ಗಿರ್ ಗಿಟ್ಲೆ ಚಿತ್ರದ ಮೂಲಕ ಮತ್ತೋರ್ವ ಭಿನ್ನ ಆಲೋಚನೆಯ ಪ್ರತಿಭಾವಂತ ನಿರ್ದೇಶರ ಆಗಮನವಾಗಿದೆ. ಈಗಾಗಲೇ ಬಿಡುಗಡೆಗೊಂಡಿರೋ ಟ್ರೈಲರ್, ಪ್ರೋಮೋಗಳ ಮೂಲಕವೇ ನಿರ್ದೇಶಕ ರವಿಕಿರಣ್ ಅಂಥಾದ್ದೊಂದು ಭರವಸೆಗೆ ಕಾರಣರಾಗಿದ್ದಾರೆ. ಇದೇ ಮಾರ್ಚ್ 15ರಂದು ಗಿರ್ ಗಿಟ್ಲೆ ಬಿಡುಗಡೆಯಾಗುತ್ತಿದೆ. ಎತ್ತ ನೋಡಿದರೂ ಈ ಚಿತ್ರದತ್ತ ಪಾಸಿಟೀವ್ ವಾತಾವರಣವೇ ಇದೆ. ಇಂತಾ ವಾತಾವರಣ ಹುಟ್ಟಿಕೊಂಡಿದ್ದರ ಹಿಂದೆ ನಿರ್ದೇಶಕರ ರವಿಕಿರಣ್ ಅವರ ಅಖಂಡ ಆರು ವರ್ಷಗಳ ವ್ರತದಂಥಾ ಕೆಲಸ, ಕನಸುಗಳಿವೆ ಅನ್ನೋದು ಬಹುತೇಕರಿಗೆ ಗೊತ್ತಿರಲಿಕ್ಕಿಲ್ಲ.
ತುಂಬಾ ಕನಸಿಟ್ಟುಕೊಂಡು ರವಿಕಿರಣ್ ಅವರು ರೂಪಿಸಿದ್ದ ಕಥೆ, ಚಿತ್ರಕಥೆಯನ್ನ ಈ ಸಿನಿಮಾ ಹೊಂದಿದೆ. ಆದರೆ ಆರಂಭದಲ್ಲಿಯೇ ಕೆಲ ಮಂದಿಯ ಶೋಕಿಯ ಕಾರಣದಿಂದ ರವಿಕಿರಣ್ ಅವರಿಗೆ ಹಿನ್ನಡೆಯಾಗಿತ್ತು. ಯಾರೋ ಮಾಡಿದ ತಪ್ಪಿನಿಂದ ಆರಂಭವಾಗಿದ್ದ ಈ ಚಿತ್ರ ನಿಂತು ಹೋಗಿತ್ತು.
ಅದಾದ ನಂತರದಲ್ಲಿ ರವಿಕಿರಣ್ ಪಡಬಾರದ ಕಷ್ಟಗಳನ್ನೆಲ್ಲ ಪಟ್ಟಿದ್ದರು. ನಿರ್ಮಾಪಕರ ಮನೆ ಬಾಗಿಲಿಗೆ ಬರೋಬ್ಬರಿ ಮೂರುವರೆ ವರ್ಷಗಳ ಕಾಲ ಅಲೆದಾಡಿದ್ದರು. ಆದರೆ ಈ ಅವಧಿಯಲ್ಲಾದ ಆಘಾತದಿಂದ ಅವರೇನೂ ಕುಗ್ಗಿ ಹೋಗಲಿಲ್ಲ. ಬದಲಾಗಿ ಆ ಅವಧಿಯನ್ನೆಲ್ಲ ಕಥೆಯನ್ನು ತಿದ್ದಿ ತೀಡುತ್ತಾ ಮತ್ತಷ್ಟು ಹೊಳಪುಗೊಳಿಸಲೆಂದೇ ಮೀಸಲಾಗಿಟ್ಟಿದ್ದರು. ಆ ಕಾರಣದಿಂದಲೇ ಈ ಚಿತ್ರವೀಗ ಎಲ್ಲರ ಗಮನವನ್ನೂ ಸೆಳೆದುಕೊಂಡಿದೆ.
