ಸಿಂಪಲ್ ಸುನಿ ನಿರ್ದೇಶನದ ಬಜ಼ಾರ್ ಚಿತ್ರದ ಹಾಡುಗಳನ್ನು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಬಿಡುಗಡೆ ಮಾಡಿದ್ದಾರೆ. ರವಿ ಬಸ್ರೂರ್ ಸಂಗೀತ ನಿರ್ದೇಶನ ಮಾಡಿರುವ, ಆನಂದ್ ಆಡಿಯೋ ಮೂಲಕ ಹೊರ ಬಂದಿರೋ ಈ ಹಾಡುಗಳನ್ನು ಅನಾವರಣಗೊಳಿಸಿದ ದರ್ಶನ್ ಅವರು ಬಜ಼ಾರ್ ಚಿತ್ರದ ಈ ವರೆಗಿನ ಕೆಲಸ ಕಾರ್ಯಗಳನ್ನು ಮೆಚ್ಚಿಕೊಳ್ಳುತ್ತಲೇ ಶುಭ ಕೋರಿದ್ದಾರೆ.

ಸುನಿ ಬೆಂಗಳೂರಿನಲ್ಲಿ ಈಗಲೂ ಒಳಗೊಳಗೇ ನಡೆಯುತ್ತಿರುವ ಪಾರಿವಾಳ ರೇಸಿನ ಬಗ್ಗೆ ಹೊಸೆದಿರೋ ರೋಚಕ ಕಥೆಯನ್ನು ಬಜ಼ಾರ್ ಚಿತ್ರ ಹೊಂದಿರೋದು ಗೊತ್ತೇ ಇದೆ. ಟೀಸರ್ ನೋಡಿದ ದರ್ಶನ್ ಅವರನ್ನು ಸೆಳೆದಿದ್ದೂ ಸಹ ಇದೇ ಅಂಶವಂತೆ. `ಟೀಸರ್ ನೋಡಿದಾಗಲೇ ಪಾರಿವಾಳ ರೇಸಿನ ಬಗ್ಗೆ ಸುನಿ ಕಥೆ ಮಾಡಿರೋ ವಿಚಾರ ತಿಳಿಯಿತು. ಆ ಕಾರಣದಿಂದಲೇ ಅದು ನನ್ನನ್ನು ಸೆಳೆಯಿತು ಕೂಡಾ. ಯಾಕೆಂದರೆ ಒಂದು ಕಾಲದಲ್ಲಿ ನಾನೂ ಹಕ್ಕಿ ಸಾಕಿದೋನೇ’ ಅನ್ನುವ ಮೂಲಕ ಚಾಲೆಂಜಿಂಗ್ ಸ್ಟಾರ್ ಎಲ್ಲರನ್ನೂ ಅಚ್ಚರಿಗೀಡು ಮಾಡಿದ್ದಾರೆ!

`ನನಗೆ ಗೊತ್ತಿರುವಂತೆ ಇಪ್ಪತ್ತು ಮೂವತ್ತು ವರ್ಷಗಳ ಹಿಂದೆ ರೌಡಿಸಂ ಶುರುವಾಗುತ್ತಿದ್ದದ್ದೇ ಈ ಪಾರಿವಾಳದ ಹಕ್ಕಿ ಸಾಕೋ ಖಯಾಲಿಯಿಂದಾಗಿ. ಈ ಪಾರಿವಾಳ ರೇಸಿಂಗಿನಲ್ಲಿಯೇ ನಾನಾ ಗೇಮುಗಳಿವೆ. ಅವು ಭಯಾನಕ ಡೇಂಜರಸ್ ಶೋಕಿಗಳು. ಇಂಥಾ ಕಥೆಯನ್ನು ಸಿದ್ದಪಡಿಸಿ ಸುನಿ ಚಿತ್ರ ಮಾಡಿದ್ದಾರೆ. ಸಿಂಪಲ್ ಸುನಿ ಯಾವಾಗಲೂ ಸಮುದ್ರಕ್ಕೆ ಎದುರಾಗಿ ಈಜುವ ಸ್ವಭಾವದವರು. ಎಲ್ಲರೂ ಒಂದು ಹಾದಿ ಹಿಡಿದರೆ ಸುನಿ ಬೇರೆಯದ್ದೇ ದಾರಿ ಕಂಡುಕೊಳ್ಳುತ್ತಾರೆ. ಟೀಸರ್ ಮತ್ತು ಹಾಡುಗಳನ್ನು ನೋಡಿದರೇನೇ ಚಿತ್ರತಂಡ ಪಟ್ಟಿರುವ ಶ್ರಮದ ಅರಿವಾಗುತ್ತೆ. ಹೊಸಾ ಹುಡುಗ ಧನ್ವೀರ್ ಈ ಚಿತ್ರದ ಮೂಲಕ ಹೀರೋ ಆಗಿದ್ದಾರೆ. ಎಲ್ಲರಿಗೂ ಒಳ್ಳೆಯದಾಗಲಿ’ ಅಂತ ಪಾರಿವಾಳದ ರೇಸಿನ ಬಗ್ಗೆ ಮಾತಾಡುತ್ತಲೇ ಬಜ಼ಾರ್ ಚಿತ್ರಕ್ಕೆಡ ದರ್ಶನ್ ಅವರು ಹಾರೈಸಿದ್ದಾರೆ.

ಪಾರಿವಾಳ ಸಾಕೋದು ಒಂದು ಚೆಂದದ ಅನುಭವ ಹೌದು. ಆದರೆ ಅದುವೇ ರೇಸಿನ ಹುಚ್ಚನ್ನೂ ಹತ್ತಿಸುತ್ತೆ. ಆದರೆ ದರ್ಶನ್ ಅವರು ಒಂದು ಕಾಲದಲ್ಲಿ ಪಾರಿವಾಳ ಸಾಕಿ ರೇಸಿನ ತೆಕ್ಕೆಗೆ ಬೀಳದೆಯೇ ಆ ಬಗ್ಗೆ ಒಂದಷ್ಟು ಕುತೂಹಲ ಹೊಂದಿದ್ದರಂತೆ. ಇಂದು ಅವರು ಸ್ಟಾರ್ ಆದರೂ ಕಾರಲ್ಲಿ ಹೋಗುವಾಗ ಪಾರಿವಾಳ ಹಾರಾಡುತ್ತಿರೋದನ್ನು ಕಂಡರೆ ಅದಕ್ಕೆ ದಾರ ಕಟ್ಟಿದ್ದಾರಾ? ಆ ದಾರದ ಸೂತ್ರಧಾರ ಯಾವ ಮನೆಯ ತಾರಸಿಯಲ್ಲಿರಬಹುದು ಅಂತೆಲ್ಲ ಅದೇ ಬೆರಗಿನಿಂದ ಕಣ್ಣಾಡಿಸುತ್ತಾರಂತೆ!

ದರ್ಶನ್ ಅವರು ಬಿಡುವು ಮಾಡಿಕೊಂಡು ಬಂದು ಬಜ಼ಾರ್ ಚಿತ್ರದ ಆಡಿಯೋ ಬಿಡುಗಡೆ ಮಾಡಿದ್ದಲ್ಲದೇ ಚಿತ್ರತಂಡದೊಂದಿಗೆ ಬರೆತು ಮುಕ್ತವಾಗಿ ಮಾತಾಡಿದ್ದಾರೆ. ಹೊಸಾ ಹೀರೋಗೆ ಶುಭ ಕೋರುತ್ತಲೇ ಸುನಿಯ ಕಸುಬುದಾರಿಕೆಯನ್ನು ಮೆಚ್ಚಿಕೊಂಡೇ ಚಿತ್ರತಂಡಕ್ಕೆ ಸಾಥ್ ನೀಡಿದ್ದಾರೆ.

  #

ARUN KUMAR G
ARUN KUMAR G Senior Film Journalist GAURI LANKESH PATRIKE, KARMAVEERA and others

ನಡುವಯಸ್ಸು ದಾಟಿದ ಹೆಣ್ಣಿನ ವೇದನೆ!

Previous article

ಟಕ್ಕರ್ ಸೆಟ್ಟಿಗೆ ದಿನಕರ್ ಸರ್‌ಪ್ರೈಸ್ ವಿಸಿಟ್!

Next article

You may also like

Comments

Leave a reply

Your email address will not be published. Required fields are marked *