Connect with us

ಕಲರ್ ಸ್ಟ್ರೀಟ್

ಕುಂದಾಪುರ ಹುಡುಗನ ಕನಸಿಗೆ ಬಣ್ಣ ತುಂಬಿದ್ದು ಕಿಚ್ಚ ಸುದೀಪ್!

Published

on

ರೆಬೆಲ್ ಸ್ಟಾರ್ ಅಂಬರೀಶ್ ನಿರ್ದೇಶನದ ಅಂಬಿ ನಿಂಗ್ ವಯಸ್ಸಾಯ್ತೋ ಚಿತ್ರ ವ್ಯಾಪಕ ನಿರೀಕ್ಷೆ ಹುಟ್ಟಿರೋದರ ಹಿಂದಿರೋ ಸೂತ್ರಧಾರ ಗುರುದತ್ ಗಾಣಿಗ. ಇದು ಈತ ನಿರ್ದೇಶನ ಮಾಡಿರೋ ಮೊದಲ ಚಿತ್ರ. ಇಪ್ಪತ್ತಾರನೇ ವಯಸ್ಸಿಗೇ ಕಿಚ್ಚ ಸುದೀಪ್ ಬ್ಯಾನರಿನ, ಜಾಕ್ ಮಂಜು ಮಂಜು ನಿರ್ಮಾಣದ, ರೆಬೆಲ್ ಸ್ಟಾರ್ ಅಂಬರೀಶ್ ನಾಯಕನಾಗಿರೋ ಚಿತ್ರವೊಂದನ್ನು ನಿರ್ದೇಶನ ಮಾಡೋ ಅವಕಾಶ ಸಿಕ್ಕಿದ್ದು ಈ ಹುಡುಗನ ಅದೃಷ್ಟ ಎಂದೇ ಅನೇಕರು ಅಂದುಕೊಂಡಿರ ಬಹುದು. ಆದರೆ ಈ ಅವಕಾಶ ಒಲಿದು ಬಂದಿದ್ದರ ಹಿಂದೆ ಹುಡುಗು ಮನಸಿನ ಹುಂಬತನದ ಕಥೆಯಿದೆ. ಅಖಂಡ ಒಂದು ದಶಕಗಳ ಕಾಲ ಪಟ್ಟ ಪಡಿಪಾಟಲಿನ ಪಾಲೂ ಇದೆ!

ಗುರುದತ್ ಗಾಣಿಗ ಕುಂದಾಪುರದ ಹುಡುಗ. ಇಲ್ಲಿನ ನಾಗೂರು ಎಂಬ ಪುಟ್ಟ ಊರಿನವರಾದ ಗುರುಗೆ ಹೈಸ್ಕೂಲು ಓದೋ ಕಾಲದಲ್ಲಿಯೇ ನಿರ್ದೇಶಕನಾಗೋ ಕನಸು ಬಿದ್ದಿತ್ತು. ಓದೆಂದರೆ ಒಂಥರಾ ಅಲರ್ಜಿ ಹೊಂದಿದ್ದ ಗುರುದತ್‌ಗೆ ಬಣ್ಣದ ಲೋಕದ ಮರ್ಜಿಗೆ ಬಿದ್ದ ಮೇಲಂತೂ ಓದು ಅಪಥ್ಯವಾಗಲಾರಂಭಿಸಿತ್ತು. ಆದರೂ ಪೋಷಕರ ಒತ್ತಾಸೆಗೆ ಮಣಿದು ತ್ರಾಸದಿಂದಲೇ ಪಿಯುಸಿ ಮಾಡಿಕೊಂಡವರೆ ಅದರ ರಿಸಲ್ಟು ಬರೋ ಮುನ್ನವೇ ಬೆಂಗಳೂರಿನತ್ತ ಹೊರಟು ನಿಂತಿದ್ದರು. ಮನೆಯಲ್ಲಿ ವಿರೋಧ ಬಂದರೂ ಲೆಕ್ಕಿಸದ ಗುರುದತ್ ಮನಸಲ್ಲಿದ್ದದ್ದು ನಿರ್ದೇಶಕನಾಗಿಯೇ ತೀರುವ ಛಲ. ಹಾಗೆ ಏಕಾಏಕಿ ಊರು ಬಿಟ್ಟು ಬಂದು ಬೆಂಗಳೂರಿಗೆ ಬಂದಿಳಿಯೋ ಹೊತ್ತಿಗೆಲ್ಲ ಅವರಿಗೆ ಕೇವಲ ಹದಿನಾರು ವರ್ಷವಾಗಿತ್ತಷ್ಟೆ!

ಆ ಕಾಲಕ್ಕೆ ಗುರುದತ್ ಪರಿಚಿತರಾಗಲಿ, ಸಂಬಂಧಿಕರಾಗಲಿ ಬೆಂಗಳೂರಿನಲ್ಲಿ ಯಾರೆಂದರೆ ಯಾರೂ ಇರಲಿಲ್ಲ. ಒಂದಷ್ಟು ಕಾಲ ಹೊಟ್ಟೆ ಹೊರೆಯಲು ಕೆಲಸ ಮಾಡಿ ಹೇಗಾದರೂ ಚಿತ್ರರಂಗ ಪ್ರವೇಶ ಮಾಡಬೇಕಂದುಕೊಂಡಿದ್ದವರಿಗೆ ಗಾಂಧಿ ನಗರದ ದಿಕ್ಕ್ಯಾವುದೆಂಬುದೂ ಸ್ಪಷ್ಟವಾಗಿ ಗೊತ್ತಿರಲಿಲ್ಲ. ಕಡೆಗೂ ಹೇಗೋ ಹರಸಾಹಸ ಪಟ್ಟು ಮೇಕಪ್ ಅಸಿಸ್ಟೆಂಟ್ ಅಂತೆಲ್ಲ ಕೆಲಸ ಮಾಡಲಾರಂಭಿಸಿದ ಗುರುದತ್ ನಿರ್ದೇಶನ ವಿಭಾಗಕ್ಕೂ ತೂರಿಕೊಂಡಿದ್ದರು. ಆದರೂ ಇದು ತನ್ನ ಹಾದಿಗೆ ಸಂಪೂರ್ಣವಾಗಿ ದಿಕ್ಕಾಗುತ್ತಿಲ್ಲ ಎಂಬಂಥಾ ಅತೃಪ್ತಿ ಇದ್ದೇ ಇತ್ತು. ಕಡೆಗೂ ಅದೊಂದು ದಿವ್ಯ ಘಳಿಗೆಯಲ್ಲಿ ಸುದೀಪ್ ಸಾನಿಧ್ಯ ಸಿಕ್ಕಿತ್ತು. ಅವರ ಜೊತೆಗೇ ಕೆಲಸ ಮಾಡೋ ಅವಕಾಶವೂ ಒಲಿದು ಬಂದಿತ್ತು.

ಸುದೀಪ್ ಜೊತೆ ಕೆಲಸ ಮಾಡುತ್ತಾ ಅವರ ಶಿಸ್ತು, ಪ್ರತಿಯೊಂದು ವಿಚಾರದಲ್ಲಿಯೂ ಪರ್ಫೆಕ್ಟ್ ಆಗಿರಬೇಕೆಂಬ ತಹತಹಗಳನ್ನೆಲ್ಲ ಅನುಸರಿಸಿಕೊಂಡು ಸಾಗಲಾರಂಭಿಸಿದ್ದ ಗುರುದತ್‌ಗೆ ಒಂದೊಂದೇ ಜವಾಬ್ದಾರಿಗಳು ಸಿಗಲಾರಂಭಿಸಿದ್ದವು. ಸುದೀಪ್ ಅವರ ಜೊತೆ ಸಹಾಯಕ ನಿರ್ದೇಶಕರಾಗಿಯೂ ಪಳಗಲಾರಂಭಿಸಿದ್ದರು. ಈ ನಡುವೆ ತಾನು ಸ್ವತಂತ್ರ ನಿರ್ದೇಶಕನಾಗಬೇಕೆಂಬ ಆಸೆಯನ್ನು ಹೇಳಿಕೊಂಡಾಗ ಸುದೀಪ್ ಅವರ ಕಡೆಯಿಂದ ಉತ್ತೇಜನವೇ ಸಿಕ್ಕಿತ್ತು. ನಂತರ ಕಥೆಯೊಂದನ್ನು ರೆಡಿ ಮಾಡಿಕೊಳ್ಳಲಾರಂಭಿಸಿದ್ದ ಗುರುದತ್ ಸುದೀಪ್ ಅವರ ಬಳಿ ಅಡಿಗಡಿಗೆ ಚರ್ಚೆ ನಡೆಸಲಾರಂಭಿಸಿದ್ದರು.

ಈ ನಡುವೆ ಅಂಬಿ ನಿಂಗ್ ವಯಸ್ಸಾಯ್ತೋ ಚಿತ್ರವನ್ನು ತಮ್ಮದೇ ಬ್ಯಾನರಿನಿಂದ ನಿರ್ಮಾಣ ಮಾಡುವ ನಿರ್ಧಾರವನ್ನು ಸುದೀಪ್ ತೆಗೆದುಕೊಂಡಿದ್ದರು. ಆರಂಭದಲ್ಲಿ ಈ ಚಿತ್ರವನ್ನು ನಿರ್ದೇಶನ ಮಾಡಲು ಬೇರೆ ನಿರ್ದೇಶಕರಿಗಾಗಿಯೇ ಸುದೀಪ್ ಹುಡುಕಲಾರಂಭಿಸಿದ್ದರು. ಗುರುದತ್ ಕೂಡಾ ಈ ಪ್ರಾಜೆಕ್ಟಿನ ಭಾಗವಾಗಿ ಕೆಲಸ ಮಾಡಲಾರಂಭಿಸಿದ್ದರಾದರೂ ಈ ಚಿತ್ರ ನಿರ್ದೇಶನ ಮಾಡೋ ಅವಕಾಶ ತನಗೇ ಸಿಗುತ್ತದೆ ಎಂಬ ಸಣ್ಣ ಕಲ್ಪನೆಯೂ ಇರಲಿಲ್ಲ. ಆದರೆ ಅದೊಂದು ದಿನ ಗುರುದತ್‌ರನ್ನು ಕರೆದ ಸುದೀಪ್ ಅಂಬಿ ನಿಂಗ್ ವಯಸ್ಸಾಯ್ತೋ ಚಿತ್ರವನ್ನು ನೀನೇ ನಿರ್ದೇಶನ ಮಾಡು ಅಂದಿದ್ದರು. ತಾವೇ ಗುರುವನ್ನು ಅಂಬರೀಶ್ ಅವರಿಗೆ ಪರಿಚಯ ಮಾಡಿಕೊಟ್ಟು `ಇವನು ನಮ್ಮ ಹುಡುಗ. ವಯಸು ಚಿಕ್ಕದಾದರೂ ಕೆಲಸಗಾರ. ಈ ಪ್ರಾಜೆಕ್ಟನ್ನು ಇವನೇ ಪೂರ್ತಿಗೊಳಿಸುತ್ತಾನೆ’ ಅಂತ ಭರವಸೆಯ ಮಾತುಗಳನ್ನಾಡಿದ್ದರು. ಆ ಬಳಿಕ ಅಂಬಿ ಕೂಡಾ ವಯಸ್ಸಿನ ಹಂಗಿಲ್ಲದೆ ಗುರುದತ್‌ಗೆ ಸಾಥ್ ನೀಡಿದ್ದರು.

ಇದು ಗುರುದತ್ ಪಾಲಿನ ಅಸಲೀ ಟರ್ನಿಂಗ್ ಪಾಯಿಂಟ್. ಅದು ಸಾಧ್ಯವಾದದ್ದು ಸುದೀಪ್ ಅವರಿಂದಲೇ ಎಂಬುದು ಅವರ ನಂಬಿಕೆ. ಅಖಂಡ ಹತ್ತು ವರ್ಷಗಳ ಕಾಲ ಬೆಂಗಳೂರಿನಲ್ಲಿದ್ದುಕೊಂಡು ಅದೇನೇ ಮಾಡಿದರೂ ಗುರುದತ್ ಪೋಶಕರಿಗೆ ಮಗ ಬರಖತ್ತಾಗೋ ಯಾವ ಭರವಸೆಯೂ ಹುಟ್ಟದಿದ್ದರೆ ಅದರಲ್ಲಿ ಅಚ್ಚರಿಯೇನೂ ಇಲ್ಲ. ಆದರೆ ಗುರು ಸುದೀಪ್ ಅವರ ಬಳಿ ಸೇರಿಕೊಂಡ ನಂತರ ಆ ಅಭಿಪ್ರಾಯ ಬದಲಾಗಿತ್ತಂತೆ. ಈಗ್ಗೆ ನಾಲಕ್ಕೂವರೆ ವರ್ಷದ ಹಿಂದೆ ಗುರುದತ್ ಊರಿಗೆ ಹೋಗಿ ವಾಪಾಸಾಗುವಾಗ ಏನಾದರೊಂದು ಸಾಧಿಸದೇ ಮತ್ತೆ ಊರಿಗೆ ಬರೋದಿಲ್ಲ ಎಂಬ ಪ್ರತಿಜ್ಞೆ ಮಾಡಿಕೊಂಡೇ ಬೆಂಗಳೂರಿಗೆ ಮರಳಿದ್ದರಂತೆ. ಈ ಚಿತ್ರ ಆರಂಭವಾದಾಗ ಊರಿಗೆ ಹೋಗಬೇಕನ್ನಿಸಿದರೂ ಸಮಯ ಸಿಕ್ಕದೆ ಇದೀಗ ಅಂಬಿ ನಿಂಗ್ ವಯಸ್ಸಾಯ್ತೋ ಚಿತ್ರದ ಭರ್ಜರಿ ಯಶಸ್ಸಿನ ಖುಷಿ ಹೊತ್ತು ಹೆತ್ತರವನ್ನು ಕಾಣುವ ಉತ್ಸಾಹದಿಂದಿದ್ದಾರೆ.

 

ಕಲರ್ ಸ್ಟ್ರೀಟ್

ಪರದೇಸಿ ಕೇರಾಫ್ ಲಂಡನ್ ಇದು ಎರಡನೇ ಸಲದ ಮಹಾ ಸಂಗಮ!

Published

on


ಸಾಮಾನ್ಯವಾಗಿ ಒಂದೇ ತಂಡ, ನಾಯಕ ಮತ್ತು ನಿರ್ದೇಶಕರು ಒಂದರ ಹಿಂದೆ ಮತ್ತೊಂದು ಚಿತ್ರದಲ್ಲಿ ಜೊತೆಯಾಗೋದು ವಿರಳ. ಎಷ್ಟೋ ಸಲ ಒಂದು ಸಿನಿಮಾ ಮುಕ್ತಾಯಕ್ಕೂ ಮುನ್ನವೇ ತಂಡದೊಳಗಿನ ವಿಶ್ವಾಸವೂ ಸಮಾಪ್ತಿಗೊಂಡಿರುತ್ತದೆ. ಆದರೆ ಪರದೇಸಿ ಕೇರಾಫ್ ಲಂಡನ್ ವಿಚಾರದಲ್ಲದು ಪಕ್ಕಾ ತದ್ವಿರುದ್ಧ!

ಪರದೇಸಿ ಕೇರಾಫ್ ಲಂಡನ್ ಮೂಲಕ ನಿರ್ದೇಶಕ ರಾಜಶೇಖರ್ ಮತ್ತು ವಿಜಯ್ ರಾಘವೇಂದ್ರ ಎರಡನೇ ಸಲ ಒಂದಾಗಿದ್ದಾರೆ. ಈ ಹಿಂದೆ ಇದೇ ಜೋಡಿ ರಾಜ ಲವ್ಸ್ ರಾಧೆ ಚಿತ್ರದ ಮೂಲಕ ಗೆಲುವು ದಾಖಲಿಸಿತ್ತು. ಈಗ ಹೆಚ್ಚೂ ಕಮ್ಮಿ ಅದೇ ತಂಡವೇ ಸೇರಿಕೊಂಡು ಪರದೇಸಿ ಕೇರಾಫ್ ಲಂಡನ್ ಚಿತ್ರವನ್ನು ರೂಪಿಸಿದೆ.
ರಾಜ ಲವ್ಸ್ ರಾಧೆ ಚಿತ್ರ ಅಂತಿಮ ಹಂತ ತಲುಪೋ ಮುನ್ನವೇ ನಿರ್ದೇಶಕ ರಾಜಶೇಖರ್ ಹೊಸಾ ಕಥೆಯೊಂದಕ್ಕೆ ಕಾವು ಕೊಟ್ಟಿದ್ದರು. ಅದಕ್ಕೆ ವಿಜಯ್ ರಾಘವೇಂದ್ರ ಅವರೇ ನಾಯಕ ಎಂದೂ ಫಿಕ್ಸಾಗಿದ್ದರು. ಆ ಘಳಿಗೆಯಲ್ಲಿಯೇ ರಾಜಶೇಖರ್ ವಿಜಯ್ ರಾಘವೇಂದ್ರ ಅವರ ಜೊತೆ ಮತ್ತೊಂದು ಚಿತ್ರ ಮಾಡೋದಾಗಿಯೂ ಘೋಶಿಸಿದ್ದರು.

ಆ ಮಾತಿಗೆ ತಕ್ಕುದಾಗಿಯೇ ಪರದೇಸಿ ಕೇರಾಫ್ ಲಂಡನ್ ಅನ್ನು ರೂಪಿಸಿ ಬಿಡುಗಡೆಯ ಹೊಸ್ತಿಲಿಗೆ ತಂದು ನಿಲ್ಲಿಸಿದ್ದಾರೆ.
ವಿಜಯ್ ರಾಘವೇಂದ್ರರ ನಟನಾ ಚಾತುರ್ಯದ ಬಗ್ಗೆ ಬಿಡಿಸಿ ಹೇಳೋ ಅಗತ್ಯವೇನಿಲ್ಲ. ಈವರೆಗೂ ಅವರು ಥರ ಥರದ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಎಂಥಾ ಪಾತ್ರಗಳಿಗಾದರೂ ಒಗ್ಗಿಕೊಳ್ಳುವ ಛಾತಿಯನ್ನೂ ಜಾಹೀರು ಮಾಡಿದ್ದಾರೆ. ಆದರೆ ಈ ಚಿತ್ರದಲ್ಲಿ ವಿಜಯ್ ಈ ಹಿಂದೆಂದೂ ಕಾಣಿಸದ ರೀತಿಯಲ್ಲಿ ಅವತರಿಸಲಿದ್ದಾರೆ ಅಂತ ರಾಜಶೇಖರ್ ಆರಂಭದಲ್ಲಿಯೇ ಹೇಳಿದ್ದಾರೆ. ಪರದೇಸಿ ಕೇರಾಫ್ ಲಂಡನ್ ಬಗ್ಗೆ ಈ ಪಾಟಿ ನಿರೀಕ್ಷೆ ಮೂಡಿರೋದಕ್ಕೆ ಅದೂ ಕೂಡಾ ಪ್ರಮುಖ ಕಾರಣ. ಅಂಥಾ ವಿಶೇಷತೆ ಏನಿದೆ ಎಂಬುದು ಈ ತಿಂಗಳ ಕಡೇಯ ಹೊತ್ತಿಗೆಲ್ಲ ಅನಾವರಣಗೊಳ್ಳಲಿದೆ.

Continue Reading

ಕಲರ್ ಸ್ಟ್ರೀಟ್

ಡಾ ರಾಜ್ ಮೊಮ್ಮಗನಿಗೊಲಿದ ಕೆಂಡಸಂಪಿಗೆ!

Published

on


ಕನ್ನಡದಲ್ಲಿ ಅಪಾರ ಅವಕಾಶಗಳನ್ನು ಗಳಿಸಿಕೊಳ್ಳುತ್ತಲೇ ಪರಭಾಷೆಗೂ ಜಿಗಿದ ಖುಷಿಯಲ್ಲಿರುವವಳು ಮಾನ್ವಿತಾ ಕಾಮತ್. ಇದೀಗ ಮಾನ್ವಿತಾ ಡಾ ರಾಜ್‌ಕುಮಾರ್ ಮೊಮ್ಮಗ ಧೀರೇನ್ ನಾಯಕನಾಗಿರೋ ದಾರಿ ತಪ್ಪಿದ ಮಗ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾಳೆ.

ಧೀರೇನ್ ಎಂಟ್ರಿ ಕೊಡುತ್ತಿರೋ ದಾರಿ ತಪ್ಪಿದ ಮಗನ ಬಗ್ಗೆ ಈ ಹಿಂದಿನಿಂದಲೂ ವ್ಯಾಪಕವಾಗಿ ಸುದ್ದಿಗಳು ಹರಿದಾಡುತ್ತಿದ್ದವು. ಈ ವಿಚಾರ ಅಧಿಕೃತವಾಗಿ ಜಾಹೀರಾದರೂ ನಾಯಕಿ ಯಾರಾಗಲಿದ್ದಾರೆಂಬ ಕುತೂಹಲ ಮಾತ್ರ ಹಾಗೆಯೇ ಉಳಿದುಕೊಂಡಿತ್ತು. ಇಲ್ಲಿ ನಾಯಕಿಯದ್ದು ಲವ ಲವಿಕೆಯಿಂದಿರೋ ಮುದ್ದಾದ ಪಾತ್ರ. ಅದಕ್ಕೆ ಹುಡುಕಾಟ ನಡೆಸಿದ ನಿರ್ದೇಶಕರು ಕಡೆಗೂ ಮಾನ್ವಿತಾಳನ್ನು ಆಯ್ಕೆ ಮಾಡಿದ್ದಾರೆ.

ರಾಜ್ ಮೊಮ್ಮಗ ಧೀರೇನ್ ಈಗಾಗಲೇ ಈ ಚಿತ್ರದ ಪಾತ್ರಕ್ಕಾಗಿ ಪಟ್ಟು ಹಿಡಿದು ಸಾಕಷ್ಟು ತಯಾರಿ ಮಾಡಿಕೊಂಡಿದ್ದಾರೆ. ನಟನೆಯಲ್ಲಿ ತರಬೇತಿ ಪಡೆದು ಡ್ಯಾನ್ಸ್, ಫೈಟ್‌ಗಳಲ್ಲಿಯೂ ಪಳಗಿಕೊಂಡಿದ್ದಾರೆ. ನಿರ್ದೇಶಾಕ ಅನಿಲ್ ಕುಮಾರ್ ಕೂಡಾ ಎಲ್ಲ ಸಿದ್ಧತೆಗಳನ್ನೂ ಮುಗಿಸಿಕೊಂಡು ಚಿತ್ರೀಕರಣದತ್ತ ಮುಖ ಮಾಡಿದ್ದಾರೆ.
ನಟಿ ಮಾನ್ವಿತಾ ಕೆಂಡ ಸಂಪಿಗೆ ಮೂಲಕ ಎಂಟ್ರಿ ಕೊಟ್ಟು ಆ ನಂತರ ಟಗರು ಚಿತ್ರದ ಮೂಲಕ ಹೆಚ್ಚಿನ ಅವಕಾಶಗಳನ್ನು ತನ್ನದಾಗಿಸಿಕೊಳ್ಳುತ್ತಿದ್ದಾಳೆ. ಈ ಸಮಯದಲ್ಲಿಯೇ ಮರಾಠಿ ಚಿತ್ರಕ್ಕೆ ನಾಯಕಿಯಾಗೋ ಅವಕಾಶವೂ ಒಲಿದು ಬಂದಿದೆ. ಅದನ್ನೊಪ್ಪಿಕೊಂಡು ಮರಾಠಿಯಲ್ಲಿಯೂ ಸಕ್ರಿಯವಾಗಿರೋ ಮಾನ್ವಿತಾ ದಾರಿ ತಪ್ಪಿದ ಮಗನಿಗೂ ಸಾಥ್ ಕೊಡಲು ಮುಂದಾಗಿದ್ದಾಳೆ.

Continue Reading

ಕಲರ್ ಸ್ಟ್ರೀಟ್

ಕ್ರೇಜಿಸ್ಟಾರ್ ಪುತ್ರನಿಗೆ ಸಿಕ್ಕವಳು ಹುಬ್ಬಳ್ಳಿ ಹುಡುಗಿ!

Published

on


ರವಿಚಂದ್ರನ್ ಪುತ್ರ ಮನೋರಂಜನ್ ಸಾಕಷ್ಟು ತಯಾರಿ ಮಾಡಿಕೊಂಡ ಬಳಿಕ ಹೊಸಾ ಚಿತ್ರಕ್ಕೆ ರೆಡಿಯಾಗಿದ್ದಾರೆ. ಈ ಚಿತ್ರಕ್ಕೆ ಪ್ರಾರಂಭ ಎಂಬ ಹೆಸರೂ ನಿಗಧಿಯಾಗಿದೆ. ಸಾಕಷ್ಟು ಸಮಯದಿಂದ ಪ್ರಾರಂಭಕ್ಕೆ ನಾಯಕಿಯನ್ನು ಆಯ್ಕೆ ಮಾಡೋ ಕಾರ್ಯ ಚಾಲ್ತಿಯಲ್ಲಿತ್ತು. ಇದಕ್ಕಾಗಿ ದೊಡ್ಡ ಮಟ್ಟದಲ್ಲಿಯೇ ಸರ್ಕಸ್ಸು ನಡೆಸಿ ಕಡೆಗೂ ಕೀರ್ತಿ ಕಲಕೇರಿಯನ್ನು ನಾಯಕಿ ಪಾತ್ರಕ್ಕೆ ನಿಕ್ಕಿ ಮಾಡಲಾಗಿದೆ.

ಕೀರ್ತಿ ಕಲಕೇರಿ ಮಾಡೆಲಿಂಗ್ ಕ್ಷೇತ್ರದಲ್ಲಿ ಛಾಪು ಮೂಡಿಸಿರೋ ಹುಡುಗಿ. ಈಗಾಗಲೇ ಮಿಸ್ ಗೋವಾ ಕರೀಟವನ್ನೂ ಮುಡಿಗೇರಿಸಿಕೊಂಡಿರುವ ಈಕೆ ಪಕ್ಕಾ ಕನ್ನಡತಿ. ಹುಬ್ಬಳ್ಳಿಯ ಕೀರ್ತಿ ಈಗಿನ್ನೂ ಹದಿನೆಂಟರ ಹುಡುಗಿ. ಈ ಚಿತ್ರದ ನಾಯಕಿ ಪಾತ್ರಕ್ಕೆ ಮುಗ್ಧ ಮುಖ ಭಾವ ಹೊತ್ತ ತಾಜಾ ಮುಖವೊಂದು ಬೇಕಾಗಿತ್ತಂತೆ. ಅದಕ್ಕಾಗಿ ಆಡಿಷನ್ ನಡೆಸಿದ್ದ ಚಿತ್ರತಂಡ ಎಪ್ಪತ್ತಕ್ಕೂ ಅಧಿಕ ಹುಡುಗೀರಲ್ಲಿ ಕೀರ್ತಿಯನ್ನು ಆಯ್ಕೆ ಮಾಡಿಕೊಂಡಿದೆ.

ಪ್ರಾರಂಭವನ್ನು ಮನು ಕಲ್ಯಾಡಿ ನಿರ್ದೇಶನ ಮಾಡಲಿದ್ದಾರೆ. ಜಗದೀಶ್ ಕಲ್ಯಾಡಿ ಹಣ ನಿರ್ಮಾಣದ ಜವಾಬ್ದಾರಿ ಹೊತ್ತಿದ್ದಾರೆ. ಕೌಟುಂಬಿಕ ಕಥಾಹಂದರ ಹೊಂದಿರೋ ಈ ಚಿತ್ರಕ್ಕೆ ತಿಂಗಳೊಪ್ಪತ್ತಿನಲ್ಲಿಯೇ ಚಿತ್ರೀಕರಣ ಆರಂಭವಾಗಲಿದೆ.

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz