Connect with us

ಹೇಗಿದೆ ಸಿನಿಮಾ

ಕಣ್ಣಿಲ್ಲದಿದ್ದರೂ ಕಾಯುವ ‘ಕವಚ’

Published

on

ಹ್ಯಾಟ್ರಿಕ್ ಹೀರೋ ಶಿವರಾಜ್ ಕಉಮಾರ್ ಅಭಿನಯದ ಕವಚ ಸಿನಿಮಾ ಈ ವಾರ ಬಿಡುಗಡೆಯಾಗಿದೆ. ಮಲಯಾಳಂನ ‘ಒಪ್ಪಂ’ ಸಿನಿಮಾದ ರಿಮೇಕ್ ಕನ್ನಡದ ‘ಕವಚ’. ಶಿವರಾಜ್ ಕುಮಾರ್ ಕಣ್ಣಿಲ್ಲದ ಅಂಧನ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಕಾರಣಕ್ಕೆ ಕವಚ ಸಾಕಷ್ಟು ಕುತೂಹಲ ಮೂಡಿಸಿತ್ತು.

ನ್ಯಾಯದ ವಿರುದ್ಧವಾದ ಒಂದು ತೀರ್ಪು, ಇದರಿಂದ ಎದುರಾಗುವ ಭೀಕರ ದುರಂತ. ಅನ್ಯಾಯಕ್ಕೊಳಗಾದ ವ್ಯಕ್ತಿ ಎಸಗುವ ಸೇಡಿನ ಸರಣಿ ಕೊಲೆಗಳು, ನ್ಯಾಯ ನೀಡಬೇಕಾದ ಸ್ಥಾನದಲ್ಲಿ ಕೂತು ತಪ್ಪು ತೀರ್ಪು ನೀಡಿದವನ ಪಾಪ ನಿವೇದನೆ… ಕಣ್ಣಿಲ್ಲದಿದ್ದರೂ ಮೈಯೆಲ್ಲಾ ಕಣ್ಣಾಗಿಸಿಕೊಂಡು ತನ್ನ ಸುತ್ತಲಿನವರನ್ನು ಕಾಯುವ, ಕರುಣಾಮಯಿಯಂತೆ ಪೊರೆಯುವ ನಾಯಕ ಜಯರಾಮ್ (ಶಿವರಾಜ್‌ಕುಮಾರ್), ಬಾಂಧವ್ಯಕ್ಕಿಂತಾ ಸ್ವಾರ್ಥ ಮುಖ್ಯ ಎಂದು ಹೊರಡುವ ಮನೆಮಂದಿ… ಹೀಗೆ ಫ್ಯಾಮಿಲಿ, ಸೆಂಟಿಮೆಂಟು, ಥ್ರಿಲ್ಲಿಂಗ್ ಎಲಿಮೆಂಟುಗಳನ್ನೆಲ್ಲಾ ಒಟ್ಟುಸೇರಿಸಿ ಮಾಡಿರುವ ಸಿನಿಮಾ ಕವಚ.
‘ಯಾರೊಂದಿಗೆ ನೀ ನಡೆಯಬೇಕು ಯಾರೊಂದಿಗೆ ನೀ ಬಾಳಬೇಕು ಎಂಬುದು ನಿನ್ನನ್ನು ಸೃಷ್ಟಿಸಿದ ಆ ದೇವರ ಶಾಸನ! ಪಾಲಿಗೆ ಬಂದ ಅನುಭಂದಗಳನ್ನು ನಂಬಿ ಆನಂದದಿಂದ ಬದುಕುವುದೇ ಜೀವನೇ… ಇದೇ ಸತ್ಯ’ ಅನ್ನೋದು ‘ಕವಚ’ದ ಅಂತಿಮ ತಿರುಳು!


ಶಿವರಾಜ್ ಕುಮಾರ್ ಅಂದರೇನೇ ಮಾಸ್ ಹೀರೋ ಅನ್ನೋ ಇಮೇಜು ಕನ್ನಡಿಗರ ಮನಸ್ಸಿನಲ್ಲಿ ಅಚ್ಚೊತ್ತಿಬಿಟ್ಟಿದೆ. ಹೀಗಿರುವಾಗ ಕಣ್ಣಿಲ್ಲದ ಅಂಧನಾಗಿ ಇಡೀ ಸಿನಿಮಾದಲ್ಲಿ ಕಾಣಿಸಿಕೊಳ್ಳುವುದಿದೆಲ್ಲಾ? ಅದು ಶಿವರಾಜ್ ಕುಮಾರ್ ರಂಥಾ ಸ್ಟಾರ್ ನಟನ ಪಾಲಿಗೆ ನಿಜಕ್ಕೂ ಸವಾಲಿನ ಕೆಲಸ. ಆದರೆ ತಮ್ಮೆಲ್ಲಾ ಇಮೇಜುಗಳನ್ನು ಪಕ್ಕಕ್ಕಿಟ್ಟು ಶಿವಣ್ಣ ಇಲ್ಲಿ ಅಮೋಘವಾಗಿ ನಟಿಸಿದ್ದಾರೆ. ಹಾಗೆಂದು ಇಲ್ಲಿ ಕಮರ್ಷಿಯಲ್ ಅಂಶಗಳಿಲ್ಲ ಅಂದುಕೊಳ್ಳಬೇಕಿಲ್ಲ ಶಿವಣ್ಣನ ಅಭಿಮಾನಿಗಳು ಇಷ್ಟ ಪಡುವ ಮಾಸ್ ಡೈಲಾಗುಗಳು, ಮೈ ಜುಮ್ಮೆನ್ನಿಸುವ ಹೊಡೆದಾಟದ ದೃಶ್ಯಗಳೂ ಇವೆ.
ಜಿ.ವಿ.ಆರ್. ವಾಸು ನಿರ್ದೇಶನದ ಈ ಸಿನಿಮಾ ಕ್ಷಣಕ್ಷಣಕ್ಕೂ ರೋಚಕ ತಿರುವುಗಳಿಂದ, ನೋಡುಗರ ಎದೆಯಲ್ಲಿ ಭಯ ಹುಟ್ಟಿಸುತ್ತಾ ಸಾಗುತ್ತದೆ. ಸಿನಿಮಾದ ಆರಂಭದಿಂದ ಕೊನೆಯು ತನಕ ಅಲ್ಲಲ್ಲಿ ಕೊಲೆ ರಕ್ತಪಾತಗಳು ಹೆಚ್ಚಿರುವುದು ಸ್ವಲ್ಪ ಹಿಂಸೆ ಅನಿಸುತ್ತದೆ. ಕನ್ನಡದ ಮಟ್ಟಿಗೆ ಈ ಮಟ್ಟಿಗಿನ ಕ್ರೌರ್ಯ ಪ್ರದರ್ಶನ ಬೇಕಿತ್ತಾ ಅನ್ನೋ ಪ್ರಶ್ನೆ ನಡುನಡುವೆ ಹುಟ್ಟಿಕೊಳ್ಳುತ್ತದೆ. ಆದರೆ ಸಿನಿಮಾದ ಕ್ಲೈಮ್ಯಾಕ್ಸ್ ನೋಡಿದಮೇಲೆ ಎಲ್ಲ ದೃಶ್ಯಗಳೂ ಪೂರಕವಾಗಿಯೇ ಇದೆ ಅನ್ನೋ ಅಭಿಪ್ರಾಯ ಕೂಡಾ ಮೂಡುತ್ತದೆ.


ಶಿವರಾಜ್ ಕುಮಾರ್, ವಸಿಷ್ಟ ಸಿಂಹ, ಬೇಬಿ ಮೀನಾಕ್ಷಿ, ಕೃತಿಕ ಜಯರಾಂ, ತಬಲಾ ನಾಣಿ ಪಾತ್ರಗಳು ಗಮನ ಸೆಳೆದರೆ ಇಷಾ ಕೊಪ್ಪೀಕರ್ ರೋಲು ಇಷ್ಟೇನಾ ಅನ್ನಿಸುತ್ತದೆ. ರಾಹುಲ್ ಶ್ರೀವಾತ್ಸವ್ ಛಾಯಾಗ್ರಹಣ ಕಥೆಗೆ ಪೂರಕವಾಗಿದೆ.
ಒಟ್ಟಾರೆ ಇದು ಶಿವಣ್ಣ ಅಭಿಮಾನಿಗಳು ಮಾತ್ರವಲ್ಲ ಫ್ಯಾಮಿಲಿ ಪ್ರೇಕ್ಷಕರನ್ನೂ ಸೆಳೆಯುವಂತಾ ಸಿನಿಮಾ ಆಗಿದೆ.

ಸಿನಿಮಾ ವಿಮರ್ಶೆ

ಕಾಡುವ ಕಥೆಯೊಂದಿಗೆ ಸಾಗುವ ಪಯಣಿಗರು!

Published

on

ಅಪ್ಪಟ ಕನ್ನಡತನದ ಶೀರ್ಷಿಕೆಯಿಂದಲೇ ಎಲ್ಲರನ್ನು ಸೆಳೆದುಕೊಂಡಿದ್ದ ಚಿತ್ರ ಪಯಣಿಗರು. ರಾಜ್ ಗೋಪಿ ನಿರ್ದೇಶನದ ಈ ಚಿತ್ರವೀಗ ತೆರೆ ಕಂಡಿದೆ. ಜರ್ನಿಯಲ್ಲಿ ನಡೆಯೋ ಕಥೆಯ ಒಂದಷ್ಟು ಚಿತ್ರಗಳು ಈಗಾಗಲೇ ತೆರೆ ಕಂಡಿವೆ. ಆದರೂ ಈ ವೆರೈಟಿ ಕಥೆಯ ಬಗ್ಗೆ ಪ್ರೇಕ್ಷಕರಲ್ಲೊಂದು ಆಕರ್ಷಣೆ ಸದಾ ಉಳಿದುಕೊಂಡು ಬಂದಿದೆ. ಅದನ್ನು ತಣಿಸುವಂತೆ, ಭಿನ್ನ ನೋಟದ ಕಥೆಯೊಂದನ್ನು ಹೊತ್ತು ಸಾಗುವ ಚಿತ್ರ ಪಯಣಿಗರು.

ಯುವ ನಿರ್ದೇಶಕ ರಾಜ್ ಗೋಪಿ ಸೂರ್ಯ ನಿರ್ದೇಶನದ ಈ ಚಿತ್ರ ಟ್ರೈಲರ್ ನಿಂದಲೇ ಎಲ್ಲೆಡೆ ಪ್ರಚಾರ ಪಡೆದುಕೊಂಡಿತ್ತು. ಆ ಬಳಿಕ ಇಡೀ ಬದುಕಿನ ಸಾರವನ್ನು ಹಿಡಿದಿಡುವಂಥಾ ಅದ್ಭುತ ಹಾಡೊಂದರ ಝಲಕುಗಳಿಂದ ಮತ್ತಷ್ಟು ಸೋಜುಗಕ್ಕೆ ಕಾರಣವಾಗಿತ್ತು. ಕೆ ಕಲ್ಯಾಣ್ ಬರೆದಿರೋ, ವಿನು ಮನಸು ಸಂಗೀತ ನೀಡಿರುವ `ಬರಿದೇಹವಿದು ಅಲ್ಲ ಬರಿ ದೇಹವಲ್ಲ ಬಾಡಿಗೆಯ ಉಸಿರಾಟ ತುಂಬಿರುವ ಚೀಲ’ ಎಂಬ ಈ ಗೀತೆಯ ಸಾರವನ್ನೇ ಬಸಿದುಕೊಂಡಂಥಾ ಕಥೆಯನ್ನು ಈ ಚಿತ್ರ ಒಳಗೊಂಡಿದೆ.

ಇದು ತಮ್ಮೆಲ್ಲ ಜಂಜಾಟಗಳಿಂದ ಒಂದಷ್ಟು ದಿನಗಳ ಮಟ್ಟಿಗಾದರೂ ತಪ್ಪಿಸಿಕೊಳ್ಳುವ ಸಲುವಾಗಿ ಗೋವಾದತ್ತ ಪ್ರಯಾಣ ಹೊರಡುವ ಐವರು ಸ್ನೇಹಿತರ ಕಥೆ. ಅವರೆಲ್ಲರೂ ನಡುವಯಸ್ಸಿನವರು. ಹೀಗೆ ಗೋವಾದತ್ತ ಹೋಗೋದಾಗಿ ಹೇಳಿದಾಗ ಮನೆ ಮಂದಿಯ ಕಡೆಯಿಂದ ವಿರೋಧ ವ್ಯಕ್ತವಾಗುತ್ತೆ. ಆದರೆ ಹೇಗೋ ಮ್ಯಾನೇಜು ಮಾಡಿ ಗೋವಾದತ್ತ ಹೊರಡೋ ಈ ಪಯಣ ಮಜವಾಗಿ ತೆರೆದುಕೊಳ್ಳುತ್ತಾ ಸಾಗುತ್ತೆ. ಈ ಐವರದ್ದೂ ಒಂದೊಂದು ತೆರನಾದ ವ್ಯಕ್ತಿತ್ವ. ಅವುಗಳ ಮೂಲಕವೇ ಬದುಕಿನ ಕಥೆಹೇಳಲು ನಿರ್ದೇಶಕರು ಪ್ರಯತ್ನಿಸಿ ಅದರಲ್ಲಿ ಯಶಸ್ವಿಯೂ ಆಗಿದ್ದಾರೆ.

ಹೀಗೇ ಗೋವಾದತ್ತ ಕಾರಿನಲ್ಲಿ ತೆರಳೋ ಈ ಐವರಿಗೆ ಚಿತ್ರ ವಿಚಿತ್ರ ಘಟನಾವಳಿಗಳು ಎದುರಾಗುತ್ತವೆ. ಅದೇ ಹಾದಿಯಲ್ಲಿ ವಯಸಾದ ಜೀವವೊಂದೂ ಜೊತೆಯಾಗುತ್ತೆ. ಒಂದು ತುಂಬಿದ ಮನೆಯ ಹಿರಿಯನಂತೆ ಆ ವಯೋವೃದ್ಧ ಈ ಐವರ ಪಾಲಿಗೂ ಕಾಣಿಸುತ್ತಾನೆ. ಆತನನ್ನು ಸೀದಾ ಗೋವಾಗೆ ಕರೆದೊಯ್ದು ಭರ್ಜರಿ ಪಾರ್ಟಿ ಕೊಟ್ಟು ಬಳಿಕ ಬೀಳ್ಕೊಡುತ್ತಾರೆ. ಹಾಗೆ ಆ ವೃದ್ಧ ಹೋದ ನಂತರ ಅಲ್ಲೊಂದು ಭಯಾನಕ ಸನ್ನಿವೇಶ ಈ ಗೆಳೆಯರಿಗೆ ಎದುರಾಗುತ್ತೆ. ಅದರಿಂದ ಇಡೀ ಚಿತ್ರದ ದಿಕ್ಕೇ ಬದಲಾಗುತ್ತೆ. ಅದೆಂಥಾ ಘಟನೆ? ವಾಪಾಸಾಗುವಾಗ ಮತ್ತೆ ದಾರಿಯಲ್ಲಿ ಅದೇ ಮುದುಕ ಸಿಕ್ಕಾಗ ಐವರಲ್ಲೊಬ್ಬ ಯಾಕೆ ಅಲ್ಲಿರೋದಿಲ್ಲ ಎಂಬುದು ರೋಚಕ ಕುತೂಹಲ. ಅದಕ್ಕೆ ತಕ್ಕುದಾದ ವಿವರಗಳೇ ಚಿತ್ರದಲ್ಲಿವೆ.

ಲಕ್ಷ್ಮಣ್ ಶಿವಶಂಕರ್, ರಾಘವೇಂದ್ರ ನಾಯಕ್, ಅಶ್ವಿನ್ ಹಾಸನ್, ರಾಘವೇಂದ್ರ ಬೂದನೂರು ಮತ್ತು ಸುಧೀರ್ ಮೈಸೂರು ಪಯಣಿಗರಾಗಿ ಎಲ್ಲರನ್ನೂ ಆವರಿಸಿಕೊಳ್ಳುವಂಥಾ ಪಾತ್ರಗಳಿಗೆ ಜೀವ ತುಂಬಿದ್ದಾರೆ. ಅವರೆಲ್ಲರ ಪಾತ್ರ, ನಟನೆಯೂ ಆಪ್ತವಾಗುತ್ತೆ. ಕ್ಲೈಮ್ಯಾಕ್ಸಿನಲ್ಲಂತೂ ಸುಜಾತಾರ ನಟನೆ ಎಂಥವರನ್ನೂ ಕಾಡುತ್ತೆ. ಅದರಲ್ಲಿಯೇ ಜೀವನದ ದರ್ಶನವಾಗುತ್ತೆ. ಹೀಗೆ ಪರಿಣಾಮಕಾರಿಯಾಗಿ ಸೂಕ್ಷ್ಮ ಕಥೆಯೊಂದನ್ನು ನಿರ್ದೇಶಕ ರಾಜ್ ಗೋಪಿ ಕಟ್ಟಿ ಕೊಟ್ಟಿದ್ದಾರೆ.

Continue Reading

ಸಿನಿಮಾ ವಿಮರ್ಶೆ

ಮಧ್ಯಮ ವರ್ಗದ ಹುಡುಗರ ಆತ್ಮಕಥೆಯಂಥಾ ಪಡ್ಡೆಹುಲಿ!

Published

on

ಮಕ್ಕಳು ಶಾಲೆಯೊಳಗೆ ಕನ್ನಡದಲ್ಲಿ ಮಾತಾಡುತ್ತಾರೆ ಅನ್ನೋದನ್ನೇ ಆರೋಪಿಸಿ ಆ ಸ್ಕೂಲಿನ ಫಾದರ್ ತಂದೆಯನ್ನು ಕರೆಸಿರುತ್ತಾರೆ. ಈ ವಿಚಾರದ ಸುತ್ತ ಮಾತಿಗೆ ಮಾತು ಬೆಳೆಯುತ್ತದೆ. ಕನ್ನಡವನ್ನು ಆ ಫಾದರ್ ಹೋಪ್ ಲೆಸ್ ಲಾಂಗ್ವೇಜ್ ಎನ್ನುತ್ತಾನೆ. ತಕ್ಷಣ ಆತನ ಕೆನ್ನೆಗೆ ಬಾರಿಸಿ “ಒಬ್ಬ ವ್ಯಕ್ತಿಯ ಬದುಕು ರೂಪುಗೊಳ್ಳೋದು ಇಂಗ್ಲಿಷಿಂದ ಅಲ್ಲ, ಗೊತ್ತಿರೋ ಜ್ಞಾನದಿಂದ. ಇಂಗ್ಲಿಷ್ ಅನ್ನೋದು ಒಂದು ಭಾಷೆ ಅಷ್ಟೇ. ಅದು ಸಂಹನಕ್ಕಿರುವ ಒಂದು ಸಾಧನ ಮಾತ್ರ. ಆದರೆ, ಕನ್ನಡ ನಮ್ಮ ಅಸ್ತಿತ್ವ. ಕನ್ನಡದ ವಿಶಾಲತೆ ಗೊತ್ತೇನೋ ನಿನಗೆ, ಒಂದಲ್ಲಾ ಎರಡು ಸಾವಿರ ವರ್ಷಗಳ ಇತಿಹಾಸ ಇದೆ. ಆ ಟೈಮಲ್ಲಿ ನಿಮ್ಮ ಇಂಗ್ಲಿಷು ತೊಟ್ಲಲ್ಲಿ ನಿಪ್ಪಲ್ ಚೀಪ್ತಾ ಇತ್ತು. ರೋಮನ್ನಿನಿಂದ ಹುಟ್ಟಿಕೊಂಡ ಇಂಗ್ಲಿಷ್ ಭಾಷೆಗೆ ಲಿಪಿನೇ ಇರಲಿಲ್ಲ.. ಅದೇ ಅಮ್ಮಾ ಅಂದಾಗ ಬಂದ ಶಬ್ದ ಕೇವಲ ಬಾಯಿಂದ ಬಂದಿದ್ದಲ್ಲ. ಅದು ಮನಸ್ಸಿಂದ ಬಂದಿದ್ದು…” ಎನ್ನುತ್ತಾರೆ ಆ ತಂದೆ!

ಇದು ಪಡ್ಡೆ ಹುಲಿ ಚಿತ್ರದಲ್ಲಿ ರವಿಚಂದ್ರನ್ ಅವರ ದೃಶ್ಯವೊಂದರ ಸ್ಯಾಂಪಲ್ಲು. ಇಡೀ ಸಿನಿಮಾದ ತುಂಬಾ, ಕನ್ನಡ, ಕನ್ನಡತನ, ಇಲ್ಲಿನ ಸಂಗೀತ, ಸಾಹಿತ್ಯ, ಸಾಹಿತಿಗಳ ವಿಚಾರ ರಾರಾಜಿಸಿದೆ. ಇತ್ತೀಚೆಗೆ ಬಹುಶಃ ಯಾವ ಕಮರ್ಷಿಯಲ್ ಸಿನಿಮಾಗಳಲ್ಲೂ ಕನ್ನಡವನ್ನು ಈ ಮಟ್ಟಿಗೆ ಎತ್ತಿಹಿಡಿದಿರಲಿಲ್ಲವೇನೋ.

ಇಂಜಿನಿಯರಿಂಗ್ ಕಾಲೇಜು, ಓದು, ಪ್ರೀತಿ, ನೆಚ್ಚಿಕೊಂಡ ಕನ್ನಡ, ಕಾಡುವ ಸಂಗೀತ… ಇವೆಲ್ಲವನ್ನೂ ಹೊಂದಿರುವ ಸಿನಿಮಾ ಪಡ್ಡೆ ಹುಲಿ. ಗುರುದೇಶಪಾಂಡೆ ನಿರ್ದೇಶನದ ಪಡ್ಡೆಹುಲಿ ಮಧ್ಯಮ ವರ್ಗದ ಹುಡುಗರ ಬದುಕಿನ ನಾನಾ ಮಜಲುಗಳನ್ನು ಹೊಂದಿರೋ ಮಜವಾದ ಕಥೆಯೊಂದನ್ನು ಒಳಗೊಂಡಿದೆ. ಹಾಗಂತ ಇದೇನು ಬರೀ ಮಧ್ಯಮ ವರ್ಗದವರಿಗೆ ಮಾತ್ರ ಕಾಡುವಂಥಾ ಕಥೆ ಅಂದುಕೊಳ್ಳಬೇಕಿಲ್ಲ. ಪಡ್ಡೆಹುಲಿಯಲ್ಲಿ ಎಲ್ಲ ವರ್ಗದ ಪ್ರೇಕ್ಷಕರೂ ಮೆಚ್ಚಿಕೊಳ್ಳೋ ಅಂಶಗಳೂ ಇವೆ. ಪ್ರತಿಯೊಬ್ಬರೂ ಏನಾದರೊಂದು ಸಾಧಿಸುವ ಛಲ ಹೊಂದಿರುತ್ತಾರೆ. ಆದರೆ ಆ ಹಾದಿಯೇನು ಹೂವಿನ ಹಾಸಿಗೆ ಆಗಿರೋದಿಲ್ಲ. ಕಲ್ಲು ಮುಳ್ಳುಗಳನ್ನು ದಾಟಿಕೊಂಡು ಹೋಗದಿದ್ದರೆ ಗೆಲುವು ಸಿಕ್ಕೋದೂ ಸಾಧ್ಯವಿಲ್ಲ. ಆದರೆ ಈ ಹಾದಿಯಲ್ಲಿ ಎದುರಾಗೋ ನೋವು, ಅವಮಾನ, ನಿರಾಸೆ ಮತ್ತು ಖುಷಿ ಒಬ್ಬೊಬ್ಬರಿಗೂ ಒಂದೊಂದು ಥರದಲ್ಲಿ ದಕ್ಕುತ್ತದೆ. ಈ ನಿಟ್ಟಿನಲ್ಲಿ ಪಡ್ಡೆಹುಲಿಯ ಅನುಭವಗಳು ಖಂಡಿತಾ ಎಲ್ಲರನ್ನೂ ಬೆರಗುಗೊಳಿಸುವಂತಿದೆ. ನಿಖರವಾಗಿ ಹೇಳಬೇಕೆಂದರೆ ಪಡ್ಡೆಹುಲಿ ಚಿತ್ರದಲ್ಲಿ ಪ್ರೀತಿಯಿದೆ. ಜೀವನಪ್ರೇಮವಿದೆ. ಸಾಧಿಸುವವರಿಗೆ ಸ್ಫೂರ್ತಿ, ಜಬರ್ದಸ್ತ್ ಕಾಮಿಡಿ, ಫ್ಯಾಮಿಲಿ ಸೆಂಟಿಮೆಂಟ್ ಸೇರಿದಂತೆ ಎಲ್ಲದರ ಹದವಾದ ಸಮ್ಮಿಲನದೊಂದಿಗೇ ಪಡ್ಡೆಹುಲಿ ತೆರೆಮೇಲೆ ಘರ್ಜಿಸಿದೆ.

ಎಂ. ರಮೇಶ್ ರೆಡ್ಡಿ ತೇಜಸ್ವಿನಿ ಎಂಟರ್ ಪ್ರೈಸಸ್ ಲಾಂಛನದಲ್ಲಿ ಪ್ರೀತಿಯಿಂದ ನಿರ್ಮಾಣ ಮಾಡಿರುವ ಚಿತ್ರ ಪಡ್ಡೆಹುಲಿ. ಈ ಚಿತ್ರವೀಗ ಬರೋಬ್ಬರಿ ಹನ್ನೊಂದು ಹಾಡುಗಳ ಮೂಲಕವೇ ಪ್ರೇಕ್ಷಕರನ್ನು ಚಕಿತಗೊಳಿಸಿವೆ. ರ್ಯಾಪ್ ಜಗತ್ತಿನಲ್ಲಿ ಕಳೆದು ಹೋಗಿರೋ ಈ ಪೀಳಿಗೆಗೆ ಹೊಸಾ ಥರದ ಹಾಡುಗಳನ್ನೂ ಪರಿಚಯಿಸಿದೆ. ಹೀಗೆ ಹಾಡುಗಳ ಮೂಲಕ ಹೊಸಾ ಶಕೆಯನ್ನೇ ಸೃಷ್ಟಿಸಿರೋ ಪಡ್ಡೆಹುಲಿ ಚಿತ್ರದ ಮೂಲಕ ಶ್ರೇಯಸ್ ನಾಯಕನಾಗಿ ಅದ್ದೂರಿಯಾಗಿಯೇ ಎಂಟ್ರಿ ಕೊಟ್ಟಿದ್ದಾರೆ. ಶ್ರೇಯಸ್ ನಿರ್ಮಾಪಕ ಕೆ ಮಂಜು ಅವರ ಪುತ್ರ. ಮಂಜು ಅವರ ಹಲವಾರು ವರ್ಷಗಳಿಂದ ಮಗನನ್ನು ನಾಯಕನನ್ನಾಗಿ ಲಾಂಚ್ ಮಾಡಲು ತಯಾರಿ ನಡೆಸಿಯೇ ಪಡ್ಡೆಹುಲಿಗೆ ಒಪ್ಪಿಗೆ ಕೊಟ್ಟಿದ್ದಾರೆ. ಅಂಥಾದ್ದೊಂದು ಗುರುತರವಾದ ಜವಾಬ್ದಾರಿಯನ್ನು ಹೊತ್ತುಕೊಂಡಿರೋ ನಿರ್ದೇಶಕ ಗುರುದೇಶಪಾಂಡೆ ಪ್ರತಿಯೊಂದನ್ನೂ ಕಣ್ಣಲ್ಲಿ ಕಣ್ಣಿಟ್ಟು ರೂಪಿಸಿದ್ದಾರೆ ಅನ್ನೋದು ಸಿನಿಮಾ ನೋಡಿದ ಯಾರಿಗೇ ಆದರೂ ಅನ್ನಿಸದೇ ಇರಲಾರದು.

ಗುರುದೇಶಪಾಂಡೆಯವರ ಕ್ರಿಯಾಶೀಲತೆಯ ಕಾರಣದಿಂದಲೇ ಪಡ್ಡೆಹುಲಿಗೆ ಅತಿರಥ ಮಹಾರಥರ ಸಾಥ್ ಸಿಕ್ಕಿದೆ. ಕ್ರೇಜಿ ಸ್ಟಾರ್ ರವಿಚಂದ್ರನ್ ಮತ್ತು ಸುಧಾರಾಣಿ ಕೂಡಾ ಪಡ್ಡೆಹುಲಿಯೊಂದಿಗೆ ಅಮೋಘವಾಗಿ ನಟಿಸಿದ್ದಾರೆ. ಕಿರಿಕ್ ಪಾರ್ಟಿ ರಕ್ಷಿತ್ ಶೆಟ್ಟಿ ಅವರೂ ಬಹುಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಸಹ ಅತಿಥಿ ಪಾತ್ರದಲ್ಲಿ ಬಂದು ಹೋಗುತ್ತಾರೆ. ವಿ. ನಾಗೇಂದ್ರ ಪ್ರಸಾದ್ ಅವರ ಸಾಹಿತ್ಯ, ಕನ್ನಡದ ವಚನಗಳು, ಕವಿವಾಣಿಗಳಿಗೆ ಅಜನೀಶ್ ಲೋಕನಾಥ್ ನೀಡಿರೋ ಸಂಗೀತ ಕೇಳಲು ಮಾತ್ರವಲ್ಲ, ಕುಣಿಸುವ ಶಕ್ತಿಯನ್ನು ಹೊಂದಿದೆ. ಚಂದ್ರಶೇಖರ್ ಅವರ ಛಾಯಾಗ್ರಹಣ ಅದ್ಭುತವಾಗಿದೆ.

ಒಟ್ಟಾರೆ ಇದು ಕಾಲೇಜು ಹುಡುಗ-ಹುಡುಗಿಯರು ಮಾತ್ರವಲ್ಲ, ಮಕ್ಕಳ ಮೇಲೆ ಅತಿಯಾದ ಜವಾಬ್ದಾರಿಗಳನ್ನು ಹೇರುವ, ಓದೊಂದೇ ಮುಖ್ಯ ಅಂದುಕೊಂಡ ಹೆತ್ತವರೂ ನೋಡಬೇಕಾದ ಸಿನಿಮಾ ಇದಾಗಿದೆ.

Continue Reading

ಸಿನಿಮಾ ವಿಮರ್ಶೆ

ತ್ರಯಂಬಕಂ: ಎದೆ ಅದುರಿಸೋ ನವಪಾಶಾಣ ರಹಸ್ಯ!

Published

on

ಅಖಂಡ ಐದು ಸಾವಿರ ವರ್ಷಗಳ ಹಿಂದಿನ ರಹಸ್ಯವೊಂದಕ್ಕೆ ಕನೆಕ್ಟ್ ಆಗೋ ಆಧುನಿಕ ಕಥೆಯೆಂದರೇನೇ ಕುತೂಹಲ ನಿಗಿ ನಿಗಿಸೋ ವಿಚಾರ. ಅಂಥಾ ಆಯಸ್ಕಾಂತೀಯ ಗುಣದ ಕಥೆಯ ಮೂಲಕವೇ ಸದ್ದು ಮಾಡುತ್ತಾ ಸಾಗಿ ಬಂದಿರೋ ತ್ರಯಂಬಕಂ ಚಿತ್ರವೀಗ ಬಿಡುಗಡೆಗೊಂಡಿದೆ. ಇದುವರೆಗೂ ಸೂಕ್ಷ್ಮ ಕಥಾ ಹಂದರಗಳಿಗೇ ದೃಶ್ಯದ ಚೌಕಟ್ಟು ಹೊದಿಸುತ್ತಾ ಪ್ರೇಕ್ಷಕರನ್ನು ತಲುಪಿಕೊಂಡಿರೋ ದಯಾಳ್ ಪದ್ಮನಾಭನ್ ನಿರ್ದೇಶನದಲ್ಲಿ ಈ ಚಿತ್ರವೂ ಮೂಡಿ ಬಂದಿದೆ. ಕನ್ನಡದ ಮಟ್ಟಿಗೆ ತೀರಾ ಅಪರೂಪದ ಈ ಕಥೆಯನ್ನು ಕಂಡು ಪ್ರೇಕ್ಷಕರೆಲ್ಲ ಥ್ರಿಲ್ ಆಗಿ ಬಿಟ್ಟಿದ್ದಾರೆ.

ಈ ಹಿಂದೆ ಆ ಕರಾಳ ರಾತ್ರಿ ಮತ್ತು ಪುಟ 109ರಂಥಾ ಚಿತ್ರಗಳ ಮೂಲಕವೇ ನಿರ್ದೇಶಕರಾಗಿ ವಿಶೇಷ ಸ್ಥಾನಮಾನಗಳನ್ನು ಗಿಟ್ಟಿಸಿಕೊಂಡಿರುವವರು ದಯಾಳ್ ಪದ್ಮನಾಭನ್. ಈವರೆಗೂ ಅವರು ಕಲಾತ್ಮಕ ಪ್ರಾಕಾರದಲ್ಲಿಯೇ ಸಾಗಿ ಬಂದಿದ್ದರೂ ಕೂಡಾ ಸಾಮಾನ್ಯ ಪ್ರೇಕ್ಷಕರನ್ನೂ ತಲುಪಿಕೊಂಡಿದ್ದಾರೆ. ತ್ರಯಂಬಕಂ ಚಿತ್ರದ ಮೂಲಕ ಅವರು ಕಮರ್ಶಿಯಲ್ ಜಾಡಿನಲ್ಲಿ ಹೆಜ್ಜೆಯಿಟ್ಟಿದ್ದಾರೆ. ಈ ಆರಂಭಿಕ ಯಾನಕ್ಕೇ ಭರ್ಜರಿ ಗೆಲುವಿನ ಸಾಥ್ ಸಿಗುವ ಸೂಚನೆಗಳೇ ದಟ್ಟವಾಗಿವೆ.

ಇದು ಒಂದರೆಕ್ಷಣವೂ ಪ್ರೇಕ್ಷಕರನ್ನು ಆಚೀಚೆ ಅಲ್ಲಾಡದಂತೆ ಸಾಗುವ ರೋಚಕ ಕಥೆ ಹೊಂದಿರುವ ಚಿತ್ರ. ಅಪ್ಪ, ಮಗಳು, ಗೆಳೆಯ ಮತ್ತು ಒಂದಷ್ಟು ಪಾತ್ರಗಳ ಸುತ್ತಾ ಸುತ್ತೋ ಈ ಚಿತ್ರ ಬೇರೆಯದ್ದೇ ರೋಚಕ ಜಗತ್ತಿನಲ್ಲಿ ನೋಡುಗರನ್ನು ಥ್ರಿಲ್ಲಿಂಗ್ ಯಾನ ಹೊರಡಿಸುತ್ತೆ. ಓರ್ವ ಪ್ರೀತಿ ತುಂಬಿದ ಅಪ್ಪನಾಗಿ ರಾಘವೇಂದ್ರ ರಾಜ್ ಕುಮಾರ್ ಭರ್ಜರಿಯಾಗಿಯೇ ರೀ ಎಂಟ್ರಿ ಕೊಟ್ಟಿದ್ದಾರೆ. ಮಗಳಾಗಿ ದ್ವಿಪಾತ್ರದಲ್ಲಿ ಅನುಪಮಾ ಗೌಡ ನಟಿಸಿದ್ದರೆ, ಅವರ ಗೆಳೆಯ ಕಂ ಡಿಟೆಕ್ಟಿವ್ ಆಗಿ ರಾಕ್ ಸ್ಟಾರ್ ರೋಹಿತ್ ನಟಿಸಿದ್ದಾರೆ.

ಆ ತಂದೆಯ ಕಣ್ಮುಂದೆ ಇರೋದು ಒಬ್ಬಳೇ ಮುದ್ದಾದ ಮಗಳು. ಆದರೆ ತನಗೆ ಮತ್ತೋರ್ವ ಮಗಳಿದ್ದಳೆಂಬ ವಿಚಾರ ಭಯಾನಕ ಕನಸೊಂದರ ಮೂಲಕ ಆತನಿಗೆ ಪದೇ ಪದೆ ಕಾಡುತ್ತಿರುತ್ತದೆ. ಅದು ಪ್ರಾಚ್ಯವಸ್ತು ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದ ಮತ್ತೋರ್ವ ಮಗಳ ಬಗೆಗಿನ ಕನಸು. ಅವಳೊಂದಿಗೆ ನಂದಿ ಬೆಟ್ಟಕ್ಕೆ ಹೋದಾಗ ನಡೆಯೋ ಭೀಕರ ಅಪಘಾತದ ಚಿತ್ರಣಗಳು ಆ ತಂದೆಯನ್ನು ಪದೇ ಪದೆ ಬೆಚ್ಚಿ ಬೀಳಿಸುತ್ತಿರುತ್ತೆ. ಅದು ಭ್ರಮೆಯಾ ಅಥವಾ ತಾನು ವಾಸ್ತವವೆಂದುಕೊಂಡಿದ್ದೇ ಭ್ರಮೆಯಿರಬಹುದಾ ಎಂಬಂಥಾ ಮನೋ ವ್ಯಾಕುಲ ಆ ತಂದೆಯದ್ದು. ಇದೆಲ್ಲದರಾಚೆಗೆ ತನಗಿರೋದು ಒಬ್ಬಳೇ ಮಗಳಲ್ಲ, ಮತ್ತೊಬ್ಬಳೂ ಇದ್ದಳೆಂಬ ಸತ್ಯ ಸಾಕ್ಷಾತ್ಕಾರವಾಗೋ ಹೊತ್ತಿಗೆ ಮೊದಲಾರ್ಧ ಸಮಾಪ್ತಿಗೊಳ್ಳುತ್ತೆ.

ಹೀಗೆ ಭೀಕರ ಕನಸು ಕಾಡೋದೂ ಸೇರಿದಂತೆ ಎಲ್ಲ ವಿಚಾರಗಳನ್ನೂ ಕೂಡಾ ಆ ತಂದೆ ಮಗಳ ಮುಂದೆ ಮುಕ್ತವಾಗಿ ಹಂಚಿಕೊಳ್ಳುತ್ತಿರುತ್ತಾನೆ. ಇದರ ಹಿಂದೆ ಏನೋ ಇದೆ ಅಂತ ಅನುಮಾನಗೊಳ್ಳುವ ಮಗಳು ತನ್ನ ಡಿಟೆಕ್ಟಿವ್ ಗೆಳೆಯನಿಗೂ ಈ ವಿಷಯ ತಿಳಿಸುತ್ತಾಳೆ. ಆ ನಂತರದಲ್ಲಿಯಂತೂ ಕಥೆ ರೋಚಕವಾಗಿಯೇ ದಿಕ್ಕು ಬದಲಿಸಿಕೊಳ್ಳುತ್ತೆ. ತಂದೆಯನ್ನು ಕಾಡುತ್ತಿದ್ದ ಆ ಘಟನೆ ನಿಜವಾ? ಅದನ್ನು ಡಿಟೆಕ್ಟಿವ್ ಹೇಗೆ ಪತ್ತೆಹಚ್ಚುತ್ತಾನೆ, ಯಾವುದು ಭ್ರಮೆ, ಯಾವುದು ವಾಸ್ತವ ಅನ್ನೋದನ್ನು ಚಿತ್ರ ನೋಡೋ ಮೂಲಕವೇ ಕಣ್ತುಂಬಿಕೊಳ್ಳೋದೊಳಿತು.

ದಯಾಳ್ ಪದ್ಮನಾಭನ್ ಈ ಕಥೆಯನ್ನು ಐದು ಸಾವಿರ ವರ್ಷಗಳಷ್ಟು ಹಿಂದಿದ್ದ ನವಪಾಶಾಣ ಎಂಬ ಔಷಧಿಯ ಮೂಲಕ ಬೆರಗಾಗುವಂತೆ ನಿರೂಪಿಸಿದ್ದಾರೆ. ಅಷ್ಟು ವರ್ಷಗಳ ಹಿಂದೆ ಋಷಿಯೊಬ್ಬರು ಒಂಭತ್ತು ಪಾಶಾಣಗಳನ್ನು ಒಟ್ಟುಗೂಡಿಸಿ ತಯಾರಿಸಿದ್ದ ನವಪಾಶಾಣ ಎಂಥಾ ಕಾಯಿಲೆಯನ್ನಾದರೂ ಗುಣಪಡಿಸೋ ಶಕ್ತಿ ಹೊಂದಿತ್ತಂತೆ. ಅಂಥಾ ಔಷಧಿಯೊಂದು ಈ ದಿನಮಾನದಲ್ಲಿ ಸಿಕ್ಕರೆ ಏನೇನಾಗುತ್ತೆ ಎಂಬುದನ್ನು ದಯಾಳ್ ಅಚ್ಚರಿದಾಯಕವಾಗಿ ನಿರೂಪಿಸಿದ್ದಾರೆ.

ಈ ಮೂಲಕ ದಯಾಳ್ ತಾನು ಕಮರ್ಶಿಯಲ್ ಚೌಕಟ್ಟಿಗೂ ಸಲ್ಲುವ ನಿರ್ದೇಶಕ ಎಂಬುದನ್ನು ಸಾಬೀತುಗೊಳಿಸಿದ್ದಾರೆ. ಒಟ್ಟಾರೆಯಾಗಿ ಇದು ಪ್ರತಿಯೊಬ್ಬರೂ ನೋಡಲೇ ಬೇಕಾದ ಅಪರೂಪದ ಚಿತ್ರ ಅನ್ನೋದರಲ್ಲಿ ಎರಡು ಮಾತಿಲ್ಲ.

Continue Reading

Trending

Copyright © 2018 Cinibuzz