One N Only Exclusive Cine Portal

ಮಾಯಾವಿ ನವೀನ ನೀವ್ ಮಾಡಿರೋದು ಸರೀನ?

ವಿಚಾರ ಏನೇ ಇರಲಿ. ಅದು ಸೆನ್ಸೇಷನಲ್ ಆಗಿದ್ದರೆ ಸಿನಿಮಾ ಮಂದಿ ಪಟಕ್ಕನೆ ಕ್ಯಾಚ್ ಹಾಕಿಕೊಂಡು ಬಿಡುತ್ತಾರೆ. ಅತ್ಯಾಚಾರದಿಂದ, ದರೋಡೆಯ ತನಕ ಸಿನಿಮಾಗೆ ಆಹಾರವಾಗದ ನೈಜ ಘಟನಾವಳಿಗಳನ್ನು ಹುಡುಕೋದೇ ಕಷ್ಟವೇನೋ. ಆದರೆ ಹಸಿವು ತಡೆಯಲಾಗದೆ ಮುಷ್ಟಿ ಅಕ್ಕಿ ಕದ್ದ ತಪ್ಪಿಗೆ ಅನ್ಯಾಯವಾಗಿ ಹತನಾದನಲ್ಲಾ ಕೇರಳದ ಆದಿವಾಸಿ ಮಧು ಪಾಲಕ್ಕಾಡ್?

ಈ ಘಟನೆ ಸಿನಿಮಾವಾಗುತ್ತದೆ ಎಂದರೆ ಮನುಷ್ಯತ್ವ ಹೊಂದಿರೋ ಮನಸುಗಳನ್ನು ಕಸಿವಿಸಿಯೊಂದು ಸಹಜವಾಗಿಯೇ ಆವರಿಸಿಕೊಳ್ಳುತ್ತದೆ.

ಅಂದಹಾಗೆ ಇಂದು ಆರಂಭವಾಗುತ್ತಿರುವ ಮೇಲೊಬ್ಬ ಮಾಯಾವಿ ಎಂಬ ಚಿತ್ರ ಇದೀಗ ಪೋಸ್ಟರ್ ಒಂದನ್ನು ಬಿಡುಗಡೆ ಮಾಡಿದೆ. ಅದರಲ್ಲಿ ಸಂಚಾರಿ ವಿಜಯ್ ಮಧು ಪಾಲಕ್ಕಾಡ್ ಗೆಟಪ್ಪಿನಲ್ಲಿ ಕಾಣಿಸಿಕೊಂಡಿದ್ದಾರೆ. ದೈನ್ಯದಿಂದ ನಿಂತ ಆ ಪಾತ್ರದ ಜೊತೆ ಸೆಲ್ಫಿ ತೆಗೆದುಕೊಳ್ಳುವ ಪೋಸಿನಲ್ಲಿ ಕಾಣಿಸಿಕೊಂಡಿರುವವರು ಪತ್ರಕರ್ತ ಚಂದ್ರಚೂಡ್ ಚಕ್ರವರ್ತಿ!

ಆದ್ದರಿಂದಲೇ ಮಧು ಪಾಲಕಾಡ್ ಪ್ರಕರಣವನ್ನೂ ಈ ಚಿತ್ರ ತಂಡ ಪಬ್ಲಿಸಿಟಿಗೆ ಬಳಸಿಕೊಳ್ಳುತ್ತಿದೆಯಾ ಅಂತೊಂದು ಗುಮಾನಿ ಎಲ್ಲರನ್ನು ಕಾಡಲಾರಂಭಿಸಿದೆ. ಅಕ್ಕಿ ಕದ್ದ ಆರೋಪದ ಮೇಲೆ ಕೇರಳದ ದುಷ್ಟ ಯುವಕರ ಗುಂಪೊಂದು ಮಧು ಎಂಬ ಮುಗ್ಧನನ್ನು ಹೊಡೆದು ಕೊಂದಿತಲ್ಲಾ? ಆ ಸಂದರ್ಭದಲ್ಲಿ ಇದೇ ಚಂದ್ರಚೂಡ್ ಮಾನವೀಯ ಧ್ವನಿ ಎತ್ತಿದ್ದರು. ಫೇಸ್‌ಬುಕ್ಕಿನಲ್ಲಿ ಅದರ ವಿರುದ್ಧ ಅಕ್ಷರ ಹೊಸೆದಿದ್ದರು. ಆದರೆ ಮೇಲೊಬ್ಬ ಮಾಯಾವಿ ಪೋಸ್ಟರಿನಲ್ಲಿ ಮಾತ್ರ ಚಂದ್ರಚೂಡ್ ಮನುಷ್ಯತ್ವವಿಲ್ಲದ ಯುವಕರ ಸ್ಥಾನದಲ್ಲಿ ನಿಂತು ಸಾಯೋ ಸ್ಥಿತಿಯಲ್ಲಿರುವ ಮಧು ಎಂಬ ಮುಗ್ಧ ಜೀವದ ಮುಂದೆ ಸೆಲ್ಫಿ ತೆಗೆದುಕೊಳ್ಳುವ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ!

ಅಷ್ಟಕ್ಕೂ ನವೀನ್ ಕೃಷ್ಣ ನಿರ್ದೇಶನದ ಮೇಲೊಬ್ಬ ಮಾಯಾವಿ ಚಿತ್ರಕ್ಕೆ ಸಂಭಾಷಣೆ ಬರೆದಿರುವವರು ಚಂದ್ರಚೂಡ್. ಅವರು ಈ ಚಿತ್ರದಲ್ಲಿ ವಿಲನ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆಂಬ ಸುದ್ದಿಯೂ ಹರಡಿತ್ತು. ಆದರೆ ಅದು ಈ ಪರಿಯ ವಿಲನ್ ರೋಲ್ ಎಂಬುದು ಈಗಷ್ಟೇ ಜಾಹೀರಾಗಿದೆ. ಇನ್ನೊಂದು ಮುಖ್ಯ ಅಂಶವೆಂದರೆ, ಮೇಲೊಬ್ಬ ಮಾಯಾವಿ ಚಿತ್ರದ ಕೆಲಸ ಕಾರ್ಯಗಳು ಆರಂಭವಾದಾಗ ಮಧು ಪಾಲಕ್ಕಾಡ್ ಪ್ರಕರಣ ನಡೆದಿರಲಿಲ್ಲ. ಅದರ ಕಥೆಯೇ ಬೇರೆಯದ್ದಿತ್ತು. ಆದರೀಗ ಏಕಾಏಕಿ ಪೋಸ್ಟರಿನಲ್ಲಿ ಸಂಚಾರಿ ವಿಜಯ್ ಮಧು ಪಾತ್ರದಲ್ಲಿ ಕಾಣಿಸಿಕೊಂಡಿರೋದು ಪಬ್ಲಿಸಿಟಿ ಗಿಮಿಕ್ಕಾ ಎಂಬುದು ಎಲ್ಲರನ್ನೂ ಕಾಡುತ್ತಿರುವ ಪ್ರಶ್ನೆ!

ಒಂದು ವೇಳೆ ಮಧು ಪ್ರಕರಣವನ್ನು ಮನುಷ್ಯತ್ವದ ಭೂಮಿಕೆಯಲ್ಲಿ ಅನಾವರಣಗೊಳಿಸಿದ್ದರೆ ಮೇಲೊಬ್ಬ ಮಾಯಾವಿಯನ್ನು ಒಪ್ಪಿಕೊಳ್ಳಬಹುದು. ಆದರೆ ಇದರ ಹಿಂದೆ ಪ್ರಚಾರದ ಮಾಯೆಯಿದ್ದರೆ ಮಾತ್ರ ಇದನ್ನು ಸಹಿಸಿಕೊಳ್ಳೋದು ಕಷ್ಟ. ಯಾಕೆಂದರೆ ಹಸಿವು ತಡೆಯಲಾರದೆ, ಕರುಳ ಸಂಕಟದಿಂದ ಅನ್ನ ಕದ್ದವರನ್ನು ಕೊಲ್ಲುವುದು ಎಷ್ಟು ಕಟುಕತನವೋ, ಅಂಥಾ ಪ್ರಕರಣವನ್ನು ಪ್ರಚಾರಕ್ಕೆ ಬಳಸಿಕೊಳ್ಳುವುದೂ ಕೂಡಾ ಮತ್ತೊಂದು ಬಗೆಯ ಕ್ರೌರ್ಯ. ಪ್ರಗತಿಪರ ಚಿಂತಕರಾಗಿಯೂ ಗುರುತಿಸಿಕೊಂಡಿರುವ ಚಂದ್ರಚೂಡ್ ಅವರು ಆ ಮಟ್ಟಕ್ಕಿಳಿಯಲಾರರು ಎಂಬುದಷ್ಟೇ ಸದ್ಯದ ಭರವಸೆ!

 

Leave a Reply

Your email address will not be published. Required fields are marked *


CAPTCHA Image
Reload Image