ಅಮ್ಮಮಗಳ ಬಾಂದವ್ಯದ ಅನಾವರಣ ಡಾಟರ್ ಆಫ್ ಪಾರ್ವತಮ್ಮ!

ಹರಿಪ್ರಿಯ ಮತ್ತು ಸುಮಲತಾ ಕಾಂಬಿನೇಶನ್ನಿನ ಡಾಟರ್ ಆಫ್ ಪಾರ್ವತಮ್ಮ ಸಿನಿಮಾ ಚಿತ್ರೀಕರಣ ಮುಗಿಸಿ, ರಿಲೀಸ್ ಗೆ ರೆಡಿಯಾಗಿದೆ. ಲೋಕಸಭಾ ಚುನಾವಣೆಯ ಬಿಸಿಯಲ್ಲಿ ಹಾಗೂ ನೀತಿ ಸಂಹಿತೆ ಜಾರಿಯಾದ ಕಾರಣವಾಗಿ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಸುಮಲತಾ ನಟಿಸಿರುವ ಸಿನಿಮಾಗಳನ್ನು ತಡೆ ಹಿಡಿಯಲಾಗಿತ್ತು. ಸದ್ಯ ಡಾಟರ್ ಆಫ್ ಪಾರ್ವತಮ್ಮ ಸಿನಿಮಾ ರಿಲೀಸ್ ದಿನಾಂಕವನ್ನು ಅನೌನ್ಸ್ ಮಾಡಿಕೊಂಡು, ಇತ್ತೀಚಿಗಷ್ಟೇ ಸಿನಿಮಾದ ಆಡಿಯೋವನ್ನು ರಿಲೀಸ್ ಮಾಡಿಕೊಂಡಿದೆ. ಎರಡು  ಗೀತೆಗಳ ಪೈಕಿ ಒಂದು ಹಾಡಿಗೆ ಸಾಹಿತ್ಯ ರಚಿಸಿರುವ ಡಾಲಿ ಧನಂಜಯ್ ಟ್ರೇಲರ್ ಬಿಡುಗಡೆ ಮಾಡಿ,  “ನಾನು ಸಾಹಿತಿ ಅಲ್ಲ. ನಟನೆಯಲ್ಲಿ ಬಿಡುವು ಇದ್ದಾಗ ಹಾಗೇ ಸುಮ್ಮನೆ ಮನಸ್ಸಿನಲ್ಲಿರುವ ಪದಗಳನ್ನು  ಪೇಪರಿನಲ್ಲಿ  ಬರದುಕೊಳ್ಳುತ್ತಿದ್ದೆ” ಎಂದು ಹೇಳಿದರು.

 ಇನ್ನು ರೆಬಲ್ ಸ್ಟಾರ್ ಪತ್ನಿ ಸುಮಲತಾ ಮಾತನಾಡಿ, “ಶೀರ್ಷಿಕೆ ಪಾರ್ವತಮ್ಮ ಇದ್ದರೂ ಇದು ಹರಿಪ್ರಿಯಾ ಸಿನಿಮಾವೆಂದು ಅಮ್ಮನಾಗಿ ಕಾಣಿಸಿಕೊಂಡಿರುವ ಸುಮಲತಾ ಅಂಬರೀಷ್ ಬಣ್ಣಿಸಿದರು. ಮಾತು ಮುಂದುವರೆಸುತ್ತಾ ಐದು ಭಾಷೆಗಳಲ್ಲಿ ೨೦೦ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿದ್ದರೂ, ಮಧ್ಯಮ ವರ್ಗದ ತಾಯಿಯಾಗಿ ಥ್ರಿಲ್ಲರ್ ಜಾನರ್‌ನಲ್ಲಿ ನಟಿಸಿದ್ದು ಇದೇ ಮೊದಲಾಗಿದೆ.  ತಾಯಿ ಮಗಳ ದೃಶ್ಯಗಳು ಸಹಜವಾಗಿ ಮೂಡಿಬಂದಿದೆ.  ನಮ್ಮ ಕಾಲದಲ್ಲಿ ಚಿತ್ರರಂಗ ಸುಲಭವಾಗಿತ್ತು. ಈಗ ತುಂಬ ಬದಲಾವಣೆ ಆಗಿದೆ.  ಹರಿಪ್ರಿಯಾ ೨೫ನೇ ಚಿತ್ರವೆಂಬುದು  ಮೈಲಿಗಲ್ಲಾಗಿದೆ.  ಬಂಡವಾಳ ಹೂಡುವವರಲ್ಲಿ  ಶ್ರದ್ದೆ, ಆಸಕ್ತಿ ಇಲ್ಲವೆಂದರೆ  ಏನು ಮಾಡೋಕೆ ಆಗೋಲ್ಲ” ಎಂದು ಅಭಿಪ್ರಾಯಪಟ್ಟರು.

ಇದಕ್ಕೂ ಮುನ್ನ ಮೈಕ್ ತೆಗೆದುಕೊಂಡ ಹರಿಪ್ರಿಯಾ, “ಇಂದು ರಿಯಲ್, ರೀಲ್ ಅಮ್ಮ ಇರುವುದರಿಂದ ದುಗುಡ ಆಗುತ್ತಿದೆ.  ಸಂಗೀತದಿಂದ ಚಿತ್ರವನ್ನು ಮೇಲಕ್ಕೆ ಎತ್ತಬಹುದು.  ಇಲ್ಲಿಯವರೆಗೂ ೩೭ ಚಿತ್ರಗಳಲ್ಲಿ ನಟಿಸಲಾಗಿದೆ. ಕನ್ನಡದಲ್ಲಿ ೨೫ ಆಗಿದೆ ಅಂತ ನಿರ್ದೇಶಕರು ಲೆಕ್ಕ ಹಾಕಿರುವುದು ಸಂಭ್ರಮಿಸುವ ವಿಷಯವಾಗಿದೆ.  ಪವರ್‌ಫುಲ್ ಟೈಟಲ್ ಆಗಿರುವುದರಿಂದ  ಜವಾಬ್ದಾರಿ ಜಾಸ್ತಿ ಇತ್ತು. ಅಮ್ಮ ನಟಿಸಿದ ನಂತರ ಚಿತ್ರಕ್ಕೆ ನ್ಯಾಯ ಸಂದಿದೆ.  ತನಿಖಾಧಿಕಾರಿ ವೈದ್ಯಳಾಗಿ  ಖಡಕ್ ಆಗಿ ಪೊಲೀಸ್ ಇಲಾಖೆಯಲ್ಲಿ ಮಹಿಳಾ ಅಧಿಕಾರಿಗಳು ಹೇಗೆ ಬುದ್ದಿವಂತಿಕೆಯಿಂದ ಅಪರಾಧಿಗಳನ್ನು ಭೇದಿಸುವಂತೆ ಇದರಲ್ಲಿ ತೋರಿಸಲಾಗಿದೆ.  ಕೃತಕವಾಗಿ ಫೈಟ್ ಮಾಡಲಾಗಿ,  ನಾಯಕನನ್ನು ರಕ್ಷಣೆ ಮಾಡುತ್ತೇನೆ. ೨೩ ಮತ್ತು ೨೪ ಎರಡು ದಿನಗಳು ಗೆಲುವು  ಅಗಲಿ” ಎಂದು  ಮೇಡಂರನ್ನು ನೋಡುತ್ತಾ ಮಾತಿಗೆ ವಿರಾಮ ಹಾಕಿದರು. ಇನ್ನು ಹರಿಪ್ರಿಯ ಮತ್ತು ಸುಮಲತಾ ಅವರಿಗೆ ಜತೆಯಾಗಿ ಸೂರಜ್ ಗೌಡ, ಪ್ರಭು, ತರಂಗ ವಿಶ್ವ, ಅಭಿನಯಿಸಿದ್ದಾರೆ. ಇನ್ನು ಶಂಕರ್ ಜೆ ಡಾಟರ್ ಆಫ್ ಪಾರ್ವತಮ್ಮನಿಗೆ ಕತೆ ಚಿತ್ರಕತೆ ಬರೆದಿರುವ ಜತೆಗೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಸಿನಿಮಾ ವಿಜಯ್ ಸಿನಿಮಾಸ್ ಬ್ಯಾನರ್ ನಲ್ಲಿ ಚಿತ್ರವು ರಿಲೀಸ್ ಆಗಲಿದ್ದು, ಶ್ವೇತ ಮಧುಸೂಧನ್, ಶಶಿಧರ್.ಕೆ, ವಿಜಯಲಕ್ಷ್ಮೀ ಕೃಷ್ಣ ಗೌಡ, ಸಂದೀಪ್ ಶಿವಮೊಗ್ಗ ಜತೆಯಾಗಿ ಬಂಡವಾಳ ಹೂಡಿದ್ದಾರೆ. ಡಾಟರ್ ಆಫ್ ಪಾರ್ವತಮ್ಮ ಮೇ 24ಕ್ಕೆ ಅಂದಾಜು 150 ಸ್ಕ್ರೀನ್ ಗಳಲ್ಲಿ ರಿಲೀಸ್ ಆಗಲಿದೆ.