One N Only Exclusive Cine Portal

ಟಕ್ಕರ್ ಹುಡುಗಿ ಪುಟ್‌ಗೌರಿ?

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಕುಟುಂಬದ ಮನೋಜ್ ಅಭಿನಯಿಸಲಿರೋ ಟಕ್ಕರ್ ಚಿತ್ರ ಈಗಾಗಲೇ ಭಾರೀ ಸದ್ದು ಮಾಡುತ್ತಿದೆ. ಮೊದಲ ಹೆಜ್ಜೆಯಲ್ಲಿಯೇ ಭರ್ಜರಿ ಕ್ರೇಜ್ ಹುಟ್ಟುಹಾಕಿರೋ ಈ ಚಿತ್ರದ ತಯಾರಿಯೂ ಅಷ್ಟೇ ವೇಗವಾಗಿ ನಡೆಯುತ್ತಿದೆ. ಆದರೆ, ಉಳಿಕೆ ತಾರಾಗಣ, ತಾಂತ್ರಿಕ ವರ್ಗದ ವಿವರಗಳಿಗಿಂತಲೂ ಹೆಚ್ಚು ಕ್ಯೂರಿಯಾಸಿಟಿ ಹುಟ್ಟಿಸಿದ್ದದ್ದು ಟಕ್ಕರ್ ಮನೋಜ್ ಅವರಿಗೆ ಜೋಡಿಯಾಗಲಿರೋ ನಟಿ ಯಾರೆಂಬ ವಿಚಾರ!

ಇದೀಗ ಟಕ್ಕರ್ ಹುಡುಗಿ ಯಾರೆಂಬುದಕ್ಕೆ ಸಣ್ಣದೊಂದು ಸುಳಿವನ್ನು ಸಿನಿಬಜ಼್ ನೀಡುತ್ತಿದೆ. ಪುಟ್‌ಗೌರಿ ಸೀರಿಯಲ್ ಮೂಲಕವೇ ಮನೆ ಮಾತಾಗಿ, ಸಿನಿಮಾರಂಗಕ್ಕೂ ಪಾದಾರ್ಪಣೆ ಮಾಡಿದ್ದ ರಂಜನಿ ರಾಘವನ್ ಆ ಅವಕಾಶವನ್ನು ತನ್ನದಾಗಿಸಿಕೊಳ್ಳುವ ಸಾಧ್ಯತೆ ಹೆಚ್ಚಾಗಿದೆ.
ದರ್ಶನ್ ಕುಟುಂಬದ ಸದಸ್ಯರಾದ ಮನೋಜ್ ಅವರ ಮೊದಲ ಚಿತ್ರ ಟಕ್ಕರ್ ಆರಂಭಿಕವಾಗಿಯೇ ಪ್ರೇಕ್ಷಕರ ಗಮನ ಸೆಳೆಯುವಲ್ಲಿ ನಿಜಕ್ಕೂ ಗೆಲುವು ಕಂಡಿದೆ. ಅತ್ತ ನಿರ್ದೇಶಕ ರಘು ಶಾಸ್ತ್ರಿ ಮತ್ತು ನಿರ್ಮಾಪಕ ಕೆ.ಎನ್. ನಾಗೇಶ್ ಕೋಗಿಲು ಅವರುಗಳು ಪಟ್ಟಾಗಿ ಕೂತು ಚಿತ್ರದ ಅಷ್ಟೂ ರೂಪುರೇಷೆಗಳನ್ನು ಸಿದ್ಧಪಡಿಸೋ ವ್ರತ ಹಿಡಿದಿದ್ದಾರೆ. ಆದರೆ ಇತ್ತಲಿಂದ ಈ ಚಿತ್ರದ ಬಗ್ಗೆ ನಾನಾ ಸುದ್ದಿಗಳು ಸರಣಿಯೋಪಾದಿಯಲ್ಲಿ ಹರಿದಾಡುತ್ತಲೇ ಇವೆ.

ಇಂಥಾ ಸುದ್ದಿಗಳು, ರೂಮರುಗಳಲ್ಲಿ ಹೆಚ್ಚಿನವು ಈ ಚಿತ್ರದ ನಾಯಕಿಯ ಸುತ್ತಲೇ ಗಿರಕಿ ಹೊಡೆದಿದ್ದವು. ಈ ರೇಸಿನಲ್ಲಿ ಅನೇಕ ನಟಿಯರ ಹೆಸರುಗಳೂ ತೇಲಿ ಬಂದಿದ್ದವು. ಇವರೇ ನಾಯಕಿಯಂತೆ ಎಂಬಂಥಾ ಸುದ್ದಿಗಳೂ ಓಡಾಡಿದ್ದವು. ಆದರೀಗ ಪುಟ್‌ಗೌರಿ ರಂಜನಿ ರಾಘವನ್ ಟಕ್ಕರ್ ಚಿತ್ರದ ನಾಯಕಿಯಾಗಿ ಫಿಕ್ಸಾಗೋದು ಬಹುತೇಕ ಖಚಿತವಾಗಿದೆ.

ಆಕಸ್ಮಿಕವಾಗಿ ಕಿರುತೆರೆಗೆ ಎಂಟ್ರಿ ಕೊಟ್ಟಿದ್ದರೂ ಅಗಾಧ ಕನಸಿಟ್ಟುಕೊಂಡೇ ಸಿನಿಮಾ ರಂಗಕ್ಕೆ ಅಡಿಯಿರಿಸಿರುವವರು ರಂಜನಿ. ಅವರು ನಟಿಸಿರೋ ಮೊದಲ ಚಿತ್ರದ ಸೋಲು ಗೆಲುವಿನಾಚೆಗೆ ನಟನೆಯಿಂದಲೇ ಗಮನ ಸೆಳೆದಿರೋ ರಂಜನಿ ಈ ಚಿತ್ರದ ನಾಯಕಿಯಾಗೋದು ಗ್ಯಾರೆಂಟಿಯಾದರೆ, ಆ ಮೂಲಕ ಮತ್ತೊಂದು ಇನ್ನಿಂಗ್ಸ್‌ಗೆ ಅಣಿಗೊಂಡಂತಾಗುತ್ತದೆ.
ಇನ್ನೇನು ತಿಂಗಳೊಪ್ಪತ್ತಿನಲ್ಲಿಯೇ ಚಿತ್ರೀಕರಣಕ್ಕೆ ಹೊರಡೋ ಸಂಭ್ರಮದಲ್ಲಿರೋ `ಟಕ್ಕರ್’ ತಂಡ ಇದೀಗ ತಾರಾಗಣ, ತಾಂತ್ರಿಕ ವರ್ಗದ ಆಯ್ಕೆಯಲ್ಲಿ ಬ್ಯುಸಿಯಾಗಿದೆ. ಇಷ್ಟರಲ್ಲೇ ಆ ವಿವರಗಳೂ ಜಾಹೀರಾಗಲಿವೆ.

Leave a Reply

Your email address will not be published. Required fields are marked *


CAPTCHA Image
Reload Image