Connect with us

ಗಾಂಧಿನಗರ ಗಾಸಿಪ್

ರಶ್ಮಿಕಾ ಬಿಟ್ಟು ಹೋದ ವೃತ್ರಕ್ಕೆ ನಿತ್ಯಾಗಮನ!

Published

on

ರಕ್ಷಿತ್ ಶೆಟ್ಟಿ ಜೊತೆ ಬ್ರೇಕಪ್ ಆದ ಸುದ್ದಿ ಹರಡುತ್ತಲೇ ರಶ್ಮಿಕಾ ಮಂದಣ್ಣ ಕನ್ನಡ ಚಿತ್ರರಂಗದಿಂದಲೂ ದೂರ ಸರಿಯುತ್ತಿದ್ದಾಳಾ? ಎಂಬ ಪ್ರಶ್ನೆ ಹುಟ್ಟಲು ಕಾರಣವಾಗಿರೋದು ವೃತ್ರ ಚಿತ್ರ. ರಕ್ಷಿತ್ ಬೆಟಾಲಿಯನ್ನಿನ ಸದಸ್ಯರಾಗಿರೋ ಗೌತಮ್ ನಿರ್ದೇಶನದ ವೃತ್ರ ಚಿತ್ರಕ್ಕೆ ರಶ್ಮಿಕಾ ನಾಯಕಿ ಎಂಬುದಾಗಿ ಅಧಿಕೃತವಾಗಿಯೇ ಘೋಷಣೆಯಾಗಿತ್ತು. ಆದರೆ ಈ ಚಿತ್ರದಲ್ಲಿ ನಟಿಸೋದಿಲ್ಲ ಅಂತ ರಶ್ಮಿಕಾ ಹೇಳಿದ ಬೆನ್ನಿಗೇ ಹೊಸಾ ಹುಡುಗಿ ನಿತ್ಯಾ ಆ ಜಾಗಕ್ಕೆ ಆಗಮಿಸಿದ್ದಾಳೆ.

ನಿರ್ದೇಶಕ ಗೌತಮ್ ರಕ್ಷಿತ್ ಕ್ಯಾಂಪಿನ ಹುಡುಗ ಎಂಬ ಕಾರಣದಿಂದಲೇ ವೃತ್ರ ಚಿತ್ರದಿಂದ ರಶ್ಮಿಕಾ ದೂರ ಸರಿದಿದ್ದಾಳೆಂಬ ಮಾತೂ ಕೇಳಿ ಬರುತ್ತಿದೆ. ರಶ್ಮಿಕಾ ಹೋದರೇನಂತೆ ಬೇರೆ ನಾಯಕಿಯರಿಗೆ ಬರವೇ ಅಂತೊಂದು ಸಂದೇಶ ರವಾನಿಸೋ ಸಲುವಾಗಿಯೇ ಈ ಚಿತ್ರಕ್ಕೆ ತರಾತುರಿಯಿಂದ ನಿತ್ಯಾ ಎಂಬಾಕೆಯನ್ನು ಕರೆತರಲಾಗಿದೆ ಎಂಬ ರೂಮರುಗಳೂ ಹುಟ್ಟಿಕೊಂಡಿವೆ.

ಒಟ್ಟಾರೆಯಾಗಿ ಮಹಿಳಾ ಪ್ರಧಾನ ವೃತ್ರ ಚಿತ್ರಕ್ಕೆ ನಿತ್ಯಾಶ್ರೀ ನಾಯಕಿಯಾಗಿ ಆಯ್ಕೆಯಾಗಿದ್ದಾಳೆ. ಈ ಹಿಂದೆ ಮಣಿರತ್ನಂ ನಿರ್ದೇಶನದ ಚಿತ್ರವೊಂದರಲ್ಲಿ ಸಣ್ಣದೊಂದು ಪಾತ್ರ ನಿರ್ವಹಿಸಿದ್ದವರು ನಿತ್ಯಾಶ್ರೀ. ಈಕೆ ಈ ಚಿತ್ರದ ಮೂಲಕ ಮಿಂಚಿ ರಶ್ಮಿಕಾ ಸ್ಥಾನವನ್ನು ತುಂಬಲಿದ್ದಾರಾ ಎಂಬ ಕುತೂಹಲವಂತೂ ಪ್ರೇಕ್ಷಕರಲ್ಲಿ ಇದ್ದೇ ಇದೆ.

ಇದು ಗೌತಮ್ ನಿರ್ದೇಶನದಲ್ಲಿ ಮೂಡಿ ಬರುತ್ತಿರುವ ಹೊಸಬರೇ ತುಂಬಿರುವ ಚಿತ್ರ. ಆದರೆ ರಶ್ಮಿಕಾ ಮತ್ತು ರಕ್ಷಿತ್ ಬ್ರೇಕಪ್ ಕಾರಣದಿಂದ ಈ ಚಿತ್ರಕ್ಕೂ ಗ್ರಹಣ ಕವಿದುಕೊಂಡಿತ್ತು. ಅದಾಗಲೇ ಕನ್ನಡ ಮತ್ತು ಇಂಗ್ಲಿಶ್ ಪೋಸ್ಟರುಗಳಲ್ಲಿಯೂ ರಶ್ಮಿಕಾ ಮಿಂಚಿದ್ದರಲ್ಲಾ? ಆ ಮುಲಾಜಿಗಾದರೂ ರಶ್ಮಿಕಾ ಈ ಚಿತ್ರದಿಂದ ಹೊರ ಹೋಗಲಿಕ್ಕಿಲ್ಲ ಎಂದೇ ಚಿತ್ರತಂಡ ನಂಬಿತ್ತು. ಅದು ಸುಳ್ಳಾದ ತಕ್ಷಣವೇ ಈ ಚಿತ್ರಕ್ಕೆ ನಿತ್ಯಾಶ್ರೀಯ ಆಗಮನವಾಗಿದೆ.

ಗಾಂಧಿನಗರ ಗಾಸಿಪ್

ಕೆಜಿಎಫ್ ಆಡಿಯೋ ಹಕ್ಕಿಗೆ ಮೂರು ಕೋಟಿ ಅರವತ್ತು ಲಕ್ಷ!

Published

on

ಕನ್ನಡದ ಮಟ್ಟಿಗೆ ಲಹರಿ ಆಡಿಯೋ ಸಂಸ್ಥೆ ಸಾರ್ವಕಾಲಿಕ ದಾಖಲೆಗಳ ರೂವಾರಿ. ತನ್ನ ದಾಖಲೆಗಳನ್ನು ತಾನೇ ಬ್ರೇಕ್ ಮಾಡಿಕೊಳ್ಳೋದು ಲಹರಿಯ ಸ್ಪೆಷಾಲಿಟಿ. ಆದರೆ ಈಗ ಈ ಸಂಸ್ಥೆ ಮಾಡಿರೋ ದಾಖಲೆ ಮಾತ್ರ ಕನ್ನಡ ಮಾತ್ರವಲ್ಲದೇ ಬೇರೆ ಭಾಷೆಗಳ ಚಿತ್ರರಂಗದವರೂ ಬೆರಗಾಗಿದ್ದಾರೆ!

ಅಂದಹಾಗೆ, ಕನ್ನಡದ ಕೆಜಿಎಫ್ ಚಿತ್ರ ಐದು ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದೆಯಲ್ಲಾ? ಅದರಲ್ಲಿ ಹಿಂದಿ ಒಂದನ್ನು ಹೊರತು ಪಡಿಸಿ ಮಿಕ್ಕ ನಾಲಕ್ಕೂ ಭಾಷೆಗಳ ಆಡಿಯೋ ಹಕ್ಕುಗಳನ್ನು ಲಹರಿ ಸಂಸ್ಥೆ ದಾಖಲೆ ಮೊತ್ತಕ್ಕೆ ಖರೀದಿಸಿದೆ. ಆ ಮೊತ್ತ ಬರೋಬ್ಬರಿ 3.60 ಕೋಟಿ!

ಇದು ನಿಜಕ್ಕೂ ದಾಖಲೆ. ಕನ್ನಡ, ತೆಲುಗು, ಮಲೆಯಾಳಂ ಮತ್ತು ತಮಿಳು ಭಾಷೆಗಳ ಕೆಜಿಎಫ್ ಆಡಿಯೋ ಹಕ್ಕನ್ನು ಈ ಪಾಟಿ ದೊಡ್ಡ ಮೊತ್ತಕ್ಕೆ ಖರೀದಿಸೋ ಮೂಲಕ ಲಹರಿ ಸಂಸ್ಥೆ ಕೆಜಿಎಫ್ ಚಿತ್ರಕ್ಕೆ ಮತ್ತಷ್ಟು ಖದರು ತಂದು ಕೊಟ್ಟಿರೋದಂತೂ ಸತ್ಯ.

ಈ ಮೂಲಕ ಲಹರಿ ವೇಲು ಈ ಹಿಂದೆ ತಾವೇ ಸೃಷ್ಟಿಸಿದ್ದ ದಾಖಲೆಯನ್ನು ಬ್ರೇಕ್ ಮಾಡಿದಂತಾಗಿದೆ. 1992ರಲ್ಲಿ ದಳಪತಿ ಚಿತ್ರದ ಆಡಿಯೋ ಹಕ್ಕುಗಳನ್ನು ಈ ಸಂಸ್ಥೆ ಎಪ್ಪತೈದು ಲಕ್ಷ ಕೊಟ್ಟು ಖರೀದಿಸಿತ್ತು. ಈ ಸುದ್ದಿ ಕೇಳಿ ಎಲ್ಲರೂ ಬೆರಗಾಗಿದ್ದರು. ಇಂಥಾದ್ದೊಂದು ದಾಖಲೆಯ ನಂತರ ಬಾಹುಬಲಿ ಚಿತ್ರದ ಆಡಿಯೋ ಹಕ್ಕುಗಳನ್ನೂ ಕೂಡಾ ಭಾರೀ ಮೊತ್ತಕ್ಕೇ ಖರೀದಿಸಲಾಗಿತ್ತು. ಇದೀಗ ಖುದ್ದು ಲಹರಿ ಸಂಸ್ಥೆ ಕೆಜಿಎಫ್ ಮೂಲಕ ತನ್ನ ದಾಖಲೆಗಳನ್ನು ತಾನೇ ಬ್ರೇಕ್ ಮಾಡಿಕೊಂಡಿದೆ.

ಕೆಜಿಎಫ್ ಚಿತ್ರದ ಟೀಸರ್‌ಗೆ ದೇಶಾಧ್ಯಂತ ವ್ಯಾಪಕ ಮೆಚ್ಚುಗೆ ಕೇಳಿ ಬರುತ್ತಿದೆ. ಕನ್ನಡ ಚಿತ್ರವೊಂದು ಬೇರೆ ಭಾಷೆಗಳಲ್ಲಿಯೂ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಿರುವ, ಕನ್ನಡ ಚಿತ್ರರಂಗದ ಗರಿಮೆಯನ್ನು ಎತ್ತಿ ಹಿಡಿಯುತ್ತಿರೋದರಿಂದ ಖುಷಿಗೊಂಡಿರೋ ವೇಲು ಅವರು ದಾಖಲೆ ಮೊತ್ತಕ್ಕೆ ಆಡಿಯೋ ಹಕ್ಕು ಖರೀದಿ ಮಾಡಿದ್ದಾರಂತೆ.

Continue Reading

ಗಾಂಧಿನಗರ ಗಾಸಿಪ್

ಶುರುವಾಯ್ತು ಬೇಡಿಕೆಯ ಭರಾಟೆ!

Published

on

ಶ್ರೀಮುರುಳಿ ಅಭಿನಯದ ಭರಾಟೆ ಚಿತ್ರದ ಚಿತ್ರೀಕರಣ ರಾಜಸ್ಥಾನದಲ್ಲಿ ಅವ್ಯಾಹತವಾಗಿ ನಡೆಯುತ್ತಿದೆ. ಯಾವಾಗ ಚಿತ್ರೀಕರಣ ಆರಂಭವಾಯ್ತೋ ಆ ಘಳಿಗೆಯಿಂದಲೇ ಸದಾ ಸುದ್ದಿಯಲ್ಲಿರುವ ಈ ಚಿತ್ರವೀಗ ಬೇರೆ ಬೇರೆ ಭಾಷೆಗಳ ಚಿತ್ರರಂಗವನ್ನೂ ತನ್ನತ್ತ ಸೆಳೆದಿದೆ. ಇನ್ನು, ದರ್ಶನ್ ಸೋದರಳಿಯ ಮನೋಜ್ ನಟಿಸುತ್ತಿರುವ ‘ಟಕ್ಕರ್’ಗೆ ನಾಲ್ಕೈದು ದಿನಗಳ ಚಿತ್ರೀಕರಣವಷ್ಟೇ ಬಾಕಿಯಿದೆ. ಈ ಎರಡೂ ಸಿನಿಮಾಗಳಿನ್ನೂ ಚಿತ್ರೀಕರಣದ ಹಂತದಲ್ಲಿರುವಾಗಲೇ ಡಬ್ಬಿಂಗ್ ರೈಟ್ಸ್‌ಗಾಗಿ ಪೈಪೋಟಿ ಆರಂಭವಾಗಿದೆ!

ವಿಶೇಷವೆಂದರೆ ಈ ಎರಡೂ ಸಿನಿಮಾಗಳ ಫಸ್ಟ್ ಲುಕ್ ಎಲ್ಲೆಡೆ ಮೆಚ್ಚುಗೆ ಪಡೆದುಕೊಂಡಿದೆ. ಅದು ಒಟ್ಟಾರೆ ಚಿತ್ರದ ಅದ್ದೂರಿತನಕ್ಕೂ ಕನ್ನಡಿ ಹಿಡಿದಂತಿದೆ. ಈ ಕಾರಣದಿಂದಾಗಿಯೇ ಡಬ್ಬಿಂಗ್ ಹಕ್ಕುಗಳಿಗೆ ಭಾರೀ ಬೇಡಿಕೆ ಬಂದಿದೆ. ಇದೀಗ ಹಿಂದಿ ಹಾಗೂ ಭೋಜ್‌ಪುರಿ ಭಾಷೆಗಳಿಗೆ ಭರಾಟೆ ಮತ್ತು ಟಕ್ಕರ್ ಸಿನಿಮಾಗಳನ್ನು ಡಬ್ ಮಾಡಲು ಪ್ರಸಿದ್ಧ ಸಂಸ್ಥೆಗಳೇ ಉತ್ಸುಕವಾಗಿವೆ.

ಬಾಲಿವುಡ್‌ನ ಪ್ರಸಿದ್ಧ ಕಂಪೆನಿಗಳೇ ಈ ಸಿನಿಮಾಗಳ ಡಬ್ಬಿಂಗ್ ಹಕ್ಕುಗಳನ್ನು ಪಡೆಯಲು ಹಣಾಹಣಿ ಶುರು ಮಾಡಿವೆ. ದೊಡ್ಡ ಮೊತ್ತ ಕೊಟ್ಟು ಡಬ್ಬಿಂಗ್ ಹಕ್ಕು ಖರೀದಿಗೂ ಮುಂದಾಗಿವೆ. ಭೋಜ್‌ಪುರಿಯಲ್ಲಂತೂ ಈ ಪೈಪೋಟಿ ಇನ್ನೂ ತೀವ್ರವಾಗಿದೆಯಂತೆ. ಆದರೆ ಈ ಬಗ್ಗೆ ಇನ್ನೂ ಮಾತುಕತೆ ಚಾಲ್ತಿಯಲ್ಲಿದೆ. ಶೀರ್ಘದಲ್ಲಿಯೇ ಈ ಬಗ್ಗೆ ನಿರ್ಮಾಪಕರು ನಿರ್ಧಾರ ಕೈಗೊಳ್ಳಲಿದ್ದಾರೆ.

ಭರಾಟೆಯನ್ನು ಭೋಜ್‌ಪುರಿ ಭಾಷೆಗೆ ಭರಾಟೆಯನ್ನು ಡಬ್ ಮಾಡುವ ಸಲುವಾಗಿ ನೂಕು ನುಗ್ಗಲು ಶುರುವಾಗಿರೋದಕ್ಕೆ ಕಾರಣವಿದೆ. ಭರಾಟೆ ಚಿತ್ರದ ಚಿತ್ರೀಕರಣ ಆರಂಭವಾಗಿದ್ದೇ ರಾಜಸ್ಥಾನದ ಮರುಭೂಮಿಯಲ್ಲಿ. ಇದರ ಬಹುಭಾಗದ ಚಿತ್ರೀಕರಣ ಅಲ್ಲಿಯೇ ನಡೆಯಲಿದೆ. ಶ್ರೀಮುರಳಿಯ ವೇಷಭೂಷಣಗಳೂ ಕೂಡಾ ಅಲ್ಲಿನ ಶೈಲಿಗನುಗುಣವಾಗಿಯೇ ಇದೆ. ಈ ಚಿತ್ರದಲ್ಲಿ ಅಲ್ಲಿನ ಸಂಸ್ಕೃತಿಯ ಘಮವೇ ಹೆಚ್ಚಾಗಿರೋದರಿಂದ ಭೋಜ್‌ಪುರಿಯಲ್ಲಿ ಈ ಚಿತ್ರ ಗೆಲ್ಲೋದು ಗ್ಯಾರೆಂಟಿ. ಆದ್ದರಿಂದಲೇ ಡಬ್ಬಿಂಗ್ ಹಕ್ಕುಗಳಿಗಾಗಿ ಕಸರತ್ತು ಶುರುವಾಗಿದೆ.

ಟಕ್ಕರ್ ಸಿನಿಮಾದ ಮೂಲಕ ಆರಡಿಯ ಹುಡುಗ ಮನೋಜ್ ಎಂಟ್ರಿ ಕೊಡುತ್ತಿರೋದು ಅಮೋಘ ಐದು ಫೈಟುಗಳನ್ನು ರೋಚಕವಾಗಿ ಚಿತ್ರೀಕರಿಸಿರೋದು, ದುಬಾರಿ ಬೆಲೆಯ ಪ್ಯಾಂಟಮ್ ಕ್ಯಾಮೆರಾದಲ್ಲಿ ಸೆರೆ ಹಿಡಿದಿರೋದು, ಸದ್ಯ ಕನ್ನಡದ ಕಿರುತೆರೆಯ ಸ್ಟಾರ್ ನಟಿ ರಂಜನಿ ರಾಘವನ್ ನಾಯಕಿಯಾಗಿ ಕಾಣಿಸಿಕೊಂಡಿರೋದು, ಭಜರಂಗಿ ಲೋಕಿ ಸ್ಟೈಲಿಷ್ ವಿಲನ್ ಆಗಿ ಆರ್ಭಟಿಸಿರೋದು… ಹೀಗೆ ಹಲವಾರು ಕಾರಣಗಳಿಗಾಗಿ ರಘು ಶಾಸ್ತ್ರಿ ನಿರ್ದೇಶನದ ಟಕ್ಕರ್ ಚಿತ್ರದ ಮಾರ್ಕೆಟ್ಟು ತೆರೆದುಕೊಂಡಿದೆ. ಅಂತಿಮ ಹಂತದ ಚಿತ್ರೀಕರಣದ ಸಂದರ್ಭದಲ್ಲೇ ನಾಗೇಶ್ ಕೋಗಿಲು ಅವರ ನಿರ್ಮಾಣದ ‘ಟಕ್ಕರ್’ಗೆ ಬೇಡಿಕೆ ಸೃಷ್ಟಿಯಾಗಿರೋದು ನಿಜಕ್ಕೂ ಒಳ್ಳೇ ಬೆಳವಣಿಗೆ.

ಕನ್ನಡ ಚಿತ್ರಗಳು ಚಿತ್ರೀಕರಣದ ಹಂತದಲ್ಲಿಯೇ ಬೇರೆ ಭಾಷೆಗಳಿಂದ ಇಂಥಾ ಬೇಡಿಕೆ ಪಡೆದಿರೋದು ಸಕಾರಾತ್ಮಕ ಬೆಳವಣಿಗೆ. ಈ ಮೂಲಕ ಭರಾಟೆ ಮತ್ತು ಟಕ್ಕರ್ ಬಗ್ಗೆ ಕನ್ನಡ ಪ್ರೇಕ್ಷಕರಲ್ಲಿಯೂ ಕುತೂಹಲ ಇಮ್ಮಡಿಸಲಿದೆ.

Continue Reading

ಗಾಂಧಿನಗರ ಗಾಸಿಪ್

ಮುಂದಿನ ಚಿತ್ರಕ್ಕೆ ಫಿಕ್ಸಾಯ್ತು ಪವರ್‌ಫುಲ್ ಟೈಟಲ್!

Published

on

ರಾಜಕುಮಾರ ಚಿತ್ರದ ನಂತರ ಮತ್ತೊಂದು ಚಿತ್ರದಲ್ಲಿ ಸಂತೋಷ್ ಆನಂದರಾಮ್ ಮತ್ತು ಪುನೀತ್ ರಾಜ್ ಕುಮಾರ್ ಜೊತೆಯಾಗುತ್ತಿದ್ದಾರೆ. ರಾಜಕುಮಾರ ಕನ್ನಡ ಚಿತ್ರರಂಗದಲ್ಲಿಯೇ ಸಾರ್ವಕಾಲಿಕ ದಾಕಲೆ ಬರೆದ ಚಿತ್ರ. ಇದೇ ಜೋಡಿಯ ಮುಂದಿನ ಚಿತ್ರದ ಬಗ್ಗೆ ಎಲ್ಲೆಡೆ ನಾನಾ ದಿಕ್ಕಿನಲ್ಲಿ ಕುತೂಹಲ, ಚರ್ಚೆ ಆರಂಭವಾಗಿದೆ. ಆದರೀಗ ಈ ಚಿತ್ರದ ಶೀರ್ಷಿಕೆ ಏನೆಂಬುದರ ಬಗ್ಗೆ ಸುಳಿವೊಂದು ಸಿಕ್ಕಿದೆ.

ಸಂತೋಷ್ ಆನಂದರಾಮ್ ಈ ಚಿತ್ರದ ಕಥೆ ಸೇರಿದಂತೆ ಎಲ್ಲ ಕೆಲಸ ಕಾರ್ಯಗಳನ್ನೂ ಈಗಾಗಲೇ ಮುಗಿಸಿಕೊಂಡಿದ್ದಾರೆ. ಆದರೆ ಇದಕ್ಕೆ ಟೈಟಲ್ ಏನಿಡಬಹುದೆಂಬುದೇ ಅವರನ್ನು ಬಹು ದೊಡ್ಡ ಬಾಧೆಯಾಗಿ ಕಾಡಿತ್ತಂತೆ. ಕಡೆಗೂ ಒಂದಷ್ಟು ಟೈಟಲ್ಲುಗಳನ್ನು ಅಳೆದೂತೂಗಿ ಈ ಚಿತ್ರದ ಕಥೆಗೆ ಅನುಗುಣವಾಗಿ ಜ್ವಾಲಾಮುಖಿ ಅಂತ ಹೆಸರಿಡಲಾಗಿದೆ.

ಜ್ವಾಲಾಮುಖಿ ೧೯೮೫ರಲ್ಲಿ ತೆರೆ ಕಂಡಿದ್ದ ಡಾ.ರಾಜ್ ಕುಮಾರ್ ನಟನೆಯ ಚಿತ್ರದ ಟೈಟಲ್. ಆ ಚಿತ್ರ ದೊಡ್ಡ ಮಟ್ಟದಲ್ಲಿಯೇ ಗೆದ್ದಿತ್ತು. ಅದು ಇಂದಿಗೂ ರಾಜ್ ಅಭಿನಯದ ಟಾಪ್ ಚಿತ್ರಗಳ ಸಾಲಿನಲ್ಲಿ ಖಾಯಂ ಸ್ಥಾನ ಪಡೆದುಕೊಂಡಿದೆ. ಇದೀಗ ಪುನೀತ್ ಚಿತ್ರಕ್ಕೆ ಅದೇ ಹೆಸರು ನಿಕ್ಕಿಯಾಗಿದೆ.

ಈ ಟೈಟಲ್ ಅನ್ನು ಪುನೀತ್ ರಾಜ್ ಕುಮಾರ್ ಅವರ ಅಭಿಮಾನಿ ಬಿಡುಗಡೆಗೊಳಿಸಲಿದ್ದಾರಂತೆ. ಅದಾದ ನಂತರ ಈ ಚಿತ್ರದ ಉಳಿದ ರೂಪುರೇಷೆಗಳ ಬಗ್ಗೆ ವಿವರ ಸಿಗಲಿದೆ. ಸದ್ಯಕ್ಕೆ ತಾರಾಗಣದ ಆಯ್ಕೆ ಕಾರ್ಯ ಬಿರುಸಿಂದ ನಡೆಯುತ್ತಿದೆ. ಅಂತೂ ಸಂತೋಷ್ ಆನಂದರಾಮ್ ಅವರು ಪುನೀತ್ ಅಭಿಮಾನಿಗಳಿಗೆ ಇಷ್ಟವಾಗುವಂಥಾ ಟೈಟಲ್ ಅನ್ನೇ ಆಯ್ಕೆ ಮಾಡಿಕೊಂಡಿದ್ದಾರೆ.

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz