Connect with us

ಕಲರ್ ಸ್ಟ್ರೀಟ್

ನೀನ್ಯಾರೆ, ಯೋಧ, ಹುಬ್ಬಳ್ಳಿ, ರಾಜಾಹುಲಿಯನ್ನು ಸೆರೆ ಹಿಡಿದಿದ್ದವರು ವಿಷ್ಣು…

Published

on

ಯಾರೋ ಕಂಡ ಕನಸನ್ನು ಕೂಡಾ ನನಸು ಮಾಡಿಕೊಡುತ್ತಿದ್ದ ಆ ಕಣ್ಣುಗಳು ಶಾಶ್ವತವಾಗಿ ಮುಚ್ಚಿ ಮಲಗಿವೆ. ಛಾಯಾಗ್ರಾಹಕ ಕೆ.ಎಂ. ವಿಷ್ಣುವರ್ಧನ್ ವಿಧಿವಶರಾಗಿದ್ದಾರೆ. ಕಳೆದ ಏಳೆಂಟು ತಿಂಗಳಿನಿಂದ ಬಾಧಿಸುತ್ತಿದ್ದ ಕ್ಯಾನ್ಸರ್ ಮಾರಿ ಅವರನ್ನು ಬಲಿ ತೆಗೆದುಕೊಂಡಿದೆ.

ತುಮಕೂರಿನ ಕುದೂರು ಮೂಲದ ವಿಷ್ಣುವರ್ಧನ್ ಎಸ್.ಜೆ. ಪಾಲಿಟೆಕ್ನಿಕ್ ಕಾಲೇಜಿನ 1991-93ರ ಬ್ಯಾಚ್’ನಲ್ಲಿ ಛಾಯಾಗ್ರಹಣ ತರಬೇತಿ ಪಡೆದವರು. ನಂತರ ವಿಷ್ಯುಯಲ್ ವರ್ಲ್ಡ್ ಎಂಬ ವಿಡಿಯೋ ಕಾರ್ಪೊರೇಟ್ ಸಂಸ್ಥೆಯಲ್ಲಿ ಸಹಾಯಕ ಛಾಯಾಗ್ರಾಹಕರಾಗಿ ಕೆಲಸ ಪ್ರಾರಂಭಿಸಿದ್ದರು. ಆದರೆ ಸಿನಿಮಾ ಛಾಯಾಗ್ರಾಹಕರಾಗಬೇಕೆನ್ನುವ ತುಡಿತದಿಂದ ಇದ್ದ ಕಾರ್ಪೊರೇಟ್ ಕೆಲಸವನ್ನು ಬಿಟ್ಟುಬಂದು ಕನ್ನಡ ಚಿತ್ರರಂಗದಲ್ಲಿ ಅಸಿಸ್ಟೆಂಟ್ ಕ್ಯಾಮೆರಾಮನ್ ಆಗಿ ಕಾರ್ಯನಿರ್ವಹಿಸಲು ಶುರು ಮಾಡಿದರು. ಆರ್.ಮಂಜುನಾಥ್. ಬಿ.ಎಸ್. ಮಂಜುನಾಥ್ ಮತ್ತು ಆರ್.ಗಿರಿ ಅವರೊಂದಿಗೆ ಸಹಾಯಕರಾಗಿ ಕೆಲಸ ಮಾಡಿಕೊಂಡೇ ಕ್ರಮೇಣ ಸ್ವತಂತ್ರ ಛಾಯಾಗ್ರಾಹಕರಾಗಿಯೂ ಅವಕಾಶ ಪಡೆದರು. ವಿಷ್ಣುವರ್ಧನ್ ಅವರು ಕ್ಯಾಮೆರಾ ಕೆಲಸ ನಿಭಾಯಿಸಿದ್ದ ‘ನೀನ್ಯಾರೆ?’ ಸಿನಿಮಾದ ಅದ್ಭುತ ಛಾಯಾಗ್ರಹಣಕ್ಕೆ ರಾಜ್ಯಪ್ರಶಸ್ತಿಯೂ ಲಭಿಸಿತ್ತು. ಈ ಚಿತ್ರದಲ್ಲಿ ಚಲಿಸುವ ಮೋಡಗಳನ್ನು ತಮ್ಮ ಕ್ಯಾಮೆರಾ ಕಣ್ಣಿನಮೂಲಕ ತೆರೆಮೇಲೆ ಹಿಡಿದು ನಿಲ್ಲಿಸಿದ್ದ ವಿಷ್ಣು ಅವರ ಕ್ಯಾಮೆರಾ ಮೋಡಿಗೆ ನೋಡಿದವರೆಲ್ಲಾ ಫಿದಾ ಆಗಿದ್ದರು. ನಂತರ ಓಂ ಪ್ರಕಾಶ್ ರಾವ್ ಟೀಮಿನಲ್ಲಿ ಗುರುತಿಸಿಕೊಂಡಿದ್ದರು. ಯೋಧ, ಹುಬ್ಬಳ್ಳಿ, ರಾಜಾಹುಲಿ ಸೇರಿದಂತೆ ಸರಿಸುಮಾರು ಇಪ್ಪತ್ತಕ್ಕೂ ಹೆಚ್ಚು ಚಿತ್ರಗಳಿಗೆ ವಿಷ್ಣುವರ್ಧನ್ ಛಾಯಾಗ್ರಹಣವಿದೆ. ಸದ್ಯ ವಿಜಯ ಪ್ರಸಾದ್ ಅವರ ತೋತಾಪುರಿ ಚಿತ್ರಕ್ಕೂ ಕಾರ್ಯನಿರ್ವಹಿಸುತ್ತಿದ್ದ ವಿಷ್ಣು ದಿಢೀರನೆ ತಮ್ಮ ಕ್ಯಾಮೆರಾ ಕಣ್ಣನ್ನು ಮುಚ್ಚಿ ಎದ್ದು ಹೊರಟಿದ್ದಾರೆ.

ಆಗಸ್ಟ್ 23, 1974ರಲ್ಲಿ ಜನಿಸಿದ್ದ ವಿಷ್ಣುವರ್ಧನ್ ಅವರಿಗೀಗ ನಲವತ್ನಾಲ್ಕು ವರ್ಷ ವಯಸ್ಸು. ಮದುವೆಯಾಗಿ ಇಬ್ಬರು ಮಕ್ಕಳನ್ನೂ ಹೊಂದಿದ್ದ ವಿಷ್ಣುವರ್ಧನ್ ಕಷಡುಕಷ್ಟದಿಂದ ಮೇಲೆ ಬಂದವರು. ಛಾಯಾಗ್ರಹಣದ ಕುರಿತು ಆಳವಾದ ಅಧ್ಯಯನ ನಡೆಸುತ್ತಾ, ಸಾಕಷ್ಟು ಪ್ರಯೋಗಗಳನ್ನು ಮಾಡಬೇಕೆನ್ನುವ ಮಹತ್ವಾಕಾಂಕ್ಷೆ ಹೊಂದಿದ್ದವರು. ಚಿತ್ರೀಕರಣದ ಸಂದರ್ಭದಲ್ಲಿ ಯಾವ ಗೊಂದಲಗಳಿಗೂ ಬೀಳದೆ ತೀರಾ ಕಾನ್ಫಿಡೆಂಟ್ ಆಗಿ ಶೂಟ್ ಮಾಡುತ್ತಿದ್ದವರು. ವಿಷ್ಣುವರ್ಧರಂಥಾ ಪ್ರತಿಭಾವವಂತ ಛಾಯಾಗ್ರಾಹಕ ನಿಜಕ್ಕೂ ಕನ್ನಡ ಚಿತ್ರರಂಗದ ಆಸ್ತಿ. ಅವರು ಇಲ್ಲವಾಗಿರುವುದರ ಬಗ್ಗೆ ಅವರ ಸಹಪಾಠಿಯೂ ಆದ ಛಾಯಾಗ್ರಾಹಕ ಸುಜ್ಞಾನ್, ಸುರೇಶ್ ಬಾಬು, ಜಗದೀಶ್ ವಾಲಿ, ಛಾಯಾಗ್ರಾಹಕರ ಸಂಘದ ಕಾರ್ಯದರ್ಶಿ ಚಂದ್ರಶೇಖರ್, ಕಿರಣ್ ಹಂಪಾಪುರ ಮತ್ತು ವಿಷ್ಣು ಅವರೊಟ್ಟಿಗೆ ಸಹಾಯಕನಾಗಿ ಕೆಲಸ ಮಾಡಿ ಇವತ್ತು ‘ಟಕ್ಕರ್’ ಚಿತ್ರದ ಮೂಲಕ ನಾಯಕನಟನಾಗಿ ಪರಿಚಯಗೊಳ್ಳುತ್ತಿರುವ ಮನೋಜ್, ಕಾರಂಜಿ ಶ್ರೀಧರ್ ಸೇರಿದಂತೆ ಚಿತ್ರರಂಗದ ಅನೇಕರು ಕಂಬನಿ ಮಿಡಿದಿದ್ದಾರೆ.

 

ಕಲರ್ ಸ್ಟ್ರೀಟ್

ಯಾರಿಗೆ ಯಾರುಂಟು : ಅದಿತಿ ರಾವ್ ಎಂಬ ಅಚ್ಚರಿ!

Published

on

ಮತ್ತೆ ಮತ್ತೆ ಕೇಳುವಂಥಾ ಮೋಹಕ ಹಾಡುಗಳು ನಿರ್ದೇಶಕ ಕಿರಣ್ ಗೋವಿಯವರ ಟ್ರೇಡ್ ಮಾರ್ಕ್ ಇದ್ದಂತೆ. ಅವರು ನಿರ್ದೇಶಿಸಿರೋ ಯಾರಿಗೆ ಯಾರುಂಟು ಚಿತ್ರದ ಮೂಲಕ ಅದು ಯಥಾಪ್ರಕಾರವಾಗಿ ಮುಂದುವರೆದಿದೆ. ಮೆಲೋಡಿಯಸ್ ಹಾಡುಗಳ ಮೂಲಕವೇ ಕೌತುಕದ ತರಂಗಗಳನ್ನೆಬ್ಬಿಸಿರೋ ಈ ಚಿತ್ರದಲ್ಲಿ ಮೂವರು ನಾಯಕಿಯರಿದ್ದಾರಲ್ಲಾ? ಆ ಪೈಕಿ ಒಬ್ಬರಾಗಿ ಅದ್ಭುತವಾದೊಂದು ಪಾತ್ರಕ್ಕೆ ಜೀವ ತುಂಬಿದ ಖುಷಿಯಲ್ಲಿರುವವರು ಅದಿತಿ ರಾವ್.

ಅಪ್ಪಟ ಬೆಂಗಳೂರಿನ ಕನ್ನಡತಿ ಅದಿತಿ ರಾವ್ ಅವರ ಒರಿಜಿನಲ್ ಹೆಸರು ಮೇಘನಾ. ಅದೇ ಹೆಸರಲ್ಲಿ ಆರಂಭ ಕಾಲದಲ್ಲಿ ಧಾರಾವಾಹಿಗಳಲ್ಲಿ ನಟಿಸಲಾರಂಭಿಸಿದ್ದ ಅವರು ನಾನಾ ಪಾತ್ರಗಳ ಮೂಲಕ ಕಿರುತೆರೆ ಪ್ರೇಕ್ಷಕರ ನೆನಪಲ್ಲುಳಿದಿದ್ದಾರೆ. ಆ ಕಾರಣದಿಂದಲೇ ಅಪಾರ ಅಭಿಮಾನಿ ಬಳಗವನ್ನೂ ತಮ್ಮದಾಗಿಸಿಕೊಂಡಿದ್ದಾರೆ. ಡಿಗ್ರಿಯಲ್ಲಿರುವಾಗಲೇ ಹುಡುಕಿ ಬಂದ ನಟನೆಯ ಅವಕಾಶ, ಬಂದ ಅವಕಾಶವನ್ನು ಚೆಂದಗೆ ಬಳಸಿಕೊಂಡ ಪ್ರತಿಭೆ ಮತ್ತು ಅದನ್ನೇ ಆಧಾರವಾಗಿಟ್ಟುಕೊಂಡು ಹಿರಿತೆರೆಯಲ್ಲಿಯೂ ನಾಯಕಿಯಾಗಿ ಗುರುತಿಸಿಕೊಂಡಿರೋ ಅದಿತಿ ರಾವ್ ತಮ್ಮ ಮೂಲ ಹೆಸರನ್ನೇ ಮರೆಯುವಂತೆ ಮಾಡಿದ್ದು ಕೂಡಾ ಒಂದು ಧಾರಾವಾಹಿ ಎಂಬುದು ವಿಶೇಷ!

ಹಾಗೆ ಅದಿತಿ ರಾವ್ ಎಂದೇ ಹೆಸರಾಗಿರುವ ಅವರೀಗ ಯಾರಿಗೆ ಯಾರುಂಟು ಚಿತ್ರದ ನಾಯಕಿಯರಲ್ಲೊಬ್ಬರಾಗಿ ನಟಿಸಿದ್ದಾರೆ. ತಮ್ಮ ಪಾತ್ರ ಮತ್ತು ಕಥೆಯ ಬಗ್ಗೆ ಅಪಾರವಾದ ಭರವಸೆಯನ್ನೂ ಹೊಂದಿದ್ದಾರೆ. ಆರಂಭದಲ್ಲಿ ಅದಿತಿಗೆ ಇಷ್ಟವಾಗಿದ್ದದ್ದು ನಿರ್ದೇಶಕ ಕಿರಣ್ ಗೋವಿಯವರು ಕಥೆ ಹೇಳಿದ ರೀತಿ. ಒಂದಿಡೀ ಕಥೆ ಮತ್ತು ತಮ್ಮ ಪಾತ್ರವನ್ನು ಬಹುವಾಗಿ ಮೆಚ್ಚಿಕೊಂಡೇ ನಟಿಸಲು ಒಪ್ಪಿಕೊಂಡಿದ್ದ ಅವರಿಗೆ ಚಿತ್ರೀಕರಣ ಶುರುವಾಗುತ್ತಲೇ ಹೊಸಾ ಲೋಕವೊಂದು ತೆರೆದುಕೊಂಡಂತಾಗಿತ್ತು. ಅದು ಪಕ್ಕಾ ಚಾಲೆಂಜಿಂಗ್ ಪಾತ್ರ. ಆದರೆ ಅದೂ ಕೂಡಾ ಸಲೀಸಾಗಿದ್ದು ನಿರ್ದೇಶಕರ ಜಾಣ್ಮೆಯಿಂದ ಎಂಬುದು ಅದಿತಿ ಅಭಿಪ್ರಾಯ.

ನಿರ್ದೇಶಕ ಕಿರಣ್ ಗೋವಿ ಪ್ರತೀ ಸೀನುಗಳಲ್ಲಿಯೂ ಬರೀ ಡೈಲಾಗಿ ಒಪ್ಪಿಸಿ ಸುಮ್ಮನಾಗದೆ, ಆ ಸನ್ನಿವೇಶಕ್ಕೆ ಆ ಪಾತ್ರ ಹೇಗೆ ಪ್ರತಿಕ್ರಿಯಿಸುತ್ತೆ, ಹೇಗೆಲ್ಲ ವರ್ತಿಸುತ್ತೆ ಎಂಬುದನ್ನು ವಿವರಿಸಿ ನಟಿಸಿಯೇ ತೋರಿಸುತ್ತಿದ್ದರಂತೆ. ಇದಲ್ಲದೇ ವರ್ಕ್‌ಶಾಪನ್ನೂ ಮಾಡಿದ್ದರು. ಇದರಲ್ಲಿ ಪ್ರತೀ ದಿನ ರಿಹರ್ಸಲ್ ಕೂಡಾ ನಡೆಯುತ್ತಿತ್ತು. ಈ ಸಂದರ್ಭದಲ್ಲಿ ಪ್ರಶಾಂತ್, ಲೇಖಾ ಜೊತೆ ಚರ್ಚಿಸಿ ಆ ಕಾಂಬಿನೇಷನ್ನಿನಲ್ಲಿ ತನ್ಮಯರಾಗಿ ನಟಿಸೋಕೆ ಸಾಧ್ಯವಾಯ್ತು, ಒಂದೇ ಟೇಕಿಗೆ ಓಕೆಯಾಗುವಂಥಾ ಅಭಿನಯ ನೀಡಲು ಸಾಧ್ಯವಾಯಿತೆನ್ನುವ ಅದಿತಿ ಪಾಲಿಗೆ ಚಿತ್ರೀಕರಣದ ಪ್ರತಿ ಘಳಿಗೆಯೂ ಹೊಸತೇನನ್ನೋ ಕಲಿತುಕೊಂಡ, ಹೊಸಾ ಭರವಸೆಯನ್ನು ತುಂಬಿಕೊಂಡ ತೃಪ್ತಿಯಿದೆ. ಈ ಪಾತ್ರ ತನ್ನನ್ನು ಇನ್ನಷ್ಟು ಭಿನ್ನವಾಗಿ ಗುರುತಿಸುವಂತೆ ಮಾಡುತ್ತದೆ ಎಂಬ ನಂಬಿಕೆಯೂ ಇದೆ.

ಹೀಗೆ ಯಾರಿಗೆ ಯಾರುಂಟು ಚಿತ್ರದ ನಾಯಕಿಯರಲ್ಲೊಬ್ಬರಾಗಿ ಒಂದು ಭಿನ್ನವಾದ ಪಾತ್ರಕ್ಕೆ ಜೀವ ತುಂಬಿಸಿರುವ ಅದಿತಿ ಬೆಂಗಳೂರಿನ ಹುಡುಗಿ. ಇಲ್ಲಿಯೇ ವಿದ್ಯಾಭ್ಯಾಸ ಪೂರೈಸಿದ್ದ ಅವರ ಪಾಲಿಗೆ ಚಿತ್ರರಂಗವೆಂಬುದು ದೂರದಿಂದಲೇ ಕೈ ಬೀಸಿ ಸೆಳೆಯುತ್ತಿದ್ದ ಮಾಯಾಲೋಕ. ಚಿಕ್ಕ ವಯಸಿನಿಂದಲೂ ಡ್ಯಾನ್ಸ್ ಮತ್ತು ಆಕ್ಟಿಂಗಿನಲ್ಲಿ ಆಸಕ್ತಿ ಹೊಂದಿದ್ದ ಅದಿತಿ ಶಾಲಾ ಕಾಲೇಜುಗಳಲ್ಲಿ ಮಿಂಚಿದ್ದೂ ಇದೆ. ಆದರೆ ಹಠಾತ್ತನೆ ನಟಿಯಾಗಬೇಕೆಂಬ ಆಂತರ್ಯದ ಬಯಕೆ ಈಡೇರಿಕೊಂಡಿದ್ದ ಅದಿತಿ ಫೈನಲ್ ಇಯರ್ ಡಿಗ್ರಿ ವ್ಯಾಸಂಗ ಮಾಡುತ್ತಿದ್ದ ಕಾಲದಲ್ಲಿ!

ಆವಾಗ ಎಲ್ಲರಂತಲ್ಲ ನಮ್ಮ ರಾಜಿ ಎಂಬ ಧಾರಾವಾಹಿಗೆ ಚಾಲನೆ ಸಿಕ್ಕಿತ್ತು. ಏಕಾಏಕಿ ಆ ಸೀರಿಯಲ್ಲಿನಲ್ಲಿ ನಟಿಸೋ ಸುಯೋಗವೂ ಅದಿತಿ ಪಾಲಿಗೆ ಕೂಡಿ ಬಂದಿತ್ತು. ಆ ಧಾರಾವಾಹಿಯಿಂದಲೇ ನಟಿಯಾಗಿ ಗುರುತಿಸಿಕೊಂಡ ಅವರ ಮುಖ್ಯ ಕನಸಾಗಿದ್ದದ್ದು ಚಿತ್ರರಂಗ. ಈ ನಡುವೆ ನಾನು ಅದಿತಿ ರಾವ್ ಎಂಬ ಧಾರಾವಾಹಿಯ ಮುಖ್ಯ ಪಾತ್ರದ ಮೂಲಕ ಮೇಘನಾ ಅದಿತಿ ಎಂಬ ಹೆಸರಿಂದಲೇ ಫೇಮಸ್ಸಾಗಿದ್ದರು. ಅದೇ ಹೆಸರನ್ನು ಪರ್ಮನೆಂಟಾಗಿ ಇಟ್ಟುಕೊಂಡಿದ್ದರು. ತಾನು ನಾಯಕ ನಟಿಯಾಗಬೇಕೆಂಬ ಹಂಬಲದಿಂದ ಪ್ರಯತ್ನಿಸುತ್ತಿದ್ದ ಅದಿತಿಗೆ ಸಾರಾ ಗೋವಿಂದು ಪುತ್ರ ಅನೂಪ್‌ಗೆ ಜೋಡಿಯಾಗಿ ಡೌ ಚಿತ್ರದಲ್ಲಿ ನಟಿಸೋ ಅವಕಾಶವೂ ಕೂಡಿ ಬಂದಿತ್ತು. ಆ ಬಳಿಕ ಹುಚ್ಚುಡುಗ್ರು ಚಿತ್ರದಲ್ಲಿಯೂ ನಟಿಸಿದ್ದ ಅದಿತಿ ಲೂಸ್‌ಮಾದ ಯೋಗಿಗೆ ನಾಯಕಿಯಾಗಿಯೂ ಒಂದು ಚಿತ್ರದಲ್ಲಿ ನಟಿಸಿದ್ದರು. ಆದರೆ ಕಾರಣಾಂತರಗಳಿಂದ ಆ ಪ್ರಾಜೆಕ್ಟು ಬಾಕಿಯಾಗಿತ್ತು. ತದನಂತರ ಅಕಿರಾ ಚಿತ್ರದ ಮೂಲಕ ಮುನ್ನೆಲೆಗೆ ಬಂದ ಅದಿತಿ ಮತ್ತೊಂದು ಚಿತ್ರವನ್ನೂ ಕೂಡಾ ನಾಯಕಿಯಾಗಿ ಕಂಪ್ಲೀಟ್ ಮಾಡಿಕೊಂಡಿದ್ದಾರೆ.

ಅದೇ ಹೊತ್ತಿನಲ್ಲಿ ಯಾರಿಗೆ ಯಾರುಂಟು ಚಿತ್ರವೂ ಬಿಡುಗಡೆಗೆ ಸಜ್ಜಾಗಿದೆ. ನಿರ್ಮಾಪಕ ರಘುನಾಥ್ ಸೇರಿದಂತೆ ಇಡೀ ಚಿತ್ರ ತಂಡದ ಬಗ್ಗೆ ಪ್ರೀತಿ, ಅಭಿಮಾನ ಹೊಂದಿರೋ ಅದಿತಿಗೆ ಈ ಚಿತ್ರ ಹಾಡುಗಳ ಮೂಲಕವೇ ಸೃಷ್ಟಿಸಿರೋ ಕ್ರೇಜ್ ಬಗ್ಗೆ ಅಚ್ಚರಿ ಬೆರೆತ ಖುಷಿಯಿದೆ. ಈ ಚಿತ್ರ ಸದಾ ಕಾಲವೂ ತನ್ನ ನಟನಾ ವೃತ್ತಿಗೆ ಬೆಂಬಲವಾಗಿ ನಿಂತಿರೋ ಅಮ್ಮ ಪದ್ಮಲತಾರ ಪಾಲಿಗೂ ಗೆಲುವಿನ ಸರ್‌ಪ್ರೈಸ್ ನೀಡುತ್ತದೆ ಎಂಬ ಆಸೆಯಿದೆ. ಹೇಳಿಕೇಳಿ ಅದಿತಿಯವರಿಗೆ ಯಾವುದೇ ಸಿನಿಮಾ ಹಿನ್ನೆಲೆ ಇಲ್ಲ. ಮಗಳು ಬಣ್ಣ ಹಚ್ಚುತ್ತೇನೆಂದಾಗ ಬೆಚ್ಚಿ ಬೀಳೋ ಟಿಪಿಕಲ್ ಪ್ರೀತಿಯ ಕುಟುಂಬ ಅದಿತಿಯದ್ದು. ಆದರೆ ಆರಂಭದಲ್ಲಿ ಅಮ್ಮ ಒಂದು ಚಿತ್ರದಲ್ಲಿ ನಟಿಸೋಕೆ ಮಾತ್ರ ಓಕೆ ಅಂದಿದ್ದರಂತೆ. ಆ ಬಳಿಕ ಮತ್ತೊಂದು, ಮಗದೊಂದು ಸೇರಿ ಅದಿತಿ ಹೀರೋಯಿನ್ ಆಗಿ ನೆಲೆ ಕಂಡುಕೊಂಡಿದ್ದಾರೆ. ಬಿಎಸ್‌ಎನ್‌ಎಲ್ ಉದ್ಯೋಗಿಯಾಗಿರುವ ಅಮ್ಮನ ಪಾಲಿಗೆ ಅದಿತಿಯೀಗ ಹೆಮ್ಮೆಯ ಮಗಳು. ಹಾಗೆಯೇ ಯಾರಿಗುಂಟು ಯಾರಿಗಿಲ್ಲ ಚಿತ್ರವೂ ಕೂಡಾ ತನನ್ನು ಸ್ಯಾಂಡಲ್‌ವುಡ್ಡಿನ ಹೆಮ್ಮೆಯ ನಾಯಕಿಯಾಗಿ ನೆಲೆಗೊಳಿಸುತ್ತದೆ ಎಂಬ ನಿರೀಕ್ಷೆ ಅದಿತಿಯದ್ದು…

 

Continue Reading

ಕಲರ್ ಸ್ಟ್ರೀಟ್

ಅಟ್ಟಯ್ಯ v/s ಹಂದಿ ಕಾಯೋಳು

Published

on

ಕನ್ನಡ ಚಿತ್ರರಂಗಕ್ಕೆ ಹೊಸಾ ಪ್ರತಿಭೆಗಳು, ಹೊಸಾ ಆಲೋಚನೆಗಳು ಸದಾ ಹರಿದು ಬರುತ್ತಲೇ ಇರುತ್ತವೆ. ಆ ಜಾಡಿನಲ್ಲಿರುವ ಸಿದ್ಧಸೂತ್ರವನ್ನು ಮೀರಿದ ಗಟ್ಟಿತನದ ಪ್ರಯತ್ನಗಳು ತನ್ನಿಂದ ತಾನೇ ಗಮನ ಸೆಳೆಯುತ್ತವೆ. ಹಾಗೆಯೇ ಸದ್ಯ ಪ್ರೇಕ್ಷಕರನ್ನು ತನ್ನತ್ತ ಸೆಳೆದುಕೊಂಡು ಬಿಡುಗಡೆಗೆ ಸಜ್ಜಾಗಿ ನಿಂತಿರೋ ಚಿತ್ರ ‘ಅಟ್ಟಯ್ಯ v/s ಹಂದಿ ಕಾಯೋಳು’ ಚಿತ್ರ. ಈ ಚಿತ್ರದ ಮೂಲಕ ಲೋಕೇಂದ್ರ ಸೂರ್ಯ ಎಂಬ ನವ ಪ್ರತಿಭೆಯೂ ನಿರ್ದೇಶಕನಾಗಿ ಪಾದಾರ್ಪಣೆ ಮಾಡಿದ್ದಾರೆ.

ಹೆಸರಲ್ಲಿಯೇ ವಿಭಿನ್ನವಾದುದೇನನ್ನೋ ಧ್ವನಿಸುತ್ತಿರೋ ಈ ಚಿತ್ರ ಲೋಕೇಂದ್ರರ ಅದೆಷ್ಟೋ ವರ್ಷಗಳ ತಪನೆಯ ಫಲ. ಮೂಲತಃ ಆಕ್ರೇಸ್ಟ್ರಾ ಗಾಯಕರಾಗಿರೋ ಲೋಕೇಂದ್ರ ಆ ವಲಯದಲ್ಲಿ ಜ್ಯೂನಿಯರ್ ಉಪೇಂದ್ರ ಎಂದೇ ಖ್ಯಾತಿ ಪಡೆದಿರುವವರು. ಉಪ್ಪಿಯ ಓಂ ಚಿತ್ರವನ್ನು ಕಣ್ತುಂಬಿಕೊಂಡ ನಂತರ ತಮ್ಮೊಳಗಿನ ಸಿನಿಮಾ ಕನಸಿಗೆ ಓಂಕಾರ ಬರೆದುಕೊಂಡ ಅವರು ಆ ಬಳಿಕ ಬದುಕು ಎತ್ತ ಹೊಯ್ದಾಡಿಸಿದರೂ ತಮ್ಮ ಗುರಿಯ ಬಿಂದುವಿನಿಂದ ಹಿಂದೆ ಸರಿಯದ ಛಲಗಾರ ಲೋಕೇಂದ್ರ.

ಅಟ್ಟಯ್ಯ v/s ಹಂದಿ ಕಾಯೋಳು ಎಂಬ ಚಿತ್ರವೂ ಕೂಡಾ ಲೋಕೇಂದ್ರರೊಳಗಿನ ಸೂಕ್ಷ್ಮವಂತಿಕೆಯ ಮೂಸೆಯಲ್ಲರಳಿದ ಕನಸಿನಂಥಾದ್ದು. ಪೊಲೀಸ್ ಅಧಿಕಾರಿಯೊಬ್ಬರು ಹೇಳಿದ ಸತ್ಯ ಕಥೆಯೊಂದನ್ನು ಕೇಳಿದ್ದ ಲೋಕೇಂದ್ರ ಆ ಗುಂಗಿನಿಂದ ಹೊರ ಬರಲು ವಾರಗಳ ಕಾಲ ತೆಗೆದುಕೊಂಡಿದ್ದರಂತೆ. ಹಾಗೆ ಬಿಟ್ಟೂ ಬಿಡದೆ ಕಾಡಿದ ಅಪರೂಪದ ಕಥೆಯನ್ನೇ ಸಿನಿಮಾವಾಗಿಸೋ ಹಠಕ್ಕೆ ಬಿದ್ದ ಲೋಕೇಂದ್ರ, ಇದರ ಅಸಲೀ ಕಥೆಯೇನೆಂಬ ಸುಳಿವನ್ನು ಕಿಂಚಿತ್ತೂ ಬಿಟ್ಟುಕೊಟ್ಟಿಲ್ಲ. ತನ್ನನ್ನು ವಾರಗಳ ಕಾಲ ಆವರಿಸಿಕೊಂಡು ಕಾಡಿದ ಈ ಕಥೆ ಸಿನಿಮಾ ರೂಪದಲ್ಲಿ ಎರಡು ತಾಸುಗಳ ಕಾಲಾವಧಿಯ ತುಂಬಾ ಪ್ರೇಕ್ಷಕರನ್ನು ಕಾಡದಿರುತ್ತದಾ ಎಂಬ ತರ್ಕ ಅವರದ್ದು.

ಲೋಕೇಂದ್ರ ಅಟ್ಟಯ್ಯ v/s ಹಂದಿ ಕಾಯೋಳು ಚಿತ್ರದ ಕಥಾ ಹಂದರವನ್ನು ಗೌಪ್ಯವಾಗಿಟ್ಟಿದ್ದರೂ ಕೂಡಾ ಅದು ಬದುಕಿಗೆ ಹತ್ತಿರಾದ, ಲೋಕನಿಂದಿತ ಜೀವಗಳ ಒಡಲ ತುಡಿತ ಹೊಂದಿರೋ ಕಥೆ ಎಂಬುದು ಪಕ್ಕಾ. ತಿಂಗಳ ಹಿಂದೆ ಅವರು ಈ ಚಿತ್ರದ ಆಡಿಯೋ ಮತ್ತು ಟೀಸರ್ ಅನಾವರಣಗೊಳಿಸಿ ಅದೇ ವೇದಿಕೆಯಲ್ಲಿ ತಾವು ಬರೆದ ಆಕಾಶ ಬುಟ್ಟಿ ಕಾದಂಬರಿಯನ್ನೂ ಬಿಡುಗಡೆಗೊಳಿಸಿದ್ದರು. ಅವರನ್ನು ಹತ್ತಿರದಿಂದ ಬಲ್ಲವರಿಗೆ, ಅವರ ಸಾಹಿತ್ಯ ಕೃಷಿಯ ಪರಿಚಯ ಇರುವವರಿಗೆ ಆ ವಿಚಾರದಲ್ಲಿ ಯಾವ ಅನುಮಾನವೂ ಉಳಿಯುವುದಿಲ್ಲ. ಯಾಕೆಂದರೆ ಲೋಕೇಂದ್ರ ಬರೆದಿರೋ ಆಕಾಶ ಬುಟ್ಟಿಯೆಂಬ ಕಾದಂಬರಿಯ ಕಥಾ ವಸ್ತುವೇ ಅಂಥಾದ್ದಿದೆ.

ಬೆಂಗಳೂರಿನ ಮಲ್ಲತ್ತಹಳ್ಳಿಯ ರೈಪಾಪಿ ಕುಟುಂಬದಿಂದ ಬಂದವರು ಲೋಕೇಂದ್ರ. ಬೆಳೆದ ಬೆಂಗಳೂರು ನಗರ ಎದೆ ಮೇಲೇ ಬಂದಂತಾಗಿ ಬೆಚ್ಚಿಬಿದ್ದ ಬೆಂಗಳೂರಿನ ಆಸುಪಾಸಿನ ಹಳ್ಳಿಗರಿದ್ದಾರಲ್ಲಾ? ಅದೇ ತಲ್ಲಣಗಳನ್ನು ಮೈ ಮನಸುಗಳಿಗೆ ತುಂಬಿಕೊಂಡು ಅದನ್ನೇ ತಮ್ಮ ಹಾಡಿನ ಧ್ವನಿಯಾಗಿಸಿಕೊಂಡವರು, ಬರವಣಿಗೆಯ ಕಸುವಾಗಿಸಿಕೊಂಡವರು ಲೋಕೇಂದ್ರ. ಬೆಂಗಳೂರಿಗೆ ಸೇರಿದ ಹಳ್ಳಿ ಹುಡುಗ ಲೋಕೇಂದ್ರಗೆ ಈ ನಗರಕ್ಕೆ ಬದುಕು ಅರಸಿ ಬರೋ ಪ್ರತೀ ಜೀವಗಳ ಅನಾಥ ಪ್ರಜ್ಞೆಗೆ ಕಣ್ಣಾಗೋ ಸೂಕ್ಷ್ಮತೆಯಿದೆ. ಇಲ್ಲಿನ ಸಮುದ್ರದಂಥಾ ಜನಸಾಗರದಲ್ಲಿ ನಿಂತ ನಾನಾ ಥರದ ಬದುಕುಗಳ ಜಾಡು ಹಿಡಿಯುವ ಸಂವೇದನೆಯೂ ಇದೆ. ಅವರು ನಿರ್ದೇಶನ ಮಾಡಿರುವ ಅಟ್ಟಯ್ಯ v/s ಹಂದಿ ಕಾಯೋಳು ಚಿತ್ರ ಮುಖ್ಯವಾಗೋದು ಈ ಕಾರಣದಿಂದಲೇ.

ಬೆಂಗಳೂರೆಂಬ ರಾಕ್ಷಸ ನಗರಿ ಲೋಕೇಂದ್ರ ಹುಟ್ಟಿ ಬೆಳೆದ ಊರನ್ನು, ಹಿರೀಕರು ಉತ್ತಿ ಬೆಳೆದ ಹೊಲಗಳನ್ನು ಅಕ್ಷರಶಃ ನುಂಗಿ ನಗುತ್ತಿದೆ. ಆದರೂ ಹಳ್ಳಿ ಪ್ರಜ್ಞೆಯನ್ನು ಜಾಗೃತವಾಗಿರಿಸಿಕೊಂಡಿರೋ ಅವರು ಗಾಂಧಿನಗರದ ಹೊರಗಿದ್ದುಕೊಂಡೇ ಚಿತ್ರ ನಿರ್ದೇಶನ ಮಾಡಬೇಕಂದುಕೊಂಡು ಅದರಲ್ಲಿ ಗೆಲುವು ಕಂಡಿರೋ ಸಾಹಸಿ. ಸೂಪರ್ ಸ್ಟಾರ್ ರಜನೀಕಾಂತ್‌ರಂಥವರೇ ನಟಿಸಬಹುದಾದಂಥಾ ಕಥೆಯನ್ನೂ ರೆಡಿ ಮಾಡಿಟ್ಟುಕೊಂಡಿರೋ ಉತ್ಸಾಹಿ. ಈ ಚಿತ್ರಕ್ಕೆ ಅಟ್ಟಯ್ಯ v/s ಹಂದಿ ಕಾಯೋಳು ಎಂಬ ಹೆಸರಿಟ್ಟಿದ್ದಕ್ಕೂ ಅವರಲ್ಲಿ ನಿಖರವಾದ ಕಾರಣಗಳಿವೆ. ತಮ್ಮ ಆಸುಪಾಸಿನವರೇ ಈ ಟೈಟಲ್ಲಿನ ಬಗ್ಗೆ ಅಸಮಾಧಾನ ಹೊಂದಿದ್ದರೂ ಲೋಕೇಂದ್ರರಿಗೆ ಆ ಬಗ್ಗೆ ಸಮಾಧಾನವಿದೆ. ಈ ಸಿನಿಮಾ ಕನ್ನಡ ಚಿತ್ರರಂಗದಲ್ಲಿಯೇ ವಿಭಿನ್ನವಾದ ಛಾಪೊಂದನ್ನು ಮೂಡಿಸುತ್ತದೆ ಎಂಬ ನಂಬಿಕೆಯೂ ಇದೆ.

ಒಟ್ಟಾರೆಯಾಗಿ ಆಕ್ರೇಸ್ಟ್ರಾಗಳಲ್ಲಿ ಹಾಡಿಕೊಂಡು, ಸಾಹಿತ್ಯದ ಗುಂಗಿಗೆ ಬಿದ್ದಿದ್ದ ಸಂವೇದನಾಶೀಲ ಹುಡುಗ ಲೋಕೇಂದ್ರ ಈಗ ನಿರ್ದೇಶಕರಾಗಿದ್ದಾರೆ. ಅವರ ಚೊಚ್ಚಲ ಚಿತ್ರ ಅಟ್ಟಯ್ಯ v/s ಹಂದಿ ಕಾಯೋಳು ಬಿಡುಗಡೆಗೆ ಸಜ್ಜುಗೊಂಡಿದೆ. ಅವರ ಕಡೆಯಿಂದ ಇನ್ನಷ್ಟು ಭಿನ್ನ ಜಾಡಿನ ಚಿತ್ರಗಳು ಕನ್ನಡ ಚಿತ್ರರಂಗಕ್ಕೆ ಜಮೆಯಾಗಿ, ಪ್ರೇಕ್ಷಕರ ಮನಸಲ್ಲುಳಿಯುವಂತಾಗಲಿ…

 

Continue Reading

ಕಲರ್ ಸ್ಟ್ರೀಟ್

ಲೇಖಾ ಚಂದ್ರ: ಹಾಸನದಿಂದ ಬಂದ ಚಂದಿರನ ತುಂಡು!

Published

on

ಇದೀಗ ಹಾಡುಗಳ ಮೂಲಕವೇ ಪ್ರೇಕ್ಷಕರ ಗಮನವನ್ನು ಸಂಪೂರ್ಣವಾಗಿ ತನ್ನತ್ತ ತಿರುಗಿಕೊಳ್ಳುವಂತೆ ಮಾಡಿರೋ ಚಿತ್ರ ಯಾರಿಗೆ ಯಾರುಂಟು. ಕಿರಣ್ ಗೋವಿ ನಿರ್ದೇಶನದ ಈ ಚಿತ್ರದಲ್ಲಿ ಲೇಖಾ ಚಂದ್ರ ಕೂಡಾ ನಾಯಕಿಯಾಗಿ ನಟಿಸಿದ್ದಾರೆ. ಅನಿರೀಕ್ಷಿತವಾಗಿ ಚಿತ್ರರಂಗಕ್ಕೆ ಬಂದು ಆ ಬಳಿಕ ಆಕಸ್ಮಿಕ ತಿರುವುಗಳ ಮೂಲಕ, ತನ್ನೊಳಗಿನ ನಟನೆಯ ತಾಕತ್ತಿನ ಮೂಲಕವೇ ನಾಯಕಿಯಾಗಿ ನೆಲೆ ಕಂಡುಕೊಂಡಿರೋ ಲೇಖಾಗೆ ಈ ಚಿತ್ರದಲ್ಲಿ ಚಾಲೆಂಜಿಂಗ್ ಆದೊಂದು ಪಾತ್ರ ಸಿಕ್ಕಿದೆ.

ಲೇಖಾ ಚಂದ್ರ ಈ ಚಿತ್ರವನ್ನು ಒಪ್ಪಿಕೊಂಡಿರುವುದೇ ಚೆಂದದ ಕಥೆಯ ಕಾರಣದಿಂದ. ನಿರ್ದೇಶಕ ಕಿರಣ್ ಗೋವಿಯವರು ಆರಂಭದಲ್ಲಿ ಇಡೀ ಕಥೆಯನ್ನು ಕಣ್ಣಿಗೆ ಕಟ್ಟುವಂತೆ ಹೇಳಿದ್ದರಂತೆ. ಇದರಲ್ಲಿ ಲೇಖಾ ನಿರ್ವಹಿಸೋ ಪಾತ್ರದ ಹಾವ ಭಾವ ಸೇರಿದಂತೆ ಎಲ್ಲವನ್ನೂ ಇಂಚಿಂಚಾಗಿ ಬಿಡಿಸಿಟ್ಟಿದ್ದರಂತೆ. ಈ ಕಥೆಯ ಸೊಗಸಿನ ಮನಸೋತ ಲೇಖಾ ಬೇರೇನೂ ಯೋಚಿಸದೇ ಈ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ.

ಯಾರಿಗೆ ಯಾರುಂಟು ಚಿತ್ರದಲ್ಲಿರುವ ಮೂವರು ನಾಯಕಿಯರಲ್ಲಿ ಲೇಖಾ ಚಂದ್ರ ಕೂಡಾ ಒಬ್ಬರು. ಇಲ್ಲಿ ಅವರ ಪಾತ್ರ ಮೇಚೂರ್ಡ್ ಶೇಡ್ ಹೊಂದಿರುವಂಥಾದ್ದು. ಈಗಿನ ಹುಡುಗೀರು ಪ್ರೀತಿ ಪ್ರೇಮವೂ ಸೇರಿದಂತೆ ಪ್ರತಿಯೊಂದನ್ನೂ ಲೈಟ್ ಆಗಿ ತೆಗೆದುಕೊಳ್ಳೋದು ಮಾಮೂಲು. ಆದರೆ ಈ ಚಿತ್ರದಲ್ಲಿ ಲೇಖಾರ ಪಾತ್ರ ಅದಕ್ಕೆ ತದ್ವಿರುದ್ಧವಾದದ್ದು. ಅದು ಇಡೀ ಚಿತ್ರಕ್ಕೇ ಒಂದು ಮಹತ್ವದ ತಿರುವು ನೀಡುವಂಥಾ ರೋಲು. ಇಂಥಾ ಕಾಡೋ ಕ್ಯಾರೆಕ್ಟರೊಂದನ್ನು ಆವಾಹಿಸಿಕೊಳ್ಳುವಂತೆ ಮಾಡಿದ ನಿರ್ದೇಶಕ ಕಿರಣ್ ಗೋವಿ, ಯಾವುದಕ್ಕೂ ಕೊರತೆಯಾಗದಂತೆ ಚಿತ್ರವನ್ನು ಸುಂದರವಾಗಿ ರೂಪಿಸಿರುವ ನಿರ್ಮಾಪಕರಾದ ರಘುನಾಥ್, ಕೋರಿಯೋಗ್ರಾಫರ್ ಮೋಹನ್, ಸಂಗೀತ ನಿರ್ದೇಶಕ ಬಿ.ಜೆ ಭರತ್, ಛಾಯಾಗ್ರಾಹಕ ರಾಕೇಶ್ ಸೇರಿದಂತೆ ಇಡೀ ಚಿತ್ರ ತಂಡದ ಮೇಲೆ ಲೇಖಾಗೆ ಅಕ್ಕರೆಯಿದೆ.

ಈಗಾಗಲೇ ಶ್ರೇಯಾ ಘೋಶಾಲ್ ಹಾಡಿರೋ ‘ಧ್ಯಾನಿಸಿ ಕಾಯುವೆನು ನಿನ್ನ. ಕೇಳದೆ ದೋಚಿ ಬಿಡು ನನ್ನ. ಭಾಷೆಯೇ ಸಾಲದು ಪ್ರೀತಿ ಮಾತಾಡಲು’ ಎಂಬ ಹಾಡೀಗ ಹಿಟ್ ಆಗಿದೆಯಲ್ಲಾ? ಅದರಲ್ಲಿ ಮೋಹಕವಾಗಿ ನಟಿಸಿದ ಖುಷಿ ಲೇಖಾರದ್ದು. ರಾಜಸ್ಥಾನದ ಸುಂದರ ವಾತಾವರಣದಲ್ಲಿ ಸೆರೆ ಹಿಡಿಯಲ್ಪಟ್ಟಿರೋ ಈ ಹಾಡಿನ ಬಗ್ಗೆ ಅವರಲ್ಲೊಂದು ಮೋಹವಿದೆ. ಈ ಚಿತ್ರ ತನ್ನ ಸಿನಿಮಾ ಯಾನಕ್ಕೊಂದು ಹೊಸಾ ಆಯಾಮ ತಂದುಕೊಡುತ್ತದೆ ಎಂಬ ಭರವಸೆ ಹೊಂದಿರೋ ಲೇಖಾ ಚಂದ್ರರ ಪ್ರಕಾರ ಒಂದು ಅಚ್ಚುಕಟ್ಟಾದ ಚಿತ್ರದಲ್ಲಿ ಏನೆಲ್ಲ ಇರಬೇಕೋ ಅದೆಲ್ಲವನ್ನೂ ಯಾರಿಗೆ ಯಾರುಂಟು ಚಿತ್ರ ಒಳಗೊಂಡಿದೆ.

ಹೀಗೆ ಈಗ ಯಾರಿಗೆ ಯಾರುಂಟು ಚಿತ್ರದಲ್ಲಿ ನಾಯಕಿಯಾಗಿರೋ ಲೇಖಾ ಚಂದ್ರ ಮೂಲತಃ ಹಾಸನದ ಹುಡುಗಿ. ಹಾಸನ ನಗರದ ವಿಜಯನಗರದಲ್ಲಿಯೇ ಹುಟ್ಟಿ ಬೆಳೆದ ಲೇಖಾ ವಿದ್ಯಾಭ್ಯಾಸ ಪೂರೈಸಿಕೊಂಡಿದ್ದೆಲ್ಲ ಅಲ್ಲಿಯೇ. ಇಲ್ಲಿನ ಎವಿಕೆ ಕಾಲೇಜಿನಲ್ಲಿ ವ್ಯಾಸಂಗ ಮಾಡಿರೋ ಅವರಿಗೆ ನಟಿಯಾಗೋ ಕನಸೇನೂ ಇರಲಿಲ್ಲ. ಆದರೆ ಅವರೊಳಗೂ ಬಣ್ಣದ ಕನಸು ತುಂಬಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುವಂತೆ ಪ್ರೇರೇಪಿಸಿದ್ದ ಅಕ್ಕ ಸೌಮ್ಯಾ ಚಂದ್ರ!

ಲೇಖಾರ ಅಕ್ಕ ಸೌಮ್ಯಾಗೆ ಆರಂಭದಿಂದಲೂ ಚಿತ್ರರಂಗದ ಮೇಲೆ ಮೋಹ. ಆ ಜಗತ್ತಿನದ್ದೇ ಕನಸು. ಆದರೆ ಸೌಮ್ಯಾ ತನ್ನ ಕನಸನ್ನೆಲ್ಲ ತಂಗಿಯ ಮೂಲಕ ನನಸು ಮಾಡಿಕೊಳ್ಳುವ ಇರಾದೆ ಹೊಂದಿದ್ದರು. ಲೇಖಾರೊಳಗೆ ನಟಿಯಾಗೋ ಕನಸು ಬಿತ್ತಿದ್ದಲ್ಲದೇ ಅದರತ್ತ ಪ್ರಯತ್ನ ಪಡುವಂತೆಯೂ ಸೌಮ್ಯಾ ಪ್ರೇರೇಪಿಸಿದ್ದರು. ಹೀಗೆ ಬಣ್ಣದ ಕನಸು ತುಂಬಿಕೊಂಡ ಲೇಖಾ ಚಂದ್ರ ಅಚ್ಚರಿದಾಯಕವಾಗಿ ಮೊದಲ ಪ್ರಯತ್ನದಲ್ಲಿಯೇ ನಾಯಕಿಯಾಗಿ ಹೊರ ಹೊಮ್ಮಿದ್ದರು. ಅವನು ಹೇಮಂತ್ ಅವಳು ಸೇವಂತಿ ಚಿತ್ರದ ನಾಯಕಿಯಾಗಿಯೂ ಆಯ್ಕೆಯಾಗಿದ್ದರು. ಯಾವುದೇ ನಟನಾ ತರಬೇತಿ ಪಡೆಯದಿದ್ದರೂ ನಂಬಿಕೆಯಿಟ್ಟು ನಾಯಕಿಯಾಗೋ ಅವಕಾಶ ಕಲ್ಪಿಸಿದವರು ಸುಧಾಕರ ಬನ್ನಂಜೆ.

ಮೊದಲ ಚಿತ್ರದಲ್ಲಿಯೇ ನಟನೆಯಲ್ಲಿ ಗಮನ ಸೆಳೆದ ಲೇಖಾ ಆ ಬಳಿಕ ಕೃಷ್ಣ ರುಕ್ಕು ಚಿತ್ರದಲ್ಲಿಯೂ ನಾಯಕಿಯಾಗಿದ್ದರು. ಆದರೆ ಅವರ ವೃತ್ತಿ ಜೀವನಕ್ಕೆ ಅನಿರೀಕ್ಷಿತ ಮೈಲೇಜು ಕೊಟ್ಟಿದ್ದು ವಜ್ರಕಾಯ ಚಿತ್ರ. ಇದರಲ್ಲಿ ಲೇಖಾ ಚಂದ್ರ ಶಿವಣ್ಣನ ತಂಗಿಯ ಪಾತ್ರದಲ್ಲಿ ನಟಿಸಿ ಎಲ್ಲರ ಗಮನ ಸೆಳೆದಿದ್ದರು. ಅದಾದ ನಂತರ ಸಾಲು ಸಾಲು ಅವಕಾಶ ಬಂದಿದ್ದು ನಿಜ. ಆದರೆ ಒಂದು ಕಥೆ ಬಂದರೆ ಅದರಲ್ಲಿ ಪಾತ್ರವಾಗೋದೇ ಪುಣ್ಯ ಅನ್ನಿಸದೇ ನಟಿಸಬಾರದೆಂಬ ನಿಲುವಿನ ಲೇಖಾ ಕಥೆಯ ಆಯ್ಕೆಯಲ್ಲಿ ಕಟ್ಟು ನಿಟ್ಟಾದರು. ಈ ನಡುವೆ ಕಿರೀಟ ಚಿತ್ರದಲ್ಲಿ ನಟಿಸಿರೋ ಅವರು ಫೈಟರ್ ಚಿತ್ರದಲ್ಲಿ ವಿನೋದ್ ಪ್ರಭಾಕರ್ ಅವರಿಗೂ ನಾಯಕಿಯಾಗಿ ನಟಿಸಿದ್ದಾರೆ. ಈ ಚಿತ್ರವೂ ಬಿಡುಗಡೆಯ ಹೊಸ್ತಿಲಲ್ಲಿದೆ.

Continue Reading

Trending

Copyright © 2018 Cinibuzz