ಅಲ್ಲಾಡಿಸುವ ಹಾಡು ಕೇಳಿ ಅಮೆರಿಕಾ ಅದುರಿತು!

ಬೊಂಬೆ ಹೇಳುತೈತೆ ನೀನೇ ರಾಜಕುಮಾರಾ ಎಂದು ಹಾಡುವ ಮೂಲಕ  ಕನ್ನಡ ಸಂಗೀತ ಪ್ರಿಯರನ್ನು ತನ್ನ ಕಂಚಿನ ಕಂಠದಿಂದಲೇ ಮೋಡಿ ಮಾಡಿದ  ಗಾಯಕ ವಿಜಯ್ ಪ್ರಕಾಶ್ ಅವರ ಪ್ರತಿಭೆಯನ್ನು ಅಮೆರಿಕದಂಥ ಮುಂದುವರಿದ ರಾಷ್ಟ್ರದಲ್ಲಿ  ಗುರ್ತಿಸಿ  ಅವರ  ಹೆಸರಿನಲ್ಲಿ  ಒಂದು ದಿನವನ್ನು  ಮೀಸಲಿಟ್ಟು  ಗೌರವಿಸಲಾಗಿದೆ. ಅಮೆರಿಕಾದ  ನಾರ್ಥ್ ಕರೋಲಿನಾದ ಷಾರ್ಲೆಟ್ ನಗರದಲ್ಲಿ ಗಾಯಕ  ವಿಜಯ ಪ್ರಕಾಶ್ ಅವರಿಗೆ  ಈ ಶ್ರೇಷ್ಠ ಗೌರವವನ್ನು  ನೀಡಲಾಗಿದೆ.   ತಮ್ಮ ಕಂಚಿನ ಕಂಠದಿಂದಲೇ ದೇಶ ವಿದೇಶಗಳ  ಸಂಗೀತ ಪ್ರಿಯರನ್ನು   ಸೆಳೆದಿದ್ದ  ವಿಜಯ್ ಪ್ರಕಾಶ್ ಅವರ ಹೆಸರಿನಲ್ಲಿ  ಮೇ.೧೨ನ್ನು   ವಿಜಯ್ ಪ್ರಕಾಶ್ ಡೇ ಎಂದು  ಆಚರಿಸಲಾಗುವುದು ಎಂದು ಉತ್ತರ ಕರೋಲಿನಾದ  ಮೇಯರ್  ಘೋಷಿಸಿzರೆ.  ಈ ವಿಷಯವನ್ನು ಖುದ್ದು  ವಿಜಯ ಪ್ರಕಾಶ್ ಅವರೇ  ಮೊನ್ನೆ ನಡೆದ ಪತ್ರಿಕಾ ಗೋಷ್ಟಿಯಲ್ಲಿ  ಹೇಳಿಕೊಂಡರು.

ಕಳೆದ ಮೇ 12 ರಂದು ಅಮೆರಿಕದ ಉತ್ತರ ಕರೊಲಿನಾದ ಷಾರ್ಲೆಟ್  ನಗರದಲ್ಲಿ  ನಡೆದ ಸಂಗೀತ  ಸಂಜೆ ಕಾರ್ಯಕ್ರಮದಲ್ಲಿ  ತಮ್ಮ ವಿಭಿನ್ನ ಶೈಲಿಯ ಗಾಯನದಿಂದ  ವಿಜಯ್ ಪ್ರಕಾಶ್  ಅಲ್ಲಿನ  ಸಂಗೀತ ಪ್ರೇಮಿಗಳನ್ನು  ರಂಜಿಸಿದ್ದರು. ಅಪಾರ ಸಂಖ್ಯೆಯ  ಅನಿವಾಸಿ ಭಾರತೀಯರಲ್ಲದೆ ಅಮೆರಿಕನ್ನರೂ  ಕೂಡ ಆಗಮಿಸಿದ್ದ  ಈ  ಸಂಗೀತ ಸಂಜೆ ಕಾರ್ಯಕ್ರಮದಲ್ಲಿ  ಅಲ್ಲಿನ ಮೇಯರ್  ವಿಲಿಯಮ್ ಸಿ ಡಶ್  ಅವರು  ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು.

ವಿಜಯ್ ಪ್ರಕಾಶ್ ಅವರು ಹಾಡಿದ  ನಟಸಾರ್ವಭೌಮ ಚಿತ್ರದ ಒಪನ್ ದಿ ಬಾಟಲ್,  ಬೆಲ್ ಬಾಟಂ  ಚಿತ್ರದ ಏತಕೆ ಹೀಗೆ .. ಗೀತೆಗಳಿಗೆ ಅಲ್ಲಿದ್ದ  ಪ್ರೇಕ್ಷಕರು  ಕುಣಿದು ಕುಪ್ಪಳಿಸುತ್ತಿರುವ  ದೃಶ್ಯವನ್ನು  ಆ  ಮೇಯರ್  ವೀಕ್ಷಿಸಿದ್ದರು. ಗಾಯಕ ವಿಜಯ ಪ್ರಕಾಶ್ ಅವರ ಆ ಕಂಠಸಿರಿಗೆ ಮಾರುಹೋದ ಅಲ್ಲಿನ ಚುನಾಯಿತ ಪ್ರತಿನಿಧಿ  ವಿಲಿಯಮ್, ವಿಜಯ್ ಪ್ರಕಾಶ್ ಅವರ ಬಗ್ಗೆ  ಹಾಗೂ  ಅವರ ಸಂಗೀತ ಸಾಧನೆಯ ಬಗ್ಗೆ  ತಿಳಿದುಕೊಂಡಿದ್ದಾರೆ.

ಇಡೀ ಷಾರ್ಲೆಟ್ ನಗರವನ್ನೇ  ತನ್ನ  ಸಂಗೀತದ ಅಲೆಯಲ್ಲಿ  ತೇಲಿಸಿದ್ದ ಗಾಯಕ  ವಿಜಯ್ ಪ್ರಕಾಶ್  ಅವರಿಗೆ  ಆ ದಿನವನ್ನು ಮೀಸಲಿಡಲು  ಸ್ಥಳೀಯ ಆಡಳಿತ ಮಂಡಳಿಯ ಜೊತೆ  ಮೇಯರ್ ವಿಲಿಯಂ ಚರ್ಚಿಸಿ ಈ ನಿರ್ಧಾರ ಕೈಗೊಂಡಿದ್ದಾರೆ.   ಇದೀಗ 2019ರ ಮೇ.12 ವಿಜಯ್ ಪ್ರಕಾಶ್ ಡೇ ಎಂದು  ಷಾರ್ಲೆಟ್ ನಗರದ ಸರ್ಕಾರಿ ದಾಖಲೆಯಲ್ಲಿ  ನಮೂದಿಸಲಾಗಿದೆ.  ಪ್ರತಿವರ್ಷ ಈ ದಿನವನ್ನು ವಿಜಯಪ್ರಕಾಶ್ ಡೇ ಎಂದು ಆಚರಿಸಲು ನಾರ್ತ್ ಕರೊಲಿನಾದ ಷಾರ್ಲೆಟ್ ನಗರದ ಆಡಳಿತ ಮಂಡಳಿ ಅಧಿಕೃತ ಪ್ರಕಟಣೆ ಹೊರಡಿಸಿದೆ.    ಇಂಥದ್ದೊದು ಅಂತರ ರಾಷ್ಟ್ರೀಯ  ಗೌರವಕ್ಕೆ  ಪಾತ್ರರಾಗಿರುವ  ಮೊದಲ ಕನ್ನಡ ಗಾಯಕ ಎಂಬ ಖ್ಯಾತಿ ಇದೀಗ ವಿಜಯ್ ಪ್ರಕಾಶ್ ಅವರ ಪಾಲಾಗಿದೆ.  ಇದು ಭಾರತೀಯ ಸಂಗೀತ ಕ್ಷೇತ್ರಕ್ಕೆ  ಅಂತರಾಷ್ಟ್ರೀಯ  ಮಟ್ಟದಲ್ಲಿ  ಸಿಕ್ಕಿರುವ ಅತೀ ದೊಡ್ಡ ಗೌರವಗಳಲ್ಲಿ ಒಂದು ಎನ್ನಬಹುದು.