Connect with us

ಕಲರ್ ಸ್ಟ್ರೀಟ್

ಸ್ವಾರ್ಥದ ದುನಿಯಾದಲ್ಲಿ ಬಿತ್ತು ಮೊದಲ ಗುನ್ನ!

Published

on

ದುನಿಯಾ ಚಿತ್ರದಲ್ಲಿ ಸಹಜವಾದ ಫೈಟ್ ಸೀನುಗಳ ಮೂಲಕವೇ ಸಾಹಸ ನಿರ್ದೇಶಕರಾಗಿ ಹೆಸರುವಾಸಿಯಾದವರು ಡಿಫರೆಂಟ್ ಡ್ಯಾನಿ. ಆ ಚಿತ್ರದ ಮಹಾ ಗೆಲುವಿನ ಭಾಗವಾಗಿದ್ದರೂ ಅದೇ ಚಿತ್ರದ ಸಂಭ್ರಮದಲ್ಲಿ ಅವಮಾನಿತರಾಗಿ ನಿಂತವರು, ಅದನ್ನೇ ಕೆಂಡದಂತೆ ಎದೆಯಲ್ಲಿಟ್ಟುಕೊಂಡು ಮತ್ತಷ್ಟು ಖ್ಯಾತಿ ಗಳಿಸಿಕೊಂಡವರು ಡ್ಯಾನಿ. ಕನ್ನಡ ಮಾತ್ರವಲ್ಲದೆ ತೆಲುಗು ಸೇರಿದಂತೆ ನಾನಾ ಭಾಷೆಗಳಲ್ಲಿ ಬ್ಯುಸಿಯಾಗಿರೋ ಅವರ ಬದುಕೂ ಒಂದು ಸಾಹಸವೇ!
ದಶಕಗಳಷ್ಟು ಹಿಂದೆ ಅಂದರೆ ಸರಿಸುಮಾರು ಇಪ್ಪತ್ತೇಳು ವರ್ಷಗಳ ಹಿಂದೆ ಅಚಾನಕ್ಕಾಗಿ ಆ ಹುಡುಗ ಪ್ರೀಮಿಯರ್ ಸ್ಟುಡಿಯೋದತ್ತ ಸುಳಿಯುತ್ತಾನೆ. ಅಲ್ಲಿ ಕುಮಾರ್ ಬಂಗಾರಪ್ಪ ಅಭಿನಯದ ಅಂಗೈಯಲ್ಲಿ ಅಪ್ಸರೆ ಎಂಬ ಚಿತ್ರದ ಚಿತ್ರೀಕರಣ ನಡೆಯುತ್ತಿರುತ್ತದೆ. ವಯೋ ಸಹಜ ಕುತೂಹಲದಿಂದ ಆ ಹುಡುಗ ಸ್ಟುಡಿಯೋದೊಳಗೆ ಎಂಟ್ರಿ ಕೊಡುವ ಹೊತ್ತಿಗೆಲ್ಲ ಅಲ್ಲಿ ಸಾಹಸ ದೃಷ್ಯಾವಳಿಗಳ ಚಿತ್ರೀಕರಣ ನಡೆಯುತ್ತಿರುತ್ತೆ. ಹಿಂದೆ ಫೈಟರುಗಳು ಹತ್ತನ್ನೆರಡಡಿ ಎತ್ತರದಿಂದ ಕೆಳ ಜಿಗಿಯೋ ಸನ್ನಿವೇಷವದು. ಅದನ್ನು ಕಂಡ ಈ ಹುಡುಗ ತಾನೇ ಆ ಸಾಹಸ ಸನ್ನಿವೇಷವನ್ನು ಮಾಡಲು ಮುಂದಾಗುತ್ತಾನೆ. ಆತನ ಉತ್ಸಾಹ ಕಂಡ ಫೈಟ್ಮಾಸ್ಟರ್ ಅವಕಾಶ ಕೊಟ್ಟೇಟಿಗೆ ಹುಡುಗ ಪಳಗಿದ ಫೈಟರ್‌ನಂತೆ ಪುಟಿದೆದ್ದಿದ್ದೇ ಅದೇ ಚಿತ್ರದಲ್ಲಿ ಫೈಟರ್ ಆಗೋ ಅವಕಾಶವನ್ನೂ ಗಿಟ್ಟಿಸಿಕೊಳ್ಳುತ್ತಾನೆ.
ಇದೆಲ್ಲ ನಡೆಯುವ ಹೊತ್ತಿಗೆ ಆತನಿಗೆ ಕೇವಲ ಹದಿನೈದು ವರ್ಷ ವಯಸ್ಸು. ಆತ ಡಿಫರೆಂಟ್ ಡ್ಯಾನಿ!
ಹೀಗೆ ಅನಿರೀಕ್ಷಿತವಾಗಿ ತನ್ನ ಆಂತರ್ಯದ ಕನಸನ್ನು ನನಸಾಗಿಸಿಕೊಂಡ ಡ್ಯಾನಿ ಮೈಸೂರಲ್ಲಿ ನಲವತೈದು ಅಡಿ ಎತ್ತರದಿಂದ ಲೀಲಾಜಾಲವಾಗಿ ಜಿಗಿದಿದ್ದರು. ಅದನ್ನು ಕಂಡ ಕುಮಾರ್ ಬಂಗಾರಪ್ಪ ಇವರಿಗೆ ಫೈಟರ್ ಕಾರ್ಡನ್ನು ಕೊಡಿಸಿದ್ದೇ ಡ್ಯಾನಿ ಬಹು ಬೇಡಿಕೆಯ ಫೈಟರ್ ಆಗಿ ಬದಲಾಗಿದ್ದರು. ಇದೆಲ್ಲ ಆದ ನಂತರ ಡ್ಯಾನಿ ಶಾಸ್ತ್ರೋಕ್ತವಾಗಿ ಫೈಟರ್ ಆಗಿ ಕಾರ್ಯ ನಿರ್ವಹಿಸಿದ್ದ ಮೊದಲ ಚಿತ್ರ ವಿನೋದ್ ಪ್ರಭಾಕರ್ ಅಭಿನಯದ ಕ್ಯಾಪ್ಟನ್ ಚಿತ್ರದಲ್ಲಿ. ಆ ನಂತರ ಅಖಂಡ ಮುನ್ನೂರೈವತ್ತು ಚಿತ್ರಗಳಲ್ಲಿ ಡ್ಯಾನಿ ಫೈಟರ್ ಆಗಿ ಕಾರ್ಯನಿರ್ವಹಿಸಿದ್ದರು. ಅದು ನಿಜಕ್ಕೂ ಕ್ಷಣವೂ ಸಾವಿಗೆದುರಾಗುವಂಥಾ ಕೆಲಸ!
ಫೈಟರ್‌ಗಳೆಂದರೆ ಅಂಥಾ ಸಾಹಸ ಮಾಡಿಯೂ ಅದರ ಕ್ರೆಡಿಟ್ಟನ್ನೆಲ್ಲ ಹೀರೋಗಳಿಗೆ, ನಟ ನಟಿಯರಿಗೆ ಬಿಟ್ಟುಕೊಟ್ಟು ಜೀವವನ್ನೇ ಒತ್ತೆಯಿಟ್ಟು ಉಸಿರಾಡೋ ವೃತ್ತಿ. ಅದರ ಸಂಕಟ ಹೆಚ್ಚಿನ ಸಂದರ್ಭಗಳಲ್ಲಿ ಪ್ರೇಕ್ಷಕರಿಗೂ ಗೊತ್ತಾಗುವುದಿಲ್ಲ. ಡ್ಯಾನಿ ಅದೆಷ್ಟೋ ಸಾರಿ ಸತ್ತೇ ಹೋಗುವಂಥಾ ಅಪಾಯಗಳನ್ನು ಮೈ ಮೇಲೆಳೆದುಕೊಂಡಿದ್ದಾರೆ. ವಿಷ್ಣುವರ್ಧನ್ ಅವರಿಗೆ ಡ್ಯೂಪ್ ಆಗಿ ಮೇಕೆದಾಟುವಿನಲ್ಲಿ ೧೭೫ ಅಡಿಯಿಂದ ದುಮುಕಿದ್ದ ಡ್ಯಾನಿ ಬದುಕುಳಿದಿದ್ದೇ ಹೆಚ್ಚು. ಲಾಕಪ್ ಡೆತ್, ಯುದ್ಧ ಮುಂತಾದ ಚಿತ್ರಗಳ ಚಿತ್ರೀಕರಣದ ಸಂದರ್ಭದಲ್ಲಯೂ ಅವರು ಸಾವಿಗೆ ಮುಖಾಮುಖಿಯಾಗಿದ್ದರು. ಹಾಯ್ ಬೆಂಗಳೂರ್ ಚಿತ್ರದ ಚಿತ್ರೀಕರಣದ ಸಂದರ್ಭದಲ್ಲಂತೂ ಟ್ರಾಫಿಕ್ ಪೊಲೀಸ್ ಜೀಪು ಡ್ಯಾನಿಗೆ ಹಿಂಬದಿಯಿಂದ ಬಂದು ಹೊಡೆದಿತ್ತು. ಆ ರಭಸಕ್ಕೆ ಬೆನ್ನಿನ ಭಾಗ ಓರೆಯಾಗಿ ಹೋಗಿತ್ತು. ಆಪರೇಷನ್ ಮಾಡಿಸಿದರೆ ಮತ್ತೆಂದೂ ಫೈಟರ್ ಆಗಲು ಸಾಧ್ಯವಿಲ್ಲ ಎಂದರಿತ ಡ್ಯಾನಿ ಆ ನೋವು ನುಂಗಿಕೊಂಡೇ ವೃತ್ತಿಯಲ್ಲಿ ಮುಂದುವರೆದಿದ್ದರು. ಅದು ಶಾಶ್ವತ ಊನವಾಗಿ ಈವತ್ತಿಗೂ ಡ್ಯಾನಿ ಜೊತೆಗಿದೆ!
ಹಾಗೆ ಮುನ್ನೂರಕ್ಕೂ ಹೆಚ್ಚು ಚಿತ್ರಗಳಿಗೆ ಫೈಟರ್ ಆಗಿ ಕೆಲಸ ಮಾಡಿದ್ದ ಡ್ಯಾನಿ ಸ್ವತಂತ್ರ ಸಾಹಸ ನಿರ್ದೇಶಕರಾಗಿದ್ದು ಎಕ್ಸ್‌ಕ್ಯೂಸ್‌ಮಿ ಚಿತ್ರದ ಮೂಲಕ. ಅದರಲ್ಲಿ ಡಿಫರೆಂಟಾದ ಸಾಹಸ ಪಟ್ಟುಗಳ ಮೂಲಕ ಅವರು ಗಮನ ಸೆಳೆದಿದ್ದರು. ಸಹಜವಾದ ಫೈಟ್ ಸೀನುಗಳು ಪ್ರೇಕ್ಷಕರ ಮೆಚ್ಚುಗೆಗೂ ಪಾತ್ರವಾಗಿದ್ದವು. ಮೊದಲ ಚಿತ್ರದಲ್ಲಿಯೇ ಡ್ಯಾನಿಯ ವಿಭಿನ್ನ ಕಸುಬುದಾರಿಕೆ ಕಂಡ ಮಾಧ್ಯಮಗಳೂ ಡ್ಯಾನಿ ಡಿಫರೆಂಟು ಅಂತ ಹಾಡಿ ಹೊಗಳಿದ್ದವು. ಆ ಮೂಲಕ ಅವರು ಡಿಫರೆಂಟ್ ಡ್ಯಾನಿ ಎಂದೇ ಪ್ರಖ್ಯಾತರಾಗಿದ್ದರು.
ಹೆಸರಲ್ಲಿಯೇ ಡಿಫರೆಂಟ್ ಎಂಬ ವಿಶೇಷಣ ಸೇರಿದ್ದರಿಂದ ಪ್ರತೀ ಚಿತ್ರದಲ್ಲಿಯೂ ಅದಕ್ಕೆ ತಕ್ಕುದಾಗಿಯೇ ಕೆಲಸ ಮಾಡಬೇಕಾದ ಅನಿವಾರ್ಯತೆಯೂ ಡ್ಯಾನಿಯೆದುರು ಸೃಷ್ಟಿಯಾಗಿತ್ತು. ಅದುವೇ ಅವರನ್ನು ವರ್ಷಾಂತರಗಳ ನಂತರವೂ ಹಳತಾಗದಂತೆ ಪೊರೆಯುತ್ತಾ ಬಂದಿದೆ. ಇಂಥಾ ಡ್ಯಾನಿಗೆ ದೊಡ್ಡ ಹೆಸರು ತಂದು ಕೊಟ್ಟ ಚಿತ್ರ ದುನಿಯಾ. ಅದರ ಭಾರೀ ಗೆಲುವಿನಲ್ಲಿ ಅವರ ಪಾಲೂ ಇತ್ತು. ಆದರೆ ಈ ಚಿತ್ರದ ಮೊದಲ ಶೋನ ನಂತರ ಚಿತ್ರ ತಂಡದ ಕೆಲ ಮಂದಿ ಬದಲಾಗಿ ಬಿಟ್ಟಿದ್ದರು. ತಾವೇ ಟಿಕೆಟು ಖರೀದಿಸಿ ಆ ಚಿತ್ರವನ್ನು ಮೊದಲ ಶೋನಲ್ಲಿ ನೋಡಿದ್ದ ಡ್ಯಾನಿಗೆ ಆ ಚಿತ್ರದ ಗೆಲುವಿನ ಸಂಭ್ರಮದಲ್ಲಿಯೂ ಅವಮಾನವಾಗಿತ್ತು. ಪ್ಯಾಲೇಸ್ ಗ್ರೌಂಡಿನಲ್ಲಿ ನಡೆದಿದ್ದ ಆ ಸಮಾರಂಭಕ್ಕೆ ಕಡೇ ಘಳಿಗೆಯಲ್ಲಿ ನಿರ್ಮಾಪಕ ಸಿದ್ದರಾಜು ಕರೆ ಮಾಡಿ ಆಹ್ವಾನಿಸಿದ್ದರಂತೆ. ಆದರೆ ಹೆಬ್ಬಾಗಿಲಲ್ಲಿಯೇ ಡ್ಯಾನಿಯನ್ನು ತಡೆದು ನಿಲ್ಲಿಸಲಾಗಿತ್ತು. ಕಡೆಗೆ ಸಾರ್ವಜನಿಕರೇ ಅವರ ಗುರುತು ಹಿಡಿದು ಪೊಲೀಸರಿಗೆ ಹೇಳಿ ಒಳ ಬಿಟ್ಟಿದ್ದರು. ಆದರೆ ಅಲ್ಲಿಗೆ ಹೋದರೂ ದೊಡ್ಡ ಹೀರೋಗಳೆಲ್ಲ ಬಂದು ಹೋದ ಮೇಲೆ ಡ್ಯಾನಿಯನ್ನು ಕಾಟಾಚಾರಕ್ಕೆ ವೇದಿಕೆಗೆ ಕರೆದು ಶೀಲ್ಡು ಕೊಟ್ಟು ಕಳಿಸಲಾಗಿತ್ತು.
ಆದರೆ ಆ ಹೊತ್ತಿಗೆಲ್ಲ ಡ್ಯಾನಿ ಕನ್ನಡ ಮಾತ್ರವಲ್ಲದೆ ಬೇರೆ ಭಾಷೆಗಳಲ್ಲಿಯೂ ಬೇಡಿಕೆ ಹೊಂದಿದ್ದರು. ಯಾಪಾಟಿ ಬೆಳೆದರೆಂದರೆ ಯಾವುದೇ ಚಿತ್ರಕ್ಕಾದರೂ ಅವರನ್ನು ನಾಲಕ್ಕು ತಿಂಗಳ ಮುಂಚೆಯೇ ಬುಕ್ ಮಾಡೋ ವಾತಾವರಣ ಸೃಷ್ಟಿಯಾಗಿತ್ತು. ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅವರೇ ಮೊದಲು ಡ್ಯಾನಿಯ ಡೇಟು ಫಿಕ್ಸ್ ಮಾಡುವಂತೆ  ಚಿತ್ರತಂಡಕ್ಕೆ ಸಲಹೆ ನೀಡುವ ಮಟ್ಟಕ್ಕೆ ಅವರು ಬೆಳೆದು ನಿಂತಿದ್ದರು. ಹಾಗೆ ಡ್ಯಾನಿ ಫೈಟ್ ಮಾಸ್ಟರ್ ಆಗಿ ಇದುವರೆಗೂ ೬೦೫ ಚಿತ್ರಗಳನ್ನು ಮಾಡಿದ್ದಾರೆ. ತೆಲುಗಿನಲ್ಲಿ ವರ್ಮಾ ನಿರ್ಮಾಣದಲ್ಲಿ ಮೂಡಿ ಬರುತ್ತಿರುವ, ಡಾಲಿ ಧನಂಜಯ್ ಅಭಿನಯದ ಭೈರವ ಗೀತಾ ಅವರ 602ನೇ ಚಿತ್ರವಂತೆ!
ಈ ನಡುವೆ ಡಿ ಅಂತೊಂದು ಚಿತ್ರವನ್ನು ನಿರ್ದೇಶನ ಮಾಡಿ ನಾಯಕನಾಗಲೂ ಡ್ಯಾನಿ ಮುಂದಾಗಿದ್ದರು. ಆದರದು ಮುಂದುವರೆಯಲಿಲ್ಲ. ಇದೀಗ ಆ ಚಿತ್ರಕ್ಕೆ ಬೇರೆ ಹೀರೋನನ್ನು ಹಾಕಿಕೊಂಡು ನಿರ್ದೇಶನ ಮಾಡೋ ಕನಸು ಹೊಂದಿದ್ದಾರೆ. ಇಂಥಾ ಡ್ಯಾನಿ ಮೂಲತಃ ಕೊಳ್ಳೇಗಾಲದವರು. ಆದರೆ ಬೆಳೆದಿದ್ದೆಲ್ಲವೂ ಮೈಸೂರಿನಲ್ಲಿ ಬನ್ನೂರು, ಮುಳ್ಳೂರು ಸೇರಿದಂತೆ ಒಂದಷ್ಟು ಊರುಗಳಲ್ಲಿ ವಿದ್ಯಾಭ್ಯಾಸ ನಡೆಸಿದ್ದ ಡ್ಯಾನಿಗೆ ಓದೆಂದರೆ ಅಷ್ಟಕ್ಕಷ್ಟೇ. ಅವರ ತಂದೆ ಸಿಐಡಿ ಅಧಿಕಾರಿಯಾಗಿದ್ದವರು. ಅಮ್ಮ ಗೃಹಿಣಿ. ತಂದೆ ಆಗಾಗ ಕೆಲ ಸಾಹಸಮಯ ವ್ಯಾಯಾಮ ಮಾಡಿಸುತ್ತಿದ್ದರಲ್ಲಾ? ಅದುವೇ ಡ್ಯಾನಿಯನ್ನು ಸಾಹಸ ನಿರ್ದೇಶಕನಾಗೋ ಕನಸಿನತ್ತ ಕೈ ಹಿಡಿದು ಮುನ್ನಡೆಸಿತ್ತು. ಆ ಬಳಿಕೆ ಚಿಕ್ಕ ವಯಸ್ಸಿಗೇ ಫೈಟರ್ ಆಗಿ ಪ್ರತೀ ಕ್ಷಣವೂ ಸಾವಿನೊಂದಿಗೆ ಸರಸವಾಡುತ್ತಾ ಬಂದಿದ್ದ ಡ್ಯಾನಿ ವಿಷ್ಣುವರ್ಧನ್, ಶಶಿಕುಮಾರ್, ದೇವರಾಜ್, ಮಾಲಾಶ್ರೀ, ಚರಣ್ ರಾಜ್ ಸೇರಿದಂತೆ ಅನೇಕ ನಟ ನಟಿಯರಿಗೆ ಡ್ಯೂಪ್ ನೀಡಿದ್ದಾರೆ. ಈ ಕ್ಷಣಕ್ಕೂ ಅವರು ಕನ್ನಡ, ತೆಲುಗು, ಮಲೆಯಾಳಂ ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದಾರೆ.  ಕರ್ನಾಟಕ ಚಲನಚಿತ್ರ ಸಾಹಸ ಕಲಾವಿದರ ಒಕ್ಕೂಟದ ಅಧ್ಯಕ್ಷರಾಗಿ ಕೂಡಾ ಕಾರ್ಯ ನಿರ್ವಹಿಸುತ್ತಿರುವ ಡಿಫರೆಂಟ್ ಡ್ಯಾನಿ ಅವರಿಗೆ ಒಳಿತಾಗಲಿ…
– ಅರುಣ್ ಕುಮಾರ್.ಜಿ

Continue Reading
Advertisement
Click to comment

Leave a Reply

Your email address will not be published. Required fields are marked *

ಕಲರ್ ಸ್ಟ್ರೀಟ್

ಶೃತಿ ಹರಿಹರನ್‌ಗೆ ಬಿಸಿ ಮುಟ್ಟಿಸಿತೇ ಮಹಿಳಾ ಆಯೋಗ?

Published

on

ಅರ್ಜುನ್ ಸರ್ಜಾ ವಿರುದ್ಧ ಲೈಂಗಿಕ ಕಿರುಕುಳದ ಆರೋಪ ಮಾಡಿರೋ ಶ್ರುತಿ ಹರಿಹರನ್ ಹರಾಕಿರಿಗಳು ಯಥಾ ಪ್ರಕಾರ ಮುಂದುವರೆದಿವೆ. ಆರಂಭದಿಂದಲೂ ಈಕೆಯ ನಡಾವಳಿಗಳ ಬಗ್ಗೆ ಒಂದು ಅನುಮಾನ ಮೂಡಿಕೊಂಡಿತ್ತಲ್ಲಾ? ಅದಕ್ಕೆ ತಕ್ಕುದಾಗಿಯೇ ಶ್ರುತಿ ವರ್ತನೆಗಳೂ ಜಾಹೀರಾಗುತ್ತಿವೆ!

ಇದೀಗ ಖುದ್ದು ಮಹಿಳಾ ಆಯೋಗವೇ ಶ್ರುತಿಯ ಉಢಾಳ ವರ್ತನೆಗಳನ್ನು ಸಹಿಸಿ ಸಾಕಾಗಿ ಸರಿಯಾಗಿಯೇ ಬಿಸಿಮುಟ್ಟಿಸಿರೋ ಸುದ್ದಿ ಹೊರ ಬಿದ್ದಿದೆ!

ಶ್ರುತಿ ಅರ್ಜುನ್ ವಿರುದ್ಧ ಮೀಟೂ ಆರೋಪ ಮಾಡಿ, ಅದು ನಾನಾ ರೂಪ ಪಡೆಯುತ್ತಲೇ ಮಹಿಳಾ ಆಯೋಗ ಈ ಬಗ್ಗೆ ಸ್ವಯಂಪ್ರೇರಿತ ದೂರು ದಾಖಲಿಸಿಕೊಂಡಿತ್ತು. ಈ ಬಗ್ಗೆ ಹೇಳಿಕೆ ನೀಡುವಂತೆ ಶ್ರುತಿ ಹರಿಹರನ್‌ಗೆ ಆದೇಸಿಸಿತ್ತು. ಆದರೆ ಇದಕ್ಕೆ ಶ್ರುತಿ ಮಾತ್ರ ಯಾವ ಪ್ರತಿಕ್ರಿಯೆಯನ್ನೂ ನೀಡದೆ ಅಸಡ್ಡೆ ತೋರಿಸಲಾರಂಭಿಸಿದ್ದಳು. ಮತ್ತೂ ಮುಂದುವರೆದು ಮಹಿಳಾ ಆಯೋಗದ ಯಾವ ಫೋನ್ ಕರೆ, ಮೆಸೇಜುಗಳಿಗೂ ಸ್ಪಂದಿಸದೇ ಮುಂದುವರೆಯಲಾರಂಭಿಸಿದ್ದಳು.

ಇದೆಲ್ಲವನ್ನೂ ಕಂಡು ಕೋಪಗೊಂಡ ಮಹಿಳಾ ಆಯೋಗ ಶ್ರುತಿಗೆ ಖಾರವಾದ ಸಂದೇಶವೊಂದನ್ನು ಕಳಿಸೋ ಮೂಲಕ ಸರಿಯಾಗಿಯೇ ಚುರುಕು ಮುಟ್ಟಿಸಿದೆ. ಇದನ್ನು ಕಂಡು ಕಂಗಾಲಾದ ಶ್ರುತಿ ತಕ್ಷಣವೇ ಸ್ಪಂದಿಸಿದ್ದಾಳೆ. ಬಚಾವಾಗಲು ಕ್ಷಮೆ ಕೇಳಿ ಸೋಮವಾರ ಹಾಜರಾಗಿ ಹೇಳಿಕೆ ಕೊಡೋದಾಗಿಯೂ ಹೇಳಿದ್ದಾಳಂತೆ. ಈಕೆ ಮಾಡಿದ ಆರೋಪ ನಿಜವೇ ಆಗಿದ್ದರೆ ಇಂಥಾ ಕಳ್ಳಾಟವಾಡೋ ಅವಶ್ಯಕತೆ ಏನಿತ್ತೆಂಬ ಪ್ರಶ್ನೆ ಜನಸಾಮಾನ್ಯರನ್ನೂ ಕಾಡಲಾರಂಭಿಸಿದೆ!

Continue Reading

ಕಲರ್ ಸ್ಟ್ರೀಟ್

ಕೆಜಿಎಫ್ ಹೀರೋಯಿನ್ ಅಳುವಿಗೆ ಅಸಲೀ ಕಾರಣವೇನು?

Published

on

ಕೆಲವೊಮ್ಮೆ ಅದೆಷ್ಟು ಅಲೆದಾಡಿದರೂ ಒಲಿಯದ ಅದೃಷ್ಟವೆಂಬೋ ಮಾಯೆ, ಕೆಲವರ ಪಾಲಿಗೆ, ಕೆಲವಾರು ಸಂದರ್ಭಗಳಲ್ಲಿ ಬಯಸದೇನೇ ಒತ್ತರಿಸಿಕೊಂಡು ಬರೋದಿದೆ. ಅದಕ್ಕೆ ಕಣ್ಣೆದುರಿನ ಉದಾಹರಣೆ ಕೆಜಿಎಫ್ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿರೋ ಶ್ರೀನಿಧಿ ಶೆಟ್ಟಿ!

ಕೆಜಿಎಫ್ ಚಿತ್ರದ ಟ್ರೈಲರ್ ಬಿಡುಗಡೆಯಾಗಿ ಘಂಟೆ ಕಳೆಯೋದರೊಳಗೇ ಅದು ಮಾಡಿರೋ ಮೋಡಿ, ಬಾಲಿವುಡ್ ಚಿತ್ರಗಳನ್ನೇ ಥಂಡಾ ಹೊಡೆಸಿರೋ ರೀತಿಗಳೇ ಈ ಚಿತ್ರದ ಅಸಲೀ ಖದರಿಗೆ ಸಾಕ್ಷಿಯಂತಿವೆ. ಈ ಬಗ್ಗೆ ಖುದ್ದು ಯಶ್ ಸೇರಿದಂತೆ ಇಡೀ ಚಿತ್ರತಂಡ ಕುಣಿದಾಡುವಂಥಾ ಖುಷಿಯಲ್ಲಿ ಮಿಂದೇಳುತ್ತಿದೆ. ಆದರೆ ಅದೆಲ್ಲವನ್ನೂ ಮೀರಿಸುವಂತೆ ಉದ್ವೇಗದಲ್ಲಿರುವಾಕೆ ಶ್ರೀನಿಧಿ ಶೆಟ್ಟಿ!

ತಾನು ಈ ಚಿತ್ರದ ಟ್ರೈಲರರ್ ನೋಡಿ ಅತ್ತೇ ಬಿಟ್ಟಿರೋದಾಗಿ ಶ್ರೀನಿಧಿ ಹೇಳಿಕೊಂಡಿದ್ದಾಳೆ. ತೀರಾ ಬಾಲಿವುಡ್ ಚಿತ್ರಗಳನ್ನೇ ಮೀರಿಸುವಂತಿರೋ ಕೆಜಿಎಫ್ ಚಿತ್ರದ ಭಾಗವಾಗಿರೋದರ ಹೆಮ್ಮೆ ಅದಕ್ಕೆ ಕಾರಣವಂತೆ. ಇದು ಸಹಜವೇ. ಯಾಕೆಂದರೆ ಈ ಶ್ರೀನಿಧಿಗೆ ಈಗ್ಗೆ ಎರಡು ವರ್ಷಗಳ ಹಿಂದೆ ಕೆಜಿಎಫ್ ಚಿತ್ರದಲ್ಲಿ ನಟಿಸೋ ಆಫರ್ ಬಂದಾಗ ಇಂಥಾದ್ದೊಂದು ಚಮಾತ್ಕಾರ ನಡೆಯಲಿದೆ ಎಂಬುದನ್ನು ಆಕೆ ಕನಸಲ್ಲಿಯೂ ಅಂದುಕೊಂಡಿರಲಿಲ್ಲವಂತೆ.

ಅದು ೨೦೧೬ರ ವರ್ಷ. ಮಾಡೆಲಿಂಗ್ ಕ್ಷೇತ್ರದಲ್ಲಿಯೂ ಒಂದಷ್ಟುಯ ಹೆಸರು ಮಾಡಿದ್ದ ಶ್ರೀನಿಧಿ ಮಿಸ್ ಇಂಡಿಯಾ ಸೌಂದರ್ಯ ಸ್ಪರ್ಧೆಯಲ್ಲಿ ಗೆಲುವು ಕಂಡಿದ್ದಳು. ಈ ಬಗ್ಗೆ ಮಾಧ್ಯಮಗಳಲ್ಲಿಯೂ ವರದಿ ಪ್ರಕಟವಾಗಿತ್ತು. ಇದನ್ನು ಕಂಡು ನಿರ್ದೇಶಕ ಪ್ರಶಾಂತ್ ನೀಲ್ ಶ್ರೀನಿಧಿಯನ್ನು ಸಂಪರ್ಕಿಸಿದ್ದರಂತೆ. ಅವರು ಹೇಳಿದ ಕಥೆ ಕೇಳಿ ಸಂಭ್ರಮದಿಂದಲೇ ಒಪ್ಪಿಕೊಂಡರೂ ಈ ಚಿತ್ರ ತನ್ನ ಪಾಲಿಗೆ ಅದೃಷ್ಟದ ಹೆಬ್ಬಾಗಿಲು ತೆರೆದೀತೆಂಬ ಸಣ್ಣ ಸುಳಿವೂ ಶ್ರೀನಿಧಿಗಿರಲಿಲ್ಲವಂತೆ. ಆದರೆ ಈ ಎರಡು ವರ್ಷಗಳ ಅವಧಿ ಆಕೆಯ ಪಾಲಿಗೆ ನಿಜಕ್ಕೂ ಹೊಸಾ ಅನುಭವಗಳ ಪಾಠಶಾಲೆ.

ಇದೀಗ ಅದರ ಪೂರ್ವಭಾವಿ ಫಲಿತಾಂಶ ಪ್ರಕಟವಾಗಿದೆ. ಬಾಲಿವುಡ್ ಮಟ್ಟದಲ್ಲಿಯೂ ಈ ಚಿತ್ರ ಸದ್ದು ಮಾಡುತ್ತಿದೆ. ಇಂಥಾ ಚಿತ್ರದ ನಾಯಕಿ ತಾನೆಂಬುದೇ ಶ್ರೀನಿಧಿ ಪಾಲಿಗೆ ಚಿವುಟಿ ನೋಡಿಕೊಳ್ಳುವಂಥಾ ಅಚ್ಚರಿಗೆ ಕಾರಣವಾಗಿದೆ!

Continue Reading

ಕಲರ್ ಸ್ಟ್ರೀಟ್

‘ಸತ್ತಮೇಲೆ ನಿದ್ರಿಸೋದು ಇದ್ದಿದ್ದೇ, ಬದುಕಿರೋವಾಗ ಕೆಲಸ ಮಾಡೋಣ…’

Published

on

ಸಾಧಿಸುವ ಹಂಬಲ ಹೊಂದಿರುವವರಿಗೆಲ್ಲ ಟಾನಿಕ್ಕಿನಂತಿರುವ ಈ ಮಾತು ಹೇಳಿ, ಕಡೇ ಘಳಿಗೆಯವರೆಗೂ ಅದಕ್ಕೆ ತಕ್ಕುದಾಗಿ ಬದುಕಿದವರು ಶಂಕರ್ ನಾಗ್. ಅವರು ದೈಹಿಕವಾಗಿ ಮರೆಯಾಗಿ ಇಪ್ಪತ್ನಾರು ವರ್ಷಗಳೇ ಕಳೆದು ಹೋಗಿದ್ದರೂ ಅವರು ಜೀವಂತವಾಗಿರುವ ಥರಹೇವಾರಿ ರೀತಿಯನ್ನು ನೋಡಿದರೆ ಅಚ್ಚರಿಯಾಗುತ್ತದೆ. ಅಭಿಮಾನ ಇಮ್ಮಡಿಸುತ್ತದೆ. ಅಷ್ಟಕ್ಕೂ ಅವರ ನೆನಪಿಗೊಂದು ನೆಪವೇ ಬೇಕಿಲ್ಲ. ಆ ರೀತಿ ಕ್ರಿಯಾಶೀಲರಾಗಿ ಎಲ್ಲದರತ್ತಲೂ ಮಿಡಿಯುತ್ತಾ ಜೀವಿಸಿದ ಶಂಕರ್ ನಾಗ್ರ ಕಾರ್ಯಕ್ಷೇತ್ರ ಚಿತ್ರರಂಗ. ಆತ ಕನ್ನಡ ಚಿತ್ರರಂಗದ ಅಜರಾಮರ ನಕ್ಷತ್ರ. ಆದರೆ ಅವರ ಆಲೋಚನೆ, ವೃತ್ತಿ ಮತ್ತು ಕನಸುಗಾರಿಕೆಗೆ ಯಾವುದೇ ಪರಿಧಿರಲಿಲ್ಲ. ಅದಾಗಲೇ ಎರಡೂವರೆ ದಶಕಗಳಾದರೂ ಅವರನ್ನು ಇಂದಿಗೂ ಪ್ರಸ್ತುತವಾಗಿರಿಸಿರುವುದು ಅದೇ ಗುಣ!

ಅರುಣ್ ಕುಮಾರ್.ಜಿ

ಇದೀಗ ಕನ್ನಡದ ಪ್ರತೀ ಮನಸುಗಳ ಮೇಲೆಯೂ ಸಾರ್ವತ್ರಿಕವಾಗಿ ಶಂಕರ್ ನಾಗ್ ಅವರ ನೆನಪಿನ ಮೊಹರು ಪಡಿಮೂಡಿದೆ. `ಛೇ ಅವರು ಬದುಕಿರಬೇಕಿತ್ತು’ ಅಂತ ಅದೆಷ್ಟು ಮನಸುಗಳು ಏಕಕಾಲದಲ್ಲಿಯೇ ಲೊಚಗುಟ್ಟುತ್ತಿವೆಯೋ. ಅವರೀಗ ಬದುಕಿದ್ದಿದ್ದರೆ ಹೇಗಿರುತ್ತಿದ್ದರು ಎಂಬುದೂ ಸಹ ಮಧುರ ಕಲ್ಪನೆಯೇ. ಅಕಸ್ಮಾತು ಶಂಕರ್ ಬದುಕಿದ್ದಿದ್ದರೆ ಈ ತಿಂಗಳ ಒಂಭತ್ತನೇ ತಾರೀಕಿಗೆ ಅವರಿಗೆ ಭರ್ತಿ ಅರವತ್ತು ವರ್ಷ ತುಂಬುತ್ತಿತ್ತು. ಬಹುಶಃ ಅವರ ಖಾತೆಗೆ ಮತ್ತಷ್ಟು ದೊಡ್ಡದಾದ ಸಾಧನೆಗಳೇ ಜಮಾವಣೆಯಾಗಿರುತ್ತಿದ್ದವು. ಈ ಅರವತ್ತೆರಡರ ವಯಸ್ಸಿಗೆ ಯುವಕರೇ ನಾಚುವಂಥಾದ್ದೊಂದು ಯೋಜನೆ ಹಾಕಿಕೊಂಡು ಒರಟು ಮೀಸೆಯ ಮೊನೆಯಲ್ಲೇ ತುಂಟ ನಗೆ ಚಿಮ್ಮಿಸುತ್ತಿದ್ದರೋ ಏನೋ…

ಇಂಥಾ ಸಾವಿರ ಕಲ್ಪನೆಗಳಿಗೆ ಕಾರಣವಾಗಿರುವುದು ಶಂಕರ್ ನಾಗ್ ಬದುಕಿದ ರೀತಿ. ಇರುವಾಗಲೇ ಸತ್ತಂತೆ ಬದುಕುವವರ ನಡುವೆ ಸತ್ತೂ ಬದುಕಿರುವ ಶಂಕರ್ ನಾಗ್ ಜೀವಿಸಿದ ಜೀವನ್ಮುಖಿ ಶೈಲಿಯೇ ಅವರ ಪ್ರಭಾವವನ್ನು ದಶಕಗಳಾಚೆಗೂ ದಾಟಿಸಿಕೊಂಡು ಬಂದಿದೆ. ಶಂಕರ್ ನಾಗ್ ಬದುಕಿದ್ದು ಕೇವಲ ಮೂವತ್ತೂಚಿಲ್ಲರೆ ವರ್ಷ ಮಾತ್ರ. ಆದರೆ ಆ ಅಲ್ಪ ಅವಧಿಯಲ್ಲಿಯೇ ಅವರು ಮಾಡಿದ ಸಾಧನೆ ಮಾತ್ರ್ರ ಅಗಾಧ. ಶಂಕರ್ ತನ್ನ ಹನ್ನೆರಡು ವರ್ಷಗಳ ವೃತ್ತಿ ಜೀವನದಲ್ಲಿ ೫೦ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದರು. ೧೯೮೪ರ ಸುಮಾರಿನಲ್ಲಿ ಒಂದೇ ವರ್ಷದಲ್ಲಿ ಬರೋಬ್ಬರಿ ಹದಿನಾಲ್ಕು ಚಿತ್ರಗಳಲ್ಲಿ ಮತ್ತು ನಂತರದ ಎರಡು ವರ್ಷಗಳಲ್ಲಿ ಇಪ್ಪತ್ನಾಲ್ಕು ಸಿನಿಮಾಗಳಲ್ಲಿ ಶಂಕರ್ ನಟಿಸಿದ್ದರು ಎಂದರೆ ಅವರು ಅದೆಷ್ಟು ಪಾಳಿಗಳಲ್ಲಿ ದುಡಿದಿರಬಹುದು, ಯಾವ ಮಟ್ಟಕ್ಕೆ ನಿದ್ರೆಯನ್ನು ಸುಟ್ಟಿರಬಹುದು ಲೆಕ್ಕಹಾಕಿ. ಶಂಕರ್ ನಾಗ್ ನಿರ್ದೇಶಕನಾಗಿ ಗುರುತಿಸಿಕೊಂಡು, ರಂಗಭೂಮಿಯಲ್ಲಿಯೂ ಹೊಸಾ ಅಲೆ ಎಬ್ಬಿಸಿ, ಕಿರುತೆರೆಯನ್ನೂ ಆವರಿಸಿಕೊಂಡ ಪರಿ ಅದ್ಭುತವಾದದ್ದು.

ಶಂಕರ್ನಾಗ್ ಅವರಿಗೆ ಸಿನಿಮಾ ಮುಂತಾದ ಯಾವ ಹಿನ್ನೆಲೆಯೂ ಇರಲಿಲ್ಲ. ಆರ್ಥಿಕವಾಗಿಯೂ ಅಂಥಾ ಶಕ್ತಿ ಇರಲೂ ಇಲ್ಲ. ಆದರೆ ಆರಂಭದಿಂದಲೂ ಏನಾದರೊಂದು ಸಾಧಿಸಿಯೇ ತೀರಬೇಕೆಂಬ ಆಳವಾದ ಹಂಬಲವಿತ್ತು. ಉತ್ತರ ಕನ್ನಡ ಜಿಲ್ಲೆಯ ಚೆಂದದ ಊರು ಹೊನ್ನಾವರದಲ್ಲಿ ೯ನೇ ನವಂಬರ್ ೧೯೫೪ರಂದು ಜನಿಸಿದ ಶಂಕರ್ ಮನೆಯ ಭಾಷೆ ಕೊಂಕಣಿ. ಶಾಲಾ ದಿನಗಳಲ್ಲಿಯೇ ಬಣ್ಣದ ಜಗತ್ತಿನ ಕನಸು ಕಂಡಿದ್ದ ಅವರು ಅನ್ನ ಅರಸಿ ಕುಟುಂಬ ಸಮೇತರಾಗಿ ಹೊರಟದ್ದು ಹೊನ್ನಾವರದಿಂದ ಮುಂಬೈಗೆ. ಮುಂಬೈನ ಇಂಗ್ಲೀಷ್ ನಾಟಕವೊಂದರಲ್ಲಿ ಅಮೋಘವಾಗಿ ಅಭಿನುಸಿದ ಶಂಕರ್ ನಾಗ್ ಖ್ಯಾತ ನಾಟಕಕಾರ ಗಿರೀಶ್ ಕಾರ್ನಾಡ್ ವರ ಗಮನ ಸೆಳೆದರು. ನಂತರ ಕಾರ್ನಾಡ್ ತಮ್ಮ `ಒಂದಾನೊಂದು ಕಾಲದಲ್ಲಿ’ ಚಿತ್ರಕ್ಕೆ ನಾಯಕನನ್ನಾಗಿ ಮಾಡಲು ಬೆಂಗಳೂರಿಗೆ ಶಂಕರನ್ನು ಕರೆತಂದರು. ನಂತರ ಶಂಕರ್ ಮತ್ತೆ ನಮ್ಮವರಾಗಿ ಹೋದರು. ಬಹುಬೇಗ ಕನ್ನಡ ಕಲಿತರು. ಹಿಂದಿ ಚಿತ್ರರಂಗ, ಕನ್ನಡ ಚಿತ್ರರಂಗ, ಮರಾಠಿ ಹಾಗೂ ಕನ್ನಡ ರಂಗಭೂಮಿ ಸೇರಿದಂತೆ ಕನ್ನಡ ಚಿತ್ರರಂಗದ ಎಲ್ಲ ವಿಭಾಗಗಳಲ್ಲೂ ಕೈಯಾಡಿಸಿದರು. ನಿರ್ಮಾಪಕ ಅಬ್ಬಾಯಿ ನಾಯ್ಡು ಅವರ ಸಾಥ್ನಿಂದ ಕರ್ಮಯಲ್ ಹೀರೋ ಆಗಿ ಭರ್ಜರಿಯಾಗಿ ಮಿಂಚಿದರು.

ಅವರು ಚಿತ್ರ ಬದುಕು ನಡೆಸಿದ್ದು ಕೇವಲ ಹತ್ತನ್ನೆರಡು ವರ್ಷ ಮಾತ್ರ. ಆದರೆ ಈ ಪುಟ್ಟ ಅವಧಿಯಲ್ಲಿ  ಮಾಡಿದ ಸಾಧನೆ ಅಪೂರ್ವವಾದದ್ದು. ಹಾಗಂತ ಅವರೇನು ಹೂವಿನ ಹಾಸಿಗೆಯ ಮೇಲೆ ನಡೆಯಲಿಲ್ಲ. ಹೊಸಾ ಆಲೋಚನೆ, ಪ್ರಯತ್ನಗಳು ಸೋಲಿನ ಕಪ್ಪ ಕೇಳಿದವು. ಸಾಲದ ಸಂಕೋಲೆ ತಂತಾನೇ ಸುತ್ತಿಕೊಂಡಿತ್ತು. ಆದರೆ ಶಂಕರ್ರ ಗಟ್ಟಿತನ ಅದ್ಯಾವುದಕ್ಕೂ ಜಗ್ಗುವಂಥಾದ್ದಾಗಿರಲಿಲ್ಲ. ಇಂಥಾ ಹಿನ್ನಡೆ ಮತ್ತು ಸಂಕಟಗಳನ್ನೇ ಸೃಜನಾತ್ಮಕವಾಗಿ ಬಳಸಿಕೊಳ್ಳುವ ಕಲೆ ಅವರಿಗೆ ಸಿದ್ಧಿಸಿತ್ತು. ಅಂಥಾ ಕನಸುಗಾರಿಕೆ ಮತ್ತು ಪ್ರಯೋಗಾತ್ಮಕ ಮನಸ್ಥಿತಿಯ ಫಲವೇ ಭಾರತೀಯ ಧಾರಾವಾಹಿ ಕ್ಷೇತ್ರದಲ್ಲೊಂದು ಕ್ರಾಂತಿಯ ಅಲೆ ಎಬ್ಬಿಸಿದ ಮಾಲ್ಗುಡಿ ಡೇಸ್ ಧಾರಾವಾಹಿ. ನಾರಾಯಣ್ ಅವರ ಮಾಲ್ಗುಡಿ ಡೇಸ್ ಕೃತಿಯನ್ನು ಅದೇ ಹೆಸರಿನಲ್ಲಿ ಧಾರಾವಾಹಿಯಾಗಿ ಮಾಡಿ ಡಿಡಿ೧ರ ಮೂಲಕ ಭಾರತದಾದ್ಯಂತ ಪ್ರಸಾರ ಮಾಡಿ ಜನಮೆಚ್ಚುಗೆ ಗಳಿಸಿದ ಶಂಕರ್ನಾಗ್ ಕನ್ನಡ, ಮರಾಠಿ, ಹಿಂದಿ ಭಾಷೆ ಸೇರಿದಂತೆ ಪ್ರತಿ ಭಾರತೀಯರ ಹೃದಯದಲ್ಲೂ ವಿರಾಜಮಾನರಾದರು. ಈಗಲೂ ಈ ಮಾಲ್ಗುಡಿಯ ಮೋಡಿ ಹಾಗೆಯೇ ಇರುವುದು ಶಂಕರ್ ಅವರ ಕೆಲಸದ ಚಾತುರ್ಯಕ್ಕಿರುವ ಜೀವಂತ ಸಾಕ್ಷಿ

ಶಂಕರ್ ಅಂದರೇನೇ ಚೈತನ್ಯದ ಚಿಲುಮೆ. ಇದು ಇಷ್ಟೇ ಎಂಬಂತೆ ಗೆರೆ ಹಾಕಿಕೊಂಡು ಯಾವುದೇ ಸವಾಲುಗಳಿಲ್ಲದೇ ಬದುಕುವುದು ಶಂಕರ್ ಜಾಯಮಾನವಾಗಿರಲಿಲ್ಲ. ಸರಿಯಾದ ದಿಕ್ಕಿನಲ್ಲಿ ಕನಸು ಕಂಡು ಅದನ್ನು ಸಾಕಾರಗೊಳಿಸಲು ಎಂಥಾ ಸವಾಲಿಗಾದರೂ ಎದೆಗೊಡುವ ಛಲ ಅವರಲ್ಲಿತ್ತು. ಆ ಕಾಲದಲ್ಲಿಯೇ ಒಂದು ಸುಸಜ್ಜಿತ ಸ್ಟುಡಿಯೋ ಕಟ್ಟಬೇಕೆಂದು ಕನಸು ಕಂಡ ಅವರು ತನ್ನಣ್ಣ ಅನಂತ್ ನಾಗ್ ಜೊತೆ ಸೇರಿಕೊಂಡು ಸಂಕೇತ್ ಎಂಬ ಸ್ಟುಡಿಯೋವನ್ನು ಬೆಂಗಳೂರಲ್ಲೇ ಸ್ಥಾಪಿಸಿದರು. ಆ ದಿನಗಳಲ್ಲಿ ಶಂಕರ್ ಅವರಿಗೆ ಆರ್ಥಿಕವಾಗಿ ಸಂಕಷ್ಟಗಳಿದ್ದವು. ಆದರೆ ತನ್ನ ಕನಸು ಗಟ್ಟಿಯಾಗಿದೆ ಎಂಬ ಭರವಸೆಯಿಂದಲೇ ಈ ಸ್ಟುಡಿಯೋ ಸ್ಥಾಪಿಸಿದ್ದರು. ಅದೂ ಅವರಿವರ ಬಳಿ ಸಾಲ ಮಾಡಿ! ಆ ಕಾಲಕ್ಕಿದು ಮಹಾ ದುಸ್ಸಾಹಸ. ಅದನ್ನು ಲೀಲಾಜಾಲವಾಗಿ ಮಾಡಿದ ಶಂಕರ್ ಅವರನ್ನು ಬಹಳಷ್ಟು ಮಂದಿ ಕುಹಕವಾಡಿದ್ದೂ ಇದೆ. ಅದಕ್ಕೆಲ್ಲ ತಲೆಕೆಡಿಸಿಕೊಳ್ಳದ ಅವರು ಸಂಕೇತ್ ಎಂಬ ತಳಹದಿಯ ಮೇಲೆ ಮತ್ತಷ್ಟು ಕನಸುಗಳನ್ನು ಪೇರಿಸುತ್ತಾ ಮುನ್ನಡೆದರು. ಮುಂದೆ ಸಂಕೇತ್ ಎಂಬ ನಾಟಕ ತಂಡವನ್ನೂ ಕಟ್ಟಿದರು. ಆ ಮೂಲಕ ಹಲವಾರು ನಾಟಕಗಳನ್ನೂ ನೀಡಿ ಕನ್ನಡ ರಂಗಭೂಮಿಯಲ್ಲೂ ಕ್ರಿಯಾಶೀಲರಾದರು.

ಹಾಗೆಂದು ಶಂಕರ್ ಕ್ರಿಯಾಶೀಲತೆ ಕೇವಲ ಸಿನಿಮಾ, ನಟನೆಗಳಿಗೆ ಮಾತ್ರ ಸೀಮಿತವಾಗಿರಲಿಲ್ಲ. ಒಂದು ಕ್ಷಣವನ್ನೂ ವ್ಯರ್ಥವಾಗಿಸಲು ಬಿಡದ ಅವರು ಈ ಸಮಾಜಕ್ಕೆ ಉಪಯೋಗವಾಗುವ ನಿಟ್ಟಿನಲ್ಲಿಯೂ ಆಲೋಚಿಸುತ್ತಿದ್ದರು. ಎರಡ್ಮೂರು ದಶಕಗಳಾಚೆ ನಿಂತು ಯೋಚಿಸುವ ಅಭೂತಪೂರ್ವ ದೂರದೃಷ್ಟಿ ಹೊಂದಿದ್ದ ಶಂಕರ್, ಆಗಿನ ಕಾಲಕ್ಕೇ ಭವಿಷ್ಯದ ಬೆಂಗಳೂರಿಗೆ ಕನಸಿನ ಭಾಷ್ಯ ಬರೆದಿದ್ದರು. ಬೆಂಗಳೂರಿಗೊಂದು ಮೆಟ್ರೋ, ನಂದಿ ಬೆಟ್ಟಕ್ಕೆ ರೋಪ್ ವೇ, ಜನಸಾಮಾನ್ಯನ ಅಗ್ಗದ ಮನೆ ಕನಸಿಗೆ ಹೊಸ ತಂತ್ರಜ್ಞಾನ, ಸಿನಿಮಾಕ್ಕಾಗಿ ಮಲ್ಟಿಪ್ಲೆಕ್ಸ್ ಹೀಗೆ ಅವರ ಕನಸುಗಳು ರೋಚಕ. ಕಡಿಮೆ ವೆಚ್ಚದಲ್ಲಿ ನಾಟಕಗಳ ಪ್ರದರ್ಶನ ನಡೆಸಲು ರಂಗಭೂಮಿ ಕಲಾವಿದರಿಗೆ ನೆರವಾಗುವಂತೆ ನಾಟಕಮಂದಿರವೊಂದನ್ನು ನಿರ್ಮಿಸುವ ಕನಸು ಹೊತ್ತಿದ್ದರು. ಬರೀ ಕನಸು ಕಾಣದೆ ಆ ಯೋಜನೆಗಳಿಗೆ ತಾವೇ ನೀಲ ನಕ್ಷೆಯನ್ನೂ ಸಿದ್ಧಪಡಿಸಿದ್ದ ಶಂಕರ್ ನಾಗ್ರ ಕ್ರಿಯಾಶೀಲತೆಗೆ ಸಾಟಿಲ್ಲ.

ಶಂಕರ್ ನಾಗ್ರ ಬದುಕು ಸಾಧಿಸುವ ಹಂಬಲವಿರುವ ಅನೇಕರಂತೆಯೇ ಡೋಲಾಯಮಾನವಾಗಿತ್ತು. ಪ್ರಯಾಸಪಟ್ಟು ವಿದ್ಯಾಭ್ಯಾಸ ಮುಗಿಸಿದ ಅವರಿಗೆ ಮುಂಬೈ ನಗರದಲ್ಲಿ ಬ್ಯಾಂಕ್ ಒಂದರ ಗುಮಾಸ್ತರಾಗಿ ಕೆಲಸ ಸಿಕ್ಕಿತ್ತು. ಆದರೆ ಅವರ ಕ್ರಿಯಾಶೀಲ ಮನಸು ಕಡತಗಳ ಕಮಟು ವಾಸನೆಯ ನಡುವೆ ಉಸಿರುಗಟ್ಟಲಾರಂಭಿಸಿತ್ತು. ಆ ಸಮಯದಲ್ಲೇ ಅವರಿಗೆ ಮರಾಠಿ ರಂಗಭೂಮಿಯ ಗೀಳು ಅಂಟಿಕೊಂಡದ್ದು. ಹೀಗಾಗಿ ಶಂಕರ್ ಅವರ ರಂಗಭೂಮಿ ಪ್ರವೇಶವಾದದ್ದು ಮರಾಠಿ ಭಾಷೆಯ ಮೂಲಕ. ಇದೇ ಸಮಯದಲ್ಲಿ ಅಲ್ಲಿನ ಗೆಳೆಯರೊಡನೆ ಸೇರಿ ಶಂಕರ್ ಅವರು ಚಿತ್ರಕತೆ ರಚಿಸಿದ ಮರಾಠಿ ಚಲನಚಿತ್ರ `೨೨ ಜೂನ್ ೧9೯೭’ಕ್ಕೆ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ದೊರಕಿತು.

ಸದಾ ಪ್ರಯೋಗಗಳಿಗೆ ಹಾತೊರೆಯುತ್ತಿದ್ದ ಶಂಕರ್ ನಾಗ್ ೮೦ಕ್ಕೂ ಹೆಚ್ಚಿನ ಕನ್ನಡ ಮತ್ತು ೨ ಹಿಂದಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ, ನಿರ್ದೇಶಿಸಿದ್ದು ಸುಮಾರು ೧೦ ಕನ್ನಡ ಚಲನಚಿತ್ರ ಹಾಗೂ ೨ ಕಿರುತೆರೆ ಧಾರವಾಹಿಗಳನ್ನು. `ಇದು ಸಾಧ್ಯ’ ಎಂಬ ಕನ್ನಡ ಚಲನಚಿತ್ರದ ಸಂಪೂರ್ಣ ಚಿತ್ರೀಕರಣವನ್ನು ಕೇವಲ ೪೮ ಗಂಟೆಗಳಲ್ಲಿ ಮುಗಿಸಿದ ದಾಖಲೆಯಲ್ಲಿ ಶಂಕರ್ ಅವರ ಕೊಡುಗೆ ಇಲ್ಲದಿಲ್ಲ. ‘ಆಟೋ ರಾಜ’ ಚಿತ್ರದ ಅವರ ಅಭಿನಯವು ಇಂದಿಗೂ ಶಂಕರ್ ನಾಗ್ ಅವರಿಗೆ ಆಟೋ ಚಾಲಕರ ನೆಚ್ಚಿನ ನಾಯಕನ ಸ್ಥಾನ ಒದಗಿಸಿಕೊಟ್ಟಿದೆ. ಕನ್ನಡಿಗರ ಹೃದಯ ಸಿಂಹಾಸನದಲ್ಲಿ ಶಂಕರ್ ಇನ್ನೂ ಜೀವಂತವಾಗಿದ್ದಾರೆ. ಸಣ್ಣದೊಂದು ಗೆಲುವಿಗೂ ಇಡೀ ದೇಹವನ್ನೇ ಉಬ್ಬರಿಸಿಕೊಂಡು ಓಡಾಡುವ ಈಗಿನ ಪೀಳಿಗೆಯ ಕೆಲ ಮಂದಿಯ ಅಬ್ಬರಾಟದ ನಡುವೆ ಶಂಕರ್ ಸದಾ ಪ್ರಸ್ತುತವೆನಿಸುತ್ತಾರೆ. ಸಾಧಿಸುವ ಛಲಕ್ಕೆ ಎಲ್ಲಾ ಕ್ಷೇತ್ರದವರಿಗೂ ಸ್ಫೂರ್ತಿಯಾಗಿದ್ದಾರೆ. ಇದು ಅವರ ಬದುಕಿನ ನಿಜವಾದ ಸಾರ್ಥಕ್ಯ.

ಅರುಣ್ ಕುಮಾರ್.ಜಿ

ಕೃಪೆ : avadhimag.com

Continue Reading
Advertisement
Chitralahari 400 x 600
DJ ENTERTAINMENTS 300 x 600

Trending

Copyright © 2018 Cinibuzz