ಅದೊಂದು ಅದ್ದೂರಿ ಮದುವೆ ಮನೆ… ಅಲ್ಲಿ ಸುಂದರ ಅಲಂಕಾರ, ಊಟದ ಪರಿಮಳ, ಬಂಧು-ಬಳಗದ ಸಂಭ್ರಮ. ಆದರೆ ಇದರ ಮಧ್ಯೆ ಎಣ್ಣೆ ಪಾರ್ಟಿಯ ನಶೆ ಏರಿದರೆ ಹೇಗಿರುತ್ತದೆ? ಗಲಾಟೆ ಗದ್ದಲ, ಕೇಕೆ, ಕುಣಿತಗಳೊಂದಿಗೆ ಇಡೀ ಕಥೆಯೇ ತಲೆಕೆಳಗಾದರೆ ಹೇಗೆ? ಸದ್ಯ ಸ್ಯಾಂಡಲ್‌ವುಡ್‌ನಲ್ಲಿ ಅಂತಹದ್ದೇ ಒಂದು ಸಖತ್ ಮಜಾಸುದ್ದಿ ಧೂಳೆಬ್ಬಿಸುತ್ತಿದೆ. ಚಯನ್ ಶೆಟ್ಟಿ ನಿರ್ದೇಶನದ, ಕರಾವಳಿಯ ಪ್ರತಿಭೆಗಳ ತಂಗಾಮವಾಗಿ ಮೂಡಿಬಂದಿರುವ ಬಹುನಿರೀಕ್ಷಿತ ‘ಮ್ಯಾರೇಜ್ ಪಾರ್ಟಿ’ ಚಿತ್ರದ ‘ಗಲಾಟೆ’ ವೀಡಿಯೊ ಸಾಂಗ್ ಈಗ ರಿಲೀಸ್ ಆಗಿ ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದೆ!
ಇದೇ ಡಿಸೆಂಬರ್ 4ರಂದು ರಾಜ್ಯಾದ್ಯಂತ ಅದ್ದೂರಿಯಾಗಿ ತೆರೆಕಾಣಲು ಸಜ್ಜಾಗಿರುವ ಈ ಚಿತ್ರದ ಮೊದಲ ಪತ್ರಿಕಾಗೋಷ್ಠಿ ಇತ್ತೀಚೆಗೆ ತುಂಬಾನೇ ಕಳೆಗಟ್ಟಿತ್ತು. ಹಾಡಿನ ಬಿಡುಗಡೆ ನೆಪದಲ್ಲಿ ಸೇರಿದ ಇಡೀ ಚಿತ್ರತಂಡ, ಸಿನಿಮಾದ ಮಜುವಿನ ಕ್ಷಣಗಳನ್ನು ಮಾಧ್ಯಮದವರೊಂದಿಗೆ ಹಂಚಿಕೊಳ್ಳುವ ಮೂಲಕ ಸಿನಿಪ್ರಿಯರಲ್ಲಿ ಕೌತುಕ ಮೂಡಿಸಿದೆ.
ಚಿತ್ರದ ಬಗ್ಗೆ ಬಾಯ್‌ಬಿಟ್ಟ ನಿರ್ದೇಶಕ ಚಯನ್ ಶೆಟ್ಟಿ, ಸಿನಿಮಾದ ಅಸಲಿ ಗುಟ್ಟನ್ನು ಈ ರೀತಿ ಬಿಚ್ಚಿಟ್ಟಿದ್ದಾರೆ: “ಇದು ಹೆಸರೇ ಸೂಚಿಸುವಂತೆ ಮದುವೆಯೊಂದರ ಸುತ್ತ ಘಟಿಸುವ ಕಥೆ ಹೌದು, ಹಾಗಂತ ಇದರಲ್ಲಿ ಕೇವಲ ಮದುವೆ ಮಾತ್ರ ಇಲ್ಲ; ಇದರೊಳಗೆ ಕೆಲ ರೋಚಕ ಹಾರರ್ ಅಂಶಗಳೂ ಇವೆ. ಮ್ಯಾರೇಜ್ ಪಾರ್ಟಿ ಅಂದಾಕ್ಷಣ ಇದು ಸಂಪೂರ್ಣವಾಗಿ ಮದುವೆ ಸುತ್ತಲೇ ಸುತ್ತುವ ಸರಳ ಕಥೆ ಅಂದುಕೊಳ್ಳಬೇಕಿಲ್ಲ, ಇದರೊಳಗೆ ಬೇರೆ ಬೇರೆ ರೋಚಕ ಕಥನಗಳೂ ಇದ್ದಾವೆ” ಎಂದು ಸಸ್ಪೆನ್ಸ್ ಉಳಿಸಿದ್ದಾರೆ.
ಈ ಚಿತ್ರದ ಮೂಲಕ ನಿರ್ಮಾಪಕರಾಗಿ ಬಂಡವಾಳ ಹೂಡಿರುವ ಸಂತೋಷ್ ವಿ ಅವರಿಗೆ ಇದು ಚೊಚ್ಚಲ ಹೆಜ್ಜೆ. ಮೊದಲ ಪ್ರಯತ್ನದಲ್ಲೇ ಇಷ್ಟು ದೊಡ್ಡ ಪ್ರಾಜೆಕ್ಟ್ ಕೈಗೆತ್ತಿಕೊಂಡಿರುವ ಅವರು, “ನಿರ್ಮಾಪಕನಾಗಿ ಇದು ನನ್ನ ಮೊದಲ ಸಿನಿಮಾ. ಮೊದಲ ಹೆಜ್ಜೆಯಲ್ಲಿಯೇ ಅತ್ಯಂತ ಅಚ್ಚುಕಟ್ಟಾಗಿ, ಜವಾಬ್ದಾರಿಯುತವಾಗಿ ಕೆಲಸ ಮಾಡುವ ಚಯನ್ ಶೆಟ್ಟಿ ಅವರಂತಹ ನಿರ್ದೇಶಕ ಸಿಕ್ಕಿರೋದು ನನ್ನ ದೊಡ್ಡ ಹೆಮ್ಮೆ. ಇಡೀ ತಂತ್ರಜ್ಞರು ಮತ್ತು ಕಲಾವಿದರ ಅದ್ಭುತ ಸಾಥ್‌ನಿಂದ ಸಿನಿಮಾ ಸ್ಕ್ರೀನ್ ಮೇಲೆ ಅದ್ಭುತವಾಗಿ ಮೂಡಿಬಂದಿದೆ. ದಯವಿಟ್ಟು ಎಲ್ಲರೂ ಥಿಯೇಟರ್‌ಗೆ ಬಂದು ನಮ್ಮ ಈ ಪ್ರಯತ್ನವನ್ನು ಪ್ರೋತ್ಸಾಹಿಸಿ” ಎಂದು ಪ್ರೇಕ್ಷಕರಲ್ಲಿ ಮನವಿ ಮಾಡಿಕೊಂಡಿದ್ದಾರೆ.
ಮದುವೆ ಮನೆಯ ಗಮ್ಮತ್ತಿಗೆ ತಕ್ಕಂತೆ ಮೂಡಿಬಂದಿರುವ ಈ ‘ಗಲಾಟೆ’ ಹಾಡು ಪ್ರೇಕ್ಷಕರನ್ನು ಕುಣಿದು ಕುಪ್ಪಳಿಸುವಂತೆ ಮಾಡಿದೆ. ಮದುವೆ ಮನೆಯಲ್ಲಿ ಎಣ್ಣೆ ಪಾರ್ಟಿಯ ಅಮೋಘ ನಶೆಯನ್ನು ಮೈತುಂಬಿಕೊಂಡಂತಿರುವ ಈ ಹಾಡಿಗೆ ಗಾಯಕ ಪ್ರಣವಮ್ ಸಸಿ ತಮ್ಮ ಗಡಸು ಹಾಗೂ ಜೋಶ್‌ಭರಿತ ಧ್ವನಿಯಿಂದ ಜೀವ ತುಂಬಿದ್ದಾರೆ. ತ್ರಿಲೋಕ್ ತ್ರಿವಿಕ್ರಮ ಅವರ ಕ್ಯಾಚಿ ಸಾಹಿತ್ಯಕ್ಕೆ ರಿತ್ವಿಕ್ ಮುರಳೀಧರ್ ಅವರ ಮ್ಯೂಸಿಕ್ ಮ್ಯಾಜಿಕ್ ವರ್ಕೌಟ್ ಆಗಿದ್ದು, ಹಲವಾರು ರಿಯಾಲಿಟಿ ಶೋಗಳ ಮೂಲಕ ಮನೆಮಾತಾಗಿರುವ ಮುರುಗ ಮಾಸ್ಟರ್ ಅವರ ನೃತ್ಯ ನಿರ್ದೇಶನ ಈ ಹಾಡಿಗೆ ಮತ್ತಷ್ಟು ಕಳೆ ತಂದಿದೆ.
ಇದೇ ಹಾಡಿನಲ್ಲಿ ಭರ್ಜರಿಯಾಗಿ ಹೆಜ್ಜೆ ಹಾಕಿ ರಂಗೇರಿಸಿರುವ ಕಾಮಿಡಿ ಕಿಂಗ್ ನವೀನ್ ಡಿ ಪಡೀಲ್, ನಗುವಿನ ಸರದಾರ ಪ್ರಕಾಶ್ ತುಮಿನಾಡು ಹಾಗೂ ಮೈಮ್ ರಾಮ್‌ದಾಸ್ ಪತ್ರಿಕಾಗೋಷ್ಠಿಯಲ್ಲಿ ತಮ್ಮ ಶೂಟಿಂಗ್ ಅನುಭವಗಳನ್ನು ಮೆಲುಕು ಹಾಕಿದರು. ಚಿತ್ರೀಕರಣದ ದಿನಗಳಲ್ಲಿ ಸೆಟ್‌ನಲ್ಲಿ ನಡೆದ ಮಜವಾದ ತುಂಟಾಟದ ಕ್ಷಣಗಳನ್ನು ನೆನಪಿಸಿಕೊಳ್ಳುತ್ತಾ, ಈ ಸಿನಿಮಾ ಬಾಕ್ಸ್ ಆಫೀಸಿನಲ್ಲಿ ದೊಡ್ಡ ಮಟ್ಟದ ಗೆಲುವು ಕಾಣಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಈ ಹಿಂದೆ ‘ರಾಜ್ ಸೌಂಡ್ಸ್ ಆಂಡ್ ಲೈಟ್ಸ್’ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಗಮನ ಸೆಳೆದಿರುವ ವಿನೀತ್ ಈ ಚಿತ್ರದ ನಾಯಕನಾಗಿ ಬಣ್ಣ ಹಚ್ಚಿದ್ದಾರೆ. ಶ್ರೀ ವಾರಾಹಿ ಫಿಲಂಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣವಾಗಿರುವ ಈ ಚಿತ್ರದ ತಾಂತ್ರಿಕ ಬಳಗವೂ ಸ್ಟ್ರಾಂಗ್ ಆಗಿದೆ. ಶ್ರೀಕಾಂತ್ ಕ್ಯಾಮೆರಾ ಕಣ್ಣುಗಳು ಕರಾವಳಿಯ ಸೊಬಗನ್ನು ಹಾಗೂ ಮದುವೆ ಮನೆಯ ಅಬ್ಬರವನ್ನು ಅದ್ಭುತವಾಗಿ ಸೆರೆಹಿಡಿದಿದ್ದರೆ, ‘ಸು ಫ್ರಂ ಸೋ’ ಖ್ಯಾತಿಯ ನಿತಿನ್ ಶೆಟ್ಟಿ ಸಂಕಲನ ಸಿನಿಮಾಗೆ ಇನ್ನಷ್ಟು ವೇಗ ನೀಡಿದೆ. ಪ್ರಮೋದ್ ಮರವಂತೆ ಮತ್ತು ತ್ರಿಲೋಕ್ ತ್ರಿವಿಕ್ರಮ ಅವರ ಸಾಹಿತ್ಯ ಚಿತ್ರದ ಪ್ಲಸ್ ಪಾಯಿಂಟ್ ಎನಿಸಲಿದೆ.
ನವೀನ್ ಡಿ ಪಡೀಲ್, ಪ್ರಕಾಶ್ ತುಮಿನಾಡು, ದೀಪಕ್ ರೈ, ರಕ್ಷಿತಾ, ನಮಿತಾ ಕಿರಣ್, ರಾಮ್‌ದಾಸ್, ರಘು ಪಾಂಡೇಶ್ವರ, ಪುಷ್ಪರಾಜ್ ಬೋಳಾರ್, ಜ್ಯೋತಿ ಶೆಟ್ಟಿ, ರಾಧಾಕೃಷ್ಣ, ಪಿಡಿ ಸತೀಶ್, ಭೀಮ್ ರಾವ್ ವಾಸ್ಟರ್ ಸೇರಿದಂತೆ ನಗುವಿನ ದೈತ್ಯರೇ ಈ ಸಿನಿಮಾದಲ್ಲಿದ್ದಾರೆ. ವಿಶೇಷವೆಂದರೆ, ಈ ಹಂಗಾಮಿ ಚಿತ್ರವು ಕೇವಲ ಕನ್ನಡ ಮಾತ್ರವಲ್ಲದೆ ಮಲಯಾಳಂ ಭಾಷೆಯಲ್ಲೂ ಏಕಕಾಲಕ್ಕೆ ತೆರೆಕಾಣುತ್ತಿರುವುದು ವಿಶೇಷ.
ಸದ್ಯ ಸಮಸ್ತ ಕೆಲಸ ಕಾರ್ಯಗಳನ್ನು ಮುಗಿಸಿ ತೆರೆಗೆ ಬರಲು ಸನ್ನದ್ಧವಾಗಿರುವ ‘ಮ್ಯಾರೇಜ್ ಪಾರ್ಟಿ’ಯ ಗಲಾಟೆ ಹಾಡು ಸಿನಿಮಾದ ಮೇಲಿನ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದೆ. ಡಿಸೆಂಬರ್ 4ರಂದು ಈ ಗಲಾಟೆ ಥಿಯೇಟರ್‌ಗಳಲ್ಲಿ ಯಾವ ಮಟ್ಟಿಗೆ ಸದ್ದು ಮಾಡಲಿದೆ ಎಂಬುದನ್ನು ಕಾದು ನೋಡಬೇಕಿದೆ!
