ನನ್ನ ಪ್ರಕಾರ ಹೂ ನಗೆ ಆಮಂತ್ರಿಸಿದೆ ಸಾಂಗ್ ಬಿಡುಗಡೆ!

ಸ್ಯಾಂಡಲ್ ವುಡ್ ನಲ್ಲಿ ಈಗೀಗ ಸಸ್ಪೆನ್ಸ್ ಕಂ ಥ್ರಿಲ್ಲರ್ ಓರಿಯೆಂಟೆಡ್ ಸಿನಿಮಾಗಳ ಸಂಖ್ಯೆ ಹೆಚ್ಚಾಗುತ್ತಿದ್ದು, ಬಾಕ್ಸ್ ಆಫೀಸಿನಲ್ಲಿ ನಿರೀಕ್ಷೆಗೂ ಮೀರಿದ ಗಳಿಕೆಯನ್ನು ಗಳಿಸುತ್ತಿದೆ. ಆ ಪೈಕಿ ಇತ್ತೀಚಿಗೆ ಸೆನ್ಸೇಷನ್ ಸೃಷ್ಟಿಸಿರುವ ನನ್ನ ಪ್ರಕಾರ ಸಿನಿಮಾ ಪ್ರಮುಖವಾಗಿದೆ. ಪ್ರಿಯಾಮಣಿ ಮತ್ತು ಕಿಶೋರ್ ಕಾಂಬಿನೇಷನ್ನಿನಲ್ಲಿ ಈ ಚಿತ್ರ ಮೂಡಿ ಬಂದಿದ್ದು, ಸಿಕ್ಕಾಪಟ್ಟೆ ಹೈಪ್ ಕ್ರಿಯೇಟ್ ಮಾಡುತ್ತಲೇ ಇದೆ. ಇದೀಗ ರಿಲೀಸ್ ಗೆ ಬೆರಳೆಣಿಕೆಯ ದಿನಗಳಿರುವಾಗಲೇ ನನ್ನ ಪ್ರಕಾರ ಹೂ ನಗೆ ಆಮಂತ್ರಿಸಿದೆ ಎಂಬ ಲಿರಿಕಲ್ ವಿಡಿಯೋ ಸಾಂಗನ್ನು ಬಿಡುಗಡೆ ಮಾಡಿಕೊಂಡಿದೆ.

ಈ ಹಾಡನ್ನು ಕಿರಣ್ ಕಾವೇರಪ್ಪ ಸಾಹಿತ್ಯ ಬರೆದಿದ್ದು, ಕಾರ್ತಿಕ್ ಮತ್ತು ಅನುರಾಧ ಭಟ್ ಮೆಲೋಡಿ ಮೂಡ್ ನಲ್ಲಿ ಹಾಡಿದ್ದಾರೆ. ಚಿತ್ರದಲ್ಲಿ ಕಿಶೋರ್ ಅಶೋಕ್ ಅನ್ನೋ ಖಡಕ್ ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಂಡರೆ ಪ್ರಿಯಾಮಣಿ ಅಮೃತಾ ಪಾತ್ರಧಾರಿಯಾಗಿ ಮಿಂಚಲಿದ್ದಾರೆ. ಇನ್ನು ಕೃಷ್ಣ ಲೀಲಾ ಮಯೂರಿ ಸಹ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ನನ್ನ ಪ್ರಕಾರ ಚಿತ್ರವನ್ನು ವಿನಯ್ ಬಾಲಾಜಿ ನಿರ್ದೆಶನ ಮಾಡಿದ್ದಾರೆ. ಎಲ್ಲ ಅಂದುಕೊಂಡಂತಾದರೆ ಸದ್ಯದಲ್ಲಿ ಸಿನಿಮಾ ತೆರೆಕಾಣಲಿದೆ.