Connect with us

ಅಪ್‌ಡೇಟ್ಸ್

ಸಿಂಗಲ್ ಪೀಸಲ್ಲಿ ಉಪ್ಪಿಯ ಪ್ರೇಮಪಾಠ!

Published

on

ತಾಜ್ ಮಹಲ್, ಚಾರ್ ಮಿನಾರ್‌ನಂಥಾ ಪ್ರೇಮಕಾವ್ಯಗಳನ್ನು ಪ್ರೇಕ್ಷಕರಿಗೆ ತೋರಿಸಿದ್ದ ಆರ್ ಚಂದ್ರು ನಿರ್ದೇಶನದ ಚಿತ್ರ ಐ ಲವ್ ಯೂ. ಉಪೇಂದ್ರ ನಾಯಕರಾಗಿರೋ ಈ ಚಿತ್ರದ ಫಸ್ಟ್ ಲುಕ್ ಚೆಂದದೊಂದು ಕಾರ್ಯಕ್ರಮದ ಮೂಲಕ ಬಿಡುಗಡೆಯಾಗಿದೆ. ಹಾಗೆ ಬಿಡುಗಡೆಯಾಗಿರೋ ಫಸ್ಟ್ ಲುಕ್‌ಗೆ ಪ್ರೇಕ್ಷಕರೆಲ್ಲ ಸಕಾರಾತ್ಮಕ ಪ್ರತಿಕ್ರಿಯೆ ನೀಡಿದ್ದಾರೆ.

ದಶಕಗಳ ಹಿಂದೆ ತೆರೆ ಕಂಡಿದ್ದ ಉಪ್ಪಿ ಅಭಿನಯದ ಎ ಚಿತ್ರದ ಡೈಲಾಗುಗಳ ಮೂಲಕವೇ ಈ ಫಸ್ಟ್ ಲುಕ್ ತೆರೆದುಕೊಳ್ಳುತ್ತದೆ. ನಂತರ ಬೆಡ್ ರೂಮಲ್ಲಿ ಸಿಂಗಲ್ ಪೀಸಲ್ಲಿ ಪವಡಿಸಿ ಬಾಯಲ್ಲೊಂದು ರೆಡ್ ರೋಸ್ ಕಚ್ಚಿಕೊಂಡ ಉಪ್ಪಿ ಐ ಲವ್ ಯೂ ಪದವನ್ನು ವಿಶ್ಲೇಷಣೆ ಮಾಡೋ ಕಿಕ್ಕು ಕೊಡೋ ಡೈಲಾಗುಗಳಿವೆ. ಅಂತೂ ಈ ಮೂಲಕವೇ ನಿರ್ದೇಶಕ ಆರ್ ಚಂದ್ರು ದಶಕದ ಹಿಂದಿನ ಉಪ್ಪಿಯನ್ನು ಮತ್ತೆ ಅಭಿಮಾನಿಗಳ ಮುಂದೆ ತರಲು ಹೊರಟಿದ್ದಾರಾ ಎಂಬ ಕುತೂಹಲವೂ ಕಾಡಲಾರಂಭಿಸಿದೆ.

ಐ ಲವ್ ಯೂ ಚಿತ್ರದ ಫಸ್ಟ್ ಲುಕ್ಕನ್ನು ವಿತರಕರಾದ ಭಾಷಾ ಬಿಡುಗಡೆ ಮಾಡಿದ್ದಾರೆ. ರಾಜಕಾರಣಿ ರವಿ ಕುಮಾರ್ ಸೇರಿದಂತೆ ಅನೇಕ ಗಣ್ಯರು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು. ವಿಶಿಷ್ಟವಾದ ಆಲೋಚನೆಗಳಿಂದಲೇ ಅಪಾರ ಅಭಿಮಾನಿಗಳನ್ನು ಗಳಿಸಿಕೊಂಡಿರೋ ಉಪ್ಪಿಯವರ ಜೊತೆ ಎರಡನೇ ಸಲ ಚಿತ್ರ ಮಾಡಲು ಅವಕಾಶ ಸಿಕ್ಕಿದ್ದೇ ಪುಣ್ಯ ಅನ್ನುತ್ತಾ ಮಾತಿಗಾರಂಭಿಸಿದವರು ನಿರ್ದೇಶಕ ಕಂ ನಿರ್ಮಾಪಕ ಆರ್ ಚಂದ್ರು. ಅವರು ನಿರ್ದೇಶಕರ ನಟ. ಅವರ ವಿಶೇಷತೆಗಳೇನು ಎಂಬುದು ಬ್ರಹ್ಮ ಚಿತ್ರದ ಸಂದರ್ಭದಲ್ಲಿಯೇ ನನಗೆ ತಿಳಿದಿತ್ತು. ಆ ಚಿತ್ರದ ಬಾಕಿ ಹತ್ತು ಲಕ್ಷ ಕೊಡಲು ಹೋದಾಗ ಕೇಲವ ಒಂದು ಲಕ್ಷ ಮಾತ್ರ ತೆಗೆದುಕೊಂಡಿದ್ದ ಅವರ ಹೃದಯ ವೈಶ್ಯಾಲ್ಯತೆಯೂ ಬೆರಗು ಹುಟ್ಟಿಸಿತ್ತು. ಅದೇ ಸಮಯದಲ್ಲಿ ಅವರು ಹೊಸಾ ಚಿತ್ರ ಮಾಡಿ ನಾನು ನಿಮ್ಮ ಜೊತೆಗಿರುತ್ತೇನೆ ಎಂದೂ ಭರವಸೆ ತುಂಬಿದ್ದರು.

ನಂತರ ಅವರ ಅನಿಮತಿ ಇಲ್ಲದೆಯೆ ಚಿತ್ರ ಘೋಷಣೆ ಮಾಡಿ ಅವರ ಬಳಿ ಹೋದಾಗಲೂ ಖುಷಿಯಿಂದಲೇ ಒಪ್ಪಿಕೊಂಡಿದ್ದರು. ಬೇರೆಯವರಿಗೆ ನೀಡಿದ್ದ ಕಾಲ್ ಶೀಟನ್ನು ನನಗೆ ನೀಡಿದ್ದರು. ಸದ್ಯಕ್ಕೆ ಸಾಹಸ ಮತ್ತು ಹಾಡುಗಳು ಮಾತ್ರ ಬಾಕಿ ಉಳಿದಿವೆ. ಅದೆಲ್ಲದಕ್ಕೂ ಉಪ್ಪಿ ಸರ್ ತುಂಬು ಸಹಕಾರ ನೀಡುತ್ತಿದ್ದಾರೆಂದು ಉಪೇಂದ್ರರ ಗುಣಗಾನ ಮಾಡುತ್ತಲೇ ಚಂದ್ರು ಚಿತ್ರದ ಬಗ್ಗೆ ಭರವಸೆಯ ಮಾತುಗಳನ್ನಾಡಿದ್ದಾರೆ.

ಸದ್ಯ ಈ ಫಸ್ಟ್ ಲುಕ್ ಎಲ್ಲರ ಮನ ಗೆದ್ದಿದೆ. ಉಪೇಂದ್ರ ಈ ಚಿತ್ರದ ಮೂಲಕ ಮತ್ತೊಂದು ಗೆಲುವಿನ ಶಕೆ ಆರಂಭಿಸೋ ಲಕ್ಷಣಗಳೂ ಕಾಣಿಸುತ್ತಿವೆ.

ಅಪ್‌ಡೇಟ್ಸ್

ಬೆಳದಿಂಗಳ ಬಾಲೆ ಸುಮನ್ ನಗರ್ ಕರ್ ಈಗ ಬ್ರಾಹ್ಮಿ!

Published

on

ಹೊಸ ಅಲೆಗಳನ್ನು ಮೂಡಿಸುತ್ತಿರುವ ಕನ್ನಡ ಚಿತ್ರರಂಗವು ಇತ್ತೀಚಿನ ದಿನಗಳಲ್ಲಿ ಬಹುತೇಕ ಪ್ರಯೋಗಾತ್ಮಕ ಚಿತ್ರಗಳನ್ನು ನಿರ್ಮಾಣ ಮಾಡಿ ಚಿತ್ರರಸಿಕರ ಮನಗೆದ್ದಿದೆ ಎಂದರೆ ತಪ್ಪಾಗಲಾರದು. ಇಂತಹದೊಂದು ಹೊಸ ಅಲೆಯ ಚಿತ್ರವನ್ನು ಖ್ಯಾತ ನಟಿ, ಬೆಳದಿಂಗಳ ಬಾಲೆ ಸುಮನ್ ನಗರ್ ಕರ್ ಅವರು ತಮ್ಮ ಹೊಸ ನಿರ್ಮಾಣ ಸಂಸ್ಥೆ ಸುಮನ್ ನಗರ್ ಕರ್ ಪ್ರೊಡಕ್ಷನ್ಸ್ ಅಡಿಯಲ್ಲಿ ನಿರ್ಮಾಣ ಮಾಡಿದ್ದಾರೆ. ಈಗಾಗಲೇ ಚಿತ್ರೀಕರಣ ಮುಗಿಸಿರುವ ಈ ಚಿತ್ರದ ಹೆಸರು “ಬ್ರಾಹ್ಮಿ” . ಚಿತ್ರ ನಿರ್ಮಾಣದ ಜೊತೆಗೆ ಸುಮನ್ ಅವರು ಈ ಚಿತ್ರದಲ್ಲಿ ಮುಖ್ಯ ಪಾತ್ರದಲ್ಲಿಯೂ ಕಾಣಿಸಿಕೊಂಡಿದ್ದಾರೆ.

ಬ್ರಾಹ್ಮಿ ಅಂದರೆ ಸರಸ್ವತಿ, ವಿದ್ಯೆ ಮತ್ತು ಕಲೆಯ ಆರಾಧ್ಯ ದೇವತೆ. ಅದರಂತೆಯೇ ಈ ಚಿತ್ರವು ಆದ್ಯ ಎನ್ನುವ ಸಂಗೀತಗಾರ್ತಿಯ ಕಥೆ. ಸಂಗೀತವೇ ಸರ್ವಸ್ವ ಎಂದು ನಂಬಿದ್ದ ಆದ್ಯಾಳ ಬಾಳಿನಲ್ಲಿ ಬಿರುಗಾಳಿ ಬೀಸಿ ಸಂಗೀತವೇ ಅವಳಿಂದ ದೂರವಾಗುತ್ತದೆ. ಆದ್ಯಾಳ ಬಾಳಿನಲ್ಲಿ ಮತ್ತೆ ಸಂಗೀತ ವಾಪಸ್ಸಾಗುತ್ತದೆಯೇ ಎನ್ನುವುದೇ ಈ ಚಿತ್ರದ ಕಥಾವಸ್ತು. ಆದ್ಯಾಳ ಪಾತ್ರದಲ್ಲಿ ಸುಮನ್ ನಗರ್ ಕರ್ ಕಾಣಿಸಿಕೊಳ್ಳಲಿದ್ದಾರೆ. ಇನ್ನೊಂದು ಮುಖ್ಯ ಪಾತ್ರದಲ್ಲಿ, ಆದ್ಯಾಳ ಮ್ಯಾನೇಜರ್ ಅಚ್ಚಪ್ಪನಾಗಿ ಖ್ಯಾತ ನಟ ರಮೇಶ್ ಭಟ್ ಅವರು ಅಭಿನಯಿಸಿದ್ದಾರೆ. ಬಹಳ ವರ್ಷಗಳ ನಂತರ ಈ ಇಬ್ಬರು ಕಲಾವಿದರು ತೆರೆಯ ಮೇಲೆ ಒಟ್ಟಿಗೆ ಕಾಣಿಸಿಕೊಳ್ಳುತ್ತಿರುವುದು ಈ ಚಿತ್ರದ ವಿಶೇಷ. ಮತ್ತೊಂದು ಮುಖ್ಯ ಪಾತ್ರದಲ್ಲಿ ನಟಿ ಅನೂಷಾ ಕ್ರಷ್ಣ ಅಭಿನಯಿಸಿದ್ದಾರೆ. ಸತ್ಯ ಬಿ.ಜಿ ಒಂದು ವಿಭಿನ್ನ ಪಾತ್ರದಲ್ಲಿದ್ದಾರೆ.

ಈ ಚಿತ್ರದ ಕಥೆ ಪ್ರದೀಪ್ ವರ್ಮ ಅವರದ್ದು. ಚಿತ್ರಕಥೆ ಹಾಗೂ ಸಂಭಾಷಣೆ ರಂಗಭೂಮಿ ಹಿನ್ನೆಲೆಯುಳ್ಳ ಅಭಿಷೇಕ್ ಅಯ್ಯಂಗಾರ್ ಅವರದ್ದು. ಚಿತ್ರೀಕರಣ ನಿರ್ದೇಶನ ಪ್ರದೀಪ್ ವರ್ಮ ಹಾಗೂ co director ವಿಶ್ವನಾಥ್ ಪೆಡ್ನೇಕರ್ ಅವರದ್ದು . Post production ನಿರ್ವಹಿಸುತ್ತಿರುವವರು ವಿಶ್ವನಾಥ್ ಪೆಡ್ನೇಕರ್. ಛಾಯಾಗ್ರಹಣ ಗುರುಪ್ರಸಾದ್ ನಾರ್ನಾಡ್, ಸಂಕಲನ ಕೆಂಪರಾಜ್. ಚಿತ್ರದ ಸಂಗೀತ ನಿರ್ದೇಶಕರು ಬಿಂದುಮಾಲಿನಿ. ಸಾಹಿತ್ಯ – ಕಿರಣ್ ಕಾವೇರಪ್ಪ . ಚಿತ್ರದ ಕಾರ್ಯಕಾರಿ ನಿರ್ಮಾಪಕರು ಗುರುದೇವ್ ನಾಗರಾಜ.

Continue Reading

ಅಪ್‌ಡೇಟ್ಸ್

ಮಡಿಕೇರಿ ಕಾಡೊಳಗೆ ಕ್ಲೈಮ್ಯಾಕ್ಸ್ ಉದ್ಘರ್ಷ!

Published

on

ಸುನೀಲ್ ಕುಮಾರ್ ದೇಸಾಯಿ… ಹೀಗೊಂದು ಹೆಸರು ಕೇಳುತ್ತಲೇ ಒಂದೊಳ್ಳೆ ಚಿತ್ರಗಳ ಸಾಲೇ ಕಣ್ಮುಂದೆ ಬರುತ್ತೆ. ತಾವು ನಿರ್ದೇಶಕನಾಗಿ ಬಂದ ನಂತರ ಜನರೇಷನ್ನೇ ಬದಲಾಗಿದ್ದರೂ ಅದಕ್ಕನುಗುಣವಾಗಿ ಅಪ್‌ಡೇಟ್ ಆಗಿರೋ ದೇಸಾಯಿ ಇದೀಗ `ಉದ್ಘರ್ಷ’ ಚಿತ್ರದ ಮೂಲಕ ಮೈಕೊಡವಿಕೊಂಡಿದ್ದಾರೆ. ಮಡಿಕೇರಿಯಲ್ಲಿ ನಡೆಯುತ್ತಿರೋ ಈ ಚಿತ್ರದ ಕ್ಲೈಮ್ಯಾಕ್ಸ್ ಚಿತ್ರೀಕರಣದ ರೀತಿ ನೋಡಿದರೆ ಸುನೀಲ್ ಕುಮಾರ್ ದೇಸಾಯಿ ಹಳೇ ಖದರ್ರಿನೊಂದಿಗೆ ಎದ್ದು ನಿಲ್ಲೋ ಎಲ್ಲ ಲಕ್ಷಣಗಳೂ ಕಾಣಿಸುತ್ತಿವೆ!


ಇದೀಗ ಮಡಿಕೇರಿಯ ವಿಷಿಷ್ಠವಾದೊಂದು ಪ್ರದೇಶದಲ್ಲಿ ಉದ್ಘರ್ಷ ಚಿತ್ರದ ಕ್ಲೈಮ್ಯಾಕ್ಸ್ ಭಾಗದ ಚಿತ್ರೀಕರಣ ನಡೆಯುತ್ತಿದೆ. ಅದು ಕಾಡಿನೊಂದಿಗೆ ಬೆಸೆದುಕೊಂಡಂತಿರುವ ಕಾಫಿ ತೋಟ. ಅದರ ಮಧ್ಯದಲ್ಲೊಂದು ಬ್ರಿಟಿಷರ ಕಾಲದ ಪಳೆಯುಳಿಕೆಯಂತಿರೋ ದೊಡ್ಡ ಬಂಗಲೆ. ಅದರ ಇಕ್ಕೆಲದಲ್ಲಿಯೇ ಕಾಡೊಳಗಿಂದ ತಪ್ಪಿಸಿಕೊಂಡು ಬಂದಂತಿರೋ ಹುಡುಗಿ. ಮೈಗೆ ಗೋಣಿ ಚೀಲವನ್ನೇ ಹೊದ್ದುಕೊಂಡಿರೋ ಆಕೆಯ ಮೈತುಂಬಾ ರಕ್ತ ಒಸರುವಂಥಾ ಗಾಯ. ಆಕೆ ಈ ರಕ್ಕಸ ಗಾತ್ರದ ಬಂಗಲೆಯ ಇಕ್ಕೆಲದಲ್ಲಿ ತಪ್ಪಿಸಿಕೊಳ್ಳಲು ಹವಣಿಸುವ ದೃಷ್ಯಾವಳಿ ಇಂದು ಚಿತ್ರೀಕರಣಗೊಂಡಿದೆ.


ಒಟ್ಟಾರೆಯಾಗಿ ಈ ಚಿತ್ರೀಕರಣ ನಡೆಯುತ್ತಿರೋ ರೀತಿ ನಿಜಕ್ಕೂ ಮತ್ತೊಮ್ಮೆ ಸುನೀಲ್ ಕುಮಾರ್ ದೇಸಾಯಿ ಪರ್ವವೊಂದು ಆರಂಭವಾಗಲಿರೋ ಲಕ್ಷಣದಂತೆಯೇ ಕಾಣಿಸುತ್ತಿದೆ.

ನಮ್ಮೂರ ಮಂದಾರ ಹೂವೆ ಚಿತ್ರದಂಥಾ ಸಾರ್ವಕಾಲಿಕ ಹಿಟ್ ಚಿತ್ರಗಳನ್ನು ನಿರ್ದೇಶನ ಮಾಡಿರೋ ದೇಸಾಯಿ ಉತ್ಕರ್ಷ, ನಿಶ್ಕರ್ಷ, ಬೆಳದಿಂಗಳ ಬಾಲೆ ಮುಂತಾದ ಸಾರ್ವಕಾಲಿಕ ಹಿಟ್ ಚಿತ್ರಗಳ ಮೂಲಕ ನೆಲೆ ನಿಂತಿರೋ ದೇಸಾಯಿ, ಉದ್ಘರ್ಷ ಚಿತ್ರದ ಮೂಲಕ ಮತ್ತೊಂದು ಮಹಾ ಗೆಲುವಿಗೆ ರೂವಾರಿಯಾಗೋ ಛಾಯೆ ಮಡಿಕೇರಿಯಲ್ಲಿ ಚಿತ್ರೀಕರಣ ನಡೆಯುತ್ತಿರೋ ಪ್ರದೇಶದ ತುಂಬಾ ಕಾಣಿಸಿಕೊಂಡಿದ್ದರಲ್ಲಿ ಅಚ್ಚರಿ ಪಡುವಂಥಾದ್ದೇನೂ ಇಲ್ಲ.
ಈಗಾಗಲೇ ಈ ಚಿತ್ರ ಹೈದ್ರಾಬಾದ್ ಮುಂತಾದೆಡೆಗಳಲ್ಲಿನ ರೆಸಾರ್ಟುಗಳಲ್ಲಿ, ರಾಮೋಜಿ ಫಿಲಂ ಸಿಟಿಯಲ್ಲಿ ಅರವತೈದು ದಿನಗಳ ಚಿತ್ರೀಕರಣ ಮುಗಿಸಿಕೊಂಡಿದೆ. ಇದೀಗ ಮಡಿಕೇರಿಯಲ್ಲಿ ಕ್ಲೈಮ್ಯಾಕ್ಸ್ ಭಾಗದ ಚಿತ್ರೀಕರಣ ನಡೆಯುತ್ತಿದೆ. ಇನ್ನೊಂದು ಆರು ದಿನಗಳ ಕಾಲ ಚಿತ್ರೀಕರಣ ಸಮಾಪ್ತಿಯಾದರೆ ಉದ್ಘರ್ಷ ಚಿತ್ರ ಅಂತಿಮ ಹಂತ ತಲುಪುತ್ತದೆ. ವಿಶೇಷವೆಂದರೆ, ಈ ಚಿತ್ರದ ಮೂಲಕ ಪರಭಾಷೆಗಳಲ್ಲಿಯೂ ಬಾರೀ ಬೇಡಿಕೆ ಹೊಂದಿರುವ ನಟ ಠಾಕೂರ್ ಅನೂಪ್ ಸಿಂಗ್ ನಾಯಕನಾಗಿ ನಟಿಸಿದ್ದಾರೆ. ಕೆಲ ಜನಪ್ರಿಯ ಟಿವಿ ಶೋಗಳು ಸೇರಿದಂತೆ ಸಿಂಗಂ ಚಿತ್ರದಲ್ಲಿಯೂ ಖಳನಾಗಿ ನಟಿಸಿದ್ದವರು ಠಾಕೂರ್ ಅನೂಪ್ ಸಿಂಗ್. ಇದೀಗ ದರ್ಶನ್ ಅಭಿನಯದ ಯಜಮಾನ ಚಿತ್ರದಲ್ಲಿಯೂ ಖಳನಾಗಿ ಅಭಿನಯಿಸಿದ್ದಾರೆ. ಆದರೆ ಅವರು ನಾಯಕನಾಗಿರೋ ಮೊದಲ ಚಿತ್ರ ಉದ್ಘರ್ಷ.


ಇನ್ನುಳಿದಂತೆ ಈ ಚಿತ್ರದ ನಾಯಕಿಯಾಗಿರುವಾಕೆ ದನ್ಷಿಕಾ. ಈಕೆ ಕಬಾಲಿ ಚಿತ್ರದಲ್ಲಿ ರಜನೀಕಾಂತ್ ಮಗಳಾಗಿ ನಟಿಸಿದ್ದ ಹುಡುಗಿ. ಇದೀಗ ಮಡಿಕೇರಿಯಲ್ಲಿ ಈಕೆಯ ಭಾಗದ ಚಿತ್ರೀಕರಣವೇ ನಡೆಯುತ್ತಿದೆ. ಮೈ ತುಂಬಾ ಗಾಯ ಮಾಡಿಕೊಂಡು, ರಕ್ತ ಸೋರುತ್ತಿರುವ, ಗೋಣಿ ಚೀಲ ಹೊದ್ದುಕೊಂಡಿರೋ ಅವತಾರದಲ್ಲಿ ದಂತಿಕಾ ನಟಿಸುತ್ತಿದ್ದಾಳೆ. ದೇವರಾಜ್ ಆರ್ ನಿರ್ಮಾಣ ಮಾಡಿರುವ ಈ ಚಿತ್ರಕ್ಕೆ ಬಾಲಿವುಡ್‌ನಲ್ಲಿಯೂ ಹೆಸರು ಮಾಡಿರುವ ಸಂಜೋಯ್ ಜೋಷಿ ಹಿನ್ನೆಲೆ ಸಂಗೀತ ನೀಡಿದ್ದಾರೆ. ತಾನ್ಯಾ ಹೋಪೆ, ಕಬೀರ್ ಸಿಂಗ್ ದುಹಾನ್, ಹರ್ಷಿಕಾ ಪುಣಚ್ಚ ಮುಂತಾದವರು ನಟಿಸಿದ್ದಾರೆ.

Continue Reading

ಅಪ್‌ಡೇಟ್ಸ್

ಇದು ಕನ್ನಡಪ್ರೇಮಿ ಹುಡುಗನ ಮೊದಲ ಕನಸು!

Published

on

ಇತ್ತೀಚೆಗೆ ಬಿಡುಗಡೆಯಾಗಿದ್ದ ಹಾಡುಗಳ ಅಲೆಯಲ್ಲಿಯೇ ಪ್ರೇಕ್ಷಕರನ್ನು ತಲುಪಿಕೊಂಡಿರೋ ಚಿತ್ರ ರುದ್ರಾಕ್ಷಿಪುರ. ಹೆಸರಲ್ಲೇ ಒಂಥರಾ ರಹಸ್ಯ ಬಚ್ಚಿಟ್ಟುಕೊಂಡಿರೋ ಈ ಚಿತ್ರ ಥ್ರಿಲ್ಲರ್ ಕಥೆ ಹೊಂದಿದೆ ಎಂಬುದಷ್ಟೇ ಈವರೆಗೆ ಬಯಲಾಗಿರೋ ಅಂಶ. ಇದನ್ನು ಹೊರತಾಗಿಸಿ ಮತ್ತೆಲ್ಲವನ್ನೂ ನಿಗೂಢವಾಗಿಟ್ಟಿರೋ ನಿರ್ದೇಶಕ ಈಶ್ವರ್ ಪೋಲಂಕಿ ಪಾಲಿಗಿದು ಮೊದಲ ಕನಸು!

ಶಿಲ್ಪಿಯೂ ಆಗಿರುವ ನಾಗರಾಜ್ ಮುರುಡೇಶ್ವರ್ ನಿರ್ಮಾಣದ ಚಿತ್ರ ರುದ್ರಾಕ್ಷಿಪುರ. ದಾವಣಗೆರೆಯ ಹುಡುಗ ಅರ್ಜುನ್ ಸಹಾನ್ ಮತ್ತು ರೂಪಿಕ ಈ ಚಿತ್ರದಲ್ಲಿ ನಾಯಕ, ನಾಯಕಿಯರಾಗಿ ಅಭಿನಯಿಸಿದ್ದಾರೆ. ರವಿ ಚೇತನ್ ವಿಲನ್ ಆಗಿ ಆರ್ಭಟಿಸಿದ್ದಾರೆ. ಥ್ರಿಲ್ಲರ್ ಕಥೆಯೊಂದನ್ನು ಬೇರೆಯದ್ದೇ ವಿಧಾನದ ಕಮರ್ಷಿಯಲ್ ವೇಯಲ್ಲಿ ಹೇಳಲಾಗಿದೆ ಅಂತಷ್ಟೇ ವಿವರ ಕೊಡುವ ನಿರ್ದೇಶಕರು, ಈ ಮೂಲ ರುದ್ರಾಕ್ಷಿಪುರದತ್ತ ಕೌತುಕದ ದೃಷ್ಟಿ ನೆಡುವಂತೆಯೂ ಮಾಡುತ್ತಾರೆ.

ಈಶ್ವರ್ ಪೋಲಂಕಿ ಮೂಲತಃ ಆಂಧ್ರಪ್ರದೇಶದವರು. ಧರ್ಮಾವರಂ ಅವರ ಮೂಲ. ಆದರೆ ಅವರ ತಂದೆ ಧರ್ಮಾವರಂ ಸೀರೆಗಳ ವ್ಯಾಪಾರದ ಸಲುವಾಗಿ ವರ್ಷಾಂತರಗಳ ಹಿಂದೆ ಬೆಂಗಳೂರಿನಲ್ಲಿಯೇ ಬಂದು ನೆಲೆಯಾಗಿದ್ದಾರೆ. ಆದ್ದರಿಂದ ಈಶ್ವರ್ ಇಲ್ಲಿಯೇ ಓದಿ ಬೆಳೆದು ಪಕ್ಕಾ ಕನ್ನಡದ ಹುಡುಗನಾಗಿಯೇ ಬೆಳೆದಿದ್ದಾರೆ. ಇದಲ್ಲದೇ ಅಪಾರವಾದ ಕನ್ನಡಾಭಿಮಾನವನ್ನೂ ಹೊಂದಿದ್ದಾರೆ. ಅದು ಯಾವ ರೀತಿಯಲ್ಲಿದೆಯೆಂದರೆ, ಮುಂದ್ಯಾವತ್ತಾದರೂ ತಾನು ತೆಲುಗು ಚಿತ್ರವೊಂದನ್ನು ನಿರ್ದೇಶನ ಮಾಡಿದರೆ ಕನ್ನಡ ನಿರ್ದೇಶಕ ತೆಲುಗು ಚಿತ್ರ ನಿರ್ದೇಶನ ಮಾಡುತ್ತಿದ್ದಾರೆ ಅಂತ ಅನ್ನಿಸಿಕೊಳ್ಳೋದೇ ಅವರ ಇಂಗಿತ!

ಈಶ್ವರ್ ಪೋಲಂಕಿ ಮನೆಯವರ ಒತ್ತಾಸೆಗೆ ಮಣಿದು ಸಿಎ ಓದಲಾರಂಭಿಸಿದ್ದರಂತೆ. ಆದರೆ ಆರಂಭದಿಂದಲೂ ತಾನು ಸಿನಿಮಾ ನಿರ್ದೇಶಕನಾಗಬೇಕೆಂಬ ಇರಾದೆ ಹೊಂದಿದ್ದ ಅವರಿಗೆ ಲೆಕ್ಕಾಚಾರದ ಜಗತ್ತಿನಲ್ಲಿ ಕಳೆದು ಹೋಗೋದು ಸುತಾರಾಂ ಇಷ್ಟವಿರಲಿಲ್ಲ. ಕಡೆಗೂ ಧೈರ್ಯ ಮಾಡಿ ಮನೆ ಮಂದಿಯನ್ನು ಒಪ್ಪಿಸಿಯೇ ನಿರ್ದೇಶಕರಾಗಿರೋ ಈಶ್ವರ್ ಪಾಲಿಗೆ ರುದ್ರಾಕ್ಷಿಪುರ ಚಿತ್ರ ಮಹತ್ವಾಕಾಂಕ್ಷೆಯ ಮೊದಲ ಹೆಜ್ಜೆ.


ಪ್ರತೀ ಕ್ಷಣವೂ ಪ್ರೇಕ್ಷಕರನ್ನು ಕುತೂಹಲದ ಉತ್ತುಂಗದಲ್ಲಿಡುವ, ಭರ್ಜರಿ ಮನರಂಜನೆ ನೀಡುವ ಅಚ್ಚುಕಟ್ಟಾದ ಚಿತ್ರವೊಂದನ್ನು ನಿರ್ದೇಶನ ಮಾಡಿದ ಖುಷಿ ಈಶ್ವರ್‌ಗಿದೆ. ಮುಂದಿನ ತಿಂಗಳು ಈ ಚಿತ್ರವನ್ನು ತೆರೆಗಾಣಿಸುವ ಆಲೋಚನೆಯೂ ಅವರಲ್ಲಿದೆ.

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz