Connect with us

ಕಲರ್ ಸ್ಟ್ರೀಟ್

ಕೈ ಹಿಡಿದವರಿಗಿಂತ ಪಾಠ ಕಲಿಸಿದವರೇ ಹೆಚ್ಚು!

Published

on

ವರ್ಷದ ಹಿಂದೆ ತೆರೆ ಕಂಡಿದ್ದ ಒನ್ಸ್ ಮೋರ್ ಕೌರವ ಚಿತ್ರದ ನಾಯಕನಾಗಿ ನಟಿಸಿದ್ದವರು ನರೇಶ್ ಗೌಡ. ಒಟ್ಟಾರೆ ಚಿತ್ರದ ಏಳುಬೀಳಿನಾಚೆಗೆ ಸರಿಯಾದ ಮಾರ್ಗದರ್ಶನ ಸಿಕ್ಕರೆ ಒಳ್ಳೆ ನಟನಾಗಿ ರೂಪುಗೊಳ್ಳುತ್ತಾರೆಂಬ ಭರವಸೆಯನ್ನಂತೂ ನರೇಶ್ ಹುಟ್ಟಿಸಿದ್ದರು. ಆದರೆ, ಆ ನಂತರದಲ್ಲಿ ಸದ್ದಿಲ್ಲದಂತಿದ್ದ ನರೇಶ್ ಗೌಡ ಈಗೇನು ಮಾಡುತ್ತಿದ್ದಾರೆ? ಅವರ ಮುಂದಿನ ನಡೆಯೇನು ಎಂಬ ಪ್ರಶ್ನೆಗಳಿಗೆ ಅವರೇ ಉತ್ತರವಾಗಿದ್ದಾರೆ. ನಾಯಕನಾಗಿ ಎಂಟ್ರಿ ಕೊಟ್ಟ ಮೊದಲ ಚಿತ್ರದಲ್ಲಿಯೇ ಯಾವತ್ತೂ ಮರೆಯದ ಒಂದಷ್ಟು ಪಾಠಗಳನ್ನು ಕಲಿತಿರೋ ನರೇಶ್ ಎಲ್ಲ ನಿರಾಸೆಗಳನ್ನೂ ಕೊಡವಿಕೊಂಡು ಮೇಲೆದ್ದು ನಿಲ್ಲಲು ತಯಾರಾಗುತ್ತಿದ್ದಾರೆ!

ಅವರ ಮಾತುಗಳ ತುಂಬಾ ಒನ್ಸ್ ಮೋರ್ ಕೌರವ ಚಿತ್ರದ ಹಿಂಚುಮುಂಚಿನ ವಿದ್ಯಮಾನಗಳ ಬಗೆಗೊಂದು ವಿಷಾದ, ಕಾಸು ಸುರಿಯೋ ನಿರ್ಮಾಪಕರು ಸಿಕ್ಕಿದರೆ ಎಲ್ಲ ದಿಕ್ಕಿನಿಂದಲೂ ಹಿಂಡಿ ಹಿಪ್ಪೆ ಮಾಡುವವರ ಬಗೆಗೊಂದು ಅಸಹ್ಯ, ಮುಂದೊಂದು ಹಿಂದೊಂದು ಎಂಬಂಥಾ ನವರಂಗೀ ಆಸಾಮಿಗಳ ಬಗೆಗೆ ತಣ್ಣಗಿನ ಸಿಟ್ಟು ಮತ್ತು ಇದೆಲ್ಲವನ್ನೂ ಪಾಠ ಅಂದುಕೊಂಡು ಮತ್ತೆ ಪುಟಿದೇಳುವ ಹುಮ್ಮಸ್ಸು ನಿಗಿನಿಗಿಸುತ್ತದೆ!

ನರೇಶ್ ಗೌಡರ ಉಳಿದ ಕಥೆ, ಮುಂದಿನ ಕನಸುಗಳ ಬಗ್ಗೆ ಹೇಳುವ ಮೊದಲು ಆರಂಭದಲ್ಲೇ ಎಡವುವಂತೆ ಮಾಡಿದ ಒನ್ಸ್ ಮೋರ್ ಕೌರವ ಚಿತ್ರದ ಬಗ್ಗೆ ಹೇಳಲೇ ಬೇಕು. ಈ ಚಿತ್ರ ಭಾರೀ ಸೌಂಡಿನೊಂದಿಗೇ ಆರಂಭವಾಗಿತ್ತಲ್ಲಾ? ಹಳ್ಳಿ ಘಮಲಿನ ಚಿತ್ರಗಳಿಗೆ ಹೆಸರಾದ ಎಸ್ ಮಹೇಂದರ್ ಬಹು ಕಾಲದ ನಂತರ ನಿರ್ದೇಶನಕ್ಕಿಳಿದಿದ್ದರಿಂದ ಈ ಸಿನಿಮಾದ ಬಗ್ಗೆ ಭಾರೀ ನಿರೀಕ್ಷೆ ಹುಟ್ಟಿಕೊಂಡಿತ್ತು. ಆದರೆ ಮಹೇಂದರ್ ಥೇಟು ಜಡಭರಥನಂತೆ ಓಬೀರಾಯನ ಕಾಲದ ಕಾನ್ಸೆಪ್ಟಿನೊಂದಿಗೆ ಅಖಾಡಕ್ಕಿಳಿದಿದ್ದರು. ಈವತ್ತಿಗೆ ಮಹೇಂದರ್ ಚಿತ್ರಕ್ಕೆ ಸೋಲಾದುದರ ಎಲ್ಲ ಭಾರವನ್ನೂ ನರೇಶ್ ಗೌಡ ಹೆಗಲಿಗೆ ನೇತುಹಾಕಿ ಹೊಸಾ ಮಿಕಗಳ ಭೇಟೆಗಿಳಿದಿದ್ದಾರೆ. ಆದರೆ ನರೇಶ್ ಹೇಳೋ ಅಸಲೀ ಕಥೆ ಬೇರೆಯದ್ದೇ ಇದೆ!

ಈ ಚಿತ್ರವನ್ನು ಆರಂಭಿಸುವ ಮುನ್ನ ಮೂರು ತಿಂಗಳ ಕಾಲ ಮಹೇಂದರ್ ನರೇಶ್ ಕಚೇರಿಗೆ ಎಡತಾಕಿದ್ದರು. ರಸವತ್ತಾಗಿ ಕಥೆಯನ್ನೂ ಹೇಳಿದ್ದರು. ಕೌರವ ಚಿತ್ರದ ಮೂಲಕವೇ ವಿಜೃಂಭಿಸಿದ್ದ ಬಿ ಸಿ ಪಾಟೀಲ್ ಅವರು ತಂದೆಯ ಪಾತ್ರದಲ್ಲಿ ಕೌರವನಾಗಿ ನಟಿಸುತ್ತಾರೆಂದೂ ಮಹೇಂದರ್ ಹೇಳಿದ್ದರು. ಅವರೇ ಪೊಲೀಸ್ ಆಫೀಸರ್ ಪಾತ್ರವನ್ನು ನರೇಶ್ ಅವರೇ ನಿರ್ವಹಿಸುವಂತೆ ಒತ್ತಾಯ ಮಾಡಿದ್ದರು. ಬಿ ಸಿ ಪಾಟೀಲ್ ಜೊತೆ ನಟಿಸೋ ಅವಕಾಶ ಇರೋದರಿಂದ, ಪಳಗಿದ ನಿರ್ದೇಶಕರು ತಿದ್ದೋದರಿಂದ ನಟನಾಗಿ ನೆಲೆ ನಿಲ್ಲಬಹುದೇನೋ ಎಂಬ ಸಣ್ಣ ಆಸೆ ಮತ್ತು ಧೈರ್ಯದಿಂದ ನರೇಶ್ ಕೂಡಾ ಒಪ್ಪಿಕೊಂಡಿದ್ದರು. ಆದರೆ ಅಸಲೀ ಕಥೆ ಶುರುವಾಗಿದ್ದು ಚಿತ್ರೀಕರಣ ಶುರುವಾದ ನಂತರವೇ!

ಅದುವರೆಗೂ ತಂದೆಯ ಪಾತ್ರದಲ್ಲಿ ಬಿ ಸಿ ಪಾಟೀಲ್ ನಟಿಸುತ್ತಾರೆಂದುಕೊಂಡಿದ್ದ ನರೇಶ್‌ಗೆ ಚಿತ್ರೀಕರಣದ ಸಂದರ್ಭದಲ್ಲಿಯೇ ಶಾಕು ಕಾದಿತ್ತು. ಅಲ್ಲಿ ಪಾಟೀಲರ ಸುಳಿವೇ ಇರಲಿಲ್ಲ. ಈ ಬಗ್ಗೆ ಕೇಳಿದರೆ ‘ಹೇ ಅವ್ರು ರೆಸ್ಪಾಂಡ್ ಮಾಡ್ತಿಲ್ಲ. ಅವ್ರಿಗೆ ಬ್ರೇಕ್ ನೀಡಿದ್ದೇ ನಾನು. ಈಗದರ ನೆನಪಿಲ್ಲ. ಅವ್ರಲ್ದಿದ್ರೆ ಮತ್ತೊಬ್ರು. ನೀವೇನೂ ತಲೆ ಕೆಡಿಸ್ಕೋಬೇಡಿ’ ಎಂಬ ಭೋಳೇ ಉತ್ತರ ಎದುರಾಗಿತ್ತು. ಆ ನಂತರ ತಮ್ಮ ಪಾತ್ರವೇ ಬರಖತ್ತಾಗೋದಿಲ್ಲ ಎಂಬ ವಿಚಾರ ಚಿತ್ರೀಕರಣದ ಹಂತದಲ್ಲಿಯೇ ನರೇಶ್ ಅವರಿಗೆ ಅರ್ಥವಾಗಿ ಹೋಗಿತ್ತು. ಈ ಬಗ್ಗೆ ಮಾತಾಡಿದರೆ ಮಹೇಂದರ್ ಅವರ ಕಡೆಯಿಂದ ಬರುತ್ತಿದ್ದದ್ದು ತಾನು ಎಂತೆಂಥಾ ಸಿನಿಮಾ ಕೊಟ್ಟ ನಿರ್ಮಾಪಕ ಎಂಬ ಒಣ ಜಂಭ ಮಾತ್ರ.

ಇದಾದ ಮೇಲೆ ಪ್ರಮೋಷನ್ ವಿಚಾರವಾಗಿಯೂ ಮಹೇಂದರ್ ದಂಗಾಗುವಂತೆ ನಡೆದುಕೊಳ್ಳಲಾರಂಭಿಸಿದ್ದರು. ಚಾನೆಲ್‌ಗಳಲ್ಲಿ ಪ್ರಮೋಷನ್ ಪ್ರೋಗ್ರಾಮಿದ್ದರೆ ಅದಕ್ಕೂ ಚಕ್ಕರ್. ಮಜಾ ಟಾಕೀಸ್ ಪ್ರೋಗ್ರಾಮಿಗೆ ಹೋಗಿ ಅಂದರೆ ಅದೊಂದು ಪ್ರೋಗ್ರಾಮೇನ್ರೀ ಎಂಬಂಥಾ ಧಾಡಸಿ ಉತ್ತರ. ಆದರೆ ಆ ಹೊತ್ತಿಗಾಗಲೇ ಮಹೇಂದರ್ ಆರಂಭದಲ್ಲಿ ಕೊಟ್ಟಿದ್ದ ಬಜೆಟ್ಟು ಮೂರು ಪಟ್ಟಾಗಿತ್ತು. ಒಂದು ಕೋಟಿ ಕಾಸು ಸುರಿದರೆ ಸಾಕೆಂದಿದ್ದ ಮಹೇಂದರ್ ಬಣ್ಣ ಬಣ್ಣದ ಮಾತಾಡಿ ನಾಲಕ್ಕೂ ಚಿಲ್ಲರೆ ಕೋಟಿ ಖರ್ಚು ಮಾಡಿಸಿದ್ದರು. ಇದು ಹೀಗೇ ಇದ್ದರೆ ಕಷ್ಟ ಅಂದುಕೊಂಡ ನರೇಶ್ ತಾವೇ ಪ್ರಮೋಷನ್ ನಡೆಸಿದರೂ ಮಹೇಂದರ್ ಅವರದ್ದು ಇದೆಲ್ಲ ವರ್ಕೌಟ್ ಆಗಲ್ಲ ಎಂಬಂಥಾ ನಿರಾಸಕ್ತಿ.

ಆದರೆ, ಅದುವರೆಗೂ ಮನೆಯಲ್ಲಿಯೇ ಇದ್ದ ಮಹೇಂದರ್ ಚಿತ್ರ ಬಿಡುಗಡೆಯಾಗೋ ಮುನ್ನಾ ದಿನ ನರೇಶ್ ಅವರ ಮುಂದೆ ನಿಂತಿದ್ದರು. ಮನೆ ಬಾಡಿಗೆ ಕಟ್ಟಿಲ್ಲ ಅಂತ ಗೋಳು ತೋಡಿಕೊಂಡು ಐವತ್ತು ಸಾವಿರ ಇಸಿದುಕೊಂಡು ಹೋಗಿದ್ದರು. ಅದಕ್ಕೂ ಮುನ್ನ ನರೇಶ್ ಖುದ್ದಾಗಿ ನಿರ್ಮಾಪಕ ಭೋಗೇಂದ್ರ ಬಾಡಿಗೆಗಿದ್ದ ಮನೆಯನ್ನೇ ಮೂರು ಲಕ್ಷ ಕೊಟ್ಟು ಮಹೇಂದರ್ ಅವರಿಗೆ ಕೊಡಿಸಿದ್ದರು. ಇಂಥಾ ಮಹೇಂದರ್ ಈವತ್ತು ಒನ್ಸ್ ಮೋರ್ ಕೌರವ ಚಿತ್ರದ ವಿಚಾರವಾಗಿ ನರೇಶ್ ಮೇಲೇ ತಪ್ಪು ಹೊರಿಸುತ್ತಾ ಓಡಾಡಿಕೊಂಡಿದ್ದಾರಂತೆ. ಹೇ ಅವನೇ ಮೂರು ವರ್ಷ ನನ್ನ ಮನೆ ಬಾಗಿಲಿಗೆ ಅಲೆದಿದ್ದ ಎಂಬಂಥಾ ಮಾತುಗಳನ್ನೂ ಆಡುತ್ತಿದ್ದಾರಂತೆ. ಇವಿಷ್ಟನ್ನೂ ಕೂಡಾ ಹಳೇ ಗಾಯವೊಂದನ್ನು ಕೆದಕಿಕೊಂಡಷ್ಟೇ ನೋವಿನಿಂದ ನರೇಶ್ ಗೌಡ ತೆರೆದಿಡುತ್ತಾರೆ!

ಹೀಗೆ ಮೊದಲ ಸಿನಿಮಾದಲ್ಲಿಯೇ ಕೊನೆ ಮೊದಲಿಲ್ಲದ ಪಾಠ ಕಲಿತಿರುವ ನರೇಶ್ ಗೌಡ ಅವರಿಗೆ ನಟನಾಗಬೇಕೆಂಬ ಕನಸೇನೂ ಇರಲಿಲ್ಲವಂತೆ. ಕಡೆಗೆ ತಾನೇ ತಾನಾಗಿ ಹೀರೋ ಆಗುವ ಅವಕಾಶ ಒದಗಿ ಬಂದಾಗಲೂ ಅವರ ಒಲವಿದ್ದದ್ದು ಖಳನ ಪಾತ್ರದ ಮೇಲೆಯೇ. ಹುಲಿಯೂರುದುರ್ಗದ ಉಜ್ಜಿನಿ ಮೂಲದವರಾದ ನರೇಶ್ ಬ್ಯುಸಿನೆಸ್ ಮೂಲಕವೇ ಮೇಲೆದ್ದು ನಿಂತವರು. ಮಾಮೂಲಿ ಸಿನಿಮಾ ವ್ಯಾಮೋಹದ ಹೊರತಾಗಿ ಅವರಿಗೆ ಬೇರ‍್ಯಾವ ಕನಸೂ ಇರಲಿಲ್ಲ. ಇಂಥಾ ಸಂದರ್ಭದಲ್ಲಿಯೇ ಅಚಾನಕ್ಕಾಗಿ ಪರಿಚಯವಾದವರು ಇತ್ತೀಚೆಗೆ ನಿಧನ ಹೊಂದಿದ್ದ ನಿರ್ದೇಶಕ ಪಿ ಎನ್ ಸತ್ಯ. ಪಾಗಲ್ ಚಿತ್ರಕ್ಕೆ ಮೂವತ್ತು ಲಕ್ಷ ಸುರಿದರೂ ಒಂದು ರೂಪಾಯಿಯೂ ವಾಪಾಸಾಗಿರಲಿಲ್ಲ. ಆ ಬಳಿಕ ಅನಾಮಿಕರಾಗಿ ಒಂದಷ್ಟು ಚಿತ್ರಗಳಿಗೆ ನಿರ್ಮಾಪಕರಾಗಿದ್ದ ನರೇಶ್ ಶಿವಾಜಿ ನಗರ ಚಿತ್ರದಲ್ಲಿ ನಟಿಸಿದ್ದರು. ಆ ಸಂದರ್ಭದಲ್ಲಿಯೇ ಒಂದಷ್ಟು ಕಹಿ ಉಂಡಿದ್ದರಾದರೂ ಸತ್ತ ವ್ಯಕ್ತಿಯ ಬಗ್ಗೆ ಕೆಡುಕು ಮಾತಾಡಲು ಅವರಿಗಿಷ್ಟವಿಲ್ಲ ಅನಿಸುತ್ತದೆ.

ಹೀಗೆ ಆರಂಭದಿಂದ ಇಲ್ಲಿಯವರೆಗೂ ಕಹಿಯನ್ನೇ ಅನುಭವಿಸುತ್ತಾ ಬಂದ ನರೇಶ್‌ಗೀಗ ಗಾಂಧಿನಗರ ಅರ್ಥವಾಗಿದೆ. ನಿರ್ಮಾಪಕರನ್ನು ಕಾಮಧೇನು ಎಂಬಂತೆ ಡೌ ಮಾಡೋ ಕೆಲ ಮಂದಿ ಕೆಚ್ಚಲನ್ನೇ ಕತ್ತರಿಸುತ್ತಾರೆಂಬ ವಾಸ್ತವವೂ ಅವರಿಗರ್ಥವಾಗಿದೆ. ಒನ್ಸ್ ಮೋರ್ ಕೌರವ ಚಿತ್ರವಾದ ಮೇಲೆ ಬಂದವರಿಗೆಲ್ಲ ಖಡಕ್ ಆಗಿಯೇ ಮಾತಾಡಿ ಸಾಗಹಾಕಿದ್ದಾರೆ. ಸದ್ಯ ಎಂ ಡಿ ಶ್ರೀಧರ್ ನಿರ್ದೇಶನದ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಒಡೆಯ ಚಿತ್ರದಲ್ಲಿ ನರೇಶ್ ಅವರಿಗೊಂದು ಪಾತ್ರ ಸಿಕ್ಕಿದೆ. ಬೋಗೇಂದ್ರ ಅವರ ಕಡೆಯಿಂದ ಕಿರಾತಕ ಚಿತ್ರದಲ್ಲೂ ಒಂದು ಪಾತ್ರ ಒಲಿದು ಬಂದಿದೆ. ಅದಾದ ನಂತರ ಮತ್ತೊಂದು ಹೊಸಾ ಬಗೆಯ ಚಿತ್ರದ ಮೂಲಕ ಎದ್ದು ನಿಲ್ಲೋ ಕಸುವಿನೊಂದಿಗೆ ನರೇಶ್ ಹೊರಟಿದ್ದಾರೆ.

ನಿರ್ದೇಶಕ ಲಕ್ಕಿ ಶಂಕರ್ ಹೇಳಿದ ಕಥೆಯೊಂದು ನರೇಶ್ ಅವರಿಗೆ ಇಷ್ಟವಾಗಿದೆ. ಅದು ಖಡಕ್ ಪೊಲೀಸ್ ಅಧಿಕಾರಿ ರವಿ ಚೆನ್ನಣ್ಣವರ್ ಜೀವನಾಧಾರಿತ ಚಿತ್ರ. ಈ ಕುರಿತಾಗಿ ಈಗಾಗಲೇ ನರೇಶ್ ರವಿಯವರನ್ನು ಭೇಟಿಯಾಗಿದ್ದಾರಂತೆ. ಈ ಖಡಕ್ ಅಧಿಕಾರಿಯ ಜೀವನಾಧಾರಿತ ಚಿತ್ರದೊಂದಿಗೆ ನರೇಶ್ ಇದುವರೆಗೆ ಉಂಡಿರೋ ಕಹಿ ಮರೆಯಲು ಸಜ್ಜಾಗಿದ್ದಾರೆ.

#

Advertisement
Click to comment

Leave a Reply

Your email address will not be published. Required fields are marked *

ಕಲರ್ ಸ್ಟ್ರೀಟ್

ಮೆಣಸಿನಕಾಯಿಯ ಮಗ್ಗುಲಲ್ಲಿ ಸಿಕ್ಕಿಬಿದ್ದಳು ಮಳೆಹುಡುಗಿ!

Published

on


ಮುಂಗಾರು ಮಳೆ ಚಿತ್ರದ ಮೂಲಕವೇ ಚಿಗುರಿಕೊಂಡವಳು ನಟಿ ಪೂಜಾಗಾಂಧಿ. ಆ ನಂತರದಲ್ಲಿ ಈಕೆ ಸಿನಿಮಾಗಳ ಮೂಲಕ ಸದ್ದು ಮಾಡಿದ್ದಕ್ಕಿಂತಲೂ ಹೆಚ್ಚಾಗಿ ದೋಖಾ ಬಾಜಿಗಳ ಮೂಲಕ ವಿವಾದವೆಬ್ಬಿಸಿದ್ದೇ ಹೆಚ್ಚು. ಇಂಥಾ ಪೂಜಾ ಕಂಡೋರಿಗೆಲ್ಲ ಮುಂಡಾಯಿಸಿ ಮುಖ ಮುಚ್ಚಿಕೊಂಡು ಓಡಾಡುವ ಸ್ಥಿತಿ ಬಂದಿತ್ತು. ಈಕೆ ತನ್ನ ತವರಾದ ಉತ್ತರ ಭಾರತದ ಕಡೆ ವಲಸೆ ಹೋಗಿದ್ದಾಳೆಂದೂ ರೂಮರುಗಳು ಹಬ್ಬಿದ್ದವು. ಈಗೊಂದು ವರ್ಷದಿಂದ ಸಂಪೂರ್ಣ ಕಣ್ಮರೆಯಾಗಿ ಬಿಟ್ಟಿದ್ದ ಪೂಜಾ ಇದೀಗ ಮತ್ತೊಂದು ರಂಖಲಿನೊಂದಿಗೆ ಮತ್ತೆ ಸುದ್ದಿಯಾಗಿದ್ದಾಳೆ. ಈ ಮೂಲಕ ನಾಯಿಯ ಬಾಲ ಮುಂಗಾರು ಮಳೆಯಲ್ಲಿ ನೆನೆಬಿದ್ದರೂ ನೆಟ್ಟಗಾಗೋದಿಲ್ಲ ಅನ್ನೋದೂ ಸಾಬೀತಾಗಿದೆ!

ಒಂದು ವರ್ಷದಿಂದ ಈ ಪೂಜಾ ಅದೆಲ್ಲಿ ಹೋಗಿದ್ದಳು ಅನ್ನೋ ಪ್ರಶ್ನೆಗೆ ಈ ವಿವಾದದ ಮೂಲಕ ಉತ್ತರ ಸಿಕ್ಕಿದೆ. ಅದ್ಯಾರೋ ಅನಿಲ್ ಮೆಣಸಿನಕಾಯಿ ಎಂಬ ಬಿಜೆಪಿ ಮುಖಂಡನ ಜೊತೆ ಲಲಿತ್ ಅಶೋಕ್ ಹೊಟೆಲ್ಲಿನಲ್ಲಿ ಒಂದು ವರ್ಷದಿಂದ ಪೂಜಾ ಸುದೀರ್ಘವಾಗಿ ಮೀಟಿಂಗು ನಡೆಸುತ್ತಿದ್ದ ಸೋಜಿಗವೂ ಅನಾವರಣಗೊಂಡಿದೆ. ರಾಜಕಾರಣ ಮತ್ತು ಜನರ ಬಗ್ಗೆ ಅಪಾರ ಕಾಳಜಿ ಹೊಂದಿರೋ ಪೂಜಾ ವರ್ಷದಿಂದೀಚೆಗೆ ಲೋಕಸಭಾ ಚುನಾವಣೆಗೆ ತಯಾರಿ ನಡೆಸುತ್ತಿದ್ದ ಸಮಾಜಮುಖಿ ವಿಚಾರವೂ ಈಗ ಜಾಹೀರಾಗಿದೆ. ಬಹುಶಃ ಈ ಜೋಡಿ ಲೋಕೋದ್ಧಾರದ ಚರ್ಚೆಯಲ್ಲಿ ಹೊಟೆಲ್ ಬಿಲ್ಲು ಕೊಡೋದನ್ನೇ ಮರೆಯದಿದ್ದರೆ, ಹೈಗ್ರೌಂಡ್ಸ್ ಪೊಲೀಸ್ ಠಾಣೆಯ ಇನ್ಸ್ ಪೆಕ್ಷರ್ ಸಾಧಿಕ್ ಪಾಷಾ ವರೆಗೂ ಈ ಸುದ್ದಿ ಹೋಗದಿದ್ದರೆ ಅನ್ಯಾಯವಾಗಿ ಪೂಜಾ ಗಾಂಧಿಯ ಸಮಾಜಸೇವೆ ಮರೆಯಾಗಿ ಬಿಡುತ್ತಿತ್ತು!

ಈ ಪ್ರಕರಣದ ಒಟ್ಟಾರೆ ಡೀಟೇಲುಗಳೇ ಪೂಜಾಗಾಂಧಿಯ ಅಸಲೀ ಕಸುಬಿಗೆ ಕನ್ನಡಿ ಹಿಡಿಯುವಂತಿದೆ. ಹೋಟೆಲ್ ಲಲಿತ್ ಅಶೋಕ್ ಆಡಳಿತವರ್ಗ ನೀಡಿರೋ ದೂರು ಮತ್ತು ಪೊಲೀಸ್ ಫೈಲುಗಳು ಅದನ್ನು ಖುಲ್ಲಂಖುಲ್ಲ ಬಿಚ್ಚಿಡುತ್ತವೆ. ಈ ಪ್ರಕಾರವಾಗಿ ನೋಡ ಹೋದರೆ ಬಿಜೆಪಿ ಮುಖಂಡ ಅನ್ನಿಸಿಕೊಂಡಿರೋ ಅನಿಲ್ ಮೆಣಸಿನಕಾಯಿ ಮತ್ತು ಪೂಜಾ ಗಾಂಧಿ ಈಗೊಂದು ವರ್ಷದ ಹಿಂದೆಯೇ ಅಶೋಕ್ ಹೋಟೆಲಿನಲ್ಲಿ ರೂಂ ಬುಕ್ ಮಾಡಿದ್ದರು. ಬರೋಬ್ಬರಿ ಒಂದು ವರ್ಷಗಳ ಕಾಲ ಇವರಿಬ್ಬರೂ ಅದೇನು ಮಾಡುತ್ತಿದ್ದರೋ ಭಗವಂತನೇ ಬಲ್ಲ. ಆದರೆ ಹೊಟೇಲಿನ ಸಕಲ ಸೌಕರ್ಯಗಳನ್ನೂ ಪಡೆದುಕೊಂಡಿದ್ದರು.

ಆದರೆ ಈ ಸುದೀರ್ಘಾವಧಿ ಪವಡಿಸಿದ ಒಟ್ಟು ರೂಂ ಬಿಲ್ 26.22ಲಕ್ಷ ಆಗಿ ಹೋಗಿತ್ತು. ಹೇಳಿಕೇಳಿ ಅನಿಲ್ ಮೆಣಸಿನಕಾಯಿ ಬಿಜೆಪಿ ಮುಖಂಡ. ಈ ಮುಲಾಜಿಗೆ ಬಿದ್ದು ಸುಮ್ಮನಿದ್ದ ಹೊಟೆಲ್ ಆಡಳಿತ ವರ್ಗ ಕಡೆಗೂ ಎಚ್ಚರಿಕೆ ನೀಡಿದಾಗ ಅನಿಲ್ 22.80 ಲಕ್ಷ ಪಾವತಿಸಿದ್ದ. ಅಲ್ಲಿಗೆ 3.50 ಲಕ್ಷ ಬಾಕಿ ಉಳಿದುಕೊಂಡಿತ್ತಲ್ಲಾ? ಸಿಬ್ಬಂದಿ ಒತ್ತಾಯ ಮಾಡಿದಾಗ ಅದರಲ್ಲಿ ೨.೨೫ ಲಕ್ಷವನ್ನು ಮತ್ತೆ ಕೊಸರಾಡಿ ಕಟ್ಟಿದ್ದ. ಆದರೂ 1.25ಲಕ್ಷ ಬಾಕಿ ಉಳಿದುಕೊಂಡು ಬಿಟ್ಟಿತ್ತು. ಇದೀಗ ಇನ್ಸ್ ಪೆಕ್ಟರ್ ಸಾದಿಕ್ ಪಾಷಾ ಅವಾಜು ಹಾಕುತ್ತಲೇ ಉಳಿಕೆ ಮೊತ್ತ ಪಾವತಿಸಿ ಬಚಾವಾಗಿದ್ದಾನೆ.

ಆದರೆ ಹೊಟೇಲು ಬಿಲ್ಲ ಪಾವತಿಸಿಯಾದ ಮೇಲೂ ಅನಿಲ್ ಮೆಣಸಿನಕಾಯಿ ಬೆತ್ತಲಾಗಿದ್ದಾನೆ. ಪೂಜಾ ಗಾಂಧಿ ಕೂಡಾ ಪೇಚಿಗೆ ಬಿದ್ದಿದ್ದಾಳೆ. ಆರಂಭದಲ್ಲಿ ಈ ಅನಿಲ್ ಮಾಧ್ಯಮಗಳ ಮುಂದೆ ಕೊಸರಾಡುತ್ತಾ ಏನೇನೋ ಕಥೆ ಹೇಳಿ ತಾನು ಸಾಚಾ ಅಂತ ಬಿಂಬಿಸಿಕೊಳ್ಳಲು ಪ್ರಯತ್ನಿಸಿದ್ದ. ನನಗೂ ಪೂಜಾಗೂ ಯಾವ ವ್ಯಾವಹಾರಿಕ ಸಂಬಧವೂ ಇರಲಿಲ್ಲ. ನಾನು ಹೋಟೆಲ್ ಲಲಿತ್ ಅಶೋಕದಲ್ಲಿ ಯಾವ ರೂಮನ್ನೂ ಮಾಡಿಲ್ಲ. ಆದರೂ ನನ್ನ ಹೆಸರು ಇಲ್ಯಾಕೆ ಸೇರಿಕೊಂಡಿತೋ… ಅಂತ ಮಳ್ಳನಂತಾಡಿ ಆಕಾಶ ನೋಡಿದ್ದ. ಆದರೆ ಇದರ ಹಿಂದಿರೋ ಅಸಲೀ ವಿಚಾರ ಏನನ್ನೋದು ಜನಸಾಮಾನ್ಯರಿಗೂ ಅರ್ಥವಾಗಿದೆ. ಯಾವ ಸಂಬಂಧವೂ ಇಲ್ಲದೇ ಪೂಜಾ ಗಾಂಧಿ ಮತ್ತು ಅನಿಲ್ ಮೆಣಸಿನ ಕಾಯಿ ಒಂದು ವರ್ಷಗಳ ಕಾಲ ಭಜನೆ ಮಾಡುತ್ತಿದ್ದರೆಂದು ನಂಬುವಷು ಇಲ್ಯಾರೂ ಮುಠ್ಠಾಳರಿಲ್ಲ. ಇಂಥಾ ಕಥೆ ಹೇಳಿದರೆ ಪೂಜಾ ಗಾಂಧಿಯ ಹಿಸ್ಟರಿ ಗೊತ್ತಿರೋ ಯಾರೇ ಯಾದರೂ ಎದೆಗೆ ಬಂದೂಕು ತಿವಿದರೂ ನಂಬುವುದಿಲ್ಲ!

ಈ ಪೂಜಾಗಾಂಧಿ ಎಂಬ ಸವಕಲು ನಟಿಯ ಜಾಯಮಾನವೇ ಇಂಥಾದ್ದು. ರಾಜಕೀಯ ಪುಢಾರಿಗಳು, ಹಣವಂತರನ್ನು ಹುಡುಕಿ ಬಲೆಗೆ ಕೆಡವಿಕೊಳ್ಳೋದರಲ್ಲಿ ಈಕೆ ಮಾಸ್ಟರ್ ಪೀಸು. ನಂತರ ಹೀಗೆ ರೂಮುಗಳಲ್ಲಿ ಸುದೀರ್ಘವಾಗಿ ಮೀಟಿಂಗು ನಡೆಸಿ, ಆ ಅವಧಿಯಲ್ಲಿ ಮಿಕಗಳನ್ನು ಪಳಗಿಸಿಕೊಂಡು ಕಾಸು ಗುಂಜಿಕೊಳ್ಳೋದು ಇವಳ ಜಾಯಮಾನ. ರೀಸೆಂಟಾಗಿ ಹೀಗೆಯೇ ಇವಳಿಂದ ವಂಚನೆಗೀಡಾಗಿದ್ದ ಬಿಲ್ಡರ್ ಒಬ್ಬ ತಾನೇ ಕೊಟ್ಟಿದ್ದ ಫಾರ್ಚುನರ್ ಗಾಡಿ ಕಸಿದುಕೊಂಡು ಪೂಜಾಳ ಮುಖಕ್ಕುಗಿದು ಕಳಿಸಿದ್ದನಂತೆ. ಹಾಗೆ ಖಾಲಿ ಕೈಲಿ ನಿಂತಿದ್ದ ಪೂಜಾ ಇವನ್ಯಾರೋ ಉತ್ತರಕರ್ನಾಟಕದ ಮೆಣಸಿನಕಾಯಿಯ ಮೈ ನೀವಿ ಪಳಗಿಸಿಕೊಂಡಿದ್ದಾಳೆ. ಎಲ್ಲ ಕಾಲದಲ್ಲಿಯೂ ಟೈಂ ಸರಿಯಾಗೇ ಇರೋದಿಲ್ಲವಲ್ಲಾ? ಈ ಬಾರಿ ಪೂಜಾ ಗಾಂಧಿಯ ನಸೀಬು ಕೆಟ್ಟಿದೆ. ಆದ್ದರಿಂದಲೇ ಮಗ್ಗುಲಲ್ಲಿದ್ದ ಮೆಣಸಿನಕಾಯಿಯ ಸಮೇತ ಸಿಕ್ಕಿಬಿದ್ದಿದ್ದಾಳೆ!

Continue Reading

ಕಲರ್ ಸ್ಟ್ರೀಟ್

ಇದು ಕಿರುತೆರೆ ನಟ ಅನಿಲ್ ಕುಮಾರ್ ಆಕ್ರಂದನ!

Published

on


ಅದೆಷ್ಟೋ ಧಾರಾವಾಹಿಗಳ ಥರ ಥರದ ಪಾತ್ರಗಳ ಮೂಲಕ ಕಿರುತೆರೆ ಪ್ರೇಕ್ಷಕರ ಮನೆ ಮಾತಾಗಿರುವವರು ಅನಿಲ್ ಕುಮಾರ್. ಇತ್ತೀಚಿನವರೆಗೂ ಅದೇ ಲವಲವಿಕೆಯಿಂದ ಬಣ್ಣ ಹಚ್ಚುತ್ತಿದ್ದ ಅನಿಲ್ ಇದೀಗ ಅನಾರೋಗ್ಯದಿಂದ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ತೀರಾ ಮಾತೂ ಆಡಲಾಗದ ಸ್ಥಿತಿಯಲ್ಲಿರುವ ಅವರೀಗ ಚಿಕೆತ್ಸೆಯ ವೆಚ್ಚ ಸೇರಿದಂತೆ ಯಾವುದನ್ನು ಭರಿಸಲಾಗದ ಶೋಚನೀಯ ಸ್ಥಿತಿ ತಲುಪಿದ್ದಾರೆ.ಮುಖ್ಯವಾದ ವಿಚಾರವೆಂದರೆ ಈ ಅನಿಲ್ ಕುಮಾರ್ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಸಹಪಾಠಿ. ರಂಗಭೂಮಿಯ ನಟನೆಯನ್ನೇ ಕಸುವಾಗಿಸಿಕೊಂಡು, ಕಿರುತೆರೆಯಲ್ಲಿ ಬ್ಯುಸಿಯಾಗಿದ್ದಾಗಲೂ ರಂಗದ ನಂಟು ಮರೆಯದ ರಂಗಪ್ರೇಮಿ ಅನಿಲ್. ಇಂಥಾ ಅನಿಲ್ ಇದೀಗ ಏಕಾಏಕಿ ಅನಾರೋಗ್ಯಕ್ಕೀಡಾಗಿ ಆಸ್ಪತ್ರೆ ಸೇರಿಕೊಂಡಿದ್ದಾರೆ. ಯಾವುದಕ್ಕೂ ಸ್ಪಂದಿಸದಂಥಾ ಸ್ಥಿತಿ ತಲುಪಿಕೊಂಡಿದ್ದಾರೆ.

ನಟರಾಜ್ ಹೊನ್ನವಳ್ಳಿ ಸೇರಿದಂತೆ ಅನೇಕ ರಂಗತಜ್ಞರ ನಾಟಕಗಳಲ್ಲಿ ಅಭಿನಯಿಸಿದ್ದ ಅನಿಲ್ ಪೃಥ್ವಿ, ಕರಿಯ ಕಣ್ ಬಿಟ್ಟ, ಪಲ್ಲಟ ಸೇರಿದಂತೆ ಹತ್ತಾರು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಮೂಡಲಮನೆ ಧಾರಾವಾಹಿಯಿಂದ ಆರಂಭಿಸಿ ಭ್ರಹ್ಮಗಂಟು ತನಕ ಸಾಕಷ್ಟು ಧಾರಾವಾಹಿಗಳ ಲೀಡ್ ಪಾತ್ರಗಳಲ್ಲಿ ಅನಿಲ್ ಮನೋಜ್ಞವಾಗಿ ಅಭಿನಯಿಸುತ್ತಾ ಬಂದಿದ್ದಾರೆ. ಇಂಥಾ ಅನಿಲ್ ಮೊನ್ನೆ ದಿನ ಹಾಸನಕ್ಕೆ ತೆರಳಿದ್ದಾಗ ಅಲ್ಲಿ ಅನಾರೋಗ್ಯಕ್ಕೀಡಾಗಿ ಅಸ್ವಸ್ಥರಾಗಿದ್ದರು. ಈಗವರನ್ನು ಬೆಂಗಳೂರಿನ ಬ್ಯಾಪ್ಟಿಸ್ಟ್ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಐಸಿಯೂನಲ್ಲಿರುವ ಅನಿಲ್ ಅವರ ಚಿಕಿತ್ಸೆಗಾಗಿ ದಿನಕ್ಕೆ ನಲವತ್ತೈದು ಸಾವಿರಕ್ಕೂ ಅಧಿಕ ಹಣ ವ್ಯಯವಾಗುತ್ತಿದೆ. ಆದರೆ ಅವರ ಕುಟುಂಬದವರಿಗೆ ಮಾತ್ರ ಇಷ್ಟು ದೊಡ್ಡ ಮೊತ್ತವನ್ನು ಖರ್ಚು ಮಾಡುವ ಶಕ್ತಿ ಇಲ್ಲದಂತಾಗಿದೆ.

ಹಳೇಯ ದಿನಗಳನ್ನು, ಆ ಕಾಲದ ಗೆಳೆಯರನ್ನು ಸದಾ ಸ್ಮರಿಸುವ ದರ್ಶನ್ ಅವರಿಗೆ ಖಂಡಿತಾ ಅನಿಲ್ ಕುಮಾರ್ ಅವರ ಗುರುತು ಇದ್ದೇ ಇರುತ್ತದೆ. ಯಾಕೆಂದರೆ 1995ರ ಸಮಯದಲ್ಲಿ ದರ್ಶನ್ ನೀನಾಸಂಗೆ ನಟನೆ ಕಲಿಯಲು ಹೋದಾಗ ಅವರ ಸಹಪಾಠಿಯಾಗಿದ್ದವರು ಅನಿಲ್ ಕುಮಾರ್. ಆದರೆ ಅವರೀಗ ಅನಾರೋಗ್ಯಕ್ಕೀಡಾಗಿದ್ದಾರೆಂಬ ಸುದ್ದಿ ಅವರಿಗೆ ತಲುಪಬೇಕಿದೆ. ಅನಿಲ್ ಅಂದರೆ ಕಿರುತೆರೆ ಪ್ರೇಕ್ಷಕರ ಪಾಲಿನ ಫೇವರಿಟ್ ನಟ. ಕೆಲ ವಾಹಿನಿಗಳ ಬಹುತೇಕ ಧಾರಾವಾಹಿಗಳಲ್ಲಿ ಇವರದ್ದೊಂದು ಪಾತ್ರ ಇದ್ದೇ ಇರುತ್ತದೆ.

0425101039839
Canara Bank
Hebbala branch
Bengaluru-560024
IFS Code-CNRB 0000425
W/0
Anilkumar B.R

ರಂಗಭೂಮಿಯ ನಂಟಿನೊಂದಿಗೇ ಕಿರುತೆರೆಯಲ್ಲಿಯೂ ಸಕ್ರಿಯರಾಗಿದ್ದ ಅನಿಲ್ ಸ್ವಾಭಿಮಾನಿ. ಎಲ್ಲರ ಪ್ರೀತಿಪಾತ್ರರಾಗಿದ್ದ ಈ ಸ್ನೇಹಜೀವಿಗೀಗ ಒಂದು ಕಾಲದ ಸಹಪಾಠಿ ದರ್ಶನ್ ಅವರ ಸಹಾಯದ ಅಗತ್ಯವಿದೆ. ಇದೀಗ ಸುಮಲತಾ ಅಂಬರೀಶ್ ಅವರ ಪರವಾಗಿ ಮಂಡ್ಯದಲ್ಲಿ ಪ್ರಚಾರ ಕಾರ್ಯದಲ್ಲಿ ತೊಡಗಿಸಿಕೊಂಡಿರೋ ದರ್ಶನ್ ಆದಷ್ಟು ಬೇಗನೆ ಸಹಪಾಠಿ ಗೆಳೆಯನ ನೋವಿಗೆ ಕಿವಿಗೊಡಬಹುದೇ?

Continue Reading

ಕಲರ್ ಸ್ಟ್ರೀಟ್

ಪಡ್ಡೆಹುಲಿ ಹಿಟ್ ಹಾಡುಗಳ ಜ್ಯೂಕ್ ಬಾಕ್ಸ್ ಅನಾವರಣ!

Published

on


ಕೆ. ಮಂಜು ಅವರ ಪುತ್ರ ಶ್ರೇಯಸ್ ನಾಯಕನಾಗಿ ಎಂಟ್ರಿ ಕೊಡುತ್ತಿರುವ ಚಿತ್ರ ಪಡ್ಡೆಹುಲಿ. ಗುರುದೇಶಪಾಂಡೆ ನಿರ್ದೇಶನದ ಈ ಚಿತ್ರ ಈಗಾಗಲೇ ಹಾಡುಗಳ ಮೂಲಕ ಎಂಥವರೂ ಅಚ್ಚರಿಗೊಳ್ಳುವಂಥಾ ಕ್ರೇಜ್ ಸೃಷ್ಟಿಸಿದೆ. ಶ್ರೇಯಸ್ ಸಂಪೂರ್ಣ ತಯಾರಿಯೊಂದಿಗೇ ಅಡಿಯಿರಿಸಿರೋದರ ಬಗ್ಗೆ ಬೆರಗು, ಓರ್ವ ಎನರ್ಜಿಟಿಕ್ ಹೀರೋ ಕನ್ನಡಕ್ಕೆ ಪಾದಾರ್ಪಣೆ ಮಾಡಿದ ಸ್ಪಷ್ಟ ಸೂಚನೆಗಳೆಲ್ಲವೂ ಪಡ್ಡೆಹುಲಿಯ ಸುತ್ತ ಮಿರುತ್ತಿವೆ!

ಇದೆಲ್ಲವೂ ಸಾಧ್ಯವಾಗಿದ್ದು ಒಂದರ ಹಿಂದೊಂದರಂತೆ ಅನಾವರಣಗೊಂಡಿದ್ದ ಚೆಂದದ ಹಾಡುಗಳಿಂದ. ಈಗಾಗಲೇ ಭರತ್ ಬಿಜೆ ಸಂಗೀತ ಸಂಯೋಜನೆಯಲ್ಲಿ ಮೂಡಿ ಬಂದಿರೋ ಎಲ್ಲ ಹಾಡುಗಳೂ ಹಿಟ್ ಆಗಿವೆ. ಇದೀಗ ಪಿಆರ‍್ಕೆ ಸಂಸ್ಥೆಯ ಮೂಲಕ ಈ ಎಲ್ಲ ಹಾಡುಗಳ ಜ್ಯೂಕ್ ಬಾಕ್ಸ್ ಅನ್ನು ಅನಾವರಣಗೊಳಿಸಲಾಗಿದೆ. ಈ ಮೂಲಕ ಪಡ್ಡೆಹುಲಿ ಚಿತ್ರದ ಅಷ್ಟೂ ಚೆಂದದ ಹಾಡುಗಳನ್ನು ಒಟ್ಟಾಗಿ ಕೇಳಿಸಿಕೊಳ್ಳುವ ಸದಾವಕಾಶ ಪ್ರೇಕ್ಷಕರಿಗೆ ಸಿಕ್ಕಿದೆ. ಒಂದು ಚಿತ್ರದಲ್ಲಿ ಐದಾರು ಹಾಡುಗಳಿರೋದು ಸಾಮಾನ್ಯ. ಕೆಲ ಬಾರಿ ಈ ಸಂಖ್ಯೆ ಇನ್ನೂ ಇಳಿಕೆಯಾಗೋದೂ ಇದೆ. ಆದರೆ, ಪಡ್ಡೆಹುಲಿ ಚಿತ್ರದಲ್ಲಿ ಮಾತ್ರ ಹತ್ತು ಹಾಡುಗಳಿವೆ. ಒಂದಕ್ಕಿಂತ ಒಂದು ಚೆಂದವೆಂಬಂತೆ ಮೂಡಿ ಬಂದಿರೋ ಈ ಹಾಡುಗಳೆಲ್ಲವೂ ಜನಮಾನಸ ಗೆದ್ದಿವೆ. ಇದೀಗ ಬಿಡುಗಡೆಯಾಗಿರೋ ಜ್ಯೂಕ್ ಬಾಕ್ಸ್ ಗೂ ಒಳ್ಳೆ ಅಭಿಪ್ರಾಯಗಳೇ ಕೇಳಿ ಬರುತ್ತಿವೆ.

ಎಮ್ ರಮೇಶ್ ರೆಡ್ಡಿ ನಿರ್ಮಾಣ ಮಾಡಿರೋ ಪಡ್ಡೆಹುಲಿ ಇನ್ನೇನು ಬಿಡುಗಡೆಯ ಹೊಸ್ತಿಲಲ್ಲಿದೆ. ಚಿತ್ರೀಕರಣದ ಹಂತದಲ್ಲಿಯೇ ನಾಯಕ ಶ್ರೇಯಸ್ ಭರವಸೆ ಹುಟ್ಟಿಸಿ ಬಿಟ್ಟಿದ್ದಾರೆ. ಹಾಡುಗಳಂತೂ ಅವರ ಪೂರ್ವ ತಯಾರಿ, ಶ್ರಮಗಳನ್ನು ಪ್ರತಿಫಲಿಸುವಂತಿವೆ. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರೇ ಶ್ರೇಯಸ್ ಶ್ರಮವನ್ನು ಮೆಚ್ಚಿಕೊಂಡಿದ್ದಾರೆಂದ ಮೇಲೆ ಹೆಚ್ಚೇನು ಹೇಳೋ ಅಗತ್ಯವಿಲ್ಲ. ಇದೀಗ ಬಿಡುಗಡೆಯಾಗಿರೋ ಜ್ಯೂಕ್ ಬಾಕ್ಸ್ ಮೂಲಕ ಪಡ್ಡೆಹುಲಿಯ ಬಗೆಗಿನ ನಿರೀಕ್ಷೆ ನೂರ್ಮಡಿಸೋದಂತೂ ಖಂಡಿತ!

Continue Reading

Trending