Connect with us

ಸಿನಿಮಾ ವಿಮರ್ಶೆ

ನೀವಂದ್ಕೊಂಡಂಗೆ ಏನೂ ಇಲ್ಲಣ್ಣೊ!

Published

on

ದಿ ವಿಲನ್: ಎಲ್ಲ ರಸಗಳನ್ನೂ ಬೆರೆಸಿ ತಯಾರಿಸಿದ ಪ್ರೇಮ್‌ಮೇಡ್ ಕಷಾಯ!
ಪ್ರೇಮ್ ನಿರ್ದೇಶನದ ದಿ ವಿಲನ್ ಚಿತ್ರ ಥೇಟು ಗಜಪ್ರಸವದ ಮಾದರಿಯಲ್ಲಿಯೇ ಕಡೆಗೂ ಬಿಡುಗಡೆಯಾಗಿದೆ. ಒಂದು ಚಿತ್ರ ಆರಂಭಿಸಿದರೆಂದರೆ ಮೊದಲು ಪ್ರಚಾರ ಆಮೇಲೆ ಕೆಲಸ ಎಂಬ ಸೂತ್ರವನ್ನೇ ನೆಚ್ಚಿಕೊಂಡು ಬಂದಿರೋ ಪ್ರೇಮ್ ಈ ಚಿತ್ರದಲ್ಲಿಯೂ ಅದನ್ನೇ ಮುಂದುವರೆಸಿದ್ದರು. ಆದರೆ ಪ್ರೇಕ್ಷಕರ ಅಸಹನೆಯನ್ನೂ ಕಡೇ ಘಳಿಗೆಯಲ್ಲಿ ಕೊತ ಕೊತನೆ ಕುಡಿಯುವ ಕುತೂಹಲವಾಗಿಸಿದ್ದ ಪ್ರೇಮ್ ಜಾಣ್ಮೆ ಎಂಬುದರಲ್ಲಿ ಎರಡು ಮಾತಿಲ್ಲ. ಸುದೀಪ್ ಮತ್ತು ಶಿವಣ್ಣ ಈ ಇಬ್ಬರಲ್ಲಿ ಯಾರು ರಾಮ ಮತ್ತು ಯಾರು ರಾವಣ ಎಂಬುದಕ್ಕೆ ಇದೀಗ ಉತ್ತರ ಸಿಕ್ಕಿದೆ!

ಪ್ರೇಮ್ ಚಿತ್ರವೆಂದ ಮೇಲೆ ಹಳ್ಳಿ ಚಿತ್ರಣ, ಮದರ್ ಸೆಂಟಿಮೆಂಟ್ ಇರೋದು ವಾಡಿಕೆ. ಈ ಚಿತ್ರವೂ ಕೂಡಾ ಹಳ್ಳಿಯೊಂದರ ನಾಟಕ ಪ್ರದರ್ಶನದ ಮೂಲಕವೇ ತೆರೆದುಕೊಳ್ಳುತ್ತೆ. ಈ ಚಿತ್ರಣದಲ್ಲಿ ಶಿವಣ್ಣ ಹಳ್ಳಿಗಾಡಿನ ರಾಮನಾಗಿ ಕಾಣಿಸಿಕೊಂಡಿದ್ದಾರೆ. ಆ ತಾಯಿಗೆ ತನ್ನ ಮಗ ರಾಮ ಶ್ರೀರಾಮ ಚಂದ್ರನಂತೆಯೇ ಬಾಳಿ ಬದುಕಬೇಕೆಂಬೋ ಆಸೆ. ಆದ್ದರಿಂದ ರಾಮನ ಆದರ್ಶಗಳನ್ನೇ ಧಾರೆ ಎರೆದು ಬೆಳೆಸುತ್ತಾಳೆ. ಆದರೆ ವಿಪರೀತ ನಾಟಕದ ಹುಚ್ಚಿನ ರಾಮನ ಜನ್ಮದಾತನಿಗೆ ರಾವಣನ ಮೇಲೆ ಬಲು ಪ್ರೀತಿ. ನಾಟಕದಲ್ಲಿಯೂ ಪಟ್ಟು ಹಿಡಿದು ರಾವಣನಾಗೋ ಗಂಡನ ಮೇಲೆ ರಾಮನ ತಾಯಿಗೆ ಕೆಂಡದಂಥಾ ಸಿಟ್ಟು. ಕಡೆಗೂ ಆಕೆ ತನ್ನ ಗಂಡ ನಾಟಕದಲ್ಲಿ ಧರಿಸಿ ಮೆರೆಯುವ ರಾವಣ ಕಿರೀಟಕ್ಕೆ ಬೆಂಕಿಯಿಡುತ್ತಾಳೆ. ಆ ಬೆಂಕಿಯ ಜೊತೆಗೇ ಅಸಲೀ ಕಥಾನಕ ತೆರೆದುಕೊಳ್ಳುತ್ತೆ!

ಅವ್ವನ ರಾಮನಾಮಸ್ಮರಣೆಯನ್ನೇ ಕಿವಿಗೆ ಎರಕ ಹೊಯ್ದುಕೊಂಡಂತೆ ಬೆಳೆದ ರಾಮನ ಕತ್ತಿನಲ್ಲೊಂದು ಬೆಳ್ಳಿಯ ಸರ. ಆದರೆ ರಾಮ ಒಂದು ಫೈಟಿಂಗ್ ಸೀನಿನಲ್ಲಿದ್ದಾಗ ಆ ಸರ ಮಾಯವಾಗುತ್ತೆ. ಹಾಗೆ ಮಾಯವಾದ ಸರದ ಫ್ಲ್ಯಾಶ್ ಬ್ಯಾಕ್ ಸ್ಟೋರಿಯಲ್ಲಿ ಕೈಸರ್ ರಾಮ್ ಆಗಿ ಸುದೀಪ್ ಭರ್ಜರಿ ಎಂಟ್ರಿ ಕೊಡುತ್ತಾರೆ. ರಾಮ ಕೈಸರ್ ರಾಮನ ಬೆಂಬಿದ್ದು, ಬಡಿದಾಟವಾಗಿ, ಅದಕ್ಕೊಂದು ಉಪಕಥೆ, ಆ ಕಥೆಗೆ ಮತ್ತೊಂದು ಕೊಂಬೆ ಕೋವೆ… ಬಹುಶಃ ನಿರ್ದೇಶಕ ಪ್ರೇಮ್ ಎರಡು ವರ್ಷಗಳ ಕಾಲ ಯಾವುದ್ಯಾವುದೋ ಕಥೆಯನ್ನು ಚೆನ್ನಾಗಿ ಕಲೆಸಿ, ಕಲಸುಮೇಲೋಗರ ಮಾಡಿ ದೃಷ್ಯ ಕಟ್ಟಿದ್ದಾರೇನೋ ಎಂಬ ಸಂಶಯ ಮೂಡುವಂತೆ ಗೋಜಲಿನ ವಾತಾವರಣವೂ ಸೃಷ್ಟಿಯಾಗುತ್ತೆ.

ಥ್ರ್ರಿಲ್ಲರ್, ಆಕ್ಷನ್ ಮತ್ತು ಸೆಂಟಿಮೆಂಟುಗಳನ್ನು ಸೇರಿಸಿ ಪ್ರೇಮ್ ಕಥೆ ಹೊಸೆದಿದ್ದಾರೆ. ಅದು ಪ್ರೇಕ್ಷಕರಿಗೆ ಅಲ್ಲಲ್ಲಿ ಕಾಮಿಡಿ ಮತ್ತು ಹಾರರ್ ಅನುಭವವನ್ನೂ ನೀಡೋದು ಈ ಚಿತ್ರದ ಹೆಚ್ಚುಗಾರಿಕೆಯೋ, ಕೊರತೆಯೋ ಎಂಬ ಗೊಂದಲವೂ ಕಾಡುತ್ತೆ. ಆದರೆ ಕಥೆ ಸಿಕ್ಕಿನಾಚೆಗೆ ಇಡೀ ಚಿತ್ರವನ್ನು ಪ್ರೇಮ್ ರಿಚ್ ಆಗಿ ಕಟ್ಟಿಕೊಟ್ಟಿದ್ದಾರೆಂಬುದರಲ್ಲಿ ಎರಡು ಮಾತಿಲ್ಲ. ರಾಮ ಮತ್ತು ಕೈಸರ್ ರಾಮ್ ಪಾತ್ರದಲ್ಲಿ ಶಿವಣ್ಣ ಮತ್ತು ಸುದೀಪ್ ಅಕ್ಷರಶಃ ವಿಜೃಂಭಿಸಿದ್ದಾರೆ. ಅವರಿಬ್ಬರದ್ದೂ ಪರಕಾಯ ಪ್ರವೇಶ. ಅವರ ಬಾಯಿಂದ ಹೊರ ಬೀಳೋ ಪ್ರತೀ ಡೈಲಾಗುಗಳಿಗೂ ಶಿಳ್ಳೆ ಕೇಕೆಗಳು ಮೊರೆಯುತ್ತವೆ. ಆದರೆ ಪ್ರೇಮ್ ವ್ಯಕ್ತಿತ್ವದಂತೆಯೇ ಗಡಿಬಿಡಿ, ಗಜಿಬಿಜಿಗಳೇ ಕಥೆಯ ವಿಚಾರದಲ್ಲಿ ಮಿಜಿಗುಡುತ್ತವೆ. ಇಡೀ ಸಿನಿಮಾ ನೋಡಿದಾಗ ಸುದೀಪ್ ಪಾತ್ರಕ್ಕೆ ಹೆಚ್ಚು ಸ್ಕೋಪ್ ನೀಡಲಾಗಿದೆಯಾ ಎಂದು ಅನಿಸದೇ ಇರದು. ಹಾಗೆ ನೋಡಿದರೆ ಒಂದು ಸಣ್ಣ ಎಳೆಯಲ್ಲಿ ಸಲೀಸಾಗಿ ಹೇಳಿಬಿಡಬಹುದಾಗಿದ್ದ ಕತೆಯನ್ನು ರೋಚಕಗೊಳಿಸುವ ಉಮೇದಿಗೆ ಬಿದ್ದು ಎಲ್ಲಿಂದ ಎಲ್ಲಿಗೋ ಟ್ರಾವೆಲ್ ಮಾಡಿಸಿದ್ದಾರೆ. ಬ್ರಿಟಿಷರು ಭಾರತವನ್ನು ಆಳಿದ್ದ ಸೇಡಿಗೆ ಒಬ್ಬ ವ್ಯಕ್ತಿ ಇಡೀ ಬ್ರಿಟಿಷ್ ಸಾಮ್ರಾಜ್ಯವನ್ನೇ ಅಲ್ಲಾಡಿಸಲು ಅಂಡರ್ ವರ್ಲ್ಡ್ ಡಾನ್ ರೂಪದಲ್ಲಿ ಎದ್ದುನಿಲ್ಲೋದನ್ನು ನಿಜಕ್ಕೂ ಹಾಸ್ಯಾಸ್ಪದವಾಗಿದೆ!

ಎಲ್ಲಾ ರಸಗಳನ್ನೂ ಒಂದೇ ಚಿತ್ರದಲ್ಲಿ ಸೇರಿಸಿದರೆ ರುಚಿಯಾದ ರಸಾಯನವೇ ಆಗುತ್ತದೆಂದೇನೂ ಗ್ಯಾರಂಟಿಯಿಲ್ಲ. ಅದು ಒಗರೊಗರು ಕಷಾಯವಾಗೋ ಅಪಾಯವೂ ಇದೆ. ಆ ಅಪಾಯವನ್ನು ಪ್ರೇಮ್ ಮನಗಂಡಿಲ್ಲ ಎಂಬುದೇ ಈ ಚಿತ್ರದ ದೊಡ್ಡ ಹಿನ್ನಡೆ. ಶಿವಣ್ಣ ಮತ್ತು ಸುದೀಪ್ ಪಾತ್ರಗಳ ಖದರ್ ಇಡೀ ಕಥೆಯಲ್ಲಿಯೂ ಇದ್ದಿದ್ದರೆ, ಹುಟ್ಟಿಕೊಂಡಿದ್ದ ಕ್ರೇಜಿನಲ್ಲಿ ವಿಲನ್ ಎಲ್ಲಿಯೋ ಹೋಗಿ ಬಿಡುತ್ತಿದ್ದ. ಆದರೆ ವಿಲನ್ನು ನಿರ್ದೇಶಕ ಪ್ರೇಮ್ ಗಡಿಬಿಡಿಯ ನಡುವೆ ಅಕ್ಷರಶಃ ಬಸವಳಿದಿದ್ದಾನೆ!

ಫೈನಲಿ, ಇಡೀ ಕಥೆ ಮದರ್ ಸೆಂಟಿಮೆಂಟಿನಲ್ಲಿ ವಿಲೀನವಾಗುತ್ತದೆ. ಅದನ್ನು ನೋಡುಗರ ಕಣ್ಣಾಲಿಗಳು ತುಂಬಿ ಬರುವಂತೆ ಶಶಕ್ತವಾಗಿಯೂ ಪ್ರೇಮ್ ರೂಪಿಸಿದ್ದಾರೆ. ಆದರೆ ಕಣ್ಣುಗಳು ಹನಿಗೂಡಿದ್ದು ಮೂರು ಘಂಟೆ ಚಿತ್ರ ನೋಡಿದ ಪರಿಣಾಮದಿಂದಲಾ, ಅಥವಾ ಅದಕ್ಕೆ ಕ್ಷೈಮ್ಯಾಕ್ಸ್ ಕಾರಣವಾ ಎಂಬ ಯಕ್ಷ ಪ್ರಶ್ನೆ ಪ್ರೇಕ್ಷಕರನ್ನು ಕಾಡುತ್ತದೆ. ಇದೆಲ್ಲದರಾಚೆಗೆ ಇಡೀ ಚಿತ್ರವನ್ನು ಅದ್ದೂರಿಯಾಗಿ ರೂಪಿಸೋ ಪ್ರೇಮ್ ಹಂಬಲ ಎದ್ದು ಕಾಣಿಸುತ್ತೆ. ಕೆಲವೆಡೆ ಅದರಲ್ಲವರು ಯಶಸ್ವಿಯೂ ಆಗುತ್ತಾರೆ. ಗಿರೀಶ್ ಗೌಡ ಛಾಯಾಗ್ರಹಣವೂ ಚೇತೋಹಾರಿಯಾಗಿದೆ. ಮಳವಳ್ಳಿ ಸಾಯಿಕೃಷ್ಣರ ಸಂಭಾಷಣೆಯಲ್ಲೂ ಖದರ್ ಇದೆ. ಅರ್ಜುನ್ ಜನ್ಯಾ ಸಂಗೀತದ ಹಾಡುಗಳೂ ಚಿತ್ರಕ್ಕೆ ಪೂರಕವಾಗಿ ಇಷ್ಟವಾಗುತ್ತವೆ.

ಆದರೆ ಎಲ್ಲಾ ಇದೆ, ಮತ್ತೇನೋ ಇಲ್ಲ ಎಂಬ ಗೊಂದಲದ ಛಾಯೆಯೊಂದು ಕ್ಲೈಮ್ಯಾಕ್ಸ್ ಜೊತೆಗೇ ಪ್ರೇಕ್ಷಕರ ಮನಸಿಗೂ ಇಳಿದುಕೊಳ್ಳುತ್ತೆ ಎಂಬಲ್ಲಿಗೆ ವಿಲನ್ ಅಬ್ಬರ ಸಮಾಪ್ತಿಯಾಗುತ್ತೆ!

Advertisement
Click to comment

Leave a Reply

Your email address will not be published. Required fields are marked *

ಫೋಕಸ್

ಜೋಳದ ರೊಟ್ಟಿಯ ಸುತ್ತಾ ಫಾರ್ಚುನರ್ ಪಯಣ!

Published

on

(3/5) ***

ಸಾಕಷ್ಟು ದಿನಗಳಿಂದ ಬಿಡುಗಡೆಗೆ ಕಾದಿದ್ದ ಫಾರ್ಚುನರ್‌ಗೆ ಈ ವಾರ ಮುಕ್ತಿ ಸಿಕ್ಕಿದೆ.

ಬಹುಶಃ ದಿಗಂತ್ ನಟನೆಯಲ್ಲಿ ಮೂಡಿಬಂದ ಇತ್ತೀಚಿನ ಸಿನಿಮಾಗಳಿಗೆ ಹೋಲಿಸಿದರೆ ಫಾರ್ಚುನರ್ ಒಂಚೂರು ಬೆಟರ್ರಾಗಿ ಮೂಡಿಬಂದಿದೆಯೆನ್ನಬಹುದೇನೋ. ಯಾಕೆಂದರೆ ದಿಗಂತ್‌ನ ವ್ಯಕ್ತಿತ್ವಕ್ಕೆ ಹೇಳಿಮಾಡಿಸಿದಂತಾ ಪಾತ್ರ ಈ ಚಿತ್ರದಲ್ಲಿದೆ!

ತನ್ನ ಮನೆಯಲ್ಲೇ ಕೆಲಸಕ್ಕೆ ಬಾರದವನು ಅನ್ನಿಸಿಕೊಂಡ ಹುಡುಗ, ಸಾಫ್ಟ್‌ವೇರ್ ಹುಡುಗಿ ಪ್ರೀತಿಸಿ ರಿಜಿಸ್ಟರ್ ಮ್ಯಾರೇಜಾಗೋದರೊಂದಿಗೆ ಕಥೆ ತೆರೆದುಕೊಳ್ಳುತ್ತದೆ. ಎಂ.ಎಲ್.ಎ ಮಗ, ಸ್ವಂತ ಹೋಟೆಲ್ ನಡೆಸುತ್ತಿರುವ ಹುಡುಗ ಅನ್ನೋ ಕಾರಣಕ್ಕೆ ಆಕೆ ಮದುವೆಯಾಗಿರುತ್ತಾಳೆ. ಆದರೆ ಈತ ಪ್ರಯೋಜನಕ್ಕೆ ಬಾರದವನು, ಸ್ನೇಹಿತನ ಹೋಟೆಲ್ ತೋರಿಸಿ ಸುಳ್ಳು ಹೇಳಿ ಮದುವೆಯಾಗಿದ್ದಾನೆ ಅನ್ನೋದು ಆಕೆಗೆ ಗೊತ್ತಾಗುತ್ತದೆ. ಹೆಂಡತಿ ಆಫೀಸಿಗೆ ಹೋದರೆ ಇವನು ಮನೆಯಲ್ಲಿ ಟೀವಿ ನೋಡಿಕೊಂಡು ಇರುವ ಸೋಮಾರಿ. ಪತ್ನಿಯ ಸಹೋದ್ಯೋಗಿಯೊಬ್ಬ ಎದುರು ಮನೆಯಲ್ಲೇ ಇರುತ್ತಾನೆ. ಆತನ ಪತ್ನಿ ಹಳ್ಳಿ ಹುಡುಗಿ ಅನ್ನೋ ಕಾರಣಕ್ಕೆ ಆಕೆಯ ಗಂಡನಿಗೆ ಅವಳ ಮೇಲೆ ಒಂಥರಾ ಅಸಡ್ಡೆ, ತಿರಸ್ಕಾರ ಭಾವನೆ. ಆಕೆ ಚೆಂದದ ಅಡುಗೆ ಮಾಡುತ್ತಾಳೆ ಅಂತಾ ಗೊತ್ತಾಗಿದ್ದೇ ಅವಳಿಂದ ಅಡುಗೆ ಮಾಡಿಸಿಕೊಂಡು ತನ್ನದೇ ಫಾರ್ಚುನರ್ ಕಾರಿನಲ್ಲಿ ತೆಗೆದುಕೊಂಡು ಹೋಗಿ ವ್ಯಾಪಾರ ಶುರು ಮಾಡುತ್ತಾನೆ ಹೀರೋ. ಜೋಳದ ರೊಟ್ಟಿ ಬದನೇಕಾಯಿ ಪಲ್ಯದ ವ್ಯಾಪಾರವೇನೋ ಕುದುರುತ್ತದೆ. ಆದರೆ ಈ ವಿಚಾರ ಈತನ ಹೆಂಡತಿಗೂ ಆಕೆಯ ಗಂಡನಿಗೂ ಗೊತ್ತಾಗಿ `ಮರ್ಯಾದೆ ಹೋಯ್ತು ಅಂತಾ ರಣರಂಪ ಶುರುವಾಗುತ್ತದೆ. ಸೋಮಾರಿಯಂತೆ ಕೂತು ತಿಂದರೂ ಪರವಾಗಿಲ್ಲ ರಸ್ತೆಯಲ್ಲಿ ಹೋಟೆಲ್ ನಡೆಸಿ ಬದುಕೋದು ಎರಡೂ ಮನೆಯವರಿಗೆ ಪ್ರತಿಷ್ಟೆಹಾನಿ ಎಂಬಂತಾಗುತ್ತದೆ. ಸಿನಿಮಾದ ಮೊದಲ ಭಾಗದಲ್ಲಿ ನಡೆಯುವ ಈ ಎಲ್ಲ ದೃಶ್ಯಗಳು ಸ್ವಾಭಿಮಾನದ ಬದುಕನ್ನು ಕಟ್ಟಿಕೊಳ್ಳುವ ಯುವಕರಿಗೆ ಸ್ಫೂರ್ತಿ ನೀಡುವಂತಿದೆ. ಆದರೆ ಎರಡನೇ ಭಾಗ ಬಾಣಲಿಯ ಮೇಲೆ ಸೀದುಹೋದ ಜೋಳದ ರೊಟ್ಟಿಯಂತೆ ಕಮಟುಕಮಟಾಗಿಬಿಡುತ್ತದೆ. ಚಿತ್ರಕತೆ ಹಳ್ಳ ಹಿಡಿಯುತ್ತಾ ಸಾಗುತ್ತದೆ. ಒಂದೊಳ್ಳೆ ಸಂದೇಶದೊಂದಿಗೆ ಬೆರೆತುಕೊಳ್ಳಬೇಕಿದ್ದ ಸಿನಿಮಾ ಫ್ಯಾಮಿಲಿ ಪ್ರಾಬ್ಲಮ್ಮಿನಲ್ಲಿ ಸಿಕ್ಕು ನರಳುತ್ತದೆ; ಫಾರ್ಚುನರ್ ಹೈವೇಯಿಂದ ಗಲ್ಲಿ ಗಟಾರಗಳಿಗೆ ನುಗ್ಗುತ್ತದೆ.

ಒಟ್ಟಾರೆ ನೋಡಹೋದರೆ ದಿಗಂತನ ಈ ಹಿಂದಿನ ಸಿನಿಮಾಗಳಿಗೆ ಹೋಲಿಸಿದರೆ ತೀರಾ ಕೆಟ್ಟ ಚಿತ್ರವೇನಲ್ಲ. ಇಡೀ ಸಿನಿಮಾದಲ್ಲಿ ಆಪ್ತವೆನಿಸೋದು ದಿಂಗಂತ್ ಮತ್ತು ಸ್ವಾತಿ ಶರ್ಮಾ ನಟನೆ. ಸೋನುಗೌಡ ಪಾತ್ರ ಕೂಡಾ ಅಚ್ಚುಕಟ್ಟಾಗೇ ಇದೆ. ಸಾಫ್ಟ್‌ವೇರ್ ಮಂದಿಯ ಆತುರ, ಯಡವಟ್ಟುಗಳನ್ನು ಜೀವಂತವಾಗಿ ಕಟ್ಟಿಕೊಟ್ಟಿದ್ದಾರೆ ನಿರ್ದೇಶಕ ಮಂಜುನಾಥ್ ಅನಿವಾರ್ಯ. ಗಂಡು ಹೆಣ್ಣು ಒಟ್ಟಿಗಿದ್ದಾರೆ ಅಂದಮಾತ್ರಕ್ಕೆ ಅವರನ್ನು ಬೆಡ್ ರೂಮಿನಲ್ಲಿ ಕೂಡಿಹಾಕುವ ಸಮಾಜದ ನೀತಿಯ ಬಗೆಗೆ ಪ್ರಶ್ನೆಯೆತ್ತಿರುವುದೂ ಸಮಂಜಸವೆನಿಸುತ್ತದೆ. ಸಾಕಷ್ಟು ಕಡೆ ಸಂಭಾಷಣೆ ಕೂಡಾ ಗಮನಸೆಳೆಯುತ್ತದೆ.

ಇನ್ನೊಂದಿಷ್ಟು ಟ್ವಿಸ್ಟು ಟರ್ನುಗಳನ್ನಿಟ್ಟು, ಸ್ಥಿತಿಪ್ರಜ್ಞವಾಗಿ ಮಾಡಿದ್ದೇ ಆಗಿದ್ದಲ್ಲಿ ಒಂದೊಳ್ಳೆ ಸಿನಿಮಾ ಅನಿಸಿಕೊಳ್ಳುವ ಸಾಧ್ಯತೆ ಫಾರ್ಚೂನರ್‌ಗಿತ್ತು. ಆದರೆ ಒಂದು ಸಲ ನೋಡಿಬರಲು ಸಿನಿಮಾ ಮೋಸವಿಲ್ಲ.

Continue Reading

ಕಲರ್ ಸ್ಟ್ರೀಟ್

ನಾತಿಚರಾಮಿಎಂಬಕಾಡುವ_ಕಥೆ…

Published

on

” ಜಗತ್ತಿನ ಯಾವುದೇ ಗಂಡು ಅಥವಾ ಹೆಣ್ಣು ,ಮತ್ಯಾವುದೇ ಹೆಣ್ಣು ಅಥವಾ ಗಂಡಿನಿಂದ ಪಡೆಯಬಹುದಾದ ದೈಹಿಕ ಸುಖ ಸಾಮಾನ್ಯವಾಗಿ ಒಂದೇ ಆಗಿರುತ್ತದೆ. ಆದರೂ ನಾವು ಇಂಥವರನ್ನೇ ಪ್ರೀತಿಸಬೇಕು , ಇಂಥವರೊಟ್ಟಿಗೇ ಬದುಕಬೇಕು ಎಂಬ ಅಂಶ ಅದೆಷ್ಟು ವಿಸ್ಮಯವನ್ನುಂಟುಮಾಡಬಲ್ಲದು ಅಲ್ಲವೆ ?”

ನಾತಿಚರಾಮಿ ಸಿನಿಮಾ ನನಗೆ ಅರ್ಥವಾಗಿದ್ದು ಹೀಗೆ . ತುಂಬಾ ಪ್ರೀತಿಸಿದ ಗಂಡನ ಅಕಾಲಿಕ ಮರಣದಿಂದ ತ್ತತ್ತರಿಸಿದ ಹೆಣ್ಣೋರ್ವಳಿಗೆ ಆತನನ್ನು ಮಾನಸಿಕವಾಗಿ ಸದಾ ಜೊತೆಯಲ್ಲಿಯೇ ಇಟ್ಟುಕೊಳ್ಳಬೇಕೆಂಬ ಅಸಂಗತ ಬಯಕೆ. ಆದರೆ ವಯೋಸಹಜವಾಗಿ ದೈಹಿಕವಾದ ವಾಂಛೆಗಳು ಗಂಡೊಂದರ ‘ಸಹವಾಸ’ವನ್ನು ಸಹಜವಾಗಿಯೇ ಬಯಸುತ್ತವೆ. ಅದು ಅವಳಿಗೇನು ಅರ್ಥವಾಗದ್ದಲ್ಲ. ಆದರೆ ಸಮಾಜದ Set Pattern ಅಂತ ಒಂದಿದೆಯಲ್ಲ, ಅದಕ್ಕೆ ಅಂಜುವ ಮತ್ತು ಇದರಿಂದ ತನ್ನ ತೀರಿಹೋದ ಪ್ರೇಮಿಪತಿಗೆ ತಾನು ಅನ್ಯಾಯ ಮಾಡಿದಂತಾಗುತ್ತದೆ ಎಂಬ ಆತಂಕ ಅವಳಲ್ಲಿರುವ ಕಾರಣ ಅವಳೊಬ್ಬ ತಜ್ಞನ ಸಲಹೆಯನ್ನೂ ಪಡೆಯುತ್ತಾಳೆ. ಹೃದಯ ,ಮನಸ್ಸು ಅಂತೆಲ್ಲ ಭಾವನಾತ್ಮಕವಾಗಿರುವವಳಿಗೆ ಆತ ‘ ಹೃದಯದ ಕೆಲಸ ಕೇವಲ ರಕ್ತವನ್ನು ಪಂಪ್ ಮಾಡುವುದಷ್ಟೇ’ ಎಂದು ತಿಳಿ ಹೇಳಿ ಅವಳ Sexual Desires ಗಳು ಅನೈತಿಕವಾದವುಗಳಲ್ಲ ಆಕೆ ಅವುಗಳನ್ನು ಈಡೇರಿಸಕೊಳ್ಳಬಹುದು ಎಂಬ ಸಲಹೆ ನೀಡುತ್ತಾನೆ. ಇದೊಂದು ಮೆಟಫರಿಕ್ ವಿಧಾನವಾಗಿದ್ದು ಸಿನಿಮಾಕ್ಕೆ ಕೊಂಚ ಅಸಹಜವೆನಿಸುತ್ತದೆ ಕೂಡ.

ಈ ಸಿನಿಮಾದ ಹೀರೋ ಯಾರು ಎಂದರೆ ಅದು ‘ಕಥೆ’. ನಮ್ಮ ನಡುವಿನ ಸೂಕ್ಷ್ಮ ಬರಹಗಾರ್ತಿ ಸಂಧ್ಯಾರಾಣಿಯವರ ಈ ಕಥೆಯ ಶಕ್ತಿ ಹೇಗಿದೆ ಎಂದರೆ ನೀವು ಪಕ್ಕದಲ್ಲಿ ಕೂತಿರುವವರ ಜೊತೆ ಇದರ ಬಗ್ಗೆ ಏನನ್ನೂ ಚರ್ಚಿಸಲಾರಿರಿ.‌ಏಕೆಂದರೆ ಇದು ನಿಮ್ಮ ಮನಸ್ಸಿನೊಳಗೆ ನಡೆಯುವ ಕಥೆ. ಅಲ್ಲಿ ಹೆಣ್ಣೊಬ್ಬಳು ತನ್ನ ಮನಸ್ಸಿನ ತಳಮಳಗಳ ಬಗ್ಗೆ ಚಿಂತಿತಳಾಗಿರಬಹುದು ಆದರೆ ಅದು ಮತ್ಯಾವುದೋ ಗಂಡಸಿನದ್ದೂ ಆಗಿರಬಹುದು. ಒಂದು ಆ್ಯಪ್ ಮೂಲಕ ತನ್ನ ವಾಂಛೆಯನ್ನು ಈಡೇರಿಸಿಕೊಳ್ಳಲು ಹೊರಟವಳಿಗೆ ಅದು ಸಾಧ್ಯವಾಗುವುದಿಲ್ಲ. ಕೊನೆಗೆ ಮತ್ತೊಬ್ಬನ ಪರಿಚಯ ನಿಧಾನಕ್ಕೆ ಸಲುಗೆಗೆ ತಿರುಗಿದ ಮೇಲೆ ನಿರ್ಭಿಡೆಯಿಂದ Physical pleasure ನ ಬೇಡಿಕೆ ಇಡುವ ಆಕೆಗೆ ಅವನು ಹೇಳುವ ‘ನಿಮ್ಮನ್ನು ಒಳ್ಳೆಯ ಮನೆತನದ ಹುಡುಗಿ ಅಂದುಕೊಂಡಿದ್ದೆ’ ಎಂಬ ಮಾತು ಘಾಸಿಗೊಳಿಸುತ್ತದೆ. ನೇರವಾಗಿ ತನ್ನ ಲೈಂಗಿಕಾಸಕ್ತಿಯನ್ನು ಹೇಳುವುದು ,ಅದರಲ್ಲೂ ಓರ್ವ ಹೆಣ್ಣು ಹೀಗೆ ಹೇಳಿದಾಗ ಅವಳನ್ನು ನೋಡುವ ರೀತಿಯನ್ನು ಜನರಲೈಸ್ ಮಾಡಲಾಗಿದೆ . ಆದರೆ ಇದನ್ನು ಓರ್ವ ಗಂಡು ಕೇಳಿದಾಗ ಮತ್ಯಾವ ರೀತಿಯಲ್ಲಿ ನೋಡಲಾಗುತ್ತದೆ ಎಂಬುದಕ್ಕೆ ನಾಯಕಿ ತನ್ನ ಆಫೀಸ್ ನಲ್ಲಿ ಸಹೋದ್ಯೋಗಿಯೊಬ್ಬ ಅಂಥದ್ದೇ ಬೇಡಿಕೆಯಿಟ್ಟಾಗ ನಾಯಕಿ ನಡೆದುಕೊಳ್ಳುವ ರೀತಿ ಕನ್ನಡಿ ಹಿಡಿಯುತ್ತದೆ. ಇದನ್ನು ಒಪ್ಪುವುದು ಕಷ್ಟ.‌ಲೈಂಗಿಕಾಸಕ್ತಿಯನ್ನು ಗಂಡು ಹೆಣ್ಣಿನ ದೃಷ್ಟಿಯಲ್ಲಿ ವಿಭಿನ್ನವಾಗಿ ನೋಡಹೋದರೆ ಸಿನಿಮಾದ ಆಶಯಕ್ಕೆ ಅದು ಹೊಂದುವುದಿಲ್ಲ ಎಂಬುದನ್ನು ನಿರ್ದೇಶಕರು ಗಮನಿಸಬಹುದಿತ್ತು. ಆದರೆ ದೈಹಿಕ ಸುಖದ ಆಸೆಯನ್ನು ಯಾರೆಂದರಲ್ಲಿ ತೀರಿಸಿಕೊಳ್ಳಲಾಗದು ಅದಕ್ಕೊಂದು ಸ್ನೇಹ -ಸಲುಗೆ ಕೂಡ ಅಗತ್ಯ ಎಂಬುದನ್ನು ಹೇಳಲು ಹೀಗೆ ದೃಶ್ಯ ಕಟ್ಟಲಾಗಿದೆ ಎಂದೆನ್ನಿಸುತ್ತದೆ. ಕೇವಲ ಲೈಂಗಿಕಾಸಕ್ತಿಗಾಗಿ ಸ್ನೇಹ ಕಳೆದುಕೊಳ್ಳಲು ಇಚ್ಛಿಸದ ಅವರಿಬ್ಬರೂ ‘ Glad that we spoke again ‘ ಎಂದು ಹೇಳಿದಾಗ ಅದು ಸ್ಪಷ್ಟವಾಗುತ್ತದೆ.

ಸಂಚಾರಿ ವಿಜಯ್ ಅವರ ಪಾತ್ರ ಸಿನಿಮಾಕ್ಕೆ ಅನೇಕ ಆಯಾಮಗಳನ್ನು ನೀಡುವಂಥದ್ದು . ಮನೆಯಲ್ಲಿನ ಹೆಂಡತಿಯನ್ನು ನಿಕೃಷ್ಟವಾಗಿ ಕಾಣುವ ಆ ಪಾತ್ರ ಹೊಸದಾಗಿ ಸಂಪಾದಿಸಿದ ಹೆಣ್ಣೋರ್ವಳ ಸ್ನೇಹದಲ್ಲಿ ತನ್ಮಯತೆಯನ್ನು ಅನುಭವಿಸುತ್ತದೆ. ಹಾಗಂತ ಅವಳನ್ನು ದೈಹಿಕವಾಗಿ ಎಂದೂ ಬಯಸಿದ್ದಲ್ಲ . ಆದರೆ ಅವಳಾಗಿಯೇ ಆ ಅಭಿಲಾಷೆಯನ್ನು ವ್ಯಕ್ತಪಡಿಸಿದ ನಂತರ ಮನಸ್ಸು ಚಂಚಲಗೊಂಡು ಆ ಕಡೆ ವಾಲುತ್ತದೆ. ಒಂದು ಸಣ್ಣ ಸುಳಿವನ್ನೂ ಕೊಡದೆ ತನ್ನ ಮುಗ್ದ ಹೆಂಡತಿಯನ್ನು ವಂಚಿಸಿ ಆಕೆಯೊಂದಿಗೆ ಸುಖಿಸಲು ತಯಾರಾಗುವ ಆ ಪಾತ್ರ ಕೆಲವು ಪ್ರೇಕ್ಷಕರನ್ನಾದರೂ ‘ಆತ್ಮನಿಂದನೆಯಿಂದ ನಾಲಗೆ ಕಚ್ಚಿಕೊಳ್ಳುವಂತೆ ಮಾಡದೇ ಇರದು. ಆದರೆ ಅದನ್ನು ಯಾರೂ ಹೇಳಿಕೊಳ್ಳಲಾರರೇನೋ. ಒಂದೆಡೆ ಇಲ್ಲದ ಗಂಡನನ್ನು ಈಗಲೂ ಫ್ಯಾಂಟಸಿಯಂತೆ ಪ್ರೀತಿಸುವ ನಾಯಕಿ ಇದ್ದರೆ ,ಮತ್ತೊಂದಡೆ ಇನ್ನಿಲ್ಲದಂತೆ ತನ್ನ ಗಂಡನನ್ನು ಪ್ರೀತಿಸುವ ಸುರೇಶನ ಹೆಂಡತಿಗೆ ತಕ್ಕ ಪ್ರೀತಿ ಮತ್ತು ಸುಖ ಸಿಗದೆ ಇರುವುದು ವೈರುಧ್ಯವೇ ಸರಿ. ಇನ್ನು ಈ ಎರಡೂ ಮನೆಗಳಿಗೆ ಕೆಲಸಕ್ಕೆ ಬರುವ ಹೆಣ್ಣಿನದು ಇಬ್ಬರಿಗೂ ಪಾಠ ಹೇಳಬಹುದಾದಂಥ ಜೀವನ . ಹೀಗೇ ಬರೆಯುತ್ತಲೇ ಹೋಗಬಹುದು…

ಈ ಕಥೆಯನ್ನು ಪರಿಣಾಮಕಾರಿಯಾಗಿ ಸಿನಿಮಾ ಆಗಿಸುವಲ್ಲಿ ನಿರ್ದೇಶಕ ಮಂಸೋರೆ ಗೆದ್ದಿದ್ದಾರೆ ಎಂಬುದರಲ್ಲಿ ಎರಡು ಮಾತಿಲ್ಲ. ಕಥಾ ಚೌಕಟ್ಟಿಗೆ ಬೇಕಾದ ದೃಶ್ಯ ಮತ್ತು ಸಂಭಾಷಣೆಗಳ ಮೂಲಕ ಸರಾಗವಾಗಿ , ಸಾವಕಾಶವಾಗಿ ಕಥೆಯನ್ನು ಪ್ರೇಕ್ಷಕನ ಎದೆಗೆ ದಾಟಿಸುತ್ತಾರೆ. ಅಲ್ಲಲ್ಲಿ ನಿಧಾನ ಎನ್ನಿಸಲು ಬದುಕು ಯಾವಾಗಲೂ ಓಡದೆ ಕೆಲವೊಮ್ಮೆ ಕುಂಟುವುದೇ ಕಾರಣ. ಇಡೀ ಕಥೆಯನ್ನು ನಮ್ಮಲ್ಲಿ ಕಟ್ಟುವಂತೆ ಮಾಡುವುದು ಸಂಗೀತ.

ಇಡೀ ಸಿನಿಮಾವನ್ನು ಆವರಿಸಿರುವ ಶೃತಿ ಹರಿಹರನ್ ಅವರದ್ದು ಆ ಪಾತ್ರಕ್ಕೆ ಹೊಂದುವ ಮನೋಜ್ಞ ಅಭಿನಯ. ಸಿನಿಮಾದಲ್ಲಿ ತನ್ನ ಲೈಂಗಿಕ ಆಸಕ್ತಿಯನ್ನು ಹೇಳಿಕೊಂಡಾಗ ಆ ಪಾತ್ರಕ್ಕೆ ಎದುರಾಗುವ ಸಂಕಟ ಒಂದು ರೀತಿಯದ್ದಾದರೆ ,ಆಕೆ ಲೈಂಗಿಕ ಕಿರುಕುಳಕ್ಕೆ ಒಳಗಾದೆ ಎಂದು ದೂರಿದ್ದರ ಪರಿಣಾಮವಾಗಿ ಸಾಕಷ್ಟು ಟೀಕೆಯನ್ನು ಎದುರಿಸಬೇಕಾಯಿತು ಎಂಬುದರಲ್ಲಿಯೇ ಈ ಸಿನಿಮಾದ ಪ್ರಸ್ತುತೆಯೂ ಇದೆ.

ಇಂತಹ ಸೂಕ್ಷ್ಮ ಮತ್ತು ದಿಟ್ಟ ಕಥೆಯನ್ನು ಸಿನಿಮಾ ಮಾಡುವ ಧೈರ್ಯ ತೋರಿದ ನಿರ್ಮಾಪಕರ, ನಿರ್ದೇಶಕರಿಬ್ಬರೂ ಅಭಿನಂದನಾರ್ಹರು. ಆದರೆ ಚಿತ್ರಕ್ಕೆ ‘ನಾತಿಚರಾಮಿ’ ಎಂಬ ಯಾರಿಗೂ ಸುಲಭವಾಗಿ ಅರ್ಥವಾಗದ ಅಥವಾ ಉಚ್ಚರಿಸಲೂ ಕಷ್ಟವಾಗುವಂಥ ಕ್ಲಿಷ್ಟವಾದ ಹೆಸರಿಡುವ ಅವಶ್ಯಕತೆ ಇರಲಿಲ್ಲ ಎಂದು ನನಗನ್ನಿಸುತ್ತದೆ. ಪ್ರೇಕ್ಷಕರನ್ನು ಲಿಮಿಟ್ ಮಾಡಿಕೊಳ್ಳುವುದೇ ಇಂತಹ ಅಂಶಗಳಿಂದ.

ಪ್ರೇಮವೋ -ಕಾಮವೋ? ದೇಹವೋ-ಮನಸ್ಸೋ ? ನೈತಿಕವೋ – ಅನೈತಿಕವೋ ?
ವಿವಾಹವೋ – ವಿವಾಹೇತರವೋ ?
ಸ್ವತಂತ್ರವೋ- ಸ್ವೇಚ್ಛೆಯೋ ?
ಇವುಗಳನ್ನೆಲ್ಲ ಶೋಧಿಸುವುದರೊಳಗೆ ಮುಪ್ಪು ಬಾಗಿಲು ತಟ್ಟಿರುತ್ತದೆ ಎಂಬುದು ಬೇರೆ ಮಾತು…

ಅದೇನೋ ಗೊತ್ತಿಲ್ಲ ಕೆ.ಜಿ.ಎಫ್. ಸಿನಿಮಾ ‘ ಆ ದಿನಗಳು’ ಸಿನಿಮಾದ ಹಾಗೆ ಕಾಡಲಿಲ್ಲ. ಹಾಗೆಯೇ ‘ಆ ದಿನಗಳು’ ಎಂಬ ಸಿನಿಮಾ ‘ ನಾತಿಚರಾಮಿ’ ಹಾಗೆ ಕಾಡುವುದಿಲ್ಲ. ಆದರೆ ಮೂರೂ ರೀತಿಯ ಸಿನಿಮಾಗಳನ್ನು ನಾನು ನೋಡುತ್ತೇನೆ ಮತ್ತು ವಿಮರ್ಶಿಸಿಕೊಳ್ಳುತ್ತೇನೆ.

ವರ್ಷಾಂತ್ಯದಲ್ಲಿ ನೀವೂ ಈ ಸಿನಿಮಾ ನೋಡಿ ಮತ್ತು ಕಾಡಿಸಿಕೊಳ್ಳಿ…

– ಶಿವಕುಮಾರ್ ಮಾವಲಿ

Continue Reading

ಪ್ರಚಲಿತ ವಿದ್ಯಮಾನ

ಪರದೇಸಿ ಕೇರಾಫ್ ಲಂಡನ್: ಪಕ್ಕಾ ಫ್ಯಾಮಿಲಿ ಎಂಟರ್‌ಟೈನರ್!

Published

on


ಒಂದು ಯಶಸ್ವೀ ಚಿತ್ರ ನೀಡಿದ ಜೋಡಿ ಮತ್ತೆ ಒಂದಾದಾಗ ನಿರೀಕ್ಷೆಗಳು ಗರಿಗೆದರೋದು ಸಹಜ. ಅದರಂತೆಯೇ ರಾಜ ಲವ್ಸ್ ರಾಧೆ ಚಿತ್ರದ ಮೂಲಕ ಗೆಲುವು ದಾಖಲಿಸಿದ್ದ ರಾಜಶೇಖರ್ ಮತ್ತು ವಿಜಯ್ ರಾಘವೇಂದ್ರ ಕಾಂಬಿನೇಷನ್ನಿನ ಎರಡನೇ ಚಿತ್ರ ಪರದೇಸಿ ಕೇರಾಫ್ ಲಂಡನ್ ಬಗ್ಗೆಯೂ ಅಂಥಾದ್ದೇ ಕುತೂಹಲವಿತ್ತು. ಅದೆಲ್ಲವೂ ಈಗ ತಣಿದಿದೆ. ಆರಂಭದಿಂದಲೂ ಸುದ್ದಿಯಲ್ಲಿದ್ದ ಈ ಚಿತ್ರವೀಗ ಅದ್ದೂರಿಯಾಗಿಯೇ ಬಿಡುಗಡೆಗೊಂಡಿದೆ.

ನಿರ್ದೇಶಕ ರಾಜಶೇಖರ್ ಪರದೇಸಿ ಕೇರಾಫ್ ಲಂಡನ್ ಚಿತ್ರವನ್ನು ಪಕ್ಕಾ ಫ್ಯಾಮಿಲಿ ಎಂಟರ್‌ಟೈನರ್ ಆಗಿ ಕಟ್ಟಿ ಕೊಟ್ಟಿದ್ದಾರೆ. ಮಜವಾದೊಂದು ಕಥೆ, ಅದಕ್ಕೆ ತಕ್ಕುದಾದ ಪಾತ್ರಗಳು, ಎಲ್ಲಿಯೂ ಕುತೂಹಲ ಕಳೆದುಕೊಳ್ಳದ ಚುರುಕಿನ ನಿರೂಪಣೆ ಮತ್ತು ಭರ್ಜರಿ ಮನರಂಜನೆ… ಇವಿಷ್ಟೂ ವಿಚಾರಗಳನ್ನು ಹದವಾಗಿ ಬೆರೆಸಿ ಮುದಗೊಳ್ಳುವಂಥಾ ಚಿತ್ರವನ್ನು ರಾಜಶೇಖರ್ ಕಟ್ಟಿ ಕೊಟ್ಟಿದ್ದಾರೆ.

ಜ್ಯೂನಿಯರ್ ಆರ್ಟಿಸ್ಟ್ ರಾಮು ಪಾತ್ರಕ್ಕೆ ವಿಜಯ್ ರಾಘವೇಂದ್ರ ಜೀವ ತುಂಬಿದ್ದಾರೆ. ಅವರ ಗೆಳೆಯನಾಗಿ ಪ್ರಶಾಂತ್ ಸಿದ್ಧಿ ನಟಿಸಿದ್ದಾರೆ. ಈ ರಾಮು ಮತ್ತು ಗೆಳೆಯ ಡಾಬಾದಲ್ಲಿ ಪೊಲಿ ಗ್ಯಾಂಗಿನ ಸೆರೆಯಲ್ಲಿ ನರಳುತ್ತಿರೋ ನಾಯಕಿಯನ್ನು ಬಡಿದಾಡಿ ಬಡಿಸಿಕೊಳ್ಳುವಲ್ಲಿಂದ ಕಥೆ ತೆರೆದುಕೊಳ್ಳುತ್ತೆ. ಆದರೆ ಆ ಬಡಿದಾಟದಲ್ಲಿ ಪೋಲಿಗಳ ಲೀಡರ್‌ಗೆ ಯಾವ ನೆನಪೂ ಉಳಿಯದ ರೇಂಜಿಗೆ ವಾಂಚಿ ಬಿಟ್ಟಿರುತ್ತಾರೆ. ಇದೇ ಹೊತ್ತಲ್ಲಿ ಲಾಯ್ರ್ ಒಬ್ಬನಿಗೂ ಚಮ್ಕಾಯಿಸಿರುತ್ತಾರೆ. ಇದಾದ ನಂತರವೂ ಇವರಿಬ್ಬರು ಅವಕಾಶ ಸಿಕ್ಕಾಗ ಜ್ಯೂನಿಯರ್ ಆರ್ಟಿಸ್ಟ್ ಆಗಿ ಚಿತ್ರೀಕರಣದಲ್ಲಿ ಭಾಗಿಯಾದರೆ ಅತ್ತ ಆ ಪೋಲಿಗಳ ಲೀಡರ್ ಅಣ್ಣ ತನ್ನ ತಮ್ಮನ ನೆನಪಿನ ಶಕ್ತಿಯನ್ನೇ ಕಿತ್ತುಕೊಂಡವರಿಗಾಗಿ ಹುಡುಕಾಟ ಆರಂಭಿಸಿರುತ್ತಾನೆ. ಆ ನಂತರ ಹಲವಾರು ಟ್ವಿಸ್ಟುಗಳೊಂದಿಗೆ ಮುಂದುವರೆಯುತ್ತೆ.

ತಾನು ಹೊಡೆದ ರಾಡಿಯ ಅಣ್ಣ ಅಟ್ಯಾಕ್ ಮಾಡಿದಾಗ ರಾಮು ಮತ್ತವನ ಗೆಳೆಯ ತತ್ತರಿಸಿರುವಾಗಲೇ ತಾವೇ ರಕ್ಷಿಸಿದ ಹುಡುಗಿಯ ಎಂಟ್ರಿ. ಅನಿರೀಕ್ಷಿತ ಭೇಟಿ. ತನ್ನನ್ನು ರಕ್ಷಿಸಿದ ಕೃತಜ್ಞತೆಗಾಗಿ ಆಕೆ ಇವರಿಗೆ ತನ್ನದೇ ಮನೆಯಲ್ಲಿ ಠಾವು ಕೊಡುತ್ತಾಳೆ. ಆದರೆ ಅಲ್ಲೂ ಒಂದು ಫಜೀತಿ. ಅದಾಗಲೇ ಚಮ್ಕಾಯಿಸಿದ್ದ ಲಾಯರ್ ಈ ಹುಡುಗಿಯ ಅಪ್ಪನೆಂಬೋ ಮರ್ಮಾಘಾತ. ಆದರೆ ಲಾಯರ್ ರಾಮುವನ್ನು ಕ್ಷಮಿಸೋದರೊಂದಿಗೆ ಒಂದು ಜವಾಬ್ದಾರಿಯನ್ನೇ ಹೆಗಲಿಗೆ ಹಾಕುತ್ತಾನೆ. ಅದು ಶಿವಪುರ ಗ್ರಾಮ ಪಂಚಾಯ್ತಿ ಸದಸ್ಯ ಕೆಂಚೇಗೌಡನಿಗೆ ಲಂಡನ್ನಿನಿಂದ ಬಂದ ಆತನ ತಂಗಿ ಮಗ ವಿಜಯ್ ಅಂತ ಸುಳ್ಳು ಹೇಳಿ, ಆತನ ಮನೆ ಸೇರಿಕೊಳ್ಳೋ ಟಾಸ್ಕು!

ಲಾಯರ್ ಹಾಗೊಂದು ಜವಾಬ್ದಾರಿಯನ್ನ ರಾಮುಗೆ ವಹಿಸಿದ್ದೇಕೆ? ಅದರ ಹಿಂದಿರೋ ಮರ್ಮವೇನು. ಸುಳ್ಳು ಹೇಳಿದ್ದಲ್ಲದೇ ಕೆಂಚೇಗೌಡನ ಮಗಳೊಂದಿಗೇ ಲವ್ವಲ್ಲಿ ಬಳೋ ನಾಯಕ ಅದೆಲ್ಲವನ್ನು ದಕ್ಕಿಸಿಕೊಳ್ಳುತ್ತಾನಾ ಎಂಬುದೆಲ್ಲ ಅಸಲೀ ಕುತೂಹಲ. ಅದನ್ನು ನಾನಾ ಟ್ವಿಸ್ಟುಗಳೊಂದಿಗೆ ರೋಚಕವಾಗಿಯೇ ರಾಜಶೇಖರ್ ತೆರೆದಿಟ್ಟಿದ್ದಾರೆ.

ವಿಜಯ್ ರಾಘವೇಂದ್ರ ಈ ಪಾತ್ರದಲ್ಲಿ ಬೇರೆಯದ್ದೇ ಶೇಡಿನಲ್ಲಿ ಪ್ರೇಕ್ಷಕರನ್ನು ತಲುಪಿಕೊಂಡಿದ್ದಾರೆ. ಅವರದ್ದು ತನ್ಮಯರಾದಂಥಾ ನಟನೆ. ಇನ್ನುಳಿದಂತೆ ಪ್ರಶಾಂತ್ ಸಿದ್ಧಿ, ರಂಗಾಯಣ ರಘು, ಶೋಭರಾಜ್ ಸೇರಿದಂತೆ ಎಲ್ಲರೂ ತಂತಮ್ಮ ಪಾತ್ರಗಳನ್ನು ಲೀಲಾಜಾಲವಾಗಿ ನಿಭಾಯಿಸಿದ್ದಾರೆ. ಸಂಗೀತ, ಛಾಯಾಗ್ರಹಣ ಸೇರಿದಂತೆ ಎಲ್ಲವೂ ಕಥೆಗೆ ಪೂರಕವಾಗಿವೆ.

Continue Reading

Trending

Copyright © 2018 Cinibuzz