‘ಮುಂದಿನ ನಿಲ್ದಾಣ’ದ ಟೀಸರ್ ರಿಲೀಸ್ ಮಾಡಿದರು ರೆಟ್ರೋ ಸ್ಟಾರ್ ರಿಷಬ್!

ಸಿನಿಮಾವೊಂದು ಪೋಸ್ಟರ್ ಮೂಲಕವೇ ಕ್ರೇಜು ಕ್ರಿಯೇಟ್ ಮಾಡಿ, ಈ ಸಿನಿಮಾದಲ್ಲಿ ಏನೋ ಇದೆ ಎನ್ನುವ ಕುತೂಹಲ ಹುಟ್ಟಿಸೋದು ಅಂದರೆ ಅದೊಂದು ಸಾಧನೆಯಂತೆಯೇ. ಈ ನಿಟ್ಟಿನಲ್ಲಿ ‘ಮುಂದಿನ ನಿಲ್ದಾಣ’ ಸೃಷ್ಟಿಸಿರುವ ಸಂಚಲನ ದೊಡ್ಡದು. ಸಿಂಪಲ್ಲಾಗ್ ಇನ್ನೊಂದ್ ಲವ್ ಸ್ಟೋರಿ ಮತ್ತು ಚೂರಿಕಟ್ಟೆ ಸಿನಿಮಾದ ಮೂಲಕ ಭರವಸೆ ಮೂಡಿಸಿರುವ ನಟ ಪ್ರವೀಣ್ ತೇಜ್ ಮತ್ತು ರಂಗಿತರಂಗದ ರಾಧಿಕಾ ನಾರಾಯಣ್ ‘ಮುಂದಿನ ನಿಲ್ದಾಣ’ದಲ್ಲಿ ಪ್ರಧಾನ ಪಾತ್ರ ನಿರ್ವಹಿಸಿದ್ದಾರೆ.

ಕಲೆಯನ್ನೇ ಉಸಿರಾಗಿಸಿಕೊಂಡ ಚಿತ್ರಕಲಾವಿದೆಯಾಗಿ ಆರ್ಟ್ ಕ್ಯುರೇಟರ್ ಮೀರಾ ಮತ್ತು ವೃತ್ತಿಯಲ್ಲಿ ಐಟಿ ಇಂಜಿನಿಯರಾದರೂ ಫೋಟೋಗ್ರಫಿಯನ್ನು ಪ್ರವೃತ್ತಿಯಾಗಿಸಿಕೊಂಡು ಕಾಡು ಮೇಡು ಅಲೆಯುವ ಪಾರ್ಥರ ಸುತ್ತ ಮುಂದಿನ ನಿಲ್ದಾಣದ ಕತೆ ಸಾಗುತ್ತದೆ. ಇವರಿಬ್ಬರ ನಡುವೆ ವೈದ್ಯೆಯಾಗಿ ಅನನ್ಯಾ ಕಶ್ಯಪ್ ಪಾತ್ರ ಕೂಡಾ ಎಂಟ್ರಿ ಕೊಡುತ್ತಾರೆ. ಯಾರ ಬದುಕು ಎಲ್ಲಿ ಶುರುವಾಗಿ ಎಲ್ಲೆಲ್ಲಿ ನಿಲ್ಲುತ್ತದೆ ಎನ್ನುವ ಲೈಫ್ ಜರ್ನಿ ಕತೆ ‘ಮುಂದಿನ ನಿಲ್ದಾಣ’ ಚಿತ್ರದ್ದು. ಬಹುತೇಕ ಜಗತ್ತಿನ ಮೂಲೆ ಮೂಲೆಯಲ್ಲಿ ವಾಸ್ತವ್ಯ ಹೂಡಿರುವ ಮಂಗಳೂರು ಮೂಲದವರು ಸೇರಿ ಕೋಸ್ಟಲ್ ಬ್ರೀಜ಼್ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ತಯಾರಿಸಿರುವ ‘ಮುಂದಿನ ನಿಲ್ದಾಣ’ಕ್ಕೆ ವಿನಯ್ ಭಾರದ್ವಾಜ್ ನಿರ್ದೇಶಕರಾಗಿದ್ದಾರೆ. ಈಗಷ್ಟೇ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಚಿತ್ರಕ್ಕಾಗಿ ರಾಷ್ಟ್ರ ಪ್ರಶಸ್ತಿ ಪಡೆದಿರುವ ನಿರ್ದೇಶಕ, ರೆಟ್ರೋ ಸ್ಟಾರ್ ರಿಷಬ್ ಶೆಟ್ಟಿ ‘ಮುಂದಿನ ನಿಲ್ದಾಣ’ದ ಟೀಸರ್ ರಿಲೀಸ್ ಮಾಡಿದ್ದಾರೆ.