Connect with us

ಸಿನಿಮಾ ವಿಮರ್ಶೆ

ನೀವಂದ್ಕೊಂಡಂಗೆ ಏನೂ ಇಲ್ಲಣ್ಣೊ!

Published

on

ದಿ ವಿಲನ್: ಎಲ್ಲ ರಸಗಳನ್ನೂ ಬೆರೆಸಿ ತಯಾರಿಸಿದ ಪ್ರೇಮ್‌ಮೇಡ್ ಕಷಾಯ!
ಪ್ರೇಮ್ ನಿರ್ದೇಶನದ ದಿ ವಿಲನ್ ಚಿತ್ರ ಥೇಟು ಗಜಪ್ರಸವದ ಮಾದರಿಯಲ್ಲಿಯೇ ಕಡೆಗೂ ಬಿಡುಗಡೆಯಾಗಿದೆ. ಒಂದು ಚಿತ್ರ ಆರಂಭಿಸಿದರೆಂದರೆ ಮೊದಲು ಪ್ರಚಾರ ಆಮೇಲೆ ಕೆಲಸ ಎಂಬ ಸೂತ್ರವನ್ನೇ ನೆಚ್ಚಿಕೊಂಡು ಬಂದಿರೋ ಪ್ರೇಮ್ ಈ ಚಿತ್ರದಲ್ಲಿಯೂ ಅದನ್ನೇ ಮುಂದುವರೆಸಿದ್ದರು. ಆದರೆ ಪ್ರೇಕ್ಷಕರ ಅಸಹನೆಯನ್ನೂ ಕಡೇ ಘಳಿಗೆಯಲ್ಲಿ ಕೊತ ಕೊತನೆ ಕುಡಿಯುವ ಕುತೂಹಲವಾಗಿಸಿದ್ದ ಪ್ರೇಮ್ ಜಾಣ್ಮೆ ಎಂಬುದರಲ್ಲಿ ಎರಡು ಮಾತಿಲ್ಲ. ಸುದೀಪ್ ಮತ್ತು ಶಿವಣ್ಣ ಈ ಇಬ್ಬರಲ್ಲಿ ಯಾರು ರಾಮ ಮತ್ತು ಯಾರು ರಾವಣ ಎಂಬುದಕ್ಕೆ ಇದೀಗ ಉತ್ತರ ಸಿಕ್ಕಿದೆ!

ಪ್ರೇಮ್ ಚಿತ್ರವೆಂದ ಮೇಲೆ ಹಳ್ಳಿ ಚಿತ್ರಣ, ಮದರ್ ಸೆಂಟಿಮೆಂಟ್ ಇರೋದು ವಾಡಿಕೆ. ಈ ಚಿತ್ರವೂ ಕೂಡಾ ಹಳ್ಳಿಯೊಂದರ ನಾಟಕ ಪ್ರದರ್ಶನದ ಮೂಲಕವೇ ತೆರೆದುಕೊಳ್ಳುತ್ತೆ. ಈ ಚಿತ್ರಣದಲ್ಲಿ ಶಿವಣ್ಣ ಹಳ್ಳಿಗಾಡಿನ ರಾಮನಾಗಿ ಕಾಣಿಸಿಕೊಂಡಿದ್ದಾರೆ. ಆ ತಾಯಿಗೆ ತನ್ನ ಮಗ ರಾಮ ಶ್ರೀರಾಮ ಚಂದ್ರನಂತೆಯೇ ಬಾಳಿ ಬದುಕಬೇಕೆಂಬೋ ಆಸೆ. ಆದ್ದರಿಂದ ರಾಮನ ಆದರ್ಶಗಳನ್ನೇ ಧಾರೆ ಎರೆದು ಬೆಳೆಸುತ್ತಾಳೆ. ಆದರೆ ವಿಪರೀತ ನಾಟಕದ ಹುಚ್ಚಿನ ರಾಮನ ಜನ್ಮದಾತನಿಗೆ ರಾವಣನ ಮೇಲೆ ಬಲು ಪ್ರೀತಿ. ನಾಟಕದಲ್ಲಿಯೂ ಪಟ್ಟು ಹಿಡಿದು ರಾವಣನಾಗೋ ಗಂಡನ ಮೇಲೆ ರಾಮನ ತಾಯಿಗೆ ಕೆಂಡದಂಥಾ ಸಿಟ್ಟು. ಕಡೆಗೂ ಆಕೆ ತನ್ನ ಗಂಡ ನಾಟಕದಲ್ಲಿ ಧರಿಸಿ ಮೆರೆಯುವ ರಾವಣ ಕಿರೀಟಕ್ಕೆ ಬೆಂಕಿಯಿಡುತ್ತಾಳೆ. ಆ ಬೆಂಕಿಯ ಜೊತೆಗೇ ಅಸಲೀ ಕಥಾನಕ ತೆರೆದುಕೊಳ್ಳುತ್ತೆ!

ಅವ್ವನ ರಾಮನಾಮಸ್ಮರಣೆಯನ್ನೇ ಕಿವಿಗೆ ಎರಕ ಹೊಯ್ದುಕೊಂಡಂತೆ ಬೆಳೆದ ರಾಮನ ಕತ್ತಿನಲ್ಲೊಂದು ಬೆಳ್ಳಿಯ ಸರ. ಆದರೆ ರಾಮ ಒಂದು ಫೈಟಿಂಗ್ ಸೀನಿನಲ್ಲಿದ್ದಾಗ ಆ ಸರ ಮಾಯವಾಗುತ್ತೆ. ಹಾಗೆ ಮಾಯವಾದ ಸರದ ಫ್ಲ್ಯಾಶ್ ಬ್ಯಾಕ್ ಸ್ಟೋರಿಯಲ್ಲಿ ಕೈಸರ್ ರಾಮ್ ಆಗಿ ಸುದೀಪ್ ಭರ್ಜರಿ ಎಂಟ್ರಿ ಕೊಡುತ್ತಾರೆ. ರಾಮ ಕೈಸರ್ ರಾಮನ ಬೆಂಬಿದ್ದು, ಬಡಿದಾಟವಾಗಿ, ಅದಕ್ಕೊಂದು ಉಪಕಥೆ, ಆ ಕಥೆಗೆ ಮತ್ತೊಂದು ಕೊಂಬೆ ಕೋವೆ… ಬಹುಶಃ ನಿರ್ದೇಶಕ ಪ್ರೇಮ್ ಎರಡು ವರ್ಷಗಳ ಕಾಲ ಯಾವುದ್ಯಾವುದೋ ಕಥೆಯನ್ನು ಚೆನ್ನಾಗಿ ಕಲೆಸಿ, ಕಲಸುಮೇಲೋಗರ ಮಾಡಿ ದೃಷ್ಯ ಕಟ್ಟಿದ್ದಾರೇನೋ ಎಂಬ ಸಂಶಯ ಮೂಡುವಂತೆ ಗೋಜಲಿನ ವಾತಾವರಣವೂ ಸೃಷ್ಟಿಯಾಗುತ್ತೆ.

ಥ್ರ್ರಿಲ್ಲರ್, ಆಕ್ಷನ್ ಮತ್ತು ಸೆಂಟಿಮೆಂಟುಗಳನ್ನು ಸೇರಿಸಿ ಪ್ರೇಮ್ ಕಥೆ ಹೊಸೆದಿದ್ದಾರೆ. ಅದು ಪ್ರೇಕ್ಷಕರಿಗೆ ಅಲ್ಲಲ್ಲಿ ಕಾಮಿಡಿ ಮತ್ತು ಹಾರರ್ ಅನುಭವವನ್ನೂ ನೀಡೋದು ಈ ಚಿತ್ರದ ಹೆಚ್ಚುಗಾರಿಕೆಯೋ, ಕೊರತೆಯೋ ಎಂಬ ಗೊಂದಲವೂ ಕಾಡುತ್ತೆ. ಆದರೆ ಕಥೆ ಸಿಕ್ಕಿನಾಚೆಗೆ ಇಡೀ ಚಿತ್ರವನ್ನು ಪ್ರೇಮ್ ರಿಚ್ ಆಗಿ ಕಟ್ಟಿಕೊಟ್ಟಿದ್ದಾರೆಂಬುದರಲ್ಲಿ ಎರಡು ಮಾತಿಲ್ಲ. ರಾಮ ಮತ್ತು ಕೈಸರ್ ರಾಮ್ ಪಾತ್ರದಲ್ಲಿ ಶಿವಣ್ಣ ಮತ್ತು ಸುದೀಪ್ ಅಕ್ಷರಶಃ ವಿಜೃಂಭಿಸಿದ್ದಾರೆ. ಅವರಿಬ್ಬರದ್ದೂ ಪರಕಾಯ ಪ್ರವೇಶ. ಅವರ ಬಾಯಿಂದ ಹೊರ ಬೀಳೋ ಪ್ರತೀ ಡೈಲಾಗುಗಳಿಗೂ ಶಿಳ್ಳೆ ಕೇಕೆಗಳು ಮೊರೆಯುತ್ತವೆ. ಆದರೆ ಪ್ರೇಮ್ ವ್ಯಕ್ತಿತ್ವದಂತೆಯೇ ಗಡಿಬಿಡಿ, ಗಜಿಬಿಜಿಗಳೇ ಕಥೆಯ ವಿಚಾರದಲ್ಲಿ ಮಿಜಿಗುಡುತ್ತವೆ. ಇಡೀ ಸಿನಿಮಾ ನೋಡಿದಾಗ ಸುದೀಪ್ ಪಾತ್ರಕ್ಕೆ ಹೆಚ್ಚು ಸ್ಕೋಪ್ ನೀಡಲಾಗಿದೆಯಾ ಎಂದು ಅನಿಸದೇ ಇರದು. ಹಾಗೆ ನೋಡಿದರೆ ಒಂದು ಸಣ್ಣ ಎಳೆಯಲ್ಲಿ ಸಲೀಸಾಗಿ ಹೇಳಿಬಿಡಬಹುದಾಗಿದ್ದ ಕತೆಯನ್ನು ರೋಚಕಗೊಳಿಸುವ ಉಮೇದಿಗೆ ಬಿದ್ದು ಎಲ್ಲಿಂದ ಎಲ್ಲಿಗೋ ಟ್ರಾವೆಲ್ ಮಾಡಿಸಿದ್ದಾರೆ. ಬ್ರಿಟಿಷರು ಭಾರತವನ್ನು ಆಳಿದ್ದ ಸೇಡಿಗೆ ಒಬ್ಬ ವ್ಯಕ್ತಿ ಇಡೀ ಬ್ರಿಟಿಷ್ ಸಾಮ್ರಾಜ್ಯವನ್ನೇ ಅಲ್ಲಾಡಿಸಲು ಅಂಡರ್ ವರ್ಲ್ಡ್ ಡಾನ್ ರೂಪದಲ್ಲಿ ಎದ್ದುನಿಲ್ಲೋದನ್ನು ನಿಜಕ್ಕೂ ಹಾಸ್ಯಾಸ್ಪದವಾಗಿದೆ!

ಎಲ್ಲಾ ರಸಗಳನ್ನೂ ಒಂದೇ ಚಿತ್ರದಲ್ಲಿ ಸೇರಿಸಿದರೆ ರುಚಿಯಾದ ರಸಾಯನವೇ ಆಗುತ್ತದೆಂದೇನೂ ಗ್ಯಾರಂಟಿಯಿಲ್ಲ. ಅದು ಒಗರೊಗರು ಕಷಾಯವಾಗೋ ಅಪಾಯವೂ ಇದೆ. ಆ ಅಪಾಯವನ್ನು ಪ್ರೇಮ್ ಮನಗಂಡಿಲ್ಲ ಎಂಬುದೇ ಈ ಚಿತ್ರದ ದೊಡ್ಡ ಹಿನ್ನಡೆ. ಶಿವಣ್ಣ ಮತ್ತು ಸುದೀಪ್ ಪಾತ್ರಗಳ ಖದರ್ ಇಡೀ ಕಥೆಯಲ್ಲಿಯೂ ಇದ್ದಿದ್ದರೆ, ಹುಟ್ಟಿಕೊಂಡಿದ್ದ ಕ್ರೇಜಿನಲ್ಲಿ ವಿಲನ್ ಎಲ್ಲಿಯೋ ಹೋಗಿ ಬಿಡುತ್ತಿದ್ದ. ಆದರೆ ವಿಲನ್ನು ನಿರ್ದೇಶಕ ಪ್ರೇಮ್ ಗಡಿಬಿಡಿಯ ನಡುವೆ ಅಕ್ಷರಶಃ ಬಸವಳಿದಿದ್ದಾನೆ!

ಫೈನಲಿ, ಇಡೀ ಕಥೆ ಮದರ್ ಸೆಂಟಿಮೆಂಟಿನಲ್ಲಿ ವಿಲೀನವಾಗುತ್ತದೆ. ಅದನ್ನು ನೋಡುಗರ ಕಣ್ಣಾಲಿಗಳು ತುಂಬಿ ಬರುವಂತೆ ಶಶಕ್ತವಾಗಿಯೂ ಪ್ರೇಮ್ ರೂಪಿಸಿದ್ದಾರೆ. ಆದರೆ ಕಣ್ಣುಗಳು ಹನಿಗೂಡಿದ್ದು ಮೂರು ಘಂಟೆ ಚಿತ್ರ ನೋಡಿದ ಪರಿಣಾಮದಿಂದಲಾ, ಅಥವಾ ಅದಕ್ಕೆ ಕ್ಷೈಮ್ಯಾಕ್ಸ್ ಕಾರಣವಾ ಎಂಬ ಯಕ್ಷ ಪ್ರಶ್ನೆ ಪ್ರೇಕ್ಷಕರನ್ನು ಕಾಡುತ್ತದೆ. ಇದೆಲ್ಲದರಾಚೆಗೆ ಇಡೀ ಚಿತ್ರವನ್ನು ಅದ್ದೂರಿಯಾಗಿ ರೂಪಿಸೋ ಪ್ರೇಮ್ ಹಂಬಲ ಎದ್ದು ಕಾಣಿಸುತ್ತೆ. ಕೆಲವೆಡೆ ಅದರಲ್ಲವರು ಯಶಸ್ವಿಯೂ ಆಗುತ್ತಾರೆ. ಗಿರೀಶ್ ಗೌಡ ಛಾಯಾಗ್ರಹಣವೂ ಚೇತೋಹಾರಿಯಾಗಿದೆ. ಮಳವಳ್ಳಿ ಸಾಯಿಕೃಷ್ಣರ ಸಂಭಾಷಣೆಯಲ್ಲೂ ಖದರ್ ಇದೆ. ಅರ್ಜುನ್ ಜನ್ಯಾ ಸಂಗೀತದ ಹಾಡುಗಳೂ ಚಿತ್ರಕ್ಕೆ ಪೂರಕವಾಗಿ ಇಷ್ಟವಾಗುತ್ತವೆ.

ಆದರೆ ಎಲ್ಲಾ ಇದೆ, ಮತ್ತೇನೋ ಇಲ್ಲ ಎಂಬ ಗೊಂದಲದ ಛಾಯೆಯೊಂದು ಕ್ಲೈಮ್ಯಾಕ್ಸ್ ಜೊತೆಗೇ ಪ್ರೇಕ್ಷಕರ ಮನಸಿಗೂ ಇಳಿದುಕೊಳ್ಳುತ್ತೆ ಎಂಬಲ್ಲಿಗೆ ವಿಲನ್ ಅಬ್ಬರ ಸಮಾಪ್ತಿಯಾಗುತ್ತೆ!

Continue Reading
Advertisement
Click to comment

Leave a Reply

Your email address will not be published. Required fields are marked *

ಸಿನಿಮಾ ವಿಮರ್ಶೆ

ತಾಯಿಗೆ ತಕ್ಕ ಮಗ ಅನ್ಯಾಯದ ವಿರುದ್ಧ ಅಮ್ಮ ಮಗನ ಯುದ್ಧ!

Published

on


ಅನ್ಯಾಯದ ವಿರುದ್ಧ ತನ್ನ ವಕೀಲಿ ವೃತ್ತಿಯ ಕತ್ತಿ ಝಳಪಿಸುವ ಅಮ್ಮ ಮತ್ತು ತಾಯಿಯ ನೆರಳಲ್ಲಿ ದುಷ್ಟರನ್ನು ಸದೆ ಬಡಿಯಲು ನಿಂತ ಮಗ… ಆತನ ಸುತ್ತ ಹಬ್ಬಕೊಳ್ಳುವ ಪ್ರೀತಿ, ಅಲ್ಲಲ್ಲಿ ಮುದ ನೀಡೋ ಕಾಮಿಡಿ… ಒಂದು ಕಮರ್ಷಿಯಲ್ ಚಿತ್ರಕ್ಕೆ ಏನೇನು ಬೇಕೋ ಅದೆಲ್ಲವನ್ನೂ ಮೈದುಂಬಿಕೊಂಡಂತಿರೋ ತಾಯಿಗೆ ತಕ್ಕ ಮಗ ಚಿತ್ರ ಪ್ರೇಕ್ಷಕರ ನಿರೀಕ್ಷೆಗಳನ್ನು ತಣಿಸಿದೆ.

ವಕೀಲೆಯಾಗಿ ಸಮಾಜವಿರೋಧಿಗಳನ್ನು ಮಟ್ಟ ಹಾಕೋ ವಕೀಲೆಯಾಗಿ ಸುಮಲತಾ ಅಂಬರೀಶ್, ಮಗ ಮೋಹನ್‌ದಾಸನಾಗಿ ಅಜೇಯ್ ರಾವ್ ಮತ್ತು ಪ್ರೇಯಸಿ ಸರಸ್ವತಿಯಾಗಿ ಆಶಿಕಾ ರಂಗನಾಥ್ ನಟಿಸಿದ್ದಾರೆ. ಅಲ್ಲಲ್ಲಿ ಒಂದಷ್ಟು ಕೊರತೆಗಳು ಕಾಡೋದನ್ನು ಬಿಟ್ಟರೆ ಒಂದು ಸರಳವಾದ ಕಥೆಯನ್ನೇ ಪ್ರೇಕ್ಷಕರನ್ನು ಹಿಡಿದಿಡುವ ಧಾಟಿಯಲ್ಲಿ ನಿರ್ದೇಶಕ ಶಶಾಂಕ್ ಕಟ್ಟಿ ನಿಲ್ಲಿಸಿದ್ದಾರೆ.

ಅದು ನನಗೆ ನೀನು ನಿನಗೆ ನಾನು ಎಂಬಂಥಾ ಅಮ್ಮ ಮಗನ ಜೋಡಿ. ತಾಯಿ ವಕೀಲೆ. ಆಕೆ ಎಂಥಾ ಖದೀಮರೇ ಆದರೂ ಎದುರು ಹಾಕಿಕೊಂಡು ಕಾನೂನು ಮೂಲಕವೇ ನ್ಯಾಯ ಒದಗಿಸಿ ಕೊಡೋ ದಿಟ್ಟ ಹೆಣ್ಣ ಮಗಳು. ಮಗ ಮೋಹನ ದಾಸನ ಪಾಲಿಗೆ ಅಮ್ಮನ ರಕ್ಷಣೆಯೇ ಕಾಯಕ. ದುಷ್ಟರನ್ನು ಕಂಡರೆ ಕೆಂಡಾಮಂಡಲವಾಗಿ ಬಗ್ಗು ಬಡಿಯೋದು ಆತನ ವರಸೆ. ಅನ್ಯಾಯ ಕಂಡರೆ ಕೋಪಗೊಂಡು ಪ್ರತಾಪ ತೋರೋ ಮೋಹನದಾಸ್ ದುಷ್ಟರ ಪಾಲಿಗೆ ಸಿಂಹಸ್ವಪ್ನ.
ಇಂಥಾ ತಾಯಿ ಮತ್ತು ಮಗ ಅಧಿಕಾರದಾಸೆಗೆ ಏನು ಮಾಡಲೂ ಹೇಸದ ರಾಜಕಾರಣಿ ಮತ್ತು ತಂದೆಯ ನೆರಳಲ್ಲಿ ಎಂಥಾ ಕೆಲಸಕ್ಕೂ ರೆಡಿಯಾಗಿರೋ ಹುಂಬ ಮಗನ ವಿರುದ್ಧ ನಿಲ್ಲುತ್ತಾರೆ. ಅದರ ಸುತ್ತ ಥರ ಥರದ ವಿದ್ಯಮಾನಗಳು ನಡೆಯುತ್ತವೆ. ಇಂಥಾ ತಾಯಿ ಮಗನ ಬದುಕಿಗೆ ನಾಯಕಿ ಸರಸ್ವತಿಯ ಆಗಮನವೂ ಆಗುತ್ತೆ. ಈ ತಾಯಿ ಮಗ ದುಷ್ಟರ ವಿರುದ್ಧ ಗೆಲ್ಲುತ್ತಾರಾ? ಅನ್ಯಾಯದ ವಿರುದ್ಧ ಉಗ್ರ ಪ್ರತಾಪ ತೋರೋ ಮೋಹನ್‌ದಾಸನ ಪಾಲಿಗೆ ಪ್ರೀತಿಯೂ ದಕ್ಕುತ್ತಾ ಎಂಬೆಲ್ಲ ಕುತೂಹಲಗಳಿದ್ದರೆ, ಈ ಚಿತ್ರದಲ್ಲಿ ಥ್ರಿಲ್ಲಾಗುವಂಥಾ ಉತ್ತರವೂ ಇದೆ!

ಒಟ್ಟಾರೆಯಾಗಿ ಪಕ್ಕಾ ಕಮರ್ಷಿಯಲ್ ಶೈಲಿಯಲ್ಲಿ ಶಶಾಂಕ್ ಈ ಚಿತ್ರವನ್ನು ಕಟ್ಟಿ ಕೊಟ್ಟಿದ್ದಾರೆ. ಕಥೆ ಗಂಭೀರವಾಗುತ್ತಲೇ ವಸಾಧು ಕೋಕಿಲಾ ಬಂದು ಕಚಗುಳಿ ನೀಡುತ್ತಾರೆ. ಆಶಿಕಾ ರಂಗನಾಥ್ ಪಾತ್ರದ ಹೆಸರು ಸರಸ್ವತಿ. ಆದರೆ ಅವರನ್ನಿಲ್ಲಿ ಸಿಕ್ಕಾಪಟ್ಟೆ ಹಾಟ್ ಆಗಿ ತೋರಿಸಲಾಗಿದೆ. ಅದೂ ಕೂಡಾ ಚಿತ್ರದ ಒಟ್ಟಂದಕ್ಕೆ ಪೂರಕವಾಗಿದೆ. ಕೆಲವೆಡೆ ಅತೀ ಸಿನಿಮೀಯ ಎಂಬಂಥಾ ಸೀನುಗಳಿದ್ದರೂ ತಾಯಿ ಮಗನ ಖದರಿನ ನಡುವೆ ಅವು ಮರೆಯಾಗುತ್ತವೆ.

Continue Reading

ಸಿನಿಮಾ ವಿಮರ್ಶೆ

ಕೊಲೆಯ ಸುತ್ತ ತೆರೆದುಕೊಳ್ಳುವ ಕುತೂಹಲದ ಪುಟ!

Published

on

ಒಂದು ಕೋಣೆಯಲ್ಲಿ ಪಾತ್ರಗಳನ್ನು ಹಿಡಿದಿಡಬಹುದು. ಆದರೆ ಪ್ರೇಕ್ಷಕರ ಮನಸುಗಳನ್ನು ಅದರ ಸುತ್ತಲೇ ಕೇಂದ್ರೀಕರಿಸುವಂತೆ ಮಾಡೋದು ಸವಾಲಿನ ಸಂಗತಿ. ಆದರೆ ನಿರ್ದೇಶಕ ದಯಾಳ್ ಪದ್ಮನಾಭನ್ ಪಾಲಿಗದು ಕರತಲಾಮಲಕ ಎಂಬುದೀಗ ತೆರೆ ಕಂಡಿರೋ ಪುಟ ೧೦೯ ಚಿತ್ರದ ಮೂಲಕವೂ ಋಜುವಾತಾಗಿದೆ!


ಒಂಚೂರು ಲಯ ತಪ್ಪಿದರೂ ಪ್ರೇಕ್ಷಕರು ಉಸಿರುಗಟ್ಟಿ ಬಿಡುವಂಥಾ ಸೂಕ್ಷ್ಮವಾದ ಕಥೆಯನ್ನಿಲ್ಲಿ ದಯಾಳ್ ಜಾಣ್ಮೆಯಿಂದಲೇ ಹೇಳಿದ್ದಾರೆ. ಗಂಡ ಮತ್ತು ಹೆಂಡತಿ, ಒಂದು ಕೊಲೆ ಮತ್ತು ಅದರ ಸುತ್ತಾ ಸಾಗೋ ತನಿಖೆ… ಸಲೀಸಾಗಿ ಕಾಣೋ, ತೀರಾ ಸರಳ ಎನ್ನಿಸುವಂತೆ ಕಾಣುವ ಈ ಒನ್ ಲೈನ್ ಸ್ಟೋರಿಯನ್ನು ಪ್ರೇಕ್ಷಕರನ್ನು ತುದೀ ಸೀಟಿಗೆ ತಂದು ಕೂರಿಸುವಂತೆ, ಅದರ ಸುತ್ತ ಮನುಷ್ಯ ಸಂಬಂಧಗಳು, ವರ್ತನೆಗಳು ಮತ್ತು ನಾನಾ ಭಾವಗಳು ಗರಿ ಬಿಚ್ಚುವಂತೆ ರೋಚಕವಾಗಿ ಕಟ್ಟಿ ಕೊಡುವಲ್ಲಿಯೂ ಈ ಚಿತ್ರದ ಮೂಲಕ ದಯಾಳ್ ಗಮನಾರ್ಹ ಪ್ರಯತ್ನ ಮಾಡಿದ್ದಾರೆ.


ಒಂದು ಮನೆ. ಅದರೊಳಗೆ ಹೆಂಡತಿ ಮತ್ತು ಬರಹಗಾರನಾದ ಗಂಡ. ಈ ಎರಡು ಪಾತ್ರಗಳನ್ನು ವೈಷ್ಣವಿ ಮೆನನ್ ಮತ್ತು ನವೀನ್ ಕೃಷ್ಣ ನಿಭಾಯಿಸಿದ್ದಾರೆ. ಈ ಸಂಸಾರದಲ್ಲಿ ಹೆಂಡತಿ ಕೊಲೆ ಮೂಲಕವೇ ಗಂಡಾಂತರವೊಂದು ಬಂದೆರಗುತ್ತೆ. ಈ ಪ್ರಕರಣದ ತನಿಖೆಗಾಗಿ ಜೆಕೆ ಖಡಕ್ಕು ಪೊಲೀಸ್ ಅಧಿಕಾರಿಯಾಗಿ ಮನೆಯೊಳಗೆ ಎಂಟ್ರಿ ಕೊಡುತ್ತಾರೆ. ನಂತರ ಆ ಮನೆಯೊಳಗಿನ ನಾಲಕ್ಕು ಗೋಡೆಗಳ ನಡುವೆಯೇ ಕೊಲೆಯ ರಹಸ್ಯ ಪತ್ತೆಹಚ್ಚುವ ಕಾರ್ಯ ಶುರುವಾಗುತ್ತೆ. ಅದನ್ನೊಂದು ತನಿಖೆಯಾಗಿ ಮಾತ್ರ ಚಿತ್ರಿಸದೇ ಮನುಷ್ಯ ಸಂಬಂಧಗಳ ತಾಕಲಾಟವಾಗಿಯೂ, ನಂಟುಗಳ ಪೀಕಲಾಟವಾಗಿಯೂ, ಬದುಕಿನ ಸಂಕೀರ್ಣತೆಗಳ ಅನಾವರಣದಂತೆಯೂ ಕಟ್ಟಿ ಕೊಟ್ಟಿರೋದೇ ಈ ಚಿತ್ರದ ನಿಜವಾದ ಪ್ಲಸ್ ಪಾಯಿಂಟ್. ಈ ಪೊಲೀಸ್ ಅಧಿಕಾರಿ ಮತ್ತು ಬರಹಗಾರ ಗಂಡನ ಪಾತ್ರವನ್ನು ಜೆಕೆ ಮತ್ತು ನವೀನ್ ಕೃಷ್ಣ ಪೈಪೋಟಿಗೆ ಬಿದ್ದಂತೆ ನುಂಗಿಕೊಂಡು ನಟಿಸಿರೋದೂ ಕೂಡಾ ಪುಟ ೧೦೯ ರೋಚಕವೆನ್ನಿಸಲು ಪ್ರಧಾನ ಕಾರಣವಾಗಿ ದಾಖಲಾಗುತ್ತೆ.


ಹೀಗೆ ಮೊದಲಾರ್ಧ ನೋಡುಗರನ್ನು ಕುತೂಹಲದ ಕಾವಲಿಯಲ್ಲಿ ಕೂರಿಸಿ ಸಾಗುವ ಕಥೆ ದ್ವಿತೀಯಾರ್ಧದಲ್ಲಿ ಸಂಸಾರದ ಜಂಜಾಟಗಳನ್ನು ತೆರೆದಿಡುತ್ತಾ, ತನಿಖೆಯ ಟ್ರ್ಯಾಕಿಗೆ ಬರುತ್ತಾ ಮುದ ನೀಡುತ್ತದೆ. ಹಾಗಾದರೆ ಆ ಸಂಸಾರದಲ್ಲಿ ಇಂಥಾದ್ದೊಂದು ಗಂಡಾಂತರ ತಲೆದೋರಲು ಕಾರಣವೇನು. ಆ ಗೃಹಿಣಿಯ ಕೊಲೆಗೆ ಯತ್ನಿಸಿದವರ‍್ಯಾರು, ಅದನ್ನು ಖಡಕ್ ಅಧಿಕಾರಿ ಭೇದಿಸುತ್ತಾನಾ ಎಂಬುದೇ ನಿಜವಾದ ಕುತೂಹಲ. ಅದನ್ನು ದಯಾಳ್ ಸೃಷ್ಟಿಸಿದ ನೆರಳು ಬೆಳಕಿನ ಚಮಾತ್ಕಾರದ ನಡುವೆಯೇ ನೋಡೋದೊಳ್ಳೆಯದು!


ಒಟ್ಟಾರೆಯಾಗಿ ಪಾತ್ರ ವರ್ಗ, ನಟನೆ, ಕ್ಯಾಮೆರಾ, ಸಂಕಲನ, ಹಿನ್ನೆಲೆ ಸಂಗೀತ ಸೇರಿದಂತೆ ಎಲ್ಲವನ್ನೂ ಜತನದಿಂದ ಸಂಭಾಳಿಸುವಲ್ಲಿ ನಿರ್ದೇಶನದ ಕಸರತ್ತು ಗಮನ ಸೆಳೆಯುತ್ತೆ. ಒಂದೇ ಕೋಣೆಯೊಳಗೆ ಫೋಕಸ್ ಆಗಿದ್ದರೂ ಪಿಕೆಎಚ್ ದಾಸ್ ಅವರ ಕ್ಯಾಮೆರಾ ಕೈಚಳಕ ಇಡೀ ಚಿತ್ರವನ್ನು ಏಕತಾನತೆಯಿಂದ ಪಾರು ಮಾಡಿದೆ. ಇಂಥ ಪ್ರಯೋಗಾತ್ಮಕ ಸಿನಿಮಾವನ್ನು ಸಂಕಲನ ಮಾಡುವಾಗಿನ ಛಾಲೆಂಜು ಬಹುಶಃ ಎಡಿಟ್ ಮಾಡಿದ ಶ್ರೀ ಅವರಿಗೇ ತಿಳಿದಿರಬೇಕು. ಆದರೆ, ಅದೆಲ್ಲ ನೋಡೋ ಪ್ರೇಕ್ಷಕರಿಗೆ ಗೊತ್ತಾಗದಂತೆ ಸಂಕಲಿಸಿ ಕೊಟ್ಟಿರೋದು ಎಡಿಟರ್ ಕ್ರೇಜ಼ಿಮೈಂಡ್ಸ್ ಶ್ರೀ ಅವರ ಗೆಲುವು. ಕೊಲೆ, ತನಿಖೆ, ಅನುಮಾನಗಳ ಸುತ್ತ ಹೊಸೆದುಕೊಂಡಿರೋ ಈ ಸಿನಿಮಾ ಈ ಜಾನರಿನ ಚಿತ್ರಗಳಲ್ಲಿಯೇ ಭಿನ್ನವಾಗಿ ಕಾಣಿಸುತ್ತದೆ. ಅದು ಪುಟ ೧೦೯ರ ನಿಜವಾದ ಗಮ್ಮತ್ತು!

Continue Reading

ಸಿನಿಮಾ ವಿಮರ್ಶೆ

ಜಗತ್ ಕಿಲಾಡಿ : ಎಲ್ಲ ಮೋಸಗಳಿಗೂ ಇವನೇ ಬಾಸು!

Published

on

ಹೇಗಾದರೂ ಸರಿ ಏಕಾಏಕಿ ದುಡ್ಡು ಮಾಡಿ ಬಿಡಬೇಕು… ಇಂಥಾ ಧಾವಂತದಿಂದ ಥರ ಥರದ ವೇಷ ತೊಟ್ಟ, ಹೆಜ್ಜೆ ಹೆಜ್ಜೆಗೂ ಮಾರಾಮೋಸ ಮಾಡಿದ ಸಜೀವ ಉದಾಹರಣೆಗಳು ಸಾಕಷ್ಟಿವೆ. ಈಗ ಪ್ರೇಕ್ಷಕರ ಮುಂದೆ ಬಂದಿರೋ ಜಗತ್ ಕಿಲಾಡಿ ಅಂಥಾ ಹತ್ತಾರು ಮೋಸಗಾರರ, ನಾನಾ ವೇಷಗಳ ಒಟ್ಟು ಮೊತ್ತದಂತಿರುವವನು. ಹಣ ಮಾಡುವ ಉದ್ದೇಶದಿಂದ ಎಂತೆಂಥಾ ಪ್ರಳಯಾಂತಕ ಕೆಲಸ ಮಾಡ ಬಹುದೆಂಬುದನ್ನು ಹೇಳುತ್ತಲೇ ಆ ಹಾದಿಯಲ್ಲಿ ಮುಂದುವರೆದರೆ ಕಡೆಗೂ ಸಿಕ್ಕೋದೇನೆಂಬ ಸಂದೇಶವನ್ನೂ ಸಾರುತ್ತಾ ಸಖತ್ ಎಂಟರ್‌ಟೈನಿಂಗ್ ಚಿತ್ರವಾಗಿ ಜಗತ್ ಕಿಲಾಡಿ ಪ್ರೇಕ್ಷಕರ ಮನಗೆದ್ದಿದ್ದಾನೆ!
ಆರವ್ ಧೀರೇಂದ್ರ ನಿರ್ದೇಶನದ ಈ ಚಿತ್ರ ಅಂತಿಮ ಹಂತದಲ್ಲಿ ಭಾರೀ ಸದ್ದು ಮಾಡಿತ್ತು. ನಿರಂಜನ್ ಶೆಟ್ಟಿ ಬರೋಬ್ಬರಿ ಹದಿನೈದು ಅವತಾರಗಳಲ್ಲಿ ಕಾಣಿಸಿಕೊಳ್ಳುವ ಮೂಲಕ ಪ್ರೇಕ್ಷಕರ ಅಚ್ಚರಿಗೆ ಕಾರಣವಾಗಿದ್ದರು. ಇದೀಗ ಬಿಡುಗಡೆಯಾಗಿರೋ ಈ ಚಿತ್ರ ಆರಂಭದಿಂದ ಕೊನೆಯವರೆಗೂ ಅದನ್ನು ಕಾಯ್ದುಕೊಳ್ಳುವಲ್ಲಿ ಸಫಲವಾಗಿದೆ.

ನಿರಂಜನ್ ಶೆಟ್ಟಿ ಈ ಚಿತ್ರದಲ್ಲಿ ಸತ್ಯಮೂರ್ತಿ ಎಂಬ ಪಾತ್ರದ ಮೂಲಕ ವಿರಾಟ್ ರೂಪವನ್ನೇ ಪ್ರದರ್ಶಿಸಿದ್ದಾರೆ. ಹೆಸರಲ್ಲಿಯೇ ಸತ್ಯ ಇದ್ದರೂ ಆತ ಸುಳ್ಳು, ಮೋಸ, ವಂಚನೆಗಳ ಸಾಕಾರ ಮೂರ್ತಿ. ಎಂಥಾ ಸಂದರ್ಭವನ್ನಾದರೂ ಮೋಸದಿಂದಲೇ ಕಾಸು ಕಬಳಿಸಲು ಬಳಸಿಕೊಳ್ಳೋದರಲ್ಲಿ ಆತ ಚಾಣಾಕ್ಷ. ರೈಸ್‌ಫುಲ್ಲಿಂಗ್ ದಂಧೆಯಿಂದ ಹಿಡಿದು, ಕುಡಿಯೋ ನೀರಿನ ಮಾಫಿಯಾದ ವರೆಗೂ ಸಕಲ ಅಡ್ಡ ಕಸುಬುಗಳಲ್ಲಿಯೂ ಈತನದ್ದೇ ಮೇಲುಗೈ. ಹಣವೇ ಸಕಲ ಸುಖಕ್ಕೂ ಮೂಲ ಎಂಬುದಾತನ ಬದುಕಿನ ಸೂತ್ರ. ಎಂಥಾ ಚಾಣಾಕ್ಷನೇ ಆಗಿದ್ದರೂ ಖಾಕಿ ಕಣ್ಣಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ ಎಂಬಂತೆ ಈ ಜಗತ್ ಖಿಲಾಡಿಯೂ ಪೊಲೀಸರ ಅತಿಥಿಯಾಗುತ್ತಾನೆ.

 

ಹೀಗೆ ತಗುಲಿಕೊಂಡಾಗಲೂ ಮತ್ತೊಂದು ಮೋಸದ ಬಲೆ ಹೆಣೆದು ಬಚಾವಾಗೋದರಲ್ಲಿ ಸತ್ಯ ಮೂರ್ತಿಯನ್ನು ಮೀರಿಸೋ ಮತ್ತೊಬ್ಬರಿಲ್ಲ. ಸಾಮಾನ್ಯವಾಗಿ ಪ್ರೀತಿ ಎಂಥವರನ್ನೂ ಬದಲಿಸುತ್ತೇ ಅನ್ನೋದಿದೆ. ಆದರೆ ಹಣದ ಹಿಂದೆ ಬಿದ್ದ ಈತನಿಗೆ ತನ್ನ ಹಿಂದೆ ಬಿದ್ದ ಹುಡುಗಿಯೊಬ್ಬಳ ಅಂತರಾಳ ಮುಖ್ಯ ಅನ್ನಿಸೋದಿಲ್ಲ. ಆದರೂ ಮೋಸದ ಜಾಲದಲ್ಲಿ ಬಂಧಿಯಾಗಿ ಖೈದಿಯಾದ ಸಂದರ್ಭದಲ್ಲಿ ಪೊಲೀಸರು ಹೇಳಿದ ಮಾತು ಆತನನ್ನು ಕಾಡುತ್ತೆ. ಸತ್ಯಮೂರ್ತಿ ಬದಲಾಗುವ ಪಥದತ್ತ ಹೊರಳಿಕೊಳ್ಳುತ್ತಾನೆ. ಅದು ಸಾಧ್ಯವಾಗುತ್ತಾ? ಹಣದ ಹಿಂದೆ ಬಿದ್ದ ಅಸಡ್ಡೆ ಮಾಡಿದ್ದ ಪ್ರೀತಿ ಆತನಿಗೆ ದಕ್ಕುತ್ತಾ ಎಂಬುದು ಅಸಲೀ ಕ್ಯೂರಿಯಾಸಿಟಿ.

ಆರಂಭದಿಂದ ಕಡೆಯವರೆಗೂ ಕ್ಷಣ ಕ್ಷಣವೂ ಕಾಡುವಂತೆ, ಹೊತ್ತಿನ ಪರಿವೆಯೂ ನೆನಪಾಗದಂತೆ ಚಿತ್ರವನ್ನು ಕಟ್ಟಿ ಕೊಡುವಲ್ಲಿ ನಿರ್ದೇಶಕರು ಗೆದ್ದಿದ್ದಾರೆ. ನಾಯಕನಾಗಿ ನಿರಂಜನ್ ಶೆಟ್ಟಿ ಎಲ್ಲ ಶೇಡುಗಳ ಪಾತ್ರವನ್ನೂ, ಅವತಾರಗಳನ್ನೂ ಆವಾಹಿಸಿಕೊಂಡಂತೆ ನಟಿಸಿದ್ದಾರೆ. ನಾಯಕಿ ಅಮಿತಾ ಕುಲಾಲ್ ಕೂಡಾ ಇದಕ್ಕೆ ತಕ್ಕುದಾಗಿಯೇ ನಟಿಸಿದ್ದಾರೆ. ಪ್ರತೀ ಪಾತ್ರ, ಸನ್ನಿವೇಶಗಳೂ ಕೂಡಾ ಪ್ರೇಕ್ಷಕರನ್ನು ಕುತೂಹಲಕ್ಕೆ ತಳ್ಳುವ ಮೂಲಕ ಇಡೀ ಚಿತ್ರ ನೋಡಿಸಿಕೊಂಡು ಹೋಗುತ್ತೆ. ಇಡೀ ಚಿತ್ರದಲ್ಲಿನ ವೇಗ, ಅಚ್ಚುಕಟ್ಟಾದ ಚಿತ್ರಕಥೆ, ಬಿಗಿ ಕಳೆದುಕೊಳ್ಳದ ಕಥೆ ಮತ್ತು ಅದಕ್ಕೆ ತಕ್ಕುದಾದ ಪಾತ್ರ ಪೋಷಣೆಯ ಮೂಲಕ ಈ ಚಿತ್ರ ಪ್ರೇಕ್ಷಕರನ್ನು ಸೆಳೆದುಕೊಂಡಿದೆ.

ಸಿನಿಮಾ ರೇಟಿಂಗ್ : ***/******

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz