒಬ್ಬರನ್ನೊಬ್ಬರು ಅರಿತು ಒಬ್ಬರ ಹೆಜ್ಜೆಮೇಲೊಬ್ಬರು ಪಾದವಿಟ್ಟು ನಡೆದ ಜೀವಗಳಿಗೆ ದಾಂಪತ್ಯದ ಪ್ರತೀ ಕ್ಷಣವೂ ರಸಘಳಿಗೆ. ಇಂಥಾ ಸವಿ ಅನುಭವಿಸಿದ ನಂತರ ಆ ಇಬ್ಬರಲ್ಲಿ ಒಬ್ಬರು ಮಿಸ್ಸಾಗಿಬಿಟ್ಟರೆ ಏನಾಗಬೇಡ?

ನಾತಿಚರಾಮಿ ಚಿತ್ರದ ಹಿನ್ನೆಲೆ ಕೂಡಾ ಇಂಥದ್ದೇ. ಲವ್ ಮಾಡಿ ಮದುವೆಯಾದ ಹುಡುಗನನ್ನು ತೀರಾ ಹಚ್ಚಿಕೊಂಡು ಬದುಕಿದವಳ ಬಾಳಲ್ಲಿ ಘೋರ ದುರಂತವೊಂದು ನಡೆಯುತ್ತೆ. ಅದೊಂದು ದಿನ ಅಪಘಾತಕ್ಕೆ ಸಿಲುಕಿ ಹುಡುಗ ಜೀವ ಬಿಟ್ಟಿರುತ್ತಾನೆ. ಈ ನಂತರ ಆಕೆ ಜೀವನೋಪಾಯಕ್ಕಾಗಿ ಐಟಿ ಕಂಪೆನಿಯಲ್ಲಿ ನೌಕರಿ ಮಾಡಿಕೊಂಡು ಕೊರೆಯುವ ನೆನಪುಗಳಿಂದ ಪರಿತಪಿಸುತ್ತಾಳೆ. ಅವನ ನೆನಪಲ್ಲೇ ಬದುಕುವ ಹೆಣ್ಣುಮಗಳು ಗೌರಿಯ ಮೂಲಕ ಗಂಡನನ್ನು ಕಳೆದುಕೊಂಡ, ಗಂಡನಿಂದ ದೂರಾಗಿ ಯಾತನೆ ಅನುಭವಿಸುತ್ತಿರುವ ಅಗಣಿತ ಹೆಣ್ಣುಮಕ್ಕಳ ತಲ್ಲಣ, ತವಕಗಳನ್ನು ಪರಿಣಾಮಕಾರಿಯಾಗಿ ಕಟ್ಟಿಕೊಟ್ಟಿದ್ದಾರೆ ನಿರ್ದೇಶಕ ಮನ್ಸೋರೆ.

ಜೀವವೆಂದುಕೊಂಡಿದ್ದ ಹುಡುಗ ದೈಹಿಕವಾಗಿ ಇಲ್ಲವಾದರೂ ಈಕೆಯ ಮನಸ್ಸಿನಿಂದ ದೂರವಾಗಿರುವುದಿಲ್ಲ. ಅವನಿದ್ದಾನೆಂದುಕೊಂಡೇ ದಿನ ದೂಡಿದರೂ ಸುಡುವ ನೆನಪಿಗೆ ಪದೇಪದೆ ಕಾಡುವ ದೈಹಿಕ ವಾಂಛೆ ಪೈಪೋಟಿಗೆ ಬೀಳುತ್ತದೆ. ಅದನ್ನು ತೀರಿಸಿಕೊಳ್ಳಲು ಆಕೆ ಪಡುವ ಪಡಿಪಾಟಲುಗಳು, ಸ್ನೇಹಿತರ ಸಲಹೆ, ತಾನು ಇಷ್ಟ ಪಟ್ಟವರು ತನಗೆ ದಕ್ಕದಿದ್ದಾಗ ಉಂಟಾಗುವ ಮನೋ ವ್ಯಾಕುಲ, ತನಗಿಷ್ಟವಿಲ್ಲದವರು ಮೈಮುಟ್ಟಲು ಬಂದಾಗ ಆಗುವ ಕಿರಿಕಿರಿ.. ಅವಳ ಸಂಕಟ ಒಂದೆರಡಲ್ಲ. ಈ ಎಲ್ಲದಕ್ಕೂ ಮುಕ್ತಿ ಸಿಗುತ್ತದಾ? ಆಕೆಯ ಬಯಕೆಯ ತೋಟದ ಬೇಲಿ ಮುರಿಯುವ ಗಂಡಸು ಸಿಗುತ್ತಾನಾ ಅನ್ನೋದೆಲ್ಲಾ ಸಿನಿಮಾದ ಅಂತಿಮ ಗುಟ್ಟು. ಇದರೊಟ್ಟಿಗೆ ಎಲ್ಲವೂ ಇದ್ದೂ, ಏನೂ ಇಲ್ಲದವನಂತೆ ಬದುಕುವ ಗಂಡಿನ ಅಧ್ಯಾಯವೂ ಇದೆ. ಗೋಡೆ ಮೇಲಿಂದ ನೆಲಕ್ಕೆಬಿದ್ದ ಹಲ್ಲಿಯಂತೆ ವಿಲವಿಲ ಅಂತಾ ಒದ್ದಾಡಿ ಎದ್ದೇಳುವುದಷ್ಟೇ ಲೈಂಗಿಕತೆಯಲ್ಲ, ‘ಪ್ರೀತಿ ಬೆರೆತರೆ ಮಾತ್ರ ಪೂರ್ತಿ ಸುಖ ಪ್ರಾಪ್ತಿ’ ಅನ್ನೋದನ್ನು ಮಾರ್ಮಿಕವಾಗಿ ತಿಳಿಸಲಾಗಿದೆ. ಒಟ್ಟಾರೆ ಇದು ಕಟ್ಟಿಹಾಕಿಕೊಂಡ ಮನಸ್ಸು ಮತ್ತು ಬಿಚ್ಚಿ ಬೆತ್ತಲಾಗಲು ಬಯಸುವ ದೇಹ… ಇವೆರಡರ ನಡುವಿನ ಸಂಘರ್ಷ ನಾತಿಚರಾಮಿ.

ಲೇಖಕಿ ಸಂಧ್ಯಾರಾಣಿ ಬರೆದ ಕಥೆ ಈ ಸಿನಿಮಾದ ಮೂಲ. ನಿರ್ದೇಶಕ ಮನ್ಸೋರೆ, ಸಂಧ್ಯಾರಾಣಿ ಮತ್ತು ಅಭಯ ಸಿಂಹ ಸೇರಿ ಬರೆದ ಸಂಭಾಷಣೆ ಕೂಡಾ ಅಷ್ಟೇ ಮನಮುಟ್ಟುವಂತಿದೆ. ಈ ಸಿನಿಮಾದ ಪಾತ್ರಗಳ ಮನಸ್ಸೊಳಗೆ ಕಂಟ್ರೋಲಿಗೆ ಸಿಗದಂತೆ ಒತ್ತರಿಸಿಕೊಂಡು ಬರುವ ಕಾಮನೆಯಂಥಾ ಟ್ರಾಫಿಕ್ಕಿದೆ. ಆದರೆ ಅದನ್ನು ಎಲ್ಲಿಯೂ ಅಬ್ಬರ, ಗದ್ದಲಗಳಿಲ್ಲದೆ ನಿರೂಪಿಸಿದ್ದಾರೆ. ಇಲ್ಲಿ ತೀರಾ ಕಾಲ್ಪನಿಕವೆನಿಸುವಂಥಾ ಕಥೆಯಾಗಲಿ, ಅತಿರಂಜಕ ದೃಶ್ಯಗಳಾಗಲಿ ಇಲ್ಲ. ಬದಲಿಗೆ ಈ ಸಮಾಜದಲ್ಲಿ ಅಲ್ಲಲ್ಲಿ ಕಾಣಸಿಗುವ ಪಾತ್ರಗಳು, ಮರೆಯಲ್ಲಿ ಘಟಿಸುವ ‘ವಿಚಾರ’ಗಳನ್ನೇ ದೃಶ್ಯರೂಪಕ್ಕಿಳಿಸಲಾಗಿದೆ. ಮೇಲ್ನೋಟಕ್ಕೆ ಇದು ಸಿಂಪಲ್ಲಾಗಿ ನೋಡುಗರೆದೆಗೆ ದಾಟಿಕೊಳ್ಳುತ್ತದೆ. ಆದರೆ ಇಂಥಾ ಸದ್ದಿಲ್ಲದೇ ನಡೆಯುವ, ಭಾವನೆಗಳಲ್ಲೇ ವ್ಯಕ್ತವಾಗುವ ದೃಶ್ಯಗಳನ್ನು ಕಟ್ಟಿಕೊಡೋದು ಕಷ್ಟಕರ ಕೆಲಸ. ಈ ವಿಚಾರದಲ್ಲಿ ಮನ್ಸೋರೆ ಪೂರ್ಣ ಪ್ರಮಾಣದಲ್ಲಿ ಗೆದ್ದಿದ್ದಾರೆ. ಕಸುಬುದಾರ ನಿರ್ದೇಶಕ ಮಾತ್ರ ಇಂಥಾ ಕಥೆಯನ್ನು ಜೀವಂತವಾಗಿ ತೆರೆಮೇಲೆ ಸೃಜಿಸಲು ಸಾಧ್ಯ.

ಇನ್ನು ಪಾತ್ರಧಾರಿಗಳ ವಿಚಾರಕ್ಕೆ ಬಂದರೆ ಇಲ್ಲಿ ಅಭಿನಯಿಸಿರುವ ಒಬ್ಬೊಬ್ಬರೂ ಒಬ್ಬರನ್ನೊಬ್ಬರು ನುಂಗಿಕೊಂಡವರಂತೆ ಪಾತ್ರ ನಿರ್ವಹಿಸಿದ್ದಾರೆ. ಶೃತಿಹರಿಹರನ್ ಮತ್ತು ಸಂಚಾರಿ ವಿಜಯ್ ಉತ್ತಮ ಅಭಿನಯ ನೀಡಿದ್ದಾರೆ ಅಂತಷ್ಟೇ ಹೇಳಿದರೆ ತಪ್ಪಾಗುತ್ತದೆ. ಯಾಕೆಂದರೆ, ಎಲ್ಲಿಯೂ ಇದು ನಟನೆ ಅನ್ನೋದರ ಸುಳಿವು ಕೂಡಾ ಗೊತ್ತಾಗದಂತೆ ಕ್ಯಾಮೆರಾಮುಂದೆ ಬದುಕಿ ತೋರಿಸಿದ್ದಾರೆ!

ಇದು ಮಡಿವಂತಿಕೆ ತೋರುವ ಹುಸಿಮನಸ್ಸಿನವರ ಆಳದ ಕುತೂಹಲಗಳೊಂದಿಗೆ ಮುಖಾಮುಖಿಯಾಗೋ ಕಥಾ ಹಂದರದ ಸಿನಿಮಾ. ಮಡಿವಂತಿಕೆಯೊಳಗೇ ಮಿಸುಕಾಡೋ ವಿಕೃತಿಯ ಪ್ರಶ್ನೆಗಳಿಗೆಲ್ಲ ಇಲ್ಲಿ ಮಾನವೀಯ ನೆಲೆಯಲ್ಲಿ ಉತ್ತರ ಹುಡುಕಲಾಗಿದೆ. ಹೆಣ್ಣಿನ ಮುಂದೆ ಗೆರೆ ಹಾಕಿ ಯಾವ ಭಾವನೆಗಳನ್ನೂ ಅಭಿವ್ಯಕ್ತಿಸದಂತೆ ಪಹರೆ ಕಾಯೋ ಮನಸ್ಥಿತಿ ನಮ್ಮಲ್ಲಿಯದ್ದು. ಇಂಥಾ ವಾತಾವರಣದಲ್ಲಿ ಪ್ರಕೃತಿ ಸಹಜವಾದ ದೈಹಿಕ ವಾಂಛೆಯನ್ನ ಹೆಣ್ಣು ಹೇಳಿಕೊಳ್ಳೋದನ್ನು ಸಹಿಸೋದುಂಟೇ. ಆದರೆ ಆ ಹತ್ತಿಕ್ಕಲಾರದ ಭಾವಗಳನ್ನು ಮನಸಿಗೆ ಮುತ್ತಿಕೊಳ್ಳುವಂಥಾ ಕಥಾನಕದ ಮೂಲಕ ತೆರೆದಿಟ್ಟಿರೋದು ಮನ್ಸೋರೆಯವರ ಕಲೆಗಾರಿಕೆ. ಭಿನ್ನ ದಾರಿಯ ಸಿನಿಮಾವೊಂದು ಈ ಥರ ಮನಸಿಗೆ ನಾಟುವಂತೆ ಮೂಡಿ ಬಂದಿರೋದೇ ಖುಷಿಯ ಸಂಗತಿ.

#

Advertisement
Click to comment

Leave a Reply

Your email address will not be published. Required fields are marked *

ಪ್ರಚಲಿತ ವಿದ್ಯಮಾನ

ಸಿನಿಬಜ್ ವರದಿಯ ಫಲಶ್ರುತಿ : ಹಳೆಯ ಗೆಳೆಯ ಅನಿಲ್ ಸಮಸ್ಯೆಗೆ ಸ್ಪಂದಿಸಿದರು ದರ್ಶನ್

Published

on

ನೆನ್ನೆ ನಟ ಅನಿಲ್ ನೀನಾಸಂ ಅವರ್ ಅನಾರೋಗ್ಯ, ಆರ್ಥಿಕ ಸಮಸ್ಯೆಯ ಕುರಿತು ಸಿನಿಬಜ಼್ ನೆನ್ನೆ ವರದಿ ಮಾಡಿತ್ತು. ವರದಿ ಪ್ರಕಟಗೊಂಡ ಕೆಲವೇ ಹೊತ್ತಿನಲ್ಲಿ ದರ್ಶನ್ ಅನಿಲ್ ಕುಟುಂಬಕ್ಕೆ ಕರೆ ಮಾಡಿ ತಾನು ಆದಷ್ಟು ಬೇಗ ಬಂದು ಭೇಟಿ ಮಾಡುತ್ತೇನೆ. ಆತಂಕ ಪಡಬೇಡಿ ಅಂತಾ ಸಾಂತ್ವನ ಹೇಳಿದ್ದಾರೆ. ಮಂಡ್ಯ ಚುನಾವಣಾ ಪ್ರಚಾರದಲ್ಲಿದ್ದ ದರ್ಶನ್ ಅದರ ಒತ್ತಡದ ಮಧ್ಯೆಯೂ ಅನಿಲ್ ಅವರನ್ನು ಸಂಪರ್ಕಿಸಿದ್ದಕ್ಕೆ ಸಿನಿಬಜ್ ಧನ್ಯವಾದ ಅರ್ಪಿಸುತ್ತದೆ…

ರಂಗಭೂಮಿಯಲ್ಲಿಯೇ ಕ್ರಿಯಾಶೀಲವಾಗಿ ತೊಡಗಿಸಿಕೊಂಡಿದ್ದ ಅನಿಲ್ ಹಲವಾರು ವರ್ಷಗಳ ಕಾಲ ಅಲ್ಲಿಯೇ ತೊಡಗಿಸಿಕೊಂಡಿದ್ದವರು. ವ್ಯವಹಾರದಾಚೆಗೆ ಕಲೆಯನ್ನು ಪ್ರೀತಿಸೋ ಮನಸ್ಥಿತಿಯ ಅನಿಲ್ ಆರಂಭ ಕಾಲದಿಂದಲೂ ಹಣಕಾಸಿನ ಬಗ್ಗೆ ಹೆಚ್ಚಾಗಿ ತಲೆ ಕೆಡಿಸಿಕೊಂಡವರಲ್ಲ. ಇದ್ದುದರಲ್ಲಿಯೇ ಅಚ್ಚುಕಟ್ಟಾಗಿ ಬದುಕೋ ಜಾಯಮಾನದ ಅವರಿಗೆ ಈಗ ಬಂದೊದಗಿರುವ ಅನಾರೋಗ್ಯ ಅನಿರೀಕ್ಷಿತ ಆಘಾತ.

ಇತ್ತೀಚೆಗವರು ಕಿರುತೆರೆ ಧಾರಾವಾಹಿಗಳಲ್ಲಿಯೂ ಹೆಚ್ಚಾಗಿ ನಟಿಸುತ್ತಿದ್ದರು. ಬಿಡುವಿರದೆ ಚಿತ್ರೀಕರಣದಲ್ಲಿ ತೊಡಗಿಸಿಕೊಳ್ಳುತ್ತಿದ್ದ ಅವರು ಆರೋಗ್ಯದ ಬಗ್ಗೆಯೂ ಅಷ್ಟಾಗಿ ಗಮನ ಹರಿಸಿರಲಿಲ್ಲ. ಇದೀಗ ಅವರು ಹಾಸಿಗೆ ಹಿಡಿದಿದ್ದಾರೆ. ಸಿನಿಬಜ಼್ ವರದಿ ಪ್ರಕಟಿಸಿದ ಮೇಲೆ ಒಂದಷ್ಟು ಕಡೆಯಿಂದ ಸಹಾಯಹಸ್ತ ಚಾಚಿಕೊಳ್ಳುತ್ತಿದೆ. ಈಗ ದರ್ಶನ್ ಅವರೂ ಈ ಬಗ್ಗೆ ಗಮನ ಹರಿಸಿರೋದರಿಂದ ಅನಿಲ್ ಅನಾರೋಗ್ಯ ನೀಗಿಕೊಂಡು ಬರುವ ಭರವಸೆ ಚಿಗುರಿಕೊಂಡಿದೆ. ಅವರು ಆದಷ್ಟು ಬೇಗನೆ ಚೇತರಿಸಿಕೊಂಡು ಮತ್ತೆ ಮೊದಲಿನಂತಾಗಲೆಂಬುದು ನಮ್ಮ ಹಾರೈಕೆ.

Continue Reading

ಫೋಕಸ್

ರಾಜಕೀಯಕ್ಕೆ ನನ್ನ ಹೆಸರು ಬಳಸಬೇಡಿ ಅಂದ್ರು ಅಪ್ಪು!

Published

on

ಮಂಡ್ಯ ಲೋಕಸಭಾ ಕ್ಷೇತ್ರವೀಗ ಇಡೀ ಕರ್ನಾಟಕದ ಕುತೂಹಲದ ಕೇಂದ್ರ ಬಿಂದು. ರೆಬೆಲ್ ಸ್ಟಾರ್ ಅಂಬರೀಶ್ ಮಡದಿ ಸುಮಲತಾ ಕೊನೆಗೂ ಪಕ್ಷೇತರ ಅಭ್ಯರ್ಥಿಯಾಗಿ ಕಣಕ್ಕಿಳಿದು ಎರಡೂ ಪಕ್ಷಗಳಿಗೆ ಸೆಡ್ಡು ಹೊಡೆದಿದ್ದಾರೆ. ಈ ಮೂಲಕ ಈ ಕ್ಷೇತ್ರಕ್ಕೂ ಸಿನಿಮಾ ರಂಗಕ್ಕೂ ನೇರಾ ನೇರ ಸಂಪರ್ಕ ಬಂದು ಬಿಟ್ಟಿದೆ. ಯಾವ ನಟರು ಯಾರ ಪರ ಪ್ರಚಾರ ನಡೆಸಬಹುದೆಂಬ ಬಗ್ಗೆಯೂ ಚರ್ಚೆಗಳು ನಡೆಯುತ್ತಿವೆ. ಈ ನಿಟ್ಟಿನಲ್ಲಿ ಒಂದಷ್ಟು ರೂಮರುಗಳೂ ಹರಿದಾಡಿ ಕೆಲ ನಾಯಕರ ಹೆಸರುಗಳೂ ಓಡಾಡುತ್ತಿವೆ.

ಮಂಡ್ಯ ಲೋಕಸಭಾ ಕ್ಷೇತ್ರದ ಕಣದಲ್ಲಿ ಪುನೀತ್ ರಾಜ್ ಕುಮಾರ್ ಅವರ ಹೆಸರೂ ಹರಿದಾಡಿತ್ತು. ಪುನೀತ್ ಸುಮಲತಾ ಪರವಾಗಿ ಪ್ರಚಾರ ನಡೆಸುತ್ತಾರಾ? ನಿಖಿಲ್ ಪರವಾಗಿ ಕಣಕ್ಕಿಳಿಯುತ್ತಾರಾ ಅಂತೆಲ್ಲ ಗೊಂದಲಗಳೂ ಸೃಷ್ಟಿಯಾಗಿದ್ದವು. ಹೀಗೆ ತಮ್ಮ ಹೆಸರು ವಿನಾಕಾರಣ ಹರಿದಾಡುತ್ತಿರೋದನ್ನು ಗಮನಿಸಿರುವ ಪುನೀತ್ ಕರ್ನಾಟಕದ ಮಹಾ ಜನತೆಗೆ ಪತ್ರ ಮುಖೇನ ಸಂದೇಶವೊಂದನ್ನು ರವಾನಿಸಿದ್ದಾರೆ. ಈ ಮೂಲಕ ಈ ಲೋಕಸಭಾ ಚುನಾವಣೆಯ ಬಗ್ಗೆ ತಮ್ಮ ನಿಲುವೇನೆಂಬುದನ್ನೂ ಸ್ಪಷ್ಟಪಡಿಸಿದ್ದಾರೆ.

‘ನನಗೂ ರಾಜಕೀಯಕ್ಕೂ ಯಾವುದೇ ಸಂಬಂಧವಿಲ್ಲವೆಂದು ನಿಮಗೂ ತಿಳಿದಿದೆ. ನಾನು ಒಬ್ಬ ನಟನಾಗಿ ಕಲೆಯ ಜೊತೆ ಗುರುತಿಸಿಕೊಳ್ಳುತ್ತೇನೇ ಹೊರತು ರಾಜಕಾರಣದಲ್ಲಲ್ಲ. ನಾನು ಹೇಳ ಬಯಸುವ ವಿಚಾರವೇನೆಂದರೆ, ಮತ ಚಲಾಯಿಸುವುದು ಪ್ರತಿಯೊಬ್ಬ ನಾಗರಿಕರ ಹಕ್ಕು. ಹಾಗೆಯೇ ಅದು ಅವರ ಆಯ್ಕೆಗೆ ಸಂಬಂಧಪಟ್ಟಿದ್ದು. ಅದನ್ನು ಈ ದೇಶದ ಹಾಗೂ ಈ ನಾಡಿನ ನಾಗರಿಕನಾಗಿ ನಾನು ಗೌರವಿಸುತ್ತೇನೆ. ಕನ್ನಡ ಜನತೆಗೆ ಹಾಗೂ ನಮ್ಮ ಅಭಿಮಾನಿಗಳಿಗೆ ಅವರ ಮತವನ್ನು ಪ್ರಬುದ್ಧವಾಗಿ ಚಲಾಯಿಸಿ ಎಂದು ಕೇಳಿಕೊಂಡಿದ್ದೇನೇ ಹೊರತು ಯಾವುದೇ ಪಕ್ಷ ಹಾಗೂ ವ್ಯಕ್ತಿಗೆ ಎಂದಿಗೂ ಸೂಚಿಸುವುದಿಲ್ಲ.

ಗೌರವಾನ್ವಿತ ದೇವೇಗೌಡರ ಕುಟುಂಬ ಹಾಗೂ ಅಂಬರೀಶ್ ಅವರ ಕುಟುಂಬ ನಮ್ಮ ಕುಟುಂಬದ ಹಾಗೆ. ಇಬ್ಬರೂ ನಮ್ಮ ಹಿತೈಶಿಗಳೇ. ಇಬ್ಬರಿಗೂ ಒಳ್ಳೆಯದಾಗಲಿ. ಆ ಭಗವಂತ ನಿಮಗೆ ಜನಸೇವೆ ಮಾಡುವ ಶಕ್ತಿಯನ್ನು ಇನ್ನಷ್ಟು ಕೊಡಲಿ ಎಂದು ಪ್ರಾರ್ಥಿಸುತ್ತಾ ನನ್ನ ಹೆಸರನ್ನು ಚುನಾವಣೆಗೆ ಹಾಗೂ ರಾಜಕಾರಣಕ್ಕೆ ಸಂಬಂಧಿಸಬೇಡಿ ಎಂದು ಎಲ್ಲರಲ್ಲೂ ವಿನಂತಿಸುತ್ತೇನೆ’ ಎಂಬ ಸ್ಪಷ್ಟವಾದ ಸಂದೇಶವನ್ನು ಪುನೀತ್ ಕೊಟ್ಟಿದ್ದಾರೆ.
ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಆರಂಭ ಕಾಲದಿಂದಲೂ ರಾಜಕಾರಣದತ್ತ ಆಸಕ್ತಿ ಹೊಂದಿದವರಲ್ಲ. ಯಾವುದೇ ಪಕ್ಷದ ದಾಳವಾಗಲೊಲ್ಲದ ಅವರು ಈ ವಲಯದಿಂದ ದೂರವೇ ಉಳಿದುಕೊಂಡು ಬಂದಿದ್ದಾರೆ. ಈ ಮೂಲಕ ಈ ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿ ಅವರು ತಮ್ಮ ನಿಲುವನ್ನು ಮತ್ತಷ್ಟು ಸ್ಪಷ್ಟಪಡಿಸಿದ್ದಾರೆ.

Continue Reading

ಕಲರ್ ಸ್ಟ್ರೀಟ್

ಮೆಣಸಿನಕಾಯಿಯ ಮಗ್ಗುಲಲ್ಲಿ ಸಿಕ್ಕಿಬಿದ್ದಳು ಮಳೆಹುಡುಗಿ!

Published

on


ಮುಂಗಾರು ಮಳೆ ಚಿತ್ರದ ಮೂಲಕವೇ ಚಿಗುರಿಕೊಂಡವಳು ನಟಿ ಪೂಜಾಗಾಂಧಿ. ಆ ನಂತರದಲ್ಲಿ ಈಕೆ ಸಿನಿಮಾಗಳ ಮೂಲಕ ಸದ್ದು ಮಾಡಿದ್ದಕ್ಕಿಂತಲೂ ಹೆಚ್ಚಾಗಿ ದೋಖಾ ಬಾಜಿಗಳ ಮೂಲಕ ವಿವಾದವೆಬ್ಬಿಸಿದ್ದೇ ಹೆಚ್ಚು. ಇಂಥಾ ಪೂಜಾ ಕಂಡೋರಿಗೆಲ್ಲ ಮುಂಡಾಯಿಸಿ ಮುಖ ಮುಚ್ಚಿಕೊಂಡು ಓಡಾಡುವ ಸ್ಥಿತಿ ಬಂದಿತ್ತು. ಈಕೆ ತನ್ನ ತವರಾದ ಉತ್ತರ ಭಾರತದ ಕಡೆ ವಲಸೆ ಹೋಗಿದ್ದಾಳೆಂದೂ ರೂಮರುಗಳು ಹಬ್ಬಿದ್ದವು. ಈಗೊಂದು ವರ್ಷದಿಂದ ಸಂಪೂರ್ಣ ಕಣ್ಮರೆಯಾಗಿ ಬಿಟ್ಟಿದ್ದ ಪೂಜಾ ಇದೀಗ ಮತ್ತೊಂದು ರಂಖಲಿನೊಂದಿಗೆ ಮತ್ತೆ ಸುದ್ದಿಯಾಗಿದ್ದಾಳೆ. ಈ ಮೂಲಕ ನಾಯಿಯ ಬಾಲ ಮುಂಗಾರು ಮಳೆಯಲ್ಲಿ ನೆನೆಬಿದ್ದರೂ ನೆಟ್ಟಗಾಗೋದಿಲ್ಲ ಅನ್ನೋದೂ ಸಾಬೀತಾಗಿದೆ!

ಒಂದು ವರ್ಷದಿಂದ ಈ ಪೂಜಾ ಅದೆಲ್ಲಿ ಹೋಗಿದ್ದಳು ಅನ್ನೋ ಪ್ರಶ್ನೆಗೆ ಈ ವಿವಾದದ ಮೂಲಕ ಉತ್ತರ ಸಿಕ್ಕಿದೆ. ಅದ್ಯಾರೋ ಅನಿಲ್ ಮೆಣಸಿನಕಾಯಿ ಎಂಬ ಬಿಜೆಪಿ ಮುಖಂಡನ ಜೊತೆ ಲಲಿತ್ ಅಶೋಕ್ ಹೊಟೆಲ್ಲಿನಲ್ಲಿ ಒಂದು ವರ್ಷದಿಂದ ಪೂಜಾ ಸುದೀರ್ಘವಾಗಿ ಮೀಟಿಂಗು ನಡೆಸುತ್ತಿದ್ದ ಸೋಜಿಗವೂ ಅನಾವರಣಗೊಂಡಿದೆ. ರಾಜಕಾರಣ ಮತ್ತು ಜನರ ಬಗ್ಗೆ ಅಪಾರ ಕಾಳಜಿ ಹೊಂದಿರೋ ಪೂಜಾ ವರ್ಷದಿಂದೀಚೆಗೆ ಲೋಕಸಭಾ ಚುನಾವಣೆಗೆ ತಯಾರಿ ನಡೆಸುತ್ತಿದ್ದ ಸಮಾಜಮುಖಿ ವಿಚಾರವೂ ಈಗ ಜಾಹೀರಾಗಿದೆ. ಬಹುಶಃ ಈ ಜೋಡಿ ಲೋಕೋದ್ಧಾರದ ಚರ್ಚೆಯಲ್ಲಿ ಹೊಟೆಲ್ ಬಿಲ್ಲು ಕೊಡೋದನ್ನೇ ಮರೆಯದಿದ್ದರೆ, ಹೈಗ್ರೌಂಡ್ಸ್ ಪೊಲೀಸ್ ಠಾಣೆಯ ಇನ್ಸ್ ಪೆಕ್ಷರ್ ಸಾಧಿಕ್ ಪಾಷಾ ವರೆಗೂ ಈ ಸುದ್ದಿ ಹೋಗದಿದ್ದರೆ ಅನ್ಯಾಯವಾಗಿ ಪೂಜಾ ಗಾಂಧಿಯ ಸಮಾಜಸೇವೆ ಮರೆಯಾಗಿ ಬಿಡುತ್ತಿತ್ತು!

ಈ ಪ್ರಕರಣದ ಒಟ್ಟಾರೆ ಡೀಟೇಲುಗಳೇ ಪೂಜಾಗಾಂಧಿಯ ಅಸಲೀ ಕಸುಬಿಗೆ ಕನ್ನಡಿ ಹಿಡಿಯುವಂತಿದೆ. ಹೋಟೆಲ್ ಲಲಿತ್ ಅಶೋಕ್ ಆಡಳಿತವರ್ಗ ನೀಡಿರೋ ದೂರು ಮತ್ತು ಪೊಲೀಸ್ ಫೈಲುಗಳು ಅದನ್ನು ಖುಲ್ಲಂಖುಲ್ಲ ಬಿಚ್ಚಿಡುತ್ತವೆ. ಈ ಪ್ರಕಾರವಾಗಿ ನೋಡ ಹೋದರೆ ಬಿಜೆಪಿ ಮುಖಂಡ ಅನ್ನಿಸಿಕೊಂಡಿರೋ ಅನಿಲ್ ಮೆಣಸಿನಕಾಯಿ ಮತ್ತು ಪೂಜಾ ಗಾಂಧಿ ಈಗೊಂದು ವರ್ಷದ ಹಿಂದೆಯೇ ಅಶೋಕ್ ಹೋಟೆಲಿನಲ್ಲಿ ರೂಂ ಬುಕ್ ಮಾಡಿದ್ದರು. ಬರೋಬ್ಬರಿ ಒಂದು ವರ್ಷಗಳ ಕಾಲ ಇವರಿಬ್ಬರೂ ಅದೇನು ಮಾಡುತ್ತಿದ್ದರೋ ಭಗವಂತನೇ ಬಲ್ಲ. ಆದರೆ ಹೊಟೇಲಿನ ಸಕಲ ಸೌಕರ್ಯಗಳನ್ನೂ ಪಡೆದುಕೊಂಡಿದ್ದರು.

ಆದರೆ ಈ ಸುದೀರ್ಘಾವಧಿ ಪವಡಿಸಿದ ಒಟ್ಟು ರೂಂ ಬಿಲ್ 26.22ಲಕ್ಷ ಆಗಿ ಹೋಗಿತ್ತು. ಹೇಳಿಕೇಳಿ ಅನಿಲ್ ಮೆಣಸಿನಕಾಯಿ ಬಿಜೆಪಿ ಮುಖಂಡ. ಈ ಮುಲಾಜಿಗೆ ಬಿದ್ದು ಸುಮ್ಮನಿದ್ದ ಹೊಟೆಲ್ ಆಡಳಿತ ವರ್ಗ ಕಡೆಗೂ ಎಚ್ಚರಿಕೆ ನೀಡಿದಾಗ ಅನಿಲ್ 22.80 ಲಕ್ಷ ಪಾವತಿಸಿದ್ದ. ಅಲ್ಲಿಗೆ 3.50 ಲಕ್ಷ ಬಾಕಿ ಉಳಿದುಕೊಂಡಿತ್ತಲ್ಲಾ? ಸಿಬ್ಬಂದಿ ಒತ್ತಾಯ ಮಾಡಿದಾಗ ಅದರಲ್ಲಿ ೨.೨೫ ಲಕ್ಷವನ್ನು ಮತ್ತೆ ಕೊಸರಾಡಿ ಕಟ್ಟಿದ್ದ. ಆದರೂ 1.25ಲಕ್ಷ ಬಾಕಿ ಉಳಿದುಕೊಂಡು ಬಿಟ್ಟಿತ್ತು. ಇದೀಗ ಇನ್ಸ್ ಪೆಕ್ಟರ್ ಸಾದಿಕ್ ಪಾಷಾ ಅವಾಜು ಹಾಕುತ್ತಲೇ ಉಳಿಕೆ ಮೊತ್ತ ಪಾವತಿಸಿ ಬಚಾವಾಗಿದ್ದಾನೆ.

ಆದರೆ ಹೊಟೇಲು ಬಿಲ್ಲ ಪಾವತಿಸಿಯಾದ ಮೇಲೂ ಅನಿಲ್ ಮೆಣಸಿನಕಾಯಿ ಬೆತ್ತಲಾಗಿದ್ದಾನೆ. ಪೂಜಾ ಗಾಂಧಿ ಕೂಡಾ ಪೇಚಿಗೆ ಬಿದ್ದಿದ್ದಾಳೆ. ಆರಂಭದಲ್ಲಿ ಈ ಅನಿಲ್ ಮಾಧ್ಯಮಗಳ ಮುಂದೆ ಕೊಸರಾಡುತ್ತಾ ಏನೇನೋ ಕಥೆ ಹೇಳಿ ತಾನು ಸಾಚಾ ಅಂತ ಬಿಂಬಿಸಿಕೊಳ್ಳಲು ಪ್ರಯತ್ನಿಸಿದ್ದ. ನನಗೂ ಪೂಜಾಗೂ ಯಾವ ವ್ಯಾವಹಾರಿಕ ಸಂಬಧವೂ ಇರಲಿಲ್ಲ. ನಾನು ಹೋಟೆಲ್ ಲಲಿತ್ ಅಶೋಕದಲ್ಲಿ ಯಾವ ರೂಮನ್ನೂ ಮಾಡಿಲ್ಲ. ಆದರೂ ನನ್ನ ಹೆಸರು ಇಲ್ಯಾಕೆ ಸೇರಿಕೊಂಡಿತೋ… ಅಂತ ಮಳ್ಳನಂತಾಡಿ ಆಕಾಶ ನೋಡಿದ್ದ. ಆದರೆ ಇದರ ಹಿಂದಿರೋ ಅಸಲೀ ವಿಚಾರ ಏನನ್ನೋದು ಜನಸಾಮಾನ್ಯರಿಗೂ ಅರ್ಥವಾಗಿದೆ. ಯಾವ ಸಂಬಂಧವೂ ಇಲ್ಲದೇ ಪೂಜಾ ಗಾಂಧಿ ಮತ್ತು ಅನಿಲ್ ಮೆಣಸಿನ ಕಾಯಿ ಒಂದು ವರ್ಷಗಳ ಕಾಲ ಭಜನೆ ಮಾಡುತ್ತಿದ್ದರೆಂದು ನಂಬುವಷು ಇಲ್ಯಾರೂ ಮುಠ್ಠಾಳರಿಲ್ಲ. ಇಂಥಾ ಕಥೆ ಹೇಳಿದರೆ ಪೂಜಾ ಗಾಂಧಿಯ ಹಿಸ್ಟರಿ ಗೊತ್ತಿರೋ ಯಾರೇ ಯಾದರೂ ಎದೆಗೆ ಬಂದೂಕು ತಿವಿದರೂ ನಂಬುವುದಿಲ್ಲ!

ಈ ಪೂಜಾಗಾಂಧಿ ಎಂಬ ಸವಕಲು ನಟಿಯ ಜಾಯಮಾನವೇ ಇಂಥಾದ್ದು. ರಾಜಕೀಯ ಪುಢಾರಿಗಳು, ಹಣವಂತರನ್ನು ಹುಡುಕಿ ಬಲೆಗೆ ಕೆಡವಿಕೊಳ್ಳೋದರಲ್ಲಿ ಈಕೆ ಮಾಸ್ಟರ್ ಪೀಸು. ನಂತರ ಹೀಗೆ ರೂಮುಗಳಲ್ಲಿ ಸುದೀರ್ಘವಾಗಿ ಮೀಟಿಂಗು ನಡೆಸಿ, ಆ ಅವಧಿಯಲ್ಲಿ ಮಿಕಗಳನ್ನು ಪಳಗಿಸಿಕೊಂಡು ಕಾಸು ಗುಂಜಿಕೊಳ್ಳೋದು ಇವಳ ಜಾಯಮಾನ. ರೀಸೆಂಟಾಗಿ ಹೀಗೆಯೇ ಇವಳಿಂದ ವಂಚನೆಗೀಡಾಗಿದ್ದ ಬಿಲ್ಡರ್ ಒಬ್ಬ ತಾನೇ ಕೊಟ್ಟಿದ್ದ ಫಾರ್ಚುನರ್ ಗಾಡಿ ಕಸಿದುಕೊಂಡು ಪೂಜಾಳ ಮುಖಕ್ಕುಗಿದು ಕಳಿಸಿದ್ದನಂತೆ. ಹಾಗೆ ಖಾಲಿ ಕೈಲಿ ನಿಂತಿದ್ದ ಪೂಜಾ ಇವನ್ಯಾರೋ ಉತ್ತರಕರ್ನಾಟಕದ ಮೆಣಸಿನಕಾಯಿಯ ಮೈ ನೀವಿ ಪಳಗಿಸಿಕೊಂಡಿದ್ದಾಳೆ. ಎಲ್ಲ ಕಾಲದಲ್ಲಿಯೂ ಟೈಂ ಸರಿಯಾಗೇ ಇರೋದಿಲ್ಲವಲ್ಲಾ? ಈ ಬಾರಿ ಪೂಜಾ ಗಾಂಧಿಯ ನಸೀಬು ಕೆಟ್ಟಿದೆ. ಆದ್ದರಿಂದಲೇ ಮಗ್ಗುಲಲ್ಲಿದ್ದ ಮೆಣಸಿನಕಾಯಿಯ ಸಮೇತ ಸಿಕ್ಕಿಬಿದ್ದಿದ್ದಾಳೆ!

Continue Reading
Advertisement
Advertisement

Trending