Connect with us

cbn

ನೀರಿರೋ ಜಾಗದಲ್ಲಿ ಮನೆ ಕಟ್ಟಬೇಕು; ಮನೆ ಕಟ್ಟಿರೋ ಜಾಗದಲ್ಲಿ ನೀರು ಹುಡುಕಬಾರದು.

Published

on

“ರಂಗ ಎಸೆಸೆಲ್ಸಿವರೆಗೂ ಸ್ಕ್ರಿಪ್ಟ್ ಡೈಲಾಗ್ ಬರೆಯುತ್ತ ಇದ್ದ ನಾನು ಅದಾದ ನಂತರ ಮಾಡಿದ್ರೆ ಫಿಲ್ಮ್ ಡೈರೆಕ್ಷನ್ ಮಾಡಬೇಕು ಅಂತ ಬಲವಾಗಿ ಅಂದುಕೊಂಡಿದ್ದೆ. ಹೊಟ್ಟೆ ಹೊರೆಯೋಕೆ ಸಂಭಾಷಣೆ ಬರೆಯೋ ಕೆಲಸ ಇದ್ದೇ ಇತ್ತು. ಅದ್ರಲ್ಲೇ ಬದುಕೋಕೂ ಸಹ ಆಸ್ಪದವಿತ್ತು. ನನ್ನದೇ ಫಿಲ್ಮ್ ಮಾಡಬೇಕು ಅಂತ ಅಂದುಕೊಂಡಾಗ ಕಥೆ ಬಗ್ಗೆ ಯೋಚನೆ ಶುರುವಾಯಿತು. ನಾನು ಬೆಳೆದದ್ದು, ಓದಿದ್ದು ಎಲ್ಲ ಸ್ಲಂನಲ್ಲೇ. ಅಲ್ಲಿನ ಪರಿಸರವೇ, ಲಿವಿಂಗ್ ಸ್ಟೈಲೇ ಬೇರೆ. ಎಲ್ಲಾ ಭಾಷೆಗಳ ಜನಗಳೂ ಅಲ್ಲಿದ್ರು, ಅವರ ಬದುಕು, ಬವಣೆ, ದುಡಿಮೆ, ತಮಾಷೆ, ಜೂಜು, ಪೊಲೀಸು ಎಲ್ಲವೂ ಮಿಕ್ಸ್ ಆದ ಮಿನಿ ಇಂಡಿಯಾ ಥರ ಇದ್ದ ಪ್ರದೇಶ ಅದು. ದುನಿಯಾಗೆ ಕಥೆ ಹುಟ್ಟಿದ್ದೇ ಅಲ್ಲಿಂದ. ಚಿತ್ರದ ತುಂಬ ಗ್ರೇ ಕ್ಯಾರೆಕ್ಟರ‍್ಸ್ ಇಟ್ಟುಕೊಂಡು ಅದರ ಜೊತೆಗೆ ಎರಡು ಅಮಾಯಕ ಪಾತ್ರಗಳನ್ನ ಕಲ್ಪನೆ ಮಾಡ್ಕೊಂಡು ಬರೆದ ಕಥೆ ದುನಿಯಾ ಆಯ್ತು. ನನ್ನ ಪ್ರಕಾರ ಫಿಲ್ಮ್ ಮಾಡೋದು ಅಂದ್ರೆ ಥಿಯೇಟರ್ ಒಳಗೆ ಬಂದು ಕುಳಿತ 600 ಮಂದಿ ನೋಡುಗರೆದುರು ಒಬ್ಬ ಡೈರೆಕ್ಟರ್ ಬೆತ್ತಲಾಗೋದು. ಡೈರೆಕ್ಟರ್ ಒಬ್ಬನ ತಪ್ಪು-ಒಪ್ಪುಗಳು ಮೊದಲು ಗೊತ್ತಾಗೋದೇ ಮಾರ‍್ನಿಂಗ್ ಶೋ ನೋಡ್ಕೊಂಡು ಬಂದ ಪ್ರೇಕ್ಷಕರಿಗೆ. ಅಷ್ಟು ಮಂದಿ ಎದುರುಗಡೆ ನಿಲ್ಲಬೇಕು ಅಂದ್ರೆ ತಪ್ಪಾಗದಂತೆ ನನ್ನ ಫಿಲ್ಮನ್ನ ಡೈರೆಕ್ಟ್ ಮಾಡಿರಬೇಕು. ಮೂಲತಃ ಚಿತ್ರಕಲೆಯಿಂದ ಬಂದ ನನಗೆ ಪ್ರತಿ ಫ್ರೇಮಿನೊಳಗೆ ಇರುವ ಬಣ್ಣ ಮುಖ್ಯ ಅನ್ಸತ್ತೆ. ಆ ಕಾರಣಕ್ಕೇ ಬಹಳಷ್ಟು ಸಲ ಪ್ರೊಡ್ಯೂಸರ‍್ಸ್ ಹತ್ರ ಹಠ ಮಾಡಿಕೊಂಡು ನನಗೆ ಇಂಥದ್ದೇ ಕಲರ್ ವ್ಯಾನ್ ಬೇಕು, ಇಂಥದ್ದೇ ಕಲರ್ ಕಾರ್ ಬೇಕು ಅಂತ ಚಿತ್ರದೊಳಗೆ ಬಳಸಿಕೊಳ್ತೀನಿ.”

ಇದು ನಿರ್ದೇಶಕ ಸೂರಿ ಅವರ ಸಿನಿಮಾ ಮಾತು!

ಸದ್ಯ ಸೂರಿ ಟಗರು ಚಿತ್ರದ ಬಿಡುಗಡೆಯ ಓಡಾಟದಲ್ಲಿದ್ದಾರೆ. ಸೂರಿ ಅನ್ನೋ ವ್ಯಕ್ತಿತ್ವವೇ ಒಂಥರಾ ವಿಚಿತ್ರ. ಮಾತಾಡುವುದಿಲ್ಲ. ಮಾತಾಡಿದರೆ ಮನಸ್ಸಲ್ಲಿರೋದನ್ನೆಲ್ಲಾ ಒದರದೆ ಬಿಡುವುದಿಲ್ಲ. ಹಗಲೂ ರಾತ್ರಿ ಸಿನಿಮಾವನ್ನೇ ಧ್ಯಾನಿಸುವ ಸೂರಿಯ ಮಾತು ಕೂಡಾ ಅವರ ಸಿನಿಮಾದಂಥೆ ಸಖತ್ ರ್ರಾ!

“ಇದು ಫಾಸ್ಟ್ ಜಮಾನ ಮಾರ‍್ನಿಂಗ್‌ಶೋ ಪಿಚ್ಚರ್ ನೋಡಿದೋನು ರಪ್ ಅಂತ ಪ್ರಶ್ನೆ ಕೇಳ್ತಾನೆ ನೆಕ್ಸ್ಟ್ ಪಿಚ್ಚರ್ ಯಾವ್ದು ಅಂತ. ಅಡ್ವಾನ್ಸ್ಡ್ ಆಗಿದಾರೆ ಇವತ್ತಿನ ಪ್ರೇಕ್ಷಕರು. ಹಾಗಾಗಿ ಈ ಸ್ಪೀಡ್ ಆಡಿಯೆನ್ಸ್‌ಗೆ ಕಥೆ ಹೊಸೆಯೋದು ಚಾಲೆಂಜಿಂಗ್ ಜಾಬ್. ಕಥೆ ನಮ್ಮದೇ ಆದ್ರೆ ಪ್ರತಿಯೊಂದು ಡೀಟೈಲ್‌ಗೂ ನಾವೇ ಶ್ರಮ ಹಾಕೋದ್ರಿಂದ ಟೈಂ ಹೆಚ್ಚು ಬೇಕಾಗತ್ತೆ. ಇದು ನನ್ನ ಅನುಭವ. ಒಳ್ಳೆ ಕಥೆ ರೆಡಿಯಾಗಿರೋದೇ ಸಿಕ್ರೆ ಆ ಟೈಂ ಉಳಿಯುತ್ತೆ. ಪಾತ್ರ ಮತ್ತು ಪರಿಸರಕ್ಕೆ ಬಣ್ಣ ಕಟ್ಟೋ ಕೆಲಸ ಅಷ್ಟೇ ಇರುತ್ತೆ. ಏನೇ ಮಾತಾಡಿದ್ರೂ ಕಥೆ ಈಸ್ ದಿ ಅಲ್ಟಿಮೇಟ್ ಎಲಿಮೆಂಟ್. ನೀರಿರೋ ಜಾಗದಲ್ಲಿ ಮನೆ ಕಟ್ಟಬೇಕು. ಮನೆ ಕಟ್ಟಿರೋ ಜಾಗದಲ್ಲಿ ನೀರು ಹುಡುಕಬಾರದು. ಇದು ಫಿಲ್ಮ್‌ಗಳ ಕಥೆಗೂ ಅನ್ವಯಿಸುತ್ತೆ. ನನ್ನದು ಒಂದಷ್ಟು ಹುಡುಗರ ಟೀಂ ಇದೆ. ಸಬ್ಜೆಕ್ಟ್ ಸೆಲೆಕ್ಟ್ ಮಾಡಿ ಅದರ ಸುತ್ತ ವರ್ಕ್ ಮಾಡೋಕೆ ಬಿಡ್ತೀನಿ. ಮೊದಲು ಕಥೆಯ ವಿಷಯಕ್ಕೆ ಸಂಬಂಧಪಟ್ಟಂತೆ ಡೈಲಾಗ್, ಸ್ಕ್ರಿಪ್ಟ್ ಎಲ್ಲವನ್ನೂ ನಾನೇ ಮಾಡಬೇಕು ಅಂತ ಮಾಡಿದ್ದು. ಬೇರೆಯವರನ್ನ ಇಂಟರ್‌ಫಿಯರ್ ಮಾಡ್ತಿರಲಿಲ್ಲ. ಒಂದೆರಡು ಫಿಲ್ಮ್ ಮಾಡ್ತಿದ್ದ ಹಾಗೆ ನಮ್ಮೊಳಗಿದ್ದ ನಾನು ನನ್ನದು ಅನ್ನೋ ಪೊಸೆಸಿವ್‌ನೆಸ್ ಹೊರಟೋಗತ್ತೆ. ಕಡ್ಡಿಪುಡಿ ಪಿಚ್ಚರ್ರಲ್ಲಿ ಡೈಲಾಗ್ ಸಮೇತ ಬೇರೆಯವರ ಜೊತೆ ಶೇರ್ ಮಾಡ್ತ ಇದೀನಿ. ಸ್ಕ್ರಿಪ್ಟು, ಸ್ಕ್ರೀನ್ ಪ್ಲೇ-ಕಥೆ ಮೂರೇ ಇಲ್ಲಿ ಇಂಪಾರ್ಟೆಂಟು. ಡೈರೆಕ್ಷನ್ ಅನ್ನೋದು ಓದಿಕೊಂಡು ಮಾಡೋ ಕೆಲಸ ಅಲ್ಲ. ಅಲ್ಲಿ ಸೌಂಡ್, ಬಣ್ಣ, ಮಾತು ಎಲ್ಲವೂ ಸೇರಿಯೇ ಪ್ರತೀ ಶಾಟ್ ಕಂಪೋಸ್ ಮಾಡಬೇಕಾಗುತ್ತೆ. ಇವೆಲ್ಲವೂ ಒಂದು ಡಿಸಿಪ್ಲೀನ್ಡ್ ಮ್ಯಾನರ್ರೊಳಗೆ ಕಲೆತಾಗ ಮಾತ್ರ ಶಾಟ್ ಮತ್ತು ಸೀನ್ ಚೆನ್ನಾಗಿ ಬರುತ್ತೆ. ನನಗೆ ಸಿನಿಮಾ ಮಾಡೋದಕ್ಕಿಂತ ನೋಡೋದು ತುಂಬ ಇಷ್ಟ. ಕಾಸರವಳ್ಳಿಯವರ ಮನೆ, ಆಕ್ರಮಣ ಚಿತ್ರಗಳು ಇವತ್ತಿಗೂ ನನಗೆ ಇಷ್ಟ. ಬಾಲಾ ಅವರ ಸಿನಿಮಾಗಳನ್ನು ನೋಡೋಕೆ ಕಾಯ್ತಾ ಇರ್ತೀನಿ. ಒಂದು ಫಿಲ್ಮ್ ನೋಡಿದ ಮೇಲೆ ಕೊನೆಯಲ್ಲಿ ನಮ್ಮೊಳಗೆ ಒಂದು ಫೀಲ್ ಉಳಿಯಬೇಕು. ಅಂಥ ಸಿನಿಮಾಗಳು ನನಗೆ ಇಷ್ಟ ಆಗ್ತವೆ. ಒಂದ್ವೇಳೆ ಅವರ ಟೆನ್ಷನ್ ಫಿಲ್ಮ್ ನೋಡಿದ ನಂತ್ರಾನೂ ಕಂಟಿನ್ಯೂ ಆದ್ರೆ ಫಿಲ್ಮ್ ಅವನಿಗೆ ಎಲ್ಲೂ ತಟ್ಟಿಲ್ಲ ಮುಟ್ಟಿಲ್ಲ.. ಸೋಲ್ತು ಅಂತ. ನೋಡುಗನಿಗೆ ಕೋಪ ಬರಿಸಬಾರದು. ಅವರಿಗೆ ಸಿಟ್ಟು ಬಂದ ದಿನ ನಾವು ನಾಶ ಆಗ್ತೀವಿ. ಅದೇ ಎಚ್ಚರಿಕೆಯಲ್ಲೇ ಈಗ ಡೈರೆಕ್ಷನ್ ಮಾಡ್ತಿದೇನೆ. ಮುಂದಿಂದು ನೋಡುಗರಿಗೆ ಬಿಟ್ಟಿದ್ದು.”

ಸೂರಿ ಮಾತು ಸೂರ್ಯನಷ್ಟೇ ನಿಜ. ಪ್ರೇಕ್ಷಕನ ಸಿಟ್ಟು ಸಾಮಾನ್ಯವಾದ್ದಲ್ಲ. ಅದು ಯಾವ ಸ್ಟಾರ್‌ಗಳನ್ನೂ ಬಿಟ್ಟಿಲ್ಲ. ಯಾವತ್ತಿಗೂ ಪ್ರೇಕ್ಷಕನನ್ನು ಸಂತೃಪ್ತವಾಗಿಡಬೇಕಾದ್ದು ಸಿನಿಮಾ ನಿರ್ಮಾತೃಗಳ ಮಹತ್ತರ ಜವಾಬ್ದಾರಿ. ಇದನ್ನು ಚಿತ್ರೋದ್ಯಮದಲ್ಲಿರುವವರು ಅರಿತುಕೊಳ್ಳಬೇಕಷ್ಟೇ.

cbn

ಜೀ ಕನ್ನಡದಲ್ಲಿ ಹಾರರ್ ಆತ್ಮಬಂಧನ

Published

on

ಕಳೆದ ಹಲವು ವರ್ಷಗಳಿಂದಲೂ ಜೀ ಕನ್ನಡ ವಾಹಿನಿ ಸದಾ ತನ್ನ ಕಾರ್ಯಕ್ರಮ ಕಟ್ಟಿಕೊಡುವಲ್ಲಿ ಹೊಸತನವನ್ನು ಮೈಗೂಡಿಸಿಕೊಳ್ಳುವ ಮೂಲಕ ವೀಕ್ಷಕರಿಗೆ ಹೆಚ್ಚು ಹೆಚ್ಚು ಹತ್ತಿರವಾಗುತ್ತಿದೆ. ಜೋಡಿ ಹಕ್ಕಿ, ಸುಬ್ಬಲಕ್ಷ್ಮಿಸಂಸಾರ, ಕಮಲಿ, ಯಾರೆ ನೀ ಮೋಹಿನಿ, ವಿಷ್ಣು ದಶಾವತಾರ, ಮಹಾದೇವಿ, ನಾಗಿಣಿ, ಪಾರು, ಬ್ರಹ್ಮಗಂಟು ಮೊದಲಾದ ಧಾರಾವಾಹಿಗಳು ಹೊಸ ಇತಿಹಾಸ ಬರೆದಿವೆ. ವಾರಾಂತ್ಯ ಧಾರಾವಾಹಿ ಉಘೇ ಉಘೇ ಮಾದೇಶ್ವರ, ಅಲ್ಲದೆ ಸರಿಗಮಪ, ಡ್ರಾಮಾದಂಥ ರಿಯಾಲಿಟಿ ಷೊಗಳು ಕನ್ನಡಿಗರ ಮನೆಮಾತಾಗಿವೆ.

ಇದೀಗ ಜೀ ಕನ್ನಡ ವಾಹಿನಿಯಲ್ಲಿ ಆತ್ಮಬಂಧನ ಎಂಬ ಮತ್ತೊಂದು ಹಾರರ್ ಧಾರಾವಾಹಿ ಮೂಡಿಬರಲಿದೆ. ಜನನ ಮತ್ತು ಮರಣದ ಸಾಕ್ಷಿ ಆತ್ಮ. ಮರಣಾ ನಂತರವೂ ಆತ್ಮ ತನ್ನ ಪ್ರೀತಿ ಮತ್ತು ದ್ವೇಷವನ್ನು ಬಿಡುವುದಿಲ್ಲ ಎಂಬುದು ಸಾಮಾನ್ಯ ನಂಬಿಕೆ. ಈ ಎಳೆಯನ್ನು ಇಟ್ಟುಕೊಂಡು ತಾಯಿ ಮತ್ತು ಪುಟ್ಟ ಮಗನ ನಡುವಿನ ಬಾಂಧವ್ಯದ ಹಿನ್ನೆಲೆಯಲ್ಲಿ ಆತ್ಮಬಂಧನ ಧಾರಾವಾಹಿಯನ್ನು ನಿರೂಪಿಸಲಾಗುತ್ತಿದೆ. ದುರಂತದಲ್ಲಿ ಮರಣವನ್ನಪ್ಪುವ ಮಗನ ಆತ್ಮ ತನ್ನ ಅಮ್ಮನ ಪ್ರೀತಿಗಾಗಿ ಹಂಬಲಿಸಿ ಬರುವ ಮತ್ತು ಆ ಪ್ರೀತಿಗೆ ಅಡ್ಡ ಬರುವವರನ್ನು ಶಿಕ್ಷಿಸುವ ಕಥಾಹಂದರ ಇದರಲ್ಲಿದೆ. ಈ ಹಿನ್ನೆಲೆಯಲ್ಲಿ ಕೌಟುಂಬಿಕ ಪ್ರೀತಿ-ದ್ವೇಷಗಳು ಹಾಗೂ ಪತಿ-ಪತ್ನಿಯರ ಸಂಬಂಧದ ನಡುವೆ ಏಳುವ ಬಿರುಗಾಳಿ ಹೊಸ ಬಗೆಯಲ್ಲಿ ನಿರೂಪಿತವಾಗಿದೆ. ಈ ಧಾರಾವಾಹಿಯನ್ನು ನಿರ್ದೇಶಕ ಜಿ.ಕೆ. ಸತೀಶ್ ಕೃಷ್ಣನ್ ನಿರ್ದೇಶಿಸುತ್ತಿದ್ದಾರೆ. ದ್ವಿಜ ಕ್ರಿಯೇಷನ್ಸ್ ಅಡಿಯಲ್ಲಿ ಮಹೇಶ್ ಗೌಡ, ಡಾ| ಸುಮಾ ಈ ಧಾರಾವಾಹಿಯನ್ನು ನಿರ್ಮಿಸುತ್ತಿದ್ದಾರೆ. ಇದರ ಕಥಾವಿಸ್ತರಣೆ, ಚಿತ್ರಕತೆಯನ್ನು ಎಸ್. ಸೆಲ್ವಂ ಮತ್ತು ಗಿರೀಶ್ ತಂಡ ನಿರ್ವಹಿಸಿದೆ. ರತ್ನಗಿರಿ ಅವರ ಸಂಭಾಷಣೆ, ವಿನಯ್ ಅವರ ಸಂಗೀತ, ಹರ್ಷಪ್ರಿಯ ಅವರ ಶೀರ್ಷಿಕೆ ಸಾಹಿತ್ಯ ಇದಕ್ಕಿದೆ. ಎದೆಯಲ್ಲಿ ಕಂಪನ ಹುಟ್ಟಿಸುವ ಗ್ರಾಫಿಕ್ಸ್ ಪ್ರತಿ ಸಂಚಿಕೆಯಲ್ಲೂ ವೀಕ್ಷಕರಿಗೆ ಹೊಸ ಅನುಭವ ನೀಡಲಿದೆ.

ಆತ್ಮಬಂಧನ ವೀಕ್ಷಕರಿಗೆ ಮನರಂಜನೆಯ ಹೊಸ ಬಾಗಿಲು ತೆರೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸುತ್ತಾರೆ ಜೀ ಕನ್ನಡ ವಾಹಿನಿಯ ಬಿಸ್ನೆಸ್ ಹೆಡ್ ರಾಘವೇಂದ್ರ ಹುಣಸೂರು. ಎಲ್ಲ ವಯೋಮಾನದವರನ್ನೂ ಗಮನದಲ್ಲಿರಿಸಿಕೊಂಡು ಕುಟುಂಬ ಸಮೇತ ನೋಡುವಂತೆ ಈ ಹಾರರ್ ಧಾರಾವಾಹಿ ರೂಪಿಸಿದ್ದೇವೆ ಎನ್ನುತ್ತಾರೆ ನಿರ್ದೇಶಕ ಜಿ.ಕೆ. ಸತೀಶ್ ಕೃಷ್ಣನ್. ತಾರಾಗಣದಲ್ಲಿ ರಜನಿ, ಪ್ರಶಾಂತ್, ಬಾಲನಟ ಆಲಾಪ್, ಶಿವಾನಿ, ಲಕ್ಷ್ಮೀಗೌಡ, ರಾಮಮೂರ್ತಿ, ರಾಜೇಶ್, ನೇತ್ರಾ ಸಿಂಧ್ಯಾ, ಸುನೇತ್ರ ಪಂಡಿತ್ ಮುಂತಾದವರಿದ್ದಾರೆ. ಜೀ ಕನ್ನಡ ವಾಹಿನಿಯಲ್ಲಿ ಡಿಸೆಂಬರ್ ೧೭ ರಿಂದ ಸೋಮ-ಶುಕ್ರವಾರ ರಾತ್ರಿ ೧೦:೩೦ಕ್ಕೆ ಆತ್ಮಬಂಧನ ಪ್ರಸಾರವಾಗಲಿದೆ.

Continue Reading

cbn

ದರ್ಶನ್ ಮ್ಯಾನೇಜರ್ ಮಹಾದ್ರೋಹಿ ಮಲ್ಲಿ ಎಲ್ಲಿದ್ದಾನೆ ಗೊತ್ತಾ?

Published

on


ನಂಬಿದರೆ ಸರ್ವಸ್ವವನ್ನೂ ಧಾರೆಯೆರೆದುಬಿಡುವ ‘ಯಜಮಾನ’, ತಮ್ಮ ಕೈಕೆಳಗೆ ಕೆಲಸ ಮಾಡುವವರನ್ನೂ ಸ್ನೇಹಿತರಂತೆ ಪೊರೆಯುವ ‘ಒಡೆಯ’ ದರ್ಶನ್ ಅವರಿಗೆ ಮಲ್ಲಿಕಾರ್ಜುನ ಎನ್ನುವ ಮ್ಯಾನೇಜರ್ ಮಹಾದ್ರೋಹವೆಸಗಿ ಗಾಯಬ್ ಆದನಲ್ಲಾ? ಆತ ಎಲ್ಲಿದ್ದಾನೆ ಅನ್ನೋದರ ಸಣ್ಣ ಸುಳಿವೊಂದು ಸಿಕ್ಕಿದೆ!
ಮ್ಯಾನೇಜರ್ ಮಲ್ಲಿ ಅನ್ನೋ ಮಹಾನುಭಾವ ದರ್ಶನ್ ಮತ್ತವರ ತಂಡಕ್ಕೆ ಕೈಕೊಟ್ಟು ಊರುಬಿಟ್ಟಿದ್ದಾನೆ ಅನ್ನೋ ಸುದ್ದಿಯನ್ನು ಮೊಟ್ಟ ಮೊದಲ ಬಾರಿಗೆ ಸ್ಫೋಟಿಸಿದ್ದು ಸಿನಿಬಜ್. ನಾವು ಸುದ್ದಿ ನೀಡಿದ ಮೇಲೂ ಎಷ್ಟೋ ಜನ ‘ಹೌದಾ? ನಿಜಾನಾ? ಅದು ಹೇಗೆ ಸಾಧ್ಯ?’ ಅಂತೆಲ್ಲಾ ಪ್ರಶ್ನಿಸಿದ್ದರು. ಯಾರೆಂದರೆ ಯಾರೂ ನಂಬಲೂ ಸಾಧ್ಯವಾಗದ ನಿಜಾಂಶವನ್ನು ಸಿನಿಬಜ಼್ ಬಯಲಿಗೆಳೆದಿತ್ತು. ನಂತರ ನಮ್ಮ ವರದಿಯ ಸತ್ಯಾಸತ್ಯತೆ ಜಗತ್ತಿಗೂ ಗೊತ್ತಾಯಿತು. ಇರಲಿ, ವಿಷಯ ಅದಲ್ಲ!

ಊರುಬಿಡುವ ಮುಂಚೆ ಪಕ್ಕಾ ಪ್ಲಾನು ಮಾಡಿಕೊಂಡು, ಬೆಂಗಳೂರಿನಲ್ಲಿದ್ದ ಮನೆಯನ್ನು ಖಾಲಿ ಮಾಡಿ ಹೆಂಡತಿ ಮಕ್ಕಳನ್ನೆಲ್ಲಾ ತನ್ನ ಹುಟ್ಟೂರಿಗೆ ಬಿಟ್ಟುಬಂದಿದ್ದ ಈತ ಒಮ್ಮೆಲೇ ಗಾಯಬ್ ಆಗಿದ್ದ. ಮಲ್ಲಿ ಓಡಿಹೋದ, ದರ್ಶನ್ ಮತ್ತವರ ಸುತ್ತಲಿನವರಿಗೆ ವಂಚಿಸಿ ಕಾಲುಕಿತ್ತಿದ್ದಾನೆ ಅನ್ನೋದು ಬಿಟ್ಟರೆ ಬೇರಾವ ಸುಳಿವೂ ಈವರೆಗೆ ಸಿಕ್ಕಿರಲಿಲ್ಲ.

ಏಕಾಏಕಿ ಯಾವ ಸೂಚನೆಯನ್ನೂ ನೀಡದೆ ಊರುಬಿಟ್ಟು ಎಸ್ಕೇಪ್ ಆದ ಮಲ್ಲಿ ಈಗೆಲ್ಲಿದ್ದಾನೆ? ಅನ್ನೋದರ ಸಣ್ಣ ಸುಳಿವೊಂದು ನಮಗೆ ದೊರೆತಿದೆ.  ಅದರ ಪ್ರಕಾರ ಹೇಳೋದಾದರೆ ಮಲ್ಲಿ ಈಗ ಕೆನಡಾದಲ್ಲಿ ಸೆಟಲ್ ಆಗಿ ಅಲ್ಲೊಂದು ಫ್ಲಾಟು ಖರೀದಿಸಿ ಕೂಲಾಗಿ ಜೀವನ ನಡೆಸುತ್ತಿದ್ದಾನಂತೆ. ಅದು ಎಷ್ಟರ ಮಟ್ಟಿಗೆ ನಿಜ ಅನ್ನೋದು ಆಧಾರ ಸಮೇತ ಸಿಕ್ಕನಂತರವಷ್ಟೇ ಪಕ್ಕಾ ಆಗಲಿದೆ. ಇಷ್ಟಕ್ಕೂ ಮಲ್ಲಿ ಯಾಮಾರಿಸಿ ತೆಗೆದುಕೊಂಡು ಹೋದ ಹಣವನ್ನು ಏನು ಮಾಡಿದ್ದಾನೆ? ನಂಬಿದವರನ್ನು ವಂಚಿಸುವ ದರ್ದಾದರೂ ಈತನಿಗೇನಿತ್ತು? ಇವೆಲ್ಲ ವಿವರಗಳು ಇಷ್ಟರಲ್ಲೇ ಬಯಲಾಗಲಿದೆ… ಕಾದು ನೋಡಿ!

 

Continue Reading

cbn

ಇದು ಅಣ್ಣಾವ್ರ ಕಡೆಯ ಸಿನಿಮಾ ಆಗಬೇಕಿತ್ತು!

Published

on

`ಇರುವುದೆಲ್ಲವ ಬಿಟ್ಟು ಇರದುದರೆಡೆಗೆ ತುಡಿವುದೆ ಜೀವನ…’ ಹಾಡಿನ ಮೊದಲ ಸಾಲು ಈಗ ಸಿನಿಮಾ ಆಗಿ ಬಿಡುಗಡೆಗೊಂಡಿದೆ. ಕಾಂತ ಕನ್ನಲ್ಲಿ ನಿರ್ದೇಶನದಲ್ಲಿ ಮೂಡಿಬಂದಿರುವ ಸಿನಿಮಾ ನೋಡಿದ ಎಲ್ಲರನ್ನೂ ಸೆಳೆಯುತ್ತಿದೆ. ಸಿನಿಮಾ ನೋಡಿ ಹೊರಬಂದ ಪ್ರತಿಯೊಬ್ಬರ ಮುಖದಲ್ಲೂ ಮಂದಹಾಸ ಮೂಡಿಸುವ ಸಿನಿಮಾ ಇದು.

ಅಂದಹಾಗೆ ಇದೇ `ಇರುವುದೆಲ್ಲವ ಬಿಟ್ಟು’ ಶೀರ್ಷಿಕೆ ವರನಟ ಡಾ. ರಾಜ್ ಕುಮಾರ್ ಅವರ ನಟನೆಯ ಕೊನೆಯ ಸಿನಿಮಾ ಆಗಬೇಕಿತ್ತು ಅನ್ನೋ ವಿಚಾರವೊಂದು ಹೊರಬಿದ್ದಿದೆ. ಮೊನ್ನೆದಿನ ಈ ಸಿನಿಮಾವನ್ನು ನೋಡಿದ ಕೆ.ಎಂ.ಎಫ್‌ನ ಮಾಜಿ ವ್ಯವಸ್ಥಾಪಕ ನಿರ್ದೇಶಕ ಎ.ಎಸ್. ಪ್ರೇಮನಾಥ್ ಖುದ್ದು ನಿರ್ದೇಶಕರ ಬಳಿ ಈ ವಿಷಯವನ್ನು ಹೇಳಿದರಂತೆ. ಪ್ರೇಮ್‌ನಾಥ್ ಡಾ.ರಾಜ್ ಕುಟುಂಬದ ಜೊತೆ ತೀರಾ ನಿಕಟ ಸಂಪರ್ಕ ಹೊಂದಿರುವವರು. ಹೀಗಾಗಿ ಅಣ್ಣಾವ್ರ ಕುರಿತ ಸಾಕಷ್ಟು ಇಂಟರೆಸ್ಟಿಂಗ್ ವಿಚಾರಗಳು ಪ್ರೇಮನಾಥ್ ಅವರಿಗೆ ಸಹಜವಾಗೇ ಗೊತ್ತಿರುತ್ತದೆ.

ಡಾ. ರಾಜ್‌ಕುಮಾರ್ ನಟಿಸಬೇಕಿದ್ದ ಆ ಸಿನಿಮಾಗೆ ಖ್ಯಾತ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ್ ಕಥೆಯನ್ನೂ ಹೇಳಿದ್ದರಂತೆ. `ಇರುವುದೆಲ್ಲವ ಬಿಟ್ಟು’ ಅನ್ನೋ ಶೀರ್ಷಿಕೆಯನ್ನು ರಾಜಣ್ಣ ಬಹುವಾಗಿ ಇಷ್ಟಪಟ್ಟಿದ್ದರಂತೆ. ಅವರ ಅನಾರೋಗ್ಯ ಮತ್ತಿತರ ಕಾರಣಗಳಿಗೆ ಆ ಸಿನಿಮಾ ಸೆಟ್ಟೇರಿರಲಿಲ್ಲ. ಒಂದು ವೇಳೆ ಅಣ್ಣಾವ್ರು ಈಗಲೂ ಇರುವಂತಾಗಿ, ಅದೇ ಶೀರ್ಷಿಕೆಯೊಂದಿಗೆ ಇಷ್ಟು ಮುದ್ದಾದ ಸಿನಿಮಾ ಮೂಡಿಬಂದಿರೋದನ್ನು ನೋಡಿದ್ದಿದ್ದರೆ ಅದೆಷ್ಟು ಖುಷಿಪಡುತ್ತದ್ದರೋ…?

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz