Connect with us

ಸಿನಿಮಾ ವಿಮರ್ಶೆ

ಸರಣಿಕೊಲೆಯ ಮೆರವಣಿಗೆಯ ನಡುವೆ ಮತ್ತೇನೋ ಇದೆ!

Published

on

ಮೇಣದಬತ್ತಿಯ ಬೆಳಕನ್ನು ಒಂದೇ ಸಮನೆ ನೋಡುವ ಯೋಗವಿಧಾನದ ಹೆಸರು `ತ್ರಾಟಕ’. ಇದಕ್ಕೂ ಸಿನಿಮಾಗೂ ಏನು ಸಂಬಂಧ? ಪಾರ್ಷಿಯಲ್ ಸಿಸರ್ ಕಾಂಪ್ಲೆಂಕ್ಸ್ ಎಂಬ ಮಾನಸಿಕ ಸಮಸ್ಯೆಯಿಂದ ಬಳಲುತ್ತಿರುವ ಪೊಲೀಸ್ ಅಧಿಕಾರಿಯನ್ನು ಗುಣ ಮಾಡಲು ವೈದ್ಯೆ ಹೀರೋಯಿನ್ನು ಈ ತ್ರಾಟಕ ವಿದ್ಯೆಯನ್ನು ಬಳಸುತ್ತಿರುತ್ತಾಳೆ. ಹಾಗೆಂದ ಮಾತ್ರಕ್ಕೆ ಇದು ಖಾಯಿಲೆ ಮತ್ತು ಅದನ್ನು ಗುಣಪಡಿಸುವ ಕಥೆಯನ್ನು ಹೊಂದಿದ ಸಿನಿಮಾವಲ್ಲ. ಇದು ಸಿನಿಮಾದಲ್ಲಿರುವ ಒಂದಂಶವಷ್ಟೇ.

ಸಿನಿಮಾ ಆರಂಭವಾಗುವುದೇ ಕೊಲೆಯೊಂದರ ಮೂಲಕ. ಆನಂತರವೂ ಒಂದರ ಹಿಂದೊಂದು ಸರಣಿ ಹತ್ಯೆ ನಡೆಯುತ್ತಲೇ ಇರುತ್ತದೆ. ಸಿನಿಮಾದ ಮೊದಲ ಭಾಗದಲ್ಲಿ ಪೊಲೀಸ್ ಅಧಿಕಾರಿ (ರಾಹುಲ್ ಐನಾಪುರ್) ಕೊಲೆಗಳನ್ನು ಬೇಧಿಸಲು ಹೆಣಗಾಡುತ್ತಿರುತ್ತಾನೆ. ತಾನೇ ಒಬ್ಬ ಮನೋರೋಗಿಯಾಗಿದ್ದರೂ ಎಂಥಾ ಪಾತಕ ಪ್ರಕರಣವನ್ನೂ ಕಂಡುಹಿಡಿಯುವ ತೀಕ್ಷ್ಣಮತಿಯನ್ನೂ ಹೊಂದಿರುತ್ತಾನೆ. ಹೀಗಿರುವಾಗ ತನ್ನ ಸ್ವಂತ ಸಹೋದರನೇ ಕೊಲೆಯಾಗಿರುತ್ತಾನೆ. ಆ ಪ್ರಕರಣದ ತನಿಖೆ ಕೂಡಾ ಈತನೇ ಕೈಗೆತ್ತಿಕೊಂಡಿರುತ್ತಾನೆ. ಇನ್ನೇನು ಕೊಲೆಗಾರನ ಸುಳಿವು ಸಿಕ್ಕಿತು ಅನ್ನುವಷ್ಟರಲ್ಲಿ ಮತ್ತೊಂದು ಕೊಲೆ ನಡೆದುಹೋಗಿರುತ್ತದೆ. ಯಾರು ಹೀಗೆ ಸರಣಿ ಕೊಲೆಗಳನ್ನು ಮಾಡುತ್ತಿರೋದು ಮಾತ್ರ ನಿಗೂಢವಾಗೇ ಉಳಿದಿರುತ್ತದೆ. ಯಾರ್‍ಯಾರ ಮೇಲೋ ಅನುಮಾನ ಆರಂಭಗೊಂಡು ಕಡೆಗೆ ಇರುವ ಮೂವರಲ್ಲೇ ಯಾರೋ ಒಬ್ಬರು ಅನ್ನುವಷ್ಟರ ಮಟ್ಟಿಗೆ ಬಂದು ನಿಲ್ಲುತ್ತದೆ. ಈ ನಡುವೆ ಮಾದಕ ವಸ್ತುಗಳ ಜಾಲ, ಪೊಲೀಸ್ ಇಲಾಖೆಯ ಲೋಪ, ಗಂಡ-ಹೆಂಡಿರ ನಡುವಿನ ಗುಪ್ತ ಸಮಸ್ಯೆಗಳು ಸೇರಿಂದಂತೆ ನಾನಾ ರೀತಿಯ ವಿಚಾರಗಳು ಬಂದುಹೋಗುತ್ತವೆ.

ಸಿನಿಮಾ ಆರಂಭವಾಗಿ ಮುಗಿಯೋತನಕ ಪ್ರತಿಕ್ಷಣವೂ ಮುಂದೇನು ಅಂತಾ ಗೊತ್ತಾಗದಂತೆ ನಿರೂಪಿಸಿರೋದು ನಿರ್ದೇಶಕ ಶಿವಗಣೇಶ್ ಬುದ್ಧಿವಂತಿಕೆ. ವಿನೋದ್‌ಭಾರತಿ ಕ್ಯಾಮೆರಾ ಕೆಲಸ ಕೂಡಾ ನಿರ್ದೇಶಕರ ಕಲ್ಪನೆಯನ್ನು ಯಥಾವತ್ತು ತೆರೆಗೆ ತರುವಲ್ಲಿ ಗೆದ್ದಿದೆ.

ಲೇಡಿ ಕಾಪ್ ಪಾತ್ರವನ್ನು ನಿಭಾಯಿಸಿರುವ ಭವಾನಿ ಪ್ರಕಾಶ್ ಎಂಟ್ರಿಯ ನಂತರ ಕತೆ ಬೇರೆಯದ್ದೇ ಆಯಾಮವನ್ನು ತೆರೆದುಕೊಳ್ಳುತ್ತದೆ. ಭವಾನಿ ಅವರ ನಟನೆ ಕೂಡಾ ಅಷ್ಟೇ ಖಡಕ್ಕಾಗಿದೆ. ನಾಯಕಿ ಹೃದಯಾ ಬಹುಕಾಲದ ಗ್ಯಾಪ್ ನಂತರ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರೂ ಮಾಗಿದ ನಟನೆಯನ್ನು ನೀಡಿದ್ದಾರೆ. ಈ ಸಿನಿಮಾದ ಮೂಲಕ ರಾಹುಲ್ ಐನಾಪುರ ಕನ್ನಡ ಚಿತ್ರರಂಗಕ್ಕೆ ಸಿಕ್ಕ ಶಕ್ತಿಶಾಲಿ ನಟ ಅನ್ನೋದು ಸಾಬೀತಾಗಿದೆ. ಇನ್ನು ಯಶ್ ಶೆಟ್ಟಿ, ಅಜಿತ್ ಜೈರಾಜ್ ಕೂಡಾ ಶಕ್ತಿಮೀರಿದ ಪರಿಶ್ರಮ ಹಾಕಿ ನಟಿಸಿದ್ದಾರೆ. ಒಟ್ಟಾರೆ ತ್ರಾಟಕ ಭಿನ್ನ ಬಗೆಯ ಸಿನಿಮಾ ಅನ್ನಿಸಿಕೊಂಡಿದೆ. ಧಾರಾಳವಾಗಿ ಕಾಸು ಕೊಟ್ಟು ಟಿಕೇಟು ಪಡೆದು ನೋಡಬಹುದಾದ ಚಿತ್ರ ಕೂಡಾ ಇದಾಗಿದೆ.

ಸಿನಿಮಾ ವಿಮರ್ಶೆ

ಕತ್ತಲ ಕಾದಂಬರಿಯಲ್ಲಿ ರಹಸ್ಯ ಬಚ್ಚಿಟ್ಟ ಕಾರ್ನಿ!

Published

on

ತೀರಾ ದೊಡ್ಡ ಬಜೆಟ್ಟು, ಕಲಾವಿದರ ದಂಡು ಇಲ್ಲದಿದ್ದರೂ ಕೆಲವೊಂದು ಸಿನಿಮಾ ನೋಡುವಂತೆ ಕೂರಿಸಿಬಿಡುತ್ತವೆ. ಬಹುಶಃ ಆ ಸಾಲಿಗೆ ಸೇರೋ ಚಿತ್ರ ಕಾರ್ನಿ. ದುನಿಯಾ ರಶ್ಮಿ ಬಹುಕಾಲದ ಗ್ಯಾಪ್ ನಂತರ ಮತ್ತೆ ತೆರೆ ಮೇಲೆ ಕಾಣಿಸಿಕೊಂಡಿರುವ ಸಿನಿಮಾ ಅನ್ನೋದು ಬಿಟ್ಟರೆ ಕಾರ್ನಿಯ ಬಗ್ಗೆ ಜನರಿಗೆ ಹೆಚ್ಚು ಗೊತ್ತಿರಲಿಲ್ಲ. ಆದರೆ ಇಂದು ತೆರೆಗೆ ಬಂದಿರೋ ಕಾರ್ನಿ ನೋಡುಗರ ಪಾಲಿಗೆ ಥ್ರಿಲ್ ನೀಡಿದೆ ಅನ್ನೋದರಲ್ಲಿ ನೋ ಡೌಟ್.

ಕಾದಂಬರಿಕಾರ್ತಿಯೊಬ್ಬಳ ಮೂಲಕ ಕಥೆ ಆರಂಭಗೊಳ್ಳುತ್ತದೆ. ಕಾದಂಬರಿಯಲ್ಲಿ ಬರುವ ಪಾತ್ರಗಳು ನಿಜಜೀವನದಲ್ಲಿ ಕಾಣೆಯಾಗುತ್ತಾ ಬರುತ್ತವೆ. ಒಂದು ಕಡೆ ಕಳೆದುಹೋದವರ ಬಗ್ಗೆ ತನಿಖೆ ನಡೆಸೋ ಪೊಲೀಸರು, ಮತ್ತೊಂದೆಡೆ ಕಾದಂಬರಿಯನ್ನು ಬರೆದ ಲೇಖಕಿ ತನು ಅದೇ ಕಾದಂಬರಿಯ ಮತ್ತೊಂದು ಆವೃತ್ತಿಯನ್ನು ಬರೆಯಲು ಚಿಕ್ಕಮಗಳೂರಿಗೆ ಹೋಗಿರುತ್ತಾಳೆ. ಅಲ್ಲೊಬ್ಬ ಅನಾಮಿಕ ಆಕೆಯ ಮೇಲೆ ಅಟ್ಯಾಕ್ ಮಾಡುತ್ತಾನೆ. ಆತ ಈಕೆಯನ್ನು ಟಾರ್ಗೆಟ್ ಮಾಡಲು ಏನು ಕಾರಣ? ಕಾದಂಬರಿಯಲ್ಲಿ ಬರುವ ಪಾತ್ರಕ್ಕೂ ಬರಹಗಾರ್ತಿಗೂ ಏನಾದರೂ ಲಿಂಕು ಇದೆಯಾ? ಈ ಎಲ್ಲದರ ಹಿಂದಿನ ಅಸಲೀ ರಹಸ್ಯವಾದರೂ ಏನು? ಒಂದೊಂದಾಗಿ ತೆರೆದುಕೊಳ್ಳುತ್ತಾ ಸಾಗುವ ಕಥೆ ಕ್ಷಣಕ್ಷಣಕ್ಕೂ ಕುತೂಹಲ ಹುಟ್ಟಿಸುತ್ತಾ ಸಾಗುತ್ತದೆ.

ಸಿನಿಮಾದ ಬಹುಪಾಲು ಚಿತ್ರೀಕರಣ ಕತ್ತಲೆಯಲ್ಲೇ ನಡೆಯೋದರಿಂದ ನೋಡುಗರ ಕಣ್ಣಿಗೆ ಮಂಕು ಕವಿದ ವಾತಾವರಣ ಆವರಿಸುತ್ತದೆ. ಸಾಮಾನ್ಯವಾಗಿ ಸಸ್ಪೆನ್ಸ್ ಅಥವಾ ಥ್ರಿಲ್ಲರ್ ಸಿನಿಮಾಗಳಲ್ಲಿ ಎದೆ ಧಸಕ್ಕನ್ನುವಂಥಾ ಹಿನ್ನೆಲೆ ಸಂಗೀತವಿರುತ್ತದೆ. ಆದರೆ ಯಾವ ಶಬ್ದವನ್ನೂ ನೀಡದೆ ನಿಶ್ಯಬ್ಧದಲ್ಲೇ ತವಕ ಸೃಷ್ಟಿಸಿದ್ದಾರೆ ಅರಿಂದಂ ಗೋಸ್ವಾಮಿ. ಸಂಕಲನ ಹಾಗೂ ಕಲರಿಂಗ್ ಮಾಡಿರುವ ವಿನಯ್ ಆಲೂರ್ ಹೊಸ ಪ್ರಯೋಗಕ್ಕೆ ಕೈ ಹಾಕಿದ್ದಾರೆ. ಪೊಲೀಸ್ ಅಧಿಕಾರಿಯ ಪಾತ್ರದಲ್ಲಿ ರಾಜೇಶ್ ರಾಮಕೃಷ್ಣ ಗಮನ ಸೆಳೆಯುತ್ತಾರೆ.

ಈ ಸಿನಿಮಾದಲ್ಲಿ ಅಪರೂಪದ ಎಳೆಯೊಂದು ಪ್ರಧಾನವಾಗಿದೆ. ಇತ್ತೀಚೆಗಷ್ಟೇ ಸುಪ್ರೀಂ ಕೋರ್ಟು ಸೆಕ್ಷನ್ ೩೭೭ ಅಮಾನ್ಯಗೊಳಿಸಿರುವ ಸಂದರ್ಭದಲ್ಲಿ ಕಾರ್ನಿ ಬಿಡುಗಡೆಯಾಗಿರುವುದು ಕಾಕತಾಳೀಯವೆನ್ನುವಂತಿದೆ. ಹುಡುಗನಾಗಿ ಹುಟ್ಟಿ ಹೆಣ್ಮಕ್ಕಳಂತೆ ಆಡುವ ಹುಡುಗನೊಬ್ಬನ ಒಳಬಾಧೆಗಳು, ಸಾಮಾಜಿಕ ಸಂಕಟಗಳನ್ನು ಥ್ರಿಲ್ಲರ್ ಸಿನಿಮಾದೊಳಗೆ ಸೇರಿಸಿರುವುದು ನಿಜಕ್ಕೂ ನಿರ್ದೇಶಕ ವಿನೀ ಅವರ ಹೆಚ್ಚುಗಾರಿಕೆ.

Continue Reading

ಸಿನಿಮಾ ವಿಮರ್ಶೆ

ಓದೋ ಹುಡುಗರ ಕುಣಿಯೋ ಕನಸಿನ ಕಥೆ!

Published

on

ಡ್ಯಾನ್ಸ್‌ನಲ್ಲಿ ವಿಪರೀತ ಆಸಕ್ತಿ ಹೊಂದಿರೋ ಹುಡುಗನೊಬ್ಬನ ಕಥೆ ಎಂಬ ಸುಳಿವಿನೊಂದಿಗೆ ಒಂದಷ್ಟು ಸದ್ದು ಮಾಡಿದ್ದ ಚಿತ್ರ ಬಿಂದಾಸ್ ಗೂಗ್ಲಿ. ಸಂತೋಷ್ ನಿರ್ದೇಶನದ ಈ ಚಿತ್ರವೀಗ ತೆರೆ ಕಂಡಿದೆ. ಕಾಲೇಜು, ಖಡಕ್ ಪ್ರಿನ್ಸಿಪಾಲ್, ವಿದ್ಯಾರ್ಥಿಗಳ ತರಲೆ ತಾಪತ್ರಯ ಮತ್ತು ಕುಣಿಯೋ ಉಮೇದಿನ ಹೂರಣದೊಂದಿಗೆ ಈ ಚಿತ್ರ ತೆರೆ ಕಂಡಿದೆ.


ಗುರುಕುಲ ಎಂಬ ಕಾಲೇಜು. ಅದಕ್ಕೊಬ್ಬ ಶಿಸ್ತಿನ ಸಿಪಾಯಿಯಂಥಾ ಪ್ರಾಂಶುಪಾಲ. ಓದು ಬಿಟ್ರೆ ಬೇರೇನಕ್ಕೂ ಅವಕಾಶವಿಲ್ಲ ಎಂಬಂಥಾ ಕಟ್ಟುನಿಟ್ಟಿನ ಆದೇಶ ಪ್ರಾಂಶುಪಾಲರದ್ದು. ಆದರೆ ಅಲ್ಲಿನ ಕೆಲ ವಿದ್ಯಾರ್ಥಿಗಳಿಗೆ ಓದಂದನ್ನು ಬಿಟ್ಟು ಬೇರೆಲ್ಲದರಲ್ಲಿಯೂ ವಿಪರೀತ ಆಸಕ್ತಿ. ಅದರಲ್ಲಿಯೂ ನಾಯಕನಿಗಂತೂ ಡ್ಯಾನ್ಸ್ ಎಂದರೆ ಪ್ರಾಣ. ಆದರೆ ಅದೇನೇ ತಿಪ್ಪರಲಾಗ ಹೊಡೆದರೂ ಅದಕ್ಕೆ ಪ್ರಾಂಶುಪಾಲನ ಸಮ್ಮತಿ ಸಿಗೋದಿಲ್ಲ.


ಇಂಥಾ ಕಾಲದಲ್ಲಿಯೇ ಆ ಕಾಲೇಜಿಗೆ ಡ್ಯಾನ್ಸ್ ಮಾಸ್ಟರ್ ಒಬ್ಬರ ಆಗಮನವಾಗುತ್ತದೆ. ಆತ ಅಲ್ಲಿನ ವಿದ್ಯಾರ್ಥಿಗಳಲ್ಲಿನ ಕುಣಿಯೋ ಇರಾದೆಗೆ ಮತ್ತಷ್ಟು ಜೀವ ತುಂಬುತ್ತಾನೆ. ಇದೆಲ್ಲದರ ನಡುವೆ ಆ ವಿದ್ಯಾರ್ಥಿಗಳು ಪ್ರಾಂಶುಪಾಲರ ಇರಾದೆಯಂತೆ ಓದಿಗೆ ಮಾತ್ರವೇ ಕಟ್ಟು ಬೀಳುತ್ತಾರಾ ಅಥವಾ ಅವರಿಚ್ಚೆಯಂತೆ ಡ್ಯಾನ್ಸ್ ಕಾಂಪಿಟೇಷನ್ನಿನಲ್ಲಿ ಭಾಗವಹಿಸಿ ಮಿಂಚುತ್ತಾರಾ ಎಂಬುದು ಈ ಚಿತ್ರದ ಪ್ರಧಾನ ಕುತೂಹಲ.
ಈ ಚಿತ್ರದ ನಿರ್ಮಾಪಕರಾದ ವಿಜಯ್ ಅನ್ವೇಕರ್ ಅವರೇ ಪ್ರಾಂಶುಪಾಲನ ಪಾತ್ರ ನಿರ್ವಹಿಸಿರೋದು ವಿಶೇಷ. ಮೊದಲಾರ್ಧದ ತುಂಬಾ ಅವರದ್ದೇ ಪಾರುಪಥ್ಯ. ಧರ್ಮ ಕೀರ್ತಿರಾಜ್ ಕೂಡಾ ಫೋಕಸ್ ಇರುವಂಥಾದ್ದೇ ಪಾತ್ರದಲ್ಲಿ ನಟಿಸಿದ್ದಾರೆ. ನಾಯಕ ಆಕಾಶ್ ನಟನೆಯಲ್ಲಿ ಇನ್ನೊಂದಷ್ಟು ಪಳಗಬೇಕೆನ್ನಿಸಿದರೂ ಡ್ಯಾನ್ಸಿನಲ್ಲಿ ಗಮನ ಸೆಳೆಯುತ್ತಾನೆ. ಒಟಾರೆಯಾಗಿ ಮಕ್ಕಳನ್ನು ಓದಿಗೆ ಮಾತ್ರವೇ ಕಟ್ಟಿ ನಿಲ್ಲಿಸ ಬಾರದು. ಬದಲಾಗಿ ಒಂದಷ್ಟು ಪ್ರೋತ್ಸಾಹ ಕೊಟ್ಟರೆ ಅವರೊಳಗಿನ ಪ್ರತಿಭೆ ಜಾಹೀರಾಗುತ್ತದೆಂಬುದು ಈ ಚಿತ್ರದ ಒಟ್ಟಾರೆ ತಿರುಳು. ನಿರ್ದೇಶಕ ಸಂತೋಶ್ ಬರೀ ಪ್ರೀತಿಯ ಕಥಾವಸ್ತುವಲ್ಲದೆ ಜೊತೆಗೆ ಡ್ಯಾನ್ಸ್ ಅನ್ನು ಪ್ರಧಾನವಾಗಿಟ್ಟುಕೊಂಡು ಕಥೆ ಹೆಣೆದಿರೋದು ಮತ್ತೊಂದು ವಿಶೇಷ.

Continue Reading

ಸಿನಿಮಾ ವಿಮರ್ಶೆ

ಕೂಡಿ ಬರದ ಕಂಕಣ ನಡು ವಯಸಿನ ಕಂಪನ!

Published

on

ನಡುವಯಸ್ಸು ದಾಟಿದ ಹೆಣ್ಣುಮಗಳಿಗೆ ಮದುವೆ ಮಾಡೋ ಸರ್ಕಸ್ಸು ನಡೆಸೋ ಹೆತ್ತವರೆಲ್ಲರ ಆತ್ಮಕಥೆಯಂತಾ ಚಿತ್ರ ಪತಿಬೇಕು ಡಾಟ್ ಕಾಮ್… ಹೀಗಂತ ಸಾರಾಸಗಟಾಗಿ ಹೇಳಿಬಿಡುವಂಥಾ ಕಥಾ ಹಂದರ ಹೊಂದಿರುವ ಈ ಚಿತ್ರದುದ್ದಕ್ಕೂ ಸಂಕಟ ಹೊದ್ದ ಪಾತ್ರಗಳಿವೆ. ಆದರೆ ನಿರ್ದೇಶಕರು ಅವುಗಳಿಗೆಲ್ಲ ಮುಗುಳುನಗೆಯ ಪೋಷಾಕು ತೊಡಿಸಿದ್ದಾರೆ. ಧಾರಾಕಾರವಾಗಿ ಕಣ್ಣೀರು ಹರಿಸೋ ಇರಾದೆ ಇದ್ದಿದ್ದರೆ ಎಲ್ಲರ ಮನಸುಗಳನ್ನೂ ಕೋಡಿ ಬೀಳಿಸುವಂಥಾ ಅವಕಾಶಗಳಿದ್ದವು. ಆದರೆ ಇಲ್ಲಿ ಎಲ್ಲ ನೋವುಗಳಿಗೂ ಆಹ್ಲಾದದ ಪನ್ನೀರು ಚಿಮುಕಿಸಿ ಇಡೀ ಕಥೆಯನ್ನು ದಡ ಮುಟ್ಟಿಸುವ ಪ್ರಯತ್ನವನ್ನು ನಿರ್ದೇಶಕ ರಾಕೇಶ್ ಮಾಡಿದ್ದಾರೆ. ಅದು ಪ್ರೇಕ್ಷಕರನ್ನು ಮುಟ್ಟಿದೆ ಎಂಬುದೇ ಇಡೀ ಚಿತ್ರದ ಪ್ಲಸ್ ಪಾಯಿಂಟ್!

ಮೂವತ್ತು ವರ್ಷ ದಾಟಿದ ಮಗಳಿಗೆ ಅರವತ್ತೊಂದು ಗಂಡು ಹುಡುಕಿ ಸುಸ್ತಾದ ತಂದೆ ತಾಯಿ, ಅರವತ್ತೊಂದರಾಚೆಗೂ ಇದೇ ಮುಂದುವರೆದರೆ ಕಷ್ಟ ಅಂದುಕೊಂಡು ತಾನೇ ಅಖಾಡಕ್ಕಿಳಿಯುವ ಮಗಳು, ಇನ್ನೇನು ಸಂಬಂಧವೊಂದು ಕುದುರಿಕೊಂಡು ಗಟ್ಟಿಮೇಳ ಮೊಳಗುತ್ತದೆ ಅಂದುಕೊಂಡಾಗಲೇ ಎದುರಾಗೋ ವರದಕ್ಷಿಣೆಯೆಂಬ ಪಿಡುಗಿನ ಅಪಸ್ವರ… ಇಷ್ಟರ ಸುತ್ತಾ ಕಥೆ ಮಜವಾಗಿಯೇ ಸುತ್ತುತ್ತದೆ. ಹೆತ್ತವರ ಪರದಾಟಕ್ಕಿಂತಲೂ ಇಡೀ ಕಥಾ ನಾಯಕಿ ಭಾಗ್ಯಳ ಸುತ್ತಲೇ ಪ್ರದಕ್ಷಿಣೆ ಹಾಕುತ್ತದೆ. ಈ ಪಾತ್ರದಲ್ಲಿ ಶೀತಲ್ ಶೆಟ್ಟಿ ಸಂಪೂರ್ಣವಾಗಿ ಸಮರ್ಪಿಸಿಕೊಂಡಂತೆ ನಟಿಸಿದ್ದಾರೆ.

ತಂದೆ ತಾಯಿ ನೋಡಿದ ಪ್ರತೀ ಸಂಬಂಧವೂ ನಾನಾ ಕಾರಣಗಳಿಂದಾಗಿ ಗೋತಾ ಹೊಡೆಯುತ್ತಿರುತ್ತದೆ. ಇದಕ್ಕೆ ಪ್ರಧಾನ ಕಾರಣ ವರದಕ್ಷಿಣೆಯೇ ಅಂದುಕೊಂಡ ನಾಯಕಿ ತಾನೇ ಮದುವೆ ಬ್ರೋಕರ್ ಕೆಲಸಕ್ಕಿಳಿಯುತ್ತಾಳೆ. ಅಲ್ಲಿಂದ ಹುಟ್ಟಿದ ಕಾಸನ್ನು ವರದಕ್ಷಿಣೆಗೆ ಸುರಿದಾದರೂ ಕಂಕಣ ಭಾಗ್ಯ ಕುದುರಿಸಿಕೊಳ್ಳೋ ಇರಾದೆ ಭಾಗ್ಯಾಳದ್ದು. ಇದ್ಯಾವುದೂ ಫಲ ನೀಡದಿದ್ದಾಗ ಪ್ರೀತಿಸಿ ಮದುವೆಯಾಗೋ ನಿರ್ಧಾರ. ಅದಕ್ಕೆ ಹೆತ್ತವರ ಸಪೋರ್ಟು. ಸಾವಿರ ಸುಳ್ಳು ಹೇಳಿ ಒಂದು ಮಾದುವೆ ಮಾಡುವ ಗಾದೆಗೆ ತಕ್ಕುದಾದ ನವರಂಗೀ ನಾಟಕ… ಕಡೆಗೂ ಭಾಗ್ಯಾಳಿಗೆ ಮದುವೆಯ ಯೋಗ ಕೂಡಿ ಬರುತ್ತದಾ? ಆಕೆ ಪ್ರೀತಿಸಿ ವೈವಾಹಿಕ ಜೀವನಕ್ಕೆ ಕಾಲಿಡುತ್ತಾಳಾ? ಈ ನಡುವೆ ಎದುರಾಗೋ ಟ್ವಿಸ್ಟುಗಳೇನು ಎಂಬ ಕುತೂಹಲವನ್ನೆಲ್ಲ ಚಿತ್ರಮಂದಿರದಲ್ಲಿಯೇ ತಣಿಸಿಕೊಳ್ಳೋದೊಳಿತು.

ಎಲ್ಲ ಪಾತ್ರಗಳನ್ನೂ ಕೂಡಾ ಕಥೆಯ ಓಘಕ್ಕೆ, ತಮ್ಮ ಉದ್ದೇಶಕ್ಕೆ ತಕ್ಕುದಾಗಿ ನಿರ್ದೇಶಕ ರಾಕೇಶ್ ಪಳಗಿಸಿಕೊಂಡಿದ್ದಾರೆ. ಭಾಗ್ಯ ಎಂಬ ನಟನೆ ಬೇಡುವ ಕಥಾ ನಾಯಕಿಯ ಪಾತ್ರವನ್ನು ಶೀತಲ್ ಶೆಟ್ಟಿ ಸಲೀಸಾಗಿ ಅಭಿನಯಿಸಿದ್ದಾರೆ. ಇಷ್ಟೂ ಚಿತ್ರಗಳಿಗೆ ಹೋಲಿಸಿ ನೋಡಿದರೆ ನಟಿಯಾಗಿ ಶೀತಲ್ ಮತ್ತಷ್ಟು ಪ್ರಬುದ್ಧವಾಗಿ ರೂಪುಗೊಂಡಿದ್ದಾರೆ. ಪೋಷಕ ಪಾತ್ರಗಳಲ್ಲಿ ಕೃಷ್ಣ ಅಡಿಗ ಮತ್ತು ಹರಿಣಿಯವರ ಅಭಿನಯ ಮನಸು ಮುಟ್ಟುವಂತಿದೆ. ಎಲ್ಲ ಪರಿಸ್ಥಿತಿಗಳನ್ನೂ ನಗುವಿನ ಮೂಲಕವೇ ನಿಭಾಯಿಸಬೇಕೆಂಬ ನಿರ್ದೇಶಕರ ನಿರ್ಧಾರ ಅಲ್ಲಲ್ಲಿ ದೃಷ್ಯಗಳ ಪರಿಣಾಮಗಳನ್ನು ತುಸು ತಗ್ಗಿಸಿವೆಯಾದರೂ ಪತಿಬೇಕು ಡಾಟ್ ಕಾಮ್ ಚಿತ್ರ ಆಹ್ಲಾದಕಾರಿ ಅನುಭವವೊಂದನ್ನು ಪ್ರತೀ ಪ್ರೇಕ್ಷಕರಲ್ಲಿಯೂ ಹುಟ್ಟಿಸುತ್ತದೆ.

ಹಾಡುಗಳು, ಹಿನ್ನೆಲೆ ಸಂಗೀತ ಮತ್ತು ಛಾಯಾಗ್ರಹಣ ಸೇರಿದಂತೆ ಎಲ್ಲವೂ ಒಂದಕ್ಕೊಂದು ಪೂರಕವಾಗಿವೆ. ಕಥೆ ಮಧ್ಯಮ ವರ್ಗದ್ದೇ ಆದರೂ ಅದರ ಭಾವಗಳು ಎಲ್ಲರನ್ನೂ ಸೆಳೆಯುವಂತಿವೆ.

Continue Reading

Trending

Copyright © 2018 Cinibuzz