Connect with us

ಸಂದರ್ಶನ

ಅಂತರಾಳ ತೆರೆದಿಟ್ಟ ಅಯೋಗ್ಯ

Published

on

ಸಿನಿಮಾ ಜಗತ್ತಿನ ಆಗುಹೋಗುಗಳನ್ನು ಓದುಗರ ಮುಂದಿಡುತ್ತಲೇ ಆನ್‌ಲೈನ್ ಓದುಗರಿಗೆ ಹೊಸಾ ರುಚಿ ಹತ್ತಿಸಿದ ಹೆಗ್ಗಳಿಕೆ ನಮ್ಮದು. ನಿಮ್ಮೆಲ್ಲರ ಪ್ರೀತಿಯ ಬೆಂಬಲದಿಂದಲೇ ಇದು ಸಾಧ್ಯವಾಗಿದೆ ಎಂಬ ನಂಬಿಕೆಯೊಂದಿಗೆ ಮತ್ತೊಂದು ಸಾಹಸಕ್ಕೆ ಕೈಯಿಟ್ಟಿದ್ದೇವೆ. ಅದರಫಲವಾಗಿ ಮೂಡಿ ಬಂದಿರೋದು `ನನ್ ಲೈಫ್ ಸ್ಟೋರಿ’ ಕಾರ್ಯಕ್ರಮ. ಈ ಮೂಲಕ ಇನ್ನು ಪ್ರತೀ ವಾರವೂ ಒಬ್ಬೊಬ್ಬರ ಸಿನಿ ಬದುಕಿನ ಕಥನಗಳು ನಿಮಗೆ ನೋಡಲು ಸಿಗಲಿವೆ. ಅದರ ಆರಂಭವಾಗಿ ನಟ ನೀನಾಸಂ ಸತೀಶ್ ತಮ್ಮ ಬದುಕಿನ ಮಜಲುಗಳನ್ನು ಬಿಚ್ಚಿಟ್ಟಿದ್ದಾರೆ. ಈ ವರೆಗೆ ಸತೀಶ್ ಅವರು ಎಲ್ಲೆಂದರೆಲ್ಲಯೂ ಹೇಳಿಕೊಳ್ಳದ ಇಂಟರೆಸ್ಟಿಂಗ್ ವಿಚಾರಗಳು ಇಲ್ಲಿವೆ. ನಿಮಗಿಷ್ಟವಾಗುತ್ತದೆನ್ನುವ ನಂಬಿಕೆ ನಮ್ಮದು. #

Advertisement
Click to comment

Leave a Reply

Your email address will not be published. Required fields are marked *

ಕಲರ್ ಸ್ಟ್ರೀಟ್

ನಟ ನಟಿಯರ ಚಿತ್ತ ಬಡ ಕಲಾವಿದನ ಮನೆಯತ್ತ ನೆಡಬಹುದೇ?

Published

on

ಕಾಲು ಸೋತ ಕಲಾವಿದರನ್ನು ಕಸಕ್ಕಿಂತಲೂ ಕಡೆಯಾಗಿ ಕಾಣೋ ದುರ್ಬುದ್ಧಿ ಬಣ್ಣದ ಜಗತ್ತಿನ ಹಳೇ ಚಾಳಿ. ಇತ್ತ ಕಲಾವಿದರ ನೆರವಿಗೆಂದೇ ಸ್ಥಾಪನೆಯಾಗಿರೋ ಕಲಾವಿದರ ಸಂಘ ಅದೇನು ಕೆಲಸ ಮಾಡುತ್ತಿದೆಯೋ ಗೊತ್ತಿಲ್ಲ. ಬೆಂಗಳೂರಿನ ವಿಜಯ ನಗರದ ದಿಕ್ಕಿನಲ್ಲಿರುವ ಶೀಟು ಮನೆಯೊಂದರಲ್ಲಿ ಕಲೆಯನ್ನೇ ನೆಚ್ಚಿದ್ದ ಜೀವವೊಂದು ನರಳುತ್ತಿದೆ. ಸಾಕ್ಷಾತ್ತು ವಿಷ್ಣುವರ್ಧನ್ ಅವರೊಂದಿಗೇ ತೆರೆ ಹಂಚಿಕೊಂಡು, ಎಂಭತ್ತಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ಈ ಕಲಾವಿದನ ಪುಟ್ಟ ಮನೆಯತ್ತ ಚಿತ್ರರಂಗದ ನೆರಳೂ ಸುಳಿದಿಲ್ಲ!

ಅವರು ನಟರಾಜ್. ಈ ಫೋಟೋ ನೋಡಿದರೇನೇ ಅವರು ನಿರ್ವಹಿಸಿರೋ ಒಂದಷ್ಟು ಪಾತ್ರಗಳಾದರೂ ನೆನಪಾದಾವು. ಇಂಥಾ ಕಲಾವಿದ ಈವತ್ತಿಗೆ ಗೂಡಿನಂಥಾ ಮನೆಯೊಂದರಲ್ಲಿ ಅಕ್ಷರಶಃ ಹಾಸಿಗೆ ಹಿಡಿದು ಮಲಗಿದ್ದಾರೆ. ಅವರಿಗೆ ಈಗ್ಗೆ ಐದು ತಿಂಗಳ ಹಿಂದೆ ಸ್ಟ್ರೋಕ್ ಆಗಿತ್ತು. ಸಾಲ ಸೋಲ ಮಾಡಿ ಹೇಗೋ ಜೀವಾಪಾಯದಿಂದ ಬಚಾವಾಗಿ ಮನೆಗೆ ಮರಳಿದ್ದರೂ ಅವರಿಗೀಗ ಯಾವ ಆಸರೆಯೂ ಇಲ್ಲ. ಸರಿಸುಮಾರು ಆರೇಳು ತಿಂಗಳಿಂದ ಅವರು ಕೆಲಸ ಮಾಡಿಲ್ಲ. ಅತ್ತ ಡಿಗ್ರಿ ಓದುತ್ತಿರೋ ಮಗಳ ಖರ್ಚುವೆಚ್ಚ ನೋಡಿಕೊಳ್ಳಲೂ ಆಗುತ್ತಿಲ್ಲ… ದಿನನಿತ್ಯ ಕಾಯಿಲೆ ಬಿದ್ದಿದ್ದಾರೆಂದು ಗೊತ್ತಿದ್ದರೂ ಮನೆಮುಂದೆ ನಿಂತು ಕಿರಿಕ್ಕು ಮಾಡೋ ನಿರ್ದಯಿ ಸಾಲಗಾರರ ಬಾಧೆಯೂ ಸೇರಿಕೊಂಡು ನಟರಾಜ್ ಕಂಗಾಲಾಗಿದ್ದಾರೆ.

ನಟರಾಜ್ ಮಧುಗಿರಿ ಮೂಲದವರು. ಸಾಹಸ ಸಿಂಹ ವಿಷ್ಣುವರ್ಧನ್ ನಟಿಸಿದ್ದ ಬಂಗಾರದ ಜಿಂಕೆ ಚಿತ್ರೀಕರಣ ನೋಡೋ ಮೂಲಕವೇ ಕಲಾವಿದನಾಗೋ ಕನಸು ಕಂಡವರು. ನಂತರ ೧೯೮೫ರಲ್ಲಿ ವಿಷ್ಣು ನಾಯಕರಾಗಿದ್ದ ನನ್ನ ಪ್ರತಿಜ್ಞೆ ಎಂಬ ಸಿನಿಮಾ ಮೂಲಕ ಬಣ್ಣ ಹಚ್ಚಿದ್ದ ನಟರಾಜ್ ಆ ಬಳಿಕ ಐದಾರು ವರ್ಷ ಬಹಳಷ್ಟು ಕಷ್ಟಪಟ್ಟಿದ್ದರು. ಬಳಿಕ ಇದನ್ನೇ ನಂಬಿಕೊಂಡರೆ ಆಗೋದಿಲ್ಲ ಅಂದುಕೊಂಡು ಡೇವಿಡ್ ಎಂಬವರ ಜೊತೆ ಸೇರಿ ಮದ್ರಾಸಿಗೆ ಹೋಗಿ ಅಲ್ಲಿಯೂ ನಾನಾ ಕೆಲಸ ಮಾಡುತ್ತಾ ಬದುಕಲೋಸ್ಕರ ಕಷ್ಟ ಪಟ್ಟಿದ್ದರು. ಮತ್ತೆ ವಾಪಾಸಾಗಿ ಬೆಂಗಳೂರಿನಲ್ಲಿಯೇ ಖಾಸಗಿ ಸಂಸ್ಥೆಯೊಂದರಲ್ಲಿ ಆಫೀಸ್ ಬಾಯ್ ಆಗಿಯೂ ಕೆಲಸಕ್ಕೆ ಸೇರಿಕೊಂಡಿದ್ದರು. ಮದುವೆಯಾದ ನಂತರದಲ್ಲಿ ವಿಷ್ಣು ಅಭಿನಯದ ಏಕದಂತ ಚಿತ್ರವೂ ಸೇರಿದಂತೆ ಒಂದಷ್ಟು ಅವಕಾಶಗಳು ಬರಲಾರಂಭಿಸಿದ್ದವು. ಶಿವಣ್ಣನ ಸಂತ ಚಿತ್ರದಲ್ಲಿ ಮುಖ್ಯ ವಿಲನ್ ಆಗಿಯೂ ನಟರಾಜ್ ಅಬ್ಬರಿಸಿದ್ದರು. ಆ ನಂತರ ಅವರ ನಟನಾ ಲಿಸ್ಟಿಗೆ ಎಂಭತ್ತಕ್ಕೂ ಹೆಚ್ಚು ಸಿನಿಮಾಗಳು ಸೇರಿಕೊಂಡಿದ್ದವು.

ಆದರೆ ಅದ್ಯಾವ ಅವಕಾಶ ಬಂದರೂ ಕೂಡಾ ಇಂತಿಷ್ಟೇ ಸಂಭಾವನೆ ಬೇಕು ಅಂತ ನಟರಾಜ್ ಪಟ್ಟು ಹಿಡಿದವರಲ್ಲ. ಕೊಟ್ಟಷ್ಟನ್ನು ಇಸಿದುಕೊಂಡು ಸ್ವಾಭಿಮಾನದಿಂದ ಬದುಕುತ್ತಾ, ಖಾಸಗಿ ಟ್ರಾವೆಲ್ಸ್ ಸಂಸ್ಥೆಯ ಕೆಲಸವನ್ನೂ ಮುಂದುವರೆಸಿಕೊಂಡು ಬದುಕುತ್ತಿದ್ದ ನಟರಾಜ್‌ಗೆ ನಿಧಾನಕ್ಕೆ ಅನಾರೋಗ್ಯ ಉಲ್ಭಣಿಸಲಾರಂಭಿಸಿತ್ತು. ಈಗ್ಗೆ ಐದು ತಿಂಗಳ ಹಿಂದೆ ಸ್ಟ್ರೋಕ್ ಕೂಡಾ ಆಗಿತ್ತು. ಅದರ ತೀವ್ರತೆ ಎಷ್ಟಿತ್ತೆಂದರೆ ನಟರಾಜ್ ಹದಿನೈದು ದಿನ ಕೋಮಾದಲ್ಲಿದ್ದರು. ಹೇಗೋ ಪವಾಡ ಸದೃಶವಾಗಿ ಬದುಕುಳಿದ ಅವರು ತಿಂಗಳುಗಟ್ಟಲೆ ಆಸ್ಪತ್ರೆಯಲ್ಲಿಯೇ ಕಳೆದಿದ್ದಾರೆ. ಅವರ ಪತ್ನಿ ಇದ್ದ ಚೂರು ಪಾರು ಒಡವೆ ಮಾರಿ ಹೇಗೋ ಸಂಭಾಳಿಸಿದ್ದಾರೆ. ಆಸ್ಪತ್ರೆಡ ಬಿಲ್ಲು ಎಂಟು ಲಕ್ಷವಾಗಿತ್ತು. ಅದನ್ನೂ ನಟರಾಜ್ ಸಾಲಸೋಲ ಮಾಡಿ ಕಟ್ಟಿದ್ದಾರೆ.

ಡಾ ಸತೀಶ್ ಎಂಬವರರು ನಟರಾಜ್ ಅವರಿಗೀಗ ಚಿಕಿತ್ಸೆ ಕೊಡುತ್ತಿದ್ದಾರೆ. ಸದ್ಯ ಮನೆಯಲ್ಲಿಯೇ ವಿಶ್ರಾಂತಿ ಪಡೆಯುತ್ತಿರೋ ನಟರಾಜ್ ಪಾಲಿಗೆ ಯಾವ ಆಸರೆಯೂ ಇಲ್ಲ. ಮಡದಿ ಗೃಹಿಣಿ. ಮಗಳೀಗ ಡಿಗ್ರಿ ವ್ಯಾಸಂಗ ಮಾಡುತ್ತಿದ್ದಾಳೆ. ಆದರೆ ಏನೆಂದರೆ ಏನನ್ನೂ ಸಂಭಾಳಿಸಲಾಗದ ಸ್ಥಿತಿ ನಟರಾಜ್ ಅವರದ್ದು. ಅವರ ಪಾಲಿಗೆ ಆಸರೆ ಅಂತಿರೋದು ಕಡಿಮೆ ಮೊತ್ತಕ್ಕೆ ಭೋಗ್ಯಕ್ಕಿರೋ ಸಣ್ಣ ಮನೆ ಮಾತ್ರ. ಈವರೆಗೂ ಅವರು ಕೆಲಸ ಮಾಡುತ್ತಿದ್ದ ಟ್ರಾವೆಲ್ಸ್ ಹುಡುಗರೆಲ್ಲ ಎಂಭತ್ತು ಸಾವಿರದಷ್ಟನ್ನು ಕಲೆಕ್ಷನ್ ಮಾಡಿ ಕೊಟ್ಟಿದ್ದಾರೆ. ನಟರಾಜ್ ಪಾಲಿಗೆ ಸಿಕ್ಕ ಸಹಾಯ ಅದೊಂದೇ. ಆದರೆ ಚಿತ್ರರಂಗದ ಯಾರೊಬ್ಬರೂ ಈ ಕ್ಷಣದ ವರೆಗೂ ಅವರನ್ನು ನೋಡಿಕೊಂಡು ಹೋಗುವ, ಫೋನು ಮಾಡಿ ಮಾತಾಡಿಸುವ ಸೌಜನ್ಯವನ್ನೂ ತೋರಿಸಿಲ್ಲ.

ನಟರಾಜ್ ಸ್ವಾಭಿಮಾನಿ. ಯಾರೆದುರಿಗೂ ಕೈ ಚಾಚಿದವರಲ್ಲ. ಆದರೀಗ ಅವರು ಅನಾರೋಗ್ಯದ ಆಘಾತದಿಂದ ಕಂಗಾಲಾಗಿದ್ದಾರೆ. ಚಿತ್ರರಂಗದ ಮಂದಿ ಇನ್ನಾದರೂ ಅವರ ನೆರವಿಗೆ ಧಾವಿಸಬೇಕಿದೆ. ಅವರ ಆಸ್ಪತ್ರೆ ಖರ್ಚು ಮತ್ತು ಅಕೌಂಟ್ ನಂಬರನ್ನೂ ಇಲ್ಲಿ ದಾಖಲಿಸಿದ್ದೇವೆ. ಎಲ್ಲರೂ ಕೈಲಾದಷ್ಟು ನೆರವಾಗಲು ಪ್ರಯತ್ನಿಸಿ. ನೀವು ಕೊಡೋ ಪ್ರತೀ ರೂಪಾಯಿಯೂ ಈ ಹಿರಿಯ ಕಲಾವಿದನನ್ನು ಮಾನಸಿಕವಾಗಿ ಗಟ್ಟಿಯಾಗಿಸುತ್ತೆ.


Nataraj R
A/C no. 20057179163
IFSC: SBINO009047

#

Continue Reading

ಫೋಕಸ್

ಯುವರಾಜನ ಕಲ್ಯಾಣ ಇದೇ ತಿಂಗಳು ೨೫ಕ್ಕೆ: ನಿಖಿಲ್ ಏನಂದರು ಗೊತ್ತಾ?!

Published

on

ಸೀತಾರಾಮ ಕಲ್ಯಾಣ ಪಕ್ಕಾ ಫ್ಯಾಮಿಲಿ ಸಬ್ಜೆಕ್ಟು. ನಿಮಗೆಲ್ಲಾ ಗೊತ್ತಿರುವಂತೆ ನಮ್ಮ ತಂದೆಯವರು ಸೂರ್ಯವಂಶ, ಚಂದ್ರಚಕೋರಿಯಂಥಾ ಕೌಟುಂಬಿಕ ಕಥಾಹಂದರದ ಸಿನಿಮಾಗಳನ್ನು ನಿರ್ಮಾಣ ಮಾಡಿದವರು. ನಮ್ಮ ಮನೆಯಲ್ಲಿ ನಮ್ಮ ಅಜ್ಜಿ, ಅಪ್ಪ ಎಲ್ಲರೂ ಇವತ್ತಿಗೂ ಆ ಸಿನಿಮಾದ ಪಾತ್ರಗಳನ್ನು ನೆನಪಿಸಿಕೊಳ್ತಾ ಇರ್ತಾರೆ. ದೊಡ್ಡ ಮಟ್ಟದ ಯಶಸ್ಸು ಕೊಟ್ಟ ಸಿನಿಮಾಗಳವು. ಇಂಥಾ ಸಿನಿಮಾ ಗಳು ಬಂದು ಬಹಳಷ್ಟು ವರ್ಷಗಳಾಗಿದ್ದವು. ಈಗ ಸೀತಾರಾಮಕಲ್ಯಾಣದ ಮೂಲಕ ಅದು ರಿಪೀಟ್ ಆಗಲಿದೆ. ಈಗಾಗಲೇ ಸಾಯಿ ಸುಕನ್ಯಾ ಅವರು ಬರೆದಿರುವ ನಿನ್ನ ರಾಜ ನಾನು ನನ್ನ ರಾಣಿ ನೀನು ಹಾಡಂತೂ ಸಿಕ್ಕಾಪಟ್ಟೆ ಪಾಪ್ಯುಲಾರಿಟಿ ಪಡೆದಿದೆ. ಜನ ಖುಷಿಯಿಂದ ಸ್ವೀಕಾರ ಮಾಡಿದ್ದಾರೆ.

ಸೀತಾರಾಮ ಕಲ್ಯಾಣ ಶುರು ಮಾಡುವ ಮುಂಚೆ ನಾವು ಯಾವ ರೀತಿ ಮಾಡಬೇಕು ಅಂತಾ ಅಂದುಕೊಂಡಿದ್ವೋ ಅದಕ್ಕಿಂತಾ ಅದ್ಭುತವಾಗಿ ಸಿನಿಮಾ ಮೂಡಿಬಂದಿದೆ. ನಾವು ಜಾಗ್ವಾರ್ ಸಿನಿಮಾವನ್ನು ಸರಿಸುಮಾರು 173 ಕಾಲ್‌ಶೀಟ್ಗಳಲ್ಲಿ ಶೂಟ್ ಮಾಡಿದ್ವಿ. ಅಷ್ಟೂ ಸಂದರ್ಭದಲ್ಲೂ ನಮ್ಮ ತಂದೆ ಕುಮಾರಸ್ವಾಮಿಯವರು ಹಾಜರಿದ್ದರು. ಈಗ ಅವರು ರಾಜ್ಯದ ಮುಖ್ಯಮಂತ್ರಿಗಳಾಗಿರುವುದರಿಂದ ಅವರದ್ದೇ ಆದ ಜವಾಬ್ದಾರಿಗಳಿವೆ. ಹೀಗಾಗಿ ಅವರು ಸೆಟ್ಗೆ ಬರಲು ಆಗಲೇ ಇಲ್ಲ. ಅವರನ್ನು ತುಂಬಾನೇ ಮಿಸ್ ಮಾಡಿಕೊಂಡ್ವಿ. ಬಹುಮುಖ್ಯವಾದ ಅಂಶವೆಂದರೆ ನಮ್ಮ ತಂದೆಯೇ ಖುದ್ದು ಕತೆ ಕೇಳಿ `ಸೀತಾರಾಮಕಲ್ಯಾಣವನ್ನು ಫೈನಲ್ ಮಾಡಿದ್ದು. ಅವರಿಗೆ ಸಿನಿಮಾ ಕಥೆಮೇಲೆ ಒಳ್ಳೇ ಜಡ್ಜ್‌ಮೆಂಟ್ ಇದೆ. ಸಿನಿಮಾರಂಗದಲ್ಲಿ ನಿರ್ಮಾಪಕರಾಗಿ, ವಿತರಕರಾಗಿ, ಸೂಪರ್ ಹಿಟ್ ಸಿನಿಮಾಗಳನ್ನು ಕೊಟ್ಟವರು ಅವರು. ಎಂಥಾ ಕತೆಯನ್ನು ಜನ ಒಪ್ಪುತ್ತಾರೆ ಅನ್ನೋದು ಅವರಿಗೆ ಗೊತ್ತಿದೆ. ನಾವು ಜಗ್ವಾರ್ ಮಾಡಿದಾಗ, ಅದರ ಮೇಕಿಂಗ್ ಬಗ್ಗೆ ತುಂಬಾ ಒಳ್ಳೇ ಮಾತುಗಳು ಕೇಳಿಬಂದಿದ್ದವು. ಈ ಸಲ ಸೀತಾರಾಮ ಕಲ್ಯಾಣ ಅದನ್ನೂ ಮೀರಿಸುವಂತೆ ತಯಾರಾಗಿದೆ. ನಮ್ಮ ಸಿನಿಮಾದಲ್ಲಿ ಏನಿಲ್ಲವೆಂದರೂ 130ಜನ ಕಲಾವಿದರಿದ್ದಾರೆ. ಇಷ್ಟು ಜನ ಆರ್ಟಿಸ್ಟುಗಳು ಒಂದೇ ಸಿನಿಮಾದಲ್ಲಿ ತೊಡಗಿಸಿಕೊಳ್ಳೋದೆಂದರೆ ಸುಮ್ಮನೇ ಮಾತಲ್ಲ. ಎಲ್ಲರೂ ಒಂದು ಕುಟುಂಬದಂತೆ ಕೆಲಸ ಮಾಡಿದ್ದೇವೆ. ಶರತ್ ಲೋಹಿತಾಶ್ವ ಮತ್ತು ಶಿವರಾಜ್ ಕೆ.ಆರ್. ಪೇಟೆ ಅವರಿಂದ ನಾನು ಈ ಚಿತ್ರದಲ್ಲಿ ಸಾಕಷ್ಟು ಕಲಿತಿದ್ದೀನಿ.

ಒಟ್ಟಾರೆಯಾಗಿ ಹೇಳಬೇಕೆಂದರೆ, ಸೀತಾರಾಮಕಲ್ಯಾಣ ಒಂದು ಪರಿಪೂರ್ಣ ಸಿನಿಮಾ. ಇದು ಸಾಧ್ಯವಾಗಿರೋದು ನಮ್ಮ ಡೈರೆಕ್ಟರ್ ಎ. ಹರ್ಷ ಅವರಿಂದ. ನನ್ನ ಮತ್ತು ಅವರ ಸಂಬಂಧ ಇದೊಂದು ಸಿನಿಮಾದ ಜೊತೆಗೆ ಮುಗಿಯುವಂಥಾದ್ದಲ್ಲ. ಮತ್ತೊಂದು ಸಿನಿಮಾ ಮಾಡೋಣ ಅಂತಾ ಈಗಾಗಲೇ ಹೇಳಿದ್ದೀನಿ. ಆದಷ್ಟು ಬೇಗ ಅದು ಕಾರ್ಯರೂಪಕ್ಕೂ ಬರಲಿದೆ. ಇದೇ ತಿಂಗಳು ೨೫ನೇ ತಾರೀಖು `ಸೀತಾರಾಮಕಲ್ಯಾಣ ತೆರೆಗೆ ಬರುತ್ತಿದೆ. ನಿಮ್ಮೆಲ್ಲರ ಪ್ರೀತಿ, ಸಹಕಾರವಿರಲಿ…
– ನಿಖಿಲ್ ಕುಮಾರ್

#

Continue Reading

ಸಂದರ್ಶನ

ಭೀಕರ ದುರಂತದ ಆಚೀಚೆ ರವಿಚಂದ್ರನ್ ಹೇಳಿದ್ದೇನು?

Published

on

ಕಣ್ಣೆದುರೇ ಕುಸಿದು ಹೋದ ಕೊಡಗಿನ ಜನರ ಬವಣೆಗಳ ಬಗ್ಗೆ ಎಂಥವರಿಗಾದರೂ ಮರುಕ ಹುಟ್ಟುತ್ತದೆ. ಇಡೀ ಕರ್ನಾಟಕದ ಎಲ್ಲ ಕಡೆಗಳಿಂದಲೂ ನೆರವಿನ ಮಹಾಪೂರವೇ ಹರಿದು ಬರುತ್ತಿದೆ. ಇದೀಗ ರವಿಚಂದ್ರ ಚಿತ್ರದ ಮುಹೂರ್ತದ ಸಂದರ್ಭದಲ್ಲಿ ರವಿಚಂದ್ರನ್ ಅವರೂ ಕೂಡಾ ಈ ದುರಂತದ ಬಗ್ಗೆ ಸವಿಸ್ತಾರವಾಗಿ ಮಾತಾಡಿದ್ದಾರೆ. ಒಂದು ಮಹಾ ಪ್ರಾಕೃತಿಕ ದುರಂತದಿಂದ ಎಲ್ಲವನ್ನೂ ಕಳೆದುಕೊಂಡು ನಿಂತಿರುವ ಕೊಡಗಿನ ಜನರತ್ತ ದೂರದೃಷ್ಟಿಯ ನೋಟವನ್ನೂ ಬೀರಿದ್ದಾರೆ.

ಇದು ನಡೆಯಬಾರದಿತ್ತು. ಆದರೆ ಪ್ರಕೃತಿಯ ಪಲ್ಲಟಗಳನ್ನು ತಡೆಯಲು ಹೇಗೆ ಸಾಧ್ಯ? ಏಕಾಏಕಿ ಮನೆ ಮಠ, ಜಮೀನು ಕಳೆದುಕೊಂಡು ಬೀದಿಗೆ ಬಂದ ಜನರನ್ನು ನೋಡಿದರೆ ಮರುಕ ಹುಟ್ಟುತ್ತೆ. ಅಂತವರಿಗೆ ಆಹಾರ, ಅವಶ್ಯಕ ವಸ್ತುಗಳ ಪೂರೈಕೆಯೂ ಆಗುತ್ತಿದೆ. ಆದರೆ ಇದೆಲ್ಲ ಈ ಕ್ಷಣದ ಸ್ಪಂದನೆಯಷ್ಟೇ. ಆದರಿದು ಇಡೀ ಕೊಡಗನ್ನು ಮತ್ತೆ ಮೊದಲಿನಂತೆ ಕಟ್ಟಿನಿಲ್ಲಿಸಲು ಮುಂದಾಗ ಬೇಕಾದ ಕಾಲ… ಇಂಥಾದ್ದೊಂದು ನಿಖರವಾದ ಚಿಂತನೆಯೊಂದಿಗೇ ಮಾತಿಗಿಳಿದವರು ಕ್ರೇಜ಼ಿಸ್ಟಾರ್ ರವಿಚಂದ್ರನ್. ಅವರ ಮಾತಿನ ಲಹರಿ ಕೊಡಗನ್ನು ಮತ್ತೆ ಕಟ್ಟುವ ಮಾಸ್ಟರ್ ಪ್ಲ್ಯಾನಿನಂತಿರೋದು ಸುಳ್ಳಲ್ಲ!

ಈ ಪ್ರಾಕೃತಿಕ ವಿಕೋಪದಿಂದ ಇಡೀ ಕೊಡಗೇ ನಾಮಾವಶೇಷ ಹೊಂದಿದೆ. ಜೀವ ಹೋಗೋದು ಬೇರೆ. ಆದರೆ ಕೊಡಗಿನ ಬಹುತೇಕ ಜನ ಜೀವನವನ್ನೇ ಕಳೆದುಕೊಂಡಿದ್ದಾರೆ. ತಾವೇ ಮಾಡಿಕೊಂಡ ಜಾಗ, ಅದರಲ್ಲಿ ಕಟ್ಟಿದ ಮನೆ ಮತ್ತು ಪ್ರೀತಿಯಿಂದ ಬೆಳೆಸಿದ ತೋಟ… ಇದೆಲ್ಲವೂ ಕಣ್ಣ ಮುಂದೆಯೇ ಕೊಚ್ಚಿಕೊಂಡು ಹೋದಾಗ, ಭೂಮಿಯೊಳಗೆ ಲೀನವಾದಾಗ ಅದನ್ನು ಭರಿಸಿಕೊಳ್ಳೋದು ಕಷ್ಟ. ಹೀಗೆ ಬೀದಿಗೆ ಬಿದ್ದವರು ಮತ್ತೆ ಎದ್ದು ನಿಲ್ಲೋದೂ ತುಸು ಕಷ್ಟ. ಇದೀಗ ಆಹಾರ ಮುಂತಾದವನ್ನು ಸರಬರಾಜು ಮಾಡೋ ಒಂದು ಹಂತ ಮುಗಿದಿದೆ. ಇನ್ನೂ ಅದನ್ನೇ ಮಾಡುತ್ತಾ ಕೂತರೆ ಅದೂ ಕೂಡಾ ಬೀದಿ ಪಾಲಾಗೋ ಅಪಾಯವಿದೆ. ಈಗ ಎದ್ದು ನಿಂತು ಮತ್ತೆ ಬದುಕು ಕಟ್ಟಿಕೊಳ್ಳಲು ಕೊಡವರಿಗೆ ನೆರವಾಗಬೇಕಿರೋ ಕಾಲ.

ಇನ್ನೇನು ವಾರದೊಪ್ಪತ್ತಿನಲ್ಲಿ ಮಳೆ ಕಡಿಮೆಯಾಗಬಹುದು. ಹಾಗಾದ ಕ್ಷಣದಿಂದಲೇ ಅಲ್ಲಿ ಸೂರು ಕಳಕೊಂಡವರಿಗೆಲ್ಲ ಮನೆ ನಿರ್ಮಿಸಿ ಕೊಡುವಲ್ಲಿಂದ ಕೊಡಗನ್ನು ಮತ್ತೆ ಕಟ್ಟೋ ಕೆಲಸ ಆರಂಭವಾಗಬೇಕಿದೆ. ಇದಕ್ಕೆ ಲಕ್ಷ ಕೋಟಿ ದಾನ ಮಾಡೋದು ಮುಖ್ಯವಲ್ಲ. ಲೆಕ್ಕ ಹಾಕದೆ ಎಲ್ಲೆಡೆ ಕಾಸು ಕಲೆಕ್ಷನ್ ಮಾಡಿ ಅದು ಒಂದು ಕಡೆ ಕ್ರೋಢೀಕರಣವಾಗುವಂತೆ ನೋಡಿಕೊಂಡು, ಇಡೀ ಕೊಡಗಿನಲ್ಲಿ ಆಗಬೇಕಾದ ಸೂರುಗಳನ್ನು ಅಂದಾಜಿಸಿ ಅದನ್ನು ಕಟ್ಟಿಕೊಡುವ ಕಾರ್ಯವಾಗಬೇಕಿದೆ. ಅಲ್ಲಿ ಮನೆ ಮಾರಿನ ಜೊತೆ ಭೂಮಿಯ ಹಕ್ಕು ಪತ್ರ, ದಾಖಲೆಗಳೂ ಕೊಚ್ಚಿ ಹೋಗಿವೆಯಂತೆ. ಆದ್ದರಿಂದ ಈಗ ಅದು ನನ್ನದೆಂಬ ಅಹಮ್ಮಿಗೆ ಆಸ್ಪದವೇ ಇಲ್ಲ. ಎಲ್ಲರಿಗೂ ಕೃಷಿ ಭೂಮಿ ಹಂಚಿ ಅದರಲ್ಲಿ ಮನೆ ಕಟ್ಟಿ ಕೊಡುವ ಯಾಗಕ್ಕೆ ಚಾಲನೆ ನೀಡಬೇಕಿದೆ. ಪ್ರವಾಹದಿಂದ ಕೊಡವರನ್ನು ರಕ್ಷಿಸಲು ಯೋಧರಂತೆಯೇ ಕೆಲಸ ಮಾಡಿದ ಸಹಸ್ರಾರು ಮಂದಿ ಮನೆ ಕಟ್ಟಿಕೊಟ್ಟು ಬದುಕಿಗೆ ನೆರವಾಗಲೂ ಮನಸು ಮಾಡಿದರೆ ಕೊಡಗನ್ನು ಮತ್ತೆ ಕಟ್ಟುವ ಕೆಲಸ ಸಲೀಸಾಗುತ್ತೆ.

ಇದಕ್ಕೆ ಚಿತ್ರರಂಗದ ಕಡೆಯಿಂದಲೂ ಖಂಡಿತಾ ಹಣದ ಕ್ರೋಢೀಕರಣವಾಗೇ ಆಗುತ್ತದೆ. ಬೇರೆ ಬೇರೆ ಕ್ಷೇತ್ರಗಳಿಂದಲೂ ಅದು ಆಗುತ್ತದೆ. ಆದರೆ ಈಗ ಬೇಕಿರೋದು ಕೊಡಗನ್ನು ಮತ್ತೆ ಕಟ್ಟುವ ಪ್ಲ್ಯಾನಿಂಗು. ನಿಜ, ಕೊಚ್ಚಿ ಹೋದ ಒಂದೂರನ್ನು ಮತ್ತೆ ಕಟ್ಟೋದು ಅಸಾಧ್ಯ. ಇದನ್ನು ಮಾಡಿಕೊಳ್ಳಲು ಅಲ್ಲಿನ ಜನ ಅಶಕ್ತರಾಗಿದ್ದಾರೆ. ಅವರಿಗೆ ನೆರವಾಗೋದು ಎಲ್ಲರ ಕರ್ತವ್ಯ. ಬರೀ ಅನುಕಂಪ ತೋರಿಸಿ ಬ್ರೆಡ್ಡು ಬನ್ನು ಕಳಿಸಿಕೊಟ್ಟರೆ ಅವರ ಹೊಟ್ಟೆ ತುಂಬಬಹುದಷ್ಟೇ. ಆದರೆ ಬದುಕು ಕಟ್ಟಿ ಕೊಡೋದು ಈಗಿನ ತುರ್ತು ಅಂದ ರವಿಚಂದ್ರನ್ ಅವರ ಮಾತುಗಳಲ್ಲಿ ಕೊಡಗಿನ ಬಗ್ಗೆ ಭಾವುಕತೆಯಾಚೆಯ ಪ್ರ್ಯಾಕ್ಟಿಕಲ್ ಆದ ಕಾಳಜಿ ಎದ್ದು ಕಾಣುತ್ತಿತ್ತು. ಸರ್ಕಾರ ಈ ಬಗ್ಗೆ ಗಮನ ಹರಿಸಬಹುದೇ?

#

Continue Reading

Trending

Copyright © 2018 Cinibuzz