ಸೂಪರ್ಸ್ಟಾರ್ ರಜನಿಕಾಂತ್ ಅವರ 171ನೇ ಚಿತ್ರ “ಕೂಲಿ” ಬಗ್ಗೆ ದಿನದಿಂದ ದಿನಕ್ಕೆ ಕುತೂಹಲ ಹೆಚ್ಚುತ್ತಿದೆ. ಲೋಕೇಶ್ ಕನಕರಾಜ್ ನಿರ್ದೇಶನದ, ಸನ್ ಪಿಕ್ಚರ್ಸ್ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಅನಿರುದ್ಧ್ ರವಿಚಂದರ್ ಸಂಗೀತ ಸಂಯೋಜಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ಸತ್ಯರಾಜ್, ನಾಗಾರ್ಜುನ, ಉಪೇಂದ್ರ, ಶ್ರುತಿ ಹಾಸನ್, ಮತ್ತು ಸೌಬಿನ್ ಶಾಹಿರ್ ಸೇರಿದಂತೆ ಘಟಾನುಘಟಿ ತಾರಾಬಳಗವಿದೆ.
ಈ ಬಹು ನಿರೀಕ್ಷಿತ ಚಿತ್ರ ಅಕ್ಟೋಬರ್ 14 ರಂದು ತೆರೆಗೆ ಬರಲು ಸಿದ್ಧವಾಗಿದೆ. ಇತ್ತೀಚೆಗೆ ಕೇರಳದಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ, ನಟ ಸೌಬಿನ್ ಶಾಹಿರ್ ರಜನಿಕಾಂತ್ ಅವರೊಂದಿಗೆ ನಟಿಸಿದ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.
“ಚಿತ್ರೀಕರಣದ ಮೊದಲ ದಿನ ರಜನಿಕಾಂತ್ ಅವರ ಮುಂದೆ ನಟಿಸಲು ನಾನು ತುಂಬಾ ನರ್ವಸ್ ಆಗಿದ್ದೆ,” ಎಂದು ಸೌಬಿನ್ ಹೇಳಿದ್ದಾರೆ. “ಆದರೆ ಅವರು ವಾತಾವರಣವನ್ನು ತುಂಬಾ ಸಹಜವಾಗಿಸಿದರು. ಅವರ ಸರಳತೆ ಮತ್ತು ವಿಶಿಷ್ಟ ಶೈಲಿ ನಿಜಕ್ಕೂ ಸ್ಫೂರ್ತಿದಾಯಕವಾಗಿತ್ತು. ಅವರು ಬಟ್ಟೆ ಬದಲಾಯಿಸಲು ಅಥವಾ ಊಟ ಮಾಡಲು ಮಾತ್ರ ತಮ್ಮ ಕ್ಯಾರವಾನ್ಗೆ ಹೋಗುತ್ತಿದ್ದರು; ಉಳಿದ ಸಮಯ ಸೆಟ್ನಲ್ಲೇ ಇದ್ದು ಶೂಟಿಂಗ್ ಮೇಲೆ ಸಂಪೂರ್ಣ ಗಮನ ಹರಿಸುತ್ತಿದ್ದರು. ಅವರ ಸಮರ್ಪಣಾ ಭಾವ ನನ್ನಂತಹ ನಟರಿಗೆ ದೊಡ್ಡ ಶಕ್ತಿಯನ್ನು ನೀಡಿತು.”
ಸೂಪರ್ಸ್ಟಾರ್ ರಜನಿಕಾಂತ್ ಅವರ ಕಠಿಣ ಪರಿಶ್ರಮ ಮತ್ತು ಸರಳತೆಗೆ ಸೌಬಿನ್ ಶಾಹಿರ್ ಫಿದಾ ಆಗಿದ್ದಾರೆ.
