Connect with us

ಅಭಿಮಾನಿ ದೇವ್ರು

ಇದು ಉಪ್ಪಿ ಅಭಿಮಾನಿಯ ಚೊಚ್ಚಲ ಚಿತ್ರ!

Published

on

ಉಪ್ಪಿ-2 ಚಿತ್ರದ ಕ್ರಿಯೇಟಿವ್ ಪೋಸ್ಟರ್ ಡಿಸೈನುಗಳು ಒಂದು ಥರದ ಅಚ್ಚರಿಗೆ ಕಾರಣವಾಗಿತ್ತಲ್ಲಾ? ಅದನ್ನು ವಿನ್ಯಾಸಗೊಳಿಸಿದ್ದವರು ವಿಜಯ್ ಸೂರ್ಯ ಎಂಬ ಪ್ರತಿಭೆ. ಆ ಚಿತ್ರದ ಪೋಸ್ಟರ್ ಡಿಸೈನಿಂಗ್ ಜೊತೆಗೆ ಅಸೋಸಿಯೇಟ್ ಡೈರೆಕ್ಟರ್ ಆಗಿಯೂ ಕಾರ್ಯ ನಿರ್ವಹಿಸಿದ್ದ ವಿಜಯ್ ಮೂಲತಃ ಉಪ್ಪಿ ಅಭಿಮಾನಿ. ಬಹುಶಃ ಆ ಕಾರಣದಿಂದಲೇ ಉಪೇಂದ್ರ ಗರಡಿ ಸೇರಿಕೊಂಡು ಭಿನ್ನವಾಗಿ ಆಲೋಚಿಸುವ ವಿಧಾನವನ್ನೂ ಸಿದ್ಧಿಸಿಕೊಂಡಂತಿರೋ ಅವರೀಗ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಅದರ ಫಲವಾಗಿಯೇ ಇದೀಗ `ಎ ಪ್ಲಸ್’ ಚಿತ್ರದ ಹಂಗಾಮಾ ಶುರುವಾಗಿ ಬಿಟ್ಟಿದೆ!

ಈಗ `ಎ ಪ್ಲಸ್’ ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದೆ. ಶಿವರಾಜ್ ಕುಮಾರ್, ಉಪೇಂದ್ರ ಸೇರಿದಂತೆ ಅನೇಕ ಸ್ಟಾರ್ ನಟರೇ ಈ ಬಗ್ಗೆ ಮೆಚ್ಚುಗೆಯ ಮಾತಾಡಿದ್ದಾರೆ. ಒಂದೂವರೆ ನಿಮಿಷದ ಈ ಟ್ರೈಲರ್ ಸೃಷ್ಟಿಸಿರೋ ಸೆನ್ಸೇಷನ್ ಎಂಥವರೂ ಬೆರಗಾಗುವಂತಿದೆ. ಒಂದಷ್ಟು ಮಂದಿಗಿದು ಅಂಡರ್‌ವರ್ಲ್ಡ್ ಬೇಸ್ಡ್ ಲವ್ ಸ್ಟೋರಿಯಂತೆ ಕಂಡರೆ ಮತ್ತೆ ಕೆಲವರಿಗೆ ಬೇರೆಯದ್ದೇ ರೀತಿಯಲ್ಲಿ ಗೋಚರಿಸಿದೆ. ಒಟ್ಟಾರೆಯಾಗಿ ಈ ಚಿತ್ರದ ಮೇಲೀಗ ಎಲ್ಲರ ದೃಷ್ಟಿ ನೆಟ್ಟಿದೆ. ಈ ಮೂಲಕ ಆರಂಭಿಕ ಹೆಜ್ಜೆಯಲ್ಲಿಯೇ ನಿರ್ದೇಶಕ ವಿಜಯ್ ಸೂರ್ಯ ಭರವಸೆ ಮೂಡಿಸಿದ್ದಾರೆ.

ಒಟ್ಟಾರೆಯಾಗಿ ಈ ಚಿತ್ರದ ಬಗ್ಗೆ ನಿರ್ದೇಶಕ ವಿಜಯ್ ಸೂರ್ಯ ಕುತೂಹಲದ ಕೆಂಡಕ್ಕೆ ತುಪ್ಪ ಸುರಿಯುವಂಥಾ ಮತ್ತೊಂದಷ್ಟು ವಿಚಿತ್ರ ವಿಚಾರಗಳನ್ನೇ ಹೊರ ಹಾಕಿದ್ದಾರೆ. ಒಂದು ಚಿತ್ರವೆಂದ ಮೇಲೆ, ಅದರಲ್ಲಿಯೂ ಕಮರ್ಷಿಯಲ್ ಚಿತ್ರಗಳಲ್ಲಿ ಹಾಡು ಮತ್ತು ಫೈಟ್ ಸೀನುಗಳು ಇರಲೇ ಬೇಕೆಂಬ ಸೂತ್ರವಿದೆ. ಆದರೆ ಈ ಚಿತ್ರದಲ್ಲಿ ಹಾಡೂ ಇಲ್ಲ. ಫೈಟಿಂಗೂ ಇಲ್ಲ. ಅರೇ ಟ್ರೈಲರ್ ನೋಡಿದರೆ ಭೂಗತ ಲೋಕದ ಕಥೆ ಇದ್ದಂತಿದೆ. ಫೈಟಿಂಗ್ ಇಲ್ಲ ಅಂದರೆ ಏನರ್ಥ ಎಂಬ ಪ್ರಶ್ನೆ ನಿರ್ದೇಶಕರಿಗೆ ಹೋದಲ್ಲಿ ಬಂದಲ್ಲಿ ಎದುರಾಗುತ್ತಿವೆಯಂತೆ. ಈ ಚಿತ್ರದುದ್ದಕ್ಕೂ ಫೈಟಿಂಗ್ ಇದೆ ಆದ್ರೆ ಕಾಣೋದಿಲ್ಲ ಅನ್ನೋ ಮೂಲಕ ನಿರ್ದೇಶಕ ವಿಜಯ ಸೂರ್ಯ ಮತ್ತಷ್ಟು ಕೌತುಕ ಕುದಿಯುವಂತೆ ಮಾಡುತ್ತಿದ್ದಾರೆ.

ಹೀಗೆ ಮೊದಲ ಚಿತ್ರದಲ್ಲಿಯೇ ಈ ಪಾಟಿ ಸಂಚಲನ ಸೃಷ್ಟಿಸಿರುವ ವಿಜಯ್ ಸೂರ್ಯ ಮೂಲತಃ ಬೆಂಗಳೂರಿನವರೇ. ಕಾಮಾಕ್ಷಿಪಾಳ್ಯದ ಬಡ ಮಧ್ಯಮ ವರ್ಗದ ಕುಟುಂಬದಿಂದ ಬಂದಿರುವ ಅವರಿಗೆ ಯಾವ ಸಿನಿಮಾ ಹಿನ್ನೆಲೆಯೂ ಇಲ್ಲ. ಸಿನಿಮಾ ಬಗ್ಗೆ ಕನಸು ಕಾಣುವಂಥಾ ವಾತಾವರಣವೂ ಇರಲಿಲ್ಲ. ಆದರೆ ಆರಂಭದಿಂದಲೂ ಇವರಿಗೆ ಸಿನಿಮಾಸಕ್ತಿ ಇತ್ತು. ಬರ ಬರುತ್ತಾ ರಿಯಲ್ ಸ್ಟಾರ್ ಉಪೇಂದ್ರ ಮೇಲೆ ಅಭಿಮಾನವೂ ಹುಟ್ಟಿಕೊಂಡಿತ್ತು. ಈ ನಡುವೆ ವಿಜಯ್ ಅವರನ್ನು ಅವರ ಬಾಲ್ಯ ಸ್ನೇಹಿತ ಆ ಕಾಲಕ್ಕೆ ನಟರಾಗಿದ್ದ ಮಂಡ್ಯ ಜಗದೀಶ್ ಬಳಿ ಬಿಟ್ಟಿದ್ದರು. ಈಗ ನಿರ್ಮಾಪಕರಾಗಿರೋ ಜಗದೀಶ್ ನಂತರ ವಿಜಯ್‌ರನ್ನು ನಿರ್ದೇಶಕ ಅನೀಲ್ ಅವರಿಗೆ ಪರಿಚಯಿಸಿದ್ದರು. ಅದಾದ ಬಳಿಕ ವಿಜಯ್ ಅನಿಲ್ ಅವರ ಮನೆಯಲ್ಲಿಯೇ ಮನೆ ಮಗನಂತೆ ಆರೇಳು ವರ್ಷ ಕಲಿತಿದ್ದರು. ಸಿನಿಮಾ, ನಿರ್ದೇಶನದ ಬಗ್ಗೆಯೂ ತಿಳಿದುಕೊಂಡಿದ್ದರು.

ಅನಿಲ್ ಅವರೇ ಉಪ್ಪಿ ೨ ಚಿತ್ರದ ಸಮಯದಲ್ಲಿ ವಿಜಯ್ ರನ್ನು ಉಪೇಂದ್ರ ಅವರ ಬಳಿ ಹೋಗುವಂತೆ ಮಾಡಿದ್ದರು. ಹಾಗೆ ಹೋಗುವಾಗ ಉಪ್ಪಿ ೨ ಚಿತ್ರದ ಕೆಲ ಪೋಸ್ಟರುಗಳನ್ನೂ ಡಿಸೈನು ಮಾಡಿದ್ದರಲ್ಲಾ ವಿಜಯ್? ಅದು ಉಪ್ಪಿಗೆ ತುಂಬಾ ಇಷ್ಟವಾಗಿತ್ತು. ಆ ಕಾರಣದಿಂದಲೇ ಉಪ್ಪಿ ವಿಜಯ್‌ರನ್ನು ಡಿಸೈನರ್ ಕಂ ಅಸೋಸಿಯೇಟ್ ಆಗಿ ಮೇಮಿಸಿಕೊಂಡಿದ್ದರು. ಇದಕ್ಕೂ ಮೊದಲೇ ವಿಜಯ್ ವಿಜಯಾ ಫಿಲಂ ಇನ್ಸ್ಟಿಟ್ಯೂಟ್‌ನಲ್ಲಿ ನಿರ್ದೇಶನ ತರಬೇತಿ ಪಡೆದು ಬಂದು ಆರಂಭದಲ್ಲಿಯೇ ಒರಟ ಐಲವ್ ಯೂ ಚಿತ್ರಕ್ಕೆ ಅಸೋಸಿಯೇಟ್ ಆಗಿ ಕೆಲಸ ಮಾಡಿದ್ದರು. ಆ ಬಳಿಕ ದೀನ, ಶಕ್ತಿ, ವೀರ, ಮುದ್ದು ಮನಸೇ, ಮುಂತಾದ ಚಿತ್ರಗಳಿಗೆ ಅಸೋಸಿಯೇಟ್ ಆಗಿ ಕೆಲಸ ಮಾಡಿದ್ದರು. ಆ ಎಲ್ಲ ಅನುಭವಗಳು ಸ್ಪಷ್ಟವಾಗಿ ಮಾಗಿಕೊಂಡಿದ್ದ ಉಪ್ಪಿಯ ಸಮ್ಮುಖದಲ್ಲಿಯೇ.

ಉಪ್ಪಿ ೨ ಚಿತ್ರವಾದ ನಂತರದಲ್ಲಿ ವಿಜಯ್ `ಎ ಪ್ಲಸ್’ ಚಿತ್ರದ ಕಥೆ ಬರೆದು ಅದನ್ನು ಉಪೇಂದ್ರರಿಗೆ ಹೇಳಿದ್ದರಂತೆ. ಅದನ್ನು ಇಷ್ಟಪಟ್ಟ ಉಪ್ಪಿ ಈ ಟೈಟಲ್ಲೇ ಏಕೆ ಬೇಕು ಅಂತೆಲ್ಲ ವಿಚಾರಿಸಿ ಆ ಬಳಿಕ ಒಪ್ಪಿಕೊಂಡಿದ್ದರಂತೆ. ಆ ನಂತರ ನಿರ್ಮಾಪಕರಾದ ಸೌಂದರ್ಯ ಜಗದೀಶ್ ಕೂಡಾ ಈ ಕಥೆಯನ್ನು ಇಷ್ಟಪಟ್ಟಿದ್ದರಂತೆ. ಕಡೆಗೂ ವಿ. ಪ್ರಭು ಕುಮಾರ್ ಕಥೆ, ಕ್ರಿಯೇಟಿವ್ ಅಂಶಗಳಿಗೆ ಮನಸೋತ ವಿ ಪ್ರಭುಶಂಕರ್ ಈ ಚಿತ್ರ ನಿರ್ಮಾಣ ಮಾಡಲು ಮುಂದಾಗಿ ಅದನ್ನು ಪೂರೈಸಿಕೊಂಡಿದ್ದಾರೆ.

ಈ ಮೂಲಕ ಅನೀಲ್ ಸಿದ್ದು ನಾಯಕನಾಗಿ ಲಾಂಚ್ ಆಗುತ್ತಿದ್ದಾರೆ. ಹರ ಹರ ಮಹಾದೇವ ಸೀರಿಯಲ್ಲಿನಲ್ಲಿ ಸತಿಯಾಗಿ ನಟಿಸಿದ್ದ ಸಂಗೀತಾ ಶೃಂಗೇರಿ ಈ ಚಿತ್ರದ ಮೂಲಕ ನಾಯಕಿಯಾಗಿದ್ದಾರೆ. ಈ ಚಿತ್ರದ ಮೂಲಕ ವಿಜಯ್ ಸೂರ್ಯ ಮೊದಲ ಪ್ರಯತ್ನದಲ್ಲಿಯೇ ದೊಡ್ಡ ಮಟ್ಟದಲ್ಲಿ ಎಲ್ಲರ ಗಮನ ಸೆಳೆದಿದ್ದಾರೆ.

https://www.youtube.com/watch?v=-yNUhnwWU2Q #

ಅಭಿಮಾನಿ ದೇವ್ರು

ಸಹಜತೆ ಮತ್ತು ನೈಜತೆಗೆ ತುಂಬಾ ಹತ್ತಿರ- ಸೋನುಗೌಡ

Published

on


ಜೇಕಬ್ ಸರ್ ತಮ್ಮ ಆಯ್ಕೆ ಮತ್ತು ಅದಕ್ಕೆ ಬೇಕಾದ ಪೂರ್ವಸಿದ್ಧತೆಗಳ ಬಗ್ಗೆ ಖಚಿತವಾಗಿರುತ್ತಾರೆ. ಅದು ನನಗೆ ಆರಂಭದಲೇ ಗೊತ್ತಾಯ್ತು. ಚಿತ್ರ ಒಪ್ಪಿಕೊಳ್ಳುವಾಗ ಇದು ಯಾವ ಜಾನರ್ ಸಿನಿಮಾನೋ ಹೇಗಿರುತ್ತದೆಯೋ ಎಂಬ ಸಾಕಷ್ಟು ಗೊಂದಲಗಳಿತ್ತು. ಆದರೆ ಚಿತ್ರೀಕರಣ ಶುರುವಾದ ಮೇಲೆ ಸ್ಪಷ್ಟವಾಯ್ತು, ಚಂಬಲ್‌ಗೆ ಒಂದು ಅತ್ಯುತ್ತಮ ಕನ್ನಡ ಸಿನಿಮಾವಾಗುವ ಎಲ್ಲಾ ಆರ್ಹತೆಗಳಿವೆ ಅಂತ.


ನಾನೊಬ್ಬ ಮೇಕಪ್ ಆರ್ಟಿಸ್ಟ್ ಮಗಳು. ಹಾಗಾಗಿ ಸಹಜವಾಗೇ ಅದರ ಬಗ್ಗೆ ಕೊಂಚ ಗಮನವಹಿಸಿ ಅಲಂಕರಿಸಿಕೊಳ್ಳುತ್ತೇನೆ. ಆದರೆ ಈ ಚಿತ್ರಕ್ಕೆ ಅಂಥ ಯಾವುದೇ ಸಾಧ್ಯತೆಗಳನ್ನ ಜೇಕಬ್ ಸರ್ ಕೊಡಲಿಲ್ಲ. ಸರಳವಾದ ಸಹಜವಾದ ಯುವತಿಯಾಗಿ ಕಾಣಿಸಿಕೊಂಡರೆ ಸಾಕು ಅಂದರು. ಅದರಂತೇ ಚಂಬಲ್‌ನಲ್ಲಿ ಅಭಿನಯಿಸಿದ್ದೇನೆ. ಥ್ರಿಲ್, ಎಮೋಷನಲ್ ಎಲ್ಲವೂ ಇದರಲ್ಲಿದೆ. ನೈಜ ಘಟನೆಯನ್ನಾಧರಿಸಿ ಈ ಚಿತ್ರ ಮಾಡಿದ್ದಾರೆ. ಚಿಕ್ಕ ಚಿಕ್ಕ ಪಾತ್ರಗಳಿಗೂ ಪ್ರಾಮುಖ್ಯತೆ ಇದೆ.
ಯಾವುದೇ ರೀತಿ ಪೂರ್ವಸಿದ್ಧತೆಗಳಿಲ್ಲದೆ ಕೊಟ್ಟ ಸನ್ನಿವೇಶಕ್ಕನುಗುಣವಾಗಿ ಅಭಿನಯಿಸಬೇಕು, ಅದು ಸಹಜವಾಗೇ ಮೂಡಿ ಬರಬೇಕು ಎನ್ನುವ ಕಾರಣಕ್ಕೆ ನಿರ್ದೇಶಕರು ಪಾತ್ರದ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಿರಲಿಲ್ಲ. ಹಾಗಾಗಿ ಶೂಟಿಂಗ್‌ಗೆ ಅಂತ ಹೋದಾಗಲೂ ನನಗೆ ನನ್ನ ಪಾತ್ರ ಏನು ಅಂತ ಗೊತ್ತಿರಲಿಲ್ಲ! ಶಾಟ್ ತೆಗೆಯುವುದಕ್ಕೂ ಮುಂಚೆ ಆಗ ಎಷ್ಟು ಬೇಕೋ, ಏನು ಬೇಕೋ ಅದಷ್ಟನ್ನೇ ಹೇಳಿ ಶೂಟ್ ಮಾಡುತ್ತಿದ್ದರು. ಹಾಗಾಗಿ ಚಿತ್ರ ತುಂಬಾ ಸಹಜವಾಗಿ, ನೈಜತೆಗೆ ಹತ್ತಿರವಾಗಿ ಮೂಡಿ ಬಂದಿದೆ..

Continue Reading

ಅಭಿಮಾನಿ ದೇವ್ರು

ಕೋಟಿಗೊಬ್ಬ ನಮ್ಮ ವಿಷ್ಣು ಕ್ಯಾಲೆಂಡರ್: ಸಾಹಸಸಿಂಹನ ಅಭಿಮಾನಿಗಳಿಗೆ ವಿಷ್ಣುಸೇನಾ ಸಮಿತಿ ಉಡುಗೊರೆ!

Published

on

ಸಾಹಸಸಿಂಹ ಡಾ. ವಿಷ್ಣುವರ್ಧನ್ ಅವರ ಆದರ್ಶಗಳನ್ನು ಅಜರಾಮರವಾಗಿಸುವ ನಿಟ್ಟಿನಲ್ಲಿ ವಿಷ್ಣುಸೇನಾ ಸಮಿತಿಯದ್ದು ಸಿಂಹನಡೆ. ವಿಷ್ಣು ಹೆಸರಲ್ಲಿ ನಾನಾ ಸಾಮಾಜಿಕ ಕೆಲಸ ಕಾರ್ಯಗಳನ್ನು ಮಾಡಿಕೊಂಡುಬಂದಿರುವ ಈ ಸಮಿತಿ ಪ್ರತೀ ವರ್ಷವೂ ಕೋಟಿಗೊಬ್ಬ ನಮ್ಮ ವಿಷ್ಣು ಎಂಬ ಶೀರ್ಷಿಕೆಯಲ್ಲಿ ಆಕರ್ಷಕವಾದ ಕ್ಯಾಲೆಂಡರ್ ಒಂದನ್ನು ಹೊರತರುತ್ತಿದೆ. ಪ್ರತೀ ವರ್ಷದ ಕಡೇ ಘಳಿಗೆಯಲ್ಲಿ ವಿಷ್ಣು ಅಭಿಮಾನಿ ಪಡೆ ಕಾತರದಿಂದ ಈ ಕ್ಯಾಲೆಂಡರಿಗಾಗಿ ಕಾಯುತ್ತದೆ. ವೀರಕಪುತ್ರ ಶ್ರೀನಿವಾಸ್ ಪರಿಕಲ್ಪನೆಯಲ್ಲಿ ಮೂಡಿ ಬರುತ್ತಿರೋ ಈ ಚಿತ್ರದ ಸೊಗಸೇ ಅಂಥಾದ್ದಿದೆ!

ಡಾ.ವಿಷ್ಣುವರ್ಧನ ಅವರ ನೆನಪನ್ನು ಮನೆ ಮನಗಳಲ್ಲಿ ಹಸಿರಾಗಿಡುವ ಸಲುವಾಗಿ ಕಳೆದ ೭ ವರ್ಷಗಳಂತೆ ಈ ವರ್ಷವೂ ಕೋಟಿಗೊಬ್ಬ ಕ್ಯಾಲೆಂಡರ್ ಅನ್ನು ಡಾ.ವಿಷ್ಣು ಸೇನಾ ಸಮಿತಿ ಹೊರ ತರುತ್ತಿದೆ. ಪ್ರತಿ ವರ್ಷವೂ ಹೊಸ ರೀತಿಯ ಪರಿಕಲ್ಪನೆ ಮತ್ತು ವಿನ್ಯಾಸಗಳಿಂದ ಮನಸೂರೆಗೊಳ್ಳುತ್ತಿರುವ ಕೋಟಿಗೊಬ್ಬ ಕ್ಯಾಲೆಂಡರ್ ಈ ಸಲ ಸಿಂಹಸ್ವರೂಪಿ ಡಾ.ವಿಷ್ಣುವರ್ಧನ ಎಂಬ ಪರಿಕಲ್ಪನೆ ಅಡಿಯಲ್ಲಿ ಮೂಡಿದೆ. ೧೨ ಪುಟಗಳ ಜೊತೆಗೆ ಇನ್ನೆರೆಡು ವಿಶೇಷ ಪುಟಗಳಿವೆ.

ಈ ಕ್ಯಾಲೆಂಡರ್ ಡಾ.ವಿಷ್ಣುವರ್ಧನ ಅವರ ವಿಶೇಷ ಫೋಟೋಗಳು ಮತ್ತು ಅವರು ನುಡಿದಿದ್ದ ಕೆಲವು ಸುಪ್ರಸಿದ್ಧ ಹೇಳಿಕೆಗಳನ್ನು ಒಳಗೊಂಡಿದೆ. ಜೊತೆಗೆ ಡಾ.ವಿಷ್ಣುವರ್ಧನ್ ಅವರು ಸಿಂಹಸ್ವರೂಪಿ ಹೇಗೆ ಎಂಬುದರ ಬಗ್ಗೆ ಡಾ.ವಿ.ನಾಗೇಂದ್ರ ಪ್ರಸಾದ್, ಕೆ.ಕಲ್ಯಾಣ್ ಮತ್ತು ರವಿ ಶ್ರೀವತ್ಸ ಮುಂತಾದವರು ಮಾತನಾಡಿದ್ದಾರೆ. ಒಂದು ವೃತ್ತಿಪರ ಕ್ಯಾಲೆಂಡರ್ ನಲ್ಲಿ ಇರುವಂತಹ, ರಜೆ ದಿನಗಳು, ರಾಹುಕಾಲ, ಗುಳಿಕಕಾಲ, ಅಮಾವಾಸೆ, ಹುಣ್ಣಿಮೆ ಇತ್ಯಾದಿಗಳೆಲ್ಲವೂ ಈ ಕ್ಯಾಲೆಂಡರ್ ನಲ್ಲಿ ಕಾಣಬಹುದು. ವಿಷ್ಣು ಅವರ ಕ್ಯಾಲೆಂಡರ್ ಎಂದ ಮಾತ್ರಕ್ಕೆ ಬರೀ ಫೋಟೋಗಳಿಗೆ ಅಥವಾ ಅಭಿಮಾನಿಗಳಿಗೆ ಮಾತ್ರ ಸೀಮಿತವಾಗದೆ ಇಡೀ ಕುಟುಂಬದವರಿಗೆ ಅನುಕೂಲವಾಗುವಂತೆ ರೂಪುಗೊಂಡಿದೆ.

ಸಿಂಹವೊಂದು ಮನೆಯ ಗೋಡೆ ಮೇಲೆ ನಡೆದು ಹೋಗುವ ಅನುಭವವನ್ನು ಕಟ್ಟಿಕೊಡುವಂತಹ ಆಕರ್ಷಕ ವಿನ್ಯಾಸ ಮತ್ತು ಸಾಮಾನ್ಯ ಕ್ಯಾಲೆಂಡರ್ ಗಿಂತ ದುಪ್ಟಟ್ಟು ಗಾತ್ರ ಹೊಂದಿರುವುದು ಈ ಕ್ಯಾಲೆಂಡರ್‌ನ ಮತ್ತೆರೆಡು ವಿಶೇಷಗಳಾಗಿವೆ. ಇಷ್ಟೆಲ್ಲಾ ವಿಶೇಷತೆಗಳ ಕ್ಯಾಲೆಂಡರ್‌ನ ಮುದ್ರಣ ಹತ್ತಿರಹತ್ತಿರ ನೂರು ರೂಪಾಯಿ ಇದ್ದರೂ, ಅದನ್ನು ಅಭಿಮಾನಿಗಳಿಗಾಗಿ ವೀರಕಪುತ್ರ ಶ್ರೀನಿವಾಸ್ ಮತ್ತವರ ಸ್ನೇಹಿತರು ಕೇವಲ ರೂ.೫೦/_ರೂಪಾಯಿಗಳಿಗೆ ನೀಡುತ್ತಿದ್ದಾರೆ. ಏಕೆಂದರೆ ಈ ಕ್ಯಾಲೆಂಡರ್ ಪ್ರತಿಯೊಬ್ಬ ಅಭಿಮಾನಿಯ ಮನೆಯಲ್ಲಿರಬೇಕೆಂಬುದು ಅವರ ಉದ್ದೇಶ. ಈ ಕ್ಯಾಲೆಂಡರ್ ಎಲ್ಲಾ ಜಿಲ್ಲೆ ಮತ್ತು ತಾಲೂಕುಗಳ ಬಸ್ ಸ್ಟ್ಯಾಂಡ್ ಬಳಿಯ ಪುಸ್ತಕದ ಅಂಗಡಿಗಳಲ್ಲಿ ಲಭ್ಯವಿದೆ.

#

Continue Reading

ಅಭಿಮಾನಿ ದೇವ್ರು

ಕೆ.ಜಿ.ಎಫ್. : ಚಿನ್ನದ ನೆಲದಲ್ಲಿ ಬದುಕು ಕಳೆದುಕೊಂಡವರ ದನಿಯಾದ ರಾಕಿ!

Published

on

ಇಪ್ಪತ್ತೆರಡು ಸಾವಿರ ಜನ ಜೀತಕ್ಕೆ ಬೀಳಿಸಿಕೊಂಡ ಚಿನ್ನದ ಗಣಿ ಮಾಲೀಕ. ಬರೋಬ್ಬರಿ ಒಂಭೈನೂರೈವತ್ತು ಅಡಿ ಆಳದಲ್ಲಿ ಜೀವದ ಹಂಗು ತೊರೆದು ಕ್ರೂರ ರಾಕ್ಷಸರ ಕಣ್ಗಾವಲಿನಲ್ಲಿ ದುಡಿಮೆಗೆ ನಿಂತ ಬಡ ಜೀವಗಳು. ಆ ಚಿನ್ನದ ಗಣಿಯ ಒಡೆತನಕ್ಕಾಗಿ ರಣಹದ್ದುಗಳಂತೆ ಕಾದು ಕುಂತ ಕೇಡಿಗರು. ತನ್ನ ಅಧಿಪತ್ಯವನ್ನು ಅಲ್ಲಾಡಿಸಲು ಯಾರಿಂದಲೂ ಸಾಧ್ಯವಾಗದಂತೆ ತನ್ನ ಸುತ್ತ ಭದ್ರ ಕೋಟೆ ನಿರ್ಮಿಸಿಕೊಂಡವನು ಒಬ್ಬ ಸೈತಾನ. ಗಣಿ ಕಾರ್ಮಿಕರು ಕೂಡಾ ಮನುಷ್ಯರು ಅನ್ನೋದನ್ನು ಮರೆತ ಆತನ ಪಿಶಾಚಿ ಪಡೆ. ಗೆರೆ ದಾಟಿ ಒಂದು ಹೆಜ್ಜೆ ಮುಂದಿಟ್ಟರೆ ಆಡುವ ಮಗುವಾದರೂ ಸರಿಯೇ, ರಾಕ್ಷಸರ ತುಪಾಕಿ ಗುಂಡು ಅದರ ಗುಂಡಿಗೆಯನ್ನು ಛಿತ್ರವಾಗಿಸುತ್ತದೆ. ಇಂಥ ನರಕಕ್ಕೆ ಗಣಿ ಧಣಿ ಇಟ್ಟ ಹೆಸಡರು ಅಕ್ಕಸಾಲಿಗನ ತಕ್ಕಡಿ (ನಾರಾಚಿ)!

ಅದೊಂದು ದಿನ ಕೆ.ಜಿ.ಎಫ್ ಎನ್ನುವ ಕಡುದಾರಿದ್ರ್ಯದ ನೆಲದಲ್ಲಿ ಚಿನ್ನದ ನಿಕ್ಷೇಪ ಸಿಗುತ್ತದೆ. ಅದೇ ಘಳಿಗೆಯಲ್ಲಿ ಮತ್ತೊಂದು ಜೀವ ಕೂಡಾ ಜನ್ಮವೆತ್ತುತ್ತದೆ. ಅವನು ಲೋಕಿ. ಅಪ್ಪ ಯಾರೋ ಗೊತ್ತಿಲ್ಲ. ಹತ್ತನ್ನೆರಡು ವರ್ಷದ ಹುಡುಗ ಜಗತ್ತು ನೋಡೋ ಹೊತ್ತಿಗೆ ಅನಾರೋಗ್ಯದಿಂದ ಅಮ್ಮ ಕೂಡಾ ಉಸಿರು ಚೆಲ್ಲುತ್ತಾಳೆ. ಕೆಟ್ಟ ಬಡತನದಲ್ಲಿ ಯಾರು ಬೇಕಾದರೂ ಹುಟ್ಟಬಹುದು. ಆದರೆ ಸಾಯುವಾಗ ಬಡತನವಿರಬಾರದು ಅನ್ನೋದು ತಾಯಿಯ ಬಯಕೆ. `ನಾನು ದೊಡ್ಡ ಶ್ರೀಮಂತನಾಗೇ ತೀರುತ್ತೇನೆಂದು’ ತಾಯಿಗೆ ಭಾಷೆ ಕೊಡೋ ಹುಡುಗ ಲೋಕಿ ಹೋಗಿ ಸೇರೋದು ಮುಂಬೈ ಅನ್ನೋ ಮಾಯೆಯ ಮಡಿಲನ್ನು. ಬೂಟ್ ಪಾಲೀಷ್ ಮಾಡಿ ಬದುಕು ಆರಂಭಿಸೋ ಹುಡುಗ ಒಂದು ಕಾಲಕ್ಕೆ ಇಡೀ ಬಾಂಬೆಯನ್ನು ಆಳುವಂತಾಗುತ್ತಾನೆ. ಲೋಕಿ ರಾಕಿಯಾಗಿ ಮಾರ್ಪಡುತ್ತಾನೆ. ಇಂತಾ ರಾಕಿ ಭಾಯ್ ಕೈಗೆ ಒಂದು ದೈತ್ಯ ಆನೆಯನ್ನು ಹೊಡೆಯೋ ಡೀಲು ಬರುತ್ತದೆ. ಅದು ಅದೇ ಚಿನ್ನದ ಗಣಿ ಮಾಲೀಕನ ಮಗ ಗರುಡನದ್ದು. ತಾನು ಎಲ್ಲಿಗೆ ಹೋಗುತ್ತಿದ್ದೇನೆ, ಹೊಡೆದುರುಳಿಸಬೇಕಿರೋ ಕೀಚಕನೆ ಚರಿತ್ರೆ ಏನು? ಆತ ರಕ್ತಹರಿಸುತ್ತಿರೋ ಮಣ್ಣಿಗೂ ಅಲ್ಲಿನ ಮಣ್ಣಿನ ಮಕ್ಕಳಿಗೂ ಇರುವ ನಂಟಿನ ಇತಿಹಾಸವೇನು? ಉಹೂಂ… ಯಾವುದೂ ಗೊತ್ತಿಲ್ಲದೇ ಹೊಡೆಯೋದಷ್ಟನ್ನೇ ಗುರಿಯಾಗಿಸಿಕೊಂಡು ನರಕದ ಗೇಟಿನೊಳಗೆ ಎಂಟ್ರಿ ಕೊಡೋ ರಾಕಿಯ ಮುಂದೆ ತೆರೆದುಕೊಳ್ಳುವ ದೃಶ್ಯಗಳು, ಆ ಕೋಟೆಯ ಒಂದೊಂದೇ ಬಾಗಿಲನ್ನು ಬೇಧಿಸುತ್ತಾ ಮುನ್ನುಗ್ಗುವ ರಾಕಿ ಕಡೆಗೆ ಆ ಕಿರಾತನಕ ಕೊರಳಿಗೆ ಕೊಡಲಿಯಿಡುತ್ತಾನಾ? ಅಥವಾ ಅವರ ಕಪಿಮುಷ್ಟಿಗೆ ಸಿಲುಕಿ ಕುತ್ತಿಗೆ ತಗ್ಗಿಸಿ ಮಣಿಯುತ್ತಾನಾ ಅನ್ನೋದು ಸಿನಿಮಾದ ಒಟ್ಟಾರೆ ಸಾರಾಂಶ.

`ಕೆ.ಜಿ.ಎಫ್’ ಕಾಲ್ಪನಿಕ ಕತೆಯಂತೆ ಕಂಡರೂ ಇದು ಚಿನ್ನದ ನೆಲದಲ್ಲಿ ಉಸಿರು ಚೆಲ್ಲಿದ ಜೀವದನಿಯಂತೆ ಕಾಣುತ್ತದೆ. ಹೊರ ಜಗತ್ತಿಗೆ ಅದು ತಮ್ಮ ಆಡಂಬರ ಹೆಚ್ಚಿಸೋ ಚಿನ್ನದ ಕೊಪ್ಪರಿಗೆ. ಆದರೆ ಆ ಚಿನ್ನದ ಗಣಿಯೊಳಗೆ ಅದೆಂತೆಂಥಾ ನಿಗೂಢಗಳಿವೆ, ಅದೆಷ್ಟು ಜೀವಗಳು ಸಾವಿರಾರು ಅಡಿ ಆಳದಲ್ಲಿ ನರಳಾಡಿ ಜೀವ ಬಿಟ್ಟಿವೆ ಮತ್ತು ಚಿನ್ನದ ಮಣ್ಣಾಳದಲ್ಲಿ ಅದೆಷ್ಟು ಬಡಪಾಯಿಗಳ ನೆತ್ತರು ಇಂಗಿದೆಯೆಂಬುದು ಜಗತ್ತಿಗೆ ಬೇಡವಾದ ಸತ್ಯ. ಕೆಜಿಎಫ್ ಒಂದು ಚಿತ್ರವಾದರೂ ಕೂಡಾ ನಮ್ಮದೇ ನಡುವಿನ ಭೀಕರ ಸತ್ಯವೊಂದನ್ನು ಮುಖ್ಯವಾಹಿನಿಗೆ ತೇಲಿಸಿ ಬಿಟ್ಟಂತೆ ಭಾಸವಾಗುತ್ತೆ. ನಾವೇ ಕೇಳಿಸಿಕೊಳ್ಳದ ನಮ್ಮವರದ್ದೇ ಆಕ್ರಂದನವೊಂದು ಎದೆಗೆ ನಾಟಿದಂಥಾ ತಲ್ಲಣವನ್ನು ಪ್ರತೀ ದೃಷ್ಯಗಳೂ ಹುಟ್ಟಿಸುತ್ತವೆ. ಅದು ಚಿತ್ರವೊಂದು ಪರಿಣಾಮಕಾರಿಯಾಗೋ ಸಂಕೇತ. ಅದು ಗೆಲುವಿನ ಸೂಚನೆಯೂ ಹೌದು.

ಸಾವಿರಾರು ಅಡಿ ಆಳದಲ್ಲಿ ನಡೆಯೋ ಚಿನ್ನದ ಗಣಿಗಾರಿಕೆಯಲ್ಲಿ ಮನುಷ್ಯರನ್ನೇ ಬಲಿ ಕೊಡುತ್ತಾರೆಂಬುದು ಯಾವ ಕಾಲದಿಂದಲೋ ಹಬ್ಬಿಕೊಂಡಿರುವ ಭೀಕರ ಸತ್ಯ. ಆದರೆ ಅಲ್ಲಿ ಅದಕ್ಕಿಂತಲೂ ಭರ್ಭರವಾದುದ್ದೇ ನಡೆಯುತ್ತದೆಂಬುದಕ್ಕೆ ಈ ಚಿತ್ರದಲ್ಲಿ ವಾಸ್ತವಕ್ಕೆ ಹತ್ತಿರಾದ ಅನೇಕ ವಿಚಾರಗಳಿದ್ದಾವೆ. ಡಾನ್ ರಾಕಿ ಆನೆಯನ್ನು ಹೊಡೆಯೋ ಡೀಲು ಪಡೆದು ಕೆಜಿಎಫ್‌ಗೆ ಎಂಟ್ರಿ ಕೊಡುವಾಗ ಆತನಿಗೂ ಆ ಬಗ್ಗೆ ಏನೆಂದರೆ ಏನೂ ಗೊತ್ತಿರೋದಿಲ್ಲ. ಆದರೆ ಆ ನಂತರ ತೆರೆದುಕೊಳ್ಳೋದು ಭೀಭತ್ಸ ಸನ್ನಿವೇಶ. ತಲೆ ಎತ್ತಿ ನೋಡಿದರೂ ಕಾರ್ಮಿಕರ ರುಂಡ ಚೆಂಡಾಡೋ ಚಂಡ ಪಡೆ, ದುಡಿಯೋ ಶಕ್ತಿ ಇಲ್ಲದವರನ್ನು ಕೊಂದು ಬಿಸಾಡೋ ಕ್ರೌರ್ಯ, ಹೆಣ್ಣು ಹುಟ್ಟಿದರೆ ಹೆತ್ತವರೇ ಕತ್ತು ಹಿಸುಕಿ ಸಾಯಿಸಬೇಕಾದ ಅನಿವಾರ್ಯತೆ. ಇದೆಲ್ಲದಕ್ಕೂ ಚಿನ್ನಕ್ಕೂ ನಂಟಿದೆ. ಅದನ್ನು ಯಾವ್ಯಾವುದಕ್ಕೋ ಅಂಟದಂತೆ ಜಾಗ್ರತೆ ವಹಿಸಿ ಇಡೀ ಚಿತ್ರವನ್ನು ಪಟಕ್ಕಿಟ್ಟ ಚಿನ್ನದಂತೆಯೇ ರೂಪಿಸಿರೋದು ಚಿತ್ರತಂಡದ ವರ್ಷಾಂತರಗಳ ಶ್ರಮದ ಫಲ.

ನಿಜದ ಇತಿಹಾಸವಿರುವ ಯಾವ ಕೃತಿಗೂ ಆಳುವ ಸರ್ಕಾರಗಳು ಉಳಿಗಾಲವಿರಿಸೋದಿಲ್ಲ ಎನ್ನುವ ಸೂಕ್ಷ್ಮತೆಯೊಂದಿಗೆ ಕೆಜಿಎಫ್ ಅನ್ನು ರೂಪಿಸಲಾಗಿದೆ. ಪತ್ರಕರ್ತನೊಬ್ಬ ಬರೆದ ನಿಷೇಧಿತ ಪುಸ್ತಕದ ಮೂಲಕ ಸಿನಿಮಾವನ್ನು ನಿರೂಪಿಸಲಾಗಿದೆ. ಕಥೆ ಕಟ್ಟುವ ಮತ್ತು ಅದನ್ನು ಎಳೆಎಳೆಯಾಗಿ ಹೇಳುತ್ತಾ ಸಾಗುವ ಕಲೆ ನಿರ್ದೇಶಕ ಪ್ರಶಾಂತ್ ನೀಲ್’ಗೆ ಸಿದ್ಧಿಸಿದೆ. ದೇಶಾಧ್ಯಂತ ಕೆಜಿಎಫ್ ಬಗ್ಗೆ ಹುಟ್ಟಿಕೊಂಡಿತ್ತಲ್ಲಾ ಕ್ರೇಜ್ ಅದಕ್ಕಿಂತಲೂ ಒಂದು ಮುಟಿಗೆ ಹೆಚ್ಚೇ ರೋಚಕವಾಗಿ ನೀಲ್ ಇಡೀ ಚಿತ್ರವನ್ನು ರೂಪಿಸಿದ್ದಾರೆ. ಚಿನ್ನದ ಗಣಿಯ ಕ್ರೌರ್ಯ ಬಗೆಯುತ್ತಲೇ ಹೊಸಕಲ್ಪಟ್ಟ ಜೀವಗಳ ಕಥೆ ಹೇಳೋ ರಾಕಿ ಭಾಯ್ ಇಷ್ಟವಾಗದಿರಲು ಯಾವ ಕಾರಣಗಳೂ ಇಲ್ಲ!

ಇಷ್ಟೆಲ್ಲದರ ನಡುವೆಯೂ ಒಂದು ಕೊರಗಿದೆ. ಇನ್ನೊಂದಿಷ್ಟು ನಿಮಿಷಗಳನ್ನು ವೃದ್ಧಿಸಿ ಉಳಿದಿರೋ ಕಥೆಯನ್ನು ಒಂದೇ ಗುಕ್ಕಿನಲ್ಲಿ ಹೇಳಿಬಿಡಬೇಕಿತ್ತು. ಎಲ್ಲ ಮುಗಿದ ಮೇಲೂ ಇನ್ನೊಂಚೂರಿರಬಹುದಿತ್ತು ಎನ್ನುವ ಅತೃಪ್ತಿ ಪ್ರೇಕ್ಷಕರಿಗೆ ಉಳಿದೇ ಉಳಿಯುತ್ತದೆ. ಈ ಕಾರಣಕ್ಕಾದರೂ ಎರಡನೇ ಅಧ್ಯಾಯದ ಗೊಡವೆಗೆ ಹೋಗದೆ ಒಂದೇ ಚಾಪ್ಟರಿನಲ್ಲಿ ಹೇಳಿ ಮುಗಿಸಿಬಿಟ್ಟಿದ್ದರೆ ನೋಡುಗರ ಆತ್ಮಸಂತೃಪ್ತಿಯಾಗುತ್ತಿತ್ತು!!

#

Continue Reading

Trending

Copyright © 2018 Cinibuzz